Терэн вся, кай тумари надежда тэ авэл май састи!

1. Сави надежда дя амэнди о Иегова?

О ИЕГОВА дя амэнди райкани надежда, кай англэ авэла вечно жызня. Варико надеийпэ вечно тэ жувэл по нэбо (1 Кор. 15:50, 53). Но май бут мануша надеинпэ тэ жувэн вечно пэ ԥув, кай всаворэ авэна зоралэ и бахталэ (Отк. 21:3, 4). Нэважно, сави амэндэ надежда, — тэ жувас по нэбо или пэ ԥув, — вой важ амэндэ фартэ куч.

2. Васо амэндэ исин надежда по лашымос, саво авэла англэ?

² Андэ Библия о алав «надежда» сыкавэл гиндо, кай о мануш аштярэл варисо лашо. Амари надежда дя амэнди о Иегова, важ када амэ уверени, кай кадя и авэла (Рим. 15:13). Амэ ӷанас, кай о Дэл всегда зритярэл пэско алав (Чис. 23:19). И амэ патяс, кай о Иегова камэл и можэт тэ исполнит всаворэ пэстирэ обещянии. Важ када амэ най просто камас, кай кадя тэ авэл и вигиндосардям кадэя лащи жызня. Амэ точно ӷанас, кай кадя авэла и амэндэ исин доказательства.

3. Пала со амэ подаса дума андэ кадэя статья? (Псалом 27:14).

³ Амаро небесно Дад любий амэн и фартэ камэл, кай амэ тэ доверяем лэсти. (Проадинон Псалом 27:14.) Если амэ андэ вся надеисавас по Иегова, амэ сможэм тэ виритярас любо ԥаримос, тэ авас смили и тэ на хасарас и радость. Давайте роздиқаса, сар и надежда фэрий амэн. Спэрва амэ уӷанаса, васо можно тэ ԥэнас, кай и надежда шолпэ по якорё и по шлемо. Ай потом подаса дума, со амэ можэм тэ стерас, кай и надежда тэ ашэл май састи.

АМАРИ НАДЕЖДА САР О ЯКОРЁ

4. Васо можно тэ ԥэнас, кай амари надежда шолпэ по якорё? (Евреям 6:19).

⁴ Андэ пэско письмо лэ евреёнэнди о апостоло Павло пистросардя, кай амари надежда шолпэ по якорё. (Проадинон Евреям 6:19.) О Павло часто сас андэ моря, важ када во ӷанэнас, кай о якорё уритярэлас о кораблё, кай лэс тэ на ундярэл и балвал. Еқвар во попэля андо штормо и диқля, сар и морякоря сшутэ и якоря андо паи, кай о кораблё тэ на розмардёл андэ плая (Деян. 27:29, 39—41). Кадя жэ сар о якорё ритярэл о кораблё, кай лэс тэ на одындярэл андэ риг, амари надежда фэрий амэн, кай и проблемы тэ на одындярэн амэн лэ Иеговастар. Если амари надежда састи, вой поможыя амэнди тэ виритярас ԥарэ испытании, важ кода кай амэ ӷанас, кай англэ авэла вся драго. На бистрэн: о Иисусо ԥэнэнас, кай амэн лэна преследовать (Иоан. 15:20). Кала амэ розмышляем пала лащи жызня, сави аштярэл амэн англэ, када поможый амэнди тэ на парашас тэ жас па лэ Иеговаско дром.

5. Сар и надежда придэлас зор лэ Иисусости, кала лэс трэбуй сас тэ умарэн?

⁵ Ай сар и надежда поможысардя лэ Иисусости тэ ашэлпэ предано лэ Иеговасти, хоть лэс трэбуй сас жэстоко тэ умарэн? Андэ Пятидесятница андо 33 бэрш н. э. о апостоло Пётро ԥэндя о пророчество пала Мессия анда книӷа Псалом. Андар лэстэ дицол, сави увереность сас кай о Иисусо: «Мэ вся и жызня лава тэ надеисавав, важ кода кай ту на ашавэса ман андэ моӷила и на дэса кодэлэсти, ко тут на ашавэл, тэ тернёл. [...] Кала мэ авава паша тутэ, ту дэса манди бари радость андо ди» (Деян. 2:25—28; Пс. 16:8—11). Хоть о Иисусо ӷанэнас, кай лэсти трэбуй тэ мэрэл, лэстэ сас надежда, кай о Дэл рия лэс каринг и жызня и во упалэ авэла паша пэско небесно Дад (Евр. 12:2, 3).

