На гиндосар пала пэстэ бут, кала служыс лэ Иеговасти

1. Со ԥэндя о Давидо пала кода, кай о Иегова найӷордо?

ПО ИЕГОВА ԥэнэса, кай во найӷордо? Канешно. О Давидо еқвар ԥэндя: «Ту дэс манди тиро щито, кай тэ фэрис ман, и важ кода кай ту найӷордо, ту стердян кадя, кай пэр мандэ тэ стон бари патив» (2 Самуила 22:36; Псалом 18:35). Кала во ԥэндя кадэла алава, файма, о Давидо гиндояс пала дес, кала андэ лэстирэ дадэско цэр авеля о пророко Самуило. О Дэл ԥэндя лэ Самуилости тэ витидэл, ко авэла нэвэ царёса андо Израилё. Анда всаворэ ԥрала, савэн сас восемь, о Давидо сас само цыкно. Но о Иегова витидя лэс, кай во тэ авэл царёса вместо Сауло (1 Самуила 16:1, 10—13).

2. Пала со амэ подаса дума андэ кадэя статья?

² О Давидо авелоп соӷласно кодэлэса, со пистросардя пала Иегова, ек анда псалмопевцоря: «Во тэлёл, кай тэ диқэл по нэбо и пэ ԥув, тэ ваздэл лэ чорорэс анда лэско ԥаримос. Во ваздэл кодэлэс, ко слабо... кай во тэ бэшэл лэ ашунглэ манушэнца анда лэско народо» (Псалом 113:6—8). Андэ кадэя статья амэ подаса дума, андар со дицол, кай о Иегова найӷордо и сости амэ можэм тэ сытювас лэстар. Ай кадяжэ, сости амэ можэм тэ сытювас па кода, со сас андэ жызня кай о царё Сауло, кай о пророко Даниило и кай о Иисусо, кай тэ на гиндосарас пала пэстэ бут.

СОСТИ АМЭ СЫТЮВАС КАЙ О ИЕГОВА?

3. Сар о Иегова андярэл пэс амэнца, и со када сыкавэл?

³ Кай о Иегова найӷордо дицол андэ кода, сар во пэс андярэл пэстирэ служытелёнэнца, савэ найсовершэни. Во най кати домэкэл тэ служысарас лэсти, но и диқэл пар мэндэ, сар пэ пэстирэ друӷоря (Псалом 25:14). Во стердя пэрво шаго, кай амэ лэса тэ дружысарас. О Иегова отдя пэстирэ Шавэс пала амарэ ӷрехоря. Сар дэ драго, кай амэндэ кацаво Дэл, саво жалуий и полэл, со амэндэ по ди!

4. Со амэнди дя о Иегова и васо?

⁴ Погиндосарам, андар со инке дицол, кай о Иегова найӷордо. Во нэ создал амэн, кай тэ авас, сар роботоря, савэ вся и время терэн кода, со во камэл. Во создал амэн, кай тэ авас кацавэ жэ, сар во, и дя амэнди екжэнэнди тэ витидас, сар тэ жувас. И если тэ сыстосарас амэн лэ Иеговаса, амэ фартэ цынёне. Но во всаек шол сама пэ кода, со амэ витидас андэ пэстири жызня. Во камэл, кай амэ тэ служысарас лэсти, важ кода кай любисарас лэс, ай кадяжэ важ кода, кай полас, кай если кандас лэс, када анэн амэнди лашимос (Второзаконие 10:12; Исаия 48:17, 18). Амэ фартэ блаӷодарни лэ Иеговасти, важ кода кай во найӷордо!

5. Сар о Иегова сытярэл амэн кодэлэсти, кай амэ тэ на авас ӷорди? (Диқэн и картинка пэ обложка.)

⁵ О Иегова найӷордо и во сытярэл кадэлэсти и амэн. Во со май мудро анда всаворэ, но во всаек камэл тэ терэл дила аврэнца и шол сама пэ кода, со вонэ гиндон. Во домэкля пэстирэ Шавэс тэ терэл лэса дила, кала во создавал и Люма (Притчи 8:27—30; Колоссянам 1:15, 16). Хоть кай о Иегова со май баро зор, во всаек дэсо анда пэстири дила, дэл тэ терэн аврэнди. Кадя во стодя лэ Иисусос тэ авэл Царёса андо небесно Царство и дя власть лэ муршэнди и лэ жувлянди, савэн 144 000 и савэ лэна тэ правин лэса (Луки 12:32). Канешно, англа кода, сар о Иегова тэ стол лэ Иисусос Царёса и Пэрвосвященикоса, во лэс сытярэлас (Евреям 5:8, 9). Кадяжэ во сытярэл кодэлэн, ко лэла тэ правий лэса, но во на лэла тэ следий пала кажно лэнго шаго. О Иегова патял, кай вонэ стерэна вся, сар во када аштярэл (Откровение 5:10).

