Авэна тумарэ бэяцэ тэ служын лэ Иеговасти, кала вибарёна?

1. Саво само лашо дром можэт тэ витидэл любо мануш?

КОДА, со витидэн о дад и дэй важ пэсти бэяцэ, фартэ влияет пэ лэндири жызня. И если вонэ нэ правильно витидэна, тоди када можэт тэ анэн проблемы лэ бэятонэнди. Ай если вонэ витидэна правильно, тоди када можэт тэ анэн лащи и бахтали жызня лэ бэятонэнди. Но и бэяцэ тожэ трэбуй тэ ӷанэн тэ витидэн тэ жан па правильно дром. Со май лашо дром, саво о мануш можэт тэ витидэл, када тэ служый лэ Иеговасти (Псалом 73:28).

2. Савэ ришэния прилэлас о Иисусо и лэстирэ родителя?

² О Иосифо и Мария пристонас вся пэско зор, кай тэ поможын лэ Иисусости и аврэ пэстирэ бэятонэнди. Вонэ камэнас, кай лэндирэ бэяцэ тэ служын лэ Иеговасти. Вонэ кандэнас лэ Иеговас. Па кода, со вонэ витидэнас, дицолас, кай андэ лэндири жызня о Иегова по пэрво ҭан (Луки 2:40, 41, 52). О Иисусо тожэ прилэлас годявэрнэ ришэнии, и када поможысардя лэсти тэ стерэл и дила, сави дя лэсти о Иегова (Матфея 4:1—10). Во вибареля лашо и смило мануш, саво на парашэлас тэ кандэл. Кажно дад и дэй, савэ любин лэ Иеговас, абуросардоп кацавэ бэятоса.

3. Савэ вопросоря амэ розласа андэ кадэя статья?

³ Андэ кадэя статья амэ подаса дума пала кацавэ вопросоря. Со витидя о Иегова важ о Иисусо? Сости моӷут тэ сытён и родителя, савэ кандэн лэ Иеговас, кай о Иосифо и кай и Мария? Сости моӷут тэ сытён и тэрнэ христианоря лэ Иисусостар?

СЫТЁН ЛЭ ИЕГОВАСТАР

4. Со витидя о Иегова важ пэско шаво?

⁴ О Иегова витидя важ о Иисусо лашэ родителёнэн (Матфея 1:18—23; Луки 1:26—38). И Мария фартэ любияс лэ Иеговас и кода, со пистромэ андэ Свынто Писания. Када дицол анда латирэ алава, савэ запистромэ андэ Библия (Луки 1:46—55). О Иосифо кадяжэ любияс и столас патив по Иегова, важ када во кандэлас лэс (Матфея 1:24).

5, 6. Саво ԥаримос андэ жызня о Иегова на уля пэстирэ шавэстар?

⁵ Шон сама, кай о Иегова витидя важ о Иисусо найбарвалэ родителёнэн. Кода, кай о ери жувэлас фартэ просто, дицолас па лэндири жэртва, сави вонэ андэ андо храмо, кала арақаделя о Иисусо (Луки 2:24). Лэндэ сас семь душ бэяцэ, ай можэт и май бут, пала савэ най пистромэ андэ Библия (Матфея 13:55, 56). И о Иосифо терэлас фартэ пари бути, файма, андэ пэстири найбари мастерско, сави сас найдур лэ цэрэстар.

⁶ О Иегова спасыяс лэ Иисусос, но на фэрияс лэс всаворэ ԥаримастар (Матфея 2:13—15). Например, лэсти сас ԥарэс, кала лэско ери на патяя лэсти, кай во Христос (Марка 3:21; Иоанна 7:5). Инке о Иисусо ӷанэнас, со када тэ хасарэл пэстирэ дадэс лэ Иосифос, саво лэс барярдя. И важ кода кай о Иисусо сас барэдэр андо ери, лэсти прижыляпэ тэ терэл ԥари бути, сави терэлас лэско дад, кай тэ праварэл лэ ерес (Марка 6:3). О Иисусо вибареля и ля тэ диқэл пала ери, кай лэндэ тэ авэл вся, со трэбуй. Во терэлас бути цыло дес и фартэ цыёлас.