6. Со ек ԥрал ԥэндя пала надежда?

⁶ Амари христианско надежда поможысардя бутэ ԥралэнди и ԥэянди тэ виритярэн о ԥаримос. Подам дума, со сас андэ жызня кай о ԥрал Ленардо Чинна анда Англия, саво сас предано лэ Иеговасти. Кала жалас и пэрво мирово война, лэс бэшардэ андо баруно, важ кода кай во отԥэнделя тэ жал андэ халавдэ. Лэс проритярдэ дуй шон андэ одиночно камера, ай тоди бишалдэ тэ терэл фартэ ԥари бути. Акэ со во пистросардя: «Через кода, со манца тердяпэ, мэ полэм: амэнди фартэ трэбуй и надежда, кай вся тэ пэрэандярас. О Иисусо, лэстирэ апостолоря, ай кадяжэ и пророкоря ашадэ амэнди розлашо примеро. Инке амэндэ исин лэ Дэвлэстирэ обещянии андэ Библия, савэ фартэ куч важ амэндэ. Вся када дэл амэнди райкани надежда по лашымос, саво авэла англэ, и о зор, кай тэ ашаспэ састэ андэ истина». И надежда сас сар якорё важ о Ленардо. Кацави жэ вой можэт тэ авэл и важ амэндэ.

7. Сар амари надежда ашэл май састи андо ԥаримос? (Римлянам 5:3—5; Иакова 1:12).

⁷ Кала амэ пэрэандярас о ԥаримос и диқас, сар о Иегова подритярэл амэн и кай во амэнца довольно, амари надежда ашэл май састи. (Проадинон Римлянам 5:3—5; Иакова 1:12.) Вой ашэл май састи, чем сас тоди, кала амэ пэрво разо ашундям и радосно новость. О Сатана камэл, кай через и трудности амэ тэ умэкас и вас, но лэ Иеговастирэ зорэса амэ можэм тэ виритярас любо ԥаримос.

АМАРИ НАДЕЖДА САР О ШЛЕМО

8. Васо и надежда шолпэ по шлемо? (1 Фессалоникийцам 5:8).

⁸ Андэ Библия кадяжэ ԥэнэнпэ, кай амари надежда шолпэ по шлемо. (Проадинон 1 Фессалоникийцам 5:8.) О шлемо фэрияс лэ воиноско шэро. Андэ амари духовно война, амэнди трэбуй тэ фэрисарас пэстири годи лэ Сатанастар. Во камэл тэ зашол амэнди найлашэ гиндоря, кай амэ тэ попэрас андэ лэстири ловушка. Кадя жэ сар о шлемо фэрияс о шэро кай о воино, амари надежда фэрий амарэ гиндоря, кай амэ тэ ашаспэ предани лэ Иеговасти.

9. Сар жувэн и мануша, кастэ нинай надежда пэ вечно жызня?

⁹ И надежда пэ вечно жызня поможыя амэнди тэ прилас мудри ришэнии. Но если вой ашэла май слабо, амэ ласа тэ гиндосарас кати пала пэстирэ жэлании и можэм тэ бистрас пала вечно жызня. Подам дума пала христианоря анда Коринфо. Вонэ парашэлэ тэ патян андэ лэ Дэвлэстирэ обещянии, кай авэла воскресения (1 Кор. 15:12). О Павло пистросардя, кай кодэла, кастэ нинай надежда по лашымос, саво авэла англэ, жувэн кати еқэ десэса (1 Кор. 15:32). Адес бут мануша, савэ на патян андэ лэ Иеговастирэ обещянии, жувэн кати важ пэстэ и старыинпэ тэ лэн ла жызнятар вся. Но амэ доверяем лэ Иеговасти, кай во дэла амэнди райкани жызня англэ. Амари надежда важ амэндэ, сар о шлемо, саво фэрий амари годи, кай амэ тэ на гиндосарас кати пала пэстэ и тэ на римосарас пэстири дружба лэ Иеговаса (1 Кор. 15:33, 34).

