«И чачуни мудрость ӷромко дэл дума пэ вулица»

1. Сар бут мануша андярэн пэс, кала ашунэн пала лэ Дэвлэстири мудрость? (Притчи 1:20, 21).

АНДЭ бут страны можно тэ диқас, сар и вазвещятеля радостяса предлаӷают лэ манушэнди и журналоря пэ вулица. Тумэ варикала служынас кадя? Если да, тоди када шолпэ пэ кода, со пистромэ андэ Притчи, — и мудрость тердёл машкар мануша и ԥэнэн всаворэнди, кай вонэ тэ приашундён каринг латирэ советоря. (Проадинон Притчи 1:20, 21.) Андэ Библия и андэ амари литература исин «чачуни мудрость», лэ Иеговастири мудрость. Вой трэбуй лэ манушэнди, кай вонэ тэ жан па дром, саво андярэл каринг и жызня. Амэндэ фартэ лошавэл оди, кала и мануша приашундён каринг амэндэ и лэн амари литература. Но дэсавэ на камэн тэ уӷанэн, со пистромэ андэ Библия. Дэко приасалпэ амэндар. Ай варикасти на чалён и библейски законоря пала кода, кай трэбуй тэ ритярдювас май дур лэ билажавардимастар. Вонэ гиндон, кай када фартэ строӷо. Но о Иегова всаек на парашэл тэ ԥэнэн всаворэнди пала чачуни мудрость. Сар во када терэл?

2. Кай можно тэ арақас и чачуни мудрость, но со витидэн тэ терэн бут мануша?

² О Иегова стердя кадя, кай лэско алав и Библия моӷли тэ адинон почти всаворэ мануша пэ ԥув. Ай со можно тэ ԥэнас пала библейско литература? Блаӷодаря лэ Иеговасти вой пэрэандярдёл май бут чем пэ 1 000 шыба. Кодэла, ко приашундён каринг и мудрость, адинон лэ Дэвлэско алав, прилэн андэ пэстири жызня кода, со уӷанэн, и ашэн май бахталэ. Но май бут мануша андэ амари время отԥэндён тэ ашунэн лэ Иеговас. Кала вонэ прилэн ришэнии, вонэ надеинпэ пэр пэстэ или пэ авэр мануша. Через кода, кай амэ жувас па лэ Дэвлэско законо, вонэ дажэ моӷут тэ диқэн пар мэндэ завазглэ шэрэса. Андэ кадэя статья амэ уӷанаса, васо и мануша андярэн пэс кадя. Но спэрва давайте подаса дума, со амэ трэбуй тэ терас, кай амэндэ тэ авэл лэ Иеговастири мудрость.

КАЙ ТЭ АШАС МАЙ МУДРИ, ТРЭБУЙ ТЭ УӶАНАС ЛЭ ИЕГОВАС

3. Со трэбуй, кай тэ ашас па чачимастэ мудри?

³ И мудрость — када кала амэ используем кода, со ӷанас, кай тэ прилас лашэ ришэнии. Но андэ чачуни мудрость ужал май бут. Андэ Библия ԥэнэнпэ: «И дар англа Иегова, андэ сави дицол и патив каринг лэстэ, анэн и мудрость. И знании пала кодэва, ко Свынто, поможын бут со тэ полэн» (Прит. 9:10). Вижал, кала амэ прилас важни ришэнии, трэбуй тэ шас сама, со пала када гиндой о Иегова. Кай тэ уӷанас када, трэбуй тэ изучаем и Библия и библейски публикацыи. Када авэла па чачимастэ мудро (Прит. 2:5—7).

4. Васо кати о Иегова можэт тэ дэл амэнди чачуни мудрость?

