Сытён лэ Иисусостар и май бут гиндон пала авэр, чем пала пэстэ

1. Со анда вся оди терэн лэ Иеговастирэ служытеля?

ДЭЛМУТ андэ Библия сас запистромэ ек пророчество, кай лэ Дэвлэско народо авэла ӷотово тэ терэл дила и лэла тэ служый лэ Иеговасти тала лэ Иисусоско руковоцтво (Пс. 110:3). Адес амэ диқас, сар исполнийпэ кадэва пророчество. Лэ Дэвлэстирэ служытеля проандярэн милионоря часоря андэ служэния и терэн када бесплатно и анда вся оди. Кадяжэ вонэ поможын, кай лэ ԥралэндэ и лэ ԥэяндэ тэ авэл вся, со трэбуй, подритярэн лэн, кай лэнди тэ авэл драго по ди, и дэн зор, кай вонэ тэ на дурён лэ Иеговастар. И сар жэ бут время ужал кай и старейшыноря, кай тэ подӷотовят пэстирэ задании пэ собрании и тэ авэн каринг и ԥрала и ԥэя пэ пастырски посещении! Васо всаворэ вонэ када терэн? Важ кода кай любин лэ Иеговас и лэ манушэн (Матф. 22:37—39).

2. Сар пистромэ андэ Римлянам 15:1—3, саво примеро амэнди ашадя о Иисусо?

² О Иисусо всегда май бут гиндояс пала авэр, чем пала пэстэ, и кадя ашадя амэнди розлашо примеро. Амэ пристас вся о зор, кай тэ сытювас лэстар андэ када. (Проадинон Римлянам 15:1—3.) И, кала амэ жувас па лэско примеро, када анэн амэнди бут лашимос. Дажэ екжэно о Иисусо ԥэндя: «Май бари бах, кала дас, чем кала лас» (Деян. 20:35).

3. Пала со амэ подаса дума андэ кадэя статья?

³ Анда кадэя статья амэ уӷанаса, сар о Иисусо жэртвовал пэса, и подаса дума, сар амэ можэм тэ сытювас лэстар. Кадяжэ амэ роздиқаса, со поможыя амэнди тэ авас ӷотови тэ жас пэ жэртвы важ авэр.

ЛЭ ИИСУСОСКО ПРИМЕРО

4. Сар о Иисусо сыкадя, кай май бут гиндой пала авэр, чем пала пэстэ?

⁴ О Иисусо поможыяс аврэнди, дажэ кала сас фартэ цыено. Сар андярдя пэс о Иисусо, кала каринг лэстэ авелэ бут мануша? Во тоди сас по плай, наверно, паша Капернаумо. Англа када о Иисусо вся и рят мангэласпэ. Во сас фартэ цыено. Но кала во додиқля лэ манушэн, лэсти ашэля лэн фартэ жалко. И о Иисусо най кати исцэлисардя лэ насвалэн, но и ԥэндя ашунгли речь, сави акана амэ ӷанас, сар Наӷорно проповедь (Луки 6:12—20).

5. Сар и хула́я лэн примеро лэ Иисусостар, дажэ кала цыён?

⁵ Сости и хула́я моӷут тэ сытён лэ Иисусостар. Прецтавим пэсти кацави ситуацыя: о хулай авэл цэрэ вэчэром посли бути фартэ вицыено. Но лэндэ трэбуй тэ авэл семейно изучения. Можэт, лэсти совсем на камэлпэ када тэ терэл, но во мангэлпэ, кай о Иегова тэ дэл зор и проандярэл и семейно. Кадя и бэяцэ полэн: важ лэндирэ родителя лэ Иеговастири дила со май важно андэ жызня.

6. Росԥэнэн ек примеро, сар о Иисусо на жалуисардя пэстири время важ авэр.

