СТАТЬЯ, КАЙ ТЭ СЫТЮВАС 16
Полэн лэ ԥралэн и лэ ԥэян, кадя жэ, сар о Иегова
«Хутилэла тэ сындон па кода, со диқэн тумарэ яқа, ай сындон па чачимастэ» (ИОАННА 7:24).
ДИЛИ 101 Служысарас, сар ек ери
ПАЛА СО УӶАНАСА АНДА СТАТЬЯ?a
1. Сар дицол анда Библия, сар о Иегова диқэл пэ мануша и васо када амэн радуий?
ЧАЛЕЛОП тумэнди, если бы пала тумэндэ тэ гиндон кати па кода, савэ тумэ па муй, савэ тумэ пэса чи па кода, калэ тумэ чи парнэ? Файма, на чалелоп. Сар дэ драго, кай о Иегова на сындой амэн па кода, савэ амэ пар пэстэ! Например, кала о Самуило диқэлас пэ Иессеёстирэ шавэ, во на додиқля кода, со додиқля о Иегова. О Дэл ԥэндя лэ Самуилости, кай ек анда лэ Иессеёстирэ шавэ авэла царё андо Израилё. Но ко када авэла? Кала о Самуило додиқля лэ Елиавос, лэ Иессеёстирэ барэдэрэс шавэс, во погиндосардя: «Када и исин кодэва, кас витидя о Иегова». О Самуило погиндосардя, кай о Дэл стола лэ Елиавос царёса, важ кода кай во сас шукарно мурш. Но о Иегова ԥэндя лэ Самуилости: «На дик пэ кода, саво во пар пэстэ и кай во вучо, важ кода кай мэ на витидэм лэс». Сости када сытярэл амэн? О Иегова ԥэндя: «О мануш диқэл кода, со диқэн и яқа, ай о Иегова диқэл оди» (1 Самуила 16:1, 6, 7).
2. Васо амэ трэбуй тэ шас сама пэ алава анда Иоанна 7:24? Росԥэнэн пала врачо.
2 Важ кода кай амэ всаворэ найсовершэни, амэ присытелям тэ гиндосарас пала мануш кати па кода, саво во пар пэстэ. (Адиносар Иоанна 7:24b.) Но хэба можно тэ полас, саво о мануш па чачимастэ, кати па кода, саво во пэса? Диқам примеро. Дажэ о годявэрно и опытно врачо на ԥэнэна, со лэ манушэстэ лэ зорэса, сар кати подиқэла пэр лэстэ. Кай тэ полэл, со лэ зорэса, лэ врачости трэбуй драго тэ виашунэл лэ манушэс, кай тэ уӷанэн, со сас най кадя лэстирэ зорэса и со акана лэстэ дуқал. О врачо можэт дажэ тэ ԥэнэн, кай во тэ стерэл о ренгенто. Если во вся када на уӷанэна, во нэ сможэт драго тэ личий лэ манушэс. Кадя жэ и амэ. Амэ на поласа амарэ ԥралэн и ԥэян, если ласа тэ шас сама кати пэ кода, со амэнди дицол. Амэ трэбуй тэ полас и кода, со на дицол, савэ вонэ па чачимастэ. Важ кода кай амэ на ӷанас, со лэ манушэндэ андо ди, амэ никала на поласа лэн кадя жэ драго, сар о Иегова. И всаек, амэ можэм тэ сытювас лэстар. Сар?
3. Сар и примероря анда Библия, пала савэ амэ уӷанаса андэ кадэя статья, поможына амэнди тэ сытювас кай о Иегова?
3 Сар о Иегова обжалпэ пэстирэ служытелёнэнца? Во виашунэл лэн. Во шол сама пэ вся, со сас лэндэ андэ жызня и со исин акана. Во полэл, со по ди лэндэ. Уӷанам, сар о Иегова андярэлас пэс кадя лэ Ионаса, лэ Ильяса, ла Агаряса и лэ Лотоса. Погиндосарам, сар тэ обжаспэ амарэ ԥралэнца и ԥэянца кадя жэ, сар о Дэл.
