«Кажно мурш трэбуй тэ кандэл лэ Христос»

1. Васо о хулай можэт тэ андярэл пэс най драго лэ ереса?

САВО трэбуй тэ авэл о хулай андо ери? Бут мурша сытелэ тэ андярэн пэс ла хулаяса и лэ бэятонэнца кадя, сар андярэнас пэс и мурша андэ лэнго ери или андэ культура. Ек ԥэй анда Европа, савя ақарэн Янита, росԥэнэн, кай андэ латири страна ла жувляса обжанпэ кадя, ԥэнэса, вой служанка и гиндон, кай када кадя и трэбуй. Ай о ԥрал анда Америка росԥэнэн, кай дэсавэ дада сытярэн пэстирэ шавэн, кай и жувли трэбуй тэ ашэл мулком и кода, со вой гиндой, никасти най интересно. Но о Иегова кадя на сытярэл. Во камэл, кай о хулай андо ери тэ андярэл пэс совсем па аврятэ. (Диқэн Марка 7:13.) Со трэбуй тэ терэл о хулай, кай драго тэ диқэл пала пэско ери?

2. Со трэбуй тэ полэл о хулай, и васо када важно?

² О хулай драго диқэла пала ери, если полэла, со лэстар аштярэл о Иегова. Ай инке лэсти важно тэ полэл васо о Иегова стодя, кай во тэ авэл хулай по ери, и сости во можэт тэ сытёл кай о Иегова и кай о Иисусо? Васо важ о мурш када важно тэ полэл? Важ кода кай о Иегова дя, кай о мурш тэ хулаий андо пэско ери и во аштярэл, кай о хулай лэла када тэ терэл правильно (Луки 12:48б).

КО КАС ТРЭБУЙ ТЭ КАНДЭЛ?

3. Со амэ уӷанас анда 1 Коринфянам 11:3?

³ Адиносар 1 Коринфянам 11:3. Андэ кадэва стихо росԥэнэнпэ, ко кас трэбуй тэ кандэл андэ лэ Дэвлэско ери, саво исин по нэбо и пэ ԥув. О Иегова хулай пэ вся, и лэстэ пэ вся исин власть. Лэс кандэн всаворэ лэстирэ бэяцэ по нэбо и пэ ԥув (Рим. 14:10; Эф. 3:14, 15). Но о Дэл дя и лэ Иисусости власть, кай во тэ диқэл пала собрании. И о Иисусо полэл, кай пала када во дэла отчёто англа Иегова (1 Кор. 15:27). Кадяжэ о Иегова дя власть лэ хуласти андо ери, и во тожэ дэла отчёто англа лэстэ и англа Иисусо пала кода, сар во андярэл пэс ла хулаяса и лэ бэятонэнца (1 Пет. 3:7).

4. Саво исин право кай о Иегова и кай о Иисусо?

⁴ О Иегова хулай пэ вся. Лэстэ исин право тэ ԥэнэн, сар пэс тэ андярэн лэстирэ бэяцэ по нэбо и пэ ԥув и тэ диқэл, сар вонэ авэна када тэ терэн (Ис. 33:22). Кацаво жэ право исин и кай о Иисусо андэ собрания (Гал. 6:2; Кол. 1:18—20).

5. Пэр со о Иегова на дя власть лэ хуласти?

⁵ Кадяжэ андо христианско ери о Иегова дя власть лэ хуласти тэ прилэл ришэнии важ пэско ери (Рим. 7:2; Эф. 6:4). Но во на дя лэсти власть андэ трин маменторя. Если во варисо приԥэнэн ла хулаяти чи лэ бэятонэнди против и библейски принцыпоря, тоди вонэ моӷут лэс тэ на кандэн (Прит. 3:5, 6). Кадяжэ во на трэбуй тэ ԥэнэн аврэ ԥралэнди и ԥэянди андэ собрания, кай вонэ тэ терэн кадя, сар во приԥэнэн пэстирэ ерести (Рим. 14:4). Ай кадяжэ и взросли бэяцэ, савэ жувэн отдельно, полэн, кай вонэ моӷут тэ прилэн ришэнии екжэнэ, но вонэ вся и время трэбуй тэ стон патив пэ кода, со подԥэнэн лэнди о дад (Матф. 19:5).