⁴ Кати о Иегова можэт тэ дэл амэнди чачуни мудрость (Рим. 16:27). Васо можно тэ ԥэнас, кай и мудрость жал лэ Иеговастар? Пэрво, сар Создателё, во ӷанэн вся пала пэстирэ тварении (Пс. 104:24). Дуйто, вся со во терэл, во терэл мудростяса (Рим. 11:33). Трито, во дэл мудри советоря, савэ всегда анэн лашымос кодэлэнди, ко лэн прилэл (Прит. 2:10—12). Кай тэ авас па чачимастэ мудри, трэбуй тэ прилас кадэла трин маменторя. Кадяжэ важно тэ сэрас пала лэндэ, кала витидас, сар тэ андярас пэс андэ варисави ситуацыя.

5. Каринг со андя, кай и мануша на камэн тэ прилэн лэ Иеговастири мудрость?

⁵ Бут мануша, савэнди амэ росԥэнас пала Дэл, соӷласинпэ, кай андэ природа вся удивительно стердо. Но андэ кодэя жэ время вонэ на патян андо Создателё. Авэр ԥэнэн, кай патян андо Дэл, но гиндон, кай и законоря анда Библия фартэ дэлмутнэ и трэбуй тэ жувэс пэстиря годяса. Каринг со када андя? И мануша на закамлэ тэ приашундён каринг лэ Дэвлэстири мудрость и линэ тэ надеинпэ пэр пэстэ. Ашэля и люма посли када май лащи? Ашэлэ вонэ май бахталэ и исин лэндэ надежда по лашымос, саво авэла англэ? Лашэ алава запистромэ андэ Притчи 21:30: «Нинай ни и мудрость, ни и проницательность, ни о совето, саво жал против о Иегова». Сар жэ важно тэ мангас и мудрость кай о Иегова! Но бут мануша на терэн кадя. Васо?

ВАСО И МАНУША НА ПРИЛЭН И ЧАЧУНИ МУДРОСТЬ

6. Ко отԥэндёл тэ приашундёл каринг и чачуни мудрость? (Притчи 1:22—25).

⁶ Бут мануша отԥэндён тэ приашундён, кала «и чачуни мудрость ӷромко дэл дума пэ вулица». Сар ԥэнэнпэ андэ Библия, исин трин ӷрупы манушэн, савэ на прилэн лэ Дэвлэстири мудрость: када кодэла, ко «патял всаворэсти», ко «любий тэ приасалпэ» и «найгодявэрнэ». (Проадинон Притчи 1:22—25.) Давайте подаса дума, васо вонэ на прилэн лэ Дэвлэстири мудрость и со тэ терас, кай тэ на шаспэ пэр лэндэ.

7. Васо дэсавэ камэн тэ патян всаворэсти?

⁷ Кодэлэн, «ко патял всаворэсти» можно вушэро тэ обхохавэн. Амэ часто диқас кацавэ манушэн андэ служэния (Прит. 14:15). Например, и рашая и политикоря часто ԥэнэн хохаимос, и милионоря мануша патян кадэлэсти. Кала вонэ полэн, кай лэн хохадэ, вонэ лэнпэ шэрэстар и на полэн васо кадя. Но и мануша анда Притчи 1:22, савэ патян всаворэсти, екжэнэ витидэ тэ андярэн пэс кадя, важ кода кай лэнди када чалёл (Иер. 5:31). Лэндирэ одести драго, кала вонэ терэн па пэстирятэ. Вонэ на камэн тэ розлэнпэ, сости сытярэл и Библия и тэ жувэн па лэ Дэвлэстирэ законоря. Бут мануша гиндон кадя жэ, сар ек верущё манушни анда Квебеко, сави ԥэндя амарэ ԥралэсти: «Если о рашай ман обхохавэл, када най мэрни дош, ай лэстири». Давайте тэ терас вся, кай тэ на патяс всаворэсти кадя, сар вонэ! (Прит. 1:32; 27:12).

8. Со поможыя амэнди тэ ашас па чачимастэ мудри?

