«Мэ... додиқлэм фартэ бутэ манушэн»

1. Сави время сас кай о апостоло Иоанно, кала кончияспэ о пэрво вико?

КАЛА кончияспэ о пэрво вико лэ Иисусостар Христостар, лэ Иоанностэ сас фартэ ԥари время. Кадэва мануш ужэ сас андэ бэршэндэ и лэс одбишалдэ по острово Патмос. Файма, во сас послиднё анда апостолоря, савэ жувэнас пэ ԥув (Откровение 1:9). Во ӷанэнас, кай и отступникоря заандярэнас андо хохаимос и собрания и терэнас вся, кай тэ роздилин лэ христианонэн. Здэласпэ, кай лэ чачунэ христианонэн будэр на авэла (Иуды 4; Откровение 2:15, 20; 3:1, 17).

2. Сави видения важ о пророчество, сар запистромэ андэ Откровение 7:9—14, диқля о Иоанно? (Диқэн и картинка пэ обложка.)

² Андэ кацави ԥари время о Иоанно диқля фартэ лащи видения важ о пророчество. Во диқля, сар ек анӷело ԥэнэн лэ штарэ анӷелонэнди, тэ ритярэн и барэ балваля важ и само бари бида, жы каринг кода, пока на стона послиднё печать пэ кодэла мануша, савэ кандэнас (Откровение 7:1—3). Кодэла, пэр кастэ печать, када и 144 000, савэ лэна тэ правин лэ Иисусоса по нэбо (Луки 12:32; Откровение 7:4). Посли када о Иоанно ԥэнэн инке пала авэр мануша, када кодэла, пэр кастэ ԥэнэн и фартэ бут мануша, савэн нико нэ моӷ тэ пэрэадиной. Акэ сар во пала лэндэ пистрой: «Кадэла мануша слинэ анда всаворэ нацыи, народоря, и шыба и тердёнас англа престоло и англа Бакроро». (Адиносар Откровение 7:9—14b.) Сар жэ сас лошало о Иоанно, кала уӷангля, кай май англэ кодэла, пэр кастэ ԥэнэн и фартэ бут мануша, лэна тэ тэлён лэ Дэвлэсти андо чачимос!

3. а) Васо через лэ Иоанностири видения амари вера ашэл май састи? б) Пала со подаса дума андэ кадэя статья?

³ Через кадэя видения кай о Иоанно ашэля май састи вера. Но инке май фартэ кадэя видения стерэла, кай амари вера тэ авэл май састи, важ кода кай амэ жувас тоди, кала вой исполняеца! Амэ диқас амарэ яқэнца, сар стидэнпэ милионоря кодэла, ко надеинпэ тэ пэрэжувэн само бари бида и тэ жувэн вечно пэ ԥув. Анда кадэя статья амэ уӷанаса, сар о Иегова май бут чем 80 бэрш палпалэ, дя тэ полэн пэстирэ народости, ко авэла кодэла, пэр кастэ ԥэнэн и фартэ бут мануша. Посли када амэ роздиқаса дуй маменторя важ кадэла мануша. Пэрво, када, кай лэн фартэ бут, и, дуйто, кай вонэ анда всаворэ народоря. Кала пала када уӷанаса, и вера ашэла май састи всаворэндэ кодэлэндэ, ко ужал андэ кадэла фартэ бут мануша.

КАЙ ЛЭНА ТЭ ЖУВЭН КАДЭЛА И ФАРТЭ БУТ МАНУША?

4. Саво чачимос анда Библия на полэн и христианоря, савэ ԥирэн андэ қандиря и соса пэр лэндэ на шонпэ и Исследователя Библии?

⁴ Андэ Библия драго пистромэ, кай и лашэ мануша, савэ кандэн лэ Дэвлэс, жувэна вечно пэ ԥув. Но и христианоря, савэ кати ԥэнэн, кай патян андо Христос, адес кадэлэсти на сытярэн (2 Коринфянам 4:3, 4). Андэ бут христиански қандиря росԥэнэн, кай всаворэ лашэ мануша, посли кода, сар мэрэн жан по нэбо. Но набут мануша Исследователя Библииc, савэ в концэ андо 19 вико линэ тэ вимэкэн о журнало «Сторожэво башня» диқэнас пэ када па аврятэ. Кадэла мануша полинэ, кай о Дэл упалэ стерэла о раё пэ ԥув, и милионоря мануша, савэ кандэн лэс, лэна тэ жувэн най по нэбо, ай катэ пэ ԥув. Но трэбуй сас тэ прожал время. Васо? Кай май драго тэ полэн, ко авэла кодэла мануша, савэ кандэн лэ Дэвлэс (Матфея 6:10).