ВАСО О ИЕГОВА ДЯ ВЛАСТЬ ЛЭ ХУЛАСТИ?

6. Васо о Иегова стердя кадя, кай варико тэ авэл ӷлавно?

⁶ О Иегова стердя кадя, кай варико трэбуй тэ авэл ӷлавно, ай варико трэбуй тэ кандэл. Во када стердя, важ кода кай любий пэстирэ ерес. И важ када андэ лэско ери исин ладо и порядко (1 Кор. 14:33, 40). Если во кадя тэ на стердоп, тоди амэнди вся и время прижылопэ тэ розласпэ, ко трэбуй тэ авэл ӷлавно и тэ прилэл ришэнии, ай ко трэбуй тэ кандэл. Тоди андэ лэ Дэвлэско ери на авелоп порядко.

7. Сар о хулай трэбуй тэ андярэл пэс ла хулаяса, сар ԥэнэнпэ андэ Эфесянам 5:25, 28?

⁷ Если о Иегова стодя, кай о мурш тэ авэл ӷлавно андо ери и кай када тэ анэн лашимос, тоди васо лэ жувлянди кадя ԥарэс кодэлэстар, кай и хулая андярэн пэс жэстоко и диқэн пала кажно лэнго шаго? Ай вся када важ кода, кай о мурш жувэл най па лэ Иеговаско законо, ай кадя, сар терэлпэ андэ лэстири культура. Дэсавэ муршэнди дажэ чалёл тэ андярэн пэс ла хулаяса, кай вой, ԥэнэса, най мануш. Кадэлэса во гиндой, кай во хамари или камэл варикасти тэ доԥэнэн, кай во чаче муршари. Во дажэ можэт тэ гиндой: «Ну если мэ нэ моӷу ла тэ застависарав, кай вой пэр мандэ тэ стол патив, тоди мэк дарал мандар. Ай если лэла тэ дарал, ашэла ԥарнуни»b. Но о Иегова ԥэнэн, кай кадя тэ андярэн пэс лэ жувлянца нащи. Во камэл, кай о хулай тэ полэл и тэ цэний пэстиря хулая. (Адиносар Эфесянам 5:25, 28.)

САР ТЭ АВЭС ЛАШО ХУЛАЙ ВАЖ ПЭСКО ЕРИ?

8. Сар тэ авэс лашо хулай андо ери?

⁸ Кай тэ авэс лашэ хуласа андо ери, трэбуй тэ сытёс лэ Иеговастар и лэ Иисусостар, ай вонэ най ӷорди и любин аврэн. Кадя и о хулай трэбуй тэ андярэл пэс ла хулаяса и лэ бэятонэнца.

9. Андэр со дицол, кай о Иегова най ӷордо?

⁹ О Иегова най ӷордо. Май мудро лэ Иеговастар никас нинай, но во всаек виашунэл пэстирэ служытелёнэн и приашундёл каринг лэндэ (Быт. 18:23, 24, 32). Кадяжэ лэсти интересно, со вонэ гиндон (1 Цар. 22:19—22). Хоть о Иегова совершэно, во полэл, кай амэндэ на вижала тэ авас совершэни сар во. Во най ӷордо и поможый лэ ӷрешнонэ манушэнди тэ на парашэн лэс тэ кандэн (Пс. 113:6, 7). Андэ Библия дажэ ԥэнэнпэ, кай во Помошнико (Пс. 27:9; Евр. 13:6). О царё Давид ӷанэнас, кай на стердоп и дила, сави трэбуй сас тэ стерэл, если о Иегова тэ авелоп ӷордо и тэ на поможысардоп лэсти андэ када (2 Сам. 22:36).

10. Андэр со дицолас, кай о Иисусо сас най ӷордо?

