СТАТЬЯ, КАЙ ТЭ СЫТЮВАС 5
Васо амэ авас пэ собрании?
«Тумэ росԥэнэн пала кода, кай о Иисусо муля жы кай кодэя время, пока во на авэла» (1 КОРИНФЯНАМ 11:26).
ДИЛИ 18 Благодарны за выкуп
ПАЛА СО УӶАНАСА АНДА СТАТЬЯ?a
1. Со диқэл о Иегова, кала милионоря мануша авэн по Вэчэро? (Диқэн и картинка пэ обложка.)
КАЛА милионоря мануша авэн по Вэчэро тэ сэрэн пала лэ Иисусостири смэрть, о Иегова диқэл най кати, кай стидэпэ бут мануша, но и кажнонэ манушэс. Во диқэл кодэлэн, ко кажно бэрш авэн пэ кадэва Вэчэро. Варикас андар лэндэ ӷонин. Ай дэко най вся и время ԥирэл пэ собрании. Но по Вэчэро во полэл, кай трэбуй тэ авэл. О Иегова кадяжэ диқэл кодэлэн, ко авэл пэрво разо пэ кадэва Вэчэро, важ кода кай лэсти интересно.
2. Пала со амэ подаса дума андэ кадэя статья?
2 О Иегова лошало, кай диқэл скати дэ бут миро авэл по Вэчэро (Луки 22:19). Но важ лэстэ май куч най скати авелэ, ай васо вонэ авелэ. Андэ кадэя статья амэ подаса дума пала важно вопросо. Васо амэ авас най кати по Вэчэро, саво прожал кажно бэрш, но и кажно курко авас пэ собрании? Пэ кадэла собрании о Иегова заботийпэ пала кодэла, ко лэс любий.
Пэ вся и ԥув милионоря мануша авэн по Вэчэро, кай сэрэн пала лэ Иисусостири смэрть. (Диқэн абзацоря 1, 2.)
АМЭ НА ГИНДОСАРАС ПАЛА ПЭСТЭ БУТ
3. Васо амэ авас пэ собрания?
3 Амэ ԥирас пэ собрании, важ кода кай кадя амэ тэлювас лэ Иеговасти. Кадяжэ пэр лэндэ о Иегова амэн сытярэл. Кодэлэнди, ко бут пала пэстэ гиндой на чалёл, кала лэн варико сытярэл (3 Иоанна 9). Ай амэ лошалэ, кай о Иегова и лэстири арӷанизацыя сытярэн амэн (Исаия 30:20; Иоанна 6:45).
4. а) Со амэ сыкавас кодэлэса, кай авас пэ собрании? б) Васо, сар ԥэнэнпэ андэ 1 Коринфянам 11:23—26, амэнди трэбуй вся и время тэ авас по Вэчэро?
4 Кодэлэса, кай амэ авас пэ собрании амэ сыкавас, кай на гиндосарас пала пэстэ бут и камас тэ сытювас. Амэ авас по Вэчэро най кати, важ кода кай трэбуй. Кадя амэ кандас лэ Иисусос, саво ԥэндя: «Терэн када, кай тэ сэрэн пала мандэ». (Адиносар 1 Коринфянам 11:23—26b.) Кадэя особо собрания поможый амэнди тэ на хасарас о лашимос, саво авэла англэ и дэл тэ сэрас, сар дэ фартэ амэн любий о Иегова. Но о Иегова ӷанэн, кай амэнди трэбуй зор и кай амэн тэ подритярэн май часто, чем еқварэс андо бэрш. Важ када во заботийпэ, кай амэндэ тэ авэл кажно курко и собрании и во камэл, кай амэ пэр лэндэ тэ ԥирас. Кай тэ кандас лэ Дэвлэс и тэ ԥирас пэ собрании, амэнди трэбуй тэ на гиндосарас пала пэстэ бут. Амэ кажно курко отдас дэсави время, кай тэ ӷотовимся каринг и собрании и тэ авас пэр лэндэ.