10. Сар и надежда можэт тэ фэрий амэн лэ хохаимастар?

¹⁰ И надежда, сар о шлемо, фэрий амари годи кацавэ гиндонэндар: бесполезно варисо тэ терас, кай тэ уӷодисарас лэ Иеговасти. Дэко можэт тэ гиндой: «Манди о Иегова точно на дэла вечно жызня. Мэ када на ашав. Мандэ никала на вижала тэ терав вся, со аштярэл мандар о Дэл». Сэрэн и алава, савэ ԥэндя о Элифазо лэ Иовости: «Сар о смертно мануш можэт тэ авэл вужо?» Кадяжэ во ԥэндя пала Дэл: «Во и пэстирэ свынтонэ анӷелонэнди на патял. И дажэ о нэбо найвужо андэ лэстирэ яқа» (Иов 15:14, 15). Но када хохаимос. На бистрэн: кадэла гиндоря лэ Сатанастар. Во ӷанэн, кай если тумэ лэна кадя тэ гиндон, тумэ хасарэна пэстири надежда. Важ када отшон кадэва хохаимос и старыинпэ май бут тэ гиндон пала лэ Иеговастирэ обещянии. Патян: тумаро небесно Дад камэл, кай тумэ тэ жувэн вечно, и во поможыя тумэнди андэ када (1 Тим. 2:3, 4).

НА БИСТРЭН ПАЛА ПЭСТИРИ НАДЕЖДА

11. Васо амэ трэбуй терпеливо тэ аштярас, кала о Иегова зритярэла пэстирэ обещянии?

¹¹ Най всегда вушэро тэ сэрас пала пэстири надежда. Амэ можэм тэ хасарас и терпения, кала аштярас, пока исполняца лэ Дэвлэстирэ обещянии. Но о Иегова вечно Дэл, и важ лэстэ и время жал па аврятэ (2 Пет. 3:8, 9). Во обязательно стерэла вся, со загиндосардя, дажэ если када авэла най андэ кодэя время, кала амэ аштярас. Со поможыя амэнди састэс тэ ритярас андо шэро и надежда и терпеливо тэ аштярас, кала о Иегова зритярэла пэстирэ обещянии? (Иак. 5:7, 8).

12. Васо, кай тэ авэл надежда, трэбуй вера? (Евреям 11:1, 6).

¹² Кай амари надежда тэ авэл састи, амэ трэбуй тэ авас пашутнэ лэ Иеговастирэ друӷоря. Важ кода кай во дэл алав, кай обязательно стерэла вся, со загиндосардя. Сар ԥэнэнпэ андэ Библия, если амэ камас, кай амари надежда тэ авэл састи, амэ трэбуй тэ патяс, кай о Дэл исин и кай во «дэл бут лашымос кодэлэнди, ко фартэ родэл лэс». (Проадинон Евреям 11:1, 6.) Если амэ патяс, кай о Иегова исин, тоди амэ аваса уверени, кай во зритярэла всаворэ пэстирэ обещянии. Давайте роздиқаса дэсавэ советоря, савэ поможына амэнди тэ авас инке май пашэ каринг о Иегова. Блаӷодаря кадэлэсти амэ на хасараса пэстири надежда.

13. Сар амэ можэм тэ авас лэ Иеговастирэ друӷоря?

¹³ Мангэнпэ лэ Иеговасти и адинон и Библия. Хоть амэ на диқас лэ Иеговас, амэ можэм тэ ашас лэстирэ друӷоря. Кала амэ дас дума лэ Иеговаса андэ молитва, амэ уверени, кай во амэн ашунэл (Иер. 29:11, 12). Ай сар амэ ашунас лэ Дэвлэс? Если адиносарас и Библия и розмышляем пала кода, со проадиносардям. Кала амэ уӷанас, сар о Иегова заботияспэ пала пэстирэ предани служытеля андэ дэлмутни время, амари надежда ашэл май састи. Лэ Дэвлэско Алав «сас пистромэ... важ амэндэ Через кода, кай амэ виритярас о ԥаримос и кай амэн подритярэн алавэнца анда Писании, амэ тэ аштярас англэ о лашымос» (Рим. 15:4).

