Гиндосарам и терам кадя же, сар о Иегова лэ Христоса

1, 2. а) Пала со о Иисусо мангляпэ лэ апостолонэнца англа кода, сар тэ мэрэл? б) Васо о Иисусо фартэ шолас сама, кай тэ авэн ек пала еқэстэ?

О ИИСУСО послиднё разо халас пэстирэ апостолонэнца, ай и апостолоря идоси най ек пала еқэстэ. Кала во мангэласпэ лэнца, во ԥэндя, кай во камэл, кай вонэ тэ гиндон и тэ терэн кадя, сар во и лэско дад. (Адиносар Иоанна 17:20, 21a). Сар авелоп лэ Иисусостирэ ученикоря ек пала еқэстэ, када доԥэндоп аврэнди, кай пэ ԥув лэ Иисусос бишалдя о Иегова. И мануша ӷатярдоп, кай вонэ чачунэ лэ Христостирэ ученикоря, кала машкар лэндэ авелоп любовь (Иоан. 13:34, 35).

² О Иисусо бут дэлас дума андэ кадэя рят лэ учениконэнца акэ васо. Кай вонэ тэ авэн ек пала еқэстэ. Во поля, кай лэстирэ апостолоря на слинэ андэ вся ек пала еқэстэ. Када дицэля анда кода, кай и апостолоря линэ тэ споринпэ «машкар пэстэ, ко андар лэндэ май баро» (Луки 22:24—27; Мар. 9:33, 34). Ай андэ авэр время о Иаково и Иоанно манглэ лэ Иисусос тэ дэл лэнди ҭан ворта паша лэстэ андэ лэ Дэвлэско царство (Мар. 10:35—40).

3. Через со лэ Христостирэ учениконэнди сас ԥарэс тэ авэн ек пала еқэстэ и со амэ уӷанаса анда кадэя статья?

³ Через со лэ Христостирэ учениконэнди сас ԥарэс тэ авэн ек пала еқэстэ? Важ кода кай вонэ камэнас тэ авэн май барэ ек еқэстар. Ай инке андэ лэ Иисусостирэ деса и мануша гиндонас вэрыто пала авэр мануша и вэрыцынас ек еқэс. И лэ Иисусостирэ учениконэнди трэбуй сас тэ улэн када анда пэстирэ одя. Андэ кадэя статья амэ подаса дума акэ пала со. Со терэлас о Иисусо, кала пала лэстэ гиндонас вэрыто? Сар во поможыяс пэстирэ учениконэнди тэ на гиндон пала авэр вэрыто и тэ на парашэн тэ авэн ек пала еқэстэ? И сар кода, сости сытярэлас о Иисусо, дэла зор тэ авас инке май фартэ ек пала еқэстэ, сар лэ Дэвлэско народо?

ГИНДОНАС ВЭРЫТО ПАЛА ИИСУСО И ПАЛА ЛЭСТИРЭ УЧЕНИКОРЯ

4. Росԥэнэн, ко и со гиндонас вэрыто пала Христос.

⁴ Бут мануша гиндонас пала Иисусо вэрыто. Кала о Филиппо виарақля лэ Христос, во пала када ԥэндя лэ Нафанаилости. Ай о Нафанаило ԥэндя: «Хэба, может тэ авэл анда Назарето варисо лашо?» (Иоан. 1:46). О Нафанаило ӷанэнас, со сас пистромэ дэлмут андэ Михея 5:2 пала Христос и, кай када трэбуй тэ стерэлпэ. Во, файма, гиндояс, кай о Назарето сас найашунгло форо, кай котэ тэ арақадёлпэ о Христос. Бут иудеёря гиндонас, кай копийка ашэл лэ манушэнго ди, савэ анда Галилея (Иоан. 7:52). Авэр иудеёря камэнас тэ мударэн алавэса, кала ԥэнэнас, кай о Иисусо самаритянино (Иоан. 8:48). Иудеёря и самаритяноря жувэнас андэ разни ҭана. И кажно народо патялас андо Дэл па пэстирятэ. Кодэла, ко жувэнас андэ Иудея и Галилея на стонас патив пэ самаритяноря и обжанас лэн (Иоан. 4:9).

5. Ко и со гиндонас вэрыто пала лэ Христостирэ ученикоря?

