Ӷотово ту тэ отдэс пэстири жызня лэ Иеговасти?

1, 2. Со трэбуй тэ стерэл о мануш англа кода, сар тэ болдёл?

ПАЛА послидни 5 бэрш болделэ и ашэлэ лэ Иеговастирэ свидетеля бут мануша, май бут, чем ек милионо. Бут андар лэндэ, кадя жэ сар и о Тимофеё, саво жувэлас андо пэрво вико, ӷанэнас о чачимос с децтва (2 Тим. 3:14, 15). Авэр уӷанглэ пала Иегова, кала сас ужэ взросли, дэсавэ дажэ ужэ андэ ԥурэ бэрша. Например, ек жувли болделя, кала лати сас 97 бэрш!

² Если ту изучаеш и Библия или барёс андо ери кай лэ Иеговастирэ свидетеля, гиндос ту пала кода, кай тэ болдёс? Када райкани цэль! Но спэрва тути трэбуй тэ отдэс пэстири жызня лэ Иеговасти. Кадэя статья поможыя тути тэ полэс, сар када тэ стерэс. Ай инке амэ уӷанаса, васо дэсавэ даран тэ жан пэ кадэва шаӷо и со поможыя тэ улэн кадэя дар.

СО КАДА ТЭ ОТДЭС ПЭС ЛЭ ИЕГОВАСТИ?

3. Ко сас отдино лэ Иеговасти андэ библейско время?

³ Кала андэ Библия ԥэнэнпэ, кай варисо отдэн лэ Дэвлэсти, када сыкавэл, кай када отдэн важ и свынто дила. И израильтяноря сас народо, саво сас отдино лэ Иеговасти. Но дэсавэ анда народо сас отдилимэ важ и особо дила лэ Дэвлэсти. Например, о Аароно. Пэ лэстири рашаицко стади, сас сомнакони пластина — када сас «свынто знако, саво сыкавэл, кай динэ алав лэ Иеговасти». Вой сыкавэлас, кай о Аароно сас отдино важ и особо дила — тэ служый, сар ӷлавно рашай (Лев. 8:9). Кадяжэ можно тэ ԥэнас и пала назареёря. О алав «назареё» жал лэ еврейсконэ алавэстар нази́р, со сыкавэл «отдилимэ» или «отдино». Кадэла мануша па лэ Моисеёско законо трэбуй сас дэсо тэ на терэн (Чис. 6:2—8).

4. а) Кала амэ отдас пэс лэ Иеговасти, со ашэл ӷлавно андэ амари жызня? б) Сар када, тэ отԥэндёс пэстар? (Диқэн кадяжэ и картинка.)

⁴ Кала о мануш отдэл пэстири жызня лэ Иеговасти, со када сыкавэл? Дицол, кай во камэл тэ ашэл лэ Исусоско ученико и само ӷлавно важ лэстэ тэ терэл кода, со камэл о Дэл. Со трэбуй тэ терэл кадэва мануш? О Исусо ԥэндя: «Ко камэл тэ жал манца, мэк отԥэндёл пэстар» (Матф. 16:24). И алава «мэк отԥэндёл пэстар», можно кадяжэ тэ пэрэандярэс, сар «во трэбуй тэ ԥэнэн пэсти най». О мануш, саво отдя пэстири жызня лэ Иеговасти, трэбуй тэ ԥэнэн най всаворэсти, со нэ уӷодно лэ Дэвлэсти (2 Кр. 5:14, 15). Во трэбуй тэ отшол и «бэзэхали дила», например, о билажавардимос (Гал. 5:19—21; 1 Кр. 6:18). Вижал, во трэбуй дэсо тэ на терэл. Сԥандэл када лэсти и вас? Най, если во любий лэ Иеговас и патял, кай лэстирэ законоря анэн лэсти лашымос (Пс. 119:97; Ис. 48:17, 18). О ԥрал, савэс ақарэн Ни́колас ԥэнэн: «Можно тэ диқэс пэ лэ Иеговаско законо, сар пэ решотка андо баруно, сави на дэл свобода. Ай можно тэ диқэс пэ лэско законо, сар пэ решотка, сави фэрий лэ левонэндар».

5. а) Сар када тэ отдэс пэстири жызня лэ Дэвлэсти? б) Соса на шолпэ, кала отдэс пэстири жызня лэ Иеговасти и болдёс? (Диқэн кадяжэ и картинка.)

