Сар када, кала о мануш па чачимастэ каийпэ?

1, 2. Соса на шонаспэ о Ахаво и о Манассия, и пала со амэ подаса дума?

БУТ викоря палпалэ правинас дуй царёря. Ек сас царё пэ дэш племена андо Израилё, ай авэр сас царё пэ дуй племена андэ Иудея. Вонэ на жувэнас андэ ек время. Но вонэ андэ варисо шонаспэ. Лэдуй царёря жылэ против о Иегова и подмарэнас лэ народос тэ терэн о найлашимос. Лэдуй вонэ тэлёнас хохавнэ дэвлэнди и умарэнас лэ манушэн, савэ на сас дошалэ. Но андэ варисо вонэ на шонаспэ. Ек ашэляпэ преступнико жы каринг пэстири смэрть, ай авэр царё каисайля андэ пэско бэзэх, и о Дэл лэс простисардя. Пала кастэ жал и дума?

² Лэ царёс, саво правияс андо Израилё, ақарэнас Ахаво. Ай лэ царёс, саво правияс андэ Иудея, ақарэнас Манассия. Кала амэ май драго уӷанаса, соса вонэ на шонаспэ, тоди поласа, со када, кала о мануш каийпэ (Деян. 17:30; Рим. 3:23). Сар дицол, кай о мануш па чачимастэ каийпэ? Кай тэ уӷанас атвето пэ кадэва вопросо, амэ погиндосараса, со сас андэ жызня кай о Ахаво, кай о Манассия и кай о шаво, саво ужыля цэрал, анда лэ Иисусостири притча, и поласа, сости амэ можэм тэ сытювас. Када важно драго тэ ӷанас, важ кода кай амэ камас, кай о Иегова тэ простий амаро бэзэх.

СОСТИ АМЭ СЫТЮВАС АНДА КОДА, СО САС ЛЭ АХАВОСА?

3. Саво правителё сас о Ахаво?

³ О Ахаво сас седьмо царё, саво правияс андо десятиплемённо царство Израилё. Во жэнисайля пэ Иезавель, лако дад правияс андо форо Сидоно. Важ кода кай када сас барвало форо, лэсти сас выӷодно тэ жэнийпэ пэр латэ. Но через кадэва брако о израильско народо инке май дур отжыля лэ Иеговастар. И Иезавель тэлёлас лэ Ваалости, и вой подмарэлас лэ Ахавос, кай андо Израилё всаворэ тэ тэлён лэ хохавнэ дэвлэнди. О народо залэласпэ билажавардимаса андэ пэстирэ храморя и дажэ анэнас пэстирэ бэятонэн андэ жэртва. Пока и Иезавель правияс, вой умардя бутэ лэ Иеговастирэ пророконэн, важ када ни еқэ пророкостэ на сас спокойно жызня (1 Цар. 18:13). И о Ахаво сас кацаво жэ, сар и вой. Во терэлас баро бэзэх англа Иегова и терэлас хужэ всаворэндар, ко сас жы лэстэ (1 Цар. 16:30). Но пала вся када ӷанэнас о Иегова. Во диқэлас, со терэлас о Ахаво и лэстири хулаи и Иезавель. Но всаек о Иегова жалуияс лэн и лэ народос, важ када во бишалэлас каринг лэндэ лэ пророконэн. Через о пророко Илья во ԥэнэнас, кай вонэ тэ обгиндонпэ, пока най позно. Но лэ Ахавости и ла Иезавеляти сас всаек.

4. Со о Иегова ԥэндя лэ Ахавости, и сар во пэс андярдя?

⁴ О Иегова ришыл, кай будэр на лэла тэ тэрпий када. Во бишалдя каринг о Ахаво и каринг лэстири хулаи лэ пророкос лэ Ильяс, кай во тэ ԥэнэн, кай всаворэ́ лэндирэ ерес умарэна. Кала о Ахаво када ашундя, лэс кабута шуряса шындэ! И тоди кадэва ӷордо царё прижангля, кай терэлас най кадя (1 Цар. 21:19—29).

5, 6. Васо можно тэ ԥэнас, кай о Ахаво най па чачимастэ каисайля?

⁵ Хоть о Ахаво и прижангля, кай сас дошало, всаек кода, сар во пэс андярэлас, на сыкавэлас, кай во каисайля. Уля во лэ хохавнэ дэвлэс лэ Ваалос анда пэско царство? Най. Ԥэндя во лэ народости тэ тэлён кати лэ Иеговасти? Най. О Ахаво на каисайля и када бут со доԥэнэн.