6, 7. Сар о Иегова сытярэл амэн тэ дас аврэнди тэ терэн дэсави дила, сави терас амэ?

⁶ Если амарэ небеснонэ Дадэсти на трэбуй никастири помощь, но всаек дэл аврэнди тэ терэн дэсо анда пэстири дила, тоди, канешно, и амэнди трэбуй кадя тэ терас. О хулай андо ери и старейшыноря терэн сар о Иегова, кала дэн аврэнди тэ терэн дэсо анда пэстири дила. Ай кадяжэ вонэ старыинпэ тэ на следин пала кажно лэнго шаго. Блаӷодаря кадэлэсти най кати вся и дила авэла стерди, ай инке можно тэ сытярэс аврэн тэ терэн варисо нэво. Када поможыя лэнди тэ патян, кай лэндэ вижала тэ стерэн кадэя дила (Исаия 41:10). Ай сости моӷут тэ сытён кай о Иегова кодэла, кастэ исин власть?

⁷ Анда Библия дицол, кай о Иегова шол сама пэ кода, со гиндон лэстирэ шавэ, и анӷелоря (1 Царей 22:19—22). Дада и дэя, сар тумэ можэте тэ сытён кай о Иегова? Дэкала можно тэ пушэн лэ бэятонэндар, сар па лэндирятэ авелоп фэдэр тэ стерэн варисави дила. Если вонэ ԥэнэн лашо гиндо, стерэн кадя.

8. Сар о Иегова сыкадя, кай на грабийпэ тэ холявэл по Авраамо и пэ Сарра?

⁸ Кай о Иегова найӷордо дицол андэ кода, кай во на грабийпэ тэ холявэл. О Иегова на грабийпэ тэ холявэл пэ пэстирэ служытеля, кала вонэ пативалэс ԥэнэн лэсти, кай на допатян, кай кода, со во камэл тэ стерэл, правильно. Кала о Авраамо пэрэжывал, кай о Иегова камэл тэ сԥабарэл о Содомо и Гоморра, о Дэл драго лэс виашундя (Бытие 18:22—33). Ай сэрэн, сар о Иегова андярдя пэс ла Авраамостиря хулаяса, ла Сарраса? Вой розасаяпэ, кала ашундя, кай о Иегова дя алав, кай андэ ԥурэ бэрша латэ арақадёлапэ шаво. Но о Иегова на холяйля пэр латэ (Бытие 18:10—14). Во стодя патив пэ Сарра.

9. Сости сытён лэ Иеговастар и родителя, ай кадяжэ старейшыноря?

⁹ Дада и дэя, ай кадяжэ и старейшыноря, сости тумэ сытён кай о Иегова? Сар тумэ андярэн пэс, кала лэ бэятонэнди чи лэ ԥралэнди и лэ ԥэянди анда собрания на чалёл кода, со тумэ витидэ тэ терэн? Тумэ сразу доԥэнэн, кай тумэ прави? Чи тумэ камэн тэ полэн, васо лэнди на чалёл кода, со тумэ витидэ? Если кодэла, кастэ исин власть андо ери чи андэ собрания, сытён кай о Иегова, када анэна лашимос кажнонэ ерести, и андэ всаворэ собрании. Акэ, амэ подям дума, сар лэ Иеговаско примеро сытярэл амэн, кай амэ тэ на авас ӷорди. Ай акана погиндосараса, сости амэн сытярэн авэр примероря анда Библия, кай амэ тэ на гиндосарас пала пэстэ бут.

СОСТИ АМЭ МОЖЭМ ТЭ СЫТЮВАС АВРЭНДАР?

10. Сар о Иегова сытярэл амэн через и Библия?

¹⁰ О Иегова, амаро Само Баро Учителё, сытярэл амэн инке па авэр примероря, савэ запистромэ андэ Библия (Исаия 30:20, 21). Амэ можэм бут сости тэ сытювас лэ манушэндар, пала савэ запистромэ андэр латэ. Лэндэ сас качестворя, савэ чалён лэ Дэвлэсти, и вонэ на гиндонас пала пэстэ бут. Ай кадяжэ уӷанаса пала мануша, савэндэ на сас кадэла качестворя (Псалом 37:37; 1 Коринфянам 10:11).

