О Иегова простий. Васо трэбуй када тэ цэнис?

1, 2. Соса амэ шаспэ по тэрно мануш, пала саво ԥэнэнпэ андо пэрво абзацо?

ПРЕЦТАВЬ тэрнэ манушэс, саво вибареля андо барвало ери. Еқвар терэлпэ бида, и на ашэл лэстирэ родителёнэн. Во умардо бидаса. Но када инке най вся: во уӷанэн, кай лэстирэ родителя розындярдэ вся о мищимос и сас вужылэ жы па коратэ. И о миро, савэсти вонэ завужылисайлэ, заставий лэс тэ отдэл и ловэ палпалэ. Но о вужылимос кацаво дэ баро, кай кадэва тэрно мануш важ вся пэстири жызня не сможэт тэ роспотиндёл.

² Можно тэ ԥэнас, кай амэ шаспэ пэ кадэва тэрно мануш. Амарэ ԥурэ, о Адамо и Ева, сас идеальни и жувэнас андо раимос (Быт. 1:27; 2:7—9). Вонэ моӷли о вико вечно тэ лошавэн кацавя жызняти. Но потом тердяпэ бари бида — вонэ стердэ бэзэх. Через када вонэ хасардэ пэско райкано цэр и возможность тэ жувэн вечно. Со вонэ моӷли тэ ашавэн пэстирэ бэятонэнди? Акэ саво ответо дэл и Библия: «О бэзэх зажыля андэ люма через ек мануш [о Адамо], ай о бэзэх заандярдя и смэрть. Кадя и смэрть пэрэдяпэ всаворэ́ манушэнди, важ кода кай всаворэ стердэ бэзэх» (Римо 5:12). Вся, со дорэсляпэ амэнди лэ Адамостар, — када о бэзэх, саво анэн каринг и смэрть. Лэс можно тэ сыстос барэ вужылимаса, саво нико андар мэндэ не можэт тэ випотинэл (Пс. 49:8).

3. Васо о бэзэх можно тэ сыстос лэ вужылимаса?

³ О Исусо сыстосардя о бэзэх лэ вужылимаса (Матф. 6:12; Лука 11:4). Кала амэ терас неправильно, амэ ԥэнэса ашас вужылэ лэ Иеговасти. И лэстэ исин право тэ мангэл о вужылимос палпалэ. Если амэндэ на вижала тэ роспотиндювас, тоди ек, со можэт тэ випотинэл амаро вужылимос, — када и смэрть (Римо 6:7, 23).

4. а) Моӷут и мануша пэстирэ зорэса тэ рин кода, со хасардэ о Адамо и Ева? (Псалом 49:7—9). б) Сар трэбуй тэ полас о алав «бэзэх», кала во тердёл андэ Библия? (Диқэн и рамка «Бэзэх».)

⁴ Ай можно тэ рисарас кода, со хасардэ о Адамо и Ева? Тэ закамлоп амэ тэ стерас када пэстирэ зорэса, амэндэ нисо на вижылоп. (Проадинон Псалом 49:7—9.) Би лэ Иеговаско амэндэ никала на авелоп надия тэ рисавас каринг и жызня или тэ жувас вечно. Можно тэ ԥэнас, амэнца авелоп кода жэ, со и лэ жывотнонэнца (Эккл. 3:19; 2 Пёт. 2:12).

5. Сар амаро любящё Дад поможысардя амэнди тэ випотинас о вужылимос, саво амэнди дорэсляпэ лэ Адамостар? (Диқэн и картинка.)

⁵ Погиндосарам упалэ пала тэрно мануш, важ саво дям дума май данглал. Со лэстэ авелоп по ди, тэ ԥэндоп лэсти ек барвало мануш, кай випотинэла вся лэско вужылимос? Во авелоп фартэ блаӷодарно важ кацаво баро подарко! Точно кадя жэ амаро любящё Дад, о Иегова, закамля тэ випотинэл вся амаро вужылимос — када о бэзэх, саво пэрэдяпэ лэ Адамостар. О Исусо росԥэндя, васо о Иегова стердя када: «О Дэл фартэ любий лэ мирос и важ када отдя пэстирэ особенонэ Шавэс, кай кажно, ко патял андэр лэстэ, тэ на хасарэл и жызня, ай тэ жувэл вечно» (Иоан. 3:16). Ай инке через кадэва подарко амэндэ исин возможность тэ авас пашутнэ друӷоря лэ Иеговаса.

