СТАТЬЯ, КАЙ ТЭ СЫТЮВАС 25
Надеинпэ по Иегова, кала тумэнди ԥарэс
«Манди ԥарэс, умэклэм и вас, вся о дес ԥирав най пэско» (ПСАЛОМ 38:6).
ДИЛИ 30 Мэрно Дэл, Дад и Друӷо
ПАЛА СО УӶАНАСА АНДА СТАТЬЯ?a
1. Васо амэнди фартэ важно тэ шас сама пэ кода, со ԥэндя о Иисусо?
КАЛА о Иисусо дэлас дума пала послидни деса, во ԥэнэнас пэстирэ учениконэнди: «Драго диқэн пала пэстэ и кай тумарэ одести тэ на авэл ԥарэс... [кодэлэстар], со терэн кажно дес [када, кай загиндонпэ, сар тэ затерэн ловэ, кай тэ прожувэн]» (Луки 21:34). Амэнди трэбуй фартэ тэ шас сама пэ кадэла алава. Васо? И пэрэжывании, савэ исин кай и мануша, на обжан и амэн.
2. Саво ԥаримос исин кай дэсавэ ԥрала и ԥэя?
2 Дэкала о ԥаримос авэл ек пала ек аврэстэ. Акэ дуй примероря. Ԥрал, савэс ақарэн Джонb, савэстэ рассеяно склерозоc, лэс мэкля и хулаи, савяса во прожудя 19 бэрш. Посли када дуй лэстирэ щея парашэлэ тэ служын лэ Иеговасти. Ай аврэ ерестэ, савэн ақарэн Боб и Линда, лэндэ сас авэр ԥаримос. Вонэ хасардэ и бути, ай потом хасардэ и о цэр. Ай инке кай и Линда ашэля насвало оди, через када вой моӷла тэ мэрэл. Кадяжэ латэ ляпэ насвалимос, артрито, када кала римонпэ и кокаля.
3. Андэр со дэн тэ патяс и алава анда Филиппийцам 4:6, 7?
3 Можно тэ патяс, кай амаро Создателё и любящё Дад, о Иегова, полэл, сар хал амэн зорэстар и бари пэрэжывания. И во камэл тэ поможый амэнди. (Адиносар Филиппийцам 4:6, 7d.) Андэ Библия пистромэ, саво ԥаримос сас кай лэ Иеговастирэ служытеля и сар во лэн подритярэлас. Роздиқам дэсавэ примероря.
КАЙ О ИЛЬЯ «САС ПО ДИ КАЦАВО ЖЭ, САР И АМЭНДЭ»
4. Саво ԥаримос сас кай о Илья и со лэсти поможысардя?
4 О Илья служыяс андэ найвушэро время и лэстэ сас бут ԥаримос. О израильско царё Ахаво, саво на кандэлас лэ Дэвлэс, жэнисайля пэ Иезавель. Вой сас, вэрыто и хытро манушни и тэлёлас лэ Ваалости. Через кода, кай вонэ тэлёнас лэ Ваалости и вся и страна ля тэ тэлёл лэсти. Вонэ умардэ бутэн лэ Иеговастирэ пророконэн. Ай кай о Илья вижыля тэ спасыйпэ. Ай инке, через кода, кай о Илья патялас лэ Иеговасти, лэстэ вижыля тэ пэрэжувэл страшно ӷолодо (1 Царей 17:2—4, 14—16). Кадяжэ, во надеияспэ по Иегова, кала жалас против лэ Ваалостирэ пророкоря, и против кодэла, ко тэлёлас лэ Ваалости. О Илья ԥэнэнас лэ израильтянонэнди тэ служын лэ Иеговасти (1 Царей 18:21—24, 36—38). Андэ кодэя ԥари время о Илья най еқварэс диқэлас, сар о Иегова подритярэл лэс.
О Иегова бишалдя лэ анӷелос, кай тэ поможый лэ Ильясти упалэ тэ лэл зор (Диқэн и абзацоря 5, 6.)h
5. Со сас по ди кай о Илья, сар пистромэ андэ 1 Царей 19:1—4?