⁶ Прожыля набут время и о Ахаво мангля, кай о иудейско царё Иосафато тэ поможый лэсти тэ жал войнаса против Сирия. О Иосафато кандэлас лэ Иеговас, и важ када англа кода, сар тэ жал пэ кодэя война, во ԥэндя тэ пушэн совето кай лэ Иеговаско пророко. Лэ Ахавости када на чалеля и во ԥэндя: «Исин инке ек мануш, через саво амэ можэм тэ пушас, со ԥэнэна о Иегова. Но мэ лэс нэнавижу, важ кода кай во никала пала мандэ на ԥэнэн нисо лашо, ек кати о найлашимос». Но всаек и царёря ақардэ лэ Михеёс и во ԥэндя, кай лэ Ахавос на аштярэл нисо лашо. Но вместо кода, кай тэ каийпэ и тэ мангэл лэ Иеговас тэ простий лэс, кадэва найлашо царё шутя лэ пророкос андо бар (1 Цар. 22:7—9, 23, 27). Да, лэстэ вижыля тэ улэл лэ Иеговастирэ пророкос, но тэ мишыий, кай лэ Иеговаско алав тэ исполнийпэ, сас най па лэско зор. Андэ кадэя война лэ Ахавос умардэ (1 Цар. 22:34—38).

7. Со о Иегова гиндояс пала Ахаво посли лэстири смэрть?

⁷ Посли кода, сар о Ахаво муля, дицэля, со гиндояс пала лэстэ о Иегова. Кала о Иосафато блаӷополучно рисайля цэрэ, о Иегова бишалдя каринг лэстэ лэ пророкос, савэс ақарэнас Ииуё. Во трэбуй сас тэ ԥэнэн, кай нащи сас лэстэ тэ авэл варисави дила лэ Ахавоса. О пророко ԥэндя лэсти: «Хэба трэбуй тэ поможыс лэ найлашэ манушэнди и тэ любис кодэлэн ко шол вэрыцыя по Иегова?» (2 Лет. 19:1, 2). Кати погиндон, если о Ахаво чаче тэ каийпэ анда вся оди, тоди ԥэндоп о пророко пэр лэстэ, кай во найлашо мануш и шол вэрыцыя по Иегова? Дицол, кай о Ахаво прижангля, кай во дошало, кати пэ алава, ай пэ дила на дицэля, кай во каисайля.

8. Со амэ уӷанглям анда кода, сар андярдя пэс о Ахаво?

⁸ Сости амэ сытювас анда кода, со сас лэ Ахавоса? Кала во ашундя, кай лэстирэ ерес умарэна, во прижангля пэстири дош. Када сас правильно. Но андэ кода, сар пэс андярэлас о Ахаво потом, дицэля, кай во па чачимастэ на каисайля. Вижал, кала о мануш каийпэ, лэсти на хутила просто тэ ԥэнэн, кай во стердя нэправильно. Акана подаса дума пала авэр царё и уӷанаса, со инке трэбуй тэ стерэл о мануш, кай тэ дицол, кай во каийпэ па чачимастэ.

СОСТИ АМЭ МОЖЭМ ТЭ СЫТЮВАС АНДА КОДА, СО САС ЛЭ МАНАССИЯСА?

9. Саво правителё сас о Манассия?

⁹ Прожыля варикай 200 лет, и царё андэ Иудея ашэля о Манассия. Во сас инке май хужэ, чем о Ахаво. Андэ Библия пистромэ: «Во терэлас фартэ бут найлашимос англа лэ Иеговастирэ яқа и холярэлас лэс» (2 Лет. 33:1—9). О Манассия построисардя бут жэртвенникоря лэ хохавнэ дэвлэнди, и лэстэ дажэ хутилдя смилость тэ стол андэ лэ Иеговаско храмо свынто столбо (наверно, када сас идоло богини плодородия). Инке во залэласпэ бэнгалимаса, драбатярэлас и калдуияс. Кадяжэ во умардя бутэ манушэн, савэ на сас дошалэ. И кадэва фартэ жэстоко мануш дажэ сԥабардя пэстирэ шавэн, кай тэ анэн жэртва лэ хохавнэ дэвлэнди (2 Цар. 21:6, 7, 10, 11, 16).

10. Сар о Иегова просытярдя лэ Манассияс, и сар во пэс андярдя?

