Шавэ и щея, тердён против Сатана!

1, 2. а) Васо и тэрнэ христианоря вицэлэн и война кай о Сатана и кай и бэнга? (Диқэн и картинка англа статья.) б) Пала со амэ подаса дума андэ кадэя статья?

О АПОСТОЛО Павло ԥэндя пала христианоря, кай вонэ андэ дэсо шонпэ пэ римски воиноря. Амэ мараспэ андэ война. И хоть амарэ вороӷонэн на дицол, вонэ па чачимастэ исин. Амэ мараспэ най лэ манушэнца, амэ мараспэ лэ Сатанаса и лэ бэнгэнца. Вонэ фартэ лашэ воиноря. Вонэ терэн найлашимос фартэ бут бэрша. И важ када амэнди дэкала здэлпэ, кай амэ на вицэласа кадэя война. Ай лэ тэрнэ манушэнди када здэлпэ инке май фартэ. Ай вижала тэ вицэлэн кай и тэрнэ мануша и война кай кадэла фартэ холинатирэ и хохавнэ вороӷоря? Да, вижала. И тэрнэ мануша уже вицэлэн и инке вицэлэна май англэ. Васо лэндэ када вижал? Важ кода кай о Иегова дэл лэнди зор. Но када инке най вся. Сар и воиноря, савэн драго сытярдэ, лэн пэр пэстэ и йда, кай тэ марэнпэ, кадя же и тэрнэ мануша лэн пэр пэстэ вся и йда, сави лэнди дя о Дэл, кай тэ марэнпэ. (Адиносар Эфесянам 6:10—12a).

² Кала о Павло ԥэндя пала воино, во гиндояс пала римски воиноря, савэ ԥиравэнас йда, андэ сави марэнпэ (Деян. 28:16). Подаса дума пала кода, андэр со слинэ утидэ кадэла воиноря. Инке амэ подаса дума, васо дэсавэ тэрнэ манушэнди ԥарэс тэ ԥиравэн и йда, сави дя о Дэл, андэ сави марэнпэ. Кадяжэ подаса дума, саво лашимос кадэлэстар, и сар кадэя йда поможый лэнди.

«ТЕРДЁН АНДО ЧАЧИМОС, САВО ЗАԤАНГЛО, САР И КУЩИК»

3, 4. Васо о чачимос анда лэ Дэвлэско алав, сар и римско военно кущик?

³ Адиносар Эфесянам 6:14b. Пэ римско военно кущик слинэ которора анда састри, савэ фэринас о йло. По воино сас гад анда састри, саво фэрий. Ай и кущик сас обԥангли па кадэва гад. О гад сас фартэ ԥаро, ай и кущик ритярэлас о гад, кай во фартэ тэ на тасавэл пэ пиқэ. Пэ кущик слинэ састря, пэ савэ амблавэнас о мечо и шури. Сар и кущик сас драго заԥангли, о воино на даралас тэ жал тэ марэлпэ.

⁴ Сар и кущик, о чачимос анда лэ Дэвлэско алав фэрий амэн. Состар фэрий? Кодэлэстар, сости сытярэн и хохавнэ веры (Иоан. 8:31, 32; 1 Иоан. 4:1). Сар амэ май фартэ любисарас о чачимос анда лэ Дэвлэско алав, тоди амэнди май вушэро авэла тэ ритярас лэ Дэвлэстирэ законоря. Када сар тэ ԥиравас «по колин и чачунэ законоря» (Пс. 111:7, 8; 1 Иоан. 5:3). Инке, сар амэ май драго полас о чачимос анда Библия, амэ май драго зашаспэ пала кадэва чачимос англа амарэ вороӷоря (1 Пет. 3:15).

5. Васо амэ трэбуй никала тэ на хохавас?

