СТАТЬЯ, КАЙ ТЭ СЫТЮВАС 20
«Северно царё». Ко во адес?
«Лэсти [лэ севернонэ царёсти] авэла конец, и нико на поможыя лэсти» (ДАНИИЛ 11:45).
ДИЛИ 95 Свет становится ярче
ПАЛА СО УӶАНАСА АНДА СТАТЬЯ?a
1, 2. Пала со амэ уӷанаса анда кадэя статья?
АКАНА, амэ сар никала, драго диқас, кай жувас андэ послидни деса кадэла люмати. Йто о Иегова и о Иисус Христос стерэна кадя, кай на авэла ни ек правительства, савэ жан против лэ Дэвлэско Царство. Пока када на тердяпэ, о северно и о южно царё на парашэна тэ марэнпэ ек еқэса и тэ ӷонин лэ Дэвлэстирэ народос.
2 Анда кадэя статья амэ май драго поласа о пророчество, саво запистромэ андэ Даниила 11:40—12:1. Амэ уӷанаса, ко адес северно царё. Кадяжэ подаса дума, васо амэ можэм тэ авас спокойни и тэ патяс лэ Иеговасти, хоть и англэ авэла ԥаримос.
ПОЯВИЙПЭ НЭВО СЕВЕРНО ЦАРЁ
3, 4. Ко ашэля нэво северно царё? Росԥэнэн.
3 Андэ 1991 бэрш о Совецко Союзо роспэляпэ. Лэ Дэвлэстирэ народостэ, саво жувэлас котэ, пэ дэсави время появисайля свобода. О Даниило ԥэндя, кай кадэя свобода сас, сар «найбари помощь». Када сыкавэл, кай дэсави время лэ Дэвлэско народо моӷ свободно тэ росԥэнэн и тэ служый лэ Дэвлэсти (Даниил 11:34). Сас время, кала пала страны андэ Восточно и Центрально Европа, диқэлас о Совецко Союзо. Андэ кодэя время котэ лэ вазвещятелёнэн ашэля фартэ бут тысячи. Через дэсавэ бэрша и Россия и страны, савэ ла подритярэн, ашэлэ севернонэ царёса. Сар росԥэнэнаспэ андэ статья, сави прожылям пэ кодэва курко, амэ можэм тэ полас, ко о северно и ко о южно царё. Сар? Пэрво, кадэла царёря правин котэ, кай жувэн бут лэ Дэвлэстирэ служытеля, чи вонэ лэн ӷонин. Дуйто, кодэлэса, сар кадэла царёря пэс андярэн лэ Дэвлэстирэ служытелёнэнца, дицол, кай вонэ вэрыцын лэ чачунэ Дэвлэс лэ Иеговас и лэстирэ народос. Трито, кадэла царёря ритярэн бари холи ек пэ ек.
4 Подаса дума пала кода, васо амэ гиндосарас, кай адес о северно царё, када и Россия и страны, савэ ла подритярэн. Пэрво, кай кадэла страны запретин амари проповедническо дила и ӷонин бут тысячи амарэ ԥралэн и ԥэян, савэ жувэн андэ кадэла страны. Дуйто, кода, сар вонэ пэс андярэн, сыкавэл, кай вонэ вэрыцын лэ Иеговас и лэстирэ народос. Трито, кода, кай вонэ камэн тэ авэн май зоралэ чем о южно царё, Англо-Американско правительство. Уӷанам, сар кода, со терэл и Россия и страны, савэ ла подритярэн, доԥэнэн, кай вонэ северно царё.
О СЕВЕРНО И О ЮЖНО ЦАРЁ НА ПАРАШЭН ТЭ МАРЭНПЭ ЕК ЕҚЭСА
5. Пала сави время пистромэ андэ Даниила 11:40—43 и со терэлпэ андэ кадэя время?
5 Адиносар Даниил 11:40—43b. Андэ кадэва пророчество ԥэнэнпэ пала время, кала залэнпэ и послидни деса жы кай амарэ деса. Кадяжэ пала кода, сар о северно царё марэлпэ андэ кадэя время лэ южнонэ царёса. Сар и ԥэндя о Даниило, о южно царё на парашэл тэ марэлпэ лэ севернонэса (Даниил 11:40).
6. Сар лэдуй царёря марэнпэ ек еқэса?
