Поможын кодэлэнди, касти ԥарэс

1. Сар амэ можэм тэ терас, сар амаро любящё Дад, о Иегова?

О ИЕГОВА фартэ амэн любий (Иоанна 3:16). Амэ камас тэ терас кадя, сар амаро любящё Дад. Важ када амэ старысавас тэ полас, со лэ манушэндэ по ди, и тэ сыкавас ԥралицко любовь, и тэ жалуисарас аврэн, ай май фартэ кодэлэн, «каса амэ патяс андо ек Дэл» (Галатам 6:10; 1 Петра 3:8). Кала андэ жызня кай амарэ ԥрала и ԥэя терэлпэ бида, амэ камас лэнди тэ поможысарас.

2. Пала со амэ подаса дума андэ кадэя статья?

² Ко камэл тэ служый лэ Иеговасти всаворэндэ, авэла ԥаримос (Марка 10:29, 30). Файма, амэнди прижалапэ тэ пэрэандярас май бут ԥаримос, важ кода кай йто авэла конец кадэла люмати. Сар тэ подритярас ек аврэс? Давайте подаса дума, сости амэ можэм тэ сытювас лэ Лотостар, лэ Иовостар и ла Ноеминятар, пала савэ запистромэ андэ Библия. Кадяжэ подаса дума пала кода, саво ԥаримос исин кай амарэ ԥрала и ԥэя и сар лэнди тэ поможысарас.

ТЭ АВЭЛ ТУМЭНДЭ ТЕРПЕНИЯ

3. Васо, сар пистромэ андэ 2 Петра 2:7, 8, сас нэправильно, со тердя о Лото и каринг со када андя?

³ О Лото тердя нэправильно, кала витидя тэ жувэл андо Содомо, кай сас фартэ бут билажавардимос. (Адиносар 2 Петра 2:7, 8b.) О Содомо сас барвало форо и када лэ Лотости вижыля ригаса (Бытие 13:8—13; 14:12). Дицол, кай лэстири хулаи фартэ присытеля каринг о барвалимос, саво сас андо форо, или вой присытелясас каринг дэсавэ мануша, савэ котэ жувэнас, кай аж на кангля лэ Иеговас. Вой хасардя пэстири жызня, кала о Дэл сԥабардя кодэва форо ягаса и сераса. Погиндон кадяжэ пала дуй лэ Лотостирэ щея. Лэндирэ тэрнэ тожэ мулинэ андо Содомо. О Лото хасардя пэско цэр, о барвалимос и со май страшно, пэстиря хулая (Бытие 19:12—14, 17, 26). Со о Иегова тердя андэ кадэя ситуацыя?

4. Сар о Иегова сыкадя пэстири терпения лэ Лотоса? (Диқэн и картинка пэ обложка.)

⁴ Хоть о Лото екжэно закамля тэ жувэл андо Содомо, о Иегова всаек пожалуисардя лэс и бишалдя лэ анӷелонэн тэ спасын лэс и лэстирэ ерес. Но о Лото на кангля лэ анӷелонэн. Во на камэлас сразу тэ ужал анда форо. О Лото на грабияспэ. Лэ анӷелонэнди прижыляпэ тэ лэн лэ Лотос и лэстирэ ерес вастэндар и тэ виандярэн анда форо (Бытие 19:15, 16). Тоди и анӷелоря приԥэндэ лэсти тэ нашэлтар андэ плая. Но о Лото мангляпэ тэ нашэлтар андо форо, саво сас май пашэ (Бытие 19:17—20). О Иегова на грабисайля тэ холявэл и виашундя лэс, и мэкля тэ терэл па пэстирятэ. Прожыля дэсави время и лэ Лотости ашэля страшно тэ жувэл андэ кодэва форо. Во ужылятар андэ плая, интя, каринг о Иегова лэс май англал бишалэлас (Бытие 19:30). Скати жэ кай о Иегова сас терпения! Сар амэ можэм тэ терас сар о Иегова?

5, 6. Сар тэ терас кадя, сар пистромэ андэ 1 Фессалоникийцам 5:14, сар када терэлас о Иегова?

⁵ Можэт варико анда христианоря сар о Лото закамля тэ терэл варисо нэправильно и через када лэстэ бида. Со амэ тераса андэ кацави ситуацыя? Амэ можэт закамаса тэ ԥэнас: «Со затердян, кода и ха» (Галатам 6:7). Хоть амэ ԥэндоп чачимос, но авелоп май драго, если амэ поможысараса лэсти, кадя жэ сар о Иегова поможысардя лэ Лотости.

