Сытярэн лэ чачимасти
«Иегова... Тирэ алава, чачимос» (ПСАЛОМ 119:159, 160).
1, 2. а) Со важ о Иисусо сас со май куч андэ жызня и васо? б) Со поможыя амэнди май драго тэ росԥэнас пала Дэл?
О ИИСУС ХРИСТОС терэлас бути анда каш и важ када пэр лэстэ ԥэнэнас плотнико. Ай кала прожыля время, во ля тэ росԥэнэн пала Дэл (Марка 6:3; Римлянам 15:8). Во фартэ драго терэлас и кодэя и кадэя бути. Сар плотнико, во сытеля драго тэ терэл бути кодэлэса, со важ када трэбуй сас, кай анда котор каш тэ стерэл, со трэбуй. Ай сар кодэва, ко сытярэлас и росԥэнэнас и лащи весть, во вушэро дэлас тэ полэл лэ манушэнди о чачимос анда Библия (Матфея 7:28; Луки 24:32, 45). Кала лэ Иисусости сас 30 бэрш, во парашэля тэ авэл плотнико и ля тэ терэл и дила, сави со май фартэ трэбуй. Тэ росԥэнэн и лащи весть, лэс бишалдя о Дэл (Матфея 20:28; Луки 3:23; 4:43). Важ о Иисусо со май куч сас тэ росԥэнэн и лащи весть и во камэлас, кай и авэр тэ терэн кадяжэ (Матфея 9:35 жы кай 38).
2 Бут андар мэндэ най плотникоря, но всаворэ амэ сытярас лэ чачимасти анда Библия. Кадэя дила, сави со май трэбуй, терэл екжэно о Дэл. Важ када андэ Библия пистромэ, кай амэ «терас лэ Дэвлэса ек дила» (1 Коринфянам 3:9; 2 Коринфянам 6:4). Амэ фартэ патяс, кай лэ Иеговастирэ «алава, чачимос» (Псалом 119:159, 160). Важ када кажнонэсти андар мэндэ трэбуй тэ росԥэнас «о чачимос» кадя, сар во исин. (Адиносар 2 Тимофею 2:15a). Акэ васо амэ камас тэ полас, сар май драго па Библия тэ сытярас лэ манушэн, кала дас дума лэнца пала Иегова, пала Иисус Христос и пала царство. И ԥрала анда лэ Иеговастири орӷанизацыя динэ амэнди кода, со поможый амэнди тэ ӷанас май драго тэ сытярас лэ чачимасти.
3. Со андэ кадэя послиднё время амэнди трэбуй тэ терас андэ служэния? Савэ манушэн амэнди трэбуй тэ родас, сар пистромэ андэ Деяния 13:44 жы кай 48?
3 Кода, со дэн и ԥрала анда лэ Иеговастири орӷанизацыя дэл, кай амэ тэ сытярас лэ манушэн лэ чачимасти, ай най кай кати тэ росԥэнас пала чачимос. О мануш, саво росԥэнэн пала Дэл, во кати дэл дума пала лащи весть, ай о мануш, саво сытярэл, драго росԥэнэн, кай тэ полэн кадэя весть. Кодэва, ко сытярэл, терэл вся, кай о мануш, саво сытёл, тэ прилэл када лэ одеса и ла годяса и тэ закамэл тэ жувэл кадя, сар сытеля анда Библия. Андэ кадэя послиднё время амэнди трэбуй тэ терас вся, кай тэ виарақас манушэн, савэ закамэна тэ сытён лэ чачимасти. Важ када амэ терас вся, кай тэ виарақас манушэн, савэн «цырдэл каринг и вечно жызня» и поможысарас лэнди, кай вонэ тэ лэн тэ служын лэ Иеговасти. (Адиносар Деяния 13:44 жы кай 48b).
4. Сар тэ виарақас кодэлэн, кас «цырдэл каринг и вечно жызня»?