7. а) Пала со трэбуй тэ погиндон и родителя, кала барярэн бэятонэн? б) Сости трэбуй тэ сытярэн пэстирэ бэятонэн, сар пала када ԥэндо андэ Притчи 2:1—6?

⁷ Кай тэ полэн, савэ тумэ авэна родителя, можэте тэ погиндон акэ пала со. На заваздэн тумэ о шэро? Лащи тумэндэ дружба лэ Иеговаса, кай во тэ витидэл тумэн тэ диқэн пала лэ бэятостири жызня? (Псалом 127:3, 4). Ай если тумэндэ ужэ исин бэяцэ, трэбуй тэ погиндон пала кацавэ вопросоря. Поможын тумэ лэ бэятонэнди тэ любин тэ терэн найвушэро дила? Драго тумэ фэрин пэстирэ бэятонэн ла бидатар, сави можэт тэ авэл андэ кадэя лэ Сатанастири люма? (Экклезиаст 3:12, 13; Притчи 22:3). Полэн, кай всаворэ проблемы андэ лэ бэятонэндири жызня тумэ нэ можэте тэ улэн. Но тумэ можэте понабут тэ росԥэнэн, кай андэ жызня лэндэ авэла ԥаримос и тэ сытярэн, кай вонэ тэ родэн совето андэ Библия. (Адиносар Притчи 2:1—6b.) Если варико анда тумаро родо парашэля тэ кандэл лэ Иеговас, поможын пэстирэ бэятонэнди тэ полэн па Библия, васо лэнди важно тэ на парашэн тэ жан па лэ Дэвлэско дром (Псалом 31:23). Ай если варико муля анда родо, сыкавэн лэнди, кай и Библия можэт тэ поможый андо ԥаримос, и кай лэндэ по ди тэ авэл спокойно (2 Коринфянам 1:3, 4; 2 Тимофею 3:16).

СЫТЁН ЛЭ ИОСИФОСТАР И ЛА МАРИЯТАР

8. Со трэбуй сас тэ терэн о Иосифо и Мария, сар ԥэнэнпэ андэ Второзаконие 6:6, 7?

⁸ О Иисусо бареля лашэ манушэса и о Дэл сас довольно лэса, важ кода кай о Иосифо и Мария сытярэнас лэс кадя, сар и ԥэнэнас о Дэл. (Адиносар Второзаконие 6:6, 7c.) Вонэ фартэ любинас лэ Иеговас, и фартэ камэнас, кай лэндирэ бэяцэ тожэ тэ любин лэс.

9. Со терэнас о Иосифо и Мария, кай всаворэ ерестэ тэ авэл лащи дружба лэ Иеговаса?

⁹ О Иосифо и Мария вмести лэ бэятонэнца всегда виарақэнас время важ и служэния лэ Иеговасти. Вонэ кажно курко жанас андэ синагога андо Назарето, ай кадяжэ еқвар андо бэрш жанас андо Иерусалимо пэ Патради (Луки 2:41; 4:16). Кала жанас андо Иерусалимо, вонэ можэт прожанас кодэла ҭана, пала савэ пистромэ андэ Свынто Писания, и росԥэнэнас лэ Иисусости и лэстирэ ԥралэнди и ԥэянди пала кода, со сас варикала лэ Иеговастирэ народоса. Лэ Иосифости и ла Марияти сас найвушэро тэ витидэн время важ о Иегова, важ кода кай о ери ашэлас май баро. Но вонэ всаек стонас лэ Иеговас по пэрво ҭан, и важ када кай лэнго ери сас лащи дружба лэ Иеговаса.

10. Сости моӷут тэ сытён кай о Иосифо и Мария и родителя, савэ кандэн лэ Иеговас?

¹⁰ Сости моӷут тэ сытён кай о Иосифо и Мария и родителя, савэ кандэн лэ Иеговас? И бэяцэ трэбуй тэ диқэн, кай и родителя фартэ любин лэ Иеговас па лэндири дума и дила. Со май лашо, со можно тэ стерэн важ пэстирэ бэяцэ, када тэ поможын лэнди тэ полюбин амарэ небеснонэ Дадэс. Блаӷодаря тумэнди и бэяцэ смоӷут тэ полэн важно гиндо, кай со май ӷлавно андэ жызня, када кай о Иегова тэ авэл по пэрво ҭан. Тоди и бэяцэ на промэкэна тэ сытён па Библия, тэ мангэнпэ, тэ ԥирэн пэ собрании и тэ росԥэнэн пала Дэл (1 Тимофею 6:6). Канешно, тумэ трэбуй тэ заботинпэ, кай лэ бэятонэндэ тэ авэл вся, со трэбуй важ и жызня (1 Тимофею 5:8). Но сэрэн, кай именно и дружба лэ Иеговаса, ай най и ловэ или о мищимос поможына тумарэ бэятонэнди тэ пэрэжувэн о Армагеддоно и тэ радуинпэ ла жызняти андо раё пэ ԥув (Иезекииль 7:19; 1 Тимофею 4:8)d.