5. Васо и мануша, савэ на гиндон пала пэстэ бут, камэн тэ авэн по Вэчэро?
5 О Иегова ақарэл всаворэн, ко камэл тэ сытёл лэстар. И кажно бэрш бут мануша, савэ на гиндон пала пэстэ бут, авэн по Вэчэро (Исаия 50:4). Кала вонэ авэн пэ кадэва Вэчэро, лэнди када кадя чалёл, кай вонэ закамэн тэ ԥирэн и пэ авэр собрании (Захария 8:20—23). Амэ лошалэ лэнца еқэҭанэ тэ сытювас кай о Иегова, саво поможый амэнди и фэрий (Псалом 40:17). Хэба можэт варисо тэ авэл май важно и май драго, чем тэ сытювас кай о Иегова и кай лэско любимо шаво, кай о Иисусо? (Матфея 17:5; 18:20; 28:20).
6. Сар кода, кай ек мурш на гиндояс пала пэстэ бут, закамля тэ авэл по Вэчэро?
6 Кажно бэрш амэ камас тэ ақарас май бутэ манушэн по Вэчэро. Бут мануша, савэ на гиндон пала пэстэ бут, авэн и када лэнди чалёл. Акэ со сас еқварэс. Дэсавэ бэрша палпалэ ек ԥрал дя о приӷласительно по Вэчэро еқэ муршэсти. Кодэва ля и приӷлашэния, но ԥэндя, кай лэстэ на вижала тэ авэл. Сар жэ о ԥрал дя наздив, кала додиқля, кай кодэва мурш всаек авеля по Вэчэро! Лэс ля лэ одестар кода, кай лэс драго прилинэ и во ля тэ ԥирэл кажно курко андо зало, кай тидэнпэ лэ Иеговастирэ свидетеля. Важ о бэрш во промэкля кати трин собрании. Васо во ля кадя тэ цэний и собрании? Важ кода кай на гиндояс пала пэстэ бут. Во парудя пэстирэ планоря и авеля по Вэчэро. О ԥрал, саво лэс ақардя, май интя ԥэндя: «Кадэва мануш чаче на гиндой пала пэстэ бут». О Иегова ақардя каринг пэстэ кадэлэ муршэс и акана во болделя (2 Самуила 22:28; Иоанна 6:44).
7. Сар кода, со амэ уӷанас, кала ԥирас пэ собрании и адиносарас и Библия, поможый амэнди тэ на гиндосарас пала пэстэ бут?
7 Кода, со амэ уӷанас, кала ԥирас пэ собрании и кала адиносарас и Библия, поможый амэнди тэ на гиндосарас пала пэстэ бут. Важ дэсавэ курте жы каринг о Вэчэро, пэ собрании май бут шон сама по Иисусо и пэ кода, сар во на гиндояс пала пэстэ бут, кала отдя пала амэндэ пэстири жызня. Ай сар ашэнпэ набут деса жы каринг о Вэчэро, амэ старысавас тэ проадиносарас анда Библия кода, сар о Иисусо муля и рисайля каринг и жызня. Вся када поможый амэнди инке май фартэ тэ цэнисарас, кай о Иисусо витиндя амэн. Важ кода кай амэ блаӷодарни анда вся оди, амэ камас кадя жэ, сар и о Иисусо тэ на гиндосарас пала пэстэ бут и тэ терас кода, со камэл о Иегова, дажэ кала када фартэ ԥарэс (Луки 22:41, 42).
АМЭНДИ ПОМОЖЫЙ И СМИЛОСТЬ
8. Андэр со дицэля лэ Иисусостири смилость?
