О Иегова диқэл пала пэстири арӷанизацыя

1. Со трэбуй тэ терэл о мануш посли кода, сар болделя.

КАЛА о мануш болдёл, во англа всаворэ сыкавэл, кай патял лэ Иеговасти и кай камэл тэ служый вмести лэстирэ народоса. Но посли кода, сар о мануш болделя, лэсти трэбуй тэ на парашэл тэ патял лэ Иеговасти, ай кадяжэ кай во диқэл пала пэстири арӷанизацыяb.

2, 3. Сар о Иегова диқэл пала пэстири арӷанизацыя? Росԥэнэн.

² Па кода сар о Иегова диқэл пала пэстири арӷанизацыя, можно тэ полас, саво во и савэ лэстэ законоря. Ай кадяжэ можно тэ полас, со во камэл тэ стерэл. Акана шаса сама, саво о Иегова.

³ Пэрво, О Иегова справедливо Дэл (Деяния 10:34). Важ кода кай о Дэл любий амэн, во отдя пэстирэ Шавэс, кай тэ витинэл всаворэн лэ ӷрехостар (1 Тимофею 2:6; Иоанна 3:16). О Иегова приԥэндя пэстирэ служытелёнэнди, кай вонэ тэ росԥэнэн пала Царство всаворэнди. И кадя можэт тэ спасыйпэ кажно, ко патял, кай о Дэл витиндя лэс. Дуйто, о Иегова любий, кай тэ авэл вся мирно и андэ вся порядко (1 Коринфянам 14:33, 40). Важ када и кай лэстирэ служытеля трэбуй тэ авэл мирно и андэ вся порядко. И трито, о Иегова «Само Баро Учителё» (Исаия 30:20, 21). Акэ васо андэ лэстири арӷанизацыя сытярэн, кай амэ тэ ӷанас о чачимос анда Библия и тэ поможысарас аврэнди тэ уӷанэн кадэва чачимос. Сар кода, саво о Иегова, дицол па дила, сави терэнас андэ христианско собрания андо пэрво вико, андо 19 вико и андэ амарэ деса? И сар о свынто духо поможый амэнди тэ служысарас лэ Иеговасти андэ лэстири арӷанизацыя?

О ДЭЛ СПРАВЕДЛИВО

4. Со приԥэндя о Иисусо пэстирэ учениконэнди, и пала со во лэнди дя алав, сар запистромэ андэ Деяния 1:8?

⁴ Андо пэрво вико. Важ када кай о Иисусо росԥэнэнас лэ манушэнди пала Царство, лэнди сас пэр со тэ надеинпэ (Луки 4:43). Во приԥэндя пэстирэ учениконэнди тэ на парашэн тэ терэн и дила, сави во заля тэ терэл, када тэ росԥэнэн важ о Царство «пэ вся и ԥув». (Адиносар Деяния 1:8c.) Канешно, лэндэ на вижылоп тэ стерэн када вся пэстирэ зорэса. Трэбуй сас о свынто духо, саво поможысардоп лэнди. И вонэ получисардэ лэс, сар и дя алав о Иисусо (Иоанна 14:26; Захария 4:6).

5, 6. Сар о свынто духо поможыяс лэ Иисусостирэ учениконэнди?

⁵ Пэ Иисусостирэ ученикоря сжыля о свынто духо андэ Пятидесятница андо 33 бэрш лэ И. Х. Через о свынто духо вонэ линэ тэ росԥэнэн пала Царство, и важ набут время андэ собрания авелэ тысячи мануша. Кала лэ учениконэн линэ тэ ӷонин, вонэ манглэ помощь кай о Иегова и на пэрэдарайлэ. Андэ молитва лэ Иеговасти вонэ ԥэндэ: «Дэ тирэ рабонэнди тэ росԥэнэн пала тиро алав би дарако». Пэр лэндэ сжыля о свынто духо, и вонэ линэ смило тэ росԥэнэн пала Дэл (Деяния 4:18—20, 29, 31).

⁶ Кай лэ Иисусостирэ ученикоря сас и авэр ԥаримос. Андэ кодэя время сас мало свиткоря, анда савэ вонэ моӷли тэ адинон и Свынто Писания. И инке лэндэ на сас нисо анда кода, пар со амэ акана сытярас лэ манушэн. Хоть лэндэ сас бут ԥаримос, вонэ всаек на парашэнас анда вся ди тэ служын лэ Иеговасти. Вонэ стердэ када, хоть можэт и здэласпэ, кай лэндэ када на вижала. Но прожыля варикай 30 бэрш и пала Дэл «росԥэндэ всаворэнди пэ вся люма» (Колоссянам 1:6, 23).

7. Сар лэ Иеговастирэ служытеля андо 19 вико полэнас, со лэндар аштярэл о Дэл, и со вонэ камэнас тэ терэн?

