Заботинпэ тумэ пала тумари вера, сар пала «баро щито»?

1, 2. а) Васо, сар пистромэ андэ Эфесянам 6:16, амэнди трэбуй «баро щито», када и вера? б) Пала савэ вопросоря амэ подаса дума?

АЙ ТУМЭНДЭ исин «баро щито», када и вера? (Адиносар Эфесянам 6:16b.) Канешно, исин. Сар о баро щито фэрияс лэ воиности почти вся и тила, тумари вера кадяжэ фэрий тумэн лэ найлашимастар, саво исин андэ люма, када лэ билажавардимастар, тэ на авас жэстоки и всаворэстар, со на сжалпэ лэ Дэвлэстирэ законоса.

² Амэ жувас андэ «послидни деса», важ када амэ трэбуй тэ диқас, амари вера виритярэла о ԥаримос чи най (2 Тимофею 3:1). Сар можно тэ полас, кай амаро щито амэн фэрия? И со поможыя амэнди лэс драго тэ ритярас? Давайте подаса дума пала кадэла вопросоря.

ДИҚЭН ДРАГО ПАЛА ТУМАРО ЩИТО

3. Сар и воиноря заботинаспэ пала пэстирэ щиторя и васо?

³ Андэ библейско время бут щиторя сас обцырдэ ӷаравляса. И воиноря макэнас лэн вулееса, кай и ӷаравля тэ на пэрэшутёл, ай и састря тэ на ржавин. Кала о воино диқэлас, кай о щито паӷо, лэсти трэбуй сас лэс тэ стерэл, важ кода кай андэ любо маменто, во трэбуй сас тэ жал тэ марэлпэ. Сар кадэва примеро шолпэ пэ амари вера?

4. Васо важно тэ продиқас амаро щито, када и вера и сар када тэ терас?

⁴ Варикала лэ воинонэнди фартэ важно сас драго тэ диқэн пала пэстирэ щиторя, кай тэ на авэн паӷэ. Кадя и амэ трэбуй драго тэ диқас пала амаро щито, када тэ на парашас тэ патяс лэ Иеговасти. И христианоря марэнпэ андэ война, и амарэ вороӷоря, када и бэнга (Эфесянам 6:10—12). Амэ можэм тэ диқас пала кода, саво амэндэ щито, када амари вера. Сар тэ полас, кай амари вера фартэ састи и виритярэла о ԥаримос? Пэрво, трэбуй тэ мангаспэ лэ Дэвлэсти, кай тэ поможый амэнди. Дуйто, трэбуй тэ родас совето андэ Библия, саво поможыя тэ диқас пэр пэстэ кадя, сар диқэл о Дэл (Евреям 4:12). Андэр латэ пистромэ: «Патя лэ Иеговасти всаворэ тирэ одеса и на патя кодэлэсти, сар ту полэс» (Притчи 3:5, 6). Кала сэрэн пала кадэла алава, погиндон, со тумэ найдэлмут витидэ тэ терэн. Можэт тумэнди сас фартэ ԥарэс кодэлэстар, кай нинай ловэ? Сэрэнас тумэ о алав, саво дя о Иегова, саво запистромэ андэ Евреям 13:5: «Никала на ашавава тут и никала на мэкава тут»? Если кадэлэ алавэндар тумэ линэ тэ патян, кай о Иегова поможыя тумэнди, када сыкавэл, кай тумаро щито, када и вера, фартэ лашо.

5. Со можно тэ полэс, кала продиқэс пэстири вера?

⁵ Кала драго продиқэна пэстири вера, тумэ можэте тэ удивинпэ, кала полэна, кай андэр латэ исин слаби ҭана, пэ савэ тумэ май англал на шонас сама. Например, тумэ можэте тэ полэн, кай тумари вера ашэля май слабо, через кода кай бут пэрэжывании, хохаимос и камэлпэ тэ умэкэс и вас. Если када кадя, тоди сар тэ на домэкас, кай амари вера тэ ашэл инке май слабо?

ФЭРИН ПЭС ЛА ПЭРЭЖЫВАНИЯТАР, ХОХАИМАСТАР И КАЛА УМЭКЭС И ВАС

6. Васо можно тэ ԥэнэс, кай най всаворэ пэрэжывании найлашэ?