4 Но сар тэ виарақас кодэлэн, кас «цырдэл каринг и вечно жызня»? Сар и андэ пэрво вико, важ када трэбуй тэ росԥэнас лэ манушэнди и лащи весть. О Иисусо ԥэндя: «Андэ саво форо чи андо гав тумэ тэ на зажан, родэн андэр лэндэ кодэлэн, ко ашэл» (Матфея 10:11). Адес, амэнди трэбуй тэ терас кадяжэ. Сар и мануша притерэнпэ, заваздэн о шэро чи лэнди на трэбуй о Дэл, амэ на аштярас, кай вонэ прилэна и лащи весть. Амэ родас кодэлэн, ко на притерэнпэ, ко на заваздэн о шэро и ко фартэ камэл тэ ӷанэн о чачимос. Кала родас кацавэ манушэн, када сыкавэл, сар о Иисусо терэлас бути, кала сас плотнико. Во родэлас кацаво каш, анда саво терэнас, ԥэнаса, двэри, ӷамо, столо чи шкафо. Ай тоди во лэлас инструменторя и столас вся о зор, кай анда котор каш тэ стерэл кода, со трэбуй. Кадяжэ и амэ спэрва родас манушэн, савэ анда оди камэн тэ уӷанэн о чачимос. Тоди драго лэнди росԥэнас пала Дэл кодэлэса, со амэнди динэ и ԥрала анда лэ Иеговастири орӷанизацыя. Кадэлэса амэ поможысарас лэнди тэ ашэн лэ Иисусостирэ ученикоря (Матфея 28:19, 20).
5. Со амэнди трэбуй тэ ӷанас пала кода, со амэнди дэн и ԥрала анда лэ Иеговастири орӷанизацыя, кай тэ росԥэнас пала Дэл? Росԥэнэн. (Диқэн и картинка англа статья.)
5 Кажно инструменто, дэл тэ стерэс варисави пэстири дила. Подаса дума пала иструменторя, савэнца о Иисусо терэлас дила, кала сас плотникоc. Лэнца во мерияс, пилияс, сверлияс, вишынэнас анда каш и диқэлас, кай тэ авэл ровно. Кадяжэ и кода, со амэнди дэн и ԥрала анда лэ Иеговастири орӷанизацыя, поможый май драго тэ росԥэнас пала Дэл. Акана подам дума, сар када тэ терас.
КОДА, СО ДЭН И ԤРАЛА АНДА ЛЭ ИЕГОВАСТИРИ ОРӶАНИЗАЦЫЯ, ПОМОЖЫЙ ЛЭ МАНУШЭНДИ ТЭ ПОЛЭН, КО АМЭ
6, 7. а) Со тумэ терэн лэ визитнонэ карточкэнца? б) Васо амэ роздас и приглашения пэ амари собрания?
6 Визитни карточки. Вонэ найбарэ, но вонэ фартэ драго поможын. Через лэндэ и мануша полэн, ко амэ и уӷанэн пала амаро сайто jw.org. Пэ амаро сайто вонэ май бут уӷанэн, со терэл лэ Иеговастири орӷанизацыя и мангэн, кай лэн тэ сытярэн па Библия. Па кадэва сайто май бут чем 400 000 мануша манглэ, кай лэн тэ сытярэн па Библия. И кажно дес най ек шэл мануша мангэн пала када! Важ када авелоп драго, кай амэ тэ ритярас паша пэстэ визитни карточки, кай тэ дас манушэнди, кала дас дума лэнца.
7 Приглашения. Андэ приглашения пэ амари собрания пистромэ «Приглашаем вас изучать Библию вместе со Свидетелями Иеговы». Инке пистромэ, кай о мануш можэт тэ витидэл, сар тэ сытёл па Библия. Котэ, кай тидэнпэ лэ Иеговастирэ свидетеля чи, кай о мануш тэ авэл лэстэ и тэ сытярэл лэс па Библия. Вижал, кай через и приглашения амэ поможысарас лэ манушэнди тэ полэн, ко када лэ Иеговастирэ свидетеля и ақарас тэ сытён па Библия кодэлэн, ко полэн, кай лэнти трэбуй о Дэл (Матфея 5:3). Камэн и мануша тэ сытён па Библия чи най, амэ всаек ақарас лэн пэ собрания. Кала о мануш лэла и приглашения и авэла пэ собрания, во полэла, сар дэ бут лэстэ вижала тэ уӷанэн пала Библия.