⁷ Андо 19 вико и андэ амарэ деса. О Иегова на парашэл тэ диқэл пала пэстирэ служытеля и тэ дэл зор, кай вонэ тэ стерэн лэстири дила. Во сытярэл амэн через пэско алав и Библия. Котэ можно тэ проадиносарас пала лэ Иисусостири служэния и пала кода, сар во приԥэндя пэстирэ учениконэнди тэ на парашэн тэ терэн и дила, сави во лэнди дя (Матфея 28:19, 20). Андо июлё 1881 бэрш андэ «Сторожэво башня» ԥэнэнаспэ: «Амэн витидэ най важ кода, кай тэ авас ашунглэ англа миро и тэ стидас барвалимос, амэнди трэбуй тэ росԥэнас важ о Дэл аврэнди». Ай андо 1919 бэрш вимэклэ и брашура «Кому доверена работа», андэ сави лэ вазвещятелёнэнди ԥэнэнас, сар вонэ трэбуй тэ росԥэнэн пала Дэл. Кадяжэ андэр латэ ԥэнэнаспэ, кай бути сас фартэ бут, но кадэя дила лэ Ӷосподостири и би лэстирэ зорэско вонэ ла на стердоп. Кадэла ԥрала терэнас сар и христианоря андо пэрво вико. Вонэ смило и анда вся оди терэнас кадэя дила и патянас, кай о свынто духо поможыяс лэнди тэ росԥэнэн пала Дэл всаворэнди. Амэ патяс, кай о свынто духо поможый и амэнди.

8, 9. Со стердя и арӷанизацыя, кай май бут мануша тэ уӷанэн пала Иегова андо 19 вико и андэ амарэ деса?

⁸ Кай тэ росԥэнэн пала Иегова, лэстири арӷанизацыя всегда дэл со май лашо важ и служэния. Када печатно литература, «Фотодрама творение», патифоноря, машыны, андэ савэ сас ӷромкоговорителя, и радио. Ай андэ послиднё время терэн дила па современно техника. Андэ лэ Иеговастири арӷанизацыя кадяжэ бут пристон зор и переводчикоря. Васо? Важ кода кай и мануша андэ разни нацыи тэ уӷанэн пала Дэл пэ пэсти шыб. О Иегова ԥэндя, кай пала Царство лэна тэ росԥэнэн «андэ кажно нацыя, ери, народо и шыб» (Откровение 14:6, 7). И во камэл, кай пала лэстэ тэ ашунэн всаворэ.

⁹ Кала росԥэнас важ о Дэл, най всаворэ мануша моӷут тэ авэн цэрэ. Например, дэсавэ жувэн андэ здании, андэ савэ исин охрана. Кай тэ поможын кацавэ манушэнди тэ уӷанэн пала Дэл, линэ тэ росԥэнэн котэ, кай стидэнпэ бут мануша. Андо 2001 бэрш о Руководящо совето розришыл, кай и ԥрала андэ Франция тэ служын лэ стэндонэнца важ и литература. Потом кадя линэ тэ служын и андэ авэр страны. Када андя бут лашимос. Андо 2011 бэрш андо баро форо Нью-Йорко андо раёно, кай жувэн фартэ бут мануша, линэ инке и пэ аврятэ тэ росԥэнэн пала Дэл. Линэ тэ росԥэнэн андэ кацавэ ҭана, кай прожан чи стидэнпэ бут мануша. Важ пэрво бэрш роздинэ 102 тысячи 129 книжки и 68 тысяч 911 журналоря. И инке 4 тысячи 701 мануша манглэ, кай лэн тэ сытярэн па Библия! Дицол, кай о Иегова дя пэско свынто духо, кай тэ жал кадэя дила. Важ када о Руководящё совето ԥэндя, кай кадэлэ стэндонэнца важ и литература, тэ служын па вся и люма.

10. Со ту можэш тэ терэс, кай инке май драго тэ росԥэнас пала Дэл и тэ сытярэс кадэлэсти аврэн?

¹⁰ Со ту можэш тэ терэс. Пэ собрании о Иегова сытярэл амэн, сар тэ росԥэнас пала лэстэ аврэнди. И кода, со уӷанас, трэбуй тэ дицол пэ дила. На промэк тэ служыс лэ манушэнца андэ тири ӷруппа. И ԥрала и ԥэя, савэ служын туса андэ ек ӷруппа, моӷут тэ подԥэнэн, сар май драго тэ росԥэнэс пала Дэл и тэ сытярэс лэ манушэн па Библия. Можэт ту закамэса тэ сытёс лэндар. На параш тэ росԥэнэс пала Дэл, дажэ если андэ жызня исин ԥаримос. Ӷлавно стихо андэ кадэя статья дэл тэ сэрас, кай амэ терас лэ Иеговастири дила най пэстирэ зорэса, ай лэстирэ свынтонэ духоса (Захария 4:6). Можно тэ патяс, кай о Иегова дэла амэнди зор скати трэбуй, кай амэ тэ стерас лэстири дила.