6 О северно и о южно царё идоси марэнпэ пала кода, ко андар лэндэ тэ авэл май ӷлавно. Уӷанам, сар вонэ када терэнас посли Дуйто мирово война. О Совецко Союзо и страны, савэ лэс подритярэнас, получисардэ власть пэ бут страны андэ Европа. Через кода, со терэлас о северно царё, о южно царё закамля тэ стерэл военно союзо, андэ саво линэ тэ ужан дэсавэ страны. Пэ кадэва союзо ԥэнэн НАТО. Андэ войны, савэ сас андэ Африка, андэ Азия и андэ Латинско Америка, о северно царё подритярэлас кодэлэн, ко вороӷуияс лэ южнонэ царёса. Кадяжэ о северно и о южно царё тратин бут ловэ, кай кажно андар лэндэ тэ стерэл само бари и зорали армия. Инке о северно и о южно царё терэн вэрыто ек еқэсти через и компьютероря. Через и компьютерни проӷраммы вонэ терэн кадя, кай авэр тэ хасарэл ловэ. Андэ послидни бэрша и Россия и и страны, савэ ла подритярэн, ашэлэ со май зоралэ па вся и люма. Ай кадяжэ, сар ԥэндя о Даниило, о северно царё на парашэл тэ ӷоний лэ Дэвлэско народо (Даниил 11:41).
СЕВЕРНО ЦАРЁ ЗАЖАЛ АНДЭ «РАЙКАНИ ԤУВ»
7. Со када «Райкани ԥув»?
7 Андэ Даниила 11:41 пистромэ, кай о северно царё «зажала андэ Райкани ԥув». Со када за ԥув? Андэ дэлмутни время када сас о ҭан, кай жувэнас и израильтяноря. Кадэя ԥув сас со май шукарни анда всаворэ ԥувья (Иезекииль 20:6). Соса кадэя ԥув особенно? Важ кода кай кати котэ и мануша тэлёнас лэ Иеговасти. Но посли и Пятидесятница андо 33 бэрш лэ И. Х. линэ тэ тэлён лэ Дэвлэсти най кати пэ «Райкани ԥув». Васо? Важ кода кай адес лэ Иеговастирэ мануша жувэн па вся и люма. Адес и «Райкани ԥув», када лэ Иеговастири арӷанизацыя. И мануша андэр латэ служын лэ Иеговасти, кала авэн пэ собрании, кала росԥэнэн пала лэстэ аврэнди чи терэн авэр лэстири дила.
8. Со сыкавэл, кай о северно царё зажалас андэ «Райкани ԥув»?
8 Андэ время, кала залинэпэ и послидни деса, о северно царё най еқвар зажалас андэ «Райкани ԥув». Со сыкавэлас, кай во кордэ зажалас? Во ӷонияс и умарэлас лэ Дэвлэстирэ служытелёнэн. Када сас, кала лэ севернонэ царёса сас нацыско Германия. Ай май фартэ о северно царё када терэлас, кала сас и Дуйто мирово война. Кадяжэ о Совецко Союзо посли Дуйто мирово война, кала во ашэля северно царё, ля тэ ӷоний лэ Дэвлэстирэ служытелёнэн и тэ бишалэл лэн андэ ссылка.
9. Сар и Россия и страны, савэ ла подритярэн, зажылэ андэ «Райкани ԥув»?
9 Дэсавэ бэрша палпалэ о северно царё упалэ зажыля андэ «Райкани ԥув». Сар во кадя стердя? Андо 2017 бэрш и Россия заԥандадя и дила, сави терэл лэ Иеговаско народо и бэшардя андо баруно дэсавэ ԥралэн и ԥэян. Инке вой запретисардя амари литература и и «Библия. Нэвэ мироско переводо». Потом вой заля вся, со сас андэ российско филиало, ай кадяжэ всаворэ Залоря Царства и и Залоря важ и канӷрэсоря. Посли кода, сар вся када стердяпэ андо 2018 бэрш, о Руководящё совето поля, кай и Россия и страны, савэ ла подритярэн, када о северно царё. Но лэ Иеговастирэ мануша на камэн тэ жан против нисаво правительство. Вонэ на камэн нисо тэ терэн, кай тэ парувэн о правительство, дажэ кала кадэва правительство лэн ӷоний. Насупротив, лэ Иеговастирэ служытеля прилэн о библейско совето тэ мангэнпэ пала всаворэ, ко залэл бари положэния. Ай май фартэ тэ мангэнпэ, кала вонэ витидэн, можэт лэ Дэвлэско народо свободно тэ тэлён пэстирэ Дэвлэсти чи най (1 Тимофею 2:1, 2).