⁸ Андэ Библия ԥэнэнпэ, кай амэ тэ на патяс всаворэсти. Андэр латэ пистромэ: «Авэн взросли, кала варисо трэбуй тэ полэн» (1 Кор. 14:20). Кала амэ прилас и библейски принцыпоря, амэ ашас мудри. И Библия поможый, кай амэндэ тэ на авэн проблемы и кай амэ тэ прилас годявэрнэ ришэнии. Дэкала трэбуй тэ терас самопроверка. Если амэ ужэ дэсави время изучаем и Библия и авас пэ собрании, можно тэ пушас пэстар: «Со манди на дэл тэ отдав пэстири жызня лэ Иеговасти и тэ болдював?» Ай если амэ ужэ болделям, терас амэ вся, кай инке май драго тэ росԥэнас и радосно новость и тэ авас май лашэ учителёря? Дицол па амарэ ришэнии, кай амэ жувас па библейски принцыпоря? Вижал амэндэ тэ сытювас лэ Иисусостар андэ кода, сар тэ обжаспэ аврэнца? Если амэ полас, кай андэ варисостэ амэнди трэбуй тэ парудювас, давайте тэ розмышляем пала лэ Иеговастирэ советоря, савэ во «дэл кодэлэсти, ко нисо на ӷанэнас, тэ ашэл мудро» (Пс. 19:7).

9. Сар кодэла, ко любин тэ приасанпэ, сыкавэн, кай на прилэн лэ Дэвлэстири мудрость?

⁹ Дуйто ӷрупа манушэн, савэ на прилэн лэ Дэвлэстири мудрость, — када кодэла, «ко любий тэ приасалпэ». Дэкала андэ служэния амэ диқас кацавэ манушэн. Вонэ андэ дума старыинпэ тэ лажаварэн аврэн (Пс. 123:4). Андэ Библия ԥэнэнпэ, кай андэ послидни деса кацавэ манушэн авэла фартэ бут (2 Пет. 3:3, 4). Дэсавэ адес на шон сама, со ԥэнэн о Дэл, кадя жэ, сар лэ Лотостирэ зятёря (Быт. 19:14). Бут мануша асанпэ кодэлэндар, ко жувэн па библейски принцыпоря. Вонэ «терэн кода, со камэл о ӷрешно ди» (Иуды 7, 17, 18). Када драго поджал каринг и отступникоря и каринг кодэла, ко на камэл тэ ӷанэн лэ Иеговас.

10. Со трэбуй тэ терас, кай тэ на авас кацавэ манушэнца, савэ любин тэ приасанпэ? (Псалом 1:1).

¹⁰ Со тэ терас, кай тэ на андярас пэс кадя, сар и мануша, савэ приасанпэ? Например, тэ на общяемся кодэлэнца, ко вся и время нэдовольно. (Проадинон Псалом 1:1.) Када сыкавэл, кай нащи тэ ашунас лэ отступниконэн и тэ адиносарас кода, со вонэ пистрон. Амэ полас, кай если тэ на авас осторожни, тоди амэ можэм тэ авас нэдовольни и тэ на допатяс лэ Иеговасти и кодэлэсти, саво руковоцтво дэл лэстири арӷанизацыя. Кай кацаво тэ на авэл, трэбуй тэ погиндосарас: «Кала амэнди дэн нэво руковоцтво или объяснения, появийпэ мандэ андо ди холи? Исин мандэ привычка тэ шав сама пэ нэдостаткоря, савэ исин кай и назначени ԥрала?» Если амэ сразу парашас пэс кадя тэ андярас, тоди о Иегова авэла амэнца довольно (Прит. 3:34, 35).

11. Сар и «найгодявэрнэ» диқэн пэ лэ Дэвлэстирэ законоря?

¹¹ Трито ӷрупа манушэн, савэ на прилэн лэ Дэвлэстири мудрость — када и «найгодявэрнэ». Васо вонэ найгодявэрнэ? Важ кода кай отԥэндён тэ жувэн па лэ Дэвлэстирэ законоря, андэ савэ ԥэнэнпэ, кай трэбуй тэ ритярдювас май дур лэ билажавардимастар. Лэнди чалёл тэ терэн кода, со правильно андэ лэндирэ яқа (Прит. 12:15). Вонэ на приашундён каринг о Иегова, кастар жал и мудрость (Пс. 53:1). Кала амэ проповедуем, вонэ часто сындон амэн, кай амэ приритярдювас кодэлэсти, со пистромэ андэ Библия. Но саво лашымос вонэ амэнди моӷут тэ дэн? Нисаво. Андэ Библия ворта пистромэ: «Важ о найгодявэрно мануш и чачуни мудрость фартэ дур. Лэсти найсо тэ ԥэнэн паша лэ форостирэ вороты» (Прит. 24:7). Кацаво мануш нэ можэт тэ дэл па чачимастэ мудро совето. Важ када о Дэл ԥэнэн амэнди: «Ритярдюв май дур лэ найгодявэрнэстар» (Прит. 14:7).