⁶ О Иегова бишалдя лэ анӷелонэн най кати тэ ԥэнэн, со тэ терэл лэ Лотости, но и кай тэ поможын лэсти тэ ашэлпэ жундо, кала о Дэл лэла тэ сԥабарэл о Содомо. Кадя жэ и адес. Кала амэ диқас, кай о ԥрал камэл варисо тэ терэл, со можэт тэ анэн бида, трэбуй лэсти тэ подԥэнас и кала трэбуй авэла, тэ поможысарас. Дажэ кала во сразу на приашундёл каринг кода, со пистромэ андэ Библия, амэнди всаек трэбуй тэ на холявас и тэ аштярас, кала во приашундёла. На подэнпэ ла холяти и на гиндон, кай о ԥрал на парудёла. На бистрэн, сар и анӷелоря поможысардэ лэ Лотости, и терэн кадя жэ (1 Иоанна 3:18). Када ԥэнэса, тэ лэн лэс вастэстар и тэ поможын тэ терэл кадя сар подԥэндэ. (Адиносар 1 Фессалоникийцам 5:14c.)

7. Со поможыя амэнди, сар о Иегова, тэ полас лэ ԥралэн и лэ ԥэян, сар во полэлас лэ Лотос?

⁷ О Иегова на шолас сама кати пэ кода, со о Лото терэлас най кадя. Кала прожыля время, во ԥэндя лэ апостолости Петрости тэ ԥэнэн по Лото, кай во праведно мануш. Сар жэ амэ лошалэ, кай о Иегова простий амэн, кала варисо терас най кадя! (Псалом 130:3). Со поможыя амэнди, сар о Иегова, тэ полас лэ ԥралэн и лэ ԥэян, сар во полэлас лэ Лотос? Если амэ май бут шас сама пэ кода, савэ лэндэ лашэ качестворя, амэнди авэла май вушэро пэр лэндэ тэ на холявас и тэ аштярас, кала вонэ парудёна. Ай вонэ пэстиря ригатар, май йто прилэна амэндар и помощь.

СЫКАВЭН, КАЙ ФАРТЭ ЖАЛУИН АВРЭН

8. Со амэ камас тэ терас, кала фартэ жалуисарас?

⁸ О Иово на терэлас кадя, сар о Лото. И во вся и время витидэлас кода, со правильно. И всаек андэ лэстири жызня сас бут ԥаримос. Во хасардя пэско хабэ и кода, кай сас ашунгло и инке во фартэ занасвайля. Ай кадяжэ лэстэ мулинэ всаворэ лэстирэ бэятцэ. Кадяжэ лэс дошалярэнас кодэла, кас во полэлас, сар друӷонэн. Васо вонэ на линэ лэс фартэ тэ жалуин? Вонэ на камлэ тэ розлэнпэ, со кай о Иово тердяпэ. Важ када вонэ грабисайлэ лэс тэ дошалярэн и холяса линэ тэ доԥэнэн, васо лэстэ кадя. Сар тэ на терас кадя, сар вонэ? На бистрэн, кай кати о Иегова диқэл и ситуацыя всаворэ ригэндар. Драго виашунэн кодэлэс, ко попэля андэ бида. Старыинпэ тэ полэн, сар лэсти ԥарэс. Кати тоди дицола, кай тумэ па чачимастэ фартэ жалуин лэс.

9. Со амэ на тераса, кала амэ варикас фартэ жалуисарас и васо?

⁹ Кала амэ фартэ варикас жалуисарас, амэ на ласа тэ андярас сплетни, пала ԥаримос, саво лэндэ исин. Кадэлэстар авэла мирно андэ собрания, и на роздилия ла (Притчи 20:19; Римлянам 14:19). Кодэва, ко андярэл сплетни, во на гиндой, со во ԥэнэн и кадэлэса во можэт тэ анэн инке май бут ԥаримос кодэлэсти, касти и кадя ԥарэс (Притчи 12:18; Эфесянам 4:31, 32). Давайте тэ диқас андо мануш ек о лашимос, и тэ гиндосарас пала кода, сар тэ поможысарас лэсти тэ пэрэандярэл о ԥаримос.

10. Сости амэн сытярэн и алава анда Иов 6:2, 3?

