Дотерэн кода, со залинэ тэ терэн

1. Со дя амэнди о Иегова?

О ИЕГОВА дя амэнди тэ витидас, сар тэ жувас. Во сытярэл амэн правильно тэ витидас, со тэ терас и тэ приритярдювас кодэлэсти, со витидям, кай тэ радосарас лэс (Псалом 119:173). Важ када, кала амэ прилас и лашэ советоря анда лэ Дэвлэско Алав, анда Библия, кадэлэса амэ сытювас правильно тэ витидас, со тэ терас (Евреям 5:14).

2. Саво ԥаримос амэндэ можэт тэ авэл, кала амэ залям варисо тэ терас?

² Но дажэ, кала амэ правильно витидас, амэндэ можэт тэ авэл кадя, кай нащи дотерас и дила, сави залям. Акэ дэсавэ примероря. Тэрно ԥрал закамля тэ проадиной вся и Библия. Лэстэ вижал тэ адиной ла дэсавэ курте, но потом парашэл. Ԥэй витидя важ пэстэ тэ служый пианероса, но вся и время отстол, кала тэ залэл тэ служый. Всаворэ ԥрала анда совето старейшын ришыли, кай май часто тэ жан кай и ԥрала и ԥэя, кай тэ подритярэн лэн. Но прожылэ бут шона, ай вонэ нисо на стердэ. Кадэла примероря разни, но андэр лэндэ и ԥрала и ԥэя ришыли тэ терэн варисави дила, но на дотердэ до конца. Андэ пэрво вико кацаво сас лэ христианонэнца анда Коринфо. Подам дума, сости амэн када сытярэл.

3. Со витидэ тэ терэн и коринфяноря и со тердяпэ посли кода?

³ Варикай андо 55 бэрш лэ И. Х. и христианоря андо Коринфо закамлэ тэ терэн важно дила. Вонэ уӷанглэ, кай лэ ԥралэнди андо Иерусалимо и андэ Иуда фартэ ԥарэс и трэбуй ловэ, и авэр собрании стидэн ловэ, кай тэ подритярэн лэн. Лэндэ сас ковло ди и вонэ на сас жадни. Важ када вонэ кадяжэ закамлэ тэ стидэн и ловэ и пушлэ кай о Павло, сар вонэ када тэ стерэн. О Павло росԥэндя андэ собрания, сар када тэ терэн и приԥэндя лэ Титости тэ поможый андэ када (1 Коринфянам 16:1; 2 Коринфянам 8:6). Но кала прожылэ варисавэ шона, о Павло уӷангля, кай и коринфяноря кадя и на стидэ ловэ, савэ ԥэндэ тэ стидэн. Важ када лэндэ на вижыля тэ стидэн кода, со камлэ тэ дэн каринг кодэя время, кала андо Иерусалимо пэрэдэнас и ловэ анда авэр собрании (2 Коринфянам 9:4, 5).

4. Со, сар пистромэ андэ 2 Коринфянам 8:7, 10, 11, о Павло ԥэндя тэ терэл лэ коринфянонэнди?

⁴ И коринфяноря витидэ тэ терэн лащи дила. И о Павло похвалисардя лэн, кай лэндэ састи вера и кай вонэ фартэ камэн тэ поможын аврэнди. И кадяжэ ԥэндя лэнди тэ дотерэн и дила, сави линэ тэ терэн. (Адиносар 2 Коринфянам 8:7b, 10, 11c.) Кода, со сас лэ коринфянонэнца сытярэл амэн кодэлэсти, кай дажэ лэ чачунэ христианонэнди можэт тэ авэл найвушэро тэ приритярдён каринг кода, со витидэ тэ терэн.

5. Пала савэ вопросоря амэ подаса дума?

