Дада и дэя, сытярэн пэстирэ бэятонэн тэ любин лэ Иеговас

1. Со о Иегова камэл лэ дадэндар и лэ дэяндар, кай вонэ тэ стерэн важ пэстирэ бэятцэ?

О ИЕГОВА дя лэ пэрвонэ ерести, кай лэндэ тэ авэн бэятцэ. Андэ Библия пистромэ: «И бэятцэ лэ Иеговастар» (Псалом 127:3). Со када сыкавэл? Ԥэнаса, варисаво пашутно друӷо дя тумэнди тэ фэрин бут ловэ. Со тумэндэ авэла андо ди? Тумэнди авэла куч кода, кай во тумэнди патял. Но тумэ, файма, лэна пэрэжывать пала кода, сар тэ фэрин кодэла ловэ. О Иегова амаро само пашутно друӷо и дэл лэ дадэнди и лэ дэянди «тэ фэрин» варисо, со май куч, чем и ловэ. Во камэл лэндар, кай вонэ тэ терэн вся, кай лэ бэятонэндэ тэ авэл лашимос и вонэ тэ авэн бахталэ.

2. Савэ вопросоря амэ роздиқаса?

² Ко витидэл важ кодэла, ко найдэлмут жэнисайля, кай лэндэ тэ авэн бэятцэ чи най? И если вонэ витидэ, кай тэ авэн лэндэ бэятцэ, тоди кала? Со тэ терэн и дада и дэя, кай лэндирэ бэятонэндэ тэ авэл бахтали жызня? Роздиқам дэсавэ принцыпоря анда Библия, савэ поможына кодэлэнди, ко найдэлмут жэнисайля, годявэрнэс тэ витидэн.

СТОН ПАТИВ ПЭ КОДА, СО ВИТИДЭ О ХУЛАЙ И ХУЛАИ

3. а) Ко витидэл важ кодэла, ко найдэлмут жэнисайля, кай лэндэ тэ авэн бэятцэ чи най? б) Пала савэ библейски принцыпоря трэбуй тэ сэрэн и друӷоря и о родо?

³ Андэ дэсавэ культуры трэбуй, кай кодэлэндэ, ко кати жэнисайлэ, со май йто тэ авэн бэятцэ. Родо и авэр мануша моӷут тэ тасавэн пэр лэндэ, кай вонэ тэ терэн кадя, сар терэлпэ андэ лэндири культура. О Джетро, ԥрал анда Азия, росԥэнэн: «Андэ собрания дэсавэ христианоря, кастэ исин бэятцэ, тасавэн пэ кодэла, ко найдэлмут жэнисайля, кай лэндэ май йто тэ авэн бэятцэ». О Джеффри, авэр ԥрал анда Азия, росԥэнэн: «Исин ԥрала и ԥэя, савэ ԥэнэн кодэлэнди, кай, кала вонэ ԥурёна, пала лэндэ най ко авэла тэ диқэл». Но кажнонэ хуласти и хулаяти, корконэнди трэбуй тэ витидэн, тэ авэн лэндэ бэятцэ чи най. Када лэндири дила, и вонэ ӷанэн, сар май фэдэр (Галатам 6:5). Понятно, кай о родо и друӷоря камэн важ лэндэ ек о лашимос. Но вонэ трэбуй тэ на бистрэн, кай када ек лэндири дила (1 Фессалоникийцам 4:11).

4, 5. Пала савэ дуй вопросоря трэбуй тэ подэн дума кодэла, ко найдэлмут жэнисайлэ, и кала фэдэр када тэ стерэн? Росԥэнэн.

⁴ Хулай и хулаи, савэ закамлэ бэятонэн, трэбуй тэ подэн дума ек еқэса пала дуй важни вопросоря. Кала вонэ камэн бэятонэн и скати? Кала пала када фэдэр тэ погиндос? И васо када важно?

