Сар ту можэш тэ рис пэстири дружба лэ Иеговаса?

КАЖНО бэрш андэ собрания ринпэ бут исключони. И кажно разо, кала вонэ ринпэ каринг о Иегова, по нэбо всаворэ фартэ лошавэн! (Луки 15:7, 10). Если ту тожэ рисайлян андэ собрания, тоди ӷан, кай о Иегова, о Иисусо и анӷелоря фартэ аштярэнас тут. Но всаек можэт тэ авэл найвушэро тэ рис и дружба лэ Иеговаса. Саво ԥаримос можэт тэ авэл и со тэ терэс?

САВО ԤАРИМОС МОЖЭТ ТЭ АВЭЛ?

Бутэнди анда кодэла, ко рисайля каринг о Иегова, можэт тэ авэл ԥарэс по ди. И амэ полас васо. Дажэ о царё Давидо посли кода, сар о Иегова лэс простисардя, ԥэндя, кай и гиндоря пала лэско бэзэх, на дэнас лэсти покоё (Пс. 65:3; 40:12). Кай дэсавэ ԥрала и ԥэя, савэ ужэ рисайлэ каринг о Иегова, всаек бут бэрша оди дошалярэл лэн и лэнди лажаво. И ԥэй Изабельa, сави сас 20 бэрш исключоно, ԥэнэн, кай лати на патяласпэ, кай о Иегова ла простисардя. Можэт, и тутэ кацаво по ди. Но если ту умэкэса и вас, тоди тутэ упалэ на авэла зор тэ терэс варисо важ о Иегова (Прит. 24:10). Ай када нащи тэ домэкэс.

Но исин и авэр ԥаримос. Дэко фартэ пэрэжывает, кай лэсти прижалапэ бут со тэ стерэл, кай тэ рий и дружба лэ Иеговаса. О ԥрал Алан, саво рисайля каринг о Иегова, ԥэнэн, кай во бут со побистэрдя и ужэ на ӷанэн кадя драго тэ служый, сар инке на сас исключоно. Кацаво жэ по ди и дэсавэ ԥралэндэ и ԥэяндэ, и када на дэл лэнди тэ терэн бут дила андэ собрания.

Прецтавь, кай лэ манушэстэ по цэр дя баро ураӷано и зындярдя о цэр. Если во вся и время лэла тэ гиндой пала кода, скати трэбуй время и зор, кай упалэ тэ ваздэл о цэр, во можэт тэ умэкэл и вас. Кацаво можэт тэ авэл и тутэ по ди. Кай ту стердян баро бэзэх, тири дружба лэ Иеговаса фартэ римосайля. И можэт тэ здэлпэ, кай пэ кода, кай тэ рис ла, жала фартэ бут зор. Но тути на прижалапэ екжэнэсти када тэ стерэс.

О Иегова кабута ԥэнэн тути: «Ав и розласапэ машкар пэстэ» (Ис. 1:18). Ту ужэ бут со стердян, кай тэ рис и дружба лэ Иеговаса, и во када фартэ цэний. Акана лэ Иеговастэ исин, со тэ ԥэнэн пала тутэ лэ Сатанасти, кала во лэла тэ дошалярэл лэс! (Прит. 27:11).

Ту пашэлян каринг о Иегова, кала рисайлян лэстэ, и во дэл алав, кай пашола каринг тутэ (Иак. 4:8). Канешно, и ԥрала и ԥэя фартэ лошалэ, кай ту рисайлян. Када фартэ драго. Но исин кода, со май важно. Ту трэбуй инке май фартэ тэ любис тирэ небеснонэ Дадэс и Друӷос. Подам дума, со важ када трэбуй.

ЗАГИНДОСАР ТЭ СТЕРЭС ВАЖ О ИЕГОВА КОДА, СО ПА ТИРО ЗОР

Погиндосар, со ту трэбуй щяс тэ стерэс. Май ӥто всаворэстар, ту на бистэрдян само ӷлавно, кода, кай ту ӷанэс о чачимос пала Иегова и со во загиндосардя. Но акана, кай тэ жувэс, сар христианино, тути трэбуй авэла варисо тэ парувэс. Тутэ упалэ трэбуй тэ авэл привычка тэ служыс, тэ на промэкэс и собрания и тэ проандярэс время лэ ԥралэнца и лэ ԥэянца. Акэ со ту трэбуй тэ стерэс спэрва.

