Пэ скати дэ драго тумэ ӷанэн лэ Иеговас?

1, 2. Со амэ закамас тэ терас, кала погиндосараса, со сас кадэлэ ԥралэса?

МОЖЭТ и дружба лэ Дэвлэса тэ пэрэдэлпэ амэнди лэ дадэстар и ла датар? Най. Дажэ, кала амэ барелям андо ери кай лэ Иеговастирэ свидетеля, амэндэ трэбуй екжэнэндэ тэ авэл лащи дружба лэ Иеговаса.

² Акэ, со сас еқэ ԥралэса, саво вибареля андо ери, саво сас лэ Иеговастирэ свидетеля. Кала во сас совсем тэрноро, лэстэ на сас лащи дружба лэ Дэвлэса. Во росԥэнэн: «Мэ служысаравас лэ Иеговасти, важ кода кай о ери служыяс». Но андо ек маменто, во закамля май бут время тэ адиной и Библия и тэ гиндой пала кода, со адиной, ай кадяжэ ля май часто тэ мангэлпэ. Со када дя? Во росԥэнэн: «Мэ полэм, ек через со моӷу тэ ашав май пашэ каринг мэрно Дад каринг о Иегова, када екжэно май драго тэ уӷанав лэс». Кадэва примеро дэл тэ погиндосарас пала важно вопросо, андэр со разница машкар кода, кай тэ уӷанэс пала Иегова и тэ ӷанэс лэ Иеговас? И сар тэ авэс май пашэ каринг лэстэ?

3. Андэр со разница машкар кода, кай тэ ӷанэс пала Иегова и тэ ӷанэс лэ Иеговас?

³ Кала амэ ԥэнас, кай о мануш ӷанэн пала Иегова, амэ полас, кай во драго ӷанэн лэ Дэвлэско алав, лэстирэ законоря и лэстирэ дилы. Но кай май пашэ тэ ӷанэс лэ Иеговас, када на хутилэла. Трэбуй тэ витидэс время, кай май драго тэ уӷанэс лэ Иеговас и лэстирэ лашэ качестворя. Кати тоди амэндэ вижала тэ полас, васо во кадя терэлас, кала варисо ԥэнэнас или варисо терэлас. Када поможыя амэнди тэ полас, чалёл лэсти, сар амэ гиндосарас, со амэ витидас тэ терас, и кода, со ужэ стердям чи най. Ай кала полас, со амэндар о Иегова аштярэл, кадя трэбуй и тэ терас.

4. Сости амэн сытярэл кода, со сас лэ найсовершэнонэ манушэнца, пала савэ пистромэ андэ Библия?

⁴ Дэсавэ мануша моӷут тэ асанпэ амэндар, важ кода кай амэ камас тэ служысарас лэ Иеговасти. Вонэ моӷут тэ авэн против амэндэ инке май фартэ, кала амэ залас тэ ԥирас пэ собрании. Если амэ патяс лэ Иеговасти, во никала амэн на ашавэла. Када само ӷлавно, кай тэ авэл лащи дружба лэ Иеговаса, кадэя дружба пэ вся и жызня. Ай вижала кай и найсовершэни мануша тэ авэн пашутнэ друӷоря лэ Дэвлэса чи най? Вижала! И када бут со сыкавэл. Роздиқам, со сас лэ Моисеёса и лэ Давидоса и погиндосарам пала дуй вопросоря. Сар вонэ уӷанглэ лэ Иеговас? Сости када амэн сытярэл?

О МОИСЕЁ «ДИҚЭЛАС КОДЭЛЭС, КО НА ДИЦОЛ»

5. Со витидя о Моисеё?

⁵ О Моисеё витидя тэ служый лэ Дэвлэсти. Кала лэсти сас варикай 40 бэрш «во отԥэнделяпэ тэ авэл шаво лэ фараоностиря щяко» и заля лэ израильтянонэндири риг (Евреям 11:24). О Моисеё ашадя вся, со лэстэ сас, кай тэ служый лэ Иеговасти. Кала о Моисеё подритярэлас лэ израильтянонэн, савэ сас андо Египто раборя, во ӷанэнас, кай о фараоно пэр лэстэ фартэ холявэла. О фараоно сас фартэ зорало правителё, и лэс полэнас, сар дэвлэс. Сави састи вера сас кай о Моисеё! Во патялас лэ Иеговасти. Кода, кай во фартэ лэсти патялас, када ашэля со май ӷлавно андэ лэндири дружба, сави сас лэндэ вся и жызня (Притчи 3:5).

6. Сости амэн сытярэл кода, со сас Моисеёса?