5. Со и Исследователя Библии полинэ важ и 144 000?

⁵ И Исследователя Библии кадяжэ полинэ, кай дэсавэ мануша, авэна витиндэ па ԥув, кай тэ правин лэ Иисусоса по нэбо (Откровение 14:3). Кадэла мануша трэбуй сас тэ авэн 144 000 христианоря, савэ анда оди на парашэнас тэ кандэн лэ Иеговас пэ ԥув. Ай со можно тэ ԥэнас пала фартэ бут мануша?

6. Сар гиндонас пала фартэ бут мануша и Исследователя Библии?

⁶ Андэ пэстири видения о Иоанно диқля, кай фартэ бут мануша «тердёнас англа престоло и англа Бакроро» (Откровение 7:9). Важ када и Исследователя Библии гиндосардэ, кай и фартэ бут мануша, сар и 144 000, лэна тэ жувэн по нэбо. Но сави разница тоди сас машкар кодэла дуй ӷруппы? Исследователя Библии гиндонас, кай андэ фартэ бут мануша ужана кодэла, ко най андэ вся кандэнас лэ Дэвлэс, кала жувэнас пэ ԥув. Хоть кацавэ мануша ритярэнас дэсавэ библейски законоря и андярэнас пэс драго, дэсавэ андар лэндэ, файма, всаек ԥирэнас андэ христиански қандиря. Па кода, сар гиндонас и Исследователя Библии, кодэла мануша любинас лэ Дэвлэс, но най пэ скати, кай тэ правин лэ Иисусоса. Ай важ кода кай вонэ най фартэ любинас лэ Дэвлэс, вонэ трэбуй сас тэ тердён англа престоло, ай най тэ бэшэн пэ престолоря.

7. а) Ко, сар гиндонас и Исследователя Библии, трэбуй сас тэ жувэл андо Тысячелетнё царство пэ ԥув? б) Со вонэ гиндонас пала мануша, савэ андэ дэлмутни время на парашэнас тэ кандэн лэ Дэвлэс?

⁷ Ко тоди, сар гиндонас и Исследователя Библии, трэбуй сас тэ жувэл пэ ԥув? Вонэ гиндонас, кай кала 144 000 и фартэ бут мануша авэна стидэ по нэбо, милионоря мануша лэна тэ жувэн пэ ԥув и диқэна вся о лашимос, саво авэла андо Тысячелетнё лэ Христоско царство. Па лэндирятэ, кодэлэ манушэнди, на трэбуй сас тэ служын лэ Иеговасти жы каринг кода, сар о Иисусо лэла тэ правий. Гиндонас, кай лэн сытярэна лэ Дэвлэстирэ закононэнди, кала авэла Тысячелетнё царство. Посли кода, ко жувэла па лэ Иеговастирэ законоря, лэндэ авэла вечно жызня пэ ԥув, ай ко на жувэна па законоря, кодэла помэрэна. Исследователя Библии кадяжэ гиндонас, кай дэко анда кодэла, ко служыя андэ кодэя время лэ «князёнэнца па вся и ԥув», в концэ андо Тысячелетнё царство всаек лэна тэ жувэн по нэбо (Псалом 45:16). Вонэ гиндонас, кай када авэна кодэла мануша, савэ ринапэ каринг и жызня и пэ савэ андэ дэлмутни время стонас бари патив. Када кодэла мануша, савэ на парашэнас тэ кандэн лэ Дэвлэс и мулинэ жы каринг о Христос.

8. Пала савэ трин ӷруппы манушэн гиндонас и Исследователя Библии?

⁸ Вижал и Исследователя Библии гиндонас, кай авэна трин ӷруппы мануша. Пэрво, када 144 000, савэ трэбуй сас тэ правин лэ Иисусоса по нэбо. Дуйто, када кодэла, пэр кастэ ԥэнэн и фартэ бут мануша, савэ най анда оди терэнас лэ Дэвлэсти дила, савэ трэбуй сас тэ тердён «англа престоло и англа Бакроро». Трито, милионоря кодэла, ко трэбуй сас тэ сытён лэ Иеговастирэ закононэнди пэ ԥув, кала авэла лэ Христоско Тысячелетнё царствоd. Но андэ время, сави стодя о Иегова, вонэ линэ май драго тэ полэн о чачимос (Притчи 4:18).