⁶ О Иисусо на жалуияс пэстири время важ авэр. Погиндосарам, со сас по ди кай о Иисусо, кала лэсти ԥэндэ и найлащи новость пала Иоанно Крестителё. Во кати уӷангля, кай лэстирэ друӷос казнисардэ. Кала о Иисусо када ашундя, во жыля «андо тихо ҭан, кай тэ авэл екжэно» (Матф. 14:10—13). Канешно, амэ полас, васо во закамля кадя тэ стерэл. Амэ, наверно, кадя жэ стердоп андэ кацави ситуацыя. Но кала о Иисусо авеля интя, котэ ужэ сас фартэ бут мануша, савэ авелэ май пэрви лэстар. И сар во пэс андярдя? Во лэн шутя сама, важ кода кай гиндояс май бут пала авэр, чем пала пэстэ. О Иисусо полэлас, кай кадэлэ манушэнди трэбуй помощь лэ Дэвлэстар. «Лэсти ашэля лэн фартэ жалко», и важ када «во ля бутэсти лэн тэ сытярэл» (Мар. 6:31—34; Луки 9:10, 11).

7, 8. Росԥэнэн, сар и старейшыноря терэн, сар о Иисусо, кала варикасти андэ собрания трэбуй помощь?

⁷ И старейшыноря сытён лэ Иисусостар. Амарэ кучутнэ старейшыноря, амэ фартэ блаӷодарни тумэнди, кай тумэ пристон бут зор, кай тэ заботинпэ пала амэндэ! Часто и вазвещятеля моӷут дажэ тэ на ӷанэн, скати дила терэн и старейшыноря важ и собрания. Например, кала лэ ԥралэсти или ла ԥьяти трэбуй помощь лэ врачонэндар, и старейшыноря анда камитето па связи лэ больницэнца отстон вся пэстири дила и ӥто авэн тэ поможын. Дэкала лэнди прижалпэ и рят тэ дэн кацави помощь. Но амарэ райканэ старейшыноря и лэндирэ еря фартэ любин лэ ԥралэн и лэ ԥэян и гиндон май бут пала лэндэ, чем пала пэстэ.

⁸ Кадяжэ и старейшыноря дэн зор, кала амари арӷанизацыя строий и Залоря Царства и поможый кодэлэнди, кастэ тердяпэ природно бида. Ай тумэ никала на гиндонас, скати время тратин и старейшыноря анда тумари собрания, кай тэ сытярэн, тэ подритярэн и тэ заботинпэ пала ԥрала и ԥэя? Амэ фартэ блаӷодарни кажнонэ старейшынасти и лэстирэ ерести. Мэк о Иегова блаӷословий тумэн важ вся тумаро трудо! Да, сар и всаворэ амэ, и старейшыноря трэбуй тэ авэн осторожни. Лэнди нащи тэ терэн кадя бут дила важ и собрания, кай потом тэ на ашэлпэ время важ о ери.

САР ТЭ АВАС ӶОТОВИ ТЭ ЖАС ПЭ ЖЭРТВЫ ВАЖ АВЭР

9. Со, сар христианоря, амэ трэбуй тэ старысавас тэ терас? (Филиппийцам 2:4, 5).

⁹ Проадинон Филиппийцам 2:4, 5. Канешно, най всаворэ андэ собрания служын старейшынонэнца. Но всаек кажно христианино трэбуй тэ сытёл лэ Иисусостар и тэ жал пэ жэртвы важ авэр. Андэ Библия ԥэнэнпэ, кай о Иисусо «шутяпэ по рабо» (Флп. 2:7). Погиндон, со сыкавэн кадэла алава. Лашо рабо или слуӷа родэл возможность тэ уӷодий пэстирэ ӷосподиности. Амэ лэ Иеговастирэ раборя и, можно тэ ԥэнас, сар слуӷоря важ амарэ ԥрала и ԥэя. И амэ камас тэ терас вся, кай тэ уӷодисарас лэнди. Со имено?

10. Савэ вопросоря трэбуй пэсти тэ задас?

