На ласа тэ терас, кай машкар амэндэ тэ авэл холи, ай ласа тэ ладисарас!

1. Со моӷут тэ терэн и мануша, кай тэ сыкавэн кай вонэ май лашэ аврэндар?

АНДЭ кадэя люма всаворэ мануша старыинпэ тэ авэн май лашэ ек еқэстар. Например, барвало мануш важ пэско бизнэсо можэт тэ стерэл вэрыто аврэ манушэсти. О спортсмено, кай тэ вицэлэл, можэт нарошно тэ стерэл варисо аврэ спортсмености. Ай о мануш, саво сытёл андо университето, можэт тэ хохавэл, кай тэ здэл о экзамено. Но андэ Библия пистромэ, кай када «и дила, сави терэл и ӷрешно тила», и амэ полас, кай и христианоря нащи кадя тэ терэн (Гал. 5:19—21). Но можэт тэ авэл кацаво, кай лэ Иеговаско служытелё екжэно на полэл, сар можэт тэ стерэл кадя, кай машкар ԥрала и ԥэя андэ собрания тэ авэл холи.

2. Пала со амэ подаса дума андэ кадэя статья?

² Анда кадэя статья амэ уӷанаса пала дуй маменторя, андэр со можэт тэ дицол, кай амэ вистас пэс май лашэ аврэндар. Кадяжэ подаса дума пала лэ Дэвлэстирэ служытеля, савэ на андярэнас пэс кадя, кай вонэ май лашэ аврэ манушэндар. Но спэрва погиндосараса, сар тэ полас, васо амэ служысарас лэ Иеговасти.

ПОЛЭ, СО ТУТЭ АНДО ДИ

3. Со трэбуй тэ пушэс пэстар?

³ Кажно андар мэндэ трэбуй тэ пушэл пэстар: «Драго манди по ди, кала мэ гиндосарав, кай мэ май лашо аврэндар? Сыстосарав мэ пэс аврэнца? Важ кастэ мэ лавпэ тэ терав варисави дила андэ собрания? Кай тэ доԥэнав, кай мэ май лашо всаворэндар или май лашо варисавэ ԥралэстар или ԥьятар? Или мэ просто камав тэ отдав лэ Иеговасти вся со май лашо?» Фартэ важно тэ задэс пэсти кацавэ вопросоря. Диқам, со пала када ԥэнэнпэ андэ Библия.

4. Васо амэ на трэбуй тэ сыстосарас пэс аврэнца, сар ԥэнэнпэ андэ Галатам 6:3, 4?

⁴ Андэ Библия ԥэнэнпэ, кай на трэбуй тэ сыстосарас пэс аврэнца. (Адиносар Галатам 6:3, 4.) Если ту лэс тэ гиндос, кай ту май лашо аврэндар, тоди ту можэш тэ ашэс ӷордо. Ай авря ригатар, если ту лэса тэ гиндос, кай ту май хужэ аврэндар, тоди ту лэса пала када тэ пэрэжываеш. Но сар тэ на авэл, вся када найдраго (Рим. 12:3). И ԥэй и Катяb ԥэнэн, кай вой вся и время сыстояс пэс аврэ ԥэянца. Лати здэласпэ, кай вонэ май шукарнэ латар, кай лэндэ май бут подружки, и вонэ ӷанэн май драго тэ росԥэнэн пала Дэл. Посли кацавэ гиндоря лати ашэлас фартэ ԥарэс по ди, и вой лэлас тэ гиндой, кай нисо на ашэл. Но амэ трэбуй тэ на бистрас, кай о Иегова полюбисардя амэн най важ амари шук, кай амэндэ бут друӷоря, или кай амэ ӷанас шукарнэс тэ дас дума. О Иегова амэн полюбисардя важ кода, кай амэ полюбисардям лэс и камас тэ кандас лэстирэ Шавэс (Иоан. 6:44; 1 Кор. 1:26—31).