5 Адиносар 1 Царей 19:1—4e. И всаек, кала и Иезавель солахадя тэ умарэл лэ Ильяс, во фартэ пэрэдарайля и унашля андэ Вирсавия. Лэсти кадя сас ԥарэс, кай во «ля тэ мангэл пэсти смэрть». Васо? Важ кода кай о Илья сас найсовершэно мануш и лэстэ по ди сас «кацаво жэ, сар и амэндэ» (Иакова 5:17). Можэт, через кода кай лэстэ сас бари пэрэжывания и на сас зор, во умэкля и вас. Файма, о Илья гиндояс, кай вся, со во тердя, кай тэ рий лэ израильтянонэн каринг о Иегова, сас евья. Инке во гиндояс, кай андо Израилё нисо на ашэля май фэдэр и во екжэно служый лэ чачунэ Дэвлэсти (1 Царей 18:3, 4, 13; 19:10, 14). О пророко, саво на парашэлас тэ кандэл лэ Иеговас, камэлас тэ мэрэл. Амэ можэм тэ гиндосарас, сар кадя можэт тэ авэл. Но о Иегова полэлас лэ Ильяс.
6. Сар о Иегова сыкадя, кай любий лэ Ильяс?
6 О Иегова на ля тэ дошалярэл лэ Ильяс важ лэстирэ алава. Во поможысардя лэсти упалэ тэ лэл зор (1 Царей 19:5—7). Посли када о Иегова, сыкадя лэ Ильясти пэско баро зор, и ковлэс поможысардя лэсти тэ парувэл пэстирэ гиндоря. Потом о Иегова ԥэндя, кай андо Израилё исин инке 7 000 мануша, савэ отԥэнделэ тэ тэлён лэ Ваалости (1 Царей 19:11—18). Кадя о Иегова сыкадя лэ Ильясти, кай любий лэс.
САР О ИЕГОВА ПОМОЖЫЙ АМЭНДИ?
7. Васо амэн подритярэл кода, сар о Иегова поможысардя лэ Ильясти?
7 Можэт акана тумэ жувэн андэ найвушэро время. Тоди погиндон, сар о Иегова диқля пэ кода, со сас кай о Илья по ди. Када подритярэла тумэн и дэла тэ патян, кай о Дэл полэл амарэ пэрэжывании. Во ӷанэн, со па амаро зор, ай со най. Во ӷанэн дажэ, со амэ гиндосарас и со амэндэ по ди (Псалом 103:14; 139:3, 4). Если амэ, сар о Илья, надеисавас по Иегова, во поможыя амэнди тэ пэрэандярас о ԥаримос, саво одлэл амэндар о зор (Псалом 55:22).
8. Сар о Иегова поможыя тумэнди тэ улэн и барэ пэрэжывании?
8 Кала тутэ барэ пэрэжывании, кадэлэстар ту лэс тэ загиндоспэ и умэкэс и вас. Андэ кацаво маменто важно тэ сэрэс, кай о Иегова поможыя тэ улэс кадэла пэрэжывании. Сар? Во ԥэнэн тэ росԥэнэс лэсти пала пэстирэ пэрэжывании. И во ашунэла тирэ молитвы (Псалом 5:3; 1 Петра 5:7). Важ када на параш тэ мангэспэ лэ Иеговасти и росԥэн, пала со ту пэрэжываеш. Канешно, ту на ашунэса лэско ӷолосо, сар ашунэлас о Илья. Но во лэла тэ дэл дума туса через и Библия и через пэстири арӷанизацыя. Кала ту адинос и Библия, када тут подритярэл и ту лэс тэ аштярэс о лашимос, саво авэла англэ. Кадяжэ, тут моӷут тэ подритярэн и ԥрала и ԥэя, савэнца патяс андо ек Дэл (Римлянам 15:4; Евреям 10:24, 25).
9. Сар амэн можэт тэ подритярэл о друӷо?