¹⁰ Акана подаса дума пала Иисусо. Во сас лэ Дэвлэско Шаво, но еқвар во халадя дажэ и пэрнэ пэстирэ учениконэнди. О Иегова камэл, кай о хулай тэ сытёл лэ Иисусостар. Важ када о Иегова стердя кадя, кай пала када тэ авэл пистромэ андэ Библия. О Иисусо ԥэндясас пэстирэ учениконэнди: «Мэ сыкадэм тумэнди када, кай тумэ тэ обжанпэ аврэнца кадяжэ, сар и мэ обжылэмпэ тумэнца» (Иоан. 13:12—17). Хоть кай о Иисусо и сас бари власть, во на гиндояс, кай авэр мануша трэбуй лэсти тэ служын. Наоборот, во екжэно служыяс лэ манушэнди (Матф. 20:28).

11. Сости о хулай можэт тэ сытёл лэ Иеговастар и лэ Иисусостар?

¹¹ Сости амэ сытювас? Кай о хулай най ӷордо дицол бут андэр со. Например, во на аштярэл, кай и хулаи и бэяцэ авэна идеальни. Дажэ если вонэ на соӷласинпэ кодэлэса, со во ԥэнэн, во всаек виашунэл лэн. Ек ԥэй анда Америка ԥэнэн, кай лэ хуласа вой най вся и время соӷласно, но вой диқэл, кай во ла цэний и стол пэр латэ патив. И лэсти важно кода, со вой гиндой, кала во прилэл ришэнии. Инке о хулай, саво сытёл кай о Иисусо и камэл тэ на авэл ӷордо, терэл дила па цэр, дажэ если котэ, кай во жувэл, о миро гиндой кай када най муршыкани дила. Лэсти можэт тэ авэл ԥарэс када тэ терэл, важ кода кай лэстар лэна тэ подасанпэ. Акэ со росԥэнэн авэр ԥэй. Котэ кай вой жувэл, о миро асалпэ лэ муршэстар, саво поможый пэстиря хулаяти тэ халавэл и посуда или тэ прилэл па цэр. И вонэ дажэ ԥэнэн, кай во най мурш, если кадя терэл. Если кадя гиндон и котэ кай тумэ жувэн, на бистрэн, кай о Иисусо халадя и пэрнэ пэстирэ учениконэнди, хоть кадэя дила терэнас и слуӷоря. Но важ о хулай, саво сытёл лэ Иисусостар, май важно тэ заботийпэ пала пэско ери, чем тэ уӷодий лэ мирости.

12. Сар о Иегова и о Иисусо сыкавэн пэстири любовь?

¹² О Иегова любий. Андэ Библия пистромэ, кай о Дэл исин любовь, и вся со во терэл, во терэл, важ кода кай любий (1 Иоан. 4:7, 8). Через и Библия и через пэстири арӷанизацыя во сыкавэл, кай любий амэн и камэл, кай амэ тэ авас лэстирэ друӷоря. Кадяжэ во дэл амэнди вся, со трэбуй важ и жызня. Кадэлэстар амэнди ашэл драго по ди (1 Тим. 6:17). Дажэ кала амэ терас ошыбки, во всаек на парашэл амэн тэ любий и поможый тэ парудювас. О Иегова отдя пэстирэ Шавэс, важ кода кай любий амэн. О Иисусо тожэ сыкадя пэстири любовь каринг амэндэ, кала соӷласисайля тэ отдэл пэстири жызня важ амэндэ (Иоан. 3:16; 15:13). О Иегова и о Иисусо никала на парашэна тэ любин кодэлэн, ко лэн на ашавэл (Иоан. 13:1; Рим. 8:35, 38, 39).

13. Васо о хулай андо ери трэбуй тэ сыкавэл пэ дила, кай любий лэ ерес? (Диқэн кадяжэ и рамка «Сар о хулай сар кати жэнисайля трэбуй тэ андярэл пэс, кай и хулаи тэ стол пэр лэстэ патив?».)