5. Со ту можэш тэ сытёс кай кадэва ԥрал?

⁵ Инке ту трэбуй тэ полэс, саво ту мануш. Ту кодэва, ко терэл кай тэ авэл мирно? Или кодэва, ко вся и время спорийпэ варикаса? Ек старейшына анда Южно Корея ԥэнэн, кай во холявэлас пэ авэр ԥрала, важ кода кай сар лэсти здэласпэ вонэ вистонас пэс май лашэ лэстар. Во ля тэ дэл дума пала кадэла ԥрала найдраго, ԥэнэнас, кай вонэ терэн варисо най кадя, и пэрэԥэнэнас лэнди о алав. Кадэлэстар андэ собрания на линэ тэ ладин машкар пэстэ и ԥрала и ԥэя. Драго, кай кадэлэ ԥралэсти поможысардэ и друӷоря, и во поля, кай терэлас нэправильно. Во паруделя и акана во розлашо старейшына. Если ту полян, кай тутэ зажал андэ привычка тэ вистос пэс англа авэр, и на камэс тэ ладис аврэнца, тоди трэбуй май ӥто варисо тэ терэс.

НА АВ ӶОРДО И НА ЗАВИДУИСАР АВРЭНДИ

6. Васо о мануш лэл тэ вистол пэс англа авэр, сар ԥэнэнпэ андэ Галатам 5:26?

⁶ Адиносар Галатам 5:26. Через со о мануш можэт тэ гиндой, кай во май лашо аврэндар и тэ вистол пэс англа авэр? Спэрва во лэл тэ заваздэл о шэро. Во ашэл ӷордо и лэл тэ гиндой кати пала пэстэ. Потом во лэл тэ завидуий аврэнди. Во най кати камэл пэсти, со исин кай авэр мануш, но и камэл, кай кодэлэ манушэстэ совсем тэ на авэл кода, пэр со ля тэ завидуий. Вижал, кала варико лэл тэ завидуий аврэсти, тоди во ужэ лэл тэ вэрыцый кодэлэ манушэс. Трэбуй кадэлэстар тэ нашас, сар бидатар!

7. Со можэт тэ авэл, кала о мануш ӷордо и завидуий аврэнди? Росԥэн о примеро.

⁷ Кала о мануш ӷордо и завидуий аврэнди, када сар и мэл сави попэрэл андо керасино, саво шон андо самолёто. О самолёто сможэт тэ звурял, но кадэя мэл на дэла лэсти тэ бэшэл пэ ԥув и во розмардёла. Важ кода кай о двиӷателё нэ сможэт драго тэ терэл. Кадяжэ и о ӷордо мануш можэт тэ служый лэ Иеговасти, но када най пэ долӷонэстэ. Если во на лэла андэ када тэ парудёлпэ, тоди англэ лэс на аштярэл нисо лашо (Прит. 16:18). Во парашэла тэ служый лэ Иеговасти и кадэлэса стерэла вэрыто и пэсти и аврэнди. Но со трэбуй тэ терэс, кай тэ на авэс ӷордо и тэ на завидуис аврэнди?

8. Со поможыя тути тэ на гиндос, кай ту май лашо аврэндар?

⁸ Тэ на гиндос, кай ту май лашо аврэндар тути поможына лэ Павлостирэ алава анда книӷа Филиппийцам: «На терэн нисо анда холи или кала гиндон кати важ пэстэ. На гиндон, кай тумэ май лашэ аврэндар, ай гиндон, кай авэр май лашэ тумэндар» (Флп. 2:3). Если ту лэса кадя тэ терэс, тоди ту на лэса тэ холявэс пэ ԥрала и пэ ԥэя, савэ можэт май драго тутар варисо ӷанэн тэ терэн. Наоборот, ту лэса тэ лошавэс важ лэндэ, особенно тоди кала вонэ терэн варисави дила, кай тэ прославляют лэ Иеговас. Ай если и ԥрала и ԥэя, савэндэ драго вижал варисо тэ терэн, лэна тэ гиндон, кай авэр май лашэ лэндар, тоди вонэ лэна тэ шон сама, кай андэ авэр тожэ исин варисо лашо и лэна тэ цэнин лэн пала када. Кадя кажно андэ собрания сможэт тэ стерэл, кай тэ авэл мирно и драго.

