И книӷа Откровение сыкавэл, сави жызня аштярэл амэн англэ

1. Сави важно ришэния трэбуй тэ прилэл кажно андар мэндэ?

АДЕС кажно андар мэндэ трэбуй тэ прилэл важно ришэния: ласа амэ тэ подритярас амарэ Создателёс, лэ Иеговас, или лэстирэ вороӷос, лэ Сатанас. Трэбуй тэ витидас. Кадэлэстар зависит, ласа амэ тэ жувас вечно чи най (Матф. 25:31—33, 46). Кала авэла и само бари бида, пар мэндэ стона знако: или кай амэ тэ спасысавас, или кай тэ авас уничтожэни (Отк. 7:14; 14:9—11; Иез. 9:4, 6).

2. а) Сар и алава анда Евреям 10:35—39 придэн амэнди зор? б) Андэр со амэнди поможыя и книӷа Откровение?

² Проадинон Евреям 10:35—39. Если ту залян лэ Иеговастири риг, ту стердян годявэрнэс. Наверно, ту фартэ камэс тэ поможыс и аврэнди тэ прилэн правильно ришэния. Андэ када тути поможыя и книӷа Откровение. Андэ кадэя удивительно книӷа росԥэнэнпэ, со аштярэл лэ Иеговастирэ вороӷонэн и савэ блаӷословении авэна кодэлэндэ, ко предано подритярэл лэстири правления. Важ када фартэ важно инке май бари сама тэ шас пэ кадэя книӷа. Када придэла амэнди зор тэ на парашас тэ служысарас лэ Иеговасти, ай кадяжэ тэ поможысарас аврэнди тэ прилэн правильно ришэния.

3. Пала со амэ подаса дума андэ кадэя статья?

³ Андэ кадэя статья амэ подаса дума пала дуй вопросоря: 1) Сави жызня авэла кодэлэндэ, ко заля лэ Иеговастири риг? и 2) Со аштярэл кодэлэн, ко подритярэл лэ лолэ зверёс анда книӷа Откровение?

САВИ ЖЫЗНЯ АВЭЛА КАЙ И ВЕРНИ ЛЭ ИЕГОВАСТИРЭ СЛУЖЫТЕЛЯ

4. Кас о апостоло Иоанно додиқля по нэбо вмести лэ Иисусоса?

⁴ Андэ пэстири видения о апостоло Иоанно додиқля дуй ӷрупы манушэн, савэ подритярэн лэ Иеговастири правления и лэна тэ жувэн вечно. Андэ пэрво ӷруппа 144 000 мануша (Отк. 7:4; 14:3, 4). Вонэ лэна тэ правин вмести лэ Иисусоса по нэбо. О Иоанно додиқля андэ видения, кай вонэ тердён лэ Иисусоса по плай Сионо (Отк. 14:1). Кадэва Царство лэла тэ правий ла ԥувьяса (Отк. 5:9, 10).

5. Со ӥто авэла лэ памазаниконэнца, савэ инке ашэлэпэ пэ ԥув?

⁵ Важ и бут викоря о Иегова ужэ витидя тысячи христианонэн, кай вонэ тэ авэн памазаникоря (Луки 12:32; Рим. 8:17). Но о апостоло Иоанно ԥэндя, кай кати набут андар лэндэ ашэнапэ пэ ԥув андэ послидни деса (Отк. 12:17). Англа кода, сар тэ залэлпэ и само бари бида, лэнди по чикат стона и «печать лэ жундэ Дэвлэстар», сави сыкавэл лэ Иеговастири одобрения (Отк. 7:2, 3). Тоди андэ само бари бида лэн залэна по нэбо. Вонэ лэна тэ правин вмести лэ Иисусоса и аврэ памазаниконэнца, савэ мулинэ май данглал и ашэлэпэ верни лэ Иеговасти (Матф. 24:31; Отк. 5:9, 10).

6, 7. а) Сави инке ӷрупа додиқля о Иоанно и со амэ ӷанас пала латэ? б) Васо и 7 ӷлава Откровение фартэ интересно важ лэдуй кадэла ӷрупы?