6. Со амэ роздиқаса андэ кадэя статья и васо?

⁶ Сар и особо цэмин, сави потиндя о Иегова, освободий амэн лэ бэзэхэстар? Роздиқам дэсавэ алава, савэ пистромэ андэ Библия: тэ поладис, тэ витинэс, тэ потинэс и цэмин, тэ освободис и тэ прижанэс найдошалэнца. Када поможыя амэнди инке май фартэ тэ цэнисарас кода, со стердя о Иегова, кай тэ простий амарэ бэзэха.

СОСТЭ? ТЭ ПОЛАДИЙ

7. а) Со инке хасардэ о Адамо и Ева? б) Со фартэ трэбуй амэнди, сар лэ Адамостирэ и ла Еватирэ бэятонэнди? (Римо 5:10, 11).

⁷ О Адамо и Ева хасардэ и возможность тэ жувэн вечно. Но када най вся. Вонэ дурелэ пэстирэ Дадэстар, лэ Иеговастар. О Адамо и Ева сас лэ Дэвлэстирэ бэяцэ (Лука 3:38). Но кала вонэ лэс на канглэ, вонэ ашэлэ лэстирэ вороӷоря, и во видарадя лэн анда пэско ери. Када андя бида най кати лэнди, но и всаворэ́ манушэнди, савэ лэндар жылэ (Быт. 3:23, 24; 4:1). Важ када амэнди трэбуй тэ поладисарас лэ Дэвлэса. (Проадинон Римо 5:10, 11.) Андэ ек справочнико ԥэнэнпэ, кай о греческо алав, саво пэрэандярдо сар «тэ поладис», сыкавэл «тэ парашэс тэ авэс вороӷо и тэ ашэс друӷо». Интересно, кай имено о Иегова пэрво закамля тэ поладий амэнца. Сар во када стердя?

САР? ТЭ ВИТИНЭЛ

8. Со сыкавэл алав «тэ витинэс»?

⁸ Кай тэ поладий лэ бэзэхэстирэ манушэнца, о Иегова закамля тэ витинэл амэн. Если варисо сас хасардо, трэбуй сас тэ потинэн и цэмин, кай тэ рин када палпалэ. И цэмин трэбуй тэ ашэл скати жэ, скати ашэлас кода, со сас хасардо. Тэ на витиндоп амэн о Иегова, амэндэ никала на авелоп возможность тэ авас андэ лэ Дэвлэско ери (Римо 3:25).

9. Саво порядко стодя о Иегова андо дэлмутно Израилё, кай тэ простий лэ манушэн?

⁹ Со стердя о Иегова, кай тэ поладий лэ израильтянонэнца? Кай тэ простинпэ лэндирэ бэзэха, во стодя порядко. Еқвар андо бэрш кай и израильтяноря сас Примирительно дес. Андэ кадэва дес о пэрвосвященико сԥабарэлас лэ жывотнонэн. Кацавэ жэртвы не моӷли полностью тэ злэн па мануша и бэзэха, важ кода кай лэ жывотнонэстири жызня на сыстояпэ лэ манушэстиря жызняса. Но кала и израильтяноря каинаспэ и анэнас жэртвы кадя, сар ԥэнэнас о Иегова, во простияс лэн (Евр. 10:1—4). Кадяжэ всаворэ кадэла жэртвы дэнас лэнди тэ сэрэн, кай вонэ — бэзэхэстирэ мануша. Ай инке вонэ на бистрэнас, кай лэнди трэбуй помощь, через сави вонэ тэ ашэн вужэ лэ бэзэхэстар пэ вся и жызня.

10. Со стердя о Иегова, кай тэ простий лэ манушэн?

¹⁰ Со стердя о Иегова, кай тэ простий лэ манушэндирэ бэзэха? Во бишалдя пэ ԥув пэстирэ любимонэ Шавэс, саво «[важ] еқвар отдя пэстири жызня сар жэртва, кай тэ лэл пэр пэстэ бутэнго бэзэх» (Евр. 9:28). О Исусо отдя «пэстири жызня сар цэмин пала бут мануша... [кай] тэ витинэн лэн» (Матф. 20:28). Пала сави цэмин жал и дума?