¹⁰ О Иегова най еқвар бишалэлас пэстирэ пророконэн каринг о Манассия, кай тэ ԥэнэн, со лэса авэла, если во на парудёла. Но, сар и о Ахаво, во нисо на камэлас тэ ашунэн. И тоди о Иегова стердя кадя, кай пэ Иудея динэ и ассирийцоря. Вонэ шутэ пэр лэстэ и цэпоря, андярдэ андо Вавилоно и шутэ андо бар. Котэ во фартэ загиндосайля пала пэстири жызня. Во анда вся оди прижангля, кай дошало англа Иегова. Но када инке най вся. О Манассия ля фартэ тэ мангэл лэ Иеговас, кай тэ простий лэс. Дицол, кай во мангэласпэ най еқвар пала када. Кадэва мануш, саво сас фартэ жэстоко, ля тэ парудёлпэ. Во ля тэ полэл лэ Иеговас, сар пэстирэ Дэвлэс, и закамля, кай лэстэ тэ авэл лащи дружба лэса (2 Лет. 33:10—13).

11. Сар и алава анда 2 Летопись 33:15, 16 сыкавэн, кай о Манассия па чачимастэ каисайля?

¹¹ О Манассия ашэля авэр мануш, када дицолас па лэстирэ молитвы. Важ кода кай во анда вся оди мангэласпэ, о Иегова рисардя лэсти лэстири правления. И андэ кода, сар о Манассия андярэлас потом пэстири жызня, дицолас, кай во па чачимастэ каисайля. И када сас най кати пэ алава, сар када стердясас о Ахаво. О Манассия ля тэ андярэл пэс совсем па аврятэ. Во стердя вся, кай тэ улэн лэ хохавнэ дэвлэн и кай о народо андэ Иудея тэ тэлёл кати лэ Иеговасти. (Адиносар 2 Летопись 33:15, 16.) Чаче, лэстэ трэбуй сас тэ авэл бари вера и смилость, кай тэ стерэл када. Всаворэ бэрша жы каринг када, о Манассия пэрэвэдияс пэстирэ ерес и лэ народос, кай вонэ тэ тэлён лэ хохавнэ дэвлэнди. Ай акана, кала о Манассия сас ужэ андэ бэршэндэ, во стердя вся, кай бут со тэ парувэл андэ пэско царство. Во полэлас, андэ кода, кай о народо тэлёлас лэ хохавнэ дэвлэнди, во сас дошало. О Манассия фартэ паруделя и ашэля лашо примеро важ пэско внуко Иосия, саво потом сас лашо царё (2 Цар. 22:1, 2).

12. Со амэ уӷанглям анда кода, сар каисайля о Манассия?

¹² Сости амэ сытювас анда кода, со сас лэ Манассияса? Во, сар и о Ахаво, прижангля пэстири дош, но во стердя най кати када. Во ясвэнца мангэлас лэ Иеговас, кай во тэ жалуий лэс анда вся оди. О Манассия фартэ паруделя, и во пристодя бут зор, кай тэ парувэл кода, со во стердя. Во най кати ля анда вся оди тэ тэлёл лэ Иеговасти, но инке во ԥэнэнас, кай авэр мануша тэ терэн кадя жэ. Кода, со сас андэ жызня кай о царё Манассия, сыкавэл, кай дажэ само найлашо мануш, саво терэл баро бэзэх, можэт тэ надеийпэ, кай о Иегова лэс простия, если во каияпэ. Важ кода кай о Иегова добро и камэл тэ простий (Пс. 86:5).

13. Исин разница, кала о мануш прижанэн пэско бэзэх и кала каийпэ? Росԥэнэн о примеро.

¹³ О Манассия най просто прижангля, кай терэлас баро бэзэх, но во пэ дила сыкадя, кай каийпэ. И када фартэ важно гиндо. Прецтавь пэсти, кай ту авэс андэ кондитерско тэ тинэс пирожына. Но о продавецо вместо пирожына дэл тути кати о яро. Тути када чалёла? Канешно най. Ай если о продавецо ԥэнэна, кай о яро када само ӷлавно, со исин андэ кадэя пирожына? Када нисо на парувэла. Кадяжэ, кала лэ манушэсти ԥарэс по ди кодэлэстар, со во стердя, када драго, но када инке най вся. О Иегова аштярэл, кай о мануш, саво терэлас бэзэх, па чачимастэ тэ каийпэ. Кай тэ полас, сар када, амэ подаса дума пала лэ Иисусостири притча, андэ сави дицол, со када, кала о мануш каийпэ.

ПАР СО ДИЦОЛ, КАЙ О МАНУШ ПА ЧАЧИМАСТЭ КАИЙПЭ?