ДРАГО ВИАШУНЭН
4. Васо амэ моӷли бы найдраго тэ гиндосарас пала Иона?
4 Если амэ на ӷанас вся, со сас лэ Ионаса, тоди пала Иона можно тэ гиндосарас, кай лэсти нащи тэ патяс и кай во на кандэлас лэ Дэвлэс. О Дэл лэсти ворта ԥэндя, со тэ терэл, тэ ԥэнэн лэ манушэнди андэ Ниневия лэ Дэвлэско сындо. Но Иона на кангля и закамля «тэ уплывий.... лэ Иеговастар». Во бэшля по кораблё, саво плывияс андэ авэр риг (Иона 1:1—3). Диноп тумэ лэ Ионасти инке еқвар тэ стерэл, со трэбуй? Можэт и най. Но о Иегова диқэлас пэр лэстэ па аврятэ (Иона 3:1, 2).
5. Со амэ уӷанас пала Иона анда молитва, сави запистромэ андэ книӷа Иона 2:1, 2, 9?
5 Кода, саво о мануш сас о Иона, дицол па лэстири молитва. (Адиносар Ионы 2:1, 2c, 9d.) Кадэя молитва (ай кацавэ молитвы сас бут) поможый амэнди тэ диқас пэ Иона най сар пэ кодэва, ко пэрэдарайля кодэлэстар, со ԥэндя тэ стерэл о Иегова и унашля. Па лэстирэ алава можно тэ полас, кай во на заваздэлас о шэро и сас блаӷодарно мануш, саво камэлас тэ кандэл лэ Иеговас. Важ када амэ полас, васо, хоть о Иона и стердя ошыбка, всаек о Иегова ашундя лэстири молитва и домэкля, кай во тэ на парашэл тэ служый, сар о пророко.
Сар амэ уӷанаса, со сас лэ манушэса, амэнди авэла май вушэро тэ полас, со кай о мануш по ди (Диқэн о абзацо 6.)g
6. Васо трэбуй драго тэ виашунас аврэн?
6 Амэндэ вижала драго тэ виашунас аврэн, если амэ на заваздас о шэро и на холявас. Пэ када трэбуй тэ стас зор. Исин трин причины, васо када трэбуй тэ терас. Пэрво, амэ на ласа тэ гиндосарас вэрыто пала кода, васо о мануш варисо стердя. Дуйто, амэ поласа, со лэстэ по ди и васо во дэсо терэл. Када поможыя амэнди май бут тэ сыкавас лэсти, кай амэ полас лэс. И трито, амэ поможысараса лэ манушэсти май драго тэ полэл корко пэс. Дэкала амэ нащи полас корко пэс, пока на росԥэнаса када алавэнца (Притчи 20:5). Ек старейшына анда Азия росԥэнэн: «Сэрав, сар мэ лэм тэ сытярав еқа ԥэя, хоть инке на виашундэм ла. Мэ лати ԥэндэм, кай тэ дэл май лашэ атветоря пэ собрании. Потом мэ уӷанглэм, кай вой на ӷанэнас драго тэ адиной, и кай тэ вижал латэ лашо атвето, вой столас бут зор». Важ када фартэ важно, кай и старейшыноря май англал тэ виашунэн, ай кати тоди тэ дэн совето! (Притчи 18:13).
7. Сости амэн сытярэл кода, сар о Иегова полэлас лэ Ильяс?
7 Дэсавэ ԥралэнди и ԥэянди ԥарэс тэ росԥэнэн кода, со лэндэ по ди. Ԥарэс можэт тэ авэл, важ кода кай кацаво характеро, кадя барярдэ чи кацави культура. Сар лэнди тэ поможысарас? Сгиндон, со стердя о Иегова, кала о Илья гарадёлас ла Иезавелятар. Прожылэ бут деса, сар о Илья ля тэ росԥэнэн кода, со лэстэ по ди, пэстирэ небеснонэ Дадэсти. О Иегова драго лэс виашундя. Потом во стердя, кай лэстэ ашэля драго по ди и дя лэсти тэ стерэл важно дила (1 Царей 19:1—18). Трэбуй тэ прожал и время, кай и ԥрала чи ԥэя тэ патян амэнди. Би кадэлэско амэндэ на вижала тэ полас, со лэндэ андо ди. Если амэ сытювас кай о Иегова, и сыкавас, кай амэ на холявас, тоди, сар прожала и время, вонэ лэна амэнди тэ патян. Ай кала вонэ закамэна тэ росԥэнэн, со лэндэ по ди, тоди трэбуй драго лэн тэ виашунас.