⁵ Драго авэла пала када тэ погиндон жы каринг о ябьяв. Васо? Фартэ важно, кай вонэ лэдуй кадя тэ гиндон. Кадяжэ кодэла, ко найдэлмут жэнисайлэ, трэбуй тэ полэн, ӷотови вонэ каринг кода, кай лэндэ тэ авэн бэятцэ чи най. Дэсавэ, ко найдэлмут жэнисайля, закамлэ тэ подаштярэн бэрш чи дуй посли ябьяв, кай лэндэ тэ авэн бэятцэ. Васо? Важ кода кай лэ бэятонэнди трэбуй бут время и зор, ай вонэ пока камэн тэ присытён ек аврэстэ (Эфесянам 5:33).

6. Со витидэ дэсаво хулай и хулаи, важ кода кай полэн, андэ сави время амэ жувас?

⁶ Авэр христианоря, савэ найдэлмут жэнисайлэ, закамлэ тэ сытён кай лэ Ноёстирэ шавэ и кай лэндирэ хулая́. Лэстирэ трин шавэ витидэ, кай лэндэ пока тэ на авэн бэятцэ (Бытие 6:18; 9:18, 19; 10:1; 2 Петра 2:5). О Иисусо сыстосардя амари время кодэла времяса, кала жувэлас о Ноё, и амэ кадяжэ патяс, кай жувас андэ «фартэ ԥари время» (Матфея 24:37; 2 Тимофею 3:1). Кала дэсаво хулай и хулаи погиндосардэ пала када, вонэ витидэ, кай лэндэ пока тэ на авэн бэятцэ, кай май бут тэ терэн дила андэ служэния.

7. Сар лэ хуласти и ла хулаяти поможына и принцыпоря анда Луки 14:28, 29 и Притчи 21:5?

⁷ Авелоп годявэрнэс тэ погиндон пала кода, камэн бэятонэн чи най, ай если камэн, тоди скати. (Адиносар Луки 14:28, 29b.) Дада и дэя, савэ ужэ вибарярдэ пэстирэ бэятонэн, росԥэнэна, кай тэ вибарярэс лэ бэятос трэбуй най кати ловэ, но и фартэ бут время и зор. Через када лэ хуласти и ла хулаяти важно тэ подэн дума пала кацавэ вопросоря: «Прижалапэ чи най амэнди лэ дуенди тэ терас пэ бути, кай тэ авэл важ о ери вся, со трэбуй? Гиндосарас амэ еқэндар пала кода, со фартэ трэбуй? Если амэ лэдуя тераса пэ бути, ко диқэла пала бэятцэ? Ко лэн лэла тэ сытярэл?» О хулай и хулаи, савэ спокойно дэн дума пала кадэла вопросоря, терэн кадя, сар пистромэ андэ Притчи 21:5c (адиносар).

8. а) Саво ԥаримос можэт тэ авэл кай о хулай и хулаи? б) Со терэла о хулай, саво полэл пэстиря хулая?

⁸ Кажнонэ бэятости трэбуй, кай о дад и дэй тэ отдэн лэсти бут время и зор. Лэсти када фартэ трэбуй. Важ када, если андо ери най ек цынёнё бэято, лэ дадэсти и ла дати можэт тэ авэл найвушэро тэ виарақэл время важ кажно. Дэсавэ дад и дэй, савэндэ най ек цынёнё бэято, ԥэнэн, кай лэндэ фартэ бут дила. И дэй можэт тэ вимардёл анда зор. Латэ можэт тэ на авэл зор, кай тэ сытёл па Библия, тэ мангэлпэ и тэ ԥирэл пэ служэния. Кадяжэ латэ нинай зор, кай вой драго тэ ашунэл пэ собрания. Канешно, о хулай, саво полэл пэстиря хулая, старыияпэ тэ поможый ла хулаяти тэ заботийпэ пала бэятцэ пэ собрания, ай кадяжэ и цэрэ. Во кадяжэ лэла тэ старыийпэ тэ на промэкэл тэ сытярэл лэ ерес па Библия, кай кадэлэстар тэ авэл лашимос всаворэ ерести. И кадяжэ дад христианино витидэла время, кай тэ росԥэнэн важ о Дэл лэ ереса.