9. Со трэбуй тэ терас, кала лас тэ завидуисарас аврэнди?

⁹ Амэ всаворэ нэсовершэни. Важ када дэкала амэ можэм тэ завидуисарас аврэнди. Но кала амэ сэжи када поможыя амэнди тэ полас, кай амэ най вся можэм. Сэжо мануш никала на лэла тэ доԥэнэн, кай во само годявэрно. Наоборот, кацаво мануш полэл, кай авэр моӷут варисо май драго тэ терэн и лэла лэндар тэ сытёл. Можэт о ԥрал андэ собрания драго ӷанэн тэ ԥэнэн и речь, тоди можэш лэстар тэ пушэс, сар во ӷотовица каринг латэ. Или можэт и ԥэй ӷанэн драго тэ гитой тэ хан, тоди можэш тэ пушэс латар, сар вой кода гитой. Ай если варикасти анда тэрнэ мануша на хутилэл смилость, кай тэ подружыйпэ аврэнца андэ собрания, тоди во можэт тэ мангэл совето кодэлэстар, ко када вушэро терэл. Тоди амэндэ вижала тэ стерас, кай андэ собрания нико тэ на завидуий ек еқэсти. Ай инке сможэм тэ сытювас ек еқэстар.

СЫТЮВ ЛЭ МАНУШЭНДАР, ПАЛА САВЭ ПИСТРОМЭ АНДЭ БИБЛИЯ

10. Саво ԥаро маменто сас кай о Гедеоно?

¹⁰ Сгиндосарам, со сас лэ Гедеоноса и лэ ефремлянонэнца. О Гедеоно сас анда племя Манасия. Во и лэстирэ 300 воиноря лэ Иеговастирэ зорэса вицэлдя и бари война. Авэр пэ лэнго ҭан ужэ ашэлоп ӷорди. И акэ каринг о Гедеоно авелэ и ефремляноря, но най кай тэ поблаӷодарин лэс, кай во вицэлдя и война, ай наоборот тэ дошалярэн лэс, кай пэ война во на ля лэн пэса. Вонэ гиндонас кати пала пэстэ и камэнас тэ ашундён англа миро, кай вонэ тожэ сас пэ война и вицэлдэ. Но вонэ бистэрдэ пала ӷлавно, кай о Гедеоно вицэлдя кадэя война, най кай тэ прославит пэс, ай кай тэ прославит лэ Иеговас и тэ спасый лэстирэ народос (Суд. 8:1).

11. Сар о Гедеоно дя дума лэ ефремлянонэнца?

¹¹ О Гедеоно ԥэндя лэ ефремлянонэнди, кай тэ сгиндон и время, кала вонэ стердэсас май бут, чем во. Инке во лэнди ԥэндя, кай вонэ лэ Иеговастирэ зорэса тожэ вицэлдэ андэ авэр бари война, и лэнца на сас о Гедеоно. Посли кадэла алава вонэ парашэлэ тэ холявэн (Суд. 8:2, 3). Кала о Гедеоно лэнца дэлас дума лэстэ андэ дума на сас ни ӷрама ӷордость. Кадя во стердя кай машкар о народо тэ авэл мирно.

12. Сости амэ можэм тэ сытювас анда кода, сар андярдэ пэс о Гедеоно и ефремляноря?