⁵ Сар и коринфянонэнди, амэнди можэт тэ авэл найвушэро тэ стерас кода, со загиндосардям. Васо? Важ кода кай амэ найсовершэни амэ можэм вся и время, вся тэ отстас, со камас тэ терас. Ай инке кода, со амэ закамлям тэ терас, амэндэ можэт тэ на вижал через кода, кай варисо можэт тэ терэлпэ (Экклезиаст 9:11; Римлянам 7:18). Подам дума, со трэбуй тэ терас англа кода, сар варисо тэ витидас и англа кода, сар тэ стерас па аврятэ кода, со ужэ витидям. Кадяжэ амэ подаса дума пала советоря, савэ поможына тэ дотерас кода, со залям тэ терас до конца.

АНГЛА КОДА, САР ВАРИСО ТЭ ТЕРАС

6. Кала и ришэнии трэбуй тэ парувас?

⁶ Дэсавэ важни ришэнии амэ никала на ласа тэ парувас. Например, амэ никала на ласа палпалэ о алав, саво дям тэ служысарас лэ Иеговасти и никала на ашаваса амарэ хулас чи ла хулая (Матфея 16:24; 19:6). Но дэсавэ ришэнии трэбуй тэ парувас. Васо? Важ кода кай варисо парудёл андэ жызня. Савэ советоря поможына амэнди май драго тэ витидас, со тэ терас?

7. Пала со трэбуй тэ мангаспэ и васо?

⁷ Мангэнпэ, кай тэ дэл мудрость. О Иаково пистрояс лэ Иеговастар: «Кала варикасти андар тумэндэ на хутилэл и мудрость, мэк мангэл кай о Дэл, и во тумэнди дэла» (Иакова 1:5). Андэ варисостэ амэнди всаворэнди «на хутилэл и мудрость». Важ када амэнди трэбуй тэ мангаспэ лэ Иеговасти, кала амэ прилас варисави ришэния и, кала трэбуй ла тэ парувас. Тоди о Иегова поможыя амэнди правильно тэ витидас.

8. Со поможыя амэнди тэ погиндосарас всаворэ ригэндар?

⁸ Погиндон всаворэ ригэндар. Виарақэн совето анда Библия, проадинон, со пистромэ андэ литература, сави вимэкэл лэ Иеговастири арӷанизацыя, и подэн дума кодэлэса, касти тумэ фартэ патян (Притчи 20:18). Када фартэ важно, кала тумэнди прижалпэ тэ парувэн и бути чи, кала пэрэладэн, чи витидэн, кай тэ сытён, кай када тэ поможый тэ затерэн и ловэ тэ служын лэ Иеговасти.

9. Васо амэнди трэбуй тэ на хохавас корко пэс?

⁹ Полэн, васо тумэ кадя камэн тэ терэн. Важ о Иегова важно, васо амэ камас варисо тэ терас (Притчи 16:2). Во камэл, кай амэ ни андэр со тэ на хохавас. Важ када, кала амэ камас варисо тэ терас, амэ трэбуй тэ на хохавас пэс и аврэн андэ кода, васо амэ када камас тэ терас. Если када най кадя, тоди тути авэла ԥарэс тэ приритярдёс кодэлэсти, со ту камэс тэ терэс. Подам дума пала ек ԥрал. О тэрно ԥрал витидя тэ ашэл пианеро. Но прожыля время и лэсти ашэл найвушэро тэ росԥэнэн кодэя время, пэ скати во дя лэ Дэвлэсти алав и служэния ужэ най фартэ анэн лэсти радость. Можэт во и гиндояс, кай во ашэля пианероса через кода, кай во камэлас тэ радуий лэ Иеговас. Но, файма, ӷлавно через со во ашэля пианеро, када, кай тэ радуий лэ родителёнэн или инке варикас, ко лэсти куч?

10. Со трэбуй, кай тэ парудёс?

¹⁰ Погиндосар, о мануш заля тэ сытёл па Библия и ришыл тэ мэкэл тэ цырдэл. Май англал во дуй курте борийпэ кодэлэса, кай тэ на лэл цыӷарка, но потом на виритярэл и зацырдэл. Но потом всаек лэстэ вижал тэ мэкэл кадэя найлащи привычка! Андэ када лэсти поможый и любовь каринг о Иегова и кай камэл лэс тэ радуий (Колоссянам 1:10; 3:23).