САВИ ЦЭМИН? ЛЭ ИСУСОСТИРИ ЖЫЗНЯ

11. а) Кала андэ Библия пистромэ пала особо цэмин, пала со жал и дума? б) Сави цэмин трэбуй сас тэ потинэн?

¹¹ Андэ Библия ԥэнэнпэ пала особо цэмин, сави потинэн, кай тэ витинэн и тэ поладин. И цэмин, сави потиндя о Иегова, дэл лэсти право тэ рий кода, со хасардэ о Адамо и Ева. Вонэ хасардэ идеально жызня и возможность тэ жувэн вечно. Важ када и цэмин трэбуй сас тэ авэл кацави жэ (1 Тим. 2:6). Вижал, ла моӷ тэ потинэл кати взросло мануш, саво: 1) сас идеально, 2) моӷ тэ жувэл вечно пэ ԥув и 3) сас ӷотово тэ отдэл пэстири жызня сар жэртва пала амэндэ. Кати кацавэ манушэстири жызня моӷла сыста тэ тердёл кодэла жызняса, сави хасардя о Адамо.

12. Васо кай о Исусо вижыля тэ потинэл и особо цэмин и тэ витинэл лэ манушэн?

¹² Роздиқаса, васо кай о Исусо вижыля тэ потинэл кадэя цэмин. 1) Во сас идеально и «на стердя нисаво бэзэх» (1 Пёт. 2:22). 2) Во моӷ вечно тэ жувэл пэ ԥув. 3) Во сас ӷотово тэ мэрэл и тэ отдэл важ амэндэ пэстири жызня (Евр. 10:9, 10). О Исусо сас идеально, важ када лэстири жызня сас кацави жэ, сар кай о Адамо англа кода, сар во тэ стерэл бэзэх (1 Кр. 15:45). Кочай, кала о Исусо муля, во моӷ тэ отдэл пэстири жызня вместо кодэя, сави хасардя о Адамо (Римо 5:19). Кадя лэ Дэвлэско Шаво ашэля «послиднё Адамо». Будэр на трэбуй, кай тэ авэл инке ек идеально мануш и тэ потинэл важ кода, со хасардя о Адамо. О Исусо муля и «стердя када [важ] еқвар» (Евр. 7:27; 10:12).

13. Пэр со жыля о Иегова важ и мануша?

¹³ Со вижал? О Иегова закамля тэ пристол о зор, кай тэ поладий лэ манушэнца, ай важ када во потиндя и особо цэмин, кай тэ витинэл лэ мирос лэ бэзэхэстар. Со за када сас цэмин? Лэ Исусоско кучутно рат, саво во отдя пала амэндэ (Еф. 1:7; Евр. 9:14).

СО ДОМАРДЕЛЯ? ОСВОБОДИСАРДЯ И ПРИЖАНГЛЯ НАЙДОШАЛЭНЦА

14. Со амэ роздиқаса май англэ и состэ?

¹⁴ Со амэнди пэрэл кодэлэстар, кай о Дэл витиндя амэн? Роздиқам дуй библейски гиндоря, савэ поможына амэнди инке май фартэ тэ цэнисарас кода, кай о Дэл простий.

15, 16. а) Состар амэ самас спасымэ через и особо цэмин? б) Со тутэ по ди кодэлэстар, кай о Дэл спасысардя амэн лэ бэзэхэстар и ла смэртятар?

¹⁵ Кала андэ Библия ԥэнэнпэ пала особо цэмин, савяса витинэн, када сыкавэл, кай кадэя цэмин освободий, или спасый. О апостало Пётро ԥэндя пала када кадя: «Тумэ ӷанэн, кай тумэнди лэ ԥурэндар дорэсляпэ и жызня, савятар нинай нисаво толко, и кацавя жызнятар тумэ сас спасымэ [ворта «витиндэ»] най через кода, со тернёл, — через о руп или о сомнак, ай через лэ Христоско кучутно рат — через вужо бакроро, андэ саво нинай дош» (1 Пёт. 1:18, 19, сноска).