⁶ Посли када о Иоанно додиқля «фартэ бутэ манушэн». Андэ Библия на ԥэнэнпэ, скати мануша авэна андэ кадэя ӷрупа (Отк. 7:9, 10). Со амэ ӷанас пала лэндэ? Акэ, со пистросардя о апостоло Иоанно: «Када кодэла, ко вижан анда само бари бида. Вонэ вихаладэ пэстири ӥда и стердэ ла парни андэ лэ Бакрорэско рат» (Отк. 7:14). Кала кадэла мануша пэрэжувэна и само бари бида, вонэ лэна тэ радуинпэ ла жызняти андо раё пэ ԥув (Пс. 37:9—11, 27—29; Прит. 2:21, 22; Отк. 7:16, 17).

⁷ Андэ 7 ӷлава Откровение росԥэнэнпэ и пала кодэла, ко лэна тэ жувэн по нэбо, и пала кодэла, ко лэна тэ жувэн пэ ԥув. Диқэн тумэ пэс котэ? Стон зор, кай тэ додиқэн! Кати погиндон, сави дэ райкани жызня авэла кай лэдуй кадэла ӷрупы. Амэ аваса фартэ бахталэ, кай залям лэ Иеговастири риг! Ай со инке андэ книӷа Откровение ԥэнэнпэ пала само бари бида? (Матф. 24:21).

СО АШТЯРЭЛ ЛЭ ДЭВЛЭСТИРЭ ВОРОӶОНЭН

8. Сар залэлапэ и само бари бида и сар лэна пэс тэ андярэн почти всаворэ мануша?

⁸ Сар амэ дям дума андэ кодэя статья, ӥто и правительства дэна по Вавилоно Велико, пэ всаворэ хохавнэ веры, савэ исин пэ ԥув (Отк. 17:16, 17). Кадя залэлапэ и само бари бида. Но закамэна посли када бут мануша тэ служын лэ Иеговасти? Най. Сар дицол андэ 6 ӷлава Откровение, вонэ лэна тэ родэн помощь андэ политика и андэ камерцыя, савэ важ лэндэ здэнапэ, сар плая. Важ о Иегова кадэла мануша авэна вороӷоря, важ кода кай на залинэ лэстири риг (Луки 11:23; Отк. 6:15—17).

9. Соса лэ Иеговастирэ служытеля на лэна тэ шонпэ пэ всаворэ мануша и каринг со када анэна?

⁹ Кала авэла и само бари бида, лэ Иеговастирэ верни служытеля на лэна тэ шонпэ пэ всаворэ авэр мануша. Кати вонэ авэна предано тэ служын лэ Иеговасти и отԥэндёна тэ подритярэн «лэ зверёс» (Отк. 13:14—17). Када фартэ холярэла лэ Иеговастирэ вороӷонэн. Тоди и объединёни правительстворя жана против лэ Дэвлэско народо па вся и ԥув. Пала када андэ Библия ԥэнэнпэ, кай дэла о Гого анда Магого (Иез. 38:14—16).

10. Со стерэла о Иегова, кай тэ защитий пэско народо? (Откровение 19:19—21).

¹⁰ Сар андярэла пэс о Иегова? Во ԥэнэн: «Мэ фартэ росхолявава» (Иез. 38:18, 21—23). Андэ 19 ӷлава Откровение росԥэнэнпэ, со авэла дальшэ. О Иегова бишалэла пэстирэ Шавэс, кай во тэ защитий лэско народо и тэ улэл лэ вороӷонэн. Вмести лэ Иисусоса пала амэндэ зашонапэ кадяжэ и «небесни войскоря» — и верни анӷелоря и 144 000 памазаникоря (Отк. 17:14; 19:11—15). Соса закончица кадэя война? Всаворэ мануша и арӷанизацыи, савэ жан против о Иегова, авэна уничтожэни! (Проадинон Откровение 19:19—21.)

ЯБЬЯВ ПОСЛИ ВОЙНА

11. Сави фартэ важно события авэла по нэбо, сар ԥэнэнпэ андэ книӷа Откровение?