⁵ О чачимос анда лэ Дэвлэско алав фартэ трэбуй амэнди. Амэ жувас кадя, сар пистромэ андэ Библия, и никала на хохавас. Васо амэ на хохавас? Важ кода кай кадэлэса залэлпэ о Сатана. Лэ хохаимастар вэрыто кодэлэсти, ко хохавэл и кодэлэсти, ко андэ када патял (Иоан. 8:44). Важ када, хоть амэ и найсовершенни, амэ всаек стас зор, кай никала тэ на хохавас (Эф. 4:25). Но када найвушэро. Акэ, со ԥэнэн и Абигейл, савяти 18 бэрш: «Дэкала манди здэлпэ, кай о чачимос фэдэр тэ на ԥэнав. Важ кода кай, кала хохавэс, дэкала обжас о ԥаримос». Но и Абигейл всаек никала на хохавэл. Васо? Вой ԥэнэн: «Кала мэ ԥэнав о чачимос, мандэ вужо ди англа Иегова. Ай инке мэрно дад и дэй, ай кадяжэ мэрнэ друӷоря ӷанэн, кай манди исин патяимос». И Виктория, савяти 23 бэрш ԥэнэн: «Сар тумэ на ашавэн кода, андэр со патян, и ԥэнэн о чачимос, файма, тумэ даран, кай тумэндэ лэна тэ долэнпэ. Но тумэндэ всаек исин лашимос. Саво? Тумэнди май бут патян, тумэ ашэн май пашэ каринг о Иегова и тумэ затерэн инке май бут патив англа кодэла, ко тумэн любий». Амэ полям, пэ скати када трэбуй, никала тэ на злас о «чачимос, саво заԥангло, сар и кущик».

«ЛЭН ПО КОЛИН И ЧАЧУНЭ ЗАКОНОРЯ»

6, 7. Васо пэ Иеговастирэ чачунэ законоря ԥэнэса, кай вонэ, сар о гад анда састри?

⁶ Акэ, со лэлас пэр пэстэ о римско воино. Во лэлас пэр пэстэ гад анда састри. Кадэва гад стидэнас анда саструнэ котора и стонас ригаса, кай вонэ тэ пашлён набут ек пэ ек. Найбарэ котора слинэ сбандярдэ, кай тэ ушаравэн о колин, о йло и рига. Найбарэ котора сԥандэнас ек еқэса пряшкэнца и которэнца анда ӷаравля. И пиқэ ушаравэнас барэ котора анда састри и вонэ кадяжэ слинэ сԥанглэ пряшкэнца и которэнца анда ӷаравля. Андэ кацаво саструно гад лэ воиности сас ԥарэс тэ ԥирэл. И лэсти трэбуй сас кажно разо тэ продиқэл, драго сԥанглэ машкар пэстэ и саструнэ котора чи най. И всаек кадэва гад фэрияс лэ воиноско ди и о йло ла шурятар и лэ мечостар.

⁷ Чачунэ лэ Дэвлэстирэ законоря фэрин кода, со амэндэ андо ди (Прит. 4:23). О воино никала на парудоп о гад анда састри по гад, саво стердо анда варисо най кацаво састо. Кадяжэ и амэ никала на паруваса лэ Дэвлэстирэ чачунэ законоря пэ пэстирэ. Амэндэ нинай скати годи, сар кай о Иегова и важ када амарэ законоря на фэрина амэн кадя, сар лэ Иеговастирэ (Прит. 3:5, 6). Важ када амэнди трэбуй кажно разо тэ продиқас, фэрисардо амаро ди лэ гадэса анда састри, саво дя о Иегова чи най.

8. Васо амэ трэбуй тэ ритярас лэ Иеговастирэ законоря?

⁸ Дэкала тумэ гиндон, кай лэ Дэвлэстирэ законоря фартэ ԥарэ и на дэн тумэнди тэ терэн, со тумэ камэн. О ԥрал Дэниело савэсти 21 бэрш, росԥэнэн: «И учителёря и кодэла, каса мэ сытювавас, асанаспэ мандар, важ кода кай мэ ритярав лэ Дэвлэстирэ законоря. Сас время, кала мэ умэклэм и вас». Со лэсти дя зор? О Дэниело ԥэнэн: «Мэ полэм, саво лашимос кодэлэстар, кай мэ ритярав лэ Иеговастирэ законоря. Дэсавэ анда кодэла мануша, савэнца мэ проандяравас и время, ашэлэ наркоманоря, авэр мэклэ тэ сытён андэ школа. Ԥарэс сас тэ диқав, кай лэндири жизня ашэля бибахтали. О Иегова па чачимастэ амэн фэрий». И Мадисон, савяти 15 бэрш, росԥэнэн: «Манди найвушэро тэ ритярав лэ Дэвлэстирэ законоря. Манди ԥарэс тэ на терав кода, со терэн мэрнэ ровэсникоря и пала со вонэ гиндон, кай када прикольно и драго». Со лати дэл зор? И Мадисон ԥэнэн: «Мэ ритярав андо шэро, кай мэ лэ Иеговаско мануш. И кала манди камэлпэ тэ стерав кода, со нащи, када ԥэнэса, сар и стрелы, савэ мэкэл андэр мандэ о Сатана. Кала мэ вицэлав кадэя война, мэ лошали пэса».