8. Васо трэбуй, кай о мануш тэ авэл, хоть еқвар пэ амари собрания? Росԥэнэн.
8 Трэбуй тэ ақарас лэ манушэн, хоть пэ ек амари собрания. Васо? Важ кода кай, кала вонэ авэна, вонэ додиқэна, кай лэ Иеговастирэ свидетеля сытярэн лэ чачимасти анда Библия и поможын лэ манушэнди тэ уӷанэн лэ Дэвлэс. Вонэ диқэна, кай на шонпэ кода, сар терэлпэ андэ лэ Иеговастири орӷанизацыя и сар терэлпэ андэ хохавнэ веры (Исаия 65:13). Пэ када и шутэ сама о Рей и Линда, савэ жувэн андэ США. Найбут бэрша палпалэ вонэ закамлэ тэ ԥирэн андэ қандиря. Вонэ патянас андо Дэл и камэнас тэ уӷанэн пала лэстэ. Важ када вонэ закамлэ тэ жан андэ всаворэ қандиря, савэ исин андэ лэнго форо, ай лэн сас фартэ бут. Вонэ закамлэ тэ витидэн, кай андэ қандири, андэ сави вонэ лэна тэ ԥирэн, тэ авэл акэ со. Пэрво, лэнди трэбуй сас тэ уӷанэн варисо нэво пала Дэл, кала авэн андэ қандири. Дуйто, па мануша, савэ авэн андэ қандири трэбуй тэ дицол, кай вонэ тэлён лэ Дэвлэсти. Прожыля най ек бэрш и вонэ обжылэ всаворэ қандиря, ай кода, со родэнас, кадя и на виарақлэ. Кала вонэ котэ тэлёнас лэ Дэвлэсти, вонэ нисо нэво на уӷанэнас, ай па лэ манушэндири йда дицолас, кай вонэ на стон патив по Дэл. Кала вонэ слинэ андэ послиднё қандири, сави сас андэ лэнго форо, и Линда лагля пэ бути, ай о Рей лагля цэрэ. Кала во проладэлас котэ, кай тидэнпэ лэ Иеговастирэ свидетеля, во погиндосардя: «Ай васо и интя тэ на зажав и тэ на диқав, со котэ терэн?» О Реё сас фартэ лошало. Всаворэ лэ Иеговастирэ свидетеля, савэ котэ стидэпэ слинэ драго утидэ, сас лошалэ тэ диқэн лэс и ԥэнэнас лэсти анда оди «доров». О Реё бэшля пэ пэрво рядо и кода, со во ашундя, фартэ лэсти чалеля. Па лэ Павлостирэ алава лэ манушэсти, саво пэрво разо авеля пэ христианско собрания, фартэ чалёла, со во ашунэла и во ԥэнэна: «Па чачимастэ тумэнца о Дэл!» (1 Коринфянам 14:23 жы кай 25). Лэ Реёса кадя и сас. Во ля тэ ԥирэл кордэ, кай тидэнпэ лэ Иеговастирэ свидетеля кажно курко, ай тоди и по машкар курко. Лэса ля тэ ԥирэл и Линда. Хоть лэнди сас пала 70 бэрш, вонэ линэ тэ сытён па Библия, ай тоди болделэ.
КОДА, СО ДЭН И ԤРАЛА АНДА ЛЭ ИЕГОВАСТИРИ ОРӶАНИЗАЦЫЯ, ПОМОЖЫЙ ТЭ ЗАДАС ДУМА МАНУШЭНЦА
9, 10. а) Васо и алава анда буклеторя драго поможын тэ задас дума лэ манушэнца? б) Росԥэнэн, сар тэ дэн дума па буклето «Со када лэ Дэвлэско Царство?».
