Мэк и дар англа Дэл фэрий тут

1, 2. Андэр со амаро ԥаримос шолпэ пэ кодэва, саво сас кай о Лото?

АДЕС бут мануша андярэн пэс май вэрыто и май вэрыто. И кала амэ када диқас, амэндэ по ди кадя жэ, сар кай о Лото, саво кандэлас лэ Дэвлэс. Лэсти «сас ԥарэс лэ ӷрешнонэ миростар, саво бисовисно пэс андярэлас». Важ кода кай во ӷанэнас, кай о небесно Дад вэрыцый кацави дила (2 Пёт. 2:7, 8). О Лото даралас лэ Дэвлэстар и любияс лэс. Када поможыяс лэсти тэ на ашэл кацаво, сар и мануша андэ лэстири время. Адес амэ жувас машкар миро, важ саво лэ Дэвлэско законо почти нисо на ашэл. Но амэ можэм тэ ашаспэ вужэ англа Дэл. Важ када трэбуй тэ пристас зор, кай тэ авэл любовь каринг о Дэл и правильно дар англа лэстэ (Прит. 14:2).

² О Иегова камэл тэ поможый амэнди, важ када во дя книжка Притчи. Кадэя книжка побудий амэн тэ андярас пэс правильно. Всаворэ́ христианонэнди — лэ муршэнди, лэ жувлянди, лэ ԥурэнди, и лэ тэрнэнди — авелоп драго тэ погиндон пала мудри советоря анда кадэя книжка.

И ДАР АНГЛА ДЭЛ ФЭРИЙ АМЭН

3. Васо, сар ԥэнэнпэ андэ Притчи 17:3, амэнди трэбуй тэ фэрисарас пэско ди? (Диқэн кадяжэ и картинка.)

³ Амэнди трэбуй тэ фэрисарас пэско ди, важ кода кай о Иегова драго роздиқэл лэс. Када сыкавэл, кай во додиқэл кода, пэр со на шон сама авэр. Амэ англа лэстэ, сар пэ палматэ. (Проадинон Притчи 17:3.) Лэсти чалёл, кала амэ ԥэрас пэстири годи лэстиря мудростяса, сави дэл и жызня (Иоан. 4:14). Важ када амэ на домэкас, кай андэ амаро ди тэ попэрэл лэ Сатанаско и лэстирэ мироско ядо. Амэ на патяс андэ лэско хохаимос и на гиндосарас, кай о мануш можэт тэ жувэл кадя, сар камэл (1 Иоан. 5:18, 19). Кала амэ ашас май пашэ каринг о Иегова, амэ лас май фартэ лэс тэ любисарас и тэ стас май бари патив пэр лэстэ. Амэ на камас, кай через амэндэ тэ дуқал оди кай амаро небесно Дад. Важ када амэнди гряца дажэ о гиндо, кай тэ стерас о бэзэх. Если амаро ди цырдэл амэн тэ стерас нэправильно, авелоп драго тэ пушас пэстар: «Хэба камав мэ тэ стерав дуқанэс кодэлэсти, ко кадя фартэ ман любий?» (1 Иоан. 4:9, 10).

4. Сар и дар англа Иегова поможысардя ла ԥьяти тэ на подэлпэ лэ бэзэхэсти?

⁴ Кай и Светаb анда Хорватия сас ситуацыя, андэ сави вой моӷла тэ стерэл билажавардимос. Вой пистросардя: «Андэ кадэва маменто манди сас ԥарэс тэ гиндосарав кадя, сар сытярэл о Дэл. Каринг кадэва бэзэх цырдэласпэ мэрно ди. Манди здэласпэ, кай най па мэрно зор тэ на подавпэ лэсти. Но ман спасысардя и дар англа Иегова». Сар и дар англа Дэл поможысардя лати? И Света гиндояс, со авэла, если вой стерэла бэзэх. Када розлашо примеро важ амэндэ. Само вэрыто, со можэт тэ авэл посли бэзэх — када, кала о христианино терэл дуқанэс лэ Иеговастирэ одести и хасарэл и возможность тэ служый лэсти вечно (Быт. 6:5, 6).

