СТАТЬЯ, КАЙ ТЭ СЫТЮВАС 15
Сар тумэ полэн лэ манушэн, савэнди росԥэнэн важ о Дэл?
«Ваздэн яқа и обдиқэн и маля. Вонэ парнелэ, кай тэ стидэн о зэрно» (ИОАННА 4:35).
ДИЛИ 64 Радостно участвуем в жатве
ПАЛА СО УӶАНАСА АНДА СТАТЬЯ?a
1, 2. Со камля тэ ԥэнэн о Иисусо лэ алавэнца, савэ запистромэ андэ Иоанна 4:35, 36?
О ИИСУСО жалас паша зэлэ́ни маля, пэ савэ барёлас, файма, о ячменё (Иоанна 4:3—6). Инке варикай штар шон ашэласпэ, кай тэ стидэн о зэрно. Важ када ученикоря удивисайлэ, кала о Иисусо ԥэндя кацавэ алава: «Ваздэн яқа и обдиқэн и маля. Вонэ парнелэ, кай тэ стидэн о зэрно». (Адиносар Иоанна 4:35, 36b.) Со о Иисусо камля тэ ԥэнэн кадэлэ алавэнца?
2 О Иисусо дэлас дума най пала зэрно, ай пала мануша. Сгиндосарам, со сас дэ май англал. О Иисусо росԥэнэнас важ о Дэл ла самаритянкати и вой патяя лэсти, хоть андэ кодэя время и иудеёря обнашэнас лэ самаритянонэн. Кала о Иисусо росԥэнэнас, кай и маля «парнелэ, кай тэ стидэн о зэрно», и самаритяноря, савэ ашундэ пала лэстэ кодэла жувлятар, прастае каринг лэстэ, кай тэ уӷанэн май бут (Иоанна 4:9, 39—42). Ек учоно, саво полэл и Библия, ԥэндя: «Кода, кай и мануша прастае каринг о Иисусо, сыкавэл, кай вонэ сас, сар о зэрно, саво ужэ вибареля и лэс трэбуй тэ стидэн».
Со амэ ласа тэ терас, если патяс, кай и маля парнелэ, кай тэ стидэн о зэрно? (Диқэн о абзацо 3.)
3. Сар тумари служэния авэла инке май лащи, если тумэ лэна тэ обжанпэ лэ манушэнца кадя, сар о Иисусо?
3 Ай сар тумэ диқэн пэ мануша, касти росԥэнэн пала Дэл? Гиндон тумэ, кай вонэ, сар о зэрно, саво ужэ трэбуй тэ стидэс? Если када кадя, тоди када лэла тэ дицол пэ тумари служэния лэ Дэвлэсти. Сар? Пэрво, тумэ лэна тэ росԥэнэн важ о Дэл инке май бут. На хасарэн и время, важ кода кай, кала и мануша стидэн о зэрно, вонэ терэн када со май йто! Дуйто, тумэ авэна тэ лошавэн, кала лэна анда вся оди тэ стидэн о уражаё. Андэ Библия пала када пистромэ, кай и мануша «лошавэн, кала стидэн о уражаё» (Исаия 9:3). И трито, тумэ лэна тэ полэн лэ манушэн, сар кодэлэн, ко ужэ патял тумэнца андо ек Дэл. Важ када старыинпэ тэ росԥэнэн кадя, кай о мануш тэ закамэл тэ ашунэл.
4. Сости амэ сытювас кай о апостоло Павло?
4 Дэко анда лэ Иисусостирэ ученикоря, файма, гиндонас, кай и самаритяноря никала на ашэна лэстирэ учениконэнца. Но о Иисусо кадя на гиндояс. Во гиндояс, кай и самаритяноря моӷут тэ патян андэр лэстэ. Амэ кадяжэ трэбуй тэ диқас пэ мануша, кай вонэ моӷут тэ ашэн христианоря. Со май лашо примеро дя амэнди о апостоло Павло. Сости амэ лэстар сытювас? Андэ кадэя статья амэ подаса дума, сар во 1) столас патив пэ кода, андэр со патян кодэла, касти во росԥэнэнас, 2) полэлас, со лэнди чалёл и 3) диқэлас, кай вонэ моӷут тэ ашэн лэ Иисусостирэ ученикоря.