¹⁶ Лэ Исусостири жэртва можэт тэ спасый амэн лэ бэзэхэстар и ла смэртятар, савэ анэн амэнди бут бида (Римо 5:21). Амэ анда вся ди блаӷодарни лэ Иеговасти и лэ Исусости, кай вонэ освободисардэ амэн. Када ашэля возможно через лэ Христоско рат, или лэстири жызня (1 Кр. 15:22).

17, 18. а) Саво лашымос исин кодэлэстар, кай о Дэл прижангля амэн найдошалэнца? б) Со тутэ по ди кодэлэстар, кай о Иегова прижангля тут найдошалэса?

¹⁷ Кала о Дэл прижанэн лэ манушэн найдошалэнца, када сыкавэл, кай пар мэндэ злэн вся и дош и амэнди на трэбуй тэ роспотиндювас важ пэстирэ бэзэха. И о Иегова на ԥагэл пэско жэ справедливо законо: во прижанэн амэн найдошалэнца най важ кода, кай амэ затердям, и най важ кода, кай лэсти всаек по бэзэх. Амаро небесно Дад простий амаро вужылимос. Васо? Важ кода кай амэ патяс: 1) во витиндя амэн и 2) пала амэндэ сас потинди и особо цэмин (Римо 3:24; Гал. 2:16).

¹⁸ Со када дэл кажнонэсти андар мэндэ? Кодэлэн, ко лэла тэ правий лэ Исусоса по небо, о Дэл прижангля найдошалэнца и пэстирэ бэятонэнца (Тито 3:7; 1 Иоан. 3:1). О Иегова простисардя лэндирэ бэзэха, ԥэнэса вонэ лэн никала и на тердэсас. Важ када вонэ моӷут тэ авэн царёря и священикоря (Римо 8:1, 2, 30). Ай кодэлэн, ко надеийпэ тэ жувэл вечно пэ ԥув, о Дэл кадяжэ прижанэн найдошалэнца, и вонэ ашэн лэстирэ друӷоря (Иак. 2:21—23). Лэндирэ бэзэха во тожэ простисардя. Кай о баро ӷурто манушэн, савэ пэрэжувэна о Армагедоно, исин возможность никала тэ на мэрэн (Иоан. 11:26). «Кодэла, ко терэлас правильно и ко терэлас неправильно», савэн на ашэля, упалэ смоӷут тэ жувэн (Дила 24:15; Иоан. 5:28, 29). Через дэсави время всаворэ́ кандинэ манушэнди пэ ԥув дорэсэлапэ и «райкани жызня», и вонэ ашэна лэ Дэвлэстирэ бэятонэнца (Римо 8:21). Сави дэ лащи жызня аштярэл амэн англэ, важ кода кай амаро Дад, о Иегова, витиндя амэн, кай тэ поладий амэнца!

19. Сар через о Иегова и через о Исусо паруделя амари жызня? (Кадяжэ диқэн и рамка «Со када сыкавэл важ амэндэ?».)

¹⁹ Да, варикала амэ шасаспэ по тэрно мануш, саво хасардя вся и савэсти дорэсляпэ фартэ баро вужылимос. Но о Иегова вся парудя. Во закамля тэ витинэл амэн и потиндя и особо цэмин. Если амэ патяс андо Исусо Христос, када спасый, или освободий, амэн лэ бэзэхэстар и ла смэртятар. Кадяжэ о Иегова простий амэн, и андэ лэстирэ яқа амэ вужэ, ԥэнэса амэ нисо и на стердямас. Но само ӷлавно, кай акана амэ находисавас андэ лэ Дэвлэско ери и ашас май пашэ каринг амаро небесно Дад.

20. Со амэ роздиқаса андэ авэр статья?

²⁰ Кала амэ гиндосарас пала кода, со стердэ важ амэндэ о Иегова и о Исусо, амаро ди ашэл инке май блаӷодарно (2 Кр. 5:15). Если бы най вонэ, амэндэ на авелоп нисави надия! Андэ авэр статья амэ роздиқаса дэсавэ интересни примероря. Вонэ поможына амэнди тэ полас: кала о Иегова амэн простий, амэнди будэр на трэбуй тэ дошалярас корко пэс.