11. Сости амэн сытярэл кода, со сас лэ Саулоса?

¹¹ Погиндосарам, со сас лэ Саулоса, саво сас царё. Андэ тэрнэ бэрша во на гиндояс пала пэстэ бут. Во полэлас, кай лэсти най вся можно тэ терэл и дажэ даралас тэ лэлпэ тэ терэл бари дила (1 Самуила 9:21; 10:20—22). Но прожыля время, и о Сауло ашэля ӷордо и ля тэ терэл кода, со лэсти сас нащи. Када ля тэ дицол йто посли кода, сар во ашэля царёса. Еқварэс во сыкадя, кай во на ӷанэн тэ аштярэл. Када сас, кала лэсти трэбуй сас тэ доаштярдёл лэ пророкос лэ Самуилос. Лэ Саулости трэбуй сас тэ полэл, кай лэсти най вся можно тэ терэл и тэ патял, кай о Иегова зашолапэ пала пэско народо. Ай вместо када во андя и жэртва, хоть лэстэ пэ када на сас нисаво право. Вижыля кадя, кай через када о Сауло хасардя и дружба лэ Иеговаса, ай кадяжэ парашэля тэ авэл царёса (1 Самуила 13:8—14). Кода, со сас лэ Саулоса, сытярэл амэн, кай нащи тэ авас ӷорди!

12. Андэр со дицолас, кай о Даниило на заваздэлас о шэро?

¹² О пророко Даниило на шоласпэ по Сауло и лэстар амэ можэм тэ сытювас. Во вся пэстири жызня сас лэ Иеговастирэ служытелёса, саво на гиндояс пала пэстэ бут и вся и время мангэлас лэстар совето. Еқвар о Иегова поможысардя лэ Даниилости тэ росԥэнэн, со сыкавэл о суно, саво диқля о Навуходоносоро. Но о пророко на ԥэндя, кай во екжэно поля о суно. Ай ԥэндя, кай када стердя о Иегова (Даниил 2:26—28). Сости амэ сытювас анда када? Если лэ ԥралэнди и лэ ԥэянди чалёл, сар амэ дас дума па сцена чи амэндэ исин бут интересни случаёря андэ служэния, тоди амэнди трэбуй тэ сэрас, кай вся када лэ Иеговастар. Если амэ на гиндосарас пала пэстэ бут, када поможыя амэнди тэ полас, кай амэндэ нисо на вижылоп тэ стерас би лэ Иеговастирэ зорэско (Филиппийцам 4:13). Кала амэ кадя терас, амэ шаспэ инке и по Иисусо, саво сыкадя райкано примеро.

13. Сости амэн сытярэн лэ Иисусостирэ алава, савэ запистромэ андэ Иоанна 5:19, 30?

¹³ Хоть о Иисусо сас совершэно лэ Иеговаско Шаво, всаек во вся и время терэлас кадя, сар камэл о Дад. (Адиносар Иоанна 5:19b, 30c.) Во никала на камэлас, кай лэстэ тэ авэл кацави жэ власть, сар кай о Иегова. Андэ Филиппийцам 2:6 ԥэнэнпэ, кай о Иисусо «на гиндояс, кай тэ сыстойпэ лэ Дэвлэса». О Иисусо сас кацаво Шаво, саво кандэлас. Во полэлас, кай лэсти най вся можно тэ терэл и столас патив пэ власть, сави сас кай лэско Дад.

14. Со стердя о Иисусо, кала лэс манглэ тэ стерэл кода, со лэсти нащи сас тэ терэл?

¹⁴ Сэрэн, со ԥэндя о Иисусо, кала о Иаково, о Иоанно и лэндири дэй манглэ лэс тэ стерэл кода, со лэсти нащи сас тэ терэл? О Иисусо долӷо на гиндосардя и ԥэндя, кай, ко авэла андо небесно Царство пэ право риг лэстар, ай ко пэ лево, можэт тэ ришый кати лэско Дад (Матфея 20:20—23). Кадя о Иисусо сыкадя, кай полэл, кай лэсти най вся можно тэ терэл. Во на гиндояс пала пэстэ бут и никала на терэлас кода, со о Иегова лэсти на дэлас (Иоанна 12:49). Сар амэ можэм тэ сытювас кай о Иисусо?

15, 16. Сар тэ терас кадя, сар запистромэ андэ 1 Коринфянам 4:6?

