Сар тэ фэрисарас пэско ди?

1, 2. Васо о Иегова любияс лэ Соломонос и сар во лэс блаӷословисардя?

О СОЛОМОНО ашэля царёса андо Израилё, кала во инке сас тэрно мануш. Кала во кати ля тэ правий, во андо суно диқля лэ Иеговас. О Иегова ԥэндя лэсти: «Манг мандар, со тэ дав тути». О Соломоно ԥэндя: «Мэ инке тэрно... [...] Дэ пэстирэ слуӷости кандино ди, кай тэ сындосарав тиро народо» (1 Царей 3:5—10). О Соломоно бут на мангэлас. Во мангля кати «кандино ди»! Акана амэ полас, васо о Иегова любияс лэ Соломонос (2 Самуила 12:24). Лэ Дэвлэсти чалеля кода, со мангля о Соломоно, и во дя лэсти «мудро и годявэрно ди» (1 Царей 3:12).

² Пока о Соломоно кандэлас лэ Иеговас, о Иегова лэс андэ вся блаӷословияс. О Иегова дя лэсти честь тэ строий о храмо «важ лэ Иеговаско алав, саво лэ Израилёско Дэл» (1 Царей 8:20). О Соломоно сас ашунгло кодэлэса, кай сас фартэ мудро, важ кода кай и мудрость лэсти дя о Дэл. Инке о Соломоно запистросардя лэ Дэвлэстирэ алава андэ трин книӷи андэ Библия. Ек андар лэндэ, када и Притчи.

3. Со амэ уӷанаса анда кадэя статья?

³ Андэ Притчи о алав «оди» пистромэ варикай 100 разоря. Ек андар лэндэ када Притчи 4:23. Катэ пистромэ: «Май бут, со трэбуй тэ фэрис, фэрисар пэско ди». Пала саво ди катэ пистромэ? Атвето амэ уӷанаса анда кадэя статья. Кадяжэ амэ уӷанаса, со терэл о Сатана, кай тэ залэл и тэ римой амаро ди и сар амэнди тэ фэрисарас пэс кадэлэстар? Сар амэ камас тэ на парашас тэ кандас лэ Иеговас, тоди трэбуй тэ уӷанас атветоря пэ кадэла вопросоря.

СО КАДА «ОДИ»?

4. Со када «оди», пала саво пистромэ андэ Притчи 4:23?

⁴ Андэ Притчи 4:23 пистромэ о алав «оди». Када сыкавэл, со амэ гиндосарас, со амэндэ андо ди, со камас тэ терас и васо. Кадяжэ «оди» сыкавэл, савэ амэ па чачимастэ исин, ай най сар авэр диқэн пар мэндэ.

5. Сар кода, кай амэ трэбуй тэ диқас пала пэско зор, поможый тэ полас, кай кадяжэ трэбуй тэ диқас и пала амаро «ди»?

⁵ Подам дума, васо трэбуй тэ диқас пала пэско «ди». Кай о зор тэ авэл лашо, трэбуй тэ хас о хамос, саво на римоя о зор и тэ заласпэ спортоса. Кадяжэ, кай андэ амаро ди тэ авэл кода, со чалёл лэ Иеговасти, амэнди трэбуй тэ адиносарас пала лэстэ кажно дес и кажно дес тэ сыкавас пэ дила пэстири вера андо Иегова. Амэ када терас, кала жувас па Библия и росԥэнас аврэнди андэр со патяс (Римлянам 10:8—10; Иакова 2:26). Но исин инке варисо. Дэсаво насвалимос на дицол и о мануш можэт тэ гиндой, кай лэстэ лашо зор. Кацаво можэт тэ авэл и амарэ «одеса». Амэ можэм тэ гиндосарас: «Мэ на промэкав тэ терав вся, через со и вера авэла састи». Но андо ди амэ ужэ лас тэ камас кода, со на чалёл лэ Иеговасти (1 Коринфянам 10:12; Иакова 1:14, 15). Амэнди трэбуй тэ сэрас, кай о Сатана камэл, кай амэ тэ гиндосарас сар во. Сар во када терэл? И сар амэнди тэ фэрисарас пэс кадэлэстар?

СО ТЕРЭЛ О САТАНА, КАЙ ТЭ ГИНДОСАРАС САР ВО?

6. Сави цэль кай о Сатана и сар во ла домардёл?