8 Кадя жэ амэ старысавас тэ авас кацавэ жэ смили, сар о Иисусо. Погиндон, сар дицэля лэ Иисусостири смилость андэ послидни деса, англа лэстири смэрть. Во драго ӷанэнас, кай йто лэстирэ вороӷоря лэна лэстар тэ асанпэ, тэ марэн лэс, ай тоди казнина (Матфея 20:17—19). И всаек во сас ӷотово тэ пэрэандярэл вся када. Кала поджыля и время, во ԥэндя пэстирэ апостолонэнди, савэ лэс кандэн и савэ слинэ лэса андо Гефсиманско садо: «Ущен, авэн. Кодэва, ко ман придя ужэ пашэ» (Матфея 26:36, 46). Каринг о Иисусо авелэ, кай тэ залэн лэс, бут мануша, савэндэ сас оружыя андэ вас. Во вижыля англа лэндэ и ԥэндя, кай во кодэва, кас вонэ родэн и мангля лэ воинонэн тэ одмэкэн лэ апостолонэн (Иоанна 18:3—8). Сар дэ смило во стердя! Адес и помазани христианоря и «авэр бакрорэ» сытён лэ Иисусостар. Андэр со?
Кала смило авас пэ собрании, кадэлэса дас зор аврэнди (Диқэн о абзацо 9.)f
9. а) Васо дэкасти андар мэндэ трэбуй тэ авас смили, кай тэ на промэкас тэ авас пэ собрании? б) Сар кода, со амэ терас, поможый лэ ԥралэнди и лэ ԥэянди, савэ бэшэн андо баруно важ и вера?
9 Кай вся и время тэ ԥирэс пэ собрании, дэкала трэбуй тэ авэс смило. Дэсавэ андар мэндэ, ко авэл пэ собрании, на диқэн пэ кода, кай пэрэжудэ варисави бида, умэклэ и вас или варисо най кадя лэ зорэса. Ай аврэн тэ авэн пэ собрании на мэкэн и власти или варико анда ери. Погиндон, сар кода, со амэ терас, поможый лэ ԥралэнди и лэ ԥэянди, савэ бэшэн андо баруно важ и вера (Евреям 13:3). Кала вонэ ашунэн, кай амэ служысарас лэ Иеговасти и на диқас по ԥаримос, саво амэндэ исин, вонэ лэн зор и май дур тэ патян лэ Иеговасти, тэ на парашэн лэс тэ кандэн и тэ авэн смили. Кацаво жэ сас и кай о апостоло Павло. Андо Римо пэр лэстэ стодэ аресто и лэсти нащи сас тэ вижал анда цэр. Но во лошавэлас кажно разо, кала ашунэлас, кай и ԥрала на парашэн тэ служын лэ Иеговасти (Филиппийцам 1:3—5, 12—14). О Павло пистросардя письмо лэ евреёнэнди, сар ашэляпэ набут время, кай лэс тэ одмэкэн чи сразу посли кода. Андэр лэстэ во пистрояс лэ христианонэнди, савэ на парашэнас тэ кандэн: «Ԥрала, на парашэн тэ любин ек еқэс». Кадяжэ во ԥэндя тэ на промэкэн и «собрании» (Евреям 10:24, 25; 13:1).
10, 11. а) Кас амэнди трэбуй тэ ақарас по Вэчэро? б) Васо, сар пистромэ андэ Эфесянам 1:7, амэ када терас?
10 Кай тэ ақарас по Вэчэро лэ родос, кодэлэн, каса терас бути чи лэ сосидонэн, кадяжэ трэбуй тэ авас смили. Но васо всаек амэ лэн ақарас? Амэ кадя блаӷодарни лэ Иеговасти и лэ Иисусости, важ кода со вонэ важ амэндэ стердэ, кай нэ можэм тэ на ақарас. Амэ камас, кай и авэр мануша через о выкупо тэ полэн «лэ Дэвлэско лашимос, саво амэ на затердям». (Адиносар Эфесянам 1:7c; Откровение 22:17.)
11 Кала амэ авас пэ собрания, амэ сыкавас инке ек важно качество, саво исин май бут чем всаворэндэ кай о Иегова и кай лэско шаво.
АМЭ АВАС, ВАЖ КОДА КАЙ ЛЮБИСАРАС
12. а) Сар через и собрания, амари любовь ашэл инке май бари каринг о Иегова и каринг о Иисусо? б) Со, сар пистромэ андэ 2 Коринфянам 5:14, 15, амэнди трэбуй тэ терас, кай тэ сытювас лэ Иисусостар?