Часто дэ дума лэ Иеговаса. Тиро небесно Дад полэл, кай тут дошалярэл оди, и тути кадэлэстар найвушэро тэ мангэспэ лэсти (Рим. 8:26). Но о Иегова всаек ԥэнэн, кай ту тэ на парашэс тэ мангэспэ лэсти (Рим. 12:12). Росԥэн лэсти андэ молитва, сар дэ фартэ ту камэс тэ рис лэса и дружба. О ԥрал Андрей ԥэнэн, кай лэс фартэ дошалярэлас оди и сас фартэ лажаво, кай во стердя бэзэх. Но посли кажно молитва, лэстэ по ди ашэлас май спокойно. Ай если ту на ӷанэс, пала со тэ мангэспэ, тоди проадиносар о Псалом 51 и 65. Котэ запистромэ лэ Давидостирэ молитвы, кала во каисайля.

На промэк тэ проандярэс и лично изучения. Када поможыя, кай тири дружба лэ Иеговаса тэ авэл май лащи, и ту инке май фартэ тэ любис лэс (Пс. 19:7—11). О ԥрал Ловари ԥэнэн, кай варикала во хасардя и дружба лэ Иеговаса и на кангля лэс, ай вся важ кода, кай лэстэ на сас привычка тэ адиной и Библия и тэ изучает ла. Кай во упалэ тэ на стерэл кодэя ошыбка, во на ля тэ промэкэл тэ проандярэл лично изучения. И амэ трэбуй кадя тэ терас. Ай если ту на ӷанэс, сави тема тэ витидэс пэ лично изучения, тоди ту можэш тэ мангэс, кай о друӷо, савэстэ лащи дружба лэ Иегова, тэ подԥэнэн тути.

Упалэ лэ тэ дружыс лэ ԥралэнца и лэ ԥэянца. Бут ԥрала и ԥэя, савэ рисайлэ каринг о Иегова, гиндон, кай андэ собрания пэр лэндэ авэна тэ диқэн дошаса. И ԥэй Ляля ԥэнэн, кай лати сас фартэ лажаво и вой гиндояс, кай придя лэ ԥралэн и лэ ԥэян. И кацавэ гиндоря латэ сас фартэ долӷо. Но ту ӷан, кай и старейшыноря и авэр христианоря фартэ камэн тэ поможын тути, кай ту тэ рис и дружба Иеговаса. (Дик и рамка «Со моӷут тэ терэн и старейшыноря?».) Вонэ фартэ лошалэ, кай ту рисайлян каринг о Иегова и камэн важ тутэ ек о лашимос! (Прит. 17:17).

Со тути поможыя, кай ту упалэ тэ авэс май пашэ каринг и ԥрала и ԥэя андэ собрания? Постоянно ԥир лэ ԥралэнца и лэ ԥэянца андэ служэния, на промэк ни ек собрания. Васо када важно? О ԥрал Хвэдя ԥэнэн, кай вся и собрания фартэ аштярэлас, кала во рияпэ каринг о Иегова. Лэс анда вся оди прилинэ палпалэ. Кажно андар лэндэ старыияспэ тэ поможый, кай во упалэ лэ одеса тэ полэл, кай всаворэ андэ собрания ек ери. О Иегова простисардя лэс, и лэсти на трэбуй тэ гиндой пала кода, со ужэ сас. (Дик и рамка «Со ту можэш тэ терэс?».)

НА УМЭК И ВАС!

О Сатана на лэла спокойно тэ диқэл, сар ту риспэ каринг о Иегова (Луки 4:13). Во лэла тэ терэл вся, кай тутэ тэ авэл май бут ԥаримос и кай ту тэ умэкэс и вас. Но кай тэ на хасарэс и дружба лэ Иеговаса, пристов вся пэско зор пэ када.

Пала пэстирэ служытеля о Иегова ԥэндя: «Мэ виарақава кодэлэс, саво хасарделя, рисарава кодэлэс, саво одмарделя лэ стадостар, пэрэԥандава и рана кодэлэсти, савэстэ вой исин и дава зор кодэлэсти, саво слабо» (Иез. 34:16). Чаче, о Иегова ужэ поможысардя бутэ ԥралэнди и ԥэянди, савэ сас исключони, кай вонэ тэ ринпэ каринг лэстэ. Патя, о Иегова камэл тэ поможый и тути, кай тутэ упалэ тэ авэл лэса кацави дружба, сави нисо на розмарэла.