АНДЭР СО ВОНЭ ПАТЯН?
5. Васо о Павло полэлас кодэлэн, касти росԥэнэнас важ о Дэл андэ синагога?
5 О Павло бутварэс росԥэнэнас пала Дэл андэ иудейско синагога. Андэ синагога андэ Фессалоника во «трин субботы дя дума... [лэ иудеёнэнца] па Писании» (Деяния 17:1, 2). О Павло на даралас тэ росԥэнэн котэ пала Дэл, важ кода кай во екжэно сас иудеё (Деяния 26:4, 5). О Павло полэлас, сар гиндон и иудеёря, важ када лэсти сас вушэро лэнца тэ дэл дума (Филиппийцам 3:4, 5).
6. Соса мануша по базаро андэ Афины на шонаспэ пэ кодэла, касти о Павло росԥэнэнас андэ синагога?
6 Важ кода кай о Павло росԥэнэнас пала Дэл, лэс видарадэ анда Фессалоника, ай тоди и анда Верия. Во нашля андэ Афины. И котэ во упалэ ля тэ дэл дума «андэ синагога лэ иудеёнэнца и аврэ манушэнца, савэ тэлёнас лэ Дэвлэсти» (Деяния 17:17). Ай кала о Павло по базаро росԥэнэнас важ о Дэл, лэс ашунэнас авэр мануша. Дэко андар лэндэ патянас андэ мудрость кадэлэ мирости. Важ лэндэ и важ кодэла, ко найевреёря, лэ Павлостирэ алава сас, сар нэви учения. Вонэ ԥэнэнас лэсти: «Кода, со ту росԥэнэс, чудно важ амэндэ» (Деяния 17:18—20).
7. Сар о Павло росԥэнэнас пала Дэл лэ афинянонэнди, сар када запистромэ андэ Деяния 17:22, 23?
7 Адиносар Деяния 17:22, 23c. Кала о Павло сас андэ Афины, во дэлас дума лэ манушэнца анда авэр народоря най кадя, сар лэ иудеёнэнца андэ синагога. Во погиндосардя, андэр со патян и катутнэ мануша. О Павло шутя сама, сар вонэ присытелэ тэ тэлён лэ Дэвлэсти. Потом во старыияспэ тэ виарақэл варисо, соса шолпэ кода, сар вонэ тэлёнас и сар тэлён лэ чачунэ Дэвлэсти. Акэ со пала када пистросардя ек учоно, саво полэл и Библия: «О Павло сас евреё, саво патялас андо Иисусо, и во полэлас, кай и ӷрекоря на тэлён лэ чачунэ Дэвлэсти, сар и иудеёря и христианоря. Но во всаек камэлас тэ сыкавэл, кай о Дэл, пала саво во росԥэнэн, па чачимастэ найчужо лэнди». Важ када о Павло камэлас тэ терэл вся, кай о чачимос пала Дэл тэ дожал каринг оди. Во ԥэндя, кай лэстири весть лэ «Дэвлэстар, савэс нико на диқля», и кай афиняноря лэсти и тэлён. Хоть и о миро анда авэр народоря на ӷанэнас и Свынто Писания, о Павло на гиндояс, кай вонэ на ашунэна пала Дэл. Во диқэлас, кай вонэ шонпэ пэ спило зэрно, саво трэбуй тэ стидэн. О Павло парудя о гиндо и закамля тэ росԥэнэн важ о Дэл кадя, кай вонэ тэ полэн.
Сар и о Павло, шон сама пэ кода, сар жувэл о миро, подтидэн и алава каринг и дума и диқэн пэ всаворэ мануша, сар пэ ԥрала и ԥэя. (Диқэн и абзацоря 8, 12, 18.)g
8. а) Сар тэ полас, андэр со патял о мануш пэ тумаро учаско важ и служэния? б) Со можно тэ ԥэнас, если о мануш ԥэнэн, кай лэстэ пэско Дэл?