14. Васо авелоп драго тэ розмышляем пала кода, со о Иегова терэлас важ авэр?

¹⁴ Розмышляйте, сар о Иегова зритярэл пэстирэ обещянии. Сэрэн, со о Иегова стердя важ о Авраамо и Сарра? Вонэ сас ужэ фартэ ԥурэ, но всаек о Дэл дя алав, кай лэндэ арақадёла о бэято (Быт. 18:10). Сар о Авраамо диқля пэ кадэя обещяния? Во «патялас, кай ашэла дад важ бут народоря» (Рим. 4:18). Хоть и мануша моӷли тэ гиндон, кай када нэвозможно, о Авраамо патялас, кай о Иегова зритярэла пэско алав. И када на сас евья (Рим. 4:19—21). Кацавэ примероря поможын амэнди тэ патяс, кай о Иегова всегда зритярэл пэстирэ обещянии, дажэ кала амэнди здэлпэ, кай када нэвозможно.

15. Васо трэбуй тэ розмышляем пала кода, со о Иегова стердя важ амэндэ?

¹⁵ Погиндон пала кода, со о Иегова ужэ стердя важ тумэндэ. Саво лашымос тумэнди андя, кай и обещянии анда Библия исполнинпэ? Например, о Иисусо ԥэндя, кай лэско Дад дэла вся, со трэбуй амэнди важ и жызня (Матф. 6:32, 33). Кадяжэ о Иегова дя алав, кай если амэ ласа тэ мангас пала свынто духо, во обязательно лэс амэнди дэла (Луки 11:13). И о Иегова зритярэл кадэла обещянии. Наверно, тумэ можэте вспомнить инке бут, со о Иегова терэлас важ тумэндэ. Например, во обещял, кай дэла вся важ и лащи дружба лэса, простия и подритярэла тумэн (Матф. 6:14; 24:45; 2 Кор. 1:3). Кала амэ розмышляем пала кода, сар о Иегова заботияспэ пала амэндэ, када поможыя амэнди май фартэ тэ патяс андэ кода, кай во на ашавэла амэн и май англэ.

«ЛОШАВЭН КОДЭЛЭСТИ, САВО ЛАШЫМОС АВЭЛА АНГЛЭ»

16. Васо и надежда — када кучутно подарко?

¹⁶ И надежда пэ вечно жызня — када кучутно подарко лэ Дэвлэстар. Амэ фартэ аштярас и райкани жызня, сави авэла англэ и патяс, кай када точно авэла. Кадя жэ сар о якорё, и надежда поможый, кай амэн тэ на одындярэл лэ Иеговастар, кай амэ тэ пэрэандярас о ԥаримос, тэ виритярас и преследовании и дажэ тэ на дарас ла смэртятар. Сар о шлемо, и надежда фэрий амари годи, кай амэ тэ отшас о найлашымос и тэ терас о лашымос. Амари надежда ритярдёл пэ кода, со пистромэ андэ Библия. Вой поможый тэ ашас май пашэ каринг о Дэл и тэ диқас, сар дэ фартэ во амэн любий. Амэнди анэна бут лашымос, если амэ на домэкаса, кай амари надежда тэ ашэл май слабо.

17. Васо и надежда анэн радость?

¹⁷ О апостоло Павло пистросардя лэ христианонэнди андо Римо: «Лошавэн кодэлэсти, саво лашымос авэла англэ» (Рим. 12:12). О Павло радуияспэ, кай лэстэ сас надежда, важ кода кай во сас уверено: если во ашэлапэ предано лэ Иеговасти, во лэла тэ жувэл вечно по нэбо. И надежда можэт тэ анэн радость и амэнди, важ кода кай амэ патяс, кай о Иегова всегда зритярэл пэско алав. Акэ савэ лашэ алава ԥэндя о псалмопевцо: «Бахтало кодэва... ко лэ Иеговастар, пэстирэ Дэвлэстар, аштярэл о лашымос... Во кодэва касти можно тэ патяс андэ вся»! (Пс. 146:5, 6).