О ЧАЧИМОС, САР О СВЕТО, АШЭЛ МАЙ ЯРКО

9. а) Сар тэ полас, кай и фартэ бут мануша пэ ԥув тердён «англа престоло и англа Бакроро»? б) Васо, сар пистромэ андэ Откровение 7:9, кадя тэ полас правильно?

⁹ Андо 1935 бэрш, лэ Иеговастирэ свидетеля линэ май драго тэ полэн, ко када и фартэ бут мануша анда лэ Иоанностири видения. Вонэ полинэ, кай тэ тердён «англа престоло и англа Бакроро», лэ фартэ бутэ манушэнди на трэбуй тэ авэн по нэбо. Дажэ пэ ԥув вонэ моӷут тэ тердён «англа престоло». Сар када тэ полас? И фартэ бут мануша тердён «англа престоло» тоди, кала вонэ прижанэн лэ Иеговастири власть и андэ вся лэс кандэн (Исаия 66:1). Кадяжэ кадэла мануша тердён «англа Бакроро». Сар када? Када, кала вонэ патян, кай о Иисусо отдя важ лэндэ пэстири жызня. Пала када андэ Матфея 25:31, 32 пистромэ, кай «всаворэ народоря», кадяжэ и найлашэ и холинатирэ мануша, «авэна стидэ» англа Иисусо, саво бэшэл пэ пэско фартэ шукарно престоло. Драго дицол, кай всаворэ народоря пэ ԥув, ай най по нэбо. Тоди драго стидэлпэ вся андо гиндо. Када росԥэнэн, васо, сар пистромэ андэ Библия, кодэла, пэр кастэ ԥэнэн и фартэ бут мануша на авэна по нэбо. Вечно жызня по нэбо авэла кай и ек ӷруппа мануша, када и 144 000, савэ «авэна тэ правин ла ԥувьяса» вмести лэ Иисусоса (Откровение 5:10).

10. Васо лэ фартэ бутэ манушэнди трэбуй тэ уӷанэн пала Иегова жы каринг кода, сар залэлапэ лэ Христоско Тысячелетнё царство?

¹⁰ Акана, лэ 1935 бэршэстар, лэ Иеговастирэ свидетеля линэ тэ полэн, кай и фартэ бут мануша анда лэ Иоанностири видения, када и христианоря, савэ на парашэн тэ кандэн лэ Иеговас, и савэ надеинпэ тэ жувэн вечно пэ ԥув. Кай тэ пэрэжувэн и само бари бида, лэнди трэбуй тэ уӷанэн пала Иегова и тэ тэлён лэсти жы каринг кода, сар авэла лэ Христоско Тысячелетнё царство. Лэнди кадяжэ трэбуй тэ сыкавэн пэ дила пэстири састи вера, кай вонэ «тэ обжан вся, со трэбуй тэ авэл» англа кода, кала о Иисусо залэла тэ правий тысяча бэрш (Луки 21:34—36).

11. Васо дэсавэ Исследователя Библии гиндонас, кай в концэ лэ Христоско Тысячелетнё царство, варикас анда лэ Иеговастирэ служытеля залэна по нэбо?

¹¹ Ай со можно тэ ԥэнэс пала кацавэ гиндоря? Дэсавэ гиндонас, кай лэ Дэвлэстирэ служытеля, савэ на парашэна тэ кандэн лэ Дэвлэс, лэн залэна па ԥув по нэбо в концэ, кала авэла лэ Христоско Тысячелетнё царство? Пала када сас пистромэ андэ «Сторожэво башня» лэ 15 февралёстар андо 1913 бэрш. Варико моӷ тэ гиндой: «Васо и мурша, савэ анда дэлмутни время, савэ на парашэнас тэ кандэн лэ Дэвлэс, лэна тэ жувэн пэ ԥув? Ай кодэла христианоря, савэ най анда вся оди терэнас лэ Дэвлэсти дила, жана по нэбо». Вонэ кадя ԥэнэнас, важ кода кай нэправильно гиндонас акэ пала со. Пэрво, кай и фартэ бут мануша лэна тэ жувэн по нэбо. И дуйто, кай и фартэ бут мануша, када кодэла мануша, савэ най анда вся оди терэн лэ Дэвлэсти дила.

12, 13. Со ӷанэн пала пэстири наӷрада и памазаникоря и кодэла, пэр кастэ ԥэнэн и фартэ бут мануша?

