Тэ ритярас пэс андэ вас. О Иегова на авэла лошало, если амэ кадя на тераса

«Еқвар ек анда мэрно родо ля манца тэ спорийпэ. Тоди мэ хутилдэм лэс коратар и лэм тэ тасавав. Манди камэласпэ лэс тэ умарав» (Пэтя).

«Цэрэ мэ росхолявавас просто кадя. Мэ росԥагавас и мебель, ԥагавас лэ бэятонэнди иӷрушки и вся, со попэрдёлас манди тала вас» (Марко).

Амэ, файма, кадя на росхолявас, но амэнди всаворэнди найвушэро тэ ритярас пэс андэ вас. И ӷлавно, васо амэнди ԥарэс тэ зритярдювас, када через о бэзэх, саво амэнди пэрэдяпэ через о пэрво мануш, о Адамо (Римлянам 5:12). Варикасти, сар лэ Пэтясти и лэ Маркости, ԥарэс тэ ритярэн пэс андэ вас. Авэр на парашэн тэ гиндон пала кода, состар вонэ даран чи пала кода, состар ашэл ԥарэс по ди. Ай варикасти вся и время авэл андо шэро гиндо, кай тэ стерэл о билажавардимос, тэ камэл тэ пэл чи тэ прилэл и наркотикоря.

О мануш, саво на ӷанэн тэ ритярэл пэс андэ вас, можэт тэ римой пэстири жызня. Со тэ терас, кай кадя тэ на авэл? Амэ трэбуй тэ сытювас май драго тэ ритярас пэс андэ вас. Када кати ек качество, саво о свынто духо поможый, кай тэ авэл амэндэ (Галатам 5:22, 23). Важ када подаса дума пала трин вопросоря. Пэрво, сар када тэ ритярас пэс андэ вас? Дуйто, васо када кадя важно? И трито, со амэ тэ терас, кай май драго тэ зритярдювас? Кадяжэ погиндосараса, со тэ терас, кала амэндэ дэкала на вижал тэ ритярас пэс андэ вас.

САР ТЭ РИТЯРАС ПЭС АНДЭ ВАС?

О мануш, саво ритярэл пэс андэ вас, на холявэл пэ вся, со лэсти на чалёл. Во на дэл дума и на терэл кода, со холярдоп лэ Дэвлэс.

О Иисусо драго сыкадя, сар тэ ритярас пэс андэ вас. Андэ Библия пистромэ: «Кала пэр лэстэ хохавэнас и цыпинас, во на рияс палпалэ. Кала лэсти сас ԥарэс, во на даравэлас никас, ай ашавэлас када вся кодэлэсти, ко сындой па чачимастэ» (1 Петра 2:23). О Иисусо зритярдя пэс дажэ тоди, кала висияспэ по столбо и кала лэстар асанаспэ и вороӷоря (Матфея 27:39—44). Во кадяжэ зритярдя пэс андэ вас, кала и книжникоря и фарисеёря «доԥэнделэпэ, кай тэ приастарэн лэс по алав» (Матфея 22:15—22). Ай сар дэ драго стердя о Иисусо, кала и иудеёря холяса камэнас тэ зашон лэс барэнца! Во на ля тэ рий лэнди, ай «гараделяпэ лэндар, ай тоди ужыля анда храмо» (Иоанна 8:57—59).

Можэм и амэ тэ терас кадя жэ, сар о Иисусо? Можэм, но най андэ вся. Хоть амэ и найсовершэни, амэ стас зор, кай тэ терас точно, сар о Иисусо и тэ ритярас пэс андэ вас. Васо када важно? О апостоло Пётро пистросардя: «О Христос пэрэандярдя о ԥаримос важ тумэндэ. Во сыкадя тумэнди, сар тэ терэн, кай тумэ кадяжэ тэ уштавэн котэ, кай во уштадя» (1 Петра 2:21).

ВАСО ВАЖНО ТЭ РИТЯРАС ПЭС АНДЭ ВАС?

Амэнди трэбуй тэ ритярас пэс андэ вас, кай амэ тэ авас лашэ англа лэ Иеговастирэ яқа. Дажэ если амэ ужэ бут бэрша служысарас лэ Иеговасти, амэ можэм тэ хасарас и дружба лэса, если на ласа тэ диқас пала пэстири дума и пала кода, сар пэс андярас.

Сгиндосарам пала Моисеё, савэстэ сас «со май ковло ди анда всаворэ мануша пэ ԥув» (Числа 12:3). Бут бэрша во на грабияспэ тэ холявэл и виашунэлас, со на чалёлас лэ израильтянонэнди. Но еқвар во на зритярдя пэс андэ вас. О Моисеё росхоляйля, кала и израильтяноря упалэ линэ тэ ровэнпэ, кай лэнди на хутилэл о паи. Во ԥэндя лэнди холяса: «Ашунэн ман, кодэла, ко звазглэпэ! Амэнди анда кадэва плай тэ дас тумэнди паи?» (Числа 20:2—11).

О Моисеё на зритярделяпэ. Во на отдя и слава лэ Иеговасти важ и чуда, кай жыля о паи (Псалом 106:32, 33). Важ када о Иегова на домэкля лэс тэ зажал андэ Обетованно ԥув (Числа 20:12). Файма, о Моисеё вся и жызня дошалярэлас пэс, важ кода кай кодэва разо во на зритярделяпэ (Второзаконие 3:23—27).

