Кала варико анда ери ашавэл лэ Иеговас

1. Со можэт тэ авэл по ди кай лэ Дэвлэско служытелё, кала варикас анда лэско ери исключин анда собрания?

САР жэ дуқал оди, кала лэ манушэс, саво тути куч, исключин анда собрания! Можэт и тумэндэ сас кацаво? Акэ со росԥэнэн и ԥэй Нинаb. Кала муля лако хулай, савэса вой прожудя 41 ӷод, вой гиндояс, кай андэ жызня хужэ кадэлэстар нисо нэ можэт тэ авэл. Но кала лако шаво ашадя лэ Иеговас, ла хулая́ и лэ бэятонэн, када пэ бутэстэ май бари бида.

2, 3. Со кай о Иегова по ди, кала лэс ашавэн лэстирэ служытеля? (Псалом 78:40, 41).

² Кати погиндон, сар ԥарэс сас лэ Иеговасти, кала лэстар отбандилэ дэсавэ лэстирэ шавэ и анӷелоря! (Иуды 6). Ай сар дэ ԥарэс лэсти сас кодэлэстар, сар терэнас и израильтяноря! Во лэн фартэ любияс, ай вонэ упалэ и упалэ жанас против лэстэ. (Адиносар Псалом 78:40, 41.) И лэ Иеговасти кадяжэ ԥарэс, кала лэс ашавэл варико анда тумаро родо. И во, сар нико авэр, полэл, со тумэндэ по ди. Амаро Дэл полэл тумэн и жалуий, и во дэла зор и подритярэла.

³ Андэ кадэя статья амэ уӷанаса, со трэбуй тэ терас, кай о Иегова тэ дэл амэнди зор тэ пэрэандярас, кала варикас анда амарэ исключин анда собрания. Кадяжэ амэ подаса дума, сар амэ екжэнэ можэм тэ поможысарас амарэ ԥралэнди и ԥэянди, савэнго родо парашаля тэ служый лэ Иеговасти. Но спэрва уӷанаса, савэ гиндоря амэ трэбуй тэ вишас анда шэро.

НА ГИНДОН, КАЙ ТУМЭ ДОШАЛЭ

4. Роспэнэн, со по ди кай и родителя, кала лэнго бэято ашавэл лэ Иеговас.

⁴ Часто и родителя гиндон, кай вонэ моӷли варисо тэ стерэн, кай лэнго бэято тэ на парашэл тэ служый лэ Иеговасти. И вонэ загиндонпэ, со вонэ стердэ най кадя. Ек ԥрал, савэстирэ шавэс исключисардэ анда собрания, дошалярэлас андэ када пэс, и лэсти дажэ снинаспэ найлашэ сунэ. Дэкала во нэ моӷ тэ зритярэл и ясва, и лэско ди фартэ дуқалас. Кацави жэ бида сас ла ԥьятэ Элизабет. Вой нащи виарақэлас пэсти ҭан, кала латирэ шавэс исключисардэ анда собрания. Вой ля тэ гиндой, со стердя най кадя, васо лако шаво на полюбисардя лэ Иеговас?

5. Ко дошало, кала о мануш ашавэл лэ Иеговас?

⁵ Трэбуй тэ сэрас, кай кажнонэсти о Иегова дя возможность тэ витидэл. Вижал, кай амэ екжэнэ можэм тэ витидас, тэ кандас лэ Иеговас чи най. Дэсавэ тэрнэ мануша, важ кастэ лэндирэ родителя на сас лашо примеро, всаек витидэ тэ служын лэ Иеговасти и на парашэн тэ кандэн лэс. Ай дэкала бывает наоборот. И родителя старыинпэ, кай лэндирэ бэятонэндэ тэ авэл бари любовь каринг о Иегова, но лэндирэ бэяцэ вибарён и ашавэн лэ Иеговас. Но сар тэ на авэл, кажно мануш можэт екжэно тэ витидэл, тэ служый лэ Иеговасти чи най (Иис. Н. 24:15). Важ када, сомнакунэ родителя, если тумарэ бэяцэ ашадэ лэ Иеговас, мангас тумэн, на трэбуй тэ дошалярэн пэс андэ када!