МАЙ ДРАГО УӶАНЭН ЛЭ ԤРАЛЭН И ЛЭ ԤЭЯН
8. Сар дицол анда Бытие 16:7—13, сар о Иегова поможысардя ла Агаряти?
8 И Агарь, ла Саратири служанка, ля найдраго пэс тэ андярэл, кала вой ашэля лэ Аврамостири хулаи. Кала и Агарь уӷангля, кай латэ авэла бэято, вой ля тэ вэрыцый ла Сара, важ кода кай латэ на сас и бэяцэ. И Сара стодя по ҭан ла Агаря и вой унашля латар (Бытие 16:4—6). Если тэ диқас пэ Агарь, кай вой найсовершэно мануш, тоди вижал, кай и Агарь затердя када, важ кода кай пусавэлас лэ алавэнца. Но о Иегова диқэлас па аврятэ. Во бишалдя каринг и Агарь лэ анӷелос. Кала о анӷело виарақля ла Агаря, во поможысардя тэ парувэл пэстирэ гиндоря и блаӷословисардя ла. И Агарь поля, кай о Иегова вся диқэл и драго полэл, со ласа. Вой дажэ ԥэндя лэ Иеговасти: «Ту Дэл, саво вся диқэл». (Адиносар Бытие 16:7—13e.)
9. Васо о Иегова кадя полэлас ла Агаря?
9 Со о Иегова додиқля андэ Агарь? Во ӷанэнас вся, со ласа сас и со лати прижыляпэ тэ пэрэжувэл (Притчи 15:3). И Агарь сас египтянка, сави жувэлас андо еврейско ери. Файма, вой дэкала гиндояс, кай вой чужо. Вой скучияс пала пэско ери и пала ҭан, андэ саво жувэлас. И инке вой сас най ек хулаи кай о Аврамо. Андэ кодэя время кай и мурша, савэ на парашэнас тэ служын лэ Дэвлэсти, сас най ек хулаи. Но о Иегова када на загиндосардя (Матфея 19:4—6). Важ када амэ на удивисавас, кала андо ери сас най ек хулаи, тоди вонэ споринаспэ и ревнуинас. О Иегова на ԥэнэн, кай и Агарь драго терэлас, кала на столас патив пэ Сара. Но амэ патяс, кай о Иегова полэлас кода, со сас латэ по ди и со лати прижыляпэ тэ пэрэжувэл.
Май драго уӷанэн лэ ԥралэн и лэ ԥэян (Диқэн и абзацоря 10—12.)h
10. Сар амэ можэм май драго тэ уӷанас лэ ԥралэн и лэ ԥэян?
10 О Иегова драго полэл лэ манушэн. Амэ можэм тэ терас кадя, сар во. Важ када май драго уӷанэн лэ ԥралэн и лэ ԥэян. Май бут лэнца дэн дума англа кода, сар залэлпэ и собрания и посли кода, сар кончийпэ. Жан лэнца андэ служэния и, если тумэндэ вижал, ақарэн лэн пэстэ цэрэ. Тоди тумэ диқэна пэ вся па аврятэ. И ԥэй, сави здэлпэ на любий мирос, па чачимастэ просто лажавни. О ԥрал, савэстэ бут ловэ, па чачимастэ на любий и ловэ, ай любий тэ делийпэ. Ай пэ дэй лэ бэятонэнца, сави вся и время на авэл вовремя, тасавэн андо ери пала латири вера (Иов 6:29). Канешно, амэнди нащи тэ ӷуляс «най андэ пэстири дила» (1 Тимофею 5:13). Но всаек авелоп драго, май бут тэ уӷанас пала амарэ ԥрала и ԥэя и пала кода, сави лэндэ жызня.