О ИЕГОВА ТЕРЭЛ, КАЙ ТЭ АВЭЛ МИРНО, И ЛЭСТЭ АНДЭ ВСЯ ПОРЯДКО

11. Сар андо пэрво вико о руководящё совето терэлас, кай андэ лэ Дэвлэско народо тэ авэл мирно и порядко?

¹¹ Андо пэрво вико. И ԥрала, савэ сас анда руководящё совето андо Иерусалимо, вмести терэнас дила, кай андэ лэ Дэвлэско народо тэ авэл мирно и тэ авэл порядко (Деяния 2:42). Но варикай андо 49 бэрш лэ И. Х. и христианоря машкар пэстэ заспорисайлэ пала обрезания. О руководящё совето через о свынто духо роздиқля кадэва вопросо. Если вонэ тэ на ришысардоп кадэва вопросо, можэт и мануша парашэлоп тэ росԥэнэн пала Дэл. Хоть и старейшыноря и и апостолоря андо Иерусалимо сас евреёря, пэ лэндири ришэния нэ повлияли ни и иудейски традицыи ни и мануша, савэ лэн ритярэнас. Тэ прилэн и ришэния лэ ԥралэнди поможыяс и Свынто Писания и о свынто духо (Деяния 15:1, 2, 5—20, 28). Саво лашимос када андя? О Иегова блаӷословисардя и ришэния, сави приля о руководящё совето. И христианоря линэ тэ ладин и вмести на парашэнас анда вся ди тэ росԥэнэн пала Дэл (Деяния 15:30, 31; 16:4, 5).

12. Со сыкавэл, кай андэ лэ Иеговасти арӷанизацыя мирно и андэ вся порядко?

¹² Андо 19 вико и андэ амарэ деса. Андэ лэ Иеговасти арӷанизацыя всегда старыинпэ, кай тэ авэл мирно и порядко. Андэ «Сторожэво башня» лэ 15 ноябрёстар андо 1895 бэрш сас статья, сави называлась «Благопристойно и чинно», котэ сас ӷлавно гиндо анда 1 Коринфянам 14:40. И сас пистромэ: «И апостолоря часто шонас сама, кай андэ собрания трэбуй тэ авэл порядко». Важно тэ приашундювас каринг кода, со сас пистромэ важ амэндэ, кай тэ сытювас (Римлянам 15:4). Адес лэ Иеговастири арӷанизацыя кадяжэ, сар и христианоря андо пэрво вико, стол бут зор, кай андэ собрания тэ авэл мирно и порядко. Например, дажэ если амэ жаса пэ авэр собрания или дажэ ладаса андэ авэр страна, всаек пэ собрания авэна тэ прожан кода жэ, со и пэ тири собрания! Кацаво можэт тэ авэл, кати через лэ Дэвлэско свынто духо (Софония 3:9).

13. Если тэ шос сама пэ алава анда Иакова 3:17, со трэбуй тэ пушэс пэстар?

¹³ Со ту можэш тэ терэс. О Иегова камэл, кай лэстирэ служытеля тэ терэн вся, кай тэ ладин ек еқэса (Эфесянам 4:1—3). Важ када трэбуй тэ пушэс пэстар, ладис ту всаворэнца андэ собрания? Кандэс ту лэ старейшынонэн? Моӷут тэ дэн тути почотно дила андэ собрания и тэ патян, кай ту ла стерэса? Терэс ту вся вовремя? Поможыс ту анда вся оди аврэнди? (Адиносар Иакова 3:17d.) Если исин андэр со тэ парудёс, трэбуй тэ мангэс кай о Иегова свынто духо. Со май фартэ лэла тэ влияет пэр тутэ о свынто духо, со май фартэ и ԥрала и ԥэя лэна тэ цэнин и тэ любин тут.

О ИЕГОВА СЫТЯРЭЛ И ДЭЛ ВСЯ, СО ТРЭБУЙ

14. Сар о Иегова сытярэлас пэстирэ служытелёнэн андо пэрво вико? (Колоссянам 1:9, 10).