14. Со сыкавэл, кай о шаво, саво жыля цэрал, ля тэ каийпэ?

¹⁴ Андэ Луки 15:11—32 пистромэ пала шаво, саво ужыля цэрал. Кадэва тэрно мануш закамля тэ жувэл, сар лэсти чалёл. Во ужыля вобще андэ авэр страна. Во терэлас вся, со лэсти камэласпэ. Но кала лэстэ андэ жызня ашэля бут ԥаримос, во загиндосайля и поля, пэ скати лэсти фэдэр сас тэ жувэл андэ лэ дадэско цэр. Сар ԥэндя о Иисусо, во обгиндосайля, ришыл тэ рийпэ цэрэ и тэ мангэл кай пэско дад прощения. Вижал, андэ кадэва маменто, кала во поля, кай фартэ найдраго стердя, во ля тэ парудёл. Но со потом сас? Лэсти трэбуй сас инке варисо тэ стерэл.

15. Сар о тэрно мануш анда лэ Иисусостири притча сыкадя, кай во па чачимастэ каисайля?

¹⁵ Кай кадэва тэрно мануш каисайля, дицолас па лэстири дила. Во прожыля баро дром, кай тэ рийпэ цэрэ. Кала во додиқля пэстирэ дадэс, во ԥэндя: «Дадэ, мэ стердэм бэзэх против нэбо и против тутэ. Мэ ужэ на ашав, кай пэр мандэ тэ ԥэнэн тиро шаво» (Луки 15:21). Анда кадэла алава, савэ во ԥэндя анда вся оди, дицолас, кай во камэлас тэ рий и дружба лэ Иеговаса. Ай инке во полэлас, кай через лэстэ лэстирэ дадэстэ дуқалас оди. И кай упалэ тэ додиқэл лэ дадэстири любовь, во дажэ камэлас тэ авэл, сар рабо, андэ лэско цэр! (Луки 15:19). Када най просто лащи притча. Андэр латэ исин фартэ важни принцыпоря важ и старейшыноря, кала вонэ лэн тэ розлэнпэ андэ кода, чаче о христианино каийпэ чи най.

16. Васо лэ старейшынонэнди най всегда вушэро тэ полэн, каийпэ о мануш па чачимастэ чи най?

¹⁶ Тэ полэс каийпэ о мануш па чачимастэ чи най, када найвушэро, важ кода кай и старейшыноря нэ моӷут тэ диқэн, со кай о мануш андо ди. Кала вонэ диқэн, сар о мануш пэс андярэл, вонэ трэбуй тэ полэн, ля во тэ вэрыцый о бэзэх, саво стердя, чи най. Но дэкала о христианино терэл бэзэх и лэс вобще на хал и совесть пала када. Тоди лэ старейшынонэндэ исин васо тэ на патян лэ манушэсти, кай во каийпэ.

17. а) Анда саво примеро дицол, кай кала лэ манушэсти ԥарэс по ди, када най всегда сыкавэл, кай во па чачимастэ каисайля? б) Со сыкавэл, кай о мануш па чачимастэ каийпэ, сар ԥэнэнпэ андэ 2 Коринфянам 7:11?

¹⁷ Погиндосарам пала ек примеро. Например, ек ԥрал бут бэрша изменяет пэстиря хулаяти. И вместо кода, кай тэ парудёлпэ, во на парашэл тэ терэл кадэва бэзэх и обхохавэл пэстиря хулая, лэ друӷонэн и лэ старейшынонэн. Но прожал время, и пала кадэва бэзэх всаворэ уӷанэн. И тоди о правово камитето лэл лэса тэ дэл дума. О ԥрал полэл, кай во дошало. И дажэ дицол, кай кабута лэсти ԥарэс кадэлэстар. Но када на хутилэла, кай тэ полэн, кай во каийпэ па чачимастэ. Важ кода кай и дума жал, най кай во еқвар стердя бэзэх, ай кай во када терэлас бэршэнца. И инке, во най екжэно прижанделя андэ пэско бэзэх, ай просто пала када всаворэ уӷанглэ. И старейшыноря трэбуй тэ додиқэн, со доԥэнэн, кай о мануш па чачимастэ ля тэ вэрыцый о бэзэх, ай кадяжэ парудя пэстирэ гиндоря и паруделя. (Адиносар 2 Коринфянам 7:11.) Но пэ када трэбуй время. Май ӥто всаворэстар, кацавэ манушэс трэбуй авэла тэ исключин анда собрания. И во тэ рийпэ сможэт кати тоди, кала диласа сыкавэла, кай во каисайля (1 Кор. 5:11—13; 6:9, 10).