⁶ О Сатана камэл, кай амэ тэ авас кацавэ жэ сар и во, кай амэ тэ любисарас кати корко пэс и тэ жас против кода, сости сытярэл о Иегова. О Сатана нэ можэт тэ заставий амэн тэ гиндосарас и тэ терас сар во, важ када во домардёл када авря ригатар. Ԥэнаса, во терэл кадя, кай паша амэндэ тэ авэн мануша, савэ ужэ гиндон и терэн сар во (1 Иоанна 5:19). Во гиндой, кай амэ ласа тэ проандярас лэнца и время, хоть и полас, кай вонэ римона о лашимос, савэсти амэ сытелям лэ Иеговастар. И тоди амэ ласа тэ гиндосарас и тэ терас, сар о Сатана (1 Коринфянам 15:33). Кай о Сатана вижыля тэ стерэл кадя лэ Соломоноса. Кай о Соломоно сас бут жувля, савэ патянас хохавнэ дэвлэнди, и через лэндэ лэско ди по набут ашэля найлашо (1 Царей 11:3).

7. Со инке терэл о Сатана, кай амэндэ тэ пэрэжан лэстирэ гиндоря и васо амэнди трэбуй тэ фэрисавас?

⁷ Через и киноря и разни пэрэдачи о Сатана терэл, кай лэ манушэндэ тэ пэрэжан лэстирэ гиндоря. Во полэл, кай амэнди най кати чалёл тэ ашунас, кала авэр росԥэнэн кода, со лэнца сас чи со тердяпэ. Но и полэл, кай через када, амэ сытювас тэ гиндосарас, тэ терас кадя, сар во и андо ди ашэл кадя, сар лэстэ. Кадя жэ и о Иисусо фартэ драго сытярэлас через кода, со сас аврэ манушэнца. Сэрэн и притча пала лашо самаритянино и пала блудно шаво? (Матфея 13:34; Луки 10:29—37; 15:11—32). Через и киноря и разни пэрэдачи амэндэ моӷут тэ пэрэжан лэ Сатанастирэ гиндоря кодэлэндар, кастэ вонэ ужэ исин. Када, сар о насвалимос, саво пэрэжал аврэ манушэстар. Канешно, исин киноря и разни пэрэдачи, савэ кала амэ диқас, амэ отцыювас и дажэ сытювас лэ лашимасти. Но всаек трэбуй тэ фэрисавас. Кала витидэс, со тэ диқэс, пуш пэстар: «Сытярэл ман кадэва кино чи пэрэдача, кай можно тэ терав кода, со камэл и ӷрешно тила?» (Галатам 5:19—21; Эфесянам 2:1—3). Если амэ полям, кай амэндэ ужэ пэрэжылэ дэсавэ лэ Сатанастирэ гиндоря, со тэ терас? Терам вся, кай кадэла гиндоря амэндэ тэ на авэн!

8. Сар тэ поможын пэстирэ бэятонэнди, кай вонэ тэ фэрин пэско ди?

⁸ Дада и дэя, тумэнди фартэ трэбуй тэ фэрин пэстирэ бэятонэн лэ Сатанастар, саво терэл вся, кай тэ римой лэнго ди. Кай тумарэ бэятцэ тэ на занасвавэн, тумэ терэн вся. Тумэндэ андо цэр вужимос, тумэ вишон вся, состар тумэ и тумарэ бэятцэ моӷут тэ занасвавэн. Тумэ кадяжэ трэбуй тэ ӷанэн и тэ полэн, савэ киноря и савэ пэрэдачи диқэн тумарэ бэятцэ, андэ савэ иӷры цэлэнпэ андо телефоно и пэ савэ сайторя зажан. Васо? Важ кода кай лэндэ моӷут через вся када тэ пэрэжан лэ Сатанастирэ гиндоря. О Иегова приԥэндя тэ диқас пала пэстирэ бэятцэ, сар во сытярэл (Притчи 1:8; Эфесянам 6:1, 4). Важ када, кала приԥэнэн лэ бэятонэнди, со лэнди трэбуй тэ терэн, ԥэнэн када па библейски принцыпоря. Сар и бэятцэ цыкнорэ, ԥэн, со лэнди можно тэ диқэн, ай со най. И поможысар лэнди тэ полэн, васо ту кадя ԥэндян (Матфея 5: 37). Кала тумарэ бэятцэ подбарёна, сытярэн лэн кадя, кай вонэ екжэнэ тэ полэн па лэ Дэвлэстирэ законоря, со лашо, ай со най (Евреям 5:14). Тумэ трэбуй тэ сэрэн, кай тумарэ бэятцэ май бут сытён кодэлэстар, со тумэ дэн дума, сар тумэ пэс андярэн и со терэн (Второзаконие 6:6, 7; Римлянам 2:21).

9. Саво гиндо о Сатана камэл тэ авэл амэндэ и васо кадэлэстар трэбуй тэ фэрисавас?