12 Амэ ԥирас пэ собрании, важ кода кай любисарас лэ Иеговас и лэ Иисусос. И кодэлэстар, со амэ уӷанас пэ собрании, амэ инке май фартэ любисарас лэн. Андо зало, кай тидэнпэ лэ Иеговастирэ свидетеля, амэ кажно разо ашунас пала кода, со стердэ важ амэндэ о Иегова и лэско шаво (Римлянам 5:8). Ай о Вэчэро инке май фартэ дэл амэнди тэ полас, сар фартэ вонэ любин амэн и дажэ кодэлэн, ко пока инке на поля, пэ скати дэ куч о выкупо. Кода, кай амэ блаӷодарни важ о выкупо, дэл амэнди кажно дес тэ терас кадя, сар терэлас о Христос. (Адиносар 2 Коринфянам 5:14, 15d.) Кадяжэ амэ камас инке май бут тэ терас вся, кай о Иегова тэ авэл ашунгло, важ кода со во стердя. Сар када тэ стерас? Амэ можэм анда вся оди тэ сыкавас пэстири любовь каринг о Дэл, кала дас каминтарии пэ собрании.
13. Сар тэ сыкавас, кай фартэ любисарас лэ Иеговас и лэстирэ шавэс? Росԥэнэн.
13 Кай тэ сыкавас, кай любисарас лэ Иеговас и лэстирэ шавэс, амэ жас бут пэр со. Кай тэ ԥирас пэ собрании, бутэнди андар мэндэ трэбуй варисо тэ ашавас. Бут собрании прожан андо рабочо дес вэчэром, кала амэ фартэ цыенэ. Авэр собрании прожан андо выходно дес, кала всаворэ отцыён. Диқэл о Иегова, саво зор амэ стас, кай тэ авас пэ собрании, хоть и фартэ цыенэ? Канешно! Со май бут амэ терас, со май фартэ о Иегова цэний амари любовь каринг лэстэ (Марка 12:41—44).
14. Васо кода, кай о Иисусо любияс кадя фартэ, кай жалас бут пэр со, важ амэндэ примеро?
14 О Иисусо сыкадя амэнди, сар када тэ любисарас кадя, кай тэ жас бут пэр со. Во сас ӷотово най кати тэ отдэл пэстири жызня важ и ученикоря, но и кажно дес тэ терэл кода, со трэбуй лэнди, ай най пэсти. Еқварэс во сас кадя цыено, кай на камэлас никаса тэ дэл дума. Но всаек во шутя сама пэстирэ учениконэн (Луки 22:39—46). Важ лэстэ сас май важно тэ дэл, чем тэ лэл (Матфея 20:28). Сар амэ любисарас лэ Иеговас и амарэ ԥралэн кадяжэ дэ фартэ, сар о Иисусо, тоди амэ стераса вся, кай тэ авас по Вэчэро и пэ авэр собрании.
15. Касти амэ со май фартэ камас тэ поможысарас?
15 Сар жэ амэ лошалэ тэ авас машкар чачунэ христианоря! Амэ на жалуисарас пэстири время, кай тэ ақарас аврэн, кай вонэ тэ авэн машкар амэндэ. Но май бут амэ камас тэ поможысарас кодэлэ христианонэнди, савэ парашэлэ тэ росԥэнэн важ о Дэл и тэ ԥирэн пэ собрании (Галатам 6:10). Важ кода кай любисарас кадэлэ ԥралэн и ԥэян, амэ ақарас лэн тэ авэн пэ амарэ собрании и особено по Вэчэро. Амэ фартэ лошавас, кала варико андар лэндэ рийпэ каринг амаро любящё дад и пастырё, кай о Иегова. Кацави жэ радость андо ди кай о Иегова и кай о Иисусо (Матфея 18:14).