6. Со по ди лэ бэятонэндэ, кала лэндирэ родителя ашавэн лэ Иеговас?

⁶ Ай дэкала исин кацаво, кай варико анда родителя ашавэл лэ Иеговаско дром и, можэт, дажэ тэ ашавэл лэ ерес (Пс. 27:10). Кадэлэстар можэт тэ авэл фартэ ԥарэс лэ бэятонэнди, важ кода кай вонэ вся и время сытён лэ родителёнэндар. И ԥэй Эстер ԥэнэн, кай кала латирэ дадэс исключисардэ, вой часто ровэлас. Во най просто парашэля тэ служый лэ Иеговасти, во полэлас, со на чалёл лэ Иеговасти, и всаек терэлас када нарошно. Лати сас фартэ ԥарэс, кай лако дад кадя терэлас. Через када латэ дажэ появисайля насвалимос, кай маментонэнца вой ля фартэ тэ дарал и тэ пэрэжывает.

7. Сар о Иегова полэл лэ бэятонэн, кастэ о дад или и дэй исключоно?

⁷ Амарэ тэрнэ ԥралора и ԥэёра, ӷанэн, кай андэ собрания тумэ фартэ куч! Если тумарэ родителёнэн исключисардэ анда собрания, тоди ӷанэн, если тумэндэ дуқал оди, тоди во дуқал и амэндэ. Мангас тумэн, патян, кай о Иегова ӷанэн и полэл, сар тумэнди дэ ԥарэс. Во фартэ любий и цений тумэн, важ кода кай тумэ на парашэн тэ кандэн лэс. Амэ ек ери, и амэнди тумэ тожэ фартэ куч. На бистрэн, кай тумэ най дошалэ андэ кода, сави ришэния прилинэ тумарэ родителя. Сар ужэ амэ дям дума, о Иегова дя всаворэ манушэнди екжэнэ тэ витидэн, тэ служын лэсти чи най. Важ када кажно лэ Дэвлэско служытелё екжэно ришает, со тэ витидэл (Гал. 6:5).

8. Со трэбуй тэ терас, пока варико анда амарэ чаче на рисайля каринг о Иегова? (Диқэн и рамка «Рисав каринг о Иегова».)

⁸ Кала варико анда амарэ чаче ашавэл лэ Иеговас, амэ фартэ надеисавас, кай во рияпэ. Но пока во на рийпэ, амэнди трэбуй тэ пристас бут зор, кай амари дружба лэ Иеговаса тэ авэл май лащи. Тоди амэндар моӷут тэ сытён амарэ чаче и дажэ кодэва мануш, кас исключисардэ анда собрания. Ай инке када поможыя тэ улас пэстар о ԥаримос па ди. Уганаса, со трэбуй тэ терас, кай амари дружба лэ Иеговаса тэ авэл май лащи.

СО ПОМОЖЫЯ, КАЙ АМАРИ ДРУЖБА ЛЭ ИЕГОВАСА ВСЕГДА ТЭ АВЭЛ САСТИ?

9. Сар о Иегова можэт амэн тэ подритярэл? (Диқэн и рамка «Стихоря анда Библия, савэ придэна зор кодэлэнди, кастэ варикас анда родо исключисардэ анда собрания»).

⁹ Фартэ важно тэ пристос зор, кай тэ на хасарэс и дружба лэ Иеговаса ту и тиро ери. Ай со важ када трэбуй тэ терэс? Трэбуй тэ на промэкэс тэ адинос и Библия и тэ гиндос пала со адиносардян, ай кадяжэ тэ на промэкэс и собрания. Кадя о Иегова сможэт тэ дэл тути зор и тэ подритярэл тут. Кай и ԥэй Джоанна о дад и и барэдэр ԥэй ашадэ лэ Иеговас. Вой ԥэнэн, кай кала адиной андэ Библия пала Авигея, Эсфирь, Иово, Иосифо и пала Иисусо, лати ашэл пэ бутэстэ май вушэро. Кода, со вой пала лэндэ адиной, поможый, кай латэ тэ на авэн найлашэ гиндоря, и лати ашэл най кадя дэ ԥарэс. Ай инке вой ԥэнэн, кай ла фартэ подритярэн и диля анда Бродкастинӷо.