¹³ Сости амэ сытювас? О хулай трэбуй тэ любий лэ ерес. И када фартэ важно. Пала када пистросардясас о апостоло Иоанно, кай кодэва, ко на любий пэстирэ ԥралэс, савэс диқэл, или можно тэ ԥэнэс, пэстирэ ерес, сар во можэт тэ любий лэ Дэвлэс, савэс на диқэл? (1 Иоан. 4:11, 20). Если о хулай любий пэстирэ ерес и камэл тэ сытёл лэ Иеговастар и лэ Иисусостар, во лэла тэ заботийпэ, кай лэстирэ ерестэ тэ авэл лащи дружба лэ Иеговаса и тэ авэл вся, со трэбуй важ и жызня, и кай лэнди тэ авэл драго по ди кодэлэстар, кай во лэн любий (1 Тим. 5:8). Во кадяжэ трэбуй тэ сытярэл пэстирэ бэятонэн. Инке во шол сама, кай лэстирэ ришэнии тэ радуин лэ Иеговас и тэ анэн лашимос лэ ерести. Акана давайте май драго подаса дума, сар о хулай андо ери можэт тэ сытёл лэ Иеговастар и лэ Иисусостар.

СО ТРЭБУЙ ТЭ ТЕРЭЛ О ХУЛАЙ?

14. Со трэбуй тэ терэл о хулай, кай лэ ерестэ тэ авэл лащи дружба лэ Иеговаса?

¹⁴ Трэбуй тэ заботийпэ, кай лэ ерестэ тэ авэл лащи дружба лэ Дэвлэса. О Иисусо заботияспэ пала мануша кадяжэ, сар лэско Дад. И важ када кай лэстирэ ученикоря сас вся, со трэбуй, кай тэ авэл лащи дружба лэ Дэвлэса (Матф. 5:3, 6; Мар. 6:34). О хулай, саво кандэл лэ Дэвлэс, терэл кадяжэ. Важ лэстэ со май важно, кай о ери тэ полэл лэ Дэвлэс (Втор. 6:6—9). Андэ лэско ери исин привычка тэ адинон и Библия и тэ сытён пар латэ, тэ ԥирэн пэ собрании и тэ росԥэнэн пала Иегова аврэнди. Кадя о хулай поможый пэстиря хулаяти и лэ бэятонэнди, кай о Иегова тэ авэл лэндэ по пэрво ҭан андэ жызня.

15. Со трэбуй тэ терэл о хулай, кай о ери тэ диқэл, кай во лэн любий?

¹⁵ Трэбуй тэ сыкавэл, кай во любий пэстирэ ерес. О Иегова сыкавэлас лэ Иисусости, кай во лэс любий (Матф. 3:17). Кадяжэ и о Иисусо сыкавэлас пэстирэ учениконэнди пэ дила и алавэнца, кай во лэн любий. Ай вонэ най еқвар ԥэнэнас лэ Иисусости, кай любин лэс (Иоан. 15:9, 12, 13; 21:16). Кадяжэ и о хулай андо ери можэт тэ сыкавэл пэ дила, кай любий пэстиря хулая и пэстирэ бэятонэн. Када дицола, кала во лэн лэла тэ сытярэл па Библия. Но инке во трэбуй тэ сыкавэл пэстирэ ерести, кай цэний лэн, и кала трэбуй тэ хвалий лэн дажэ англа миро (Прит. 31:28, 29).

16. Со инке трэбуй тэ терэл о хулай, и пала со во трэбуй тэ на бистрэл?

¹⁶ Трэбуй тэ заботийпэ, кай лэ ерестэ тэ авэл вся, со трэбуй. Сас время, кала о Иегова наказывал лэ израильтянонэн, важ кода кай вонэ на кандэнас лэс. Но во и тоди всаек на парашэлас пала лэндэ тэ заботийпэ (Втор. 2:7; 29:5). Во заботийпэ и пала амэндэ (Матф. 6:31—33; 7:11). Кадяжэ терэлас и лэско Шаво о Иисусо. Во най еқвар праварэлас лэ манушэн, савэ сас лэстирэ ученикоря, ай кадяжэ во лэн исцэлияс (Матф. 4:24; 14:17—20). О хулай андо ери, саво камэл тэ радуий лэ Иеговас, тожэ трэбуй тэ терэл кадя и тэ диқэл, кай ла хулаятэ и лэ бэятонэндэ тэ авэл вся, со трэбуй важ и жызня, и тэ на бистрэл, со ӷлавно андэ жызня. Во на трэбуй тэ домэкэл, кай и бути тэ мишыий лэсти тэ заботийпэ, кай лэ ерестэ тэ авэл лащи дружба лэ Дэвлэса и лэнди тэ авэл драго по ди.