¹² Сости амэ анда када сытювас? Анда кода сар андярдэ пэс и ефремляноря дицол, кай если о мануш фартэ пэрэжывает со пала лэстэ гиндоя о миро, тоди во можэт тэ бистрэл пала само важно, када кай тэ прославляет лэ Иеговаско алав. Кай о Гедеоно моӷут тэ сытён и хулая андо ери и старейшыноря. Если пэр лэндэ варико холяйля, тоди лэнди трэбуй тэ старыинпэ тэ полэн лэ манушэско гиндо. Вонэ моӷут тэ похвалин кадэлэ мануш, кай во варисо драго терэл. Вонэ трэбуй тэ на авэн ӷорди, особенно кала пэр лэндэ холяйлэ евья. И вонэ полэн, кай андэ собрания или андо ери со май ӷлавно, тэ авэл мирно, чем тэ доԥэнэн, кай вонэ прави.

13. Саво ԥаримос сас кай и Анна и со вой стердя?

¹³ Погиндосарам пала Анна, лако хулай сас о Елкана. Лэстэ сас инке ек хулаи када и Феннана, и латэ сас бэяцэ, ай кай и Анна на сас. Но о Елкана всаек ла Анна любияс май фартэ. Важ када и Феннана завидуияс и вся и время латар подасаласпэ, кай латэ нинай бэяцэ. Кадэлэстар ла Аннати сас фартэ ԥарэс по ди. Вой вся и время ровэлас, на халас и на пэлас (1 Сам. 1:2, 6, 7). Андэ Библия на ԥэнэнпэ, кай и Анна хоть набут рияс пала пэстэ. И Анна андэ молитва лэ Иеговасти росԥэндя вся, со латэ по ди и патялас, кай о Иегова ла на ашавэла. Амэ на ӷанас, парашэля и Феннана тэ вихал оди ла Аннати чи най. Но амэ ӷанас точно, кай ла Аннати потом драго сас по ди и вой будэр ни пала со нэ пэрэжывала (1 Сам. 1:10, 18).

14. Сости амэ сытювас ла Аннатар?

¹⁴ Сости ту можэш тэ сытёс анда кода, со сас андэ жызня кай и Анна? Если варико камэл тэ сыкавэл, кай во май лашо тутар, на тер сар во. Во андярэл пэс найдраго, но ту старысав, вся тэ стерэс, кай тэ на авэл холи машкар тумэндэ (Рим. 12:17—21). Но если дажэ во на закамэла тэ поладий туса, тоди тутэ андо ди всаек авэла драго, важ кода кай ту стердян вся, кай машкар тумэндэ тэ на авэл холи.

15. Соса шонаспэ о Аполлосо и о Павло?

¹⁵ Акана подаса дума пала Аполлосо и пала Павло. Вонэ лэдуй драго ӷанэнас и Свынто Писания, и вонэ сас ашунглэ учителёря андэ кодэя время. Кажно андар лэндэ поможысардя, кай бут мануша тэ ашэн лэ Иисусостирэ ученикоря. Но машкар лэндэ никала на сас холи и вонэ на вистонас пэс ек англа ек.

16. Со ту ԥэндоп пала Аполлосо?

¹⁶ О Аполлосо арақаделяпэ андэ Александрия. Андо пэрво вико када сас само ашунгло форо, андэ саво дэнас бари образования. О Аполлосо ӷанэнас шукарнэс тэ дэл дума, драго тэ ԥэнэн и речи и драго ӷанэнас и Свынто Писания (Деян. 18:24). Кала во жувэлас андо Коринфо, и ԥрала и ԥэя андэ собрания ԥэнэнас, кай лэс май фартэ любин, чем аврэ ԥралэн андэ собрания, и май фартэ чем лэ Павлос (1 Кор. 1:12, 13). Заваздэлас о шэро во кадэлэстар? Канешно, най! Посли кода сар о Аполлосо ужыля анда Коринфо, о Павло фартэ мангэлас лэс, кай во тэ рийпэ (1 Кор. 16:12). Линоп о Павло тэ мангэл пала када лэ Аполлосос, если лэстэ тэ авелоп холи пэр лэстэ? Дицол, кай о Аполлосо на заваздэлас о шэро через кода, кай во драго ӷанэн тэ росԥэнэн пала Дэл и подритярэл лэ христианонэн. Можэм точно тэ ԥэнас, кай о Аполлосо сас най ӷордо мануш. Важ кода кай андэ Библия никай на ԥэнэнпэ, кай лэсти на чалеля, кала о Акилла и Прискилла подԥэндэ лэсти май точно тэ росԥэнэн, со пистромэ андэ Свынто Писания (Деян. 18:24—28).