10. Сар и алава анда Псалом 32:6—8 поможын тэ улас пэстар и найлашэ гиндоря?

¹⁰ Вся, со тумэндэ по ди, росԥэнэн лэ Иеговасти. Кала тумэндэ найлашэ гиндоря, на парашэн тэ мангэн лэ любящёнэ Дадэс тэ дикэн пэ вся лэстирэ яқэнца. Тоди о Иегова сытярэла тумэн, кай бут со тэ полэн, и придэла зор тэ жан па правильно дром. (Адиносар Псалом 32:6—8.) Канешно, тэ росԥэнэн лэ Иеговасти вся, со тумэндэ по ди, када найвушэро, и кадэлэстар дажэ можэт тэ дуқал оди. Но о Иегова ӷанэн, сар тумэнди дэ ԥарэс. Во фартэ тумэн любий и мангэл, кай тумэ тэ росԥэнэн лэсти пала вся (Исх. 34:6; Пс. 62:7, 8).

11. Васо амэнди трэбуй тэ патяс лэ Иеговасти, кала во прилэл ришэния, сар ԥэнэнпэ андэ Евреям 12:11? (Диқэн кадяжэ и рамка «Кала варикас исключин анда собрания, када сыкавэл лэ Иеговастири любовь».)

¹¹ Амэ трэбуй тэ подритярас кодэя ришэния, сави прилэн и старейшыноря. Кала варикас исключин анда собрания, када сыкавэл, кай када лэ Иеговастири ришэния. Када сыкавэл, кай о Иегова любий, и када анэн лашимос всаворэнди андэ собрания, и дажэ кодэлэсти, ко стердя бэзэх. (Адиносар Евреям 12:11.) Дэкала варико лэл тэ ԥэнэн, кай и ԥрала анда правово камитето прилинэ нэправильно ришэния. Но трэбуй тэ сэрас, кай амэ най вся ӷанас, сар вся сас. Ай кодэла, ко нэ соӷласни, сави ришэния прилинэ и старейшыноря, кай исключисардэ лэ манушэс, вонэ моӷут тэ угаравэн, кай кодэва мануш стердя варисо най кадя, кай тэ на вистон лэс найлащя ригатар. Амаря ригатар авэла годявэрнэс тэ патяс, кай и старейшыноря драго розлинэпэ андэ кадэя дила и терэн вся па лэ Иеговастирэ принцыпоря, и сар во камэл (2 Лет. 19:6).

12. Васо амэ трэбуй тэ подритярас лэ Иеговастири ришэния, кай тэ на дас дума кодэлэнца, ко исключоно? Росԥэнэн о примеро.

¹² Если тумэ подритярэн, кай и старейшыноря прилинэ ришэния тэ исключин варикас анда ери, кадя тумэ поможына, кай о мануш май йто тэ рийпэ каринг о Иегова. И ԥэй Элизабет, пала сави ужэ дямас дума, ԥэндя, кай тэ парашэн тэ дэн дума пэстирэ взрослонэ шавэса сас фартэ ԥарэс! Но посли кода, сар о шаво рисайля каринг о Иегова, во ԥэндя, кай затердя, кай о Иегова лэс тэ просытярэл. И во дажэ ԥэндя, кай када бут сости лэс сытярдя. И посли када и ԥэй ԥэнэн, кай акана вой точно ӷанэн, кай о Иегова прилясас правильно ришэния. Ай лако хулай о Марко ԥэнэн, кай лэнго шаво закамля тэ рийпэ каринг о Иегова инке важ кода, кай вонэ на дэнас дума лэса. Инке во ԥэнэн, кай во бахтало кодэлэстар, кай о Иегова поможыяс лэнди тэ на парашэн тэ кандэн лэс!