9 О Иегова ԥэндя лэ Ильясти тэ пэрэдэл дэсави пэстири дила лэ Елисеёсти. О Иегова дя лэ Ильясти друӷос, саво подритярдя лэс андэ ԥари время. Кадя и адес, если амэ росԥэнаса лэ друӷости, со амэндэ по ди, када поможыя амэнди тэ пэрэандярас и пэрэжывании (2 Царей 2:2; Притчи 17:17). Ай если паша тумэндэ нинай кацаво мануш? Мангэн кай о Иегова тэ бишалэл кацавэ христианинос, савэстэ састи вера, кай во тэ подритярэл тумэн.
10. а) Васо кода, со сас лэ Ильяса, поможый амэнди тэ аштярас о лашимос? б) Сар амэн подритярэл кода, со запистромэ андэ Исаия 40:28, 29?
10 О Иегова поможысардя лэ Ильясти тэ пэрэандярэл и бари пэрэжывания и во инке бут бэрша на парашэлас тэ служый. Кода со сас лэ Ильяса поможый амэнди тэ аштярас о лашимос. Через и бари пэрэжывания можэт тэ на авэл зор и тэ авэл ԥарэс по ди. Но, если амэ надеисавас по Иегова, во дэла амэнди зор, кай амэ и май дур тэ служысарас лэсти. (Адиносар Исаия 40:28, 29f.)
ВОНЭ НАДЕИНАСПЭ ПО ИЕГОВА
11—13. Со сас кай лэ Дэвлэстирэ трин дэлмутнэ служытеля, кала лэндэ сас барэ пэрэжывании?
11 Авэр лэ Иеговастирэ служытеля, пала савэ амэ адиносарас андэ Библия тожэ пэрэжудэ ԥари время. Ла Аннати сас фартэ ԥарэс через кода, кай латэ на сас бэятцэ. Ай андэ кодэя время када сас баро лажаимос. Кадяжэ, вой тэрпияс, кай латар асаласпэ и дуйто хулаи латирэ хуласти (1 Самуила 1:2, 6). Ла Аннати сас кадя ԥарэс, кай вой ровэлас и нисо на халас (1 Самуила 1:7, 10).
12 Кай о Давидо тожэ сас бари пэрэжывания. Погиндон, со лэсти прижыляпэ тэ пэрэжувэл. Лэс халас оди, важ кода кай во тердя бут со най кадя (Псалом 40:12). Лэско любимо шаво о Авессаломо вазгля против лэстэ лэ манушэн. Ай май интя лэ Авессаломос умардэ (2 Самуила 15:13, 14; 18:33). Кадяжэ лэ Давидос придя лэско пашутно друӷо (2 Самуила 16:23—17:2; Псалом 55:12—14). О Давидо най еқварэс росԥэнэнас андэ псалмы, саво ԥаримос лэстэ по ди, ай инке кай во фартэ патял лэ Иеговасти (Псалом 38:5—10; 94:17—19).
Со поможысардя лэ псалмопевцости упалэ тэ авэл радость андэ служэния лэ Иеговасти? (Диқэн и абзацоря 13—15.)i
13 Ек псалмопевцо ля тэ завидуий лэ найлашэ манушэнди. Файма, во сас лэ Асафоско потомко, саво сас левито и служыяс андэ бари лэ Дэвлэсти катуна. Лэстэ сас бари пэрэжывания и када на дэлас лэсти тэ радуийпэ. Во сас найлошало ла жызняти. Лэс дажэ на радуинас и блаӷословении, савэ анэнас лэсти кода, кай во служыяс лэ Дэвлэсти (Псалом 73:2—5, 7, 12—14, 16, 17, 21).
14, 15. Сости амэн сытярэн кадэла трин примероря?
14 Всаворэ кадэла трин служытеля банделэ каринг о Иегова, кай во тэ поможый лэнди. Вонэ росԥэнэнас лэ Дэвлэсти, со лэндэ по ди андэ молитва. Анда вся оди вонэ росԥэнэнас лэсти, васо лэнди кадя ԥарэс. Када дэлас лэнди зор и вонэ на парашэнас тэ ԥирэн андэ лэско цэр (1 Самуила 1:9, 10; Псалом 55:22; 73:17; 122:1).