11. Васо трэбуй тэ полэн, со тумэ точно камэн?

¹¹ Полэн, со тумэ точно камэн тэ терэн. Если тумэ точно ӷанэн, со камэн тэ терэн, тоди тумэнди авэла май вушэро када тэ стерэн. Ԥэнаса, тумэ закамлэ май часто тэ адинон и Библия. Если тумэндэ нинай ӷрафико, кай тэ адинон, тоди тумэндэ на вижала када тэ стерэнd. Или, ԥэнаса, и старейшыноря ришыли май часто тэ зажан кай и вазвещятеля анда собрания, кай тэ подритярэн лэн. Но время жал и вся ашэлпэ кадяжэ. Кай тэ домардён кода, со вонэ камэн тэ стерэн, вонэ трэбуй тэ пушэн пэстар: «Витидям амэ, касти анда ԥрала и анда ԥэя фартэ трэбуй, кай лэн тэ подритярас? Витидям амэ точно время, кала лэндэ тэ жас?»

12. Со, можэт, амэнди прижалапэ тэ стерас и васо?

¹² На аштярэн пэстар, кай стерэна вся, со камэн. Никастэ нинай скати время и зор, кай тэ терэл вся, со камэл. Важ када авэн годявэрнэ и на аштярэн пэстар фартэ бут. Если када трэбуй, пэрэдиқэн кода, со тумэ витидэ, если нинай зор када тэ стерэн (Экклезиаст 3:6). Ԥэнаса, тумэ витидэ варисо тэ терэн, но трэбуй набут тэ парувэн и акана гиндон, кай тумэндэ вижала тэ дотерэн кадэя дила до конца. Роздиқам панч маменторя, савэ тумэнди поможына андэ када.

СО ПОМОЖЫЯ ТЭ ДОТЕРАС КОДА, СО ЗАЛЯМ ТЭ ТЕРАС?

13. Со дэла тумэнди зор тэ терэн кода, со тумэ ужэ витидэ?

¹³ Мангэнпэ, кай тумэндэ тэ авэл зор тэ терэн варисо. О Дэл дэла «тумэнди зор тэ терэн дила» и тэ дотерэн кода, со тумэ камэн (Филиппийцам 2:13). Важ кода, кай тумэндэ тэ авэл зор, саво трэбуй, мангэн кай о Иегова свынто духо. На парашэн тэ мангэнпэ дажэ, кала тумэнди здэлпэ, кай тэ аштярэн о атвето прижалпэ фартэ долӷо. О Иисусо ԥэндя: «На парашэн тэ мангэн [свынто духо] и тумэнди дэна» (Луки 11:9, 13).

14. Сар кода, со пистромэ андэ Притчи 21:5, поможыя тумэнди тэ стерэн кода, со тумэ камлэ?

¹⁴ Трэбуй тэ полэн, со тэ терэн. (Адиносар Притчи 21:5e.) Кай тэ терэс варисави дила, май англал трэбуй тэ полэс, со трэбуй тэ терэс, ай тоди ужэ тэ залэс варисо тэ терэс. Кадяжэ и ришэния, сави витидэс, трэбуй тэ ӷанэс, со ласа тэ терэс и када поможыя тэ дотерэс, со камэс. Если тумэнди трэбуй тэ стерэн ԥари дила, терэн ла по набут. И сар ту лэса по набут тэ терэс, тоди на диқэса, кала ту ла стерэса. Кадя авэла май вушэро тэ диқэс, сар тутэ када вижал. О Павло ԥэндя лэ коринфянонэнди фэдэр тэ отстон ловэ кажно, скати камэн андэ «пэрво дес андо курко», чем тэ аштярэн, кала во авэла, и тоди кати тэ стидэн всаворэ ловэ (1 Коринфянам 16:2). Кадяжэ, кала розделис бари дила по май цынёне дилы, тумэнди авэла май вушэро тэ стерэн кода, со тумэ камлэ.