СЫТЯРЭН ЛЭ БЭЯТОНЭН ТЭ ЛЮБИН ЛЭ ИЕГОВАС

9, 10. Со важно тэ терэн лэ дадэсти и ла дати, савэ камэн тэ поможын пэстирэ бэятонэнди?

⁹ Сар о дад и дэй моӷут тэ поможын лэ бэятонэнди, кай вонэ тэ любин лэ Иеговас? Сар тэ фэрин лэн лэ найлашимастар, саво терэлпэ андэ люма? Акэ дэсавэ советоря.

¹⁰ Мангэн лэ Иеговас тэ поможый. Диқам, со сас лэ Маноёса и лэстиря хулаяса, када лэ Самсоностирэ дад и дэй. Кала о Маноё уӷангля, кай лэстэ авэла шаво, во ля тэ мангэл лэ Иеговас, кай во тэ сытярэл лэс, сар тэ барярэл лэ бэятос.

11. Пала со, сар пистромэ андэ Судей 13:8, о Маноё мангэлас лэ Иеговас, и со моӷут тэ сытён лэстар и дада и дэя?

¹¹ Кода, со сас лэ Маноёса поможысардя лэ Нихадости и ла Алмати анда Босния и Герцеговина. Вонэ росԥэнэн: «Амэ, сар о Маноё, мангасас лэ Иеговас тэ сытярэл амэн, сар тэ авас лашэ дад и дэй. О Иегова ашунэлас амарэ молитвы и поможыяс амэнди через и Библия, через и литература, сави па Библия, через и собрании и канӷрэсоря». (Адиносар Судей 13:8d.)

12. Сар сытярэнас пэстирэ бэятонэн о Иосифо и Мария?

¹² Сытярэн кодэлэса, сар тумэ пэс андярэн. Кода, со тумэ росԥэнэн лэ бэятонэнди важно. Но май важно важ лэндэ кода, сар тумэ пэс андярэн. Можно тэ патяс, кай о Иосифо и Мария сас важ пэстирэ бэятцэ, и важ о Иисусо, лашо примеро. О Иосифо бут терэлас дила, кай тэ проправарэл лэ ерес. Инке, сытярэлас лэ бэятонэн тэ любин лэ Иеговас и тэ служын лэсти (Второзаконие 4:9, 10). О Иосифо кажно бэрш лэлас пэстирэ ерес андо Иерусалимо пэ Патради, хоть па Законо када на трэбуй сас (Луки 2:41, 42). Дэсавэ дадэнди здэласпэ, кай кацаво дром анэн фартэ бут ԥаримос, жан бут ловэ и кадяжэ залэл бут время. Но о Иосифо фартэ любияс лэ Иеговас и кадэлэсти сытярэлас лэ бэятонэн. Кадяжэ можно тэ сытювас и кай и Мария. Вой драго ӷанэнас и Писания. Пэстирэ алавэнца и пэстиря жызняса, вой сытярэлас лэ бэятонэн тэ любин лэ Дэвлэско Алав и Писания.

13. Сар лэ Иосифостири и ла Мариятири жызня, поможысардя еқэ ерести?

¹³ О Нихадо и Алма, пала савэ дасас дума май англал, старыинаспэ тэ сытён кай о Иосифо и кай и Мария. Сар када поможысардя лэнди тэ барярэн пэстирэ шавэс, кай во тэ любий лэ Дэвлэс и тэ служый лэсти? Вонэ ԥэнэн: «Всаворя пэстиря жызняса амэ старысавасас тэ сыкавас амарэ шавэсти, скати бах анэн кода, кай жувас па лэ Иеговастирэ принцыпоря». О Нихадо инке ԥэнэн: «Если тумэ камэн, кай тумаро бэято тэ любий лэ Иеговас, тумэ трэбуй екжэнэ тэ любин лэ Иеговас».

14. Васо лэ дадэсти и ла дати фартэ трэбуй тэ ӷанэн, каса дэн дума лэндирэ бэятцэ?