⁶ Най всаворэ пэрэжывании найлашэ. Например, када, кала амэ пэрэжываем, терас амэ варисо, со на чалёл лэ Иеговасти и лэ Иисусости чи най (1 Коринфянам 7:32). Ай если амэ тердям баро бэзэх, амэ пэрэжываем, сар тэ рисарас и дружба лэ Дэвлэса (Псалом 38:18). Ай инке амэ пэрэжываем пала амаро хулай чи хулаи, пала родо, пала ԥрала чи ԥэя андэ собрания (1 Коринфянам 7:33; 2 Коринфянам 11:28).

7. а) Сар кода, кай амэ фартэ пэрэжываем пала варисостэ, можэт тэ римой амари вера? б) Васо, сар пистромэ андэ Притчи 29:25, амэнди на трэбуй тэ дарас лэ манушэндар?

⁷ Ай, если амэ пала варисо фартэ пэрэжываем, када можэт тэ римой амари вера. Например, амэ можэм вся и время пэрэжывать пала кода, кай тэ хутилэл о хамос, и тэ авэл, со тэ лас пэр пэстэ (Матфея 6:31, 32). Через када амэ вся и время ласа тэ гиндосарас пала када. Амэндэ можэт тэ авэл любовь каринг и ловэ. Если амэ домэкаса кацаво, амэ ласа май набут тэ патяс лэ Иеговасти и можэм тэ хасарас лэса и дружба (Марка 4:19; 1 Тимофею 6:10). Амэ кадяжэ можэм пэрэжывать и пала авэр варисо, када кала пэрэжываем, со пала амэндэ гиндон и мануша. Через када амэ можэм тэ дарас, кай амэндар лэна тэ асанпэ, чи кай амэн лэна тэ ӷонин. Кадэя дар можэт тэ ашэл май бари, чем и дар лэ Иеговастар. Кай тэ фэрисарас пэс кадэлэстар, амэнди трэбуй тэ мангас лэ Иеговас, тэ дэл амэнди вера и смилость, кай вонэ тэ поможын тэ виритярас о ԥаримос. (Адиносар Притчи 29:25c; Луки 17:5.)

8. Со амэнди трэбуй тэ терас, кала ашунас о хохаимос?

⁸ О Сатана «дад лэ хохаимаско», и через кодэла, ко тала лэско вас, во росԥэнэн о хохаимос важ о Иегова и важ амарэ ԥрала (Иоанна 8:44). Например, и отступникоря росԥэнэн через о интэрнэто, телевизоро и через авэр варисо о хохаимос или пэрэбандярэн о чачимос важ лэ Иеговастири арӷанизацыя. Када ек анда лэ Сатанастирэ «стрелы ягаса» (Эфесянам 6:16). Со амэ терас, кала ашунас кацаво хохаимос? Амэ на ласа када тэ ашунас! Васо? Важ кода кай амэ патяс лэ Иеговасти и амарэ ԥралэнди, амэ никала на ласа тэ дас дума лэ отступниконэнца. Мэк нико и нисо (дажэ кода, кай камас бут со тэ ӷанас) на заставий амэн тэ ашунас лэ отступниконэн или тэ доԥэнас лэнди.

9. Со можэт тэ авэл амэнца, кала умэкас и вас?

⁹ Амари вера можэт тэ авэл май слабо через кода, кала умэкэнпэ и вас. Канешно, на трэбуй тэ притераспэ, кай амэндэ нинай о ԥаримос, када авелоп найгодявэрнэс. Дэкала амэ умэкас и вас. Но амэнди на трэбуй тэ домэкас, кай тэ гиндосарас ек важ о ԥаримос. Тоди амэ парашаса тэ гиндосарас пала лашимос, саво авэла англэ, и саво подарисардя амэнди о Иегова (Откровение 21:3, 4). Кала умэкас и вас, када можэт тэ одлэл о зор и амэ можэм тэ сдаспэ (Притчи 24:10). Но кацаво на трэбуй тэ авэл амэнца.

10. Сости амэн сытярэл ла ԥэяко письмо?