¹¹ Кати погиндон, со авэла по ди кай и верни лэ Иеговастирэ служытеля, савэ пэрэжувэна и само бари бида! Вонэ лэна фартэ тэ радуинпэ! Ай со авэла по нэбо? Котэ всаворэ лэна тэ лошавэн, кай о Вавилоно Велико розмардо, но кадяжэ авэла инке авэр особо празнико (Отк. 19:1—3). Када фартэ важно события, пала сави ԥэнэнпэ андэ книӷа Откровение — «лэ Бакрорэско ябьяв» (Отк. 19:6—9).

12. Кала авэла лэ Бакрорэско ябьяв? (Откровение 21:1, 2).

¹² Кала авэла кадэва празнико? Англа кода, сар тэ залэлпэ о Армагеддоно, всаворэ 144 000 памазаникоря стидэнапэ по нэбо. Но када най фартэ бахтали время важ о ябьяв. (Проадинон Откровение 21:1, 2.) Лэ Бакрорэско ябьяв авэла посли Армагеддоно, кала всаворэ лэ Дэвлэстирэ вороӷоря авэна уничтожэни (Пс. 45:3, 4, 13—17).

13. Со сыкавэл лэ Бакрорэско ябьяв?

¹³ Со сыкавэл лэ Бакрорэско ябьяв? Кадяжэ, сар посли ябьяв о тэрно и тэрни ашэн сар ек, кадэва образно ябьяв стидэл вмести лэ царёс лэ Иисусос и лэстиря «тэрня» — 144 000 памазаникоря. Кадэя фартэ важно события сыкавэла, кай о нэво правительство залэл тэ правий ла ԥувьяса пэ 1 000 лет (Отк. 20:6).

ФАРТЭ ШУКАРНО ФОРО И ТУМАРИ ЖЫЗНЯ АНГЛЭ

14, 15. Соса андэ 21 ӷлава Откровение сыстонпэ и 144 000? (Диқэн и картинка пэ обложка.)

¹⁴ Потом андэ 21 ӷлава Откровение и 144 000 сыстонпэ лэ шукарнэ фороса, пэ саво ԥэнэн о Нэво Иерусалимо (Отк. 21:2, 9). Кадэва форо ритярдёл пэ 12 бара, «пэ савэ сас пистромэ 12 алава лэ Бакрорэстирэ апостолонэндирэ» (Отк. 21:10—14; Эф. 2:20). Васо лэ Иоанности сас фартэ интересно тэ роздиқэл кадэла бара? Важ кода кай пэ ек андар лэндэ во додиқля пэско алав. Сави дэ бари бах када сас важ лэстэ!

¹⁵ Кадэлэ фороса на сыстояпэ нисаво авэр форо. Во фартэ шукарно и нэобычно. Лэстири ӷлавно вулица стерди анда сомнак. И вороты, савэн 12, сас анда жэмчуӷо. Ай андэ стины стодэ и кучутнэ бара (Отк. 21:15—21). Кай о Нэво Иерусалимо идеально ровно квадратно форма. Но о апостоло Иоанно шол сама, кай андо форо варисо на хутилэл. Во ԥэнэн: «Мэ на диқлэм о храмо андо форо. Лэско храмо — о Всемоӷущё Дэл Иегова и о Бакроро. Лэ форости на трэбуй сас лэ қамэско свето и луна, важ кода кай пэр лэстэ светияс лэ Дэвлэстири слава и лэско светильнико сас о Бакроро» (Отк. 21:22, 23). Кати прецтавьте, кодэла, ко ужан андо Нэво Иерусалимо, авэна паша Иегова! (Евр. 7:27; Отк. 22:3, 4). Вижал, о Иегова и о Иисусо — када о храмо андо форо.

16. Со аштярэл лэ манушэн, кала лэ Дэвлэско Царство лэла тэ правий 1 000 лет?