11. а) Сар и алава анда 1 Тимофею 6:17—19 поможын лэ родителёнэнди тэ прилэн мудри ришэния? б) Со можэт тэ стерэл тумаро ери, и савэ блаӷословении тумэн аштярэн? (Диқэн и рамка «Со тумэ камэн тэ терэн?».)

¹¹ Сар жэ драго, кай андэ собрания кадя бут родителя, савэ прилэн годявэрнэ ришэнии и поможын пэстирэ бэятонэнди, кай лэндэ тэ авэл лащи дружба лэ Иеговаса! Кадэла еря всегда служын вмести лэ Иеговасти. Вонэ авэн пэ собрании, пэ канӷрэсоря, росԥэнэн аврэнди пала Царство, ай дэсавэ дажэ росԥэнэн пала Дэл котэ, кай мануша ридко ашунэн пала чачимос анда Библия. Ай инке вонэ дэкала ладэн андо Вефилё и строин и здании, андэ савэ лэна тэ служын лэ Иеговасти. Канешно, пэ када трэбуй ловэ и можэт прижалапэ тэ пристон бут зор важ када. Но зато кадэлэ ерестэ ашэл и дружба лэ Иеговаса май лащи. (Адиносар 1 Тимофею 6:17—19e.) И бэяцэ андэ кацавэ еря, кала вибарёна, авэна сыклэ тэ стон лэ Иеговас по пэрво ҭан. И авэна лошалэ, кай лэн сытярдэ именно кадя! (Притчи 10:22)f.

СЫТЁН ЛЭ ИИСУСОСТАР

12. Со о Иисусо трэбуй сас тэ терэл, кала во вибареля?

¹² Лэ Иисусости андя кати лашимос кода, со важ лэстэ витидэнас о Иегова, о Иосифо и Мария. Но кала о Иисусо вибареля, лэсти трэбуй сас екжэнэсти тэ витидэл, сар тэ жувэл (Галатам 6:5). О Иисусо моӷ тэ жувэл важ пэстэ, но во на ля кадя тэ терэл. Во витидя тэ жувэл важ о Иегова, важ кода кай и дружба лэ Дадэса важ лэстэ сас со май важно (Иоанна 8:29). Сар лэ Иисусоско примеро поможыя лэ тэрнэ христианонэнди?

13. Со терэлас о Иисусо андэ пэстирэ тэрнэ бэрша?

¹³ О Иисусо сас кандино бэято. Во никала на гиндояс, кай вся ӷанэн май драго пэстирэ дадэстар и пэстиря датар и кай на трэбуй сас лэс тэ сытярэн. Во «на парашэлас тэ кандэл» (Луки 2:51). О Иисусо полэлас, кай во барэдэр андо ери, важ кода во драго сытёлас кай пэско дад тэ терэл дила, кай лэ ерестэ тэ авэл вся, со трэбуй.

14. Катар амэ ӷанас, кай о Иисусо драго ӷанэнас и Свынто Писания?

¹⁴ О Иосифо и Мария росԥэнэнас лэ Иисусости, кай кода, сар во авеля пэ люма, сас чудо. Вонэ росԥэнэнас лэсти пала кода, со росԥэндэ и анӷелоря (Луки 2:8—19, 25—38). Но о Иисусо камэлас инке екжэно тэ уӷанэн май драго и Свынто Писания. Катар амэ када ӷанас? Кала лэсти сас 12 бэрш, и учителёря андо Иерусалимо, савэ сытярэнас лэ Дэвлэстирэ законости, фартэ удивинаспэ, сар во полэл и Писания и сар дэл атветоря (Луки 2:46, 47). Ужэ андэ кодэла бэрша о Иисусо поля анда Свынто Писания, кай лэско Дад о Иегова (Луки 2:42, 43, 49).

