Амэ служысарас лэ Дэвлэсти, саво «анда вся оди полэл и жалуий»

1. Кала по мануш ԥэнэн, кай во «полэл и жалуий», кас тумэ пэсти прецтавляете?

КАЛА по мануш ԥэнэн, кай во «полэл и жалуий», кас тумэ пэсти прецтавляете? Можэт, одялэ манушэс, саво добро и поможый аврэнди. Ай можэт, тумэ сгиндон пала самаритянино, пала саво росԥэнэнпэ андэ лэ Иисусостири притча. Во сыкадя пэстири жалость каринг о евреё, пэ саво динэ и бандиторя. Кадэлэ самаритяниности ашэля жалко лэ евреёс, важ кода кай во чуть на муля. И во сыкадя пэстири любовь, кай ля тэ заботийпэ пала лэстэ, хоть во сас най анда лэско народо (Луки 10:29—37). Кадэя притча сыкавэл, со када, кала полэн и жалуин. Точно кадяжэ терэл амаро Дэл. Во кажно дес сыкавэл пэстири любовь каринг амэндэ, кай полэл и жалуий.

2. Андэр со инке дицол, кала варико полэл и жалуий?

² Андэр со инке дицол, кай о мануш полэл и жалуий аврэн? Кацаво мануш можэт тэ ришый тэ на просытярэл лэ манушэс, саво дошало андэ варисо. И сар ԥэнэнпэ андо Псалом 103:10, о Иегова кадя и обжалпэ пэстирэ служытелёнэнца. Котэ ԥэнэнпэ: «Во на обжалпэ амэнца па амарэ ӷрехоря». Но дэкала можэт тэ авэл и па аврятэ. О Иегова можэт строӷо тэ просытярэл кодэлэс, ко стердя бэзэх.

3. Пала савэ вопросоря амэ подаса дума?

³ Андэ кадэя статья амэ подаса дума пала трин вопросоря. Васо о Иегова полэл и жалуий? Можно тэ ԥэнас, кай кала строӷо просытярэн варикас, када сыкавэл, кай лэс полэн и жалуин? И со поможыя амэнди тэ полас и тэ жалуисарас аврэн? Диқам, со пала када ԥэнэнпэ андэ Библия.

ВАСО О ИЕГОВА ПОЛЭЛ И ЖАЛУИЙ АВРЭН?

4. Васо о Иегова полэл и жалуий аврэн?

⁴ Важ кода кай во любий. Андэ дуйто ӷлава Эфесянам о Павло пистросардя, кай кадя, сар о Иегова, нико нэ сможэт тэ полэл и тэ жалуий аврэн. Котэ ԥэнэнаспэ пала нэсовершэни памазаникоря, савэ лэна тэ жувэн по нэбо (Эф. 2:4—7). Но най кати лэн о Иегова полэл и жалуий. О Давидо андэ ек Псалом пистросардя кадя: «О Иегова добро каринг всаворэ, и кай во полэл и жалуий, дицол андэ вся лэстири дила» (Пс. 145:9). Важ кода кай о Иегова любий лэ манушэн, во сыкавэл када тоди, кала када трэбуй.

5. Катар о Иисусо ӷанэн, кай лэ Иеговасти фартэ чалёл тэ полэл и тэ жалуий лэ манушэн?

⁵ Лэ Иеговасти чалёл тэ полэл и тэ жалуий лэ манушэн, и пала када май драго всаворэндар ӷанэн о Иисусо. Сар инке во на авелясас пэ ԥув, во проандярдя по нэбо пэстирэ Дадэса фартэ бут бэрша (Прит. 8:30, 31). И мануша жувэн пэ ԥув ужэ дэлмут, и о Иисусо вся кадэя время диқэлас, сар о Иегова полэлас и жалуияс лэн, хоть вонэ терэнас бут ӷрехоря! (Пс. 78:37—42). Важ када о Иисусо часто росԥэнэнас, сар о Иегова полэл и жалуий лэ манушэн.

6. Сар о Иисусо сыкадя, кай о Иегова жалуий амэн анда вся оди?