⁶ Сости амэ можэм тэ сытювас анда када? Амэнди, сар и лэ Моисеёсти, трэбуй тэ витидас, ласа амэ тэ служысарас лэ Иеговасти и аваса амэ лэстирэ народоса чи най? Важ када амэнди, файма, прижалапэ бут пэр со тэ жас, и амэ, файма, ваздаса против амэндэ всаворэн кодэлэн, ко на ӷанэн лэ Иеговас. Но если амэ патяс амарэ небеснонэ Дадэсти, амэ ӷанас, кай во амэн подритярэла.

7, 8. Пала со о Моисеё на парашэлас тэ уӷанэн?

⁷ О Моисеё на парашэлас тэ уӷанэн пала лэ Иеговастирэ качестворя и тэ терэл кода, со чалёл лэ Иеговасти. На бистрам, со тердяпэ, кала о Иегова приԥэндя лэ Моисеёсти тэ виандярэл лэ израильтянонэн анда рабство. О Моисеё полэлас, кай лэстэ на хутилэла зор, и най еқварэс ԥэндя лэ Иеговасти, кай кадэя дила най важ лэстэ. О Иегова па чачимастэ анда оди поля лэс и поможысардя лэсти (Исход 4:10—16). Посли кода, лэ Моисеёстэ вижыля тэ ԥэнэн лэ фараоности и найлащи весть. Потом во диқля, сар о Иегова сыкадя пэско зор, кай тэ спасый лэ израильтянонэн и тэ розмарэл лэ фараонос и лэско войско андэ Лоли моря (Исход 14:26—31; Псалом 136:15).

⁸ Посли кода, сар о Иегова освободисардя лэ израильтянонэн анда рабство анда Египто, вонэ вся и время холявэнас и лэнди нисо на чалёлас. Но дажэ тоди о Моисеё диқэлас, кай о Иегова ӷанэн тэ аштярэл и на холявэл (Псалом 78:40—43). О Моисеё кадяжэ диқля, саво о Иегова найӷордо, кала во мангля тэ на умарэл лэ израильтянонэн, и во када стердя (Исход 32:9—14).

9. Пэ скати дэ пашэ сас кай о Моисеё дружба лэ Иеговаса, сар пистромэ андэ Евреям 11:27?

⁹ Посли кода, сар израильтяноря вижылэ анда Египто, кай о Моисеё лэ Иеговаса ашэля кацави лащи дружба, кай во, ԥэнэса, диқэлас пэстирэ небеснонэ Дадэс. (Адиносар Евреям 11:27b.) Андэ Библия пала када пистромэ: «О Иегова дэлас дума лэ Моисеёса кадя пашэ, сар и мануша дэн дума ек еқэса» (Исход 33:11).

10. Со амэнди трэбуй тэ терас, кай драго тэ ӷанас лэ Иеговас?

¹⁰ Сости амэ можэм тэ сытювас анда када? Кай драго тэ ӷанас лэ Иеговас, амэнди трэбуй най кати тэ уӷанас пала лэстирэ качестворя, ай инке тэ терас кода, со во камэл. Ай во «камэл, кай и разни мануша тэ спасынпэ и драго тэ полэн о чачимос» (1 Тимофею 2:3, 4). Амэ можэм када тэ терас, кала росԥэнас аврэнди важ о Иегова.

11. Сар, кала сытярас аврэн па Библия, можно май драго тэ уӷанас лэ Иеговас?

¹¹ Кала сытярас аврэн па Библия, амэ екжэнэ май драго уӷанас лэ Иеговас. Амэ драго диқас, кай о Иегова полэл, со по ди аврэндэ, кала во бишалэл амэн каринг кодэла, ко камэл тэ ашэл лэско друӷо (Иоанна 6:44; Деяния 13:48). Амэ диқас, саво зор кай лэ Дэвлэско Алав, кай и Библия, кала и мануша, савэ сытён па Библия мэкэн и найлашэ привычки и лэн тэ «ашэн нэвэ манушэса» (Колоссянам 3:9, 10). Кадяжэ амэ диқас, кай о Дэл ӷанэн тэ аштярэл и на холявэл пэ мануша, савэ жувэн пэ тиритория кай амари собрания. Во дэл лэнди бут, через со вонэ моӷут тэ уӷанэн пала лэстэ и тэ спасынпэ (Римлянам 10:13—15).

12. Пала со, сар пистромэ андэ Исход 33:13, мангэлас о Моисеё и васо?

¹² Важ о Моисеё сас фартэ куч и дружба лэ Иеговаса. О Иегова поможысардя лэ Моисеёсти тэ стерэл фартэ бари дила. И дажэ посли када о Моисеё пативаса мангэлас, кай о Иегова тэ домэкэл лэс, кай во май драго лэс тэ уӷанэн. (Адиносар Исход 33:13c.) Кала о Моисеё мангэлас када кай о Дэл, лэсти сас варикай пала 80 бэрш. Но во полэлас, кай лэсти инке бут трэбуй тэ уӷанэн пала пэско любящё Дад.