15 Кажнонэс андар лэндэ о Иегова полэлас и жалуияс. Кай и Анна ашэля вушэро по ди (1 Самуила 1:18). Ай о Давидо пистросардя: «Бут ԥаримос кай о праведнико, но Иегова вся када улэла лэстар» (Псалом 34:19). Ай о псалмопевцо поля, кай о Иегова ритярэлас лэс пала право вас, кала ковлэс лэсти подԥэнэнас. Во пистросардя: «Ай важ мандэ тэ пашував каринг о Дэл, када лашимос. Мэ фэрисавав кай о Владыко Ӷосподо Иегова» (Псалом 73:23, 24, 28). Сости амэн сытярэн кадэла примероря? Андэ амари жызня можэт тэ авэл ԥари время. Но амэ вся виритяраса, если ласа тэ мангаспэ каринг о Иегова, тэ кандас лэс и тэ гиндосарас пала кода, сар во поможыяс аврэнди (Псалом 143:1, 4—8).
НАДЕИНПЭ ПО ИЕГОВА И ВО ПОМОЖЫЯ ТУМЭНДИ
И ԥэй на камэл никаса тэ общяеца, но вой парудёл, кала лэл тэ поможый аврэнди (Диқэн и абзацоря 16, 17.)
16. Васо амэнди на трэбуй тэ дурювас аврэндар?
16 Амэ роздиқлям трин примероря анда Библия и андэ када исин сости амэнди тэ сытювас. Амэнди на трэбуй тэ дурювас лэ Иеговастар и лэстирэ народостар (Притчи 18:1). И Нэнси пэрэжудя бари пэрэжывания, важ кода кай ла мэкля лако хулай. Вой росԥэнэн: «Дэсави время мэ на камавас никас тэ диқав и никаса тэ дав дума. Но со май дур мэ дурювавас аврэндар, со май ԥарэс манди ашэлас». Вся паруделя, кала и Нэнси закамля тэ поможый кодэлэнди, кастэ сас ԥаримос. Вой росԥэнэн: «Мэ виашунавас лэн, кала вонэ росԥэнэнас пала пэско ԥаримос. И мэ шутэм сама, кала мэ промэкав аврэндири дук через пэско ди, мэ май набут лав пэс тэ жалуисарав».
17. Со можэт тэ дэл амэнди зор?
17 Кала амэ авас пэ собрании, котэ амэ лас зор. Пэ собрании Иегова подритярэл и поможый амэнди (Псалом 86:17). Андо зало, кай тидэнпэ лэ Иеговастирэ свидетеля, о Иегова подритярэл амэн лэ свынтонэ духоса, ла Библияса и пэстирэ служытелёнэнца. Пэ собрании амэ подритярас ек аврэс (Римлянам 1:11, 12). Ек ԥэй, савя ақарэн София, росԥэнэн: «Тэ пэрэандярав вся о ԥаримос манди поможысардя о Иегова, ай кадяжэ и ԥрала и ԥэя. Бут андэр со манди поможысардэ и христиански собрании. Ай инке мэ полэм, со май бут мэ росԥэнав важ о Дэл и терав варисо важ и собрания, со май вушэро мэ пэрэандярав и барэ пэрэжывании».
18. Сар о Иегова поможый амэнди, кала амэ на ӷанас, со тэ терас?
18 Если тути ԥарэс по ди, на бистэр, о Иегова най кати обещяет тэ улэл амэндар о ԥаримос май англэ. Но, во ужэ акана поможый амэнди тэ пэрэандярас о ԥаримос. Во дэл амэнди зор, кала амэ умэкас и вас, на ӷанас, со тэ терас, и на камас тэ борисавас (Филиппийцам 2:13).
19. Андэр со дэн тэ патяс и алава анда Римлянам 8:37—39?