⁵ И иудеёски барэ мануша ворта ԥэнэнас, кай вэрыцынас лэ Христостирэ учениконэн. Ай и фарисеёря гиндонас, кай лэ Христостирэ ученикоря бибахталэ (Иоан. 7:47—49). И фарисеёря гиндонас, кай кодэла, ко на сытёнас андэ раввински школы и на жувэнас кадя, сар лэндэ терэлпэ, нисо на ашэнас и кай вонэ прости мануша (Деян. 4:13). Важ кода кай и мануша абуронас пэстиря вераса, пэстиря нацияса и кодэлэса, сар вонэ жувэн, вонэ гиндонас вэрыто пала Иисусо и пала лэстирэ ученикоря. И дэкала лэ Христостирэ ученикоря пэрэлэнас кадэла гиндоря. Кай и май дур тэ ашэнпэ ек пала еқэстэ, вонэ трэбуй сас тэ парувэн кода, сар вонэ гиндонас.

6. Росԥэнэн, со линэ тэ гиндон и мануша, савэ диқэнас, кай и авэр вэрыцын ек аврэс.

⁶ Андо миро фартэ бут манушэн, савэ гиндон вэрыто пала авэр. Дэкала амэ диқас, кай амэнца обжанпэ найдраго, важ кода кай гиндон пала амэндэ вэрыто. Ай дэкала кадя терас и амэ варикасти. Акэ, со ԥэнэн ек ԥэй пионеро анда Австралия: «Мэ бут гиндосаравас пала кода, сар и парнэ мануша обжанпэ лэ калэ катутнэ манушэнца кадя, сар вонэ на затердэ. Кадя сас вся время. И манди екжэняти най еқвар ԥэнэнас найлашэ алава, важ када мандэ сас инке май бари холи пэ парнэ мануша». Ек ԥрал анда Канада прижандёлпэ, кай вэрыцыяс лэ манушэн, савэ дэнас дума пэ авэр шыб. Во росԥэнэн: «Мэ гиндосаравас, кай кодэла, ко дэнас дума пэ французско шыб, май лашэ аврэндар. Важ када мэ вэрыцысаравас кодэлэн, ко дэнас дума пэ английско шыб».

7. Сар андярэлас пэс о Иисусо, кала и мануша вэрыцынас лэс?

⁷ Адес андо миро присытелэ тэ вэрыцын ек еқаврэс. Кадя сас и андэ лэ Иисусостирэ деса. Ай сар о Иисусо када улэлас? Пэрво, када кай во екжэно никала на вэрыцыяс аврэн и кода, кай лэс вэрыцынас, во на шолас сама пэ када. Во росԥэнэнас важ о царство лэ барвалэнди, лэ чорэнди, лэ фарисеёнэнди, лэ самаритянонэнди и даже кодэлэнди, ко стидэнас и налоӷоря и лэ ӷрешниконэнди. Дуйто, када кай о Иисусо сытярэлас пэстирэ учениконэн, кай лэндэ тэ на авэл кода, кай на допатян аврэнди, и тэ на авэл холи каринг авэр. И во екжэно кадя терэлас.

И ЛЮБОВЬ И, КАЙ НА ЗАВАЗДАС О ШЭРО, УЛЭЛ О ВЭРЫЦИМОС КАРИНГ И МАНУША

8. Пэ савэ алава ритярдёлпэ кода, кай амэ ек пала еқэстэ? Росԥэнэн.

⁸ О Иисусо росԥэндя, пэ савэ алава ритярдёлпэ кода, кай и христианоря ек пала еқэстэ. Во ԥэндя: «Тумэ всаворэ ԥрала». (Адиносар Матфея 23:8, 9b). Чаче, амэ всаворэ ԥрала и ԥэя, важ кода кай амэ жылям лэ Адамостар (Деян. 17:26). О Иисусо ԥэндя, кай лэстирэ ученикоря, ԥрала и ԥэя машкар пэстэ инке важ кода, кай вонэ прижанэн лэ Иеговас, сар пэстирэ небеснонэ дадэс (Матф. 12:50). Кадяжэ вонэ ашэлэ, сар ек лэ Дэвлэско баро ери и вонэ еқэндар андэ кода, сар любин и патян. Важ када и апостолоря ԥэнэнас пэ христианоря ԥрала, кала пистронас пэстирэ письморя лэ собраниенди (Рим. 1:13; 1 Пет. 2:17; 1 Иоан. 3:13)c.

9, 10. а) Сас кай иудеёря, васо тэ на гиндон, кай лэндири нация май лащи аврэндар? б) Сар о Иисусо сыкадя, кай нащи тэ гиндон пала авэр нации вэрыто? (Диқэн и картинка англа статья.)