11. Васо лэ старейшынонэнди трэбуй драго тэ ӷанэн лэ бакрорэн андэ пэстири собрания?
11 И старейшыноря трэбуй драго тэ ӷанэн лэ ԥралэн и лэ ԥэян, пала савэ вонэ диқэн андэ собрания. Акэ, со сас лэ Артуроса, саво служый, сар раёно надзирателё. Во еқэ старейшынаса авеля каринг и ԥэй, сави здэласпэ на любий тэ диқэлпэ лэ мироса и сави на любий тэ дэл дума. О Артуро росԥэнэн: «Амэ уӷанглям, кай вой хасардя лэ хулас, сар прожылэ набут бэрша посли ябьяв. Латэ сас бут ԥаримос, но вой вибарярдя дуе щеян и сытярдя лэн тэ любин лэ Иеговас. Потом вой по набут ля вэрыто тэ диқэл лэ яқэнца. Через вся када латэ ляпэ и депрессия. И всаек вой на парашэлас тэ любий лэ Иеговас и тэ патял лэсти. Амэ полям, кай када розлащи ԥэй и латэ можно бут сости тэ сытювас» (Филиппийцам 2:3). Кадэва раёно надзирателё терэлас кадя, сар о Иегова. О Иегова ӷанэн всаворэн пэстирэн бакрорэн и лэндири дук (Исход 3:7). Лэ старейшынонэндэ, савэ драго ӷанэн пэстирэн бакрорэн андэ собрания, вижала май драго лэнди тэ поможын.
12. Сар еқа ԥэяти андэ Азия поможысардя, кай вой май драго уӷангля ла ԥэя андэ пэстири собрания?
12 Если тумэ май драго уӷанэна лэ манушэс, саво тумэнди на чалёл, тоди тумэнди авэла май вушэро тэ полэн, со лэстэ по ди. Акэ, со росԥэнэн ек ԥэй анда Азия: «Ек ԥэй андэ мэрни собрания фартэ ӷромко дэлас дума. Мэ гиндосаравас, кай вой на ӷанэн, сар трэбуй пэс тэ андярэл машкар о миро. Но кала мэ жылэм ласа андэ служэния, мэ уӷанглэм, кай вой поможыяс пэстирэ дадэсти и ла дати тэ битинэл о мащё по базаро. И котэ лати прижаласпэ тэ цыпий лэ мирости, кай тэ пашон и тэ тинэн о мащё. Мэ полэм, кай май фэдэр тэ полас лэ ԥралэн и лэ ԥэян, трэбуй май бут пала лэндэ тэ уӷанас». Канешно, пэ када трэбуй зор. Но кала ласа тэ терас, сар пистромэ андэ Библия, тэ ԥэрнавас «пэстирэ одя», кадя амэ сыкаваса, кай терас, сар о Иегова, саво любий разнонэ манушэн (1 Тимофею 2:3, 4; 2 Коринфянам 6:11—13).
ПОЛЭН, СО ПО ДИ АВРЭНДЭ
13. Со стердэ и анӷелоря, сар запистромэ андэ Бытие 19:15, 16, кала о Лото на грабияс и васо?
13 Андо важно маменто андэ пэстири жызня лэ Лотости трэбуй сас йто тэ терэл кода, со ԥэндя о Иегова. Лэстэ авелэ дуй анӷелоря и ԥэндэ тэ одындярэл лэ ерес анда Содомо. Васо? И анӷелоря ԥэндэ: «Амэ розмараса кадэва ҭан» (Бытие 19:12, 13). Но тэсара о Лото лэ ереса всаек инке сас цэрэ. И анӷелоря упалэ ԥэндэ лэ Лотости. Ай во всаек на грабияс. Можно тэ погиндосарас, кай о Лото сас лениво и дажэ на кандэлас лэ Дэвлэс. Но о Иегова всаек на одбанделя лэ Лотостар. «Лэ Иеговасти во ашэля жалко», важ када и анӷелоря линэ лэ вастэндар лэ Лотос и лэстирэ ерес и виандярдэ лэн анда форо. (Адиносар Бытие 19:15, 16f.)
14. Васо о Иегова закамля тэ полэл, со кай о Лото по ди?