«ЛЭН ПЭ ПЭРНЭ, КАЙ ТЭ АВЭЛ ТУМЭНДЭ, СО ТЭ РОСԤЭНЭН ПАЛА ЛАЩИ ВЕСТЬ ВАЖ О ЛАШИМОС»

9—11. а) Со трэбуй тэ авэл пэ пэрнэ кай и христианоря, сар пэ пэрнэ кай и воиноря? б) Со поможыя, кай тэ авэл май вушэро тэ росԥэнас важ о Дэл?

⁹ Адиносар Эфесянам 6:15c. О римско воино на жалас тэ марэлпэ, сар лэстэ нисо на сас пэ пэрнэ. Кода, со о воино лэлас пэ пэрнэ, сас стердо анда трин ӷаравлицки котора, савэ стонас тала пэрно. Лэн стидэнас ек пэ ек и драго просувэнас. Кадэлэстар о пэрно тердёлас май састэс. Кода, со о воино лэлас пэ пэрнэ, драго и бут время ԥирадёласпэ.

¹⁰ Кода, со лэнас пэ пэрнэ и римски воиноря, поможыяс лэнди тэ вицэлэн и война. И христианоря, ԥэнэса, кадяжэ лэн пэ пэрнэ, сар и римски воиноря. Када лэнди поможый тэ росԥэнэн пала лащи весть важ о лашимос (Ис. 52:7; Рим. 10:15). Но всаек лэнди трэбуй сас тэ на даран тэ росԥэнэн о чачимос важ о Дэл. Акэ, со ԥэнэн о Бо, савэсти 20 бэрш: «Варикала мэ даравас тэ росԥэнав важ о Дэл кодэлэнди, каса мэ сытювавас андэ школа. Манди сас лажаво. Акана мэ полав, кай най состар сас тэ лажав и манди чалёл тэ росԥэнав важ о Дэл кодэлэнди, каса сытював».

¹¹ Лэ тэрнэ христианонэнди май вушэро тэ росԥэнэн важ о Дэл, кала вонэ май англал пала када погиндосардэ. Кала вонэ кадя терэн, вонэ на даран тэ росԥэнэн. Со тути поможыя, кай тэ росԥэнэс важ о Дэл. И Джулия, савяти 16 бэрш, росԥэнэн: «Мандэ андэ сумка вся время варисо исин анда амари литература. Инке мэ драго ашунав, кала кодэла, каса мэ сытював андэ школа, росԥэнэн, со гиндон и андэр со патян. Ай тоди мэ гиндосарав, со лэнди тэ росԥэнав. Кала мэ кадя терав, мандэ исин, со лэнди тэ росԥэнав. И мэ терав када кадя, кай тэ дожал каринг лэнго ди». И Макензи, савяти 23 бэрш, ԥэнэн: «Сар тумэ ковлэс обжанпэ аврэнца и камэн лэн тэ виашунэн, тумэ полэна, со лэнди прижалпэ тэ пэрэандярэн. Мэ адиносарав вся, со вимэкэл амари орӷанизация важ и тэрнэ мануша. Важ када мандэ исин, саво стихо анда Библия тэ сыкавав лэнди чи тэ сыкавав варисо па амаро интернет-ресурсо». Сар дицол па алава кадэлэ ԥэянди, кала драго гиндос, сар тэ росԥэнэс, андэр со патяс, тоди тутэ када драго вижала. Ԥэнэса, сар лэ воиности драго тэ ԥиравэл кода, со во лэл пэ пэрнэ, кадя и тути авэла драго тэ ԥиравэс кода, со ту лэс пэ пэрнэ.