5. Сости тумэн сытярэл кода, со сас андэ жызня кай о Лео?

⁵ Если амэ дарас лэ Дэвлэстар, амэ на ласа тэ гиндосарас, кай нинай нисо, если дружысараса кодэлэнца, ко терэл найлащи дила. О Лео анда Конго па пэстири жызня поля, кай када фартэ важно. Через 4 бэрш посли кода, сар во болделя, во сԥанделя найлашэ друӷонэнца. О Лео гиндояс, кай пока во екжэно на терэл варисо нэправильно, во на жал против о Иегова. Но ӷэт май интя и друӷоря повлияли пэр лэстэ, во помэкляпэ андэ ягали и ля тэ андярэл билажаварди жызня. Тоди во вспомнил, пала со лэс сытярэнас и родителя и сави дэ бахтали сас лэстири жызня, кала во сас лэ Иеговаса. Блаӷодаря кадэлэсти, во обгиндосайля и барэдэр ԥрала андэ собрания поможысардэ лэсти тэ рийпэ каринг о Дэл. Адес о Лео служый сар барэдэр ԥрал и спецыально пианеро.

6. Пала савэ дуй образни жувля амэ подаса дума?

⁶ Акана роздиқаса 9 ӷлава анда книжка Притчи. Котэ пала годявэрнимос и дилимос ԥэнэнпэ, сар пала дуй жувля. (Сыстон Римлянам 5:14; Галатам 4:24.) Кажно анда кадэла дуй жувля взвийпэ каринг и найгодявэрнэ мануша, кастэ мало опыто. И кажно андар лэндэ, кабута ԥэнэн: «Зажа мандэ и ха» (Прит. 9:1, 5, 6, 13, 16, 17). Лэдуй вонэ ақарэн манушэн тэ зажан лэндэ. Кадэлэса вонэ шонпэ. Но кода, со авэла лэндирэ ӷостёнэнца, совсем разно. Адес и мануша андэ лэ Сатанастири люма дилявэн пала отношэнии, савэ исин кати машкар хулай и хулаи, и кай тэ диқэн о билажавардимос (Эф. 4:19). Важ када амэнди трэбуй тэ пристас зор, кай тэ дурювас лэ найлашымастар и кай амэндэ тэ авэл дар англа Дэл (Прит. 16:6). Кадэлэстар зависит амари жызня. Вижал, амэнди всаворэнди — и муршэнди, и жувлянди — авелоп драго тэ подас дума пала 9 ӷлава анда книжка Притчи.

НА ЗАЖАН КАРИНГ И «ДИЛИ МАНУШНИ»

7. Со аштярэл кодэлэн, ко зажал каринг и «дили манушни», сар ԥэнэнпэ андэ Притчи 9:13—18? (Диқэн кадяжэ и картинка.)

⁷ Шон сама, со ԥэнэн лэ манушэнди и «дили манушни». (Проадинон Притчи 9:13—18.) Вой на лажал тэ ақарэл кодэлэн, кастэ нинай мудрость, тэ зажан латэ, кай тэ хан. Вой терэл када, хоть и драго ӷанэн, со авэла кадэлэ манушэнца. Кодэла, ко зажана андэ лако цэр, мэрэна. Возможно, тумэнди сразу авэл по гиндо авэр сравнении анда книжка Притчи. Котэ ԥэнэнпэ пала билажаварди и роспутно манушни. Ко жал каринг лако цэр, кодэва жал каринг и смэрть (Прит. 2:11—19). Ай андэ Притчи 5:3—10 росԥэнэнпэ инке пала ек роспутно манушни. Латирэ пэрнэ пашон каринг и смэрть.

8. Андэ сави ситуацыя амэнди прижалапэ тэ витидас?