¹⁵ Амэ шаспэ по Иисусо, саво на заваздэлас о шэро, кала терас, сар пистромэ андэ Библия: «Тумэ трэбуй тэ терэн кати кода, со пистромэ андэ Писания» (1 Коринфянам 4:6). Важ када, кала амэндар мангэн тэ подԥэнас варисо, амэ на камас тэ дас совето пэстар и на камас тэ грабисавас тэ ԥэнас пэрво, со дэл андо шэро. Вместо када амэнди трэбуй тэ шас сама пэ советоря анда Библия и анда амари литература. Кадя амэ сыкаваса, кай на гиндосарас пала пэстэ бут и нэ можэм тэ ӷанас и атветоря пэ всаворэ вопросоря. Ай кадяжэ сыкаваса, кай лэ Дэвлэстирэ советоря всегда май лашэ, чем амарэ (Откровение 15:3, 4).

¹⁶ Кала амэ на гиндосарас пала пэстэ бут, кадэлэса амэ прославляем лэ Иеговас, но исин инке васо трэбуй кадя тэ терас. Подам дума сар кода, кай амэ на заваздас о шэро, поможыя амэнди тэ авас радосни и тэ ладисарас аврэнца.

САВО ЛАШИМОС АНЭН, КАЛА О МАНУШ НА ГИНДОЙ ПАЛА ПЭСТЭ БУТ?

17. Васо можэм тэ ԥэнас, кай амэ аваса лошалэ, кала на гиндосарас пала пэстэ бут?

¹⁷ Кала о мануш на гиндой пала пэстэ бут, када анэн радость. Васо? Если амэ полас, кай най вся можэм тэ терас екжэнэ, тоди амэ аваса блаӷодарни, кала амэнди поможына авэр. Сэрэн, со сас, кала о Иисусо виличисардя дэшэн манушэн, кастэ тернёлас и тила? Кати ек андар лэндэ рисайля тэ поблаӷодарий лэ Иисусос, важ кода кай полэлас, кай екжэно никала на виличисайлоп пэстирэ насвалимастар. Кодэва мануш, саво на гиндояс пала пэстэ бут, сас блаӷодарно пала помощь и андя слава лэ Дэвлэсти (Луки 17:11—19).

18. Сар кода, кала амэ на гиндосарас пала пэстэ бут, поможый тэ ладисарас аврэнца? (Римлянам 12:10).

¹⁸ Кодэлэ манушэнди, савэ на гиндон пала пэстэ бут, май вушэро тэ ладин аврэнца. Ай кадяжэ кацавэ манушэндэ исин лашэ друӷоря. Васо? Важ кода, кай кацавэ мануша патян аврэнди и ӷотови тэ прижанэн, кай аврэ манушэндэ исин лашэ качестворя. Вонэ лошавэн, кала кай и ԥрала и кай ԥэя варисо драго вижал андэ служэния, вонэ анда оди хвалин и стон пэр лэндэ патив. (Адиносар Римлянам 12:10d.)

19. Васо трэбуй тэ улас амэндар и ӷордость?

¹⁹ Лэ манушэнди, савэ ӷорди, ԥарэс тэ хвалин аврэн. Лэнди май фартэ чалёл, кала лэн екжэнэн хвалин. Вонэ часто сыстон пэс аврэнца и камэн тэ авэн май лашэ. О ӷордо мануш часто гиндой, кай трэбуй тэ стерэл вся екжэно, важ кода кай па лэстирятэ авэр на стерэна када драго. Ӷордо мануш часто камэл тэ авэл май важно и завидуий аврэнди (Галатам 5:26). Кацавэ мануша часто хасарэн и дружба аврэнца. Если амэ полям, кай амэ ашас ӷорди, амэнди трэбуй фартэ тэ мангаспэ лэ Иеговасти, кай во тэ поможый амэнди тэ парудювас и тэ гиндосарас па аврятэ. Тоди амэ уласа и ӷордость и вой на мэкэла и корнёря андэ амаро ди (Римлянам 12:2).

20. Васо амэ трэбуй тэ авас найӷорди?

²⁰ Сар жэ амэ блаӷодарни лэ Иеговасти пала кода, сар во пэс андярэл пэстирэ служытелёнэнца! Амэ диқас, кай во ковлэс андярэл пэс лэнца и амэ камас лэстар тэ сытювас. Инке амэ камас тэ сытювас кай кодэла лэ Дэвлэстирэ служытеля, савэ жувэнас андэ дэлмутни время и савэ на сас ӷорди. Вся и время ласа тэ прославляем амарэ Дэвлэс, важ кода кай во када ашэл (Откровение 4:11). Тоди амэ сможэм вся и вечность тэ дружысарас лэ Иеговаса, важ кода кай во любий кодэлэ манушэн, савэ на гиндон пала пэстэ бут.