9 Буклеторя. Амэндэ исин восемь буклеторя, савэ поможын тэ задас дума лэ манушэнца. Лэн линэ тэ вимэкэн андо 2013 бэрш и кодэлэ разостар вимэклэ варикай панч миллиардоря! Кадэла буклеторя лашэ кодэлэса, кай кала ту сытёс тэ росԥэнэс па ек, тоди тутэ вижала тэ росԥэнэс и па авэр. Васо? Важ кода кай вонэ стердэ всаворэ сар ек, кати пэ разни темы. Но сар пар лэндэ тэ задэс дума манушэнца?
10 Ԥэнаса, ту камэс тэ задэс дума па буклето «Со када лэ Дэвлэско Царство?». Сыкав лэ манушэсти, пала со пушэлпэ пэ пэрво страница и тоди пуш: «Ту варикала загиндосаспэ, со када лэ Дэвлэско Царство?» Тоди сыкав и трин гиндоря, савэ котэ исин и пуш, саво витидоп во. Кала, о мануш ԥэндя на ԥэн, кадя када чи най, ай ԥэрнав о буклето и сыкав о подзаӷоловко «Со ԥэнэнпэ андэ Библия» и проадинон и стихоря, савэ котэ запистромэ, Даниила 2:44 и Исаия 9:6. Дэ дума май англэ, сар тутэ када вижала. Тоди шу сама лэ манушэстири пэ кода, кай пушэлпэ «Сави авэла и жизнь, кала авэла править лэ Дэвлэско Царство?», саво тала подзаӷоловко «Погиндосар». Када поможыя тути тэ подэс дума и авэр разо. Кала ту пэ авэр разо авэса лэ манушэстэ, подэ дума лэса пала 7 уроко анда брошура «Добрая весть от Бога». Кадэя брошура инке ек анда кода, со дэн и ԥрала анда лэ Иеговастири орӷанизацыя, кай тэ лас тэ сытярас лэ манушэн па Библия.
И ԤРАЛА АНДА ОРӶАНИЗАЦЫЯ ДЭН КОДА, СО ПОМОЖЫЙ МАЙ ФАРТЭ ТЭ ПАТЯС ЛЭ АЛАВЭНДИ АНДА БИБЛИЯ
11. Пэр со трэбуй тэ шас сама, кала витидас, сави брошура тэ дас манушэнди? Со амэнди трэбуй тэ ӷанас пала кадэла брошуры?
11 Брошуры. «Сторожэво башня» и «Пробудитесь!» кадэла брошуры вимэкэн пэ люма со май бут. Лэн пэрэандярэн пэ со май бут шыба. Лэн адинон андэ разни страны. Важ када и темы, савэ андэр лэндэ, подтидэн кадя, кай лэ манушэнди тэ чалёл лэн тэ адинон, кай тэ на жудоп вонэ. Па кадэла брошуры амэ поможысарас лэ манушэнди тэ виарақэн годявэрнэ алава, савэндар лэндири жызня ашэла инке май лащи. Ай спэрва трэбуй тэ полас, важ кастэ кадэла брошуры?
12. а) Важ кастэ вимэкэн и брошура «Пробудитесь!» и васо ла вимэкэн? б) Росԥэнэн, сар тумэ найдэлмут варикасти динэ кадэя брошура?
12 «Пробудитесь!» важ и мануша, савэ фартэ набут ӷанэн, со пистромэ андэ Библия. Вонэ моӷут нисо тэ на ӷанэн, сости па чачимастэ сытярэл и Библия. Чи вонэ парашэлэ тэ патян кодэлэсти, сости сытярэн андэ веры. Ай можэт вонэ на полэн, кай кода, со пистромэ андэ Библия, поможыя лэнди. Ӷлавно, васо пистромэ и брошура «Пробудитесь!», кай тэ поможый лэ манушэнди, савэ адинон ла, тэ патян, кай о Дэл исин (Римлянам 1:20; Евреям 11:6). Инке, со пистромэ андэ кадэя брошура, поможый тэ ашэл и вера май састи андэ кода, кай андэ Библия лэ Дэвлэстирэ алава (1 Фессалоникийцам 2:13). Акэ, савэ темы пистромэ андэ брошура «Пробудитесь!» андо 2018 бэрш: «Ключ к счастью», «12 секретов счастливых семей» и «Помощь тем, кто скорбит».
