Андярэн пэс сар о Христос и терэн вся, кай тумэндэ тэ авэл миро андо ди?

1, 2. Васо о Иисусо андо послиднё дес, кала сас пэ ԥув, фартэ пэрэжывал?

АНДО послиднё дес пэ ԥув, лэ Иисусости сас фартэ ԥарэс по ди. Йто лэсти сас трэбуй тэ пэрэандярэл лэ найлашэ манушэндар бут ԥаримос и тэ мэрэл. Но май бут о Иисусо пэрэжывал пала авэр. Во фартэ любияс пэстирэ Дадэс и камэлас лэс тэ радуий. О Иисусо ӷанэнас, кала во виритярэла кадэва ԥаримос и на парашэла тэ кандэл лэ Дэвлэс, кадэлэса во доԥэнэна, кай лэ Дэвлэско алав чачуно. Кадяжэ о Иисусо любияс лэ манушэн и ӷанэнас, если во на парашэла тэ кандэл лэ Иеговас, тоди и мануша моӷут тэ аштярэн и вечно жызня.

² Хоть лэ Иисусости сас фартэ ԥарэс, лэстэ всаек вижыля тэ стерэл кадя, кай по ди тэ авэл спокойно: «Мэ ашавав тумэнди миро андо ди» (Иоанна 14:27). О Дэл дя лэ Иисусости «миро андо ди», и лэстэ сас по ди спокойно. Во вся ӷанэнас и нисостар на даралас. Кацаво можэт тэ авэл лэ манушэстэ, савэстэ фартэ лащи дружба лэ Иеговаса. Кадэва миро поможысардя лэ Иисусости, кай по ди тэ авэл драго (Филиппийцам 4:7).

3. Пала со подаса дума андэ кадэя статья?

³ Никасти андар мэндэ на прижалапэ тэ пэрэандярас кода, со пэрэандярдя о Иисусо (Матфея 16:24, 25; Иоанна 15:20). Но о ԥаримос авэла кай всаворэ лэстирэ ученикоря. Дэкала амэ кадяжэ можэм фартэ тэ пэрэжываем, сар варикала о Иисусо. Со дэла зор амэнди тэ улас кадэя пэрэжывания и кай по ди тэ авэл драго? Подам дума пала кода, со поможысардя лэ Иисусости, кала во служыяс пэ ԥув, и погиндосарам, сар амэ можэм тэ терас сар во, кала амэндэ исин ԥаримос.

О ИИСУСО БУТ МАНГЭЛАСПЭ

4. а) Пар со дицолас, кай о Иисусо бут мангэласпэ андо послиднё дес пэ ԥув? б) Саво совето лэ христианонэнди запистромэ андэ 1 Фессалоникийцам 5:17?

⁴ Адиносар 1 Фессалоникийцам 5:17b. Вся о послиднё дес пэстири жызня пэ ԥув о Иисусо бут мангэласпэ. Кала о Иисусо ля тэ терэл о Вэчэро, кай тэ сэрэн пала лэстири смэрть, во мангляпэ англа кода, сар тэ пэрэдэл лэ апостолонэнди о марно, ай потом о вино (1 Коринфянам 11:23—25). О Иисусо кадяжэ мангляпэ англа кода, сар тэ вижал анда цэр, кай вонэ тердэсас и Патради (Иоанна 17:1—26). Кала вонэ авелэ по Маслично плай, во упалэ най еқвар мангляпэ (Матфея 26:36—39, 42, 44). И сар тэ мэрэл, во инке еқвар мангляпэ каринг пэско Дад (Луки 23:46). О Иисусо росԥэнэнас вся лэ Иеговасти, со терэласпэ лэса андэ кадэва важно дес.

5. Васо лэ апостолонэнди на хутилдя смилость?

⁵ О Иисусо часто мангэласпэ. Во мангэлас, кай лэско Дад тэ поможый лэсти. Акэ, васо во виритярдя вся о ԥаримос. Ай кай лэстирэ ученикоря на вижыля тэ мангэнпэ вся и рят. Вонэ позасутэ и кала лэндэ сас ԥаримос, лэнди на хутилдя смилость (Матфея 26:40, 41, 43, 45, 56). Амэндэ вижала тэ виритярас любо ԥаримос и тэ на парашас тэ кандас лэ Дэвлэс тоди, кала амэ сытювас лэ Иисусостар и постоянно мангаспэ. Пала со амэ можэм тэ мангаспэ?