¹⁴ Поможын лэ бэятонэнди тэ арақэн лашэ друӷонэн. Лэ дадэсти и ла дати трэбуй тэ ӷанэн, каса лэндирэ бэятцэ проандярэн и время и со вонэ терэн. О дад и дэй трэбуй тэ ӷанэн, каса и бэятцэ бэшэн андо интэрнэто и дэн дума па телефоно. Вся када можэт фартэ тэ парувэл лэндирэ гиндоря и кода, сар вонэ пэс андярэн (1 Коринфянам 15:33).

15. Сости и дада и дэя моӷут тэ сытён лэ Джессёстар?

¹⁵ Со тэ терэн лэ родителёнэнди, савэ найдраго полэн андо компьютеро чи андо телефоно? Акэ со росԥэнэн о Джесси, хулай лэ ереско, саво жувэл пэ Филиппины. «Амэ най фартэ ӷанасас пала компьютеро и пала телефоно. Но када на мишыияс амэнди тэ сытярас пэстирэ бэятонэн, саво найлашимос можэт тэ анэн о компьютеро и о телефоно». О Джесси на гиндояс, раз во на полэл андо компьютеро и андо телефоно, тоди на трэбуй лэн тэ дэл лэ бэятонэнди. Во ԥэнэн: «Мэ ԥэнавас лэ бэятонэнди, кай компьютеро и телефоно трэбуй важ кода, кай тэ сытён нэви шыб, тэ ӷотовица каринг и собрания и кажно дес тэ адинон и Библия». Если тумэндэ исин бэятцэ старыинаспэ тумэ чи най тэ проадинон и тэ подэн дума лэнца, сар годявэрнэс тэ бишалэн сообщения и карточки? Статьи па кадэя тема можно тэ виарақас андо раздело «Подростки» по сайто jw.org^®. Диқлэ тумэ чи най лэ бэятонэнца видео «Электрони устройства. Ту лэнго хулай или лэнго рабо?» и «Социальни сети. На андярэн пэс сар бэятцэ!»?e Када вся лащи помощь тумарэ бэятонэнди, кай годявэрнэс тэ пользуинпэ лэ компьютеронэнца и лэ телефононэнца (Притчи 13:20).

16. Со терэн бут дада и дэя важ пэстирэ бэятцэ и каринг со када анэн?

¹⁶ Бут дада и дэя терэн вся, со можно, кай лэндирэ бэятцэ тэ проандярэн май бут время кодэлэнца, ко терэл бут дила андэ служэния лэ Иеговасти. Например, о Н’Дени и Бомина, ери, саво жувэл андо Кот-д’Ивуаро, часто ақарэнас лэ раёнонэс тэ пожувэл лэндэ, кала во авэлас андэ лэндири собрания. О Н’Дени росԥэнэн: «Када фартэ драго дицэля па амаро шаво. Во ашэля пианеро и акана служый, сар заместителё кай о раёно надзирателё». Ай тумэндэ вижал варисо тэ терэн, кай тумарэ бэятонэндэ кадяжэ тэ авэн лашэ друӷоря?

17, 18. Кала трэбуй тэ залэс тэ сытярэс бэятонэн?

¹⁷ Залэн тэ сытярэн пэстирэ бэятонэн со май рано. На бистрэн, со май йто лэна тэ сытярэн, со май драго кадэлэстар авэла (Притчи 22:6). Погиндосарам пала Тимофею, саво, кала вибареля, ԥирэлас лэ апостолоса Павлоса андэ служэния. Лэ Тимофеёстири дэй и Евника и лэстири баба и Лоида сытярэнас лэс «жы цынёнестар» (2 Тимофею 1:5; 3:15).

¹⁸ Авэр ери о Жан-Клод и лэстири хулаи, савэ жувэн андо Кот-д’Ивуаро, поможынас пэстирэ шовэ бэятонэнди тэ любин лэ Иеговас и тэ ашэн лэстирэ служытеля. Сар лэндэ када вижыля? Вонэ терэнас кадя, сар и Евника и Лоида. Вонэ росԥэнэн: «Кати арақаделэпэ и бэятцэ, амэ лям тэ сытярас лэн каринг лэ Дэвлэско алав».