¹⁰ Адиносар Иов 6:2, 3d. Дэкала о Иово на приритярдёлас андэ дума. Потом во поля, кай дя дума нэправильно (Иов 42:6). Кала кай о ԥрал или ԥэй исин бари пэрэжывания, вонэ, сар и о Иово, моӷут тэ ԥэнэн кадя, пала со потом жалуина. Сар амэнди пэ када тэ диқас? На трэбуй лэн тэ сындосарас, ай фэдэр тэ полас и фартэ тэ жалуисарас. На бистрэн, кала о Иегова создал лэ манушэн, во на камля, кай лэндэ тэ авэн проблемы и о ԥаримос, саво амэндэ исин адес. Важ када амэ на удивисавас, кай кодэла, ко на парашэн тэ служын лэ Дэвлэсти, кала попэрэн андэ бида, на приритярдён андэ дума. Дажэ кала вонэ найдраго дэн дума пала Иегова чи пала амэндэ, на трэбуй тэ холявас и тэ сындосарас лэн (Притчи 19:11).

11. Сар и старейшыноря моӷут тэ терэн кадя, сар о Елиуё, кала лэнди трэбуй тэ подԥэнэн лэ ԥралэсти чи ла ԥэяти, андэр со тэ парудён?

¹¹ Дэкала лэ манушэсти, саво попэля андэ бида трэбуй, кай лэс тэ подритярэн и тэ подԥэнэн, андэр со во тэ парудёл (Галатам 6:1). Со трэбуй тэ терэн андэ кацаво случаё и старейшыноря? Лэнди важно тэ терэн кадя, сар о Елиуё, саво виашундя лэ Иовос, поля и фартэ жалуисардя лэс (Иов 33:6, 7). О Елиуё ля лэсти тэ подԥэнэн, андэр со тэ парудёл посли кода, сар поля, васо во кадя дя дума. И старейшыноря, савэ терэн кадя, сар о Елиуё, драго виашунэна лэ ԥралэн и лэ ԥэян и старыинапэ тэ полэн, со лэндэ тердяпэ. Тоди, кала и старейшыноря подԥэнэна, андэр со тэ парудён, када можэт тэ лэл лэн лэ одестар.

ПОДРИТЯРЭН АЛАВЭНЦА

12. Со ашэля ла Ноеминяса посли кода, сар мулинэ лако хулай и латирэ дуй шавэ?

¹² И Ноеминь фартэ любияс лэ Иеговас и на парашэлас тэ служый лэсти. Посли кода, сар муля лако хулай и латирэ дуй шавэ, вой ԥэндя, кай пэр латэ тэ ԥэнэн Мара, када сыкавэл «заровди» (Руфь 1:3, 5, 20 сноска, 21). Латири бори и Руфь сас паша латэ андэ всаворэ биды. И Руфь най кати поможыяс, но и подритярэлас пэстиря сасуя лашэ алавэнца анда оди и и ԥэнэнас, кай вой ла любий и никала на ашавэла (Руфь 1:16, 17).

13. Васо амэнди трэбуй тэ подритярас кодэлэн, кастэ муля о хулай чи и хулаи?

¹³ Кала варикастэ анда христианоря мэрэл о хулай чи и хулаи, лэсти трэбуй, кай лэс тэ подритярас. О хулай и хулаи, можно тэ ԥэнэс, сар дуй витки, савэ барён рядом. Прожан бэрша и лэндирэ корнёря пэрэплетинпэ, ай кала ек витка виӷанавэн, тоди авэр можэт тэ римойпэ. Кадяжэ, кала мэрэл о хулай чи и хулаи, аврэсти фартэ ԥарэс и када можэт тэ авэл долӷо. И Полаe, савятэ нэожыданно муля о хулай, росԥэнэн: «Андэ ек минута мэрни жызня пэрэисайля. Мандэ андо ди сас кацаво, кай мэ никасти нэ нужно. Мэ хасардэм само лашэс друӷос, касти мэ моӷла тэ росԥэнав пала вся. Мэрно хулай поможыяс манди тэ пэрэандярав и о лашимос и о ԥаримос. Ек лэсти мэ моӷла тэ росԥэнав, со мандэ андо ди. Ԥэнэса, ман епаш отшындэ».

14, 15. Сар можно тэ подритярас кодэлэс, ко ашэляпэ екжэно?

¹⁴ Сар тэ подритярас кодэлэс, кастэ муля о хулай чи и хулаи? Пэрво, со трэбуй тэ стерас, лэса трэбуй тэ подас дума, дажэ кала на ӷанас, со тэ терас и со тэ ԥэнас. И Пола, пала сави дасас дума май англал, ԥэнэн: «Мэ полав, кай и мануша часто на ӷанэн, сар пэс тэ андярэн кодэлэнца, кастэ муля о хулай чи и хулаи. Вонэ даран, кай ԥэнэна варисо най кадя. Но фэдэр тэ дэн дума варисо най кадя, чем совсем нисо тэ на дэн дума». Кала лэ манушэсти ԥарэс, во на аштярэл амэндар, кай амэ ԥэнаса варисави годявэрни дума. И Пола росԥэнэн: «Манди хутилэлас кода, кай и друӷоря просто ԥэнэнас: „Манди тут фартэ жалко“».