6. Сар кода, кай амэ састэс патяс, поможыя, кай по ди тэ авэл миро?

⁶ Андэ молитва амэ можэм тэ мангас лэ Иеговас: «Дэ амэнди май састэс тэ патяс» (Луки 17:5; Иоанна 14:1). Тэ патяс амэнди трэбуй, важ кода кай о Сатана бишалэл о ԥаримос всаворэнди лэ Христостирэ учениконэнди (Луки 22:31). Сар кода, кай амэ патяс, поможыя амэнди по ди тэ авэл миро, дажэ кала о ԥаримос авэл ек пала аврэстэ? Кала амэ стердям вся, со па амаро зор, амари вера поможыя амэнди тэ патяс лэ Иеговасти. Амэ патяс, во май драго ӷанэн, со тэ терэл, и кадэлэстар амэндэ по ди драго (1 Петра 5:6, 7).

7. Со амэ можэм тэ сытювас кай о Ро́берто?

⁷ Через кода, кай амэ мангаспэ, амэндэ авэла драго по ди, саво бы ԥаримос амэндэ тэ на авэл. Акэ примеро пала ек старейшына, саво на парашэлас тэ кандэл лэ Дэвлэс, савэс ақарэн Ро́берто и лэсти пала 80 бэрш. Во росԥэнэн: «И алава анда Филиппийцам 4:6, 7 поможысардэ манди тэ пэрэжував бут ԥаримос андэ мэрни жызня. Мандэ на сас ловэ. И пэ дэсави время мэ парашэлэм тэ служысарав старейшынаса». Сар кай о Ро́берто вижал, кай лэстэ по ди тэ авэл драго? Во росԥэнэн: «Сар кати мэ полав, кай по ди ашэл найдраго, мэ сразу мангавпэ. Мэ патяв, со май бут и анда вся оди мангавпэ, со май бут лашимос ашэл андо ди».

О ИИСУСО СТОЛАС БУТ ЗОР, КАЙ ТЭ РОСԤЭНЭН ВАЖ О ДЭЛ

8. Сар кодэлэстар, со пистромэ андэ Иоанна 8:29, кай о Иисусо вижалас тэ авэл по ди драго?

⁸ Адиносар Иоанна 8:29c. Со поможыяс лэ Иисусости тэ авэл спокойно дажэ, кала лэс ӷонинас? Во полэлас, кодэлэса, кай во на парашэл тэ кандэл пэстирэ Дадэс, во лэс фартэ радуияс. Во вся и время кандэлас лэ Дэвлэс, дажэ кала када сас фартэ ԥарэс. Во фартэ любияс лэ Иеговас и полэлас, кай и служэния лэ Дэвлэсти важ лэстэ сас со май важно андэ жызня. Жы каринг кода, сар тэ авэл пэ ԥув, о Иисусо сас паша Иегова «лашо мастеро» (Притчи 8:30). Ай пэ ԥув во на парашэлас тэ сытярэл лэ манушэн лэ чачимасти пала небесно Дад (Матфея 6:9; Иоанна 5:17). Када анэнас лэ Иисусости бари радость.

9. Сар кода, кай май бут служысарас лэ Дэвлэсти, амэндэ вижала тэ фэрисарас миро андо ди?

⁹ Сар амэ можэм тэ терас сар о Иисусо? Амэнди трэбуй тэ кандас лэ Иеговас и тэ терас «бут дила, сави терэл о Ӷосподо» (1 Коринфянам 15:58). Если амэ май бут «стас зор» андэ служэния, тоди амэ на ласа тэ гиндосарас ек кати важ амарэ проблемы (Деяния 18:5). Часто лэ манушэндэ, касти росԥэнас важ о Дэл, инке май бут ԥаримос чем амэндэ. Но кала вонэ уӷанэн лэ Иеговас, лэн тэ любин лэс и прилэн и советоря анда Библия, лэндири жызня ашэл май лащи и май бахтали. И кала амэ када диқас кажно разо, амэ лас май фартэ тэ патяс, кай о Иегова пала амэндэ заботийпэ. И кадэлэса амэ фэрисарас миро андо ди. Акэ со росԥэнэн ек ԥэй, савятэ вся и жызня депрессия, и вой гиндояс, кай никасти на трэбуй: «Кала мэ май бут росԥэнав важ о Дэл, кадэлэса мэ фэрисарав миро андо ди и манди ашэл май радосно. Мэ гиндосарав, када кодэлэстар, кай кала мэ росԥэнав важ о Дэл, мэ ашав май пашэ каринг о Иегова».