13. Сар тэ сыкавас, кай амэнди куч и дружба лэ Дэвлэса?

¹³ Сости амэ сытювас анда када? Всаек, дэлмут амэ служысарас лэ Иеговасти чи най, амэнди трэбуй тэ цэнисарас и дружба лэса. Ек, соса амэ можэм тэ сыкавас, кай амэнди куч кадэя дружба, када, кала дас дума лэса андэ молитва.

14. Васо лэ Дэвлэс на уӷанэса драго би ла молитвако?

¹⁴ Кала и мануша най часто проандярэн и время ек еқэса, котэ нинай лащи дружба. Важ када май часто мангэнпэ каринг о Дэл и никала на даран тэ росԥэнэн лэсти, со нэ можэте тэ росԥэнэн аврэнди (Эфесянам 6:18). Акэ, со росԥэнэн и Криста анда Турция: «Кажно разо, кала мэ мангавпэ, о Иегова ашэл манди май пашэ. Кала мэ росԥэнав лэсти пала мэрнэ пэрэжывании и диқав, сар во манди поможый, мэ лав инке май фартэ тэ патяв лэсти и тэ любисарав лэс. Кала мэ диқав, сар о Иегова ашунэл мэрнэ молитвы, мэ полав, кай о Иегова чачуно Дад и Друӷо».

О ИЕГОВА ВИАРАҚЛЯ МАНУШЭС, САВО ЛЭСТИ «ПО ДИ»

15. Ко сас важ о Иегова о Давидо?

¹⁵ О Давидо арақаделяпэ андэ кодэва народо, саво ужэ тэлёлас лэ Иеговасти. Но во най просто терэлас кадя, сар терэнас андэ лэско ери. Лэстэ екжэнэстэ сас дружба лэ Иеговаса, и о Иегова лэс фартэ любияс. О Иегова ԥэндя по Давидо «мануш, саво манди па оди» (Деяния 13:22). Сар кай о Давидо вижыля тэ авэл кацави лащи дружба лэ Иеговаса?

16. Со о Давидо уӷангля пала Иегова, кала диқэлас кода, со во создал?

¹⁶ О Давидо май драго уӷанэнас лэ Иеговас, кала диқэлас пала кода, со во создал. Сар сас тэрно, о Давидо май бут сас пэ мал, кала пасыяс лэ дадэстирэ бакрэн и часто диқэлас по нэбо. Файма, тоди во лэлас тэ гиндой пала кода, со стердя о Иегова. Например, и рят, кала диқэлас по нэбо, во диқэлас най просто пэ кода, кай бут черӷая, ай лэстэ сас андо ди бари патив пэ кодэва, ко када стердя. Када лэлас лэ Давидос лэ одестар и во пистросардя: «О нэбо сыкавэл лэ Дэвлэстири слава пала кода, со стердэ лэстирэ вас, росԥэнэн вся, со исин по нэбо» (Псалом 19:1, 2). Кала о Давидо гиндояс пала кода, сар создано о мануш, во диқэлас лэ Иеговастири шукарни мудрость (Псалом 139:14). Кала во камэлас тэ полэл лэ Дэвлэстирэ дилы, во на заваздэлас о шэро и полэлас, кай на ашэл нисо (Псалом 139:6).

17. Сости амэн можэт тэ сытярэл кода, со создал о Дэл?

¹⁷ Сости амэ можэм тэ сытювас анда када? Шон сама пэ кода, со создал о Дэл. И на гиндон, кай вся, со создал о Дэл, кадя и сас трэбуй тэ авэл! Старыинпэ кажно дес тэ диқэн, со тумэнди росԥэнэн важ о Иегова кода, кала тумэ диқэн пэ растения, жывотни и пэ мануша. Тоди тумэ кажно разо лэна тэ уӷанэн варисо нэво пала амаро любящё Дад, пала Иегова (Римлянам 1:20). И тоди тумэ полэна, кай тумари любовь каринг лэстэ ашэл инке май бари.

18. Со, сар пистромэ андо 18 Псалмо, полэлас о Давидо?

¹⁸ О Давидо полэлас, кай лэсти поможый о Иегова. Кала о Давидо фэрисардя пэсти дадэстирэ бакрорэн лэ медведёстар и лэ левостар, во полэлас, кай лэстэ вижыля тэ одмардёл кадэлэ зверёнэндар кати лэ Иеговастирэ зорэса. И кала во победисардя лэ барэс Голиафос, во драго диқэлас андэ када лэ Иеговаско вас (1 Самуила 17:37). И кала во спасысайля лэ царёстар Саулостар, саво вороӷуияс лэсти, во патялас, кай лэс фэрисардя о Иегова (Псалом 18, кода, со пистромэ англа пэрво стихо). Мануш, саво заваздэл о шэро, ԥэндоп, кай во екжэно када вся стердя. Но кати най о Давидо, во сас мануш, саво на заваздэлас о шэро, и полэлас, кай важ лэстэ вся када стердя о Иегова (Псалом 138:6).