¹⁰ Полэн, со тумэндэ андо ди. Задэн пэсти кацавэ вопросоря: «Камав мэ тэ жав пэ жэртвы важ авэр? Например, если ман мангэна тэ зажав в ӷости кай о ԥуро ԥрал или тэ подындярав ла ԥуря ԥья пэ собрании, ӷотово мэ када тэ стерав? Аштярав мэ, пока манди най еқвар ԥэнэна, кай мэ тэ терав уборка по канӷрэсо или тэ диқав пала Зало Царства?» Кала амэ отдям пэстири жызня лэ Иеговасти, амэ дям алав, кай ласа тэ служысарас лэсти. Важ када во мангэл амэн тэ на жалуисарас пэстири время и о зор, кай тэ поможысарас лэ ԥралэнди и лэ ԥэянди. Если амэ кадя терас и на гиндосарас пала варисави выӷода, о Иегова фартэ радуийпэ. Но со, если тумэ полинэ, кай тумэнди трэбуй дэсо тэ парувэн андэр пэстэ?

11. Сар и молитва можэт тэ поможый тэ жас пэ жэртвы важ авэр?

¹¹ Анда ди мангэнпэ лэ Иеговасти. Можэт, тумэ ужэ полинэ, кай тумэнди трэбуй андэ варисостэ тэ парудён, но най фартэ камэлпэ када тэ терэн. Если када кадя, анда ди мангэнпэ лэ Иеговасти. Росԥэнэн лэсти вся, со тумэндэ по ди. Ворта ԥэнэн лэсти, кай тумэнди на хутилэл зор тэ парудён и мангэн лэс, кай «тумэ тэ камэн и тэ терэн дила» (Флп. 2:13).

12. Сар и тэрнэ болдэ ԥрала моӷут тэ поможын андэ собрания?

¹² Если ту тэрно болдо ԥрал, манг лэ Иеговас, кай во тэ поможый тути тэ закамэс тэ терэс май бут важ и ԥрала и ԥэя. Андэ дэсавэ страны лэ помошниконэн андэ собрания май набут, чем лэ старейшынонэн, и бут андар лэндэ ужэ андэ ԥурэ бэрша. Кадяжэ андэ лэ Иеговастири арӷанизацыя авэл со май бут мануша, важ када амэнди трэбуй инке май бут тэрнэ ԥрала, кай тэ заботинпэ пала собрания. Если ту камэс тэ поможыс лэ ԥралэнди и лэ ԥэянди и ӷотово тэ терэс любо задания, сави тути дэна, ту авэса бахтало. Ӷанэс васо? Важ кода кай кадя ту лэса тэ радуис лэ Иеговас, тутэ авэла лащи репутацыя и по ди авэла драго кодэлэстар, кай ту поможыс аврэнди.

13, 14. Сар амэ можэм пэ дила тэ дас помощь лэ ԥралэнди и лэ ԥэянди? (Диқэн и картинка пэ обложка.)

¹³ Полэн аврэн и авэн внимательни. Андо 61 бэрш н. э. о апостоло Павло пистросардя лэ христианонэнди, савэ жувэнас андэ Иудея: «На бистрэн тэ терэн лашимос и тэ дилинпэ аврэнца, важ кода кай кацавэ жэртвы уӷодни лэ Дэвлэсти» (Евр. 13:16). Када сас фартэ лашо совето! Через дэсавэ бэрша кодэлэнди, ко адинояс кадэва письмо, прижыляпэ тэ ашавэн пэстирэ цэра, дила, лэ родос и тэ нашэн андэ плая (Матф. 24:16). Андэ кодэя время вонэ трэбуй сас тэ поможын и тэ подритярэн ек еқэс. Лэ христианонэнди, савэ сразу прилинэ лэ Павлоско совето, сар инке на авеля ԥари время, сас май вушэро тэ присытён тэ жувэн май просто.

¹⁴ Амарэ ԥрала и ԥэя най вся и время ԥэнэн амэнди, сави помощь лэнди трэбуй. Например, погиндон пала кацави ситуацыя: кай амаро ԥрал муля и хулаи. Возможно, акана лэсти трэбуй помощь, кай варико тэ гитой тэ хан, тэ поприлэл па цэр или варикаринг лэс тэ подындярэл. Лэсти можэт тэ авэл нэудобно тэ мангэл пала када амэн. Но май ӥто всаворэстар, во авэла фартэ блаӷодарно, если амэ екжэнэ закамаса варисо тэ стерас важ лэстэ и пэрви пашуваса, кай тэ поможысарас. На гиндон, кай лэсти варико авэр поможыя или кай во екжэно мангэла помощь амэндар. Пушэн пэстар: «Если мэ тэ авелоп пэ лэско ҭан, со манди авелоп трэбуй?»