⁹ О Иисусо ԥэндя пэстирэ учениконэнди, кай вонэ трэбуй тэ обжанпэ ек аврэса, сар ԥрала и ԥэя, и кай кадя тэ авэл, трэбуй тэ на заваздэн о шэро. (Адиносар Матфея 23:11, 12d). Амэ ӷанас, кай лэ апостолонэнди, важ кода кай заваздэнас о шэро, сас ԥарэс тэ ладин ек аврэса. Инке бут иудеёря гиндонас, кай вонэ май лашэ аврэндар, важ кода кай жылэ лэ Авраамостар. Но о Иоанно Крестителё ԥэндя: «Андэ лэ Дэвлэско зор анда кадэла бара тэ стерэл бэятонэн лэ Авраамости» (Луки 3:8).

¹⁰ О Иисусо ԥэндя, кай найдраго, кала о мануш гиндой, кай лэстири нация май лащи аврэндар. Во дя када тэ полэн, кала еқвар и книжникоря пушлэ лэстар: «Ко манди пашэ?» Пэ кадэла алава о Иисусо росԥэндя ек притча пала самаритянино. Еқэс иудеёс мардэ и чордэӷаря и во пашлёлас по дром. Иудеёря на шонас сама пэ кадэва домардо мануш, ай о самаритянино жалуисардя лэс и поможысардя лэсти. Кала о Иисусо росԥэндя кадэя притча, во мангля лэн тэ сытён кай кадэва самаритянино (Луки 10:25—37). О Иисусо ԥэндя, кай о самаритянино сытярэл лэ иудеёнэн па чачимастэ тэ любин кодэлэс, ко пашэ.

11. Васо лэ Иисусостирэ учениконэнди на трэбуй сас тэ гиндон вэрыто пала авэр народоря? Сар о Иисусо поможысардя лэнди када тэ полэн?

¹¹ О Иисусо англа кода, сар тэ ваздэлпэ по нэбо, ԥэндя пэстирэ учениконэнди, кай вонэ тэ росԥэнэн пала лащи весть: «па вся Иудея и Самария, и жы кай само дурутнэ ҭана пэ ԥув» (Деян. 1:8). Кай тэ стерэн кадэя дила, вонэ трэбуй сас тэ на заваздэн о шэро и тэ на гиндон пала авэр вэрыто. О Иисусо най еқвар ԥэнэнас лэнди, со исин лашо андэ мануша анда авэр народоря, кай вонэ тэ закамэн тэ жан и тэ росԥэнэн аврэ народонэнди. О Иисусо похвалисардя лэ римсконэ сотникос, кай лэстэ састи вера (Матф. 8:5—10). Андэ пэско форо Назарето о Иисусо ԥэндя, сар о Иегова тердя лашимос важ и мануша анда авэр народо, када слинэ и ԥивли анда финикийско Сарепта и о сирийцо Неемано (Луки 4:25—27). Инке о Иисусо росԥэнэнас ла самаритянкати важ и лащи весть. Во даже дуй дес сас андэ лэ самаритянонэнго форо, важ кода кай и мануша камэнас тэ ӷанэн, со во росԥэнэн (Иоан. 4:21—24, 40).

СО ТЕРЭНАС И ПЭРВИ ХРИСТИАНОРЯ, КАЙ ТЭ НА ГИНДОН ВЭРЫТО ПАЛА АВЭР?

12, 13. а) Сар диқлэ и апостолоря пэ кода, кай о Иисусо росԥэнэнас ла самаритянкати важ и лащи весть? (Диқэн и картинка англа статья.) б) Андар со дицол, кай о Иакаво и о Иоанно на сытелэ анда кода, сости сытярдя лэн о Иисусо?

¹² Лэ апостолонэнди сас найвушэро тэ парашэн тэ гиндон вэрыто. Вонэ динэ наздив, кай о Иисусо дэлас дума ла самаритянкаса (Иоан. 4:9, 27). Васо? Важ кода кай и барэ мануша андэ иудейско вера никала на линоп тэ дэн дума ла жувляса англа мануша и вонэ никала на диноп дума ла самаритянкаса, пала сави найдраго дэн дума. И апостолоря динэ лэ Иисусости тэ хал, но о Иисусо кадя задяпэ дума ла самаритянкаса, кай бистэрдя пала хамос. Во камэлас тэ росԥэнэн важ о царство всаворэ манушэнди, даже ла самаритянкати, важ кода кай лэско дад камэлас када. Ай тэ терэл кода, со камэл о дад, важ лэстэ сас май фартэ трэбуй, чем о хамос (Иоан. 4:31—34).