16. а) Сар амэ тэ подритярас аврэн и васо амэнди фартэ важно тэ ԥирас пэ всаворэ собрании? б) Васо акана кодэя время, кала трэбуй тэ сэрас лэ Иисусостирэ алава анда Иоанна 3:16?
16 Андэ кадэва шон, давайте старысаваса тэ ақарас май бутэ манушэн по Вэчэро, саво авэла в пятницу, 19 апреля 2019 бэрш. (Диқэн и рамка «Ақарэн всаворэн по Вэчэро, кай сэрэн пала лэ Иисусостири смэрть и пэ спецыально речь!».) Ай цыло бэрш стам зор, кай тэ подритярас ек аврэс кодэлэса, кай тэ авас пэ всаворэ собрании. Андэ кадэя время, кала лэ Сатанаско миро йто на авэла, амэнди трэбуй тэ на промэкас и собрании, важ кода кай вонэ поможын амэнди тэ авас смили, тэ на гиндосарас пала пэстэ бут и тэ любисарас аврэн (1 Фессалоникийцам 5:8—11). Сыкавам жэ анда вся оди, кай блаӷодарни лэ Иеговасти и лэстирэ шавэсти, важ лэндири бари любовь каринг амэндэ! (Адиносар Иоанна 3:16e.)
ДИЛИ 126 Авэн тумэ састэ
a 19 апреля 2019 бэрш амэ ласа тэ терас о Вэчэро, кай тэ сэрас лэ Иисусостири смэрть. Када само важно дес андо бэрш. Амэ всаворэ аваса, важ кода кай амэ камас тэ радосарас лэ Иеговас. Андэ кадэя статья амэ подаса дума, васо амэ авас пэ кадэва Вэчэро и пэ собрании, савэ прожан кажно курко.
b 1 Коринфянам 11:23—26: «Манди дя о Иисусо кода, со мэ и тумэнди пэрэдэм. О Ӷосподо Иисусо андэ рят, кала лэс трэбуй сас тэ отдэн пэ смэрть, ля о марно, мангляпэ, и ԥэндя «наис», росԥагля о марно и ԥэндя: „Када сыкавэл мэрни тила, сави отдэлпэ пала тумэндэ. Терэн када, кай тэ сэрэн пала мандэ“. Сар парашэлэ тэ хан, кадяжэ ля и чаша и ԥэндя: „Кадэя чаша сыкавэл нэво доӷоворо пэ мэрно рат. Терэн када кажно разо, кала пэн, кай тэ сэрэн пала мандэ“. И кажно разо, кала тумэ хан о марно и пэн анда кадэя чаша, тумэ росԥэнэн, кай о Иисусо муля жы кай кодэя время, пока во на авэла».
c Эфесянам 1:7: «Пэстирэ ратэса во витиндя амэн, кай тэ простинпэ амарэ бэзэха. Через лэ Дэвлэско лашимос, саво амэ на затердям и саво фартэ бут каринг амэндэ».
d 2 Коринфянам 5:14, 15: «Важ кода кай о Христос любий амэн, амэ погиндосардям. Сар ек муля важ всаворэ, вижал всаворэ мулинэ. И во муля важ всаворэ, кай кодэла, ко жувэн, тэ жувэн най важ пэстэ, ай важ кодэва, ко муля, важ лэндэ и рисайля каринг и жызня».
e Иоанна 3:16: «О Дэл кадя фартэ любий лэ мирос, кай отдя пэстирэ шавэс, саво лэстэ ек кацаво, кай кажно, ко сыкавэл, кай патял андэр лэстэ, тэ на мэрэл, ай тэ жувэл вечно».
f Пэ картинки. Лэ ԥралэсти, саво бэшэл андо баруно важ и вера, авеля письмо цэрал, андэ саво лашэ алава. Када ԥэнэн важ кода, кай пала лэстэ сэрэн. Во лошало, кай лэстири хулаи и о шаво на парашэн тэ кандэн лэ Иеговас, и вонэ на домэкэн, кай кода, со терэлпэ андэ политика тэ повлияет пэр лэндири вера.