10. Со амэ можэм тэ сытювас кай и Брэ́нда?

¹⁰ Акэ, со уӷанаса пала ек ԥэй, савя ақарэн Брэ́нда. Вой и латири щей лэдуй насвалэ. Лэндэ ԥаро насвалимос, рассеянно склерозо. И Брэ́нда на ԥирэл, вой пэ инвалидно каляска. Дэкала вой росԥэнэн важ о Дэл па цэра, но май бут вой пистрой письморя. Вой ԥэнэн: «Кала мэ полэм, кай андэ кадэя время мэрно зор на ашэла май фэдэр, мэ смирисайлэм кадэлэса и мандэ вижыля вся мэрни жызня тэ отдав пэ служэния. Ай кала росԥэнав важ о Дэл, мэ бистрав пала пэско ԥаримос и май бут гиндосарав пала кода, сар тэ поможысарав лэ манушэнди, савэ жувэн пэ территория андэ амари собрания. Через када мэ вся и время гиндосарав пала лашимос, саво мандэ авэла англэ».

О ИИСУСО ПРИЛЭЛАС ПОМОЩЬ ПЭСТИРЭ ДРУӶОНЭНДАР

11—13. а) Сар и апостолоря и авэр мануша ашэлэ лэ Иисусости лашэ друӷоря? б) Сар кадэя дружба поможысардя лэ Иисусости?

¹¹ Вся и время, скати о Иисусо служыяс, и апостолоря сас важ лэстэ чачунэ друӷоря. Кадэлэса вонэ сыкадэ о чачимос анда библейско притча: «Но исин друӷо, саво май пашэ, чем о ԥрал» (Притчи 18:24). Важ о Иисусо кадэя дружба сас фартэ куч. Важ и вся и время, скати во служыяс пэ ԥув, нико анда лэстирэ ԥрала на патяе андэр лэстэ (Иоанна 7:3—5). Еқвар вонэ гиндосардэ, кай во жыля па годятэ (Марка 3:21). Ай лэстирэ апостолоря, савэ на парашэнас лэс тэ кандэн, подритярэнас лэс. Важ када и рят англа пэстири смэрть о Иисусо ԥэндя лэнди: «Но тумэ ашэнаспэ манца андэ вся мэрно ԥаримос» (Луки 22:28).

¹² Дэкала и апостолоря на терэнас кода, со камэлас о Иисусо. Но во найфартэ шолас сама пэ кода, со вонэ най кадя терэнас, ай сэрэлас, кай вонэ патян андэр лэстэ (Матфея 26:40; Марка 10:13, 14; Иоанна 6:66—69). И рят англа пэстири смэрть, во ԥэндя лэ апостолонэнди, савэ на парашэнас лэс тэ кандэн: «Мэ ԥэнав пэр тумэндэ друӷоря, важ кода кай мэ росԥэндэм тумэнди вся, со ашундэм мэрнэ Дадэстар» (Иоанна 15:15). Чаче, и друӷоря фартэ подритярэнас лэ Иисусос. Кода, кай вонэ лэс подритярэнас андэ служэния, кадэлэстар кай о Иисусо сас бари радость андо ди (Луки 10:17, 21).

¹³ Кай о Иисусо сас и авэр друӷоря, най ек и апостолоря. Када мурша и жувля, савэ подритярэнас лэс андэ служэния. Вонэ заботинаспэ пала кода, кай во тэ хал, кадяжэ ақарэнас пэстэ цэрэ (Луки 10:38—42; Иоанна 12:1, 2). Авэр жанас лэса андэ ек дром и делинаспэ кодэлэса, со лэндэ сас (Луки 8:3). Кай о Иисусо сас лашэ друӷоря, важ кода кай во екжэно сас лашо друӷо. Во терэлас лэнди бут лашимос и на мангэлас лэндар кода, со най па лэнго зор. Хоть о Иисусо сас совершэно мануш, важ лэстэ сас куч, кай лэс подритярэн лэстирэ друӷоря, савэ сас обычни, найсовершэни мануша. И вонэ поможынас лэсти, кай лэстэ по ди тэ авэл спокойно.

14, 15. Сар тэ арақас лашэ друӷонэн и сар вонэ моӷут тэ поможын?