ПОБЕДИЯ О СЕВЕРНО ЦАРЁ ЛЭ ЮЖНОНЭ ЦАРЁС?
10. Победия о северно царё лэ южнонэ царёс чи най? Росԥэнэн.
10 Андо пророчество андэ Даниила 11:40—45 май бут дума жал пала северно царё. Сыкавэл када, кай во победия лэ южнонэ царёс? Най. О южно царё инке авэла, кала о Иегова и о Иисусо лэна тэ умарэн всаворэ правительства пэ ԥув андэ война Армагеддоно (Откровение 19:20). Васо амэ андэ када патяс? Диқам, со сас ԥэндо андэ пророчества, савэ запистромэ андэ книӷа Даниила и Откровение.
Лэ Дэвлэско Царство андо пророчество анда книӷа Даниила, када о бар. Кала авэла о Армагеддоно, кадэва бар розмарэла и статуя, сави сыкавэл всаворэ лэ манушэстирэ правлении. (Диқэн о абзацо 11.)
11. Со можэм тэ полас анда книӷа Даниила 2:43—45? (Диқэн и картинка пэ обложка.)
11 Адиносар Даниил 2:43—45c. О пророко Даниило пистрой пала фартэ бари статуя, савятэ штар части и вонэ стердэ анда разно металло. Кадэла части сыкавэн особи правительства, савэ парувэн ек еқэс, и пэ лэндири ԥув жувэн бут лэ Дэвлэстирэ служытеля. Кадэла правительства правинас андэ разно время. Пала послиднё мирово правительство пистромэ, кай во, сар и талпы и и ная анда састри и ӷлина. Када Англо-Американско мирово правительство и во авэла послиднё. Када сыкавэл, кай кадэва правительство всаек инке правия, кала лэ Дэвлэско Царство розмарэла всаворэ лэ манушэндирэ правительства.
12. Со сыкавэл о седьмо лэ зверёско шэро и васо амэ трэбуй када тэ ӷанас?
12 О апостоло Иоанно кадяжэ пистрой пала мирови правительства, кай жувэл лэ Иеговаско народо. О Иоанно ԥэнэн, кай кадэла правительства, сар зверё, савэстэ семь шэрэ. Седьмо лэ зверёско шэро, када Англо-Американско мирово правительство. Када амэ трэбуй тэ ӷанас. Важ кода кай андо пророчество на ԥэнэнпэ, кай лэ зверёстэ авэна инке авэр шэрэ. О седьмо лэ зверёско шэро инке правия андэ кодэя время, кала о Христос и лэско небесно войско, лэла тэ умарэл кадэлэ зверёсd (Откровение 13:1, 2; 17:13, 14).
СО О СЕВЕРНО ЦАРЁ ЙТО СТЕРЭЛА?
13, 14. а) Ко када «о Гого па ԥув Магого»? б) Васо, файма, во закамэла тэ дэл по лэ Дэвлэско народо?
13 Исин инке ек книӷа андэ Библия, кай запистромэ и пророчества. Када книӷа Иезекииль. Андэр латэ пистромэ, со можэт тэ авэл англа кода, кала о северно и о южно царё будэр на авэна. Если амэ диқаса и пророчества, савэ запистромэ андэ Иезекииль 38:10—23; Даниил 2:43—45; 11:44—12:1 и Откровение 16:13—16, 21, амэ поласа, кай котэ ԥэнэнпэ пала ек время. Важ када амэ можэм тэ полас, со трэбуй тэ аштярас англэ.