19. Сости амэн сытярэл кода, со сас лэ Давидоса?

¹⁹ Сости амэ сытювас анда када? Амэнди трэбуй най кати тэ мангас лэ Иеговас тэ поможый, ай инке трэбуй тэ старысавас тэ диқас, сар во поможый и кала. Если амэ на заваздас о шэро и полас, кай най вся па амаро зор, амэ драго диқаса, сар о Иегова дэл кода, со амэнди на хутилэл. И кажно разо, кала диқас, сар о Иегова поможый амэнди, амэ поласа, кай амари дружба лэса ашэл май лащи. Када поля о Исако, ԥрал, саво жувэл андэ Фиджи, и саво бут бэрш ужэ служый лэ Иеговасти. Во росԥэнэн: «Кала мэ диқав, со сас мандэ андэ жызня, мэ диқав, сар о Иегова манди поможыяс жы кодэла времятар, сар мэ лэм тэ сытював па Библия, и жы каринг адесутни время. Через када о Иегова важ мандэ исин па чачимастэ».

20. Через со кай о Давидо сас лащи дружба лэ Иеговаса и сости амэн када сытярэл?

²⁰ О Давидо сытёлас тэ терэл кадя, сар о Иегова. О Иегова создал амэн кацавэнца, кай амэ можэм тэ терас, сар во (Бытие 1:26). Со май бут амэ уӷанас пала лэ Иеговастирэ качестворя, со май драго амэ можэм тэ терас, сар во. О Давидо драго уӷангля пэстирэ небеснонэ Дадэс, лэ Иеговас и важ када бут сытёлас лэстар андэ кода, сар тэ обжалпэ аврэнца. Роздиқам ек маменто анда лэстири жызня. Кала о Давидо проандярдя и рят ла Вирсавияса, ай посли кода стердя кадя, кай тэ умарэн латирэ хулас, о Давидо стердя бэзэх против о Иегова. Но лэ Иеговасти во ашэля жалко и во жалуисардя лэс анда оди (2 Самуила 11:1—4, 15). О Дэл тердя кадя, важ кода кай о Давидо сытёлас лэстар и кадяжэ анда оди жалуияс аврэн. И через кода, кай лэ Давидостэ сас лащи дружба лэ Иеговаса, лэс любинас израильтяноря. О Иегова дажэ ԥэнэнас, кай лэстар тэ сытён авэр израильски царёря (1 Царей 15:11; 2 Царей 14:1—3).

21. Со амэнди дэла кода, кай амэ сытювас кай о Иегова, сар пистромэ андэ Эфесянам 4:24 и 5:1?

²¹ Сости амэ сытювас анда када? Амэнди трэбуй тэ сытювас кай о Дэл. Кадэлэстар най просто авэла май лащи амари жызня, ай инке када поможыя амэнди май драго тэ уӷанас лэ Иеговас. Кала амэ сытювас кай о Иегова, кодэлэса амэ сыкавас, кай амэ лэстирэ бэятцэ. (Адиносар Эфесянам 4:24d; 5:1e.)

НА ПАРАШЭН ТЭ УӶАНЭН ЛЭ ИЕГОВАС

22, 23. Со можно тэ аштярас, если амэ уӷанас лэ Иеговас и терас кадя, сар во?

²² Сар амэ диқлям, лэ Иеговас можно май драго тэ уӷанэс, кала диқэс пала вся, со во создал и кала сытёс па Библия. Андэ кадэя фартэ лащи книӷа бут пистромэ пала лэ Дэвлэстирэ служытеля, савэ на парашэнас лэс тэ кандэн, и савэндар амэ можэм тэ сытювас, када о Моисеё и о Давидо. О Иегова вся стердя кадя, кай амэ можэм май драго лэс тэ уӷанас. Ай амэ пэстиря ригатар трэбуй май драго тэ ашунас и май бут тэ шас сама и тэ ԥэрнавас пэско ди.

²³ Амэ вся и время ласа тэ уӷанас пала о Иегова варисо нэво (Экклезиаст 3:11). Но ӷлавно най кода, скати амэ пала лэстэ ӷанас, ай кода, со амэ терас кодэлэса, со амэ ӷанас. Если амэ старысавас тэ терас андэ жызня кода, со уӷанас и старысавас тэ сытювас кай амаро любящё Дад, кай о Иегова, амари дружба лэса авэла инке май лащи (Иакова 4:8). Через и Библия о Иегова дэл алав, кай никала на ашавэл кодэлэн, ко камэл тэ авэл лэса лашэ друӷоря.