13. а) Важ кастэ вимэкэн и брошура «Сторожэво башня», кай тэ роздас? б) Росԥэнэн, сар тумэ найдэлмут варикасти динэ кадэя брошура?
13 Андэ брошура «Сторожэво башня», кай роздас, пистромэ, сости сытярэн и алава анда Библия. Вонэ сытярэн лэ манушэн, савэ ужэ стон патив по Дэл и пэ лэстирэ алава анда Библия. Но дажэ, сар вонэ ӷанэн варисо анда Библия, вонэ ӷанэн най вся кадя, сар исин (Римлянам 10:2; 1 Тимофею 2:3, 4). Акэ, савэ темы запистромэ андэ брошура «Сторожэво башня», кай тэ роздэн, андо 2018 бэрш: «И доси адес поможын и алава анда Библия?», «Со авэла англэ?» и «О Дэл любий амэн?».
И ԤРАЛА АНДА ЛЭ ИЕГОВАСТИРИ ОРӶАНИЗАЦЫЯ ДЭН КОДА, СОСТАР ОДИ КАМЭЛ ТЭ ТЕРЭЛ ВАРИСО
14. а) Васо амэ сыкавас штар видео, савэ динэ и ԥрала анда лэ Иеговастири орӷанизацыя? б) Росԥэнэн, сар тумэндэ вижыля варикасти тэ сыкавэн ек анда амарэ видео?
14 Видео. Андэ амарэ деса и плотникоря терэн бути электрическонэ пилэнца, дреленца и шлифовальнонэ машынкэнца, савэ терэн лэ вудудэстар. Ай кала жувэлас о Иисусо, кай и плотникоря на сас кацавэ инструменторя. Кала амэ адес росԥэнас пала Дэл, амэндэ исин най кати литература, ай инке и райканэ видео, савэ дэн и ԥрала анда лэ Иеговастири орӷанизацыя. Штар андар лэндэ «Состэ тэ уӷанэс и Библия?», «Сар амэ дас помощь тэ уӷанэн и Библия?», «Со терэн андо зало, кай тидэнпэ лэ Иеговастирэ свидетеля?», «Кто такие Свидетели Иеговы?». Кажно анда кадэва видео жал май набут, чем дуй минуты и важ када фартэ вушэро тэ сыкавас лэн лэ манушэсти, кала дас дума пэрво разо. Ай кодэла видео, савэ жан май бут, амэ сыкавас, кала авас каринг о мануш дуйто разо чи кодэлэнди, кастэ исин время. Кадэла видео райканэ, важ кода кай лэндар о мануш можэт тэ закамэл тэ сытёл па Библия чи тэ авэл пэ собрания.
15. Росԥэнэн, сар лэ манушэс лэл лэ одестар, кала во диқэл о видео пэ пэстири шыб?
15 Ек амари ԥэй додиқля манушня, сави пэрэлагля анда Микронезия. Сар вой уӷангля, кай и манушни дэл дума пэ шыб яп, и ԥэй сыкадя лати о видео «Состэ тэ уӷанэс и Библия?», саво пэ кадэя шыб. Кала и манушни ашундя, кай о видео пэ латири шыб, вой ԥэндя: «Када пэ мэрни шыб. Мэ нащи патяв андэ када! Кодэва, ко дэл дума, па кодэва жэ острово, катар и мэ. Во дэл дума пэ мэрни шыб!» Тоди вой ԥэндя, кай камэл тэ проадиной и тэ продиқэл вся, со исин пэ латири шыб по сайто jw.org (Диқэн Деяния 2:8, 11). Ай акэ инке, со сас, кала сыкадэ кадэва видео. Ек амари ԥэй жувэл андэ США. Ай лако плиминико жувэл аврэтэ, котэ, кай амэнди на дэн тэ терас нисави дила важ о Дэл. И ԥэй бишалдя лэсти ссылка по видео, саво сас пэ лэстири шыб. Кала о плиминико продиқля лэс, во пистросардя лати: «Мэ со май фартэ шутэм сама, кай и люма андэ вас кай о фартэ зорало и найлашо правителё. Мэ манглэм, кай ман тэ сытярэн па Библия».