14 Через дэсави время посли кода, сар залэлапэ и бари бида, «и царёря всаворя ԥувьятирэ», стерэна коалицыя нацый (Откровение 16:13, 14; 19:19). И Библия пэр латэ ԥэнэн «о Гого па ԥув Магого» (Иезекииль 38:2). Кадэя коалицыя нацый дэла по лэ Дэвлэско народо и стола вся пэско зор, кай лэс будэр тэ на авэл. Васо кадя авэла? Кала о апостоло Иоанно пистрояс пала кадэя время, во ԥэндя, кай пэ Дэвлэстирэ вороӷоря пэрэла «баро ӷрадо» (Откровение 16:21). Кадэва ӷрадо можэт тэ сыкавэл фартэ строӷо приӷоворо, пала саво лэна тэ ԥэнэн лэ Иеговастирэ служытеля. Файма, важ када о Гого па ԥув Магого дэла по лэ Дэвлэско народо, кай тэ сқосэл лэн па вся и ԥув.
15, 16. а) Пала сави время, файма, дэлпэ дума андэ Даниила 11:44, 45? б) Со авэла лэ севернонэ царёса и кодэлэнца, ко ужал андо Гого анда Магого?
15 Файма, пала время, кала лэна тэ ԥэнэн о фартэ строӷо приӷоворо и пала кода, кала дэна по лэ Дэвлэско народо, запистромэ андэ Даниила 11:44, 45e (адиносар). Котэ ԥэнэнпэ, кай «котар, кай ваздэлпэ о қам и па северо авэна вести, савэ лэс пэрэдаравэна [лэ севернонэ царёс], и во вижала баря холяса, кай тэ умарэл и тэ стрий бутэн». О алав «бутэн», файма, катэ сыкавэл лэ Иеговастирэ служытелёнэн. О Даниило, файма, катэ пистрой пала время, кала послиднё разо баря холяса дэна по лэ Дэвлэско народоf.
16 Кала дэла о северно царё и авэр правительства по лэ Дэвлэско народо, када фартэ холярэла лэ Иеговас. Тоди залэлапэ и война Армагеддоно (Откровение 16:14, 16). И лэ севернонэ царёсти и аврэ народонэнди, пэ савэ андэ Библия ԥэнэнпэ о Гого анда Магого, авэла конец, и нико на поможыя лэнди (Даниил 11:45).
Андэ война Армагеддоно о Иисусо и лэско небесно войско умарэна лэ найлашэ мирос, саво кандэл лэ Сатанас и спасына лэ Дэвлэстирэ народос (Диқэн о абзацо 17.)
17. а) Ко када о «баро князё» о Михаило, пала саво пистромэ андэ Даниила 12:1? б) Со во терэл акана и со во йто стерэла?
17 Адиносар Даниил 12:1g. Кадэва стихо анда пророчество Даниила поможыя амэнди май бут тэ уӷанас, сар авэна умардэ о северно царё и авэр правительства. Ай кадяжэ пала кода, сар амэн спасына. Пала со дэлпэ дума андэ кадэва стихо? О Михаило, када инке ек алав лэ Иисусоско, амарэ царёско, саво правий. Во «зашолпэ» пала лэ Дэвлэско народо лэ 1914 бэршэстар, кодэла времятар, кала ашэля царёса андо небесно Царство. Йто во упалэ зашолапэ пала лэ Дэвлэско народо андэ война Армагеддоно, кала умарэла всаворэн пэстирэ вороӷонэн. Посли кадэя война кончияпэ само ԥари время, сави сас андэ лэ манушэндири жызня, пала сави и пистросардя о Даниило. Андо пророчество Иоанна, саво запистромэ андэ Откровение, пэ кадэя время ԥэнэнпэ «само бари бида» (Откровение 6:2; 7:14).
АВЭЛА ТУМАРО АЛАВ ЗАПИСТРОМЭ АНДЭ КНИӶА ЧИ НАЙ?
18. Васо амэ можэм тэ на дарас кодэлэстар, со авэла англэ?
18 Амэ можэм тэ на дарас кодэлэстар, со авэла англэ. Важ кода кай о Даниило и о Иоанно запистросардэ, кай андэ само бари бида о Иегова и о Иисусо спасына пэстирэ служытелёнэн. О Даниило ԥэндя, кай «спасыяпэ кажно, ко запистромэ андэ книӷа» (Даниил 12:1). Со амэнди трэбуй тэ терас, кай амаро алав тэ авэл запистромэ андэ кадэя «книӷа»? Амэ трэбуй тэ доԥэнас, кай амэ патяс андо Иисусо, андэ лэ Дэвлэско Бакроро (Иоанна 1:29). Амэнди трэбуй тэ дас алав лэ Иеговасти тэ жувас важ лэстэ и тэ болдювас (1 Петра 3:21). Ай инке амэ трэбуй тэ подритярас ла диласа лэ Дэвлэско Царство и тэ терас вся, кай тэ поможысарас аврэнди тэ уӷанэн пала Иегова.