17. Сар о Павло терэлас, кай андэ собрания тэ авэл мирно?

¹⁷ О Павло драго ӷанэнас, сар дэ бут дила важ о Дэл терэл о Аполлосо. Но о Павло на завидуияс лэсти. Во сас годявэрно мануш и на сас ӷордо. Када дицолас анда лэстирэ алава, савэ во пистросардя ла собранияти андо Коринфо. Хоть дэсавэ христианоря анда Коринфо ԥэнэнас, кай вонэ лэ Павлостирэ ученикоря, о Павло кадэлэстар совсем на заваздэлас о шэро. Во терэлас кадя, кай и мануша май бут сама тэ шон по Иегова и по Иисусо (1 Кор. 3:3—6).

18. Сости амэ сытювас кай о Павло и кай о Аполлосо, сар ԥэнэнпэ андэ Коринфянам 4:6, 7?

¹⁸ Сости амэ можэм тэ сытювас кай о Аполлосо и кай о Павло? Кала о христианино пристол бут зор андэ служэния лэ Иеговасти и можэт дажэ поможысардя бутэ манушэнди тэ ашэн лэ Иеговастирэ служытеля, во трэбуй тэ полэл, кай пала вся када во трэбуй тэ авэл блаӷодарно кати лэ Иеговасти. Инке трэбуй тэ сэрэл, кай со май бут дила о мануш терэл андэ лэ Иеговастири арӷанизацыя, со май фартэ во трэбуй тэ старыийпэ, кай андэ собрания тэ авэл мирно и всаворэ тэ ладин машкар пэстэ. Амэ фартэ блаӷодарни лэ старейшынонэнди и аврэ ԥралэнди, кай вонэ кадя и терэн. Вонэ сытярэн лэ ԥралэн и лэ ԥэян най па пэско гиндо, ай па кода, со пистромэ андэ Библия. И вонэ на гиндон, кай всаворэ лэндар трэбуй тэ сытён. Важ лэндэ само важно, кай вся и собрания тэ сытёл лэ Иисусостар. (Адиносар 1 Коринфянам 4:6, 7.)

19. Со кажно андар мэндэ можэт тэ терэл андэ собрания? (Диқэн кадяжэ и рамка «На тер, кай машкар тумэндэ тэ авэл холи».)

¹⁹ О Иегова амэн создал кадя, кай кажно андар мэндэ ӷанэн варисо драго тэ терэл. И кадя амэ можэм тэ терас лашимос аврэнди (1 Пет. 4:10). Но варикасти можэт тэ здэлпэ, кай во терэл найбари дила, кай андэ собрания тэ авэл мирно и драго. Тоди прецтавь пэсти, кай анда бут найбарэ кирпичоря вистроийпэ баро шукарно цэр. Кадяжэ кала и амэ всаворэ по набут ласа тэ терас варисо важ и ԥрала и ԥэя андэ собрания, тоди и собрания авэла сар кадэва шукарно цэр, андэ саво всаворэ ладин. Всаворэ амэ трэбуй тэ старысавас тэ парудювас, кай дажэ и гиндо амэндэ тэ на авэл, кай амэ май лашэ аврэндар. Пристам вся пэско зор, кай андэ собрания тэ авэл мирно и всаворэ тэ ладин (Эф. 4:3).