¹³ О Иакаво и о Иоанно нисости на сытелэ анда када. Кала лэ Иисусостирэ ученикоря прожанас па Самария, вонэ линэ тэ родэн, кай тэ рятярэн андэ варисаво гав. Но и самаритяноря на прилинэ лэн пэстэ. Тоди о Иаково и о Иоанно андэ холи ԥэндэ лэ Иисусости, кай пэ кадэва гав тэ сжал и яг па нэбо и тэ сԥабарэл лэс. Но о Иисусо ворта ԥэндя лэнди, кай када фартэ найдраго (Луки 9:51—56). Файма, о Иаково и о Иоанно на холяйлоп кадя, сар када тэ авелоп андэ лэнго форо Галилея. Файма, вонэ тердэ кадя, важ кода кай вэрыцынас кодэлэ манушэн. Прожыля время и о Иоанно драго росԥэнэнас лэ самаритянонэнди важ и лащи весть, файма, лэсти сас лажаво важ кодэла холинатирэ алава (Деян. 8:14, 25).

14. Сар розлинэ кода, со тердяпэ машкар христианоря, савэ дэнас дума пэ разни шыба?

¹⁴ Сар прожыля и Пятидесятница андо 33 бэрш лэ И. Х., дэсавэ христианонэнца линэ тэ обжанпэ вэрыто. Лэ ԥивлянди, савэнди сас ԥарэс лэ ловэнца, роздэнас о хамос. Лэ ԥивлянди, савэ дэнас дума пэ ӷреческо шыб, на додэнас о хамос, саво лэнди прижалпэ (Деян. 6:1). Файма, када сас, важ кода кай вонэ дэнас дума пэ авэр шыб. И апостолоря йто када розлинэ. Вонэ ԥэндэ, кай семь ԥрала, савэндэ састи вера, тэ роздэн о хамос, касти скати прижалпэ. Кай всаворэ кадэла ԥрала слинэ ӷречески алава. Файма, лэн стодэ, кай лэ ԥивлянди тэ авэл май вушэро тэ прилэн лэндар о хамос.

15 Сар о Пётро сытёлас тэ на гиндой пала авэр вэрыто? (Диқэн и картинка англа статья.)

¹⁵ Андо 36 бэрш лэ И. Х. и христианоря линэ тэ росԥэнэн важ о царство лэ манушэнди анда всаворэ нации. Май англал о апостоло Пётро дэлас дума кати лэ иудеёнэнца. Но о Дэл сыкадя лэ христианонэнди, кай лэнди нащи тэ гиндон пала авэр вэрыто. Тоди о Пётро жыля тэ росԥэнэн и весть важ о царство лэ римсконэ сотникости, савэс ақарэн Корнилиё. (Адиносар Деяния 10:28e, 34, 35f). Май англал андэ лошатэ о Пётро ля тэ тидэлпэ лэ христианонэнца анда авэр народоря и тэ хал лэнца. Прожылэ бэрша и андэ Антиохия о Пётро парашэля тэ тидэлпэ кодэлэнца, ко найевреёря и даже парашэля тэ хал лэнца (Гал. 2:11—14). О Павло диқля када и ворта ԥэндя лэ Петрости, со во терэл най кадя. О Пётро поля пэстири дош. Андэ пэско пэрво письмо о Пётро пистросардя лэ христианонэнди, савэ слинэ анда евреёря и анда авэр народоря, вонэ жувэнас андэ Мало Азия. Во пистросардя, кай вонэ трэбуй тэ любин всаворэн ԥралэн и ԥэян (1 Пет. 1:1; 2:17).

16. Со дэнас дума пала христианоря, савэ жувэнас андэ пэрво вико?

¹⁶ Анда кода, сар андярэлас пэс о Иисусо, и ученикоря, сытелэ тэ любин «разнонэ манушэн» (Иоан. 12:32; 1 Тим. 4:10). Вонэ парудэ пэстирэ гиндоря, хоть пэ када лэндэ и жыля дэсави время. Пэрвонэ христианонэн ӷанэнас, сар кодэлэн, ко любин ек аврэс. Андо дуйто вико жувэлас писателё, савэс ақарэнас Тертуллиан. Андэ ек пэстири книжка во пистросардя, со ԥэнэнас андэ кодэя время пала христианоря: «Вонэ любин ек аврэс... вонэ, кала када трэбуй отдэна и жизня ек пала еқэстэ». Чаче, и христианоря, савэ жувэнас андэ пэрво вико парудэ пэс и ашэлэ нэвэ манушэнца и линэ тэ обжанпэ аврэнца кадя, сар о Иегова (Кол. 3:10, 11).