⁹ Со инке терэл о Сатана, кай андэ амаро ди тэ авэл кадя, сар лэстэ? Во терэл кадя, кай амэ май бут тэ патяс кодэлэсти, со ԥэнэн и мануша, ай най лэ Дэвлэстири мудрость (Колоссянам 2:8). Подаса дума пала ек гиндо, саво о Сатана камэл, кай тэ авэл лэ манушэндэ. Када, кай о мануш тэ авэл барвало. Кодэла, ко жан каринг када, моӷут тэ ашэн барвалэ, ай моӷут и най. Но вонэ по любому тердён по дром, савэстар трэбуй тэ фэринпэ. Васо? Вонэ кадя камэн тэ барвадён, кай ӷотови тэ отдэн пэско зор, тэ хасарэн о ери и дружба лэ Дэвлэса (1 Тимофею 6:10). Сар жэ амэ блаӷодарни амарэ небеснонэ дадэсти, кай во поможый амэнди правильно тэ диқас пэ ловэ! (Экклезиаст 7:12; Луки 12:15).

САР ТЭ ФЭРИСАРАС ПЭСКО ДИ?

10, 11. а) Со тэ терас, кай тэ фэрисарас пэско ди? б) Со андэ дэлмутни время терэлас о сторожо и соса и совесть шолпэ пэ лэстири бути?

¹⁰ Если амэ камас тэ фэрисарас пэско ди, амэ трэбуй тэ полас, состар тэ фэрисавас. И кала када полас, йто варисо тэ терас. Андэ Притчи 4:23 пистромэ, кай о алав «тэ фэрис», када алав, саво ԥэнэнас андэ дэлмутни время, кала о сторожо тердёлас пэ стина и диқэлас, состар чи кастар трэбуй сас тэ фэринпэ. Во трэбуй сас тэ терэл кадя, кай всаворэ тэ уӷанэн, кай пашол и бида. Кода, со терэлас о сторожо, поможый и амэнди тэ полас, со тэ терас, кай о Сатана тэ на залэл амаро ди.

¹¹ Андэ дэлмутни время и сторожоря и кодэла, ко тердёнас паша вороты поможынас ек аврэсти андэ бути (2 Самуила 18:24—26). Вонэ вмести диқэнас, кай лэ форостирэ вороты тэ авэн заԥандадэ кажно разо, кала пашолас каринг о форо о враӷо (Неемия 7:1—3). Амари совестьb, сави амэ сытярас па Библия, сар о сторожо, подԥэнэн амэнди, кала о Сатана камэл тэ залэл амаро ди. Аврэ алавэнца подԥэнэн, кала о Сатана камэл тэ парувэл амарэ гиндоря, кода, со амэндэ андо ди, кода, со камас тэ терас и васо. Амэнди трэбуй тэ приашундювас каринг оди и ԥэнаса, тэ заԥандавас и вороты.

12, 13. Со амэнди можэт тэ закамэлпэ тэ стерас и сар тэ на подаспэ кадэлэсти?

¹² Подам дума, сар тэ на домэкас, кай о Сатана тэ парувэл амарэ гиндоря. Андэ Библия пистромэ: «Кай тэ на авэл тумэндэ нисо билажавардо и нисаво мэлалимос» (Эфесянам 5:3). Со амэ стераса, если кодэла, каса амэ сытювас андэ школа чи терас бути, лэна тэ дэн дума пала варисо билажавардо? Амэ ӷанас, кай амэнди трэбуй «тэ отшас о найлашимос и кода, со камэлпэ лэ манушэнди андэ люма» (Титу 2:12). Можэт амэнди закамэлапэ тэ ашунас, пала со дэн дума и ровэсникоря чи тэ диқас и карточки, савэ вонэ сыкавэн. Совесть, када амаро сторожо (Римлянам 2:15). Андэ кадэя время трэбуй «тэ заԥандавас и вороты», када тэ лас тэ дас дума пала варисо авэр чи тэ ужастар.

¹³ И мануша тасавэн пар мэндэ, подмарэн амэн, кай амэ тэ гиндосарас и тэ терас, сар вонэ. Но амэнди трэбуй тэ авас смили. Патян, кай о Иегова диқэл, сар амэнди можэт тэ авэл ԥарэс. Во дэла амэнди зор и мудрость, кай амэ тэ на подаспэ лэ Сатанасти (2 Летопись 16:9; Исаия 40:29; Иакова 1:5). Но со амэнди инке тэ терас, кай тэ фэрисарас пэско ди?

СТОРОЖЫН

14, 15. а) Сости амэ трэбуй тэ ԥэрнавас пэско ди и сар када тэ терас? б) Сар и алава анда Притчи 4:20—22 поможына амэнди тэ адиносарас и Библия кадя, кай май драго ла тэ полас? (Диқэн и рамка «Пала со тэ гиндосарас, кала адиносарас и Библия?».)