«ПАТЯН ЛЭ ИЕГОВАСТИ, КАДА ТУМАРО БАРО ЩИТО»

12, 13. Савэ стрелы ягаса о Сатана мэкэл андэр мэндэ?

¹² Адиносар Эфесянам 6:16d. Кай о римско воино сас баро щито, саво сас пролунговато. Во фэрияс лэ воинос лэ пиқэндар жы кай и чанга. Во фэрияс лэс лэ мечонэндар и лэ стрелонэндар.

¹³ О Сатана мэкэл андар мэндэ и стрелы ягаса. Со када? Када о хохаимос важ о Иегова. О Сатана камэл, кай тумэ тэ гиндон, кай о Иегова тумэн на любий и кай тумэ екжэнэ и никасти на трэбуй. И Ида, савяти 19 бэрш гиндояс, кай вой екжэни и никасти на трэбуй. Акэ, со вой росԥэнэн: «Мэ гиндосаравас, кай лэ Иеговас нинай паша мандэ и кай во на камэл тэ авэл мэрнэ друӷоса». Со лати дэл зор? Вой ԥэнэн: «И собрании манди фартэ дэн зор. Варикала мэ ашавас мулком пэ собрания. Манди здэласпэ, кай нико на камэл тэ ашунэл, со мэ гиндосарав. Акана мэ гиндосарав, со ԥэнава пэ собрания и ваздав о вас пэ собрания най еқвар. Када найвушэро, но манди фэдэр, кала мэ када терав. Ай сар ман подритярэн и ԥрала и ԥэя! Сар прожал и собрания, мэ лэ одеса полав, кай о Иегова ман любий».

14. Со амэ полям анда кода, со росԥэндя и Ида?

¹⁴ О щито кай о римско воино на ашэл май баро чи май цыкно. Но анда кода, со росԥэндя и Ида, амэ полям, кай амаро щито парудёл. Када, кай дэкала амэ патяс май фартэ, ай дэкала най. Када жал кати амэндар (Матф. 14:31; 2 Фес. 1:3). Кай амаро щито тэ фэрий амэн, амэнди трэбуй тэ терас вся, кай амэ май фартэ тэ патяс лэ Иеговасти.

«И САСТРУНИ СТАДИ, КАЙ ТЭ ФЭРИНПЭ»

15, 16. Васо кода, кай англэ аштярас о лашимос када, сар и саструни стади?

¹⁵ Адиносар Эфесянам 6:17e. О римско воино ԥиравэлас и саструни стади. Кала во марэласпэ лэ вороӷонэнца, вой фэрияс о шэро, и кор и о муй. Кай и дэсавэ саструнэ стадя слинэ ручки, кай о воино дэкала тэ ритярэл ла андэ вас.

¹⁶ И саструни стади фэрияс лэ воиноско шэро. Кадяжэ, кала амэ аштярас англэ о лашимос, када фэрий и мудрость, сави амэндэ исин и сави трэбуй важ и амари жизня (1 Фес. 5:8; Прит. 3:21). Кала аштярас о лашимос, када дэл зор тэ на умэкас и вас и тэ на бистрас пала алава, савэ дя о Дэл (Пс. 27:1, 14; Деян. 24:15). Но, кай и саструни стади тэ фэрий амэн, амэнди трэбуй ла тэ ԥиравас по шэро, ай най андэ вас.

17, 18. а) Со терэл о Сатана, кай амэ тэ злас и саструни стади, сави фэрий? б) Андар со дицол, кай амэ на домэкас, кай о Сатана тэ дилярэл амэн?

¹⁷ Со терэл о Сатана, кай амэ тэ злас и саструни стади, сави фэрий? Погиндосарам, со сас лэ Иисусоса. О Сатана ӷанэнас, кай о Иисусо авэла царё пэ ԥув. Но лэ Иисусости трэбуй сас тэ аштярэл, дэкин на авэла и время, кала о Иегова стола лэс царёса. Но май англал о Иисусо трэбуй сас тэ пэрэандярэл о ԥаримос и тэ мэрэл. Важ када о Сатана ԥэндя лэ Иисусости, кай сар о Иисусо хоть еқвар тэлёла лэсти, во диноп лэсти кадэя власть катэ же (Луки 4:5—7). Андэ амари время о Сатана драго ӷанэн, кай андо нэво миро амэндэ авэла вся, со трэбуй важ амари жизня и авэла бут. Но амэнди инке трэбуй тэ аштярас и, файма, дэкала тэ пэрэандярас о ԥаримос. Важ када о Сатана заманий кодэлэса, кай тэ авэл амэндэ вся и бут уже акана. О Сатана на камэл, кай амэ тэ гиндосарас пала царство. Ай камэл, кай амэ спэрва тэ гиндосарас, со трэбуй важ амари жизня, тэ авэл када бут и йто (Матф. 6:31—33).