17. Сар тэ улас анда оди вэрыцимос каринг авэр? Росԥэнэн пала ԥэя.

¹⁷ Амэнди кадяжэ, файма, трэбуй время, кай тэ улас анда оди вэрыцимос каринг авэр. Акэ, со ԥэнэн ек ԥэй анда Франция: «О Иегова ман сытярэл, сар тэ любисарав, тэ дав аврэнди кода, со мандэ исин, и тэ обжавпэ аврэнца драго. Но мэ всаек инке сытював тэ парував пэстирэ вэрыти гиндоря пала авэр мануша, ай када найвушэро. Мэ на парашав пала када тэ мангавпэ». Акэ, со ԥэнэн авэр ԥэй анда Испания: «Дэкала манди трэбуй тэ улав пэстар вэрыти гиндоря пала мануша анда дэсави нация. Мандэ вижал тэ улав кадэла гиндоря, но мэ полав, кай трэбуй и май дур тэ на парашав када тэ терав. Мэ ԥэнав „наис“ лэ Иеговасти, важ кода кай мандэ исин ери, саво па вся ԥув и андэ кадэва ери всаворэ ек пала еқэстэ!» Кажно андар мэндэ трэбуй тэ пушэл пэстар, трэбуй и манди, сар кадэлэ ԥэянди, тэ улав анда оди вэрыцимос каринг авэр?

КОТЭ, КАЙ ЛЮБИН, НА ГИНДОН ПАЛА АВЭР ВЭРЫТО

18, 19. а) Васо амэнди трэбуй всаворэнца тэ обжаспэ драго? б) Сар када тэ терас?

¹⁸ Амэнди трэбуй тэ сэрас, кай варикала амэ всаворэ «самас би лэ Дэвлэско андэ кадэва миро» (Эф. 2:12). Но о Иегова, важ кода кай любий, ақардя амэн каринг пэстэ (Ос. 11:4; Иоан. 6:44). Ай о Христос драго приля амэн. Через лэстэ амэндэ исин, васо тэ авас андэ лэ Дэвлэско ери. (Адиносар Римлянам 15:7g). Хоть амэ и ӷрешни, о Иисусо фартэ амэн любий, важ када амэнди никала нащи тэ домэкас тэ гиндосарас пала авэр мануша вэрыто!

¹⁹ Пашол и время, кала на авэла кадэва найлашо миро и кадэлэстар машкар и мануша ашэл май бут вэрыцимос, холи и кай на дополэн ек аврэс (Гал. 5:19—21; 2 Тим. 3:13). Но лэ Иеговастирэ мануша родэн и мудрость лэстар, важ када вонэ ладин ек аврэса и на гиндон пала авэр вэрыто (Иак. 3:17, 18). Амэ лошалэ тэ дружисарас лэ манушэнца анда авэр страны, тэ прилас кода, сар лэндэ терэлпэ и, файма, тэ сытювас тэ дас дума пэ лэндири шыб. Важ када андэ лэ Дэвлэско народо мирно, сар андэ лэн и кода, кай вонэ ритярэн лэ Дэвлэско законо, када, сар и волны андэ моря (Ис. 48:17, 18).

20. Сар и любовь парувэл амарэ гиндоря и кода, со амэндэ андо ди?

²⁰ Май англал амэ дям дума пала ек ԥэй анда Австралия. Сар кода, кай вой сытёлас па Библия, поможысардя лати тэ на гиндой вэрыто пала авэр мануша? Вой росԥэнэн: «Акана мандэ авэр гиндоря и авэр оди. Мэ парашэлэм тэ гиндосарав пала авэр мануша вэрыто и тэ холявав пэр лэндэ». Ай о ԥрал французо анда Канада, ԥэнэн: «И мануша вэрыцын аврэн, важ кода кай вонэ нисо на ӷанэн пала лэндэ. О мануш лашо чи найлашо, най кодэлэстар, андэ саво ҭан во арақаделяпэ». Кадэва ԥрал женисайля пэ христианка, сави сас анда Англия. Када сыкавэл, кай и христианско любовь улэл всаворэ вэрыти гиндоря пала авэр мануша. Кацави любовь терэл кадя, кай и христианоря на парашэн тэ гиндон и тэ терэн еқэндар и тэ ладин ек еқэса (Кол. 3:14).