¹² Сар амэ диқлям андо 1935 бэрш лэ Иеговастирэ свидетеля драго полинэ, кай кодэла, ко пэрэжувэна о Армагеддоно, када и исин и фартэ бут мануша анда лэ Иоанностири видения. Вонэ вижана анда само бари бида и фартэ радосно лэна тэ цыпин: «Фэрисардя амэн амаро Дэл, саво бэшэл по престоло, и о Бакроро» (Откровение 7:10, 14). Када авэла пэ ԥув. Ай инке, сар пистромэ андэ Библия, кодэла, ко рияпэ каринг и жызня тэ жувэн по нэбо, лэнди дэна «варисо май лашо», чем кодэлэ служытелёнэнди, савэ на парашэнас тэ кандэн лэ Дэвлэс и жувэнас андэ дэлмутни время (Евреям 11:40). Кала и ԥрала када полинэ, вонэ линэ анда оди тэ росԥэнэн важ о лашимос, кай и мануша смоӷут тэ жувэн вечно пэ ԥув, и линэ тэ ԥэнэн лэ манушэнди, кай тэ служын лэ Иеговасти.

¹³ И христианоря, пэ савэ ԥэнэн и фартэ бут мануша, вонэ фартэ лошалэ, кай аштярэн о лашимос, саво авэла пэ ԥув. Вонэ полэн, кай о Иегова екжэно витидэл, ко анда кодэла, ко лэс на парашэл тэ кандэл, лэла тэ жувэл по нэбо, ай ко пэ ԥув. О Иегова, кадя фартэ любий лэ манушэн, кай отдя пэстирэ шавэс лэ Иисусос, кай тэ витинэл лэ манушэн (Римлянам 3:24). И памазаникоря и кодэла, пэр кастэ ԥэнэн и фартэ бут мануша ӷанэн, кай кати важ када вонэ получина пэстири наӷрада.

ЧАЧЕ ФАРТЭ БУТ МАНУША!

14. Васо бутэнди андо 1935 бэрш камэласпэ тэ уӷанэн, сар авэла о пророчество важ и кодэла, пэр кастэ ԥэнэн и фартэ бут мануша?

¹⁴ Андо 1935 бэрш лэ Иеговастирэ свидетеля полинэ май драго кода, со уӷанглэ анда лэ Иоанностири видения. Посли када, бутэнди камэласпэ тэ уӷанэн, сар ашэла май бут кодэлэн, ко надеинпэ тэ жувэн пэ ԥув, важ кода кай лэн трэбуй сас тэ авэл и фартэ бут мануша. Акэ со росԥэнэн о Рональдо Паркино, савэсти андэ кодэя время сас 12 бэрш. Во росԥэнэн: «Тоди па вся и ԥув сас варикай 56 000 вазвещятеля, и, файма, май бут андар лэндэ сас памазаникоря. Важ када здэласпэ, кай кодэла, пэр кастэ ԥэнэн и фартэ бут мануша, лэн набут».

15. Сар стидэн кодэлэн, пэр кастэ ԥэнэн и фартэ бут мануша?

¹⁵ Но кала прожыля най ек десятко бэрш, лэ Иеговастирэ свидетелёнэн ашэлас май бут через кода, кай служынас и мисианероря, савэн одбишалэнас андэ бут страны. Посли кода, андэ 1968 бэрш залинэ тэ сытярэн па Библия через и книжка «Истина, ведущая к вечной жизни». Андэ кадэя книжка фартэ драго росԥэнэнас о чачимос анда Библия. И через када фартэ бут мануша, кастэ ковло ди, уӷанглэ о чачимос. Важ и штар бэрш болделэ май бут чем епаш милионо нэвэ ученикоря. И католическо қандири хасарэлас пэско зор андэ Латинско Америка и андэ авэр страны. Ай андэ Восточно Европа и андэ Африка злэнас о запрето па амари дила. И важ кода болделэ инке милионоря мануша (Исаия 60:22). Андэ послидни бэрша андэ лэ Иеговастири арӷанизацыя ашэля май бут кода, пар со май драго линэ тэ поможын лэ манушэнди тэ уӷанэн, сости сытярэл и Библия. Акана амэ патяс, кай о Иегова стидэл кодэлэн, пэр кастэ ԥэнэн и фартэ бут мануша. Лэн акана май бут чем 8 милионоря.

И ФАРТЭ БУТ МАНУША АНДА ВСАВОРЭ НАРОДОРЯ

16. Ко ужал андэ фартэ бут мануша?