Сости амэн сытярэл кода, со сас лэ Моисеёса? Дажэ кала амэ дэлмут ӷанас о чачимос, амэнди никала нащи найпативалэс тэ дас дума кодэлэнца, ко амэн холярэл чи кодэлэнца, ко андярэл пэс найдраго (Эфесянам 4:32; Колоссянам 3:12). Чаче, кала амэ ԥурювас чи амаро зор ашэл май хужэ, тэ ритярас пэс андэ вас ашэл май ԥарэс. Но трэбуй тэ сэрас вся и время пала Моисеё. Амэ на камас тэ хасарас амари лащи дружба лэ Иеговаса, важ кода кай на зритярдюваса. Со амэ трэбуй тэ терас, кай май драго тэ ритярас пэс андэ вас?

СО АМЭ ТЭ ТЕРАС, КАЙ МАЙ ДРАГО ТЭ ЗРИТЯРДЮВАС?

Мангэнпэ пала свынто духо. Состэ? О свынто духо поможый, кай тэ авэн лашэ качестворя. Ек анда кадэла качестворя, када тэ ритярас пэс андэ вас. И кала амэ мангас кадэва качество лэ Иеговастар, во дэл амэнди лэс (Луки 11:13). О Иегова через пэско свынто духо дэл амэнди зор, саво поможый амэнди тэ ритярас пэс андэ вас (Филиппийцам 4:13). Кадяжэ о свынто духо поможый, кай амэндэ тэ вижал май драго тэ сыкавас и авэр качестворя, ай кадяжэ и любовь. Через кадэла качестворя амэндэ май драго вижала тэ ритярас пэс андэ вас (1 Коринфянам 13:5).

Ритярдён май дур всаворэстар, со на дэл тумэнди тэ ритярэн пэс андэ вас. На зажан пэ сайторя, кай тумэ можэте тэ додиқэн варисо билажавардо. Терэн вся, кай тумэндэ тэ на авэн развличении, андэ савэ лащя ригатар сыкавэн кода, со на чалёл лэ Дэвлэсти (Эфесянам 5:3, 4). Трэбуй тэ фэрисавас всаворэстар, со можэт тэ анэн каринг о найлашимос (Притчи 22:3; 1 Коринфянам 6:12). О мануш, саво можэт вушэро тэ стерэл варисаво билажавардимос, можэт тэ витидэл важ пэстэ, кай лэсти совсем на трэбуй тэ адиной и книжки и тэ диқэл кино пала любовь.

Тэ терас кадя можэт и найвушэро. Но если амэ пэстиря ригатар стаса вся о зор, кай тэ зритярдювас, тоди о Иегова дэла амэнди пэско зор (2 Петра 1:5—8). Во поможыя амэнди тэ зритярас пэстирэ гиндоря, и алава и дила. Кадя сас лэ Маркоса и лэ Пэтяса, пала савэ ԥэнэнаспэ май англал андэ статья. Вонэ сытелэ тэ зритярэн пэстири холи. Акэ со сас еқэ ԥралэса, саво часто вижалас андар пэстэ, кала ладэлас пала рулё и дажэ спорияспэ аврэ водителёнэнца. Со во стердя? Во росԥэнэн: «Мэ кажно дес фартэ мангаваспэ. Мэ адиносаравас и статьи пала кода, кай тэ зритярдював и пэ кадэя тема ритяравас андо гиндо стихоря анда Библия. Хоть мэ када терав ужэ най ек бэрш, мэ всаек кажно тэсара ԥэнав пэсти, сар важно тэ авав спокойно. Ай инке мэ терав вся, кай май рано тэ виладав анда цэр, кай никаринг тэ на грабисавав».

СО ТЭ ТЕРАС, КАЛА НА ВИЖЫЛЯ ТЭ ЗРИТЯРДЮВАС?

Дэкала амэндэ на вижал тэ ритярас пэс андэ вас. Кала на зритярделямпэ, амэнди можэт тэ авэл фартэ лажаво тэ мангаспэ лэ Иеговасти. Но андэ кадэя время амэнди и трэбуй тэ мангаспэ со май фартэ. Важ када май йто мангэнпэ лэ Иеговасти. Фартэ мангэн лэс, кай тэ простий тумэн, мангэн помощь и старыинпэ никала тэ на терэн кадэя ошыбка (Псалом 51:9—11). На гиндон, кай о Иегова тумэн на ашунэла (Псалом 102:17). О Иоанно ԥэнэн амэнди, кай о рат лэ Дэвлэстирэ Шавэско «терэл, кай амэ тэ авас вужэ всаворэ ӷрехонэндар» (1 Иоанна 1:7; 2:1; Псалом 86:5). Сэрэн, кай о Иегова ԥэнэн амэнди, кай амэ тэ простисарас аврэн, дажэ если вонэ холярдэ амэн най еқвар. Важ када амэ можэм тэ патяс, кай и о Иегова простия амэн най еқвар (Матфея 18:21, 22; Колоссянам 3:13).

Лэ Иеговасти на чалеля, кай о Моисеё на зритярделяпэ. Но во лэс простисардя. И андэ Библия ԥэнэнпэ, кай о Моисеё фартэ патялас лэ Дэвлэсти (Второзаконие 34:10; Евреям 11:24—28). Хоть о Моисеё через пэстири ошыбка на зажыля андэ Обетованно ԥув, но йто о Иегова рия лэс каринг и жызня андо раё пэ ԥув и подария лэсти вечно жызня. И амэ жуваса андо раё пэ ԥув, если амэ стаса зор, кай май драго тэ ритярас пэс андэ вас (1 Коринфянам 9:25).