18. Со сыкавэл, кай о мануш па чачимастэ каисайля, и андэр со во можэт тэ патял?

¹⁸ Со сыкавэл, кай о мануш па чачимастэ каийпэ? О мануш, савэс исключисардэ, трэбуй тэ мангэлпэ лэ Иеговасти, тэ на промэкэл и собрания и тэ изучает и Библия. Пала када лэсти, канешно, ԥэнэна и старейшыноря. Кадяжэ лэсти трэбуй тэ обжал кацавэ ситуацыи, через савэ во сможэт упалэ тэ терэл бэзэх. Если кацаво мануш лэла тэ пристол вся пэско зор, кай тэ рий пэстири дружба лэ Иеговаса, тоди о Иегова вся лэсти простия, и во рияпэ андэ собрания. Канешно, на трэбуй, кай всаворэ мануша тэ терэн варисо ек, кай тэ сыкавэн, кай вонэ каинпэ. Важ када, кала и старейшыноря розлэн лэ манушэстири дила, саво стердя бэзэх, вонэ драго розуӷанэн, сар вся сас и васо во кадя стердя. Вонэ пэстар на ԥэнэн лэ манушэсти, со во трэбуй тэ стерэл, кай тэ рийпэ андэ собрания, ай терэн вся кати кадя, сар ԥэнэн о Дэл.

19. Со сыкавэл, кай о мануш па чачимастэ каийпэ? (Иезекииль 33:14—16).

¹⁹ Анда кадэя статья амэ полям важно гиндо. Кай о мануш па чачимастэ тэ каийпэ, лэсти трэбуй тэ стерэл варисо май бут, чем просто тэ мангэл прощения. Лэсти трэбуй андо ди и андэ годи вся тэ парувэл. Во трэбуй тэ ашавэл пэстири найлащи жызня и упалэ тэ жувэл кадя, сар ԥэнэн о Иегова. (Адиносар Иезекииль 33:14—16.) Лэстири дружба лэ Иеговаса фартэ римосайля. Важ када во трэбуй вся и время тэ гиндой пала кода, сар жэ упалэ тэ рий ла.

ПОМОЖЫН ЛЭ МАНУШЭСТИ, САВО СТЕРДЯ БАРО БЭЗЭХ, ТЭ КАИЙПЭ

20, 21. Сар ту можэш тэ поможыс лэ манушэсти, саво стердя бэзэх?

²⁰ Анда лэ Иисусостирэ алава дицолас, васо во авеля пэ ԥув. Во ԥэнэнас: «Мэ авелэм тэ ԥэнав, кай тэ каинпэ и ӷрешникоря» (Луки 5:32). Вижал, и амэ трэбуй тэ стерас вся, кай тэ поможысарас лэ манушэсти андэ када. Например, ту уӷанглян, кай тиро друӷо стердя баро бэзэх. Со ту терэса?

²¹ Кала ту лэса тэ гаравэс о бэзэх, саво стердя тиро друӷо, ту терэса лэсти кати хужэ. И всаек на вижала тэ угаравэс лэско бэзэх, важ кода кай о Иегова вся диқэл (Прит. 5:21, 22; 28:13). Ту поможыса пэстирэ друӷости, если ԥэнэса, кай во тэ жал каринг и старейшыноря и пала вся тэ росԥэнэн. Важ кода кай вонэ заботинпэ, кай амэндэ тэ авэл вся драго. Но если во на закамэла тэ росԥэнэн лэнди пала пэско бэзэх, ту трэбуй екжэно када тэ стерэс. Важ кода кай тиро друӷо лэл тэ хасарэл и дружба лэ Иеговаса. Кадя ту сыкавэса, кай ту чаче лэско друӷо.

22. Со амэ уӷанаса анда авэр статья?

²² Если о христианино терэл бэзэх ужэ най ек бэрш, и лэс пала када на хал и совесть, ай и старейшыноря ришын, кай лэс трэбуй тэ исключин анда собрания, сыкавэл када, кай и ԥрала на полинэ лэс и на жалуисардэ? Пала када амэ уӷанаса андэ авэр статья. Андэр латэ ԥэнэнпэ, сар о Иегова полэл и жалуий кодэлэн, ко стердя бэзэх, кала лэн просытярэл, и уӷанаса, сости амэ анда када можэм тэ сытювас.