Во стердоп кадя, кай тэ чалёл лэ Дэвлэсти

СПЭРВА ВИТИДЯ НАЙДРАГО

Лэ Ровоамоско дад сас о Соломоно, саво правияс андо Израилё 40 бэрш (1 Цар. 11:42). О Соломоно муля андэ 997 бэрш жы кай И. Х. О Ровоамо анда Иерусалимо жыля андо Сихемо, кай лэс трэбуй сас «тэ стон... царёса» (2 Лет. 10:1). Сар па тирятэ, фартэ во загиндояспэ кодэлэстар, кай во трэбуй тэ ашэл царёса? Всаворэ ӷанэнас, пэ скати дэ годявэрно сас о Соломоно. Йто о Ровоамо трэбуй сас тэ доԥэнэн, кай во кацаво же годявэрно, кай тэ улэл о ԥаримос.

Лэ Ровоамости сас найвушэро. Каринг лэстэ авелэ израильтяноря и ԥэндэ лэсти пала кода, со пэр лэндэ тасавэлас: «Тиро дад стердя амаро ӷамо ԥаро, но ту стер май вушэро амари бути и о ԥаро ӷамо, саво во пар мэндэ стодя, и тоди амэ ласа тэ терас кода, со ту ԥэнэса» (2 Лет. 10:3, 4).

Лэ Ровоамости сас найвушэро тэ витидэл. Сар во стерэла кадя, сар мангэл о народо, лэсти, лэстирэ ерести и лэ князёнэнди прижалапэ тэ отԥэндён варисавэ барвалимастар. Но, сар во тэ отԥэндёла кодэлэстар, со вонэ мангэн, тоди о народо жала против лэстэ. Со лэсти тэ терэл? Спэрва о Ровоама пушля кай и ԥурэ мануша, савэ подԥэнэнас лэстирэ дадэсти, со вонэ гиндон пала када. Но, тоди во ля тэ пушэл кай пэстирэ ровэстникоря. Вонэ подԥэндэ лэсти тэ стерэл лэнго ӷамо инке май ԥаро. О Ровоамо кангля лэн. Во ԥэндя лэ народости: «Мэ стерава тумаро ӷамо инке май ԥаро и достава каринг лэстэ. Мэрно дад марэлас тумэн лэ чукнянца, ай мэ марава тумэн чукнянца, пэ савэ исин востри састря» (2 Лет. 10:6—14).

Сости амэ анда када сытювас? Авелоп годявэрнэс тэ ашунас, со ԥэнэн и ԥурэ, савэндэ лащи дружба лэ Дэвлэса. Вонэ поможына амэнди, сар май драго тэ витидас. Трэбуй тэ терас годявэрнэс, тэ кандас лэн (Иов 12:12).

«ВОНЭ СТЕРДЭ КАДЯ, САР ԤЭНДЯ О ИЕГОВА»

О народо вазгляпэ против кода, со ԥэндя о Ровоамо. Тоди о царё стидя лэ воинонэн, кай тэ жал пэр лэндэ. Но о Иегова через о пророко Шемаия ԥэндя: «Тумэ на трэбуй тэ жан тэ марэнпэ пэстирэ ԥралэнца, лэ Израилёстирэ шавэнца. Рисавэн андэ пэстирэ цэра, важ кода кай вся када сас мандар» (1 Цар. 12:21—24)a.

Вушэро сас важ о Ровоамо тэ стерэл кадя, сар ԥэндя о Иегова? Со и мануша лэна тэ гиндон пала нэво царё? Кати найдэлмут во ԥэнэнас, кай авэла тэ марэл лэн «чукнянца, пэ савэ исин востри састря». Ай акана лэсти трэбуй тэ стерэл кадя, сар вонэ камэн! (Диқэн, сар кадэла алава сжанпэ лэ стихоса 2 Летопись 13:7.) И всаек о царё и лэстирэ воиноря «стердэ кадя, сар ԥэндя о Иегова и рисайлэ цэрэ, сар и ԥэндя лэнди о Иегова».

Сости амэ анда када сытювас? Трэбуй тэ терас кадя, сар ԥэнэн о Дэл, даже сар варико кадэлэстар приасалпэ. Кала амэ терас кадя, сар во ԥэнэн, во блаӷословия амэн (Втор. 28:2).

Со сас лэ Ровоамости кодэлэстар, кай во стердя кадя, сар ԥэндя лэсти о Дэл? Андэ лэско царство ашэлэпэ дуй племена, када о Иуда и о Вениамино. Во ля тэ строий нэвэ фороря, ай и пуранэ стердя май састэ (2 Лет. 11:5—12). Но, май важно сас кода, кай о Ровоамо дэсави время ритярэлас лэ Иеговаско законо. Кала правияс о Иеровоамо, авэр Израильски дэш племена линэ тэ тэлён хохавнэ дэвлэнди. Важ када дэсавэ мануша анда кадэла дэш племена жылэ тэ жувэн андо Иерусалимо, кай тэ стерэн лэ Ровоамостири правления май састи и, кай май дур тэ служин лэ чачунэ Дэвлэсти (2 Лет. 11:16, 17). И акэ, важ кода кай о Ровоамо кангля лэ Дэвлэс, лэстири правления ашэля май састи.