И ԤРАЛА АНДА ЛЭ ИЕГОВАСТИРИ ОРӶАНИЗАЦЫЯ ДЭН КОДА, СО ПОМОЖЫЙ ТЭ СЫТЯРАС ЛЭ ЧАЧИМАСТИ
16. Росԥэнэн, состэ трэбуй и брошуры а) «Ашун лэ Дэвлэс и жувэса вечно»? б) «Добрая весть от Бога»? в) «Кто сегодня исполняет волю Иеговы?».
16 Брошуры. Со кала лэ манушэстэ, савэс амэ сытярас лэ чачимасти, нинай литература пэ лэстири шыб чи во на ӷанэн драго тэ адиной? Тоди амэ сытяраса лэс па брошура «Ашун лэ Дэвлэс и жувэса вечно»d. Ай кода, со пистромэ андэ брошура «Добрая весть от Бога», драго поможый тэ залас тэ сытярас лэ манушэн па Библия. Сыкав лэ манушэсти и 14 темы, савэ пистромэ пэ палуни обложка и пуш, пала сави андар лэндэ во камэл май бут тэ уӷанэн. Тоди подэ дума лэса пэ кодэя тема. Васо тэ на стерэс кадя, кала авэс кай о мануш авэр разо? Трито брошура анда кода, со дэн и ԥрала анда лэ Иеговастири орӷанизацыя, када «Кто сегодня исполняет волю Иеговы?». Кадэя брошюра, кай и мануша, савэ сытён па Библия, тэ уӷанэн пала лэ Иеговастири орӷанизацыя. Кай тэ уӷанэс, сар и алава анда кадэя брошура поможын, кала сытярэс лэ манушэн па Библия, дик и тетрадка «Амаро христианско дром и служения» пала марто 2017 бэрш.
17. а) Состэ трэбуй и книжки, па савэ сытярас анда Библия? б) Со трэбуй тэ терэн всаворэ, ко болделя и васо?
17 Книжки. Кала тумэ линэ тэ сытярэн па брошура, тоди андэ любо время, кала закамэна, пэрэжан пэ книжка «Сости амэ сытювас анда Библия?». И алава андар латэ поможын тэ уӷанэн, сости сытярэн и алава анда Библия. Кала тумэ парашэлэ тэ сытярэн па кадэя книжка, и диқэн кай лэ манушэстэ и вера ашэл май састи, тоди сытярэн лэс па книжка «Сохраняйте себя в Божьей любви»e. Андэ кадэя книжка пистромэ алава, пэ савэ ритярдёлпэ лэ Дэвлэско законо. Вонэ поможын лэ манушэсти тэ жувэл па кадэла алава. Сэрэн, кай дажэ кала о мануш болделя, трэбуй тэ на парашэл тэ сытёл па кадэла лэдуй книжки. Васо? Кай тэ уӷанэн и тэ полэл вся, со котэ пистромэ. Када поможыя тэ авэл лэстэ састи вера андо Иегова и тэ на парашэл тэ кандэл лэс. (Адиносар Колоссянам 2:6, 7f).
18. а) Со амэ закамаса тэ терас, кала адиносарас 1 Тимофею 4:16? б) Пала со трэбуй тэ сэрас, кала сытярас па кода, со дэн и ԥрала анда лэ Иеговастири орӷанизацыя?