⁶ О Иисусо, кай тэ сыкавэл, сар о Иегова любий тэ жалуий лэ манушэн, росԥэндя притча. Амэ ужэ дямас дума пала кадэя притча андэ кодэя статья. Андэр латэ ԥэнэнпэ, кай о шаво ашадя пэско цэр, ля тэ андярэл найлащи жызня и розындярдя вся, со лэстэ сас (Луки 15:13). Но потом во каисайля, поля, кай дошало, и рисайля. Со стердя лэско дад, кала во рисайля цэрэ? Кала лэско дад дурал додиқля лэ шавэс, «лэсти ашэля лэс жалко. Во прастая каринг лэстэ, обля лэс и нежно чуминдя». Во на ля тэ лажаварэл пэстирэ шавэс. Ай наоборот, анда вся оди приля лэс андо ери. И хоть о шаво сас дошало, о дад простисардя лэс анда вся оди, поля и жалуисардя, важ кода кай во каисайля. Андэ кадэя притча о Иисусо сыкадя, кай о Иегова, сар кадэва дад, камэл тэ простий амэн, если амэ анда вся оди каисавас. Када фартэ лэл амэн лэ одестар (Луки 15:17—24).

7. Сар лэ Дэвлэстири мудрость дицол андэ кода, кай во полэл и жалуий амэн?

⁷ Важ кода кай во фартэ мудро. Всаворэ лэ Иеговастирэ ришэнии анэн амэнди кати о лашимос. Но во най кати мудро. Андэ Библия ԥэнэнпэ: «Но и мудрость па нэбо... вся и время жалуий и терэл лашимос» (Иак. 3:17). Амаро небесно Дад о Иегова ӷанэн, кай амэнди чалёл, кала амэн полэн и жалуин (Пс. 103:13; Ис. 49:15). Хоть амэ нэсовершэни, во всаек дэла амэнди райкани жызня, сави авэла англэ. Кай о Иегова фартэ бари мудрость, и важ када во камэл тэ полэл и тэ жалуий амэн, кала када трэбуй. Инке амаро мудро Дэл полэл, кай нащи вся и время тэ жалуис манушэс, важ кода кай кадя дицэлоп кабута лэсти чалёл, кала варико терэл бэзэх.

8. Со трэбуй дэкала тэ терэн андэ собрания и васо?

⁸ Со амэ трэбуй тэ терас, кала варико анда амарэ ԥрала или ԥэя андэ собрания андярэл пэс билажавардэс? О Иегова амэнди ԥэнэн через о апостоло Павло, кай амэ трэбуй тэ парашас тэ общяемся кацавэ манушэса (1 Кор. 5:11). Важ када лэ ӷрешникос, саво на каисайля, исключин анда собрания. Када трэбуй, кай тэ фэрин лэ ԥралэн и лэ ԥэян, савэ на парашэн тэ кандэн лэ Дэвлэс, ай кадяжэ кай и собрания тэ авэл вужи. Но варикасти можэт тэ здэлпэ, кай кала исключин, када на сыкавэл, кай о Дэл полэл и жалуий кодэлэ манушэс. Чаче када кадя? Давайте розласапэ.

КАЛА ИСКЛЮЧИН АНДА СОБРАНИЯ, СЫКАВЭЛ, КАЙ ЛЭ МАНУШЭС ПОЛЭН И ЖАЛУИН?

9, 10. Саво примеро сыкавэл, кай кала исключин лэ манушэс анда собрания, лэс полэн и жалуин анда вся оди? (Евреям 12:5, 6).

⁹ Канешно, фартэ ԥарэс тэ ашунас, кала варикас анда амарэ друӷоря или кас драго ӷанас, исключин анда собрания. И амэ можэм дэкала тэ на дополас, чаче лэс трэбуй сас тэ исключин. Хэба андэ када дицол, кай лэс жалуин? Да. Важ кода кай если лэс тэ на исключин, тоди када на сыкадоп, кай лэ манушэс любин, полэн и жалуин (Прит. 13:24). Ай можэт тэ поможый лэ манушэсти, саво стердя бэзэх, кода, кай лэс исключин? Можэт. Бут ԥрала и ԥэя, савэ стердэсас варикала бэзэх, ԥэнэн, кай кода, кай и старейшыноря лэн исключисардэсас анда собрания, када поможысардя лэнди тэ обгиндонпэ, тэ исправинпэ и тэ ринпэ каринг о Иегова. (Адиносар Евреям 12:5, 6.)