8 Сар и о Павло, шон сама пэ кода, сар жувэл о миро. Полэн, андэр со патял о миро пэ тумаро учаско важ и служэния. Саво кай о мануш цэр чи вурали? Со можно тэ полас пэ лэско алав, пэ кода, сар во утидэлпэ, со за причоска кай о мануш, савэ алава во ԥэнэн. Можно па вся када тэ полас, савэ дэвлэсти во патял? Ай можэт во ворта ԥэнэн, андэр со патял. Кацаво сас еқа ԥэяса, сави служый, сар спецыально пианеро. Акэ со вой ԥэнэн: «Мэ катэ най важ када, кай тэ пэрэцырдав тумэн андэ пэстири вера. Ай камав тэ подав дума тумэнца акэ пала со...»
9. Со можно тэ виарақас еқэндар кодэлэ манушэса, саво ужэ патял андо Дэл?
9 Пала со можно тэ подас дума кодэлэса, ко ужэ патял андо Дэл? Виарақэн варисо, со тумэндэ еқэндар. Можэт во патял, кай о Дэл ек, чи прижанэл, кай о Иисусо спасысардя всаворэн манушэн, чи патял андэ кода, кай о найлашимос будэр никала на авэла. Сар виарақэна кода, андэр со патян еқэндар, тоди росԥэнэн лэ манушэсти, со пала када пистромэ андэ Библия. Тоди лэсти чалёла тэ ашунэл кода, пала со тумэ лэсти росԥэнэн.
10. Со трэбуй тэ стерас и васо?
10 Сэрэн, кай и мануша дэкала на патян андэ вся кода, сости сытярэл лэндири вера. Важ када, дажэ кала полинэ, сави вера кай о мануш, всаек уӷанэн, андэр со патял во. И Дональта анда Албания росԥэнэн: «Амэ диқас манушэн, савэ ԥэнэн, кай лэндэ исин пэсти вера. Но потом амэ полас, кай вонэ па чачимастэ на патян андо Дэл». Ай о мисианеро анда Аргентина шутя сама, кай дэсавэ мануша ԥэнэн, кай патян андэ Троица, но на патян, кай о небесно Дад, о Шаво и о свынто духо, када ек Дэл. Во ԥэнэн: «Кала ӷанэс када, тоди май вушэро тэ виарақэс лэ манушэса пала со тэ дэс дума». Важ када трэбуй тэ стон зор, кай тэ полэн, андэр со о мануш патял. Тоди тумэндэ вижала тэ ԥэнэн пала пэстэ, сар о апостоло Павло, саво ԥэндя: «Мэ стердэм вся, со можно сас, кай тэ поможысарав разнонэ манушэнди» (1 Коринфянам 9:19—23).
СО ЛЭНДИ ЧАЛЁЛ?
11. Сар дицол анда Деяния 14:14—17, кай о Павло стердя кадя, кай лэ мирости андэ Листра, тэ чалёл и лащи весть?
11 Адиносар Деяния 14:14—17d. О Павло май англал уӷанэнас, со чалёл кодэлэнди, ко лэс ашунэн, ай тоди дэлас дума пала када. Мануша, савэ жувэнас андэ Листра, набут ӷанэнас пала Свынти Писания. Важ када о Павло дэлас дума кадя, кай вонэ тэ полэн. Во дэлас дума пала баро уражаё и пала кода, со дэл бах и лош андэ жызня. Лэстирэ алава и примероря сас вушэро тэ полэн кодэлэнди, ко котэ жувэлас.
12. Сар тэ полас, со чалёл лэ манушэсти и тэ подтидас и алава, кай тэ подас дума?
12 Старыинпэ тэ полэн, со чалёл лэ манушэнди котэ, кай тумэ росԥэнэн пала Дэл, и погиндон, пала со и мануша камэн тэ дэн дума. Но сар тэ полас, со чалёл лэ манушэсти? Атвето кацаво жэ, трэбуй тэ шас сама манушэс и пэ кода, сар во жувэл. Можэт во терэл бути андо садо, адиной и книжка чи терэл и вурали, чи инке варисо. Тоди, васо тэ на задэн дума пала кодэя дила, сави о мануш терэл? (Иоанна 4:7). Дажэ па кода, сар о мануш утидэлпэ, можно бут со тэ полас, сави лэстэ нацыя, соса во залэлпэ и сави команда анда спорто лэсти чалёл. О ԥрал, савэс ақарэн Густаво, росԥэнэн: «Мэ задэм дума тэрнэ манушэса, савэсти 19 бэрш. Лэстэ пэ майка сас нарисомэ ашунгло мануш, саво дилабэл. Мэ задэм дума лэса пала када, и во росԥэндя, соса во лэсти чалёл. Кадэва мануш заля тэ сытёл па Библия и акана во амаро ԥрал».