¹⁴ Кай тэ фэрисарас пэско ди, трэбуй най кати тэ заԥандавас и вороты, кай тэ на зажал о найлашимос, но и тэ ԥэрнавас пэско ди, кай тэ зажал о лашимос. Рисаваса каринг лэ форостири стина. Кала каринг о форо пашолас о враӷо кодэла, ко тердёнас паша вороты, ԥандавэнас лэн. Но кала анэнас о хамос чи варисаво товаро, и вороты ԥэрнавэнас. Тэ авелоп и вороты вся и время заԥандадэ, тоди андо форо авелоп боқалимос. Кадя жэ и амэнди трэбуй тэ ԥэрнавас пэско ди, кай котэ тэ авэн бут лэ Иеговастирэ гиндоря.

¹⁵ Андэ Библия запистромэ лэ Иеговастирэ гиндоря. Важ када, кажно разо, кала амэ ла адиносарас, вонэ парувэн амарэ гиндоря, парувэн кода, со амэндэ андо ди и кода, сар амэ андярас пэс. Со тэ терас, кай кала адиносарас и Библия май драго тэ полас ла? Фартэ трэбуй тэ мангаспэ. Ек ԥэй ԥэндя: «Кай тэ адиносарав и Библия, мэ спэрва мангавпэ. Кадяжэ мангав лэ Иеговас, кай во тэ поможый манди тэ додиқав андэ Библия „удивительни дилы“» (Псалом 119:18). Кадяжэ трэбуй тэ гиндосарас пала кода, со адиносардям. Кала амэ мангаспэ, адиносарас лэ Дэвлэско алав и гиндосарас пала кода, со проадиносардям, тоди лэ Иеговастирэ гиндоря фартэ дур зажан андэ амаро ди и амэ лас лэн тэ любисарас. (Адиносар Притчи 4:20—22c; Псалом 119:97.)

16. Сар амэнди поможый амари телевидения? Росԥэнэн.

¹⁶ Инке амэ домэкас, кай лэ Дэвлэстирэ гиндоря тэ парувэн амарэ, кала амэ диқас амари телевидения. Акэ со ԥэнэн ек хулай и лэстири хулаи: «Амари телевидения, кай вижал кажно шон, када атвето пэ амарэ молитвы! Вонэ придэн амэнди зор и дэн радость, кала амэнди ԥарэс по ди чи кала здэлпэ, кай амэ екжэнэ. И диля па амари телевидения дилабэн амэндэ вся и время. Вонэ дилабэн, кала амэ тавас тэ хас, прилас чи просто пас чаё». Кода, со исин пэ амари телевидения, сытярэл амэн тэ гиндосарас кадя, сар о Иегова и тэ на терас кадя, сар камэл о Сатана.

17, 18. а) Со амэ сыкавас, сар пистромэ андэ 1 Царей 8:61, кала терас кода, сости сытювас кай о Иегова? б) Сости сытювас кай о Езекия? в) Пала со амэ можэм тэ мангаспэ, сар пистросардя о Давидо андэ Псалом 139:23, 24?

¹⁷ Кажно разо, кала амэ терас правильно и диқас, саво лашимос кадэлэстар вижал, амари вера ашэл май састи (Иакова 1:2, 3). Амэ кадэлэсти фартэ ради. Важ кода кай о Иегова абурой амэнца и ԥэнэн пар мэндэ, кай амэ лэстирэ бэятцэ. Тоди амэнди инке май фартэ камэлпэ тэ терас кода, со лэсти чалёл (Притчи 27:11). Кажно разо, кала амэндэ ԥаримос, амэ сыкавас, кай служысарас амарэ дадэсти, саво диқэл и фэрий амэн «анда вся оди» (Псалом 119:113). Кадяжэ амэ доԥэнас, кай любисарас лэ Иеговас, кандас лэс анда вся оди, камас тэ ритярас лэско законо и вся и время тэ терас па лэстирятэ. (Адиносар 1 Царей 8:61d.)

¹⁸ Аваса амэ тэ шылисавас? Канешно, важ кода кай амэ найсовершэни. Но кала тумэ шылинпэ, сэрэн пала Езекия. Во дэкала терэлас най кадя. Но «анда вся оди» каияспэ и май дур служыяс лэ Иеговасти (Исаия 38:3—6; 2 Летопись 29:1, 2; 32:25, 26). Терам вся, кай амэндэ тэ на пэрэжан лэ Сатанастирэ гиндоря. Мангампэ, кай амэндэ тэ авэл «кандино ди» (1 Царей 3:9; адиносар Псалом 139:23, 24e). Амэндэ вижала тэ ашаспэ лэ Иеговаса, кала амэ фэрисарас пэско ди.