12. Со поможыя амэнди тэ на терас кадя, сар андярэн пэс и найгодявэрнэ мануша?

¹² Амэ на шаспэ пэ мануша, савэ отԥэндён тэ кандэн лэ Дэвлэс. Амэ любисарас лэстирэ советоря, ай кадяжэ кала во подԥэнэн тэ ритярдювас май дур лэ билажавардимастар. Амэ можэм тэ терас, кай кадэя любовь тэ авэл май бари, если ласа тэ сыстосарас, каринг со анэн, кала кандас или кала на кандас лэ Дэвлэс. Погиндон пала мануша, савэндэ бут проблемы кодэлэстар, кай вонэ отԥэндён тэ прилэн лэ Иеговастар лэстирэ мудри советоря! И диқэн пэ пэстири жызня: пэскати вой май бахтали, кай тумэ кандэн лэ Иеговас (Пс. 32:8, 10).

13. Заставий амэн о Иегова тэ прилас лэстирэ мудри советоря?

¹³ О Иегова дэл и мудрость всаворэнди. Но во никас на заставий каринг латэ тэ приашундён. Кадяжэ во росԥэнэн, сави жызня авэла кай о мануш, если во на прилэл лэстири мудрость (Прит. 1:29—32). Кодэлэнди, ко на камэн тэ кандэн лэ Иеговас, авэла кода, со вонэ затердэ. Сар прожала время, лэнди авэла фартэ ԥарэс кодэлэстар, кай вонэ жувэнас па пэстирятэ. Ай потом о Иегова лэн улэла. Но пала кодэла, ко прилэл лэ Иеговастирэ советоря, андэ Библия ԥэнэнпэ: «Кодэва, ко ман ашунэл, авэла тэ жувэл андэ безопасность. Во на лэла тэ дарал ла бидатар» (Прит. 1:33).

САВО ЛАШЫМОС АНЭН И ЧАЧУНИ МУДРОСТЬ

14, 15 Сости амэн сытярэл о гиндо анда Притчи 4:23?

¹⁴ Лэ Дэвлэстири мудрость вся и время анэн лашымос. Сар амэ ужэ подям дума, о Иегова позаботисайля пала кода, кай амэ моӷли вушэро тэ арақас лэстирэ советоря. Например, андэ книӷа Притчи исин бут лашэ советоря, савэ всегда полезни. Давайте подаса дума, пала штар кацавэ советоря.

¹⁵ Фэрин пэско образно ди. Андэ Библия ԥэнэнпэ: «Май бут, со трэбуй тэ фэрис, фэрисар пэско ди. Важ кода кай лэстар и жызня» (Прит. 4:23). Погиндон, со трэбуй, кай о буквально ди тэ авэл здорово. Важ када трэбуй полезно хамос, тэ терас зарядка и тэ улас и найлашэ привычки. Кадяжэ амэнди трэбуй тэ диқас и пала образно ди, кай тэ фэрисарас лэс. Амэ кажно дес адиносарас лэ Дэвлэско Алав, ӷотовимся каринг и собрании, авас пэр лэндэ и участвуем андэ проӷрама. Ай инке амэ проповедуем и на жалуисарас пэ када пэско зор. И амэ дурювас лэ найлашэ привычкэндар, савэ моӷут тэ анэн амэнди вэрыти гиндоря, — абисавэ развличении и найлащи общения.

16. Саво лашо совето пистромэ андэ Притчи 23:4, 5?