13. Сар тэ стерас кадя, кай о мануш тэ закамэл тэ сытёл па Библия?
13 Кала ԥэнэс лэ манушэсти, кай во можэт тэ сытёл па Библия, тоди шу сама, со лэсти чалёл и сыкав, сар када поможыя лэсти (Иоанна 4:13—15). Еқвар амари ԥэй росԥэнэнас пала Дэл еқа манушняти. Лати чалеля, со росԥэндя и ԥэй и вой ақардя ла пэстэ цэрэ. Кала вой зажыля, и ԥэй додиқля, кай пэ стина сас о лил, саво сыкавэлас, кай кадэя манушни сас прафесаро андо университето. Тоди амари ԥэй ԥэндя, кай амэ кадяжэ сытярас лэ манушэн. И када амэ терас пэ урокоря, пэ савэ сытярас па Библия и пэ амарэ собрании. Кодэя манушни соӷласисайля, кай ла тэ сытярэн па Библия и пэ авэр дес вой авеля пэ собрания, ай потом инке сас по раёно канӷрэсо. Через бэршэстэ вой болделя. Пушэн пэстар: «Со чалёл манушэнди, кастэ ԥирав? Сар мэ моӷу пэ када тэ шав сама, кала росԥэнав лэнди пала Дэл?»
14. Сар трэбуй тэ проандярас изучения разнонэ манушэнца?
14 Кала залэн тэ сытярэн па Библия, терэн акэ со. Кажно разо, кала екжэнэ ӷотовитесь каринг и изучения, шон сама пэ кода, сар манушэс вибарярдэ о дад и дэй, ӷрамотно во чи най, со лэстэ сас андэ жызня и со лэсти чалёл. Кала тумэ ӷотовитесь, кай тэ проандярэн и изучения, витидэн и стихоря, савэ тумэ проадинона, видео, саво сыкавэна и савэ примероря ԥэнэна, кай о чачимос анда Библия тэ авэл понятно. Пушэн пэстар: «Со можэт тэ лэл лэ одестар лэ манушэс, кас мэ сытярав па Библия?» (Притчи 16:23). Ек пианерка, сави ақарэнас Флора, сытярэлас па Библия еқа манушня андэ Албания. Вой нисар нащи полэлас, сар о Дэл рия лэ манушэн каринг и жызня. И Флора на ля ла тэ лажаварэл. Вой росԥэнэн: «Мэ полэм, кай лати спэрва трэбуй драго тэ уӷанэн лэ Дэвлэс, саво дэл алав, кай рия каринг и жызня лэ манушэн». Тоди и Флора пэ кажно изучения ля тэ шол сама пэ Иеговастири любовь, пэ мудрость и пэ лэско зор. Прожыля дэсави время, и кодэя манушни патяя, кай о Иегова рисарэла каринг и жызня лэ манушэн, савэ мулинэ. Акана вой анда вся оди служый лэ Иеговасти.
ДИҚЭН ПЭР ЛЭНДЭ, САР ПЭ ԤРАЛА И ПЭ ԤЭЯ
15. Со пэрэандярдя о Павло андэ Афины, сар пистромэ андэ Деяния 17:16, 17, и васо во на гиндояс, кай на трэбуй тэ росԥэнэн лэнди важ о Дэл?
15 Адиносар Деяния 17:16, 17e. Анда Афины всаворэ мануша тэлёнас хохавнэ дэвлэнди, андярэнас пэс билажавардэс и гиндонас, сар и мануша андэ люма. Но всаек о Павло на гиндояс, кай лэнди на трэбуй тэ росԥэнэн пала Дэл. Лэ Павлос на тердярдя дажэ кода, кай вонэ ԥэнэнас пэр лэстэ найлашэ алава. О Павло жы каринг кода, сар тэ ашэл христианиноса, екжэно ӷонияс манушэн, ԥэнэнас найлашэ алава по Дэл, и фартэ бут гиндояс пала пэстэ (1 Тимофею 1:13). Кадя жэ, сар о Иисусо додиқля андо Павло пэстирэ ученикос, кадя и о Павло диқэлас пэ афиняноря, сар пэ пэстирэ ԥрала и ԥэя. И во най евья кадя гиндояс (Деяния 9:13—15; 17:34).