⁸ Кодэла, ко ашунэн ла «диля манушня», трэбуй тэ витидэн, соӷласинапэ вонэ тэ зажан чи най. Амэнди тожэ можэт тэ прижалпэ тэ витидас. Сар амэ пэс андяраса, если авэла кацави жэлания, кай тэ терас билажавардо бэзэх? Со амэ тераса, если по телевизоро или андо телефоно появияпэ билажаварди картинка?

9, 10. Васо трэбуй тэ фэрисавас лэ билажавардимастар?

⁹ Амэ ӷанас, васо фартэ важно тэ нашас лэ билажавардимастар. И «дили манушни» ԥэнэн: «И чорданэ пая гуглэ». Со када «чорданэ пая»? Андэ Библия пала отношэнии, савэ моӷут тэ авэн кати машкар хулай и хулаи ԥэнэнпэ, сар пала лашо паи (Прит. 5:15—18). Кай о мурш и жувли, савэ андо законо брако исин право тэ радуинпэ кадэлэсти. Канешно, вонэ трэбуй андэ када тэ андярэн пэс ек еқэса вужэс и пативалэс. Но «и чорданэ пая» — када совсем авэр. Када, кала машкар мануша, савэ най андо брако, исин кацавэ отношэнии, савэ моӷут тэ авэн кати машкар хулай и хулаи. Обычно, и мануша, савэ кадя пэс андярэн, терэн када чоралэс, сар чордыӷаря, кай нико нисо тэ на уӷанэн. «И чорданэ пая» здэнпэ гуглэ, особено, кодэлэнди, ко гиндой, кай лэнди вся обжалапэ кадя. Кадэлэса вонэ хохавэн корко пэс. Важ кода кай о Иегова вся диқэл. Нинай нисави май бари бида, чем тэ хасарас и дружба лэ Иеговаса. Ай кала о мануш полэл, кай о Дэл нэдовольно лэса, нисо «гугло» андэ када нинай (1 Кор. 6:9, 10). Но када инке най вся.

¹⁰ Каринг со анэн, кала и мануша, савэ най андо брако терэн кода, со можэт тэ авэл кати машкар хулай и хулаи? Када анэн каринг о лажаимос, о мануш хасарэл патив каринг пэстэ, ай кадяжэ через када розжанпэ и еря. Ай инке через о билажавардимос и манушни можэт тэ заԥирэл, хоть и на камля када. Пэскати авелоп дэ годявэрнэс тэ обжас ригаса ла «диля манушняко» цэр и тэ на шас сама пэ мисяйля, сави вой стодя. Кодэла, ко зажан латэ, моӷут тэ хасарэн най кати и дружба лэ Иеговаса, но и пэстири жызня. Важ кода кай бутэ манушэндэ, савэ андярэн билажаварди жызня, появийпэ насвалимос, саво андярэл каринг и смэрть (Прит. 7:23, 26). Андо 18 стихо андэ 9 ӷлава ԥэнэнпэ: «Латирэ ӷостёря андэ моӷила». Васо тоди бут мануша зажан каринг и «дили манушни» и попэрэн андэ латири ловушка? (Прит. 9:13—18).

11. Кала о мануш диқэл о билажавардимос, каринг саво найлашымос када анэн?

¹¹ Например, адес бут мануша диқэн о билажавардимос. Дэсавэ на полэн, кай када лэ Сатанастири нажывка. Вонэ гиндон, кай кадэлэстар нисо на авэла. Но па чачимастэ када анэн найлашымос. Кала о мануш диқэл билажавардимос, во, можно тэ ԥэнэс, приԥандёлпэ каринг када, ай кадяжэ хасарэл патив каринг пэстэ и каринг авэр. Билажавардэ картинки и видео фартэ влияют по мануш. Вонэ постояно болдэнпэ андэ годи, и важ када лэн фартэ ԥарэс тэ вишос анда шэро. Инке, кала о мануш диқэл о билажавардимос, во на улэл пэстирэ найлашэ жылании, ай, наоборот, росԥабарэл лэн (Кол. 3:5; Иак. 1:14, 15). Бут кодэла, ко диқэн о билажавардимос, потом лэн тэ андярэн пэс билажавардэс.