¹⁶ Авэн довольни кодэлэса, со тумэндэ исин. И Библия дэл лашо совето: «На ха пэско зор, кай тэ розбарвадёс. [...] Ту диқэса по барвалимос, ай лэс ужэ нинай, важ кода кай лэстэ вибарёна крылоря и во, сар орло, завуряла по нэбо» (Прит. 23:4, 5). О барвалимос можно быстро тэ хасарас. И всаек, и барвалэ и чорорэ мануша фартэ цырдэнпэ пала ловэ. Через кода кай лэндэ о шэро кати кадэлэса замардо, вонэ лэн тэ андярэн пэс кадя, кай римон пэстири репутацыя, хан пэско зор и най фартэ ладин аврэнца (Прит. 28:20; 1 Тим. 6:9, 10). Ай блаӷодаря кодэлэсти, кай амэндэ исин и мудрость, амэ на ласа фартэ тэ пэрэжываем пала ловэ. Када поможыя амэнди тэ на авас жадни и тэ радосавас кодэлэсти, со амэндэ исин (Эккл. 7:12).

17. Сар амэ можэм тэ дас дума годявэрнэс, сар ԥэнэнпэ андэ Притчи 12:18?

¹⁷ Гиндон англа кода, сар тэ дэн дума. Если амэ на аваса осторожни, амарэ алава моӷут тэ анэн лэ манушэсти баро ԥаримос. Андэ Библия пистромэ: «Дэко, кала на гиндой, со дэл дума, шынэл сар шуряса, ай ко дэл дума годявэрнэс, дэл зор» (Прит. 12:18). Амэ ладисараса лэ манушэнца тоди, если на ласа тэ розындярас пала лэндэ сплетни (Прит. 20:19). Кай через амари дума тэ на авэл ԥарэс, и вой тэ анэн лашымос, амэнди трэбуй май бут тэ уӷанас пала Иегова анда Библия (Луки 6:45). Кала амэ гиндосарас пала кода, со ԥэнэнпэ андэ Библия, амарэ алава ашэн сар «ла мудростяко источнико», и подритярэн аврэн (Прит. 18:4).

18. Сар о принцыпо анда Притчи 24:6 поможый амэнди андэ служэния?

¹⁸ Прилэн советоря, савэ дэл лэ Иеговастири арӷанизацыя. Андэ Библия ԥэнэнпэ: «Родэ мудро руководство, кала андярэс и война. И кала бут советникоря, ту вицэлэса» (Прит. 24:6). Сар кадэва принцыпо поможый амэнди, кай тэ авэл май бут лашымос андэ служэния и кала сытярас лэ манушэн па Библия? Амэ старысавас тэ прилас и советоря, савэ дэл лэ Иеговастири арӷанизацыя, и на терас па пэстирятэ, кала проповедуем и проандярас и изучении Библии. Кадэла советоря амэ получисарас, кала ашунас и библейски речи или диқас и задании пэ собрании. Кадяжэ лэ Иеговастири арӷанизацыя дэл амэнди лашэ инструменторя: када и публикацыи и видео, савэ поможын лэ манушэнди тэ полэн и Библия. Сытён май драго тэ используете кадэла инструменторя!

19. Сар тумэ диқэн пэ мудрость, сави дэл о Иегова? (Притчи 3:13—18).

¹⁹ Проадинон Притчи 3:13—18. Сар жэ амэ блаӷодарни лэ Иеговасти пала лэстирэ советоря, савэ запистромэ андэ Библия! Сави жызня амэндэ авелоп би лэнго? Андэ кадэя статья амэ подям дума пала дэсавэ принцыпоря анда книӷа Притчи. Канешно, андэ Библия исин фартэ бут лэ Дэвлэстирэ мудри советоря. Давайте вся и время тэ приашундювас каринг лэ Иеговастири мудрость. И нэважно, сар диқэл пэр латэ кадэва миро. Амэ уверени, кай «пэ кодэла, ко састэс ритярдёлпэ... [пала мудрость], ԥэнэна, кай вонэ бахталэ».