15. Со можно тэ стерэс посли кода, сар полян, со трэбуй тэ терэс?

¹⁵ Кала тумэ ӷанэн, со камэн тэ терэн, тумэнди авэла май вушэро тэ стерэн кадя, сар трэбуй (1 Коринфянам 14:40). Кадя, лэ старейшынонэнди ԥэндэ, кай варико ек андэр лэндэ тэ запистрой най кати, со прилинэ тэ терэн, но и кода, касти динэ тэ стерэл кадэя дила и кала. И ԥрала, савэ кадя терэн, лэндэ, файма, драго вижала тэ дотерэн пэстири дила (1 Коринфянам 9:26). Васо тэ на терас и амэ кадя? Например, кажно дес тэ пистрос скати трэбуй тэ стерэс и дила. И тэ ростос па порядко, савэ андар лэндэ май важно. Када поможыя тумэнди най кати тэ дотерэн и дила, сави залинэ тэ терэн, но и пэ када жала май набут время.

16. Со трэбуй тэ терас, кай тэ домардювас кода, со камас и сар пала када пистромэ андэ Римлянам 12:11?

¹⁶ Стон бут зор. Кай тэ авэл вся кадя, сар ту загиндосардян и тэ домардёс кода, со камэс, трэбуй тэ стос бут зор. (Адиносар Римлянам 12:11f.) О Павло камэлас, кай о Тимофеё тэ ашэл май лашо учителё. Важ када во анда оди подԥэнэнас лэсти тэ на парашэл тэ терэл кода, со во терэлас. Лэ Павлоско совето кадяжэ поджал и каринг авэр дила (1 Тимофею 4:13, 16).

17. Сар кода, со запистромэ андэ Эфесянам 5:15, 16, поможыя тумэнди тэ дотерэн и дила, сави загиндосардэ?

¹⁷ Годявэрнэс проандярэн и время. (Адиносар Эфесянам 5:15, 16g.) Погиндон, андэ сави время тумэ камэн тэ дотерэн и дила, сави загиндосардэ, и на отстон кадэя время. На аштярэн, кай авэла май лащи время, кацаво можэт и тэ на авэл (Экклезиаст 11:4). На домэкэн, кай и най фартэ важни дилы, тэ одлэн тумэндар о зор и время, сави трэбуй важ и май важни дилы (Филиппийцам 1:10). Если можно, витидэн кацави время, кала тумэнди нико на мишыия. Мангэн кодэлэн, ко паша тумэндэ, кай тэ на мишыин тумэнди андэ кадэя время. Диқэн, если вижала, мударэн о телефоно, на продиқэн, ко тумэнди пистросардя и на зажан андэ соцыальни сетиh.

18, 19. Со поможыя амэнди тэ на умэкас и вас, кала амэндэ на вижал тэ дотерас и дила?

¹⁸ Гиндон пала лашимос, саво авэла, кала дотерэна и дила. Кала дотердэ и дила, када шолпэ пэ кода, сар тумэ долаглэ каринг сас тумэнди трэбуй. Если тумэ па чачимастэ камэн тэ доладэн интя каринг трэбуй, тоди тумэ на парашэна тэ ладэн, дажэ если о дром пэрэԥандадо, и тумэнди прижалапэ тэ ладэн па авэр дром. Кадяжэ, кала варисо витидям тэ терас, если амэ гиндосарас, саво лашимос кадэлэстар авэла, тоди амэнди авэла май вушэро тэ стерас варисо па аврятэ и тэ обжас ԥаримос, саво авэл (Галатам 6:9).

¹⁹ Правильно тэ витидэс найвушэро. Найвушэро и тэ ритярдёс пала кода, со витидян тэ терэс. Но о Иегова можэт тэ дэл амэнди мудрость и о зор, скати трэбуй, кай тэ дотерас и дила, сави залям тэ терас.