12. Сар амэ можэм тэ фэрисавас лэ картинкэндар, через савэ появинпэ билажавардэ гиндоря?

¹² Со амэ, сар христианоря, можэм тэ терас, если по экрано появийпэ билажаварди картинка? Амэнди трэбуй май ӥто тэ вилас када па яқа. Со амэнди поможыя? Трэбуй тэ сэрас, кай само цэно важ амэндэ — када амари дружба лэ Иеговаса. Дажэ если пэ варисавэ картинки на ԥэнэса, кай вонэ билажавардэ, через лэндэ всаек моӷут тэ появинпэ и найлашэ жылании. Васо лэ христианонэнди на трэбуй тэ диқэн пэ када? Важ кода кай амэ на камас тэ терас ни ек шаӷо каринг о бэзэх и тэ на изменяем лэ хуласти или ла хулаяти дажэ андэ пэско ди (Матф. 5:28, 29). О барэдэр ԥрал Дэвидо анда Таиландо ԥэнэн: «Мэ всегда задав пэсти вопросо: „Дажэ если када най билажавардимос, чалёла лэ Иеговасти кода, со мэ диқав?“ Кацавэ гиндоря поможын манди тэ андярав пэс годявэрнэс».

13. Со поможыя амэнди тэ андярас пэс годявэрнэс?

¹³ Амэ сможэм тэ андярас пэс годявэрнэс, если ласа тэ пристас зор, кай амэндэ тэ авэл дар англа Иегова. Кацави правильно дар англа Дэл «анэн и мудрость» (Прит. 9:10). Можно тэ ԥэнэс, кай кацави дар — пэрво шаӷо каринг латэ. Када драго дицол анда пэрви алава андэ 9 ӷлава Притчи. Котэ росԥэнэнпэ пала «чачуни мудрость», пэ сави тожэ ԥэнэнпэ, сар пэ образно жувли.

АВЭН КАРИНГ И «ЧАЧУНИ МУДРОСТЬ»

14. Пала со жал и дума андэ Притчи 9:1—6?

¹⁴ Проадинон Притчи 9:1—6. Анда кадэла шов стихоря амэ диқас, кай лэ манушэн ақарэл каринг пэстэ о Иегова, савэстар жал и чачуни мудрость (Прит. 2:6; Рим. 16:27). Катэ дэлпэ дума пала баро цэр, савэстэ семь столборя. Када сыкавэл, кай о Иегова анда вся оди шол сама всаворэн, ко камэл тэ сытёл лэстар и тэ ашэл годявэрно.

15. Каринг со побудий амэн о Дэл?

¹⁵ О Иегова фартэ щедро и заботливо Дэл, и важ када во дэл вся, со трэбуй важ и жызня. Кадэла качестворя сыкавэн и «чачуни мудрость». Пала латэ ԥэнэнпэ андэ 9 ӷлава Притчи, сар пала жувли, сави гитосардя о мас, шутя приправа андо вино и стодя мисяйля (Прит. 9:2). Май дур андо 4 и андо 5 стихо ԥэнэнпэ: «Лэ найгодявэрнэнди вой ԥэнэн: „Авэн, хан мэрно марно“». Сости амэнди тэ зажас андо цэр, кай «чачуни мудрость» и тэ хас па латири мисяйля? О Иегова камэл, кай лэстирэ бэяцэ тэ авэн годявэрнэ и кай лэнца нисо тэ на терэлпэ найлашо. Во на камэл, кай амэ тэ сытювас па пэстирэ ошыбки, тэ шылисавас, кай потом тэ хас пэстирэ куя. Важ када «во фэрий и мудрость важ кодэла, ко лэс кандэл андэ вся» (Прит. 2:7). И правильно дар англа Дэл побудия амэн тэ андярас пэс кадя, кай во тэ авэл амэнца довольно. Амэ приашундювас каринг лэстирэ советоря и радостяса прилас лэн андэ пэстири жызня (Иак. 1:25).