¹⁶ Кала и памазаникоря розмышляют пала Нэво Иерусалимо, лэндэ аж о фано пэрэхутилэл! Но кадэва пророчество кадяжэ лэл лэ одестар кодэлэн, ко надеийпэ тэ жувэн пэ ԥув. Амэ пэстирэ яқэнца диқаса, сар важ кадэла 1 000 лет пэ ԥув вся парудёла. И када анэна амэнди бари бах. Амэндэ авэна фартэ бут блаӷословении, пэ савэ ԥэнэн «и лэн ла жызнятирэ паеса». Ай «па лэдуй ла лэнатирэ рига барён ла жызнятирэ витки». И листоря пэ кадэла витки «исцэлин и народоря» (Отк. 22:1, 2). Всаворэ мануша, савэ лэна тэ жувэн пэ ԥув, диқэна саво дэ щедро амаро Дэл Иегова. Полокорэс кажно андар мэндэ ашэла совершэно. Амэ бистраса, со када насвалимос, дук и ясва (Отк. 21:3—5).

17. Ко лэла тэ жувэл андо раё пэ ԥув, кала авэла Тысячелетнё Царство? (Откровение 20:11—13).

¹⁷ Ко лэла тэ жувэл пэ ԥув андо Тысячелетнё лэ Дэвлэско Царство? Када фартэ бут мануша, савэ пэрэжувэна о Армагеддоно, ай кадяжэ лэндирэ бэяцэ, савэ арақадёна андо раё. Но андэ 20 ӷлава Откровение кадяжэ ԥэнэнпэ пала воскресения. (Проадинон Откровение 20:11—13.) Ко рияпэ каринг и жызня? И «праведни» мануша, савэ верно служынас лэ Иеговасти, ай кадяжэ и «нэправедни», савэндэ на сас возможность тэ уӷанэн пала Иегова (Деян. 24:15; Иоан. 5:28, 29). Сыкавэл када, кай всаворэ мануша, савэ мулинэ, ринапэ каринг и жызня? Най. О Иегова на рия кодэлэн, ко отԥэнделя тэ служый лэсти. Вонэ сыкадэ, кай нэдостойни тэ жувэн андо раё пэ ԥув (Матф. 25:46; 2 Фес. 1:9; Отк. 17:8; 20:15).

ПОСЛИДНЁ ПРОВЕРКА

18. Со авэла, кала закончица и 1 000 лет?

¹⁸ Кала закончица и 1 000 лет, всаворэ мануша пэ ԥув ашэна совершэни. О Иегова улэла о бэзэх, саво амэнди пэрэдяпэ лэ Адамостар, и во будэр на лэла пар мэндэ тэ влияет (Рим. 5:12). Каринг кодэя время, кай и всаворэ мануша авэла совершэно жызня, важ када андэ Библия ԥэнэнпэ, кай вонэ жундёна (Отк. 20:5).

19. Васо о Иегова домэкэла, кай тэ авэл послиднё проверка?

¹⁹ О Иисусо ашэляпэ верно лэ Иеговасти, дажэ кала о Сатана фартэ тасавэлас пэр лэстэ. Кала прожана 1 000 лет и лэ Сатанас вимэкэна анда безна, во упалэ закамэла тэ змарэл амэн па правильно дром. Ашэнапэ тоди всаворэ совершэни мануша предани лэ Дэвлэсти? (Отк. 20:7). Када авэла послиднё проверка. Кажно андар мэндэ сможэт тэ сыкавэл пэстири преданость лэ Иеговасти. И мануша, савэ авэна верни лэсти, лэна тэ жувэн вечно и ашэна па чачимастэ свободни (Рим. 8:21). Ай кодэла, ко отԥэндёна лэ Иеговастар, авэна уничтожэни вмести лэ Сатанаса и лэ бэнгэнца (Отк. 20:8—10).

20. Со амэндэ по ди, кай амэ роздиқлям и пророчества анда книӷа Откровение?

²⁰ Сар амэ ужэ дям дума, и книӷа Откровение шолпэ по альбомо лэ карточкэнца. Чалеля тумэнди, кай котэ тумэ додиқлэ пэс? Наверно, тумэ инке май фартэ закамлэ тэ росԥэнэн аврэ манушэнди пала Иегова, кай и вонэ тэ залэн лэстири риг (Отк. 22:17). Амэн фартэ линэ лэ одестар и пророчества анда Откровение. Важ када амэ, сар о апостоло Иоанно, камас тэ ԥэнас: «Аминь! Ав, Ӷосподо Иисусо!» (Отк. 22:20).