«Пристов вся пэско зор, кай тэ стерэс и дила, сави тути динэ!»
СО ТУМЭНДЭ по ди, кала тумаро лашо друӷо бишалдя тумэнди письмо? Кацаво письмо бишалдя о апостоло Павло лэ Тимофеёсти, саво адес исин андэ Библия и пэ саво ԥэнэн Дуйто письмо лэ Тимофеёсти. Можэт, о Тимофеё камэлас май ӥто тэ виарақэл кацаво ҭан, кай лэсти нико тэ на мишыий, кай тэ проадиной лэс. Можэт, во погиндосардя: «Со жэ манди о Павло пистросардя? Можэт, во росԥэндя, сар лэстэ котэ и дила? Ай можэт дя манди лашо совето, сар мэ тэ терав май драго пэстири дила? Или можэт во росԥэндя, сар мэ май драго тэ росԥэнав пала Дэл?» О Тимофеё виарақля атветоря пэ пэстирэ вопросоря и инке виарақля бут лашэ гиндоря. Давайте май драго уӷанаса пала када.
ВИРИТЯР ВСЯ О ԤАРИМОС
Сар о Тимофеё ля тэ адиной о письмо, во поля, пэ скати во дэ куч лэ Павлости. Важ кода кай и пэрви алава андо письмо сас, кай о Тимофеё лэско любимо шаво (2 Тимофею 1:2). Во авеля лэ Тимофеёсти, кала лэсти ужэ сас май бут чем 30 бэрш, и андэ собрания во ужэ сас лашо старейшына. О Павло лэ Тимофеёса дружынас май бут чем 10 бэрш, и во бут сости лэстар сытеля.
О апостоло Павло андэ кодэя время, сас андо Римо андо баруно и лэс трэбуй сас ӥто тэ казнин (2 Тимофею 1:15, 16; 4:6—8). О Тимофеё фартэ обрадосайля, кала уӷангля, кай о Павло всаек на парашэл тэ кандэл лэ Дэвлэс. Када дицолас анда лэстирэ алава, о Павло ԥэндя: «Мэ виритярав любо ԥаримос» (2 Тимофею 2:8—13). Лэ Павлостирэ алава придэнас зор най кати лэ Тимофеёсти, вонэ придэн зор и амэнди.
МЭК ТУТЭ ԤАБОЛ ОДИ АНДЭ СЛУЖЭНИЯ
О Павло камля тэ поможый, кай о Тимофеё тэ цэний и дила, сави лэсти дя о Дэл. Во камля тэ ԥэнэн, кай лэ Тимофеёстэ трэбуй сас тэ ԥабол оди андэ служэния лэ Дэвлэсти (2 Тимофею 1:6). О Павло андэ пэско письмо пистросардя ӷреческо алав ха́рисма. Кадэва алав пэрэандярдёлпэ «кала дэн варисо най важ варисави дила, ай просто кадя, сар подарко». Лэ Тимофеёсти сас дино кадэва даро, кала во ля тэ терэл особо дила андэ христианско собрания (1 Тимофею 4:14).
Со о Тимофеё трэбуй сас тэ терэл пэстирэ дароса? Лэ Павлостирэ алава о Тимофеё моӷ тэ полэл кадя. Кай андо цэр тэ авэл май тато и андо бов тэ авэл яг, трэбуй тэ росԥабарэн о янгар. Кадя и андэ служэния трэбуй тэ ԥабол амаро ди. Андэ ек словарё о алав аназопире́о, саво ԥэндя о Павло, па ӷреческо шыб пэрэандярдёл сар «тэ росԥабарэс, или тэ дэс яг» или аврэ алавэнца тэ на парашэс тэ терэс и дила анда вся оди. Вижал, о Павло кадэлэ алавэнца ԥэндя лэ Тимофеёсти, кай во тэ пристол вся пэско зор, кай тэ стерэл и дила, сави лэсти динэ. Кадяжэ и амэндэ трэбуй тэ ԥабол оди андэ служэния.