¹⁵ О Уильямо, кастэ муля и хулаи, и кала прожылэ дэсавэ бэрша, росԥэнэн: «Мэ фартэ лошавав, кала и друӷоря варисо росԥэнэн пала мэрни хулаи. Када сыкавэл манди, кай ла любинас и полэнас. Мандэ нинай алава тэ росԥэнав, сар када ман подритярэлас, важ кода кай вой важ мандэ сас фартэ куч». Ек ԥивли, савя ақарэн Бьянка, росԥэнэн: «Манди ашэл май вушэро, кала авэр мангэнпэ манца, заадинон дэсавэ стихоря анда Библия, росԥэнэн манди пала мэрно хулай и виашунэн, кала мэ росԥэнав пала лэстэ».

16. а) Со амэ можэм тэ стерас важ кодэла, ко ашэляпэ екжэно? б) Со приԥэндя о Иегова амэнди тэ терас, сар пистромэ андэ Иакова 1:27?

¹⁶ Кадя жэ сар и Руфь сас вся и время паша Ноеминь, амэнди трэбуй тэ на парашас тэ подритярас кодэлэн, ко хасардя пэстирэ чачес. И Пола росԥэнэн: «Посли кода, сар муля мэрно хулай, ман всаворэ подритярэнас. Но прожыля время и лэндири жызня упалэ ашэля сар сас, ай мэрни най. Драго, сар авэр полэн, кай кодэлэс, ко хасардя пэстирэ чачес, трэбуй тэ подритярэн най ек шон, ай дэкала дажэ най ек бэрш». Канешно, всаворэ мануша разни. Варико присытёл каринг када йто. Ай аврэнди кажно разо ԥарэс тэ терэн кода, со терэнас дуйжэнэ. Кажно пэрэандярэл и бида па пэстирятэ. Давайте тэ на бистрас, кай амэнди приԥэндя о Иегова тэ заботисавас пала кодэла, ко ашэляпэ екжэно, и амэнди трэбуй када тэ терас. (Адиносар Иакова 1:27f.)

17. Васо амэнди трэбуй тэ подритярас кодэлэн, кас мэкля о хулай чи и хулаи?

¹⁷ Ай инке фартэ ԥарэс и кодэлэ христианонэнди, савэн мэкля о хулай чи и хулаи. И Джойс, савятар о хулай ужылятар кай авэр жувли, росԥэнэн: «Если бы во тэ мулиноп, манди авелоп най кадя ԥарэс. Кодэла, ко муля андэ авария чи муля через о насвалимос, лэндэ на сас выборо. Ай кай мэрно хулай сас, и во витидя тэ мэкэл ман. Стодя ман тала пэрнэ!»

18. Сар тэ подритярэс кодэлэн, ко ашэляпэ екжэно?

¹⁸ Кала ту терэс варисаво лашимос важ кодэла, ко ашэляпэ екжэно, ту сыкавэс, кай любис лэс. Лэсти, сар никала, трэбуй друӷоря (Притчи 17:17). Сар тэ авэс важ лэндэ лашо друӷо? Можно тэ ақарэс пэстэ цэрэ, тэ стос тэ хал, или тэ ақарэс лэс тэ жан варикастэ тэ побэшэн. Кадяжэ тэ жас андэ служэния чи тэ ақарэс, кала тидэспэ лэ ереса тэ сытёс па Библия. Кадэлэса ту радуиса лэ Иеговас, важ кода кай во «паша кодэва, ко бидаса умардо» и фэрий кодэлэн, кастэ муля о хулай чи и хулаи (Псалом 34:18; 68:5).

19. Со амэ трэбуй тэ терас, сар запистромэ андэ 1 Петра 3:8?

¹⁹ Кала лэла тэ правий лэ Дэвлэско Царство, пэ ԥув «и биды, савэ сас, бистрэна». Амэ фартэ аштярас кодэя время, кала «кода, со сас, на лэна тэ сэрэн», и «на авэла по ди» (Исаия 65:16, 17). Ай пока давайте тэ подритярас ек аврэс. Мэк андэ амарэ алава и дила дицол, кай амэ анда оди любисарас лэ ԥралэн и лэ ԥэян! (Адиносар 1 Петра 3:8g.)