15. Со амэ трэбуй тэ терас, если камас тэ поможысарас аврэнди?

¹⁵ Авэн май прости, кай авэр тэ мангэн тумэндар помощь. Андэ тумари собрания, наверно, исин кацавэ ԥрала и ԥэя, савэ вся и время ӷотови тэ поможын. И амэндэ никала нинай гиндо, кай вонэ терэн када через оди. Пэр лэндэ всегда можно тэ надеиспэ. Амэ всаворэ камлоп, кай амэндэ тэ авэл кацави жэ репутацыя. Ек старейшына, савэс ақарэн Алано, старыийпэ тэ сытёл лэ Иисусостар, кай лэ манушэнди тэ авэл май вушэро тэ пашон каринг лэстэ. Во росԥэнэн: «Кай о Иисусо сас фартэ бут дила, но всаворэ, дажэ и бэяцэ и ԥурэ, цырдэнаспэ каринг лэстэ и на лажанас тэ мангэн лэстар помощь. Вонэ диқэнас, кай о Иисусо сас лашо и заботливо друӷо важ лэндэ. Мэ тожэ камав, кай аврэнди тэ авэл вушэро тэ пашон каринг мандэ, приятно манца тэ дэн дума, и вонэ тэ ӷанэн, кай манди най всаек пэ лэндирэ проблемы».

16. Сар о принцыпо анда Псалом 119:59, 60 поможый амэнди тэ жувас па лэ Иисусоско примеро?

¹⁶ Канешно, амэ на трэбуй тэ умэкас и вас, если амэндэ на вижал андэ вся тэ терас точно кадя, сар о Иисусо (Иак. 3:2). О мануш, саво кати ля тэ рисуий, нэ можэт сразу тэ ашэл ашунгло художнико. Но если во сытёл пэ пэстирэ ошыбки и старыийпэ тэ шолпэ пэ учителёря, лэстэ вижала шукарнэс тэ рисуий. Када жэ можно тэ ԥэнас и пала амэндэ. Если амэ прилас кода, со уӷанас пэ лично изучения, и терас вся, кай тэ парудювас, тоди амэндэ вижала тэ жувас па лэ Иисусоско примеро. (Проадинон Псалом 119:59, 60.)

ЕСЛИ ТУМЭ ЖАН ПЭ ЖЭРТВЫ ВАЖ АВЭР, КАДА АНЭН ЛАШИМОС

17, 18. Васо амэ трэбуй тэ сытювас лэ Иисусостар тэ жас пэ жэртвы важ авэр?

¹⁷ Кала и ԥрала и ԥэя диқэн, сар амэ жас пэ жэртвы важ авэр, вонэ моӷут тэ закамэн тэ терэн кадя жэ. Ек старейшына, савэс ақарэн Тимо, росԥэнэн: «Амэндэ андэ собрания исин тэрнэ ԥрала, савэ бут со стердэ, кай тэ ашэн май састэ андэ вера, и лэн стодэ тэ авэн помошникоря андэ собрания. Кала вонэ диқэнас, сар и ԥрала и ԥэя жанас пэ жэртвы важ авэр, када придя лэнди зор. Кадэла тэрнэ ԥрала терэн бут дила андэ собрания, и старейшыноря фартэ лэн цэнин».

¹⁸ Адес андэ кадэя люма фартэ бут мануша гиндон кати пала пэстэ, но лэ Дэвлэско народо совсем авэр. Амэ камас тэ сытювас лэ Иисусостар и тэ жас пэ жэртвы важ авэр. Канешно, амэ полас, кай амэндэ на вижала точно тэ жас «па лэстирэ слидоря», но амэ можэм тэ старысавас тэ терас када, со май фэдэр (1 Пет. 2:21). Кала амэ, сар о Иисусо, жас пэ жэртвы важ авэр, тоди о Иегова абурой амэнца. Тэ ӷанас када — фартэ бари бах!