¹⁰ Кай фэдэр када тэ полас, подам дума пала ек примеро. Со терэл о пастухо, кала ек анда бакрорэ занасвавэл? Во полэл, кай о насвалимос можэт тэ розжалпэ, и моӷут тэ насвавэн авэр бакрорэ, тоди во одындярэл кадэлэ бакрорэс анда стадо. Но кадэла жывотни нэ моӷут тэ авэн екжэнэ, вонэ присытелэ тэ авэн андо стадо. Вонэ цырдэнпэ ек еқэстэ и лэнди найдраго, кала вонэ ашэнпэ екжэнэ. Вижал, со о пастухо фартэ жэстоко, кай камэл кадя тэ личий? Канешно, най. Во полэл, кай лэ бакрорэсти нащи тэ ашэлпэ андо стадо, кай тэ на заразий аврэн. Кадя во фэрий вся о стадо. (Диқэн Левит 13:3, 4.)

11. а) Васо лэ манушэс, савэс исключин, можно тэ сыстос лэ бакрорэса, саво занасвайля? б) Со о исключоно можэт тэ на парашэл тэ терэл и сави помощь лэсти моӷут тэ дэн?

¹¹ Лэ манушэс, савэс исключин анда собрания, можно тэ сыстос кацавэ бакрорэса. Можно тэ ԥэнэн, во тожэ занасвайля, кай хасардя и дружба лэ Дэвлэса (Иак. 5:14). Важ када лэс трэбуй тэ исключин, кай авэр ԥрала и ԥэя тэ на сытён лэстар. Андэ када дицол лэ Иеговастири любовь каринг всаворэ лэстирэ служытеля, ай кадяжэ каринг о мануш, саво стердя бэзэх, кай во тэ полэл, пэскати дэ баро бэзэх во стердя, и тэ каийпэ. Хоть во и исключоно, во всаек можэт тэ ԥирэл пэ собрания, лэстэ можэт тэ авэл вся амари литература, кай во тэ адиной ла екжэно. Кадяжэ тэ диқэл о Бродкастинго, и тэ старыийпэ, кай лэстэ упалэ тэ авэл лащи дружба лэ Иеговаса. Кала и старейшыноря диқэн, кай о исключоно старыийпэ тэ парудёл, вонэ моӷут тэ дэн лэсти советоря, савэ поможына тэ рий пэстири дружба лэ Иеговаса и упалэ тэ ашэл лэско служытелёb.

12. Сар дицол, кай и старейшыноря любин и жалуин лэ манушэс, саво на каисайля?

¹² Трэбуй тэ сэрас, кай анда собрания исключин кати кодэлэн, ко на каисайля андэ пэско бэзэх. Англа кода, сар тэ прилэн кацави важно ришэния, и старейшыноря вся драго розуӷанэн. Вонэ ӷанэн, кай о Иегова просытярэл лэ манушэс кадя, сар во затердя, и во камэл, кай и вонэ кадя тэ терэн (Иер. 30:11). Вонэ любин всаворэ ԥралэн и ԥэян и на камэн, кай хоть варико тэ хасарэл и дружба лэ Иеговаса. Но дэкала, кай тэ сыкавэн лэ манушэсти, кай лэс любин и жалуин, лэс исключин анда собрания.

13. Васо лэ христианинос анда Коринфо трэбуй сас тэ исключин анда собрания?