⁵ Сар тэ отдэс пэстири жызня лэ Иеговасти? Трэбуй андэ молитва тэ ԥэнэс, кай лэса тэ тэлёс кати лэсти и кай ӷлавно андэ тири жызня авэла тэ терэс кода, со во камэл. Кадя ту дэс алав лэ Иеговасти, кай лэса тэ любис лэс «всаворэ одеса, всаворя жызняса, всаворя годяса и всаворэ зорэса» (Мар. 12:30). Кадэя особо молитва — када дума кати машкар тутэ и о Иегова. Ай кала болдёс, кадэлэса ту сыкавэс всаворэнди, кай отдян пэстири жызня лэ Дэвлэсти. И акана ту камэс тэ зритярэс пэстири солах, сави дян лэ Дэвлэсти. О Иегова тожэ када тутар фартэ аштярэл (Эккл. 5:4, 5).

ВАСО АШЭЛ ТЭ ОТДЭС ПЭСТИРИ ЖЫЗНЯ ЛЭ ИЕГОВАСТИ?

6. Со побудий лэ манушэс тэ отдэл пэстири жызня лэ Иеговасти?

⁶ Сави ӷлавно причина, васо о мануш отдэл пэс лэ Иеговасти? Важ кода кай во любий лэ Дэвлэс. Кадэя любовь када най кати жылания. Ту полюбисардян лэ Иеговас блаӷодаря кодэлэсти, кай драго уӷанглян лэс и кода, со во загиндосардя (Клс. 1:9). Кала ту лян май драго тэ уӷанэс лэ Дэвлэско алав, ту полян кай: 1) о Иегова жундо Дэл, 2) и Библия лэ Дэвлэстар, 3) лэстэ исин арӷанизацыя, через сави во терэл кода, со загиндосардя.

7. Пар со можно тэ полэс, кай ту ӷотово тэ отдэс пэстири жызня лэ Иеговасти?

⁷ Кодэла, ко отдэн пэстири жызня лэ Иеговасти, ӷанэн ӷлавно чачимос анда Библия и жувэн па лэ Дэвлэско законо. Вонэ терэн вся, со па лэнго зор, кай тэ росԥэнэн аврэнди андэр со патян (Матф. 28:19, 20). Вонэ любин лэ Иеговас май фартэ и май фартэ и камэн тэ служын кати лэсти. Ай пала тутэ можно кадя тэ ԥэнэс? Если да, када сыкавэл, кай ту по правильно дром. Кала ту закамэса тэ болдёс, ту стерэса када най кай тэ радуис лэ родителёнэн или кодэлэс, ко изучает туса и Библия, или, кай кадя терэн тирэ друӷоря. Ту стерэса када через и бари любовь каринг о Иегова.

8. Сар и блаӷодарность поможыя тути тэ закамэс тэ отдэс пэстири жызня лэ Иеговасти? (Псалом 116:12—14).

⁸ Кала ту гиндос пала вся о лашымос, саво стердя важ тутэ о Иегова, тути на прижалапэ тэ заставис пэс тэ отдэс лэсти пэстири жызня. Ту екжэно закамэса када тэ стерэс. (Проадинон Псалом 116:12—14.) Андэ Библия пала Иегова ԥэнэнпэ, кай во Дад, саво дэл «вся о лашымос и бахталимос» (Иак. 1:17). Например, во отдя андэ жэртва пэстирэ Шавэс, лэ Исусос. Кати погиндосар! О выкупо домэкэл тути тэ ашэс пашутно друӷо лэ Дэвлэсти и тэ жувэс вечно (1 Иоан. 4:9, 10, 19). Кала ту отдэса пэстири жызня лэ Иеговасти, кадэлэса ту сыкавэса пэстири блаӷодарность важ кадэва и важ авэр подаркоря, савэ тути дя о Иегова (Втор. 16:17; 2 Кр. 5:15). Кадэва гиндо кадяжэ росԥэнэнпэ андэ книжка «Жувэн вечно пэ бахтатэ!», андэ 46 ӷлава, 4 подзаӷоловко, кай исин видео, саво жал 3 минуты «Со амэ можэм тэ дас лэ Дэвлэсти?».

АЙ ТУ ӶОТОВО ТЭ ОТДЭС ПЭСТИРИ ЖЫЗНЯ ЛЭ ДЭВЛЭСТИ И ТЭ БОЛДЁС?

9. Васо важно тэ сэрас, кай кажно трэбуй екжэно тэ пристол зор тэ авэл и дружба лэ Дэвлэса май састи?