14 Кай о Иегова сас най ек причина, васо во поля, со по ди кай о Лото. Можэт, о Лото на грабияс тэ ужал цэрал, важ кода кай даралас лэ манушэндар, савэ жувэнас пала форо. Сас инке варисо, состар во моӷ тэ дарал. Можэт во ӷанэнас, кай андэ мал найдур лэ форостар, дуй царёря пэлинэ андэ ямы, андэ савэ сас асфальто (Бытие 14:8—12). Сар о дад и о хулай, о Лото пэрэжывал пала пэско ери. Ай инке о Лото сас барвало мануш, важ када андо Содомо, файма, лэстэ сас лашо цэр (Бытие 13:5, 6). Канешно, када вся на сыкавэл, кай о Лото на сас дошало, кай йто на кангля лэ Иеговас. Но о Иегова ԥэндя пэр лэстэ, кай во праведно мануш, хоть о Лото и домэкля и ошыбка (2 Петра 2:7, 8).
Кала виашунэс лэ манушэс, тоди ту уӷанэса, сар тэ сыкавэс, кай полэс, со лэстэ по ди (Диқэн и абзацоря 15, 16.)i
15. Со трэбуй тэ терас, вместо кода, кай тэ сындосарас?
15 Вместо кода, кай тэ сындон аврэ манушэс, фэдэр терэн вся, со па тумаро зор, кай тэ полэн, со лэстэ по ди. Кадя стердя и ԥэй Вероника анда Европа. Вой росԥэнэн: «Ек ԥэй вся и время ԥирэлас холинатири и дурёлас аврэндар. Дэкала мэ дарав латэ тэ пашував. Но мэ погиндосардэм: „Тэ авелоп мэ пэ лако ҭан, манди авелоп трэбуй подружка“. Важ када мэ закамлэм тэ уӷанав, со латэ по ди. И вой росԥэндя манди, со латэ сас по ди! Акана мэ ла полав пэ бутэстэ май фэдэр».
16. Васо, кай драго тэ полас, со аврэндэ по ди, трэбуй тэ мангаспэ лэ Иеговасти?
16 Андэ вся амэн полэл кати о Иегова (Притчи 15:11). Важ када мангэн лэ Иеговас тэ поможый тумэнди тэ додиқэн андэ авэр мануша кода, со диқэл во и тэ полэн, сар тэ сыкавэн лэнди, кай тумэ лэн жалуин. Ԥэй, савя ақарэн Анжела, ля май фартэ тэ полэл, со по ди аврэндэ. Лати андэ када поможысардя и молитва. Лати ашэля ԥарэс тэ дэл дума еқа ԥэяса. И Анжела росԥэнэн: «Авелоп вушэро тэ дав дума пала латэ вэрыто и тэ обжав ла ригаса. Но мэ манглэм лэ Иеговас, кай во тэ поможый манди тэ полав кодэла ԥэя». Ашундя о Иегова ла Анжелатири молитва? Вой росԥэнэн: «Амэ жылям ласа андэ служэния, ай тоди дям дума на ек часо. Мэ драго ла виашунавас. Акана мэ май фартэ ла любисарав и фартэ камав ла тэ подритярав».
17. Со амэ камас тэ терас?
17 Амэ нэ можэм тэ ришаем, ко анда ԥрала и ԥэя затердя, кай амэ лэс тэ полас, ай ко най. Лэндэ всаворэндэ исин ԥаримос, кадяжэ сар када сас кай о Иона, о Илья, и Агарь и кай о Лото. Дэкала вонэ екжэнэ дошалэ андэ пэско ԥаримос. Но трэбуй тэ прижанас, кай дэкала кацаво жэ сас и амэнца. Акэ васо о Иегова ԥэнэн амэнди, тэ полас, со по ди ек еқэстэ (1 Петра 3:8). Кала амэ кандас лэ Иеговас, тоди амэ инке май фартэ аваса ек пала ек андэ амаро ери, саво ек па вся и люма и андэ саво разни ԥрала и ԥэя. Важ када виашунам амарэ ԥралэн и ԥэян, май драго уӷанам лэн и полам, со лэндэ по ди.