¹⁶ Кала о Иоанно росԥэнэнас пала пэстири видения, во ԥэндя, кай андэ кодэла, пэр кастэ ԥэнэн и фартэ бут мануша, ужана и народоря «анда всаворэ нацыи... и шыба». Пала кацаво жэ пистросардясас и о пророко Захария: «Андэ кодэла деса дэш мануш анда всаворэ нацыи, савэ дэн дума пэ разни шыба, астардёна пала лэ иудеёнэнди йда, астардёна и ԥэнэна: „Амэ жаса тумэнца, важ кода кай амэ ашундям, кай тумэнца о Дэл“» (Захария 8:23).

17. Сар лэ Иеговастири арӷанизацыя поможый лэ манушэнди анда разни народоря и шыба?

¹⁷ Лэ Иеговастирэ свидетеля полэн, кай тэ стидэн лэ манушэн, савэ дэн дума пэ разни шыба, трэбуй тэ росԥэнэн и лащи весть пэ кадэла шыба. Амэ пэрэандярас вся кода, пар со сытярэн па Библия ужэ май бут чем 130 бэрш. Но кода, кай амэ пэрэандярас и литература пэ фартэ бут шыба, кадэя дила нико и никала на терэлас и на терэл. Амарэ яқэнца амэ диқас, сар о Иегова терэл чуда и стидэл кодэлэн, пэр кастэ ԥэнэн и фартэ бут мануша анда всаворэ народоря. Исин и Библия и литература, сави стерди пар латэ пэ фартэ бут шыба. Через када, кадэла мануша тэлён лэ Иеговасти сар ек, хоть вонэ и анда разни народоря. Вонэ ашундён кодэлэса, кай вся и время росԥэнэн важ о Дэл и любин ек аврэс. Кадэлэстар амэ фартэ лошавас! (Матфея 24:14; Иоанна 13:35).

СОСТИ СЫТЯРЭЛ АМЭН КАДЭЯ ВИДЕНИЯ?

18. а) Васо, сар пистромэ андэ Исаия 46:10, 11, амэ на удивисавас, кай о Иегова фартэ драго терэл о пророчество пала фартэ бут мануша? б) Васо кодэла, ко надеинпэ тэ жувэн пэ ԥув, на гиндон, кай лэн варисоса обжылэ?

¹⁸ Амэ фартэ лошалэ кодэлэстар, сар о Иегова терэл кадэва пророчество пала кодэла, пэр кастэ ԥэнэн и фартэ бут мануша! Амэ на удивисавас, кай о Иегова терэл лэс кадя драго. (Адиносар Исаия 46:10, 11e.) Кодэла, пэр кастэ ԥэнэн и фартэ бут мануша, блаӷодарин лэ Иеговас пала лашимос, саво авэла англэ, саво во лэнди подарисардя. Кадэла мануша на гиндон, кай во лэн варисоса обжыля, важ кода кай вонэ най памазани лэ Дэвлэстирэ духоса, кай тэ служын лэ Иисусоса по нэбо. Андэ Библия пистромэ пала бут мурша и жувля, савэ на парашэнас тэ кандэн лэ Дэвлэс, пэ савэ сас о свынто духо, но савэ на ужан андэ 144 000. Ек кацаво примеро, када о Иоанно Крестителё (Матфея 11:11). Ай авэр, када о царё Давидо (Деяния 2:34). Вонэ, ай кадяжэ бут авэр мануша ринапэ каринг и жызня, кай тэ жувэн андо раё пэ ԥув. Всаворэ кадэла служытеля и кодэла, пэр кастэ ԥэнэн и фартэ бут мануша, моӷут тэ сыкавэн, кай вонэ на парашэн тэ кандэн лэ Иеговас и подритярэн ла диласа лэстири правления.

19. Со амэ камас тэ терас, кала полас, сар стерэлпэ лэ Иоанностири видения важ кодэла, пэр кастэ ԥэнэн и фартэ бут мануша?

¹⁹ Инке никала на сас кацаво, кай о Дэл тэ стидэл милионоря манушэн анда всаворэ народоря. И всаек, кай амэ камас тэ жувас, пэ ԥув или по нэбо, амэ трэбуй тэ поможысарас, кай май бут мануша тэ ашэн андэ кодэла, пэр кастэ ԥэнэн и фартэ бут мануша, пэ савэ инке ԥэнэн «авэр бакрорэ» (Иоанна 10:16). Йто, сар и сас ԥэндо, о Иегова бишалэла пэ ԥув и само бари бида и умарэла и правительства и веры, савэ на дэнас жызня лэ манушэнди. Саво жэ лашимос авэла всаворэндэ, ко ужал андэ фартэ бут мануша, кай тэ служын лэ Иеговасти вечно пэ ԥув! (Откровение 7:14).