16. Сар и дар англа Дэл, поможысардя лэ Аланости тэ прилэл годявэрни ришэния и каринг со када андя?

¹⁶ Подаса дума, сар и дар англа Дэл поможысардя лэ Аланости тэ прилэл годявэрни ришэния. О А́лано барэдэр ԥрал андэ собрания, ай кадяжэ учителё андэ школа. Во росԥэнэн: «Бут мануша, савэнца мэ терав бути, гиндон, кай о мануш трэбуй тэ диқэл билажавардэ киноря, кай тэ сытёл кадэлэсти». Но о Алано полэлас, кай када най кадя. Во ԥэнэн: «Мандэ исин дар англа Дэл. Важ када мэ сразу отԥэндювавас тэ диқав кацавэ киноря и всегда росԥэнавас лэнди, васо мэ кадя терав». Во приашундёлас каринг о совето: «Жан годявэрнэ дромэса» (Прит. 9:6). Кода, кай о Алано састэс када ришыл важ пэстэ, во подя лашо примеро аврэнди. Акана дэсавэ анда авэр учителёря, савэ терэн бути вмести лэ Аланоса, изучают и Библия и ԥирэн пэ христиански собрании.

17, 18. Со авэла кодэлэндэ, ко авэл андо цэр каринг и «чачуни мудрость», и со лэн аштярэл англэ? (Диқэн кадяжэ и картинка.)

¹⁷ Через дуй образни жувля о Иегова сыкадя, сар тэ андярас бахтали и радосно жызня. Дэсавэ жан каринг и шумно «дили манушни». Лэндири жызня андэ кода, кай тэ жувэн кадя, сар чалёл. Вонэ чоралэс терэн о билажавардимос, сар ԥэнэса хан варисаво гуглимос. Вонэ жувэн еқэ десэса и на гиндон, со авэла англэ. Ай англэ лэн аштярэл и смэрть (Прит. 9:13, 17, 18).

¹⁸ Сар жэ на шонпэ пэр лэндэ кодэла, ко зажал каринг и «чачуни мудрость». Латирэ ӷостёря ужэ акана хан па шукарни мисяйля, сави стодя о Дэл. Котэ тердёл разно вкусно и полезно хамос (Ис. 65:13). Через о пророко Исая о Иегова ԥэндя: «Драго ашунэн ман и хан о лашо хамос и мэк тумарэ одя чалён лашэ хамастар» (Ис. 55:1, 2). Амэ сытювас тэ любисарас кода, со любий о Иегова и тэ вэрыцысарас кода, со вэрыцый во (Пс. 97:10). И амэнди фартэ чалёл тэ ақарас аврэн в ӷости каринг и «чачуни мудрость». Амэ, ԥэнэса, тердювас пэ вуче ҭана андо форо и ақарас: «Кодэва, ко най вся полэл, мэк авэл кардэ». Чаче, всаворэ, ко авэл каринг и чачуни мудрость, никала на жалуина пала када. Амэ сможэм тэ жувас вечно и вся и время тэ жас лэ годявэрнэ дромэса! (Прит. 9:3, 4, 6).

19. Каринг со побудин амэн и алава анда Экклезиаст 12:13, 14? (Диқэн кадяжэ и рамка «Саво лашымос анэн и дар англа Дэл?»)

¹⁹ Проадинон Экклезиаст 12:13, 14. Мэк и дар англа Дэл поможый тумэнди вужэ одеса тэ тэлён лэ Иеговасти, и фэрий тумаро ди, кай во тэ на впитой андэр пэстэ о мэлалимос кадэла люмако. Мэк кадэя дар побудия тумэн и май дур тэ ақарэн всаворэн каринг и «чачуни мудрость», кай тэ сытён латар.