¹⁴ Андо пэрво вико. О Иегова радостяса сытярэл пэстирэ служытелёнэн (Псалом 32:8). Амаро небесно Дад камэл, кай амэ тэ ӷанас лэс, тэ любисарас и тэ жувас вечно. Важ када амэнди трэбуй тэ уӷанас пала лэстэ (Иоанна 17:3). Андо пэрво вико о Иегова сытярэлас пэстирэ служытелёнэн через и собрания. (Адиносар Колоссянам 1:9, 10e.) Кадяжэ андэ када фартэ поможыяс о свынто духо, пала саво ԥэндя о Иисус Христос (Иоанна 14:16). Лэ Иеговаско свынто духо поможыяс лэ Иисусостирэ учениконэнди май драго тэ полэн и Свынто Писания и тэ сгиндон, со терэлас и ԥэнэнас о Иисусо. Потом када вся запистросардэ андэ Евангелия. Кода со уӷанэнас кодэла христианоря, терэлас лэндири дружба лэ Иеговаса май лащи и поможыяс, кай вонэ инке май фартэ тэ любин лэс, лэстирэ Шавэс и ек еқэс.

15. Сар о Иегова стерэла кода, пала со дя алав, сар ԥэнэнпэ андэ Исаия 2:2, 3?

¹⁵ Андэ 19 вико и андэ амарэ деса. О Иегова ԥэндя, кай «андэ послидни деса» и мануша анда всаворэ народоря жана каринг лэско «плай». Када сыкавэл, кай вонэ лэна тэ служын лэсти. (Адиносар Исаия 2:2, 3f.) Амэ диқас, сар када терэлпэ пэ амарэ яқа. Кала служын лэ Иеговасти, совсем на шолпэ пэ кода, кала тэлён лэ хохавнэ дэвлэнди. О Иегова через пэско «годявэрно и кандино рабо» дэл амэнди бут со, кай амари дружба лэса тэ авэл май лащи. Када и статьи, речи, савэ ԥэнэн и ԥрала, видео, ай кадяжэ и мультикоря (Матфея 24:45). Амэндэ кацаво жэ по ди, сар кай о Елиуё, саво сас лэ Иовоско друӷо и саво ԥэндя, кай нинай май лашо учителё, чем о Иегова (Иов 36:22).

16. Со ту можэш тэ терэс, кай тири дружба лэ Иеговаса тэ авэл инке май лащи?

¹⁶ Со ту можэш тэ терэс. О свынто духо поможыя тути тэ терэс кадя, сар уӷанэс анда Библия. Трэбуй тэ мангэспэ сар о псалмопевцо, саво ԥэндя: «Сытяр ман, Иегова, па тиро дром. Мэ жувава па тиро чачимос. Поможысар манди всаворэ одеса тэ дарав тутар» (Псалом 86:11). Трэбуй тэ на парашэс тэ адинос и май драго тэ полэс и Библия, ай кадяжэ и литература, сави дэл лэ Иеговастири арӷанизацыя. Но тути трэбуй най просто май бут тэ уӷанэс, ай трэбуй всаворэ одеса тэ патяс, кай кода, со запистромэ андэ Библия, чачимос и тэ терэс кадя, сар уӷанэс. Андэ када тути поможыя лэ Иеговаско свынто духо. Инке важно тэ подритярэс лэ ԥралэн и ԥэян андэ собрания (Евреям 10:24, 25). Важ кода кай вонэ тиро ери, савэса ту служыс еқэ Дэвлэсти лэ Иеговасти. Кадяжэ ту трэбуй тэ мангэспэ, кай о Иегова тэ дэл тути пэско свынто духо, кай анда вся оди тэ дэс каминтарии и драго тэ ӷотовишся каринг пэстирэ задании. Кадя сыкавэса лэ Иеговасти и лэстирэ Шавэсти, кай ту любис лэстирэ служытелёнэн, савэ лэсти фартэ куч (Иоанна 21:15—17).

17. Сар тэ сыкавэс, кай ту на парашэс тэ кандэс лэ Иеговас, через лэстири арӷанизацыя?

¹⁷ Ужэ йто пэ ԥув ашэлапэ кати ек арӷанизацыя, лэ Дэвлэстири. Важ када присто вся пэско зор, кай вмести лэ ԥралэнца и лэ ԥэянца тэ служыс андэ кадэя арӷанизацыя. Старысав тэ любис лэ манушэн кадяжэ, сар о Иегова. И важ када росԥэн важ лэстэ лэ манушэнди, сави бы лэндэ тэ на авэл нацыя. О Иегова любий, кай андэ собрания тэ авэл мирно, порядко, тэ ладин ек еқэса. И тути трэбуй тэ сытёс лэстар. Трэбуй тэ кандэс лэ Иеговас и тэ прилэс вся, со дэл лэстири арӷанизацыя. Тоди ту на лэса тэ дарас, кала о Иегова стерэла кадя, кай лэ Сатанастири люма будэр на авэла. И ту лэса тэ служыс лэ Иеговасти вмести лэстирэ народоса, саво на парашэл лэс тэ кандэл.