¹⁰ Акэ со сас еқа ԥэяса анда Соединённи Штаторя, савяти прижыляпэ тэ диқэл пала пэско фартэ насвало хулай. Со вой терэлас, кай тэ авэл латири вера май састи? Андо письмо, саво вой пистросардя андэ ӷлавно управления, вой ԥэнэн: «Дэкала амэнди фартэ ԥарэс и амэ умэкас и вас, но амари надежда всаек састи. О Иегова бут со дэл, кай тэ ашэл амари вера май састи! Мэ фартэ блаӷодарно лэсти пала када. Амэ на обжасапэ би лэстирэ советонэнго, и кай во тэ на подритярэл амэн. Вонэ поможын амэнди тэ виритярас о ԥаримос, саво лэ Сатанастар». Анда латирэ алава дицол, со трэбуй тэ терас, кай тэ на умэкас и вас. Трэбуй тэ виритярас о ԥаримос и тэ сыкавас, кай на парашас тэ патяс лэ Иеговасти и тэ на подаспэ лэ Сатанасти, и трэбуй тэ цэнисарас вся, со дэл о Иегова, и тэ сэрас, кай во можэт амэн тэ подритярэл.

11. Со трэбуй тэ пушас пэстар, кай тэ полас, сави амэндэ вера?

¹¹ Погиндон, трэбуй тумари вера тэ авэл май састи чи най? Вижыля тумэндэ кадэла послидни шона, тэ на пэрэжываете пала варисо фартэ? Вижыля тумэндэ тэ боринпэ кодэлэса, кай тэ на ашунэн лэ отступниконэн чи тэ на доԥэнэн лэнди? Ай инке вижыля тумэндэ тэ на умэкэн и вас? Если када кадя, тоди тумэндэ лащи вера. Но трэбуй тэ фэринпэ, важ кода кай лэ Сатанастэ исин авэр оружыя, сави во можэт тэ мэкэл пар мэндэ.

ФЭРИНПЭ, КАЙ ТЭ НА ЦЫРДЭНПЭ КАРИНГ О БАРВАЛИМОС

12. Каринг со можэт тэ анэн, если цырдэнпэ каринг о барвалимос?

¹² Через кода, кай цырдаспэ каринг о барвалимос, амари вера можэт тэ ашэл май слабо и амэ май набут ласа тэ ԥирас андэ служэния. О апостоло Павло ԥэндя: «Ни ек воино на залэлпэ пэстиря диласа, кай тэ затерэл ловэ, если камэл тэ чалёл кодэлэсти, ко ля лэс пэ военно служба» (2 Тимофею 2:4). Лэ римсконэ халавдэн на мэкэнас тэ залэнпэ авря диласа. Со авелоп, если вонэ тэ на кандэн?

13. Васо воино на трэбуй тэ залэлпэ авря диласа?

¹³ Представьте, тэсара всаворэ воиноря сытён тэ марэнпэ лэ мечонэнца, ай ек воино нинай. Во тердёл по базаро и битинэн варисо. Вэчэром всаворэ продиқэн пэстирэ доспехоря и парнярэн и мечоря. Ай кодэва воино стидэл о товаро, саво тэся тэ битинэн по базаро. Ай тэсара дэн пэр лэндэ и вороӷоря. Ко анда воиноря ӷотово тэ марэлпэ и кас хвалия о барэдэр? И ко анда кадэла воиноря, тумэ камлоп тэ авэл паша тумэндэ, кодэва ко ӷотовился, кай тэ марэлпэ чи кодэва, ко терэлас авэр дила?

14. Со важ амэндэ, сар важ лэ Христостирэ воиноря, май ӷлавно всаворэстар?

¹⁴ Амэнди трэбуй тэ сытювас кай и воиноря, савэ ӷотови тэ марэнпэ. Важ амэндэ ӷлавно, кай амэн тэ хвалин и Военачальникоря, о Иегова и о Христос, и амэнди на трэбуй кодэлэстар тэ одбандювас. Амэ патяс, кай када май куч всаворэстар, чем кода, со можэт тэ дэл и люма, савяса правий о Сатана. Амэ старысавас тэ виарақас время и зор, кай тэ служысарас лэ Иеговасти и тэ заботисавас пала щито, када пала амари вера, и пала авэр йда, андэ сави марэнпэ.

15. Состар камля тэ фэрий о апостоло Павло и васо?