ФЭРИСАР И ЦЭНИСАР КОДА, СО ТУТИ ДИНЭ
И акэ инке саво совето, дя о Павло лэ Тимофеёсти, пэстирэ друӷости: «Тути динэ кода, со куч. И мэк о свынто духо поможыя тути тэ фэрис када» (2 Тимофею 1:14). Со жэ динэ лэ Тимофеёсти? Катэ о Павло ԥэнэн важ о чачимос пала Дэл, саво исин андэ Свынто Писания (2 Тимофею 1:13). И о Тимофеё, сар христианино, трэбуй сас тэ росԥэнэн пала када аврэ манушэнди, ай кадяжэ лэ ԥралэнди и лэ ԥэянди андэ собрания (2 Тимофею 4:1—5). О Тимофеё кадяжэ сас старейшына и драго заботияспэ пала лэ Иеговастирэ бакрорэ (1 Петра 5:2). Лэ Иеговаско свынто духо и свынто Писания поможыяс лэ Тимофеёсти тэ фэрий кода, со лэсти сас дино. Када о чачимос пала Дэл, пала саво во росԥэнэнас аврэнди (2 Тимофею 3:14—17).
Амэ тожэ ӷанас о чачимос пала Дэл и росԥэнас пала када аврэнди (Матфея 28:19, 20). И амэнди на трэбуй тэ бистрас пэ скати када дэ важно. Важ када трэбуй вся и время тэ мангаспэ лэ Иеговасти и тэ на промэкас тэ сытювас па Библия (Римлянам 12:11, 12; 1 Тимофею 4:13, 15, 16). Андэ собрания исин кодэла, касти динэ тэ терэн инке варисави дила. Варико служый сар старейшына. Ай варико андэ полновременно служэния. И амэ на ласа тэ заваздас о шэро важ кода, кай терас кацави важно дила. И ласа тэ сэрас, кай би лэ Иеговаско амэ када на стердоп. Кай тэ на парашас тэ цэнисарас када, амэнди трэбуй вся и время тэ прилас помощь лэ Иеговастар.
СЫТЯР АВРЭН КОДЭЛЭСТИ, СО ЕКЖЭНО ӶАНЭС ДРАГО ТЭ ТЕРЭС
О Тимофеё трэбуй сас тэ пэрэдэл кода, со ӷанэн, аврэ ԥралэнди. Важ када о Павло ԥэндя лэсти: «Кода, со ту ашундян мандар... пэрэдэ лэ манушэнди, пэ савэ можно тэ надеиспэ и савэ кадяжэ смоӷут тэ сытярэн аврэн» (2 Тимофею 2:2). О Павло ԥэндя лэ Тимофеёсти, пэ скати дэ важно тэ росԥэнэн аврэ ԥралэнди кода, со во ӷанэн. Адес каринг кадэва совето трэбуй тэ приашундёл кажно старейшына. Лашо старейшына лэла тэ росԥэнэн аврэ ԥралэнди пала кода, сар май драго тэ терэн и дила андэ собрания. Тоди авэр ԥрала тожэ ӷанэна драго тэ терэн и дила. Во на лэла тэ пэрэжывает, кай авэр лэна май драго лэстар тэ терэн варисави дила андэ собрания. Важ када во камэл, най кати просто тэ сытярэл аврэн, ай тэ поможый, кай вонэ тэ стерэн кадэя дила фартэ драго и тэ полэн, со лэндар аштярэн авэр. Тоди кадэла надёжни ԥрала смоӷут тэ авэн па чачимастэ сар сомнак андэ собрания.
Канешно, о Тимофеё фартэ цэнияс кадэва письмо лэ Павлостар. Можэт во най еқвар проадинояс и лашэ советоря пэстирэ друӷостар и гиндояс, сар лэн май драго тэ прилэл андэ пэстири жызня.
Амэ тожэ камас тэ прилас кадэла алава анда лэ Павлоско письмо каринг пэстэ. Амэ ласа тэ терас вся, со па амаро зор, кай амаро ди тэ ԥабол андэ служэния. Тэ фэрисарас и тэ цэнисарас кода, со амэнди динэ и тэ сытярас аврэн кодэлэсти, со екжэнэ ӷанас драго тэ терас. Кадя амэ приласа о совето, саво ԥэндя о Павло лэ Тимофеёсти: «анда вся оди служысар лэ Дэвлэсти» (2 Тимофею 4:5).