17. Сар о Иегова и о Иисусо сытярэн и подԥэнэн амэнди?

¹⁷ Трэбуй тэ сытярэл пэстирэ ерес. О Иегова сытярэл и подԥэнэн, важ кода кай камэл важ амэндэ ек о лашимос (Евр. 12:7—9). О Иисусо тожэ терэлас кадя, сар лэско Дад. Во сытярэлас и подԥэнэнас пэстирэ учениконэнди и терэлас када ковлэс, важ кода кай любияс лэн (Иоан. 15:14, 15; Матф. 20:24—28). Во полэл, кай амэ най совершэни и можэм тэ терас варисо най кадя (Матф. 26:41).

18. Со трэбуй тэ полэл о хулай андо ери?

¹⁸ О хулай андо ери, саво камэл тэ терэл кадя, сар о Иегова и о Иисусо, полэл, кай и хулаи и бэяцэ моӷут тэ терэн варисо най кадя. Во на андярэл пэс лэнца ӷрубо (Кол. 3:19). Ай терэл кадя, сар запистромэ андэ Галатам 6:1 и «ковлэс» поможый пэстиря хулаяти и лэ бэятонэнди тэ парудён. Во полэл, кай во тожэ най совершэно. О хулай полэл, кай фэдэр тэ сытярэл пэстирэ ерес кодэлэса, кай тэ андярэл пэс сар о Иисусо, кай вонэ лэстар тэ сытён (1 Пет. 2:21).

19, 20. Сар о хулай андо ери, кала прилэл ришэнии, терэл кадяжэ сар о Иегова и о Иисусо?

¹⁹ Трэбуй тэ гиндой най важ пэстэ, ай важ авэр. Кала о Иегова прилэл ришэнии, во спэрва гиндой, кай кадэлэстар тэ авэл драго аврэнди. Во дя амэнди и жызня най важ кода, кай лэсти варисо кадэлэстар тэ авэл. Во камля, кай амэ тэ радосавас ла жызняти. И нико нэ моӷ тэ заставий лэ Иеговас, кай во тэ отдэл пэстирэ Шавэс важ амарэ ӷрехоря. Во екжэно приля кадэя ришэния, важ кода кай камэлас важ амэндэ ек о лашимос. Кадяжэ и о Иисусо, кала прилэлас и ришэния, дицолас, кай во заботийпэ пала авэр мануша (Рим. 15:3). Например, кай тэ росԥэнэн важ лэ Дэвлэско Царство, во най еқвар отԥэндёлас кодэлэстар, кай тэ отцыёл (Мар. 6:31—34).

²⁰ О хулай андо ери полэл, кай тэ прилэл годявэрнэ ришэнии най вушэро, но када важно. И важ када во на грабий тэ прилэл ришэнии, если во холяйля или умэкля и вас. Кадяжэ во на прилэл ришэнии кати важ кода, кай лэстэ исин пэ када право. Наоборот, во старыийпэ тэ полэл, со лэстар аштярэл о Иегова (Прит. 2:6, 7)c. Кадэлэстар авэла драго и лэсти и аврэнди (Флп. 2:4).

21. Пала со амэ подаса дума андэ авэр статья?

²¹ О Иегова стодя, кай пала ери тэ диқэл о хулай. И када найвушэро лэсти тэ терэл, и во полэл, кай дэла отчёто англа Дэл. Если о хулай старыийпэ тэ сытёл кай о Иегова и кай о Иисусо, лэстэ вижала драго тэ диқэл пала пэско ери. Но инке андо ери важно кода, сар андярэл пэс и хулаи. Сар вой трэбуй тэ полэл о принцыпо анда Библия, кай трэбуй тэ кандэл лэ хулас, и васо када можэт тэ авэл найвушэро? Пала када амэ подаса дума андэ авэр статья.