19. Со амэ трэбуй тэ терас ужэ акана и васо?
19 Акана само вой и время, кай тэ терас вся, кай май фартэ тэ патяс лэ Иеговасти и лэстиря арӷанизацыяти. Акана время тэ сыкавас пэ дила, кай подритярас лэ Дэвлэско Царство. Кати кадя амэ сможэм тэ спасысавас, кала о Царство лэла тэ умарэл лэ севернонэ и южнонэ царёс.
ДИЛИ 149 Песня победы
a Ко адес «северно царё» и сар авэла лэско конец? И атветоря пэ кадэла вопросоря поможына, кай амэ май фартэ тэ патяс лэ Иеговасти и тэ подӷотовимся каринг и само бари бида, сави авэла англэ.
b Даниил 11:40—43: «Кала жана и послидни деса, о южно царё лэла тэ марэлпэ лэса, и о северно царё жала пэр лэстэ лэ вурдонэнца важ и война и лэ всадниконэнца, и бутэ кораблёнэнца. Во зажала андэ ԥувья, и зындярэла вся, сар о потопо. Во кадяжэ зажала андэ Райкани ԥув и бут ԥувья во захутилэла. Но лэстирэ вастэстар спасынапэ о Эдомо, о Моаво и ӷлавни анда амонитяноря. Во на парашэла тэ процырдэл пэско вас пэ ԥувья. На спасыяпэ и о Египто. Во лэла тэ хулаий загарадэ барвалимаса, када о сомнак и о руп, и всаворэса, со кучутно андо Египто. Ай пала лэстэ жана и ливийцоря и и эфиопоря».
c Даниил 2:43—45: «Ту диқлян о састри, саво пэрэӷамисардо ла ковля ӷлинаса. Кадя и вонэ стидэнапэ лэ манушэнца. Но вонэ всаек на ашэна еқэндар, сар о састри на ашэл еқэндар ла ӷлинаса. И андэ деса, кала правина кодэла царёря, о Дэл, саво по нэбо, стола царство, саво никала на авэла розмардо. Кадэва царство на авэла пэрэдино аврэ народости. Во розмарэла всаворэ кадэла царстворя и стерэла кадя, кай лэн будэр на авэла, ай екжэно авэла тэ тердёл вечно. Кадяжэ ту диқлян, кай о бар екжэно отшынделяпэ лэ плаестар и розмардя о састри, и о харкум, и ӷлина, и о руп и о сомнак. О само баро Дэл дя лэ царёсти тэ ӷанэн, со авэла англэ. Кадэва суно чачуно, и кода, со снисайля, авэла точно кадя, сар сас ԥэндо».
d Май бут пала кадэва пророчество анда Даниила 2:36—45 и Откровение 13:1, 2 можэм тэ уӷанас андэ «Сторожэво башня» лэ 15 июнёстар пала 2012 бэрш андэ статьи «О Иегова, када Дэл, саво ԥэрнавэл и тайны», «Ко када восемь царёнэн?», «О Иегова ԥэрнавэл „со йто трэбуй тэ авэл“», «Пушэн кодэла, ко адинон».
e Даниил 11:44, 45: «Но котар, кай ваздэлпэ о қам и па северо авэна вести, савэ лэс пэрэдаравэна [лэ севернонэ царёс], и во вижала баря холяса, кай тэ умарэл и тэ стрий бутэн. Во стола пэстирэ царски катуны машкар фартэ бари моря и о свынто плай, саво пэ Райкани ԥув. Лэсти [лэ севернонэ царёсти] авэла конец, и нико на поможыя лэсти».
f Май бут пала када можэм тэ уӷанас андэ «Сторожэво башня» лэ 15 маёстар пала 2015 бэрш, страницы 29—30.
g Даниила 12:1: «Андэ кодэя время ваздэлапэ о баро князё, о Михаило, саво зашолпэ пала тиро народо. И авэла фартэ ԥари время, сави на сас кодэла времятар, сар появисайлэ и мануша. Андэ кодэя время тиро народо спасыяпэ, спасыяпэ кажно, ко запистромэ андэ книӷа».