⁹ Тути можэт тэ здэлпэ, кай ту пока нэ ӷотово тэ дэс алав тэ жувэс важ о Дэл и тэ болдёс. Возможно, тути инке трэбуй варисо тэ парувэс андэ пэстири жызня, кай андэ вся тэ ритярэс лэ Иеговаско законо. Или можэт трэбуй май бут время, кай тири вера тэ ашэл май састи (Клс. 2:6, 7). Най всаворэндэ, ко изучает и Библия, и дружба лэ Дэвлэса ӥто ашэл састи. И най всаворэ тэрнэ мануша ӷотови тэ отдэн пэстири жызня лэ Дэвлэсти и тэ болдён андэ ек возрасто. Старысав тэ полэс, со трэбуй тэ лашарэс имено тути и на сыстосар пэс аврэнца (Гал. 6:4, 5).

10. Со ту можэш тэ терэс, если инке най ӷотово тэ отдэс пэстири жызня лэ Иеговасти и тэ болдёс? (Кадяжэ диқэн и рамка «Важ кодэла, ко барёл андо ери, кай лэ Иеговастирэ свидетеля».)

¹⁰ Если ту инке най ӷотово тэ отдэс пэстири жызня лэ Иеговасти, всаек старысав тэ домардёс кадэя цэль. Мангпэ, кай о Иегова тэ поможый тути тэ парудёс (Флп. 2:13; 3:16). Патя, во ашунэна тири молитва и дэла атвето пэр латэ (1 Иоан. 5:14).

ВАСО ДЭСАВЭ ЦЫРДЭН И ВРЕМЯ?

11. Сар о Иегова поможый амэнди тэ на парашас лэс тэ кандас?

¹¹ Дэсавэ ужэ ӷотови тэ отдэн пэстири жызня лэ Дэвлэсти и тэ болдён, но нисар нащи стерэн када. Лэндэ моӷут тэ авэн кацавэ пэрэжывании: «Ай со если ӷэт май интя мэ стерава баро бэзэх и ман исключина анда собрания?» Если тутэ исин кацавэ гиндоря, патя, кай о Иегова поможыя тути андэ вся тэ уӷодис лэсти (Клс. 1:10). Кадяжэ во дэла зор тэ андярэс пэс правильно. Па лэ ԥралэндири и лэ ԥэяндири жызня дицол, кай о Дэл поможый лэнди андэ када и пэр лэстэ можно тэ надеиспэ (1 Кр. 10:13). Анда христианско собрания исключин кати набут манушэн. Када доԥэнэн, кай о Иегова поможый пэстирэ служытелёнэнди тэ на парашэн лэс тэ кандэн.

12. Со поможыя тэ на терэс баро бэзэх?

¹² Всаворэ мануша адес най идиальни и кажнонэс цырдэл тэ терэл варисо нэправильно (Иак. 1:14). Но тэ подэспэ кадэлэсти чи най — витидэс ту. Кажно ришает екжэно, со лэла тэ терэл. Дэсавэ ԥэнэн, кай о мануш нэ можэт тэ зритярэл пэско ди, савэс цырдэл каринг о найлашымос. Но када най кадя. Ту можэш тэ сытёс тэ зритярэс пэстирэ нэправильни жылании. Но дажэ, если тути фартэ камэлапэ тэ терэс варисо нэправильно, тутэ хутилэла зор тэ ритярэс пэс андэ вас. Акэ дэсавэ советоря, савэ поможына тэ на подэспэ лэ бэзэхэсти. Кажно дес мангпэ лэ Иеговасти. Стер лашо ӷрафико важ и лично изучения Библии и приритярдюв лэсти. Ԥир пэ собрании. Росԥэн аврэнди, со уӷанглян пала Дэл. Тоди тутэ авэла зор тэ жувэс кадя, сар дян алав лэ Дэвлэсти. Никала на бистэр, о Иегова тути поможыя (Гал. 5:16).

13. Сости амэ сытювас кай о Иосифо?

¹³ Тути авэла май вушэро тэ кандэс лэ Иеговас, если ту май данглал погиндоса, сар андярэса пэс андэ ситуацыя, сави подмарэла каринг о бэзэх. Роздиқаса лэ Иосифоско примеро. Лэ Патифаростири хулаи най еқвар ԥэнэнас лэсти, кай во тэ пэрэл ласа. Но во драго ӷанэнас, со лэла тэ терэл. Андэ Библия ԥэнэнпэ: «Сар жэ мэ стерава кадэва найлашымос и стерава бэзэх англа Дэл?» (Быт. 39:8—10). Дицол, кай о Иосифо ӷанэнас, сар пэс тэ андярэл инке жы каринг кода, сар кадэя жувли ля тэ долэлпэ каринг лэстэ. Важ када лэсти сас май вушэро тэ терэл правильно, кала сас ԥари ситуацыя.