16, 17. Васо можно тэ ԥэнас, кай лэ Иисусостирэ учениконэнца моӷут тэ авэн разни мануша? Росԥэнэн, со сас еқа тэрня манушняса.
16 Андэ пэрво вико ашэнас лэ Иисусостирэ учениконэнца разни мануша. О апостоло Павло пистросардя лэ манушэнди, савэ жувэнас андо ӷреческо форо Коринфо, кай вонэ сас преступникоря чи андярэнас пэс фартэ билажавардэс. Но во инке ԥэндя: «ашэлэ вужэ» (1 Коринфянам 6:9—11). Ай тумэ патяёп, кай кацавэ мануша моӷут тэ парудёнпэ и тэ ашэн лэ Иисусостирэ учениконэнца?
17 Адес бут, ко камэл тэ парувэл пэстири жызня, кай тэ авэл лэ Иисусоско ученико. Ек пианерка анда Австралия, савя ақарэн Юкина, диқля пэстирэ яқэнца, кай о чачимос анда Библия моӷут тэ прилэн разни мануша. Еқвар вой додиқля тэрня манушня, сави сас утиди андэ фартэ буӷли йда и латэ пэ тила сас най ек наколка. И Юкина ԥэнэн: «Мэ на ӷанавас, тэ поджав латэ чи най, но всаек ришыла тэ подав дума ласа. Кала мэ ласа давас дума, мэ полэм, кай лати кадя чалёл и Библия, кай вой дажэ вимардя пэсти пэ тила алава анда книӷа Псалом!» Кадэя тэрни манушни заля тэ сытёл па Библия и тэ ԥирэл пэ собранииf.
18. Васо амэ трэбуй тэ на сындосарас лэ манушэн?
18 О Иисусо ԥэндя, кай о зэрно пэ маля ужэ трэбуй тэ стидэн. Камэлас о Иисусо кадэлэ алавэнца тэ ԥэнэн, кай лэстири лащи весть прилэна бут мануша? Най. Андэ Свынто Писания сас ԥэндо, кай андэр лэстэ патяна найбут мануша (Иоанна 12:37, 38). Инке, во диқэлас, со манушэстэ андо ди (Матфея 9:4). О Иисусо май бут шолас сама пэ кодэла, ко моӷ тэ патял андэр лэстэ. Но всаек во росԥэнэнас пала Дэл всаворэ манушэнди и на жалуияс о зор пэ када. Амэ най сар о Иисусо, амэ нэ можэм тэ диқас, со андо ди. Тоди, пэ скати дэ фартэ амэнди трэбуй тэ старысавас тэ на гиндосарас вэрыто пала мануша, савэ жувэн пэ амаро учаско важ и служэния чи важ варисаво ек мануш! Диқэн пэ всаворэ мануша, сар пэ ԥрала и ԥэя. Акэ со пала када ԥэндя о Марко, саво служый мисианероса андэ Буркина-Фасо: «Часто и мануша, савэ мэ гиндосаравас, кай лэндэ авэла лащи дружба лэ Иеговаса, мэкэнас тэ сытён па Библия. Ай кодэла, пала кастэ мэ гиндосаравас, кай лэндэ нисо на вижала, лэнас тэ полэн лэ Иеговас май фартэ. Важ када мэ полэм, кай май фэдэр тэ патяс лэ Иеговасти, чем тэ гиндос кадя, сар тути здэлпэ».
19. Сар трэбуй тэ андярас пэс лэ манушэнца, савэнди росԥэнас важ о Дэл?
19 Спэрва можэт тэ здэлпэ, кай пэ амаро учаско важ и служэния нинай бут мануша, савэ, сар, спило зэрно. Но сгиндон, со о Иисусо ԥэндя пэстирэ учениконэнди. О зэрно пэ маля ужэ трэбуй тэ стидэн. Мануша, савэнди амэ росԥэнас важ о Дэл, моӷут тэ парудён и тэ ашэн лэ Иисусостирэ учениконэнца. О Иегова ԥэнэн, кай вонэ лэсти куч (Аггей 2:7). Если амэ диқас пэ мануша кадя жэ, сар о Иегова и о Иисусо, тоди амэ ласа тэ старысавас май драго тэ полас лэн и кода, со лэнди чалёл. Амэ ласа пэс тэ андярас лэнца, най сар чужонэнца, ай сар ԥралэнца и ԥэянца, савэ моӷут тэ патян амэнца андо ек Дэл.