¹⁵ Амэнди вся и время трэбуй тэ авас ӷотови каринг и война. Васо? О апостоло Павло камля тэ фэрий и ԥэндя, кай «кодэла, ко закамлэ тэ барвадён», вонэ «ашадэ лэ Дэвлэс» (1 Тимофею 6:9, 10). О алав «ашадэ» сыкавэл пэ кода, со амэн можэт тэ одбандярэл. Када, кай амэ камас тэ тинас варисо, со амэнди на трэбуй. Через када андэ амаро ди можэт тэ авэл «кода, со найгодявэрно и вэрыто, када анэн лэ манушэн каринг и смэрть». Амэ нащи кацаво тэ домэкас, важ кода кай када лэ Сатанастири оружыя, сави во бишалэл пар мэндэ, кай амэндэ тэ авэл май слабо вера.

16. Сости амэн сытярэл кода, со сас лэ тэрнэ манушэса, сар пистромэ андэ Марка 10:17—22?

¹⁶ Амэндэ исин ловэ, кай бут со тэ тинас, со амэнди чалёл, но со най фартэ трэбуй. Када драго? Най фартэ. Погиндон акэ пала со. Дажэ если амэндэ вижал тэ тинас пэсти варисо, со амэнди чалёл, авэла амэндэ время и зор, кай тэ пользуисавас кодэлэса, со тиндям, тэ следисарас чи тэ терас ремонто? На ласа амэ фартэ тэ цырдаспэ пала кода, со амэндэ исин? На тераса амэ кадя, сар кодэва тэрно мануш, саво отԥэнделя тэ кандэл лэ Иисусос и тэ терэл май бут андэ служэния лэ Дэвлэсти? (Адиносар Марка 10:17—22d.) Фэдэр тэ андярас просто жызня и тэ отдас пэстири время и о зор, кай тэ терас кода, со камэл о Дэл.

СО ПОМОЖЫЯ АМЭНДИ ДРАГО ТЭ РИТЯРАС О ЩИТО, КАДА И ВЕРА?

17. Пала со амэнди нащи тэ бистрас?

¹⁷ Давай никала тэ на бистрас, кай амэ пэ война и кажно дес амэ трэбуй тэ авас ӷотови, кай тэ мараспэ (Откровение 12:17). Амарэ ԥрала и ԥэя на андярэна важ амэндэ амаро щито. Кажнонэсти андар мэндэ трэбуй лэс драго тэ ритярас.

18. Васо андэ дэлмутни время, и воиноря старыинаспэ састэс тэ ритярэн пэско щито?

¹⁸ Андэ дэлмутни время лэ воинонэн, савэ сас смили андо боё, фартэ шонас сама. Но кала о воино авэлас анда боё би щитоско, када сас лажаимос. О римско историко Тацито пистросардя: «Тэ мэкэл о щито, када баро лажаимос». Акэ васо, кала марэнаспэ, и воиноря старыинаспэ састэс тэ ритярэн пэско щито.

19. Со поможыя амэнди састэс тэ ритярас пэско щито?

¹⁹ Со поможыя амэнди састэс тэ ритярас пэско щито? Амэнди трэбуй тэ на парашас тэ ԥирас пэ собрании и тэ росԥэнас пала лэ Дэвлэско алав и пала лэско Царство (Евреям 10:23—25). Ай инке амэнди трэбуй кажно дес тэ адиносарас и Библия и тэ мангаспэ лэ Иеговасти, кай во тэ поможый амэнди вся и время тэ прилас советоря анда Библия (2 Тимофею 3:16, 17). Тоди ни ек оружыя, сави о Сатана стердя, кай тэ жал пар мэндэ, на стерэла амэнди вэрыто (Исаия 54:17). «Баро щито», када амари вера, лэла амэн тэ фэрий. Еқэҭанэ амарэ ԥралэнца и ԥэянца амэ смило ласа тэ мараспэ андэ война. Амэ най кати вицэласа андэ кадэя война важ и вера, пала сави мараспэ кажно дес, но май ӷлавно, амэнди випэрэла бах тэ тердювас пэ Иисусостири риг, кала во розмарэла лэ Сатанаско войско и кодэлэн, ко лэс подритярэл (Откровение 17:14; 20:10).