¹³ Сгиндосарам, со сас андо пэрво вико андо Коринфо. О апостоло Павло уӷангля, кай ек христианино жувэлас пэстирэ дадэстиря хулаяса. Када сас баро лажаимос! Андэ дэлмутни время о Иегова ԥэндя лэ израильтянонэнди, кай о мурш, саво жувэл лэ дадэстиря хулаяса, лажаварэл пэстирэ дадэс, и кацавэ манушэс трэбуй сас тэ умарэн (Лев. 20:11). Канешно, о Павло нэ моӷ тэ стерэл кадя, сар запистромэ андэ лэ Моисеёско законо, и тэ умарэл кодэлэ манушэс. Но во приԥэндя, кай кацавэ христианинос, трэбуй тэ исключин анда собрания. Через кода, сар андярдя пэс кадэва христианино, и ԥрала и ԥэя линэ тэ гиндон, кай андэ када нинай нисо (1 Кор. 5:1, 2, 13).

14. Сар о Павло сыкадя, кай полэл и жалуий лэ манушэс, савэс исключисардэ анда собрания андо Коринфо, и васо? (2 Коринфянам 2:5—8, 11).

¹⁴ Прожыля дэсави время и о апостоло Павло уӷангля, кай кодэва мануш фартэ паруделя и па чачимастэ каисайля андэ пэско бэзэх. О Павло полэлас, кай нащи тэ авэл фартэ строӷо лэса, мэк во дажэ лажавардя вся и собрания. Важ када во ԥэндя лэ старейшынонэнди, кай тэ простин кадэлэ манушэс и тэ подритярэн. Шон сама, о Павло ԥэндя, кай вонэ тэ на авэн фартэ строӷи лэса. О Павло поля и жалуисардя кодэлэ манушэс, саво каисайля андо бэзэх. Во на камэлас, кай кадэлэ манушэсти тэ авэл фартэ ԥарэс по ди и во тэ гиндой, кай лэс нико на простия. (Адиносар 2 Коринфянам 2:5—8, 11.)

15. Сар и старейшыноря моӷут и тэ жалуин аврэн, и тэ авэн строӷи?

¹⁵ Кадя жэ, сар и лэ Иеговасти, лэ старейшынонэнди чалёл тэ жалуин лэ манушэн. И если када можно и исин васо, вонэ на исключина анда собрания. Ай если када трэбуй, тоди вонэ строӷо просытярэна. Важ кода кай если вонэ на исключина анда собрания, тоди на дицола, кай вонэ полэн и жалуин, ай наоборот, када сыкавэла, кай вонэ на шон сама по бэзэх, саво стердя о мануш. Но хэба кати и старейшыноря трэбуй тэ полэн и тэ жалуин аврэн?

СО ПОМОЖЫЯ ТЭ ПОЛАС И ТЭ ЖАЛУИСАРАС АВРЭН?

16. Сар о Иегова обжалпэ кодэлэнца, ко на полэл и на жалуий аврэн, сар ԥэнэнпэ андэ Притчи 21:13?

¹⁶ Кажно андар мэндэ камэл тэ сытёл лэ Иеговастар тэ полэл и тэ жалуий аврэн. Васо? Важ кода кай о Иегова на лэла тэ ашунэл кодэлэндирэ молитвы, ко на полэл и на жалуий аврэн. (Адиносар Притчи 21:13.) Ужэ ек кадэлэ гиндостар ашэл найдраго. Важ када амэ старысавас тэ терас вся, кай тэ на авас жэстоки и фартэ строӷи. Амэ на андярас пэс сар кодэла, «ко ԥандавэл и кан, кай тэ на ашунэн, сар о чороро мангэл помощь». И если варикасти анда ԥрала или ԥэя найдраго, амэ старысавас лэнди тэ поможысарас. Инке амэ фартэ драго полас и алава: «Ко на полэл и на жалуий аврэн, тоди и лэс по сындо на полэна и на жалуина» (Иак. 2:13). Если амэ най ӷорди и прижанас, кай амэнди трэбуй, кай амэн тэ полэн и тэ жалуин, тоди амэнди май вушэро авэла тэ андярас пэс кадяжэ аврэнца. Особенно важно тэ полас и тэ жалуисарас кодэлэн, ко каисайля и рисайля андэ собрания.

17. Сар о Давидо сыкавэлас, кай па чачимастэ полэл и жалуий?