ДИЛИ 57 Проповедуем людям всякого рода
a Сар кода, сар амэ полас лэ манушэн, терэл амари служэния инке май лащи? Андэ кадэя статья подаса дума пала Иисусо и пала апостоло Павло. Вонэ шонас сама пэ кода, андэр со и мануша патян и со лэнди чалёл. Кадяжэ вонэ диқэнас пэ мануша, сар пэ кодэла, ко можэт тэ ашэл учениконэнца. Подам дума пала кода, сар амэ можэм тэ терас кадя жэ, сар и вонэ.
b Иоанна 4:35, 36: «Ваздэн яқа и обдиқэн и маля. Вонэ парнелэ, кай тэ стидэн о зэрно. Кодэва, ко стидэл о зэрно, ужэ лэл кода, со лэсти прижал и стидэл плодоря важ и вечно жызня, кай и кодэва, ко сеий и кодэва, ко стидэл тэ лошавэн еқэҭанэ».
c Деяния 17:22, 23: «О Павло терделя машкар Ареопа́го и ԥэндя: „Афиняноря! Мэ диқав, кай тумэ май бут, чем авэр мануша, даран лэ дэвлэндар. Кала мэ прожавас па форо и диқавас кода, со важ тумэндэ свынто, мэ виарақлэм жэртвеннико, пэ саво пистромэ: „Лэ Дэвлэсти, савэс на ӷанас“. Ни, важ кадэва Дэл, савэсти тумэ тэлён, и дажэ на ӷанэн, ко во, мэ и росԥэнав тумэнди“».
d Деяния 14:14—17: «Но кала и апостолоря о Варна́ва и о Павло ашундэ важ када, вонэ росшындэ пэр пэстэ йда, шутэпэ андэ толпа и зацыписайлэ: „Состэ тумэ када терэн? Амэ кацавэ жэ мануша, сар и тумэ. И амэ росԥэнас тумэнди лащи весть, кай тумэ тэ ашавэн кода, со евья, и тэ бандён каринг о жундо Дэл, саво стердя о нэбо, и ԥув, и моря и вся, со андэр лэндэ. Андэ дэлмутни время во мэкэлас, кай всаворэ народоря тэ ԥирэн пэстирэ дромэнца, хоть на парашэлас тэ росԥэнэн пала пэстэ, кала терэлас лашимос, бишалэлас тумэнди па нэбо о брышын, дэлас уражаё андэ пэстири время, дэлас о хамос и ԥэрэлас тумарэ одя лошаса“».
e Деяния 17:16, 17: «Пока о Павло аштярэлас лэн андэ Афины, во додиқля, кай андо форо бут идолоря. И када лэс холярдя. Во дэлас дума па Писании андэ синагога лэ иудеёнэнца и аврэ манушэнца, савэ тэлёнас лэ Дэвлэсти. Кадяжэ во кажно дес дэлас дума по базаро кодэлэнца, кас диқэлас».
f Май бут тэ уӷанас пала кода, сар парудён и мануша, савэ ашэлэ христианоря, амэ можэм андэ рубрика «Библия парувэл и жызня», сави вижалас андэ «Сторожэво Башня», ай лэ 2018 бэршэстар када можно тэ виарақэс по сайто jw.org®. (Диқэн и вкладка О НАС > СЛУЧАИ ИЗ ЖИЗНИ.)
g ПЭ КАРТИНКА. О хулай ла хулаяса андэ служэния шон сама 1) по шукарно цэр, паша саво барён и цвиторя, 2) по цэр, андэ саво жувэл о ери лэ бэятоса, 3) по цэр, саво замэкло андрал и упрал, 4) по цэр, андэ саво жувэн и мануша, савэ патян андэ пэско дэл. Сар па тумарятэ, кай вонэ виарақэна кодэлэн, ко ашэла лэ Иисусоско ученико?