19. Со сыкавэл о алав «сытяр»?

¹⁹ Андэ Библия андэ Второзаконие 6:6, 7 пистромэ лэ дадэнди и лэ дэянди «сытярэн» пэстирэ бэятонэн лэ Иеговастирэ закононэнди. Еврейско алав, саво пэрэандярдо, сар «сытярэн», можэт тэ сыкавэл, кай трэбуй тэ ԥэнэс «най еқвар» и «тэ доԥэнэс». Важ када лэ дадэсти и ла дати трэбуй вся и время тэ проандярэн и время пэстирэ бэятонэнца. Дэкала тумэ можэте тэ холявэн, кай тумэнди трэбуй най еқвар тэ ԥэнэн лэ бэятонэнди. Важ када на холявэн, ай прилэн када, сар лашо способо тэ поможын лэ бэятонэнди тэ полэн лэ Дэвлэско Алав, и Библия и кай тэ терэн кадя андэ жызня.

20. Сар через кода, со пистромэ андэ 127 Псалмо, можно тэ сытярэн бэятонэн?

²⁰ Полэн, со трэбуй тумарэ бэятонэнди. Андэ 127 Псалмо лэ бэятонэн сыстон лэ стрелэнца. (Адиносар Псалом 127:4f.) И стрелы разни па размеро и стердэ по разному. Всаворэ бэятцэ разни, важ кода лэ дадэсти и ла дати трэбуй тэ полэн, сар тэ сытярэн кажнонэ бэятос. Ек ери анда Израилё, савэ драго вибарярдэ дуе бэятонэн, росԥэнэн, со лэнди поможысардя: «Амэ сытярасас па Библия кажнонэ бэятос отдельно». Канешно, кажно хулай андо ери екжэно трэбуй тэ витидэл, поджал лэсти чи най, кай кадя тэ сытярэл лэ ерес.

О ИЕГОВА ПОМОЖЫЯ ТУМЭНДИ

21. Сар о Иегова можэт тэ поможый лэ дадэнди и лэ дэянди?

²¹ Дэкала лэ дадэсти и ла дати можэт тэ здэлпэ, кай тэ сытярэн лэ бэятонэн фартэ ԥарэс. Но лэнди трэбуй тэ сэрэн, кай и бэятцэ, када подарко лэ Иеговастар и во вся и время поможый. Во драго виашунэл лэ дадэстирэ и ла датирэ молитвы и дэл атвето через и Библия и через амари литература. Ай инке атвето пэ молитва можэт тэ авэл через кода, сар подԥэнэна и христианоря, савэ ужэ вибарярдэ пэстирэ бэятонэн.

22. Саво подарко лэ дадэстар и ла датар со май лашо?

²² Канешно, о дад и дэй пэ вся и время ашэнапэ дадэса и даса. Но фартэ часто можно тэ ашунэс, кай тэ вибарярэс лэ бэятос, трэбуй 20 бэрш. Вся со май лашо, со о дад и дэй моӷут тэ дэн лэ бэятонэнди важ кадэя время, када и любовь, время и кай тэ ашэн лашэ христианоря. Кажно бэято прилэл када по разному. Но бут анда кодэла, ко вибареля андо ери, кай любин лэ Иеговас, ԥэнэн, кай лэндэ по ди кацаво жэ, сар кай и Джоанна-Мэй анда Азия: «Мэ блаӷодарисарав мэрнэ дадэс и ла да, кай вонэ ман драго барярдэ и сытярдэ тэ любисарав лэ Иеговас! Вонэ найпросто подарисардэ манди и жызня, ай стердэ вся, кай андэ мэрни жызня тэ авэл о Иегова» (Притчи 23:24, 25). Кадяжэ моӷут тэ ԥэнэн милионоря ԥрала и ԥэя па вся и ԥув.