14. Сар тэ сытёс сразу тэ отԥэндёс кодэлэстар, со гряца лэ Иеговасти?

¹⁴ Сости тумэ можэте тэ сытён кай о Иосифо? Ужэ акана полэн, со́ лэна тэ терэн, если авэла ситуацыя, сави подмарэла тумэн каринг о бэзэх. Сытён сразу тэ отԥэндён кодэлэстар, со гряца лэ Иеговасти. На́ домэкэн пэсти дажэ о гиндо пала кода, со андоп дук лэ Дэвлэстирэ одести (Пс. 97:10; 119:165). Тоди тумэ на подэнапэ лэ бэзэхэсти. Тумэ май данглал лэна тэ ӷанэн и тэ полэн, со лэна тэ терэн.

15. Сар о мануш можэт тэ сыкавэл, кай во «фартэ родэл» лэ Иеговас? (Евреёря 11:6).

¹⁵ Возможно, ту патяс, кай арақлян о чачимос и камэс тэ служыс лэ Иеговасти всаворэ одеса. Но со, если ту всаек най ӷотово тэ отдэс пэстири жызня лэсти и тэ болдёс? Тоди ту можэш тэ стерэс кадя, сар о Давидо. Ԥэн лэ Иеговасти андэ молитва: «Уӷан ман, мэрно Дэл, и продик мэрно ди. Уӷан май драго ман и полэ, пала со мэ фартэ загиндосавав. Роздик, нинай андэр мандэ варисо кацаво, со даравэл ман по найлашо дром, и андяр ман па дром каринг и вечность» (Пс. 139:23, 24). Кацави молитва сыкавэла, кай ту родэс помощь кай о Иегова и пристос о зор тэ домардёс пэстири цэль — тэ дэс алав тэ жувэс важ лэстэ и тэ болдёс. О Иегова блаӷословий кодэлэн, ко «фартэ родэл лэс». (Проадинон Евреёря 11:6.)

НА ПАРАШ ТЭ ПАШОС КАРИНГ О ИЕГОВА

16, 17. Сар о Иегова пашарэл каринг пэстэ кодэлэн, ко барёл андо ери кай лэ Иеговастирэ свидетеля? (Иоано 6:44).

¹⁶ О Исусо ԥэндя, кай нико нэ можэт тэ авэл лэско ученико, если лэс на пашарэла о Иегова. (Проадинон Иоано 6:44.) Погиндон пала кадэва састо гиндо и пала кода, со во сыкавэл тути. Андэ кажно, кас о Иегова пашарэл каринг пэстэ, во диқэл варисо лашо. Во гиндой пала кадэва мануш, кай во лэско, и во куч важ лэстэ (Втор. 7:6). Ту тожэ важ лэстэ фартэ куч.

¹⁷ Ай со можно тэ ԥэнас пала амари молодёж? Андэ еря, савэ лэ Иеговастирэ свидетеля, и тэрнэ мануша моӷут тэ чуствуют пэс кадя, кай вонэ ԥирэн пэ собрания кати важ кода, кай кадя терэн лэндирэ родителя. Если и тутэ кадя, погиндосар пала кадэла библейски алава: «Ашэн май пашэ каринг о Дэл, и во ашэла май пашэ каринг тумэндэ» (Иак. 4:8; 1 Лет. 28:9). Если ту пэстиря ригатар пашос каринг о Иегова, во пашола каринг тутэ. Важ о Иегова ту фартэ куч. Во пашарэл каринг пэстэ кажнонэ манушэс, кадяжэ и кажнонэс, ко барёл андо ери кай лэ Иеговастирэ свидетеля. Сар ԥэнэнпэ андо Иаково 4:8, кала кацаво мануш пэрво пашол каринг о Дэл, тоди во пэстиря ригатар пашола каринг лэстэ. (Сыстон 2 Фесалоники 2:13.)

18. Пала со амэ подаса дума андэ авэр статья? (Псалом 40:8).

¹⁸ Кала тумэ отдэн пэстири жызня лэ Иеговасти и болдён, кадэлэса тумэ шонпэ по Исусо. Во анда вся оди терэлас кода, пала со лэс мангэлас лэско Дад. (Проадинон Псалом 40:8; Евр. 10:7). Андэ авэр статья амэ уӷанаса, со поможыя тумэнди тэ на парашэн тэ служын лэ Иеговасти посли кода, сар болделэ.