Амэ витидям тэ уӷодисарас лэ Иеговасти

1. Со амэнди трэбуй тэ терас, кай тэ авас па чачимастэ бахталэ, и васо? (Исайя 48:17, 18).

О ИЕГОВА фартэ амэн любий. Во камэл, кай амэ тэ радосавас ла жызняти акана и англэ (Эккл. 3:12, 13). О Дэл дя лэ манушэнди разни таланторя. Но най вся амэнди па зор: амэ не можэм екжэнэ тэ хулаисарас аврэ манушэнца и тэ витидас со лашо, ай со най (Эккл. 8:9; Иер. 10:23). Во ӷанэн: кай тэ авас па чачимастэ бахталэ, амэ трэбуй тэ уӷодисарас лэсти и тэ кандас лэс. (Проадинон Исайя 48:17, 18.)

2. Со камэл тэ доԥэнэн амэнди о Сатана и сар о Иегова сыкадя, кай када хохаимос?

² О Сатана камэл тэ доԥэнэн амэнди, кай амэ аваса бахталэ би лэ Иеговаско и кай и мануша моӷут тэ правин екжэнэ (Быт. 3:4, 5). Кай тэ дицол, кай када хохаимос, о Иегова домэкля лэ манушэнди тэ правин дэсави время, и амэ диқас, кай када на андя нисаво лашымос. Но кадяжэ андэ Библия росԥэнэнпэ пала бут мурша и жувля, савэ сас па чачимастэ бахталэ, кала старыинаспэ тэ уӷодин лэ Дэвлэсти. Само лошало андар лэндэ сас о Иисусо Христос. Давай роздиқаса, васо во витидя тэ уӷодий лэ Иеговасти. Посли када уӷанаса, васо о Иегова ашэл, кай амэ тэ андярас лэстири время. И потом инке еқвар шаса сама, васо амэ витидям тэ уӷодисарас лэ Иеговасти.

ВАСО О ИИСУСО ВИТИДЯ ТЭ УӶОДИЙ ЛЭ ИЕГОВАСТИ

3. Со ԥэндя о Сатана и со витидя о Иисусо?

³ Кала о Иисусо сас пэ ԥув, лэсти трэбуй сас тэ витидэл, касти во лэла тэ уӷодий. Посли кода сар во болделя, о Сатана ԥэндя лэсти, кай дэла лэсти право тэ правий андэ всаворэ царстворя пэ ԥув, если о Иисусо еқвар тэлёла лэсти. Но о Иисусо лэсти ԥэндя: «Вижа мандар, Сатана! Важ кода кай пистромэ: „Полэн тумарэ Дэвлэс лэ Иеговас и терэн кати лэстири свынто дила“» (Матф. 4:8—10). Васо о Иисусо витидя тэ уӷодий лэ Дэвлэсти? Давай роздиқаса.

4, 5. Васо о Иисусо витидя тэ уӷодий лэ Иеговасти?

⁴ О Иисусо фартэ любий пэстирэ Дадэс и када сас ӷлавно, васо во витидя тэ терэл лэ Иеговастири дила (Иоан. 14:31). Инке о Иисусо андярэл лэ Иеговастири время, важ кода кай када правильно (Иоан. 8:28, 29; Тайна 4:11). Во ӷанэн, кай о Иегова дя жызня, кай лэсти исин патяимос и кай во дэл амэнди бут лашымос (Пс. 33:4; 36:9; Иак. 1:17). О Иегова никала на хохавэлас лэ Иисусос и во стердя бут подаркоря пэстирэ Шавэсти (Иоан. 1:14). Ай о Сатана совсем най кацаво, сар о Иегова. Вся, со во «подарисардя» лэ манушэнди, — када бэзэх и смэрть. Во хохавно и любий кати корко пэс (Иоан. 8:44). Акэ васо кай о Иисусо дажэ гиндо на сас, кай тэ терэл кадя, сар о Сатана, и тэ жал против Иегова (Флп. 2:5—8).

⁵ Васо инке о Иисусо витидя тэ уӷодий лэ Иеговасти? Во гиндояс пала кода, саво лашымос авэла, если во на парашэла тэ кандэл лэ Дэвлэс (Евр. 12:2). О Иисусо ӷанэнас, кай, если во вся виритярэла, тоди лэстирэ Дадэско алав авэла свынто, ай о бэзэх и смэрть будэр никала на авэна.

ВАСО О ИЕГОВА АШЭЛ, КАЙ АМЭ ТЭ АНДЯРАС ЛЭСТИРИ ВРЕМЯ

6, 7. Васо бут мануша адес на тэлён лэ Иеговасти и васо во ашэл, кай всаворэ тэ андярэн лэстири время?