18 Амэ, лэ Иеговастирэ свидетеля, трэбуй тэ сытярас лэ манушэн «лэ чачунэ алавэнди пала лащи весть», савэ поможын лэ манушэнди тэ аштярэн тэ жувэн вечно (Колоссянам 1:5; адиносар 1 Тимофею 4:16g). Андэ када амэнди поможыя вся, со дэн и ԥрала анда лэ Иеговастири орӷанизацыя. (Диқэн и рамка «Кода, со дэн и ԥрала анда лэ Иеговастири орӷанизацыя, кай тэ росԥэнас пала Дэл».) Терам вся, кай май драго тэ полас, сар пар лэндэ тэ сытярас. Кажно андар мэндэ екжэно витидэл, соса и кала анда кода, со дэн и ԥрала анда лэ Иеговастири орӷанизацыя тэ росԥэнэн пала Дэл. Но амэ камас най кати тэ роздас амари литература и тэ ашавас ла кодэлэнди, касти всаек и лащи весть. Важ амэндэ ӷлавно тэ поможысарас тэ ашэн лэ Христостирэ ученикоря кодэла, кас «цырдэл каринг и вечно жызня». Тэ поможысарас лэ манушэнди, савэ на хохавэн, на заваздэн о шэро и анда оди камэн тэ ӷанэн о чачимос (Деяния 13:48; Матфея 28:19, 20).
a 2 Тимофею 2:15: «Тер вся, со можэшь, кай о Дэл тэ хвалий тут, и тер дила кадя, кай тэ на авэл, пала со тэ лажал, и росԥэн о чачимос кадя, сар во исин».
b Деяния 13:44 жы кай 48: «Пэ авэр суббота, па вся форо стидэпэ чуть найвсаворэ мануша тэ ашунэн лэ Дэвлэстирэ алава. Кала и иудеёря додиқлэ, кай кадя бут мануша, вонэ росхоляйлэ, кай лэн кадя на ашунэн и линэ тэ дэн дума против кода, со росԥэнэнас о Павло и тэ ԥэнэн пала када найлашэ алава. Тоди о Павло и о Варнава би дарако ԥэндэ: „Трэбуй сас, кай лэ Дэвлэстирэ алава май англал тумэнди тэ росԥэнэн. Но важ кода кай тумэ отшон лэн и гиндон, кай на ашэн тэ жувэн вечно, амэ росԥэнас аврэ народонэнди“. О Иегова дя амэнди законо, и важ када во ԥэндя: „Мэ стодэм тут вудудэса важ и народоря, кай ту тэ фэрис лэн жы кай ла ԥувьятирэ краёря“. Кала када ашундэ и мануша анда авэр народоря, вонэ линэ тэ лошавэн и драго тэ дэн дума важ лэ Иеговастирэ алава. И всаворэ, кас цырдэлас каринг о чачимос, саво дэл вечно жызня, линэ тэ патян».
c Диқэн и статья «Плотницкое ремесло» и рамка «Набор инструментов плотника» андэ брошура «На пороге конца света?».
d Сар о мануш на ӷанэн тэ адиной, тоди сытяр лэс па брошура «Ашун лэ Дэвлэс», андэ сави набут алава и май бут картинки.
e Кала пэ русско шыб вимэкэна и книжка «Оставайтесь в любви Бога» трэбуй авэла тэ сытярэс пар латэ.
f Колоссянам 2:6, 7: «Важ кода кай патяе андо Ӷосподо, андо Иисус Христос, и май дур гиндон и терэн кадя, сар во. Май драго полэн лэс, май фартэ патян андэр лэстэ и нико тумэн мэк на змарэл, кай тумэ тэ патян андэр лэстэ. Тэ авэл тумэндэ фартэ састи вера, сар тумэн и сытярдэ и тэ авэн фартэ блаӷодарни».
g 1 Тимофею 4:16: «Вся время дик пала пэстэ и пала кода, сар ту сытярэс. На параш када тэ терэс. Кала кадя терэса, фэриса и пэс, и кодэлэн, ко тут ашунэн».