¹⁴ И чачунэ друӷоря поможын амэнди тэ на парашас тэ кандас лэ Иеговас. Кай тэ виарақэс лашэ друӷонэн, трэбуй екжэно тэ авэс лашо друӷо (Матфея 7:12). И Библия сытярэл амэн тэ отдас пэстири время и о зор аврэнди, особенно кодэлэнди, касти када фартэ трэбуй (Эфесянам 4:28). Погиндон, касти тумэ моӷли бы тэ поможын андэ собрания. Ԥэнаса, о мануш на вижал анда цэр, тоди амэ можэм тэ жас андо маӷазино и тэ тинас кода, со лэсти трэбуй. Ай если варикастэ нинай ловэ, можно тэ ақарас пэстэ цэрэ и тэ стас тэ хан. Ай кала варико анда собрания на ӷанэн тэ пользуийпэ лэ сайтоса jw.org^® или ла прилажэнияса JW Library^®, можно тэ сыкавас, кай тэ полэл, сар екжэно тэ виарақэл сомнак анда Библия. Кала амэ поможысарас аврэнди, кадэлэстар амэ радосавас (Деяния 20:35).

¹⁵ Друӷоря подритярэн амэн, кала ԥарэс и поможын амэнди, кай тэ авэл миро по ди. Точно кадя, сар о Елиуй виашунэлас лэ Иовос, кала во росԥэнэнас пала пэстирэ биды. Амарэ друӷоря кадяжэ на холявэн и виашунэн, кала амэ росԥэнас лэнди, савэ пэрэжывании амэндэ по ди (Иов 32:4). На гиндосар, кай и друӷоря ԥэнэна, сар тэ терэс. Авелоп драго тэ приашундювас каринг лэнго совето, саво анда Библия (Притчи 15:22). Тумэ сэрэн, о царё Давидо на завазгля о шэро, и приля и помощь пэстирэ друӷонэндар? (2 Самуила 17:27—29). Кала амэнди и друӷоря дэн помощь, трэбуй тэ на заваздас о шэро, ай тэ прилас и помощь. И друӷоря, када лашо подарко лэ Иеговастар (Иакова 1:17).

СО ТЭ ТЕРАС, КАЙ ТЭ НА ХАСАРАС МИРО АНДО ДИ?

16. Со, сар пистромэ андэ Филиппийцам 4:6, 7, тэ терас, кай тэ фэрисарас миро андо ди?

¹⁶ Адиносар Филиппийцам 4:6, 7d. Васо о Иегова ԥэнэн, кай амэндэ можэт тэ авэл «миро андо ди», саво во дэл кати через о Иисус Христос? Важ кода кай амэндэ вижала тэ фэрисарас миро по ди кати тоди, кала амэ полас и патяс андэ кода, со стердя о Иисусо. Например, кода, кай о Иисусо отдя пэстири жызня важ амэндэ, простийпэ вся амаро бэзэх (1 Иоанна 2:12). Сар дэ драго кадэлэстар ашэл по ди! О Иисусо Царё андэ лэ Дэвлэско Царство улэла вся о ԥаримос, саво терэл амэнди о Сатана и о миро, савэса во правий (Исаия 65:17; 1 Иоанна 3:8; Откровение 21:3, 4). О Иисусо приԥэндя амэнди тэ терас найвушэро дила. Но во всаек паша амэндэ и подритярэл амэн андэ кадэла послидни деса (Матфея 28:19, 20). Кала амэ када ӷанас, када дэл амэнди смилость. Кай по ди тэ авэл спокойно, трэбуй, кай тэ подритярэн лашэ алавэнца, тэ аштярас лашимос англэ и тэ авас смили.

17. а) Со поможыя амэнди тэ фэрисарас миро андо ди? б) Со авэла амэнди па амаро зор, сар пистромэ андэ Иоанна 16:33?

¹⁷ Со акана поможыя тумэнди, кай по ди тэ авэл драго, кала исин бут ԥаримос? Кода жэ, со поможысардя лэ Иисусости. Пэрво, тэ на парашэн тэ мангэнпэ. Дуйто, тэ кандэн лэ Иеговас и тэ росԥэнэн важ лэстэ, дажэ кала када найвушэро. Трито, кала ԥарэс, прилэн помощь лэ друӷонэндар. Тоди о «миро андо ди», саво лэ Дэвлэстар, фэрия тумаро ди и годи. И тоди тумэ, сар и о Иисусо бирона любо ԥаримос. (Адиносар Иоанна 16:33e.)