15. Сар о Иисусо сыкадя, кай со май важно важ лэстэ, када тэ терэл, со камэл о Иегова?

¹⁵ Кала о Иисусо поля, сави дила дя лэсти о Иегова, во сразу заля ла тэ терэл (Иоанна 6:38). Хоть во и полэлас, кай лэс авэна тэ вэрыцын, и лэсти кадэлэстар авэла ԥарэс по ди, во всаек вся и время кандэлас пэстирэ небеснонэ Дадэс. Кала о Иисусо болделя андо 29 бэрш, во ля тэ терэл и дила, сави дя лэсти о Иегова, и када сас важ лэстэ со май ӷлавно (Евреям 10:5—7). И дажэ кала во мэрэлас по столбо, во ӷанэнас, кай со май важно, када тэ стерэл, со камэл о Иегова (Иоанна 19:30).

16. Сости и тэрнэ мануша моӷут тэ сытён лэ Иисусостар?

¹⁶ Кандэн лэ дадэс и ла да. Сар о Иосифо и Мария, тумарэ родителя тожэ найсовершэни. Но о Иегова дя лэнди, кай вонэ тэ фэрин тумэн и тэ сытярэн. Если тумэ стон патив пэ тумарэ родителя и приашундёнпэ каринг кода, со вонэ ԥэнэн, тоди тумэ авэна бахталэ (Эфесянам 6:1—4).

17. Со трэбуй тэ витидэн и тэрнэ мануша, сар ԥэнэнпэ андэ Иисус Навин 24:15?

¹⁷ Витидэн, касти тэ служын. Тумэнди трэбуй драго тэ полэн, ко када о Иегова, со во камэл тэ стерэл май англэ и сар кадэлэстар парудёла тумари жызня (Римлянам 12:2). Тоди тумэ сможэте тэ витидэн со май важно андэ тумари жызня, када тэ служын лэ Иеговасти (адиносар Иисус Навин 24:15g; Экклезиаст 12:1). Если тумэ кажно дес адинона и Библия, тоди тумари любовь каринг о Иегова авэла май бари и тумэ инке май фартэ патяна лэсти.

18. Со трэбуй тэ витидэн и тэрнэ мануша, и сар када дицола па лэндири жызня?

¹⁸ Мэк важ тумэндэ и служэния лэ Иеговасти авэла со май важно. Андэ лэ Сатанастири люма и мануша ԥэнэн, кай если лэса тэ жувэс кати важ пэстэ, тоди авэса бахтало. Но по чачимастэ када най кадя. Кала и мануша жувэн кати важ кода, кай май бут тэ затерэн ловэ, кадэлэстар авэла ек о ԥаримос (1 Тимофею 6:9, 10). Ай если кандэн и служын лэ Иеговасти, тоди авэна бахталэ и лэна тэ терэн годявэрнэс (Иисус Навин 1:8).

СО ТУМЭ ВИТИДЭНА?

19. Пала со трэбуй тэ сэрэн о дад и дэй?

¹⁹ Родителя, терэн вся, кай тумарэ бэяцэ тэ служын лэ Иеговасти. Тумэ сможэте тэ витидэн правильно дром, если надеинапэ по Дэл (Притчи 3:5, 6). Сэрэн, и бэяцэ диқэн пэ кода, сар тумэ пэс андярэн, ай най пэ тумарэ алава. Мэк кода, со тумэ витидэн, поможыя лэ бэятонэнди, кай о Иегова тэ авэл лэнца довольно.

20. Саво лашимос авэла англэ кай и шавэ и щея, если вонэ витидэна тэ служын лэ Иеговасти?

²⁰ Шавэ и щея, о дад и дэй моӷут тумэнди тэ подԥэнэн, сар май драго тэ терэн. Но кати тумэ сможэте тэ стерэн кадя, кай о Иегова тэ авэл тумэнца довольно. Важ када сытён кай о Иисусо, и жан па лэ Дэвлэско дром. Тоди тумари жызня авэла па чачимастэ бахтали и андар латэ авэла бут лашимос, пала саво тумэ дажэ и на гиндонас! (1 Тимофею 4:16).