13. Со поможыя тэ улас пэстар о ԥаримос па ди?

¹³ Росԥэнэн вся, со тумэндэ по ди, лэ друӷонэнди, савэ тумэн полэна. Проандярэн время кодэлэнца, кастэ лащи дружба лэ Иеговаса. Вонэ поможына тумэнди тэ на умэкэн и вас (Прит. 12:25; 17:17). И ԥэй Джоанна, пала сави ужэ дям дума, ԥэнэн, кай латэ сас по ди кацаво, кай вой екжэни. Но лати поможысардэ и лашэ друӷоря, кай тэ улэл пэстар кацавэ гиндоря. Ай дэкала можэт тэ авэл наоборот. Дэсавэ ԥрала и ԥэя моӷут тэ ԥэнэн кацавэ алава, савэндар ашэл инке май ԥарэс по ди. Со тоди тэ терас?

14. Васо амэнди трэбуй тэ простисарас лэ ԥралэн и лэ ԥэян, савэ терэн варисо най кадя?

¹⁴ На холявэн пэ ԥрала и пэ ԥэя. Можэт най всаворэ моӷут тэ подтидэн правильни алава (Иак. 3:2). Амэ всаворэ нэсовершэни, важ када трэбуй тэ полас, кай варико, можэт, на ӷанэнас, со тэ ԥэнэн или най нарошно ԥэнэна кода, состар ашэла ԥарэс по ди. На бистрэн пала лэ Павлостирэ алава: «На холявэн ек пэ ек и анда вся оди простин ек еқэс, если варикастэ исин васо тэ холявэл пэ авэр» (Кол. 3:13). Ек пэй, ԥэнэн, кай кала лако шаво сас исключоно, и ԥрала и ԥэя камэнас ла тэ подритярэн, но лэндэ када най фартэ драго вижалас. Вонэ най нарошно ԥэнэнас най кодэла алава, савэ трэбуй. Но о Иегова поможыяс лати тэ простий лэн. Ай акана амэ подаса дума, сар моӷут тэ поможын и ԥрала и ԥэя анда собрания кодэлэнди, кастирэ родос исключисардэ.

САР МОӶУТ ТЭ ПОМОЖЫН И ԤРАЛА И ԤЭЯ АНДА СОБРАНИЯ?

15. Со амэ можэм тэ терас важ кодэла, кастэ варикас анда ери найдэлмут исключисардэ анда собрания?

¹⁵ Придэн зор и подритярэн кодэлэн, кастэ варикас анда ери исключисардэ. И ԥэй Мириам ԥэнэн, кай кала лако цыкнэдэр ԥрал ашадя лэ Иеговас, лати на камэласпэ тэ ԥирэл пэ собрания. Вой даралас, кай котэ лэна бут пала када тэ дэн дума. Но вой поля, кай латэ райканэ друӷоря, савэ подритярэнас ла и на дэнас дума най драго пала лако ԥрал. Через када лати май вушэро сас тэ пэрэандярэл о ԥаримос. Ай авэр ԥэй ԥэнэн, кай кала латирэ шавэс исключисардэ анда собрания, и друӷоря авелэ тэ подритярэн ла и латирэ хулас. Дэсавэ дажэ на ӷанэнас, со тэ ԥэнэн. Варико ровэлас ласа, ай варико потом бишалдя открытка. Лати када фартэ трэбуй сас!

16. Сар и ԥрала и ԥэя моӷут тэ подритярэн кодэлэ ерес, кастэ варикас исключисардэ анда собрания?