ДИЛИ 90 Подритярэн ек еқэс
a Важ кода кай амэ найсовершэни, амэ присытелям май йто тэ гиндосарас найдраго пала мануша и пала кода, васо вонэ закамлэ варисо тэ терэн. Ай «о Иегова диқэл оди» (1 Самуила 16:7). Андэ кадэя статья амэ подаса дума, сар во подритярэлас анда оди лэ Ионас, лэ Ильяс, ла Агаря и лэ Лотос. Када поможыя амэнди тэ полас лэ ԥралэн и лэ ԥэян кадя жэ, сар о Иегова.
b Иоанна 7:24: «Хутилэла тэ сындон па кода, со диқэн тумарэ яқа, ай сындон па чачимастэ».
c Иона 2:1, 2: «Кала о Иона сас лэ мащестэ андо йло, во мангляпэ пэстирэ Дэвлэсти лэ Иеговасти. Во ԥэндя: „Андэ бида мэ манглэмпэ лэ Иеговасти, и во ашундя ман. Анда ла моӷилако само ӷлубоко ҭан мэ ақардэм тэ дэс помощь, и ту ашундян мэрно ӷолосо“».
d Иона 2:9: «Ай мэ лэ алавэнца блаӷодарности анава тути жэртва. О алав, саво дэм, стерава. Спасения лэ Иеговастар».
e Бытие 16:7—13: «Через дэсави время лэ Иеговаско анӷело виарақля ла паша хаинг, паша хаинг па дром андо Сур. Во пушля: „Агарь, ла Саратири служанка, катар ту авелян и каринг жас?“ Вой ԥэндя пэ лэстирэ алава: „Мэ нашавтар мэрня ӷоспожатар, ла Саратар“. Лэ Иеговаско анӷело ԥэндя лати: „Рисав кай тири ӷоспожа и кандэ ла“. Тоди лэ Иеговаско анӷело ԥэндя: „Мэ дава тути скати бэятонэн, кай лэн на вижала дажэ тэ виадинон“. Лэ Иеговаско анӷело инке ԥэндя: „Тутэ авэла бэято, тутэ арақадёлапэ шаво. Дэ лэсти алав Измаило, важ кода кай о Иегова ашундя пала тири бида. Тиро шаво авэла, сар дыко ишако. Во авэла против всаворэ, и всаворэ авэна против лэстэ. Во жувэла паша всаворэ пэстирэ ԥрала“. Тоди вой ԥэндя лэ Иеговасти, саво дя дума ласа: „Ту Дэл, саво вся диқэл“, важ кода кай погиндосардя: „Хэба мэ диқлэм катэ кодэлэс, ко диқэл ман?“».
f Бытие 19:15, 16: «Кала ля тэ светлой, и анӷелоря линэ тэ грабисарэн лэ Лотос: „Май йто одындяр катар пэстиря хулая и лэ́дуен щеян, кай тути тэ на мэрэс важ о бэзэх кадэлэ фороско!“ Но во на грабияспэ, и, важ кода кай лэ Иеговасти во ашэля жалко, кодэла мануша линэ пала вас лэс, лэстиря хулая и лэ́дуен щеян и виандярдэ лэн анда форо».
g ПЭ КАРТИНКИ. Лэ ԥралэсти, саво андэ бэршэндэ, на чалёл, кай о тэрно ԥрал на авеля вовремя пэ собрания. Ӷэт май интя, во уӷанэн, кай о ԥрал попэля андэ авария.
h ПЭ КАРТИНКИ. О надзирателё андэ ӷруппа спэрва гиндой, кай и ԥэй на любий тэ диқэлпэ лэ мироса, но тоди во полэл, кай вой лажавни и лати на чалёл тэ авэл машкар о миро, савэс вой найдраго ӷанэн.
i ПЭ КАРТИНКИ. И ԥэй ақарэл пэстэ цэрэ авря ԥэя май драго тэ уӷанэн ла. И кадэя ԥэй поля, кай авэр ԥэй па чачимастэ найхолинатири и лати най вся всаек, сар здяпэ пэрво разо андо Зало Царства.