СТЕРДЯ БЭЗЭХ И КАИСАЙЛЯ

Кала лэ Ровоамостири власть ашэля май састи, во парашэля тэ ритярэл лэ Иеговаско законо и ля тэ тэлёл хохавнэ дэвлэнди. Но васо? Файма, пэр лэстэ тасавэлас лэстири дэй, сави сас аммонитянка (1 Цар. 14:21). И о народо ля тэ терэл кадя, сар во. Важ када о Иегова домэкля, кай о египетско царё Сусакимо тэ захутилэл бут иудейски фороря, хоть и о Ровоамо стердя кадэла фороря састэ (1 Цар. 14:22—24; 2 Лет. 12:1—4).

Кадэя время ашэля инке май ԥари, кала о Сусакимо поджыля каринг о Иерусалимо, кай правияс о Ровоамо. Тоди каринг о царё и каринг и князёря авеля о пророко Шемаия и пэрэдя лэнди лэ Дэвлэстирэ алава. Во ԥэндя: «Важ кода кай тумэ ашадэ ман, мэ ашадэм тумэн и отдэм андэ лэ Сусакимостирэ вас». Со кадэлэстар стердя о Ровоамо? Во прижангля пэстири дош. Андэ Библия ԥэнэнпэ: «Кала о царё и князёря ашундэ када, вонэ полинэ, кай завазглэ о шэро и ԥэндэ: „Кати кай о Иегова о чачимос и о лашимос“». Важ када о Иегова простисардя лэ Ровоамос и фэрисардя о Иерусалимо, кай лэс тэ на розмарэн (2 Лет. 12:5—7, 12).

После када о Ровоамо и май дур правияс андо Иудейско царство. Англа кода, сар тэ мэрэл, во дя лашэ подаркоря пэстирэ шавэнди, кай нико андар лэндэ тэ на жан против лэнго ԥрал Авия, саво трэбуй сас тэ ашэл царё (2 Лет. 11:21—23). Акана во стердя май годявэрнэс, чем кала во сас май тэрно.

ЧАЛЁЛАС ЛЭ ДЭВЛЭСТИ О РОВОАМО ЧИ НАЙ?

Дэкала о Ровоамо терэлас лашимос. Но андэ Библия ԥэнэнпэ пала лэстири правления, кай «во терэлас о найлашимос». Васо? Важ кода кай «во най всаворэ одеса родэлас лэ Иеговас» (2 Лет. 12:14).

Сости амэ сытювас анда кода, со сас лэ Ровоамоса? Дэкала во кандэлас лэ Дэвлэс и терэлас лашимос важ лэ Дэвлэско народо. Но лэстэ на сас бари дружба лэ Иеговаса и во на камэлас анда вся оди тэ терэл, со чалёл лэ Иеговасти. Вижыля кадя, кай во ля тэ тэлёл хохавнэ дэвлэнди и ля тэ терэл кода, со вэрыцый о Дэл. Файма, ту гиндос: «Васо о Ровоамо кандэлас лэ Иеговас? Файма, кай во анда вся оди каияспэ важ пэстирэ ӷрехоря и камэлас тэ терэл, со камэл о Дэл, чи важ кода, кай лэсти ԥэнэнас када авэр мануша?» (2 Лет. 11:3, 4; 12:6). Сар бы тэ на авэл, во всаек рияспэ каринг кода, кай тэ терэл о найлашимос. Во кадя на шоласпэ пэ пэско папо, по царё Давидо! Чаче, дэкала о Давидо терэлас бэзэх, но во любияс лэ Иеговас, тэлёлас лэсти вся пэстири жизня и анда вся оди каияспэ важ пэско бэзэх (1 Цар. 14:8; Пс. 51:1, 17; 63:1).

Чаче, кода, со сас лэ Ровоамоса бутэсти амэн сытярэл. Роздраго, кала и мануша диқэн пала пэско ери и поможын аврэнди. Но, сар амэ камас тэ чалювас лэ Иеговасти, амэнди трэбуй анда вся оди тэ служисарас лэсти и тэ терас вся, кай амари дружба лэса тэ авэл май састи.

Кай амэндэ вся када тэ авэл, амэнди трэбуй фартэ тэ любисарас лэ Иеговас. Сар важ кода, кай тэ ԥабол и яг, трэбуй тэ подшас и каш, кадя же, кай амари любовь каринг о Иегова тэ на мудардёл, трэбуй тэ на промэкас тэ сытювас па Библия, тэ гиндосарас пала кода, со адиносардям и тэ на парашас тэ мангаспэ (Пс. 1:2; Рим. 12:12). Кала амэ кадя любисарас, амэ закамаса, кай о Иегова тэ авэл лошало амаря жизняса, и кала стердям о бэзэх тэ каисавас па чачимастэ. Тоди амэ никала на оджаса па лэ Иеговаско дром, сар о Ровоамо (Иуды 20, 21).