¹⁶ На парашэн тэ шон сама лэ ерес, андэ саво исключисардэ варикас. Акана лэнди, сар никала трэбуй, кай лэн тэ подритярэн и тэ заботинпэ пала лэндэ (Евр. 10:24, 25). Дэкала лэндэ по ди кацаво, кабута лэн исключисардэ. Но нащи кадя тэ гиндон! Особенно фартэ важно тэ хвалисарас и тэ придас зор лэ тэрнорэ ԥралэнди и ԥэянди, кастирэ родителя ашадэ лэ Иеговас. Еқа ԥьятэ сас кацави жэ бида. Лако хулай ашадя лэ ерес и лэ Иеговас. Кай тэ пэрэандярэл кадэва ԥаримос, лати динэ зор и ԥрала и ԥэя анда собрания. Вой ԥэнэн, кай и ԥрала и ԥэя авэнас, кай тэ поможын тэ проандярэн семейно изучения и тэ гитон тэ хан. Вонэ полэнас, сар лати дэ ԥарэс и ровэнас вмести ласа. Ай если варико розмэкэлас и сплетни, вонэ зашонаспэ пала латэ. Вой ԥэнэн, кай би лэнго лати авелоп май ԥарэс! (Рим. 12:13, 15).

17. Сар и старейшыноря моӷут тэ подритярэн кодэлэн, ко умэкля и вас?

¹⁷ Старейшыноря, всегда виаракэн время, кай тэ подритярэн кацавэ ԥралэн и ԥэян, кастэ варико исключоно. Када тумари обязаность (1 Фес. 5:14). Общяйтесь лэнца жы каринг и собрания и посли латэ. Авэн каринг лэндэ, мангэнпэ лэнца. Ақарэн лэн пэ служэния и дэкала проандярэн лэнца семейно изучения. Лэнди фартэ трэбуй кадэя помощь. Полэн лэн, жалуин, шон сама и заботинпэ пала лэндэ (1 Фес. 2:7, 8).

НА ПАРАШЭН ТЭ НАДЕИНПЭ И ТЭ ПАТЯН ЛЭ ИЕГОВАСТИ

18. Со о Иегова аштярэл кодэлэндар, ко стердя бэзэх, сар ԥэнэнпэ андэ 2 Петра 3:9?

¹⁸ О Иегова «на камэл, кай варико тэ мэрэл, но камэл, кай всаворэ тэ каинпэ». (Адиносар 2 Петра 3:9.) Дажэ кала о мануш стердя баро бэзэх, важ о Иегова лэстири жызня всаек куч. Кати погиндон, кай во отдя пэстирэ любимонэ Шавэс, кай тэ витинэн амэн анда бэзэх! Важ кода кай о Иегова полэл и жалуий, во процырдэл пэско вас кодэлэнди, ко ашадя лэс, и ԥэнэн, кай вонэ тэ ринпэ палпалэ. И кай тэ полас, сар о Иегова аштярэл кацавэ манушэн, о Иисусо росԥэндясас о примеро пала дад и пала шаво, саво жылятар цэрал (Луки 15:11—32). Бут кодэла, ко ашадя лэ Дэвлэс, потом рисайлэ каринг пэско небесно Дад, и и ԥрала и ԥэя всаворэ одеса прилинэ лэн. Кацави радость сас и кай и ԥэй Элизабет. Лако шаво рисайля каринг о Иегова. Вой ԥэнэн, кай сас фартэ лошали и сас блаӷодарно, кай ла подритярэнас и поможынас, кай вой тэ на умэкэл и вас!

19. Васо амэ вся и время можэм тэ патяс лэ Иеговасти?

¹⁹ Амэ андэ вся можэм тэ патяс лэ Иеговасти. Во никала на мангэл амэн тэ стерас кода, состар амэнди авелоп найдраго. О Иегова щедро, во полэл и жалуий, и во Дад, саво любий кодэлэн, ко лэс кандэл. О Иегова никала амэн на ашавэла, особенно тоди, кала амэнди фартэ ԥарэс (Евр. 13:5, 6). Пала када ԥэнэн и о ԥрал Марко. Во ԥэнэн, кай кала лэнди сас ԥарэс, о Иегова вся и время сас паша лэндэ. О Иегова и май англэ лэла тэ дэл зор, саво трэбуй (2 Кор. 4:7). Да, дажэ кала варико анда тумарэ чаче ашадя лэ Иеговас, тумэ можэте тэ на парашэн тэ кандэн лэ Иеговас и тэ надеинпэ, кай о мануш рияпэ каринг о Иегова!