¹⁸ Сар и бут тэрнэ христианоря, и Киана, савяти 20 бэрш, на домэкэл, кай о Сатана ла тэ дилярэл. Вой росԥэнэн: «Мэ ӷанав, кай кати лэ Дэвлэско царство улэла вся амаро ԥаримос». Сар кода, кай и Киана аштярэл англэ о лашимос, дэл лати зор и май дур тэ гиндой и тэ терэл кадя, сар чалёл лэ Дэвлэсти? Вой росԥэнэн: «Кода, кай мэ англэ аштярав о лашимос, саво авэла андо раё пэ ԥув, дэл манди тэ сэрав, кай кода, со исин андэ кадэва миро, будэр на авэла. Мэ на став зор, кай тэ затерав барэ ловэ и тэ авав баро мануш пэ пэстири бути. Мэ отдав мэрно зор и время лэ Иеговасти, кай тэ терав лэстири дила».

«ЛЭ ДУХОСКО МЕЧО, КАДА ЛЭ ДЭВЛЭСКО АЛАВ»

19, 20. Со тэ терас, кай драго тэ ӷанас, савэ стихоря тэ ԥэрнавас и тэ росԥэнас пар лэндэ?

¹⁹ И римски воиноря марэнаспэ лэ мечонэнца, савэ слинэ по епаш метра. И римски воиноря фартэ драго марэнаспэ лэ мечоса, важ кода кай кажно дес сытёнас лэса тэ марэнпэ.

²⁰ О Павло ԥэндя, кай лэ Дэвлэско алав, сар о мечо, саво дя амэнди о Иегова. Но амэ пэстиря ригатар трэбуй драго тэ ӷанас, савэ стихоря тэ ԥэрнавас. Кадяжэ трэбуй драго тэ ӷанас тэ росԥэнас пар лэндэ, кай тэ зашаспэ пала кода, андэр со патяс чи тэ парувас кода, со амэ най кадя полас (2 Кор. 10:4, 5; 2 Тим. 2:15). Со амэ терас, кай када май драго тэ вижал? Акэ, со ԥэнэн о Себастиано, савэсти 21 бэрш: «Кала мэ адиносарав и Библия, мэ випистросарав анда кажно ӷлава по ек стихо. Кадя мэ стидав и стихоря, савэ манди фартэ чалён. Через када мэ май драго полав, сар гиндой о Иегова». Акэ, со ԥэнэн о Дэниело, пала саво сас пистромэ май англал: «Кала мэ адиносарав и Библия, мэ родав и стихоря, савэ па мэрнятэ дэна зор кодэлэнди, касти мэ росԥэнав важ о Дэл. Мэ полэм, кай и мануша май драго ашунэн, кала диқэн, кай тути чалёл тэ дэс дума пала Библия и кай ту стос зор, кай тэ поможыс лэнди».

21. Васо амэ на трэбуй тэ дарас лэ Сатанастар и лэ бэнгэндар?

²¹ Анда кода, со росԥэндэ и шавэ и щея, амэ уӷанглям, кай на трэбуй тэ дарас лэ Сатанастар и лэ бэнгэндар. Чаче, вонэ фартэ зоралэ, но най май зоралэ лэ Иеговастар. Ай инке вонэ на жувэна вечно. Лэн ԥандавэна андо баруно и вонэ будэр на лэна тэ терэн вэрыто лэ манушэнди. Када авэла, кала о Иисусо правия тысяча бэрш. После када лэн умэрэна (Отк. 20:1—3, 7—10). Амэ драго ӷанас пэстирэ вороӷос, соса во заманий и со во загиндосардя тэ стерэл. Но лэ Иеговаса амэ састэс тердюваса против лэстэ!