¹⁷ Кай тэ полас и тэ жалуисарас аврэн и тэ на авас фартэ строӷи, амэнди поможына и примероря анда Библия. Сгиндосарам пала Давидо. Во най еқвар жалуияс аврэн. Например, о царё Сауло камэлас лэс тэ умарэл. Но о Давидо полэлас, кай када лэ Иеговаско памазанико. И важ кода кай во жалуияс лэс, во никала на камэлас важ пэстэ тэ рий (1 Сам. 24:9—12, 18, 19).

18, 19. Андэ савэ дуй маменторя дицэля, кай о Давидо на сыкадя, кай во полэл и жалуий аврэн?

¹⁸ Но дэкала о Давидо на жалуияс аврэн. Например, кала о ӷрубо Навало найдраго дя дума лэса и на дя лэсти и лэстирэ манушэнди хамос, о Давидо фартэ росхоляйля и закамля тэ умарэл лэ Навалос и всаворэ муршэн андэ лэско цэр. Но драго, кай и Авигея, лэ Навалостири хулаи, на дя, кай о Давидо варикас тэ умарэл (1 Сам. 25:9—22, 32—35).

¹⁹ Ай акэ инке сар андярдя пэс о Давидо. О пророко Нафано росԥэндя лэсти пала барвало мануш, саво одля послиднёнэ бакрорэс кай о чороро мануш. О Давидо драго ӷанэнас лэ Моисеёско законо, кай если чордэ лэ бакрорэс, тоди трэбуй тэ стон по ҭан штарвар май бут (Исх. 22:1). Но о Давидо кадя росхоляйля, кай ԥэндя тэ умарэн кацавэ манушэс! (2 Сам. 12:1—6). Па чачимастэ о Нафано вигиндосардя када, кай о Давидо тэ полэл, пэскати дэ баро бэзэх во екжэно стердя! И хоть во на камэлас тэ жалуий кодэлэ манушэс, о Иегова лэс жалуисардя (2 Сам. 12:7—13).

20. Сости амэ сытювас анда кода, со сас лэ Давидоса?

²⁰ Шам сама, кала о Давидо росхоляйля, во закамля, кай о Навало и лэстирэ мануша тэ мэрэн. Потом инке во ԥэндя, кай о мануш, саво чордя лэ бакрорэс, тожэ трэбуй тэ мэрэл. Васо кадэва мануш, саво вся и время сас добро, акана кадя строӷо сындой аврэн? Важно тэ полас, со сас май данглал. Андэ кодэя время и совесть кай о Давидо ужэ римосайля, и кода, кай во строӷо сындояс аврэн, сыкавэлас, кай во ля тэ хасарэл и дружба лэ Иеговаса. Акэ васо о Иисусо ԥэндя: «Парашэн тэ сындон, кай и тумэ тэ на авэн сындосардэ. Важ кода кай сар тумэ сындон, кадя и о Дэл лэла тэ сындой тумэн» (Матф. 7:1, 2). Важ када трэбуй тэ терас вся, кай тэ на обжаспэ строӷо аврэнца. Амэнди трэбуй тэ сытювас кай о Иегова, саво анда вся оди полэл и жалуий.

21, 22. Сар амэ можэм тэ сыкавас, кай полас и жалуисарас аврэн?

²¹ Тэ полас и тэ жалуисарас трэбуй най кати андо ди, но и тэ дицол када пэ дила. Амэ трэбуй тэ полас, сави помощь амэ можэм тэ дас амарэ родости, лэ ԥралэнди и лэ ԥэянди андэ собрания и лэ сосидонэнди. Например, амэ можэм лэн тэ подритярас, тэ поприлас па цэр, ай можэм тэ андярас хамос. Ай важ кодэла, ко найдэлмут рисайля андэ собрания, амэ можэм тэ авас друӷоря. И если ласа тэ росԥэнас аврэнди пала Дэл, кадя амэ со май драго сыкаваса, кай полас и жалуисарас аврэн (Иов 29:12, 13; Рим. 10:14, 15; Иак. 1:27).

²² Чаче, амэ бут андэр со можэм тэ сыкавас, кай полас и жалуисарас лэ манушэн! Просто трэбуй тэ авас май внимательни. Тоди амаро небесно Дад лэла тэ лошавэл, важ кода кай во анда вся оди полэл и жалуий всаворэ манушэн!