19 Адиносар Римлянам 8:37—39g. О апостоло Павло ԥэндя, нисо нэ сможэт «тэ одлэн кодэлэстар, кай о Дэл тэ на любий амэн». Но сар тэ подритярас лэ ԥралэн и лэ ԥэян, савэ пэрэжувэн ԥари время? Андэ авэр статья подаса дума пала кода, сар тэ терас сар о Иегова, и тэ промэкас о ԥаримос кодэлэнго касти ԥарэс через амаро ди и тэ подритярас лэн.
ДИЛИ 44 Молитва анда вся ди
a Кала долӷо цырдэлпэ и бари пэрэжывания, кадэлэстар фартэ найдраго по ди и хал амаро зор. Сар амэн можэт тэ подритярэл о Иегова? Амэ подаса дума, сар во поможысардя лэ пророкости лэ Ильясти, кала кодэва умэкля и вас. Инке, амэ роздиқаса и авэр примероря анда Библия, савэ сыкавэна, со трэбуй тэ терас, кай о Дэл тэ поможый амэнди.
b Андэ кадэя статья, дэсавэн манушэн на ақарэн кадя, сар катэ пистромэ.
c Рассеяно склерозо, када кала римойпэ и цэнтрально нервно система. Кадэлэстар о мануш лэл тэ кунийпэ, на кандэн и вас и пэрнэ, ай дэкала на диқэн и яқа, найдраго полэл и драго нащи дэл дума.
d Филиппийцам 4:6, 7: «Ни пала со нэ пэрэжывайте, ай важ вся росԥэнэн лэ Дэвлэсти андэ молитва и анда вся оди мангэн и блаӷодарин лэс. Тоди о Дэл дэла тумэнди миро андо ди, саво май баро чем всаворэ гиндоря и фэрия тумаро ди и годи через о Иисус Христос».
e 1 Царей 19:1—4: «О Ахаво росԥэндя ла Иезавеляти пала вся, со стердя о Илья, и пала кода, сар во [о Илья] умардя лэ мечоса всаворэн пророконэн. Тоди и Иезавель бишалдя каринг о Илья манушэн тэ ԥэнэн лэсти: „Ну марэла жэ ман о Дэл, если тэся, каринг кадэя время, мэ на стерава туса кадя жэ, со ту стердян лэнца“. О Илья пэрэдарайля и унашля, кай тэ спасый пэстири жызня. Во авеля андо Беэ́р-Ше́ву, кай андэ Иуда и ашадя котэ пэстирэ слуӷос, ай екжэно ужыля андэ пустыня и жыля цыло дес. Во дожыля каринг о кусто ракитнико, бэшля тала лэстэ и ля тэ мангэл пэсти смэрть: „Авэла ужэ! Иегова, залэ мандар мэрни жызня, важ кода кай мэ най май лашо, чем мэрнэ ԥурэ“».
f Исаия 40:28, 29: «Хэба ту на ӷанэс? Хэба ту на ашундян? О Иегова, саво стердя ла ԥувьятирэ краёря, када о Дэл пэ вся и вечность. Во на цыёл и лэстэ вся и время исин зор. Кода, со во ӷанэн, и мануша никала на полэна. Кодэлэстэ, кастэ нинай зор и ко цыёл, во терэл, кай во тэ авэл састо».
g Римлянам 8:37—39: «Но андэ вся када амэ победисарас блаӷодаря кодэлэсти, ко амэн полюбисардя. Мэ патяв, кай ни и смэрть, ни и жызня, ни и анӷелоря, ни и власти, ни кода, со исин акана, ни кода, со авэла, нисаво зор, ни о вучимос, ни и глубина, ни варисави авэр тварения, нэ смоӷут амэн тэ одлэн кодэлэстар, кай о Дэл тэ на любий амэн, через амаро Ӷосподо Иисус Христос».
h Пэ картинка. Лэ Иеговаско анӷело полокорэс жунгавэл лэ Ильяс и ԥэнэн лэсти тэ хал.
i Пэ картинка. О псалмопевцо, саво, файма, сас лэ Асафоско потомко, пистрой псалмы и дилабэл аврэ левитонэнца.