⁶ Адес бут мануша на тэлён лэ Иеговасти важ кода, кай на ӷанэн, саво во лашо и скати лашымос во важ лэндэ стердя. Вонэ шонпэ пэ мануша, савэнди о апостало Павло росԥэнэнас пала Дэл андэ Афины (Дила 17:19, 20, 30, 34).

⁷ О Павло росԥэнэнас кодэлэнди, ко лэс ашунэнас, кай о чачуно Дэл «дэл всаворэнди тэ жувэн, и тэ ԥурдэн, и вся авэр». Ай потом во ԥэндя: «Лэстирэ зорэса амэ жувас, и ԥирас, и ԥурдас». О Дэл «стердя кадя, кай еқэ манушэстар жылэ всаворэ народоря, савэ исин пэ ԥув» (Дила 17:25, 26, 28). Важ када всаворэ мануша трэбуй тэ тэлён кати лэсти.

8. Со о Иегова никала на стерэла и сар во сыкавэл, кай фартэ амэн любий?

⁸ Сар амаро Создателё и всаворя люмако Правителё, о Иегова моӷ бы тэ заставий всаворэн тэ тэлён лэсти. Но во кадя никала на стерэла. Наоборот, о Дэл най еқвар сыкавэл амэнди, кай во исин и кай во фартэ амэн любий. Во камэл, кай со май бут мануша вечно тэ дружын лэса (1 Тим. 2:3, 4). Важ када о Иегова сытярэл амэн, сар тэ росԥэнас аврэнди пала лэстири удивительно дила, сави во стерэла англэ (Матф. 10:11—13; 28:19, 20). Во стидя амэн андэ ек баро ери и подарисардя амэнди лэ старейшынонэн, савэ любин и заботинпэ пала амэндэ (Дила 20:28).

9. Пар со дицол, кай о Иегова любий всаворэ́ манушэн?

⁹ О Иегова любий дажэ кодэлэн, ко отԥэндёл андэр лэстэ тэ патял. Погиндосар: важ вся и время, скати мануша жувэн пэ ԥув, бут миро на кандэлас лэ Иеговас, ай екжэно витидэлас, со лашо, ай со най. Но о Иегова всаек дэлас лэнди вся, кай вонэ тэ жувэн и тэ радуинпэ (Матф. 5:44, 45; Дила 14:16, 17). Например, лэ манушэнди анэн радость, кала вонэ проандярэн и время лэ друӷонэнца, кала лэндэ исин ери и кала вонэ терэн варисо пэстирэ вастэнца (Пс. 127:3; Эккл. 2:24). Хэба када на доԥэнэн, кай о Иегова любий всаворэ́ манушэн? (Исх. 34:6). Ай акана давай инке еқвар шаса сама, васо амэ витидям тэ уӷодисарас лэ Иеговасти и сар во пала када амэн блаӷословий.

ВАСО АМЭ ЗАКАМЛЯМ ТЭ УӶОДИСАРАС ЛЭ ИЕГОВАСТИ

10. а) Сави ӷлавно причина, васо амэ камас тэ уӷодисарас лэ Иеговасти? (Матфеё 22:37). б) Росԥэн, сар о Иегова простисардя тут (Псалом 103:13, 14).

¹⁰ Амэ, сар о Иисусо, старысавас тэ уӷодисарас лэ Иеговасти, важ кода кай фартэ любисарас лэс. Када само ӷлавно причина. (Проадинон Матфеё 22:37.) Со май драго амэ уӷанас лэско характеро, со май пашэ во ашэл амарэ одести. Например, о Иегова всегда ӷотово тэ простий амэн. Кала и израильтяноря на кандэнас лэс, во взвияспэ каринг лэндэ: «Мангав тумэн, ашавэн пэстири найлащи дила» (Иер. 18:11). О Иегова сэрэл, кай амэ сар прахо. (Проадинон Псалом 103:13, 14.) Кала ту гиндос, сар о Иегова простий, хэба тути на камэлпэ тэ старыиспэ тэ уӷодис лэсти вся и вечность?

11. Савэ инке амэндэ исин причины тэ старысавас тэ уӷодисарас лэ Иеговасти?

¹¹ Ай инке амэ уӷодисарас лэ Иеговасти, важ кода кай када правильно (Матф. 4:10). И инке амэ ӷанас, кай када анэн бут лашымос. Если амэ на парашас тэ кандас лэ Иеговас, лэско алав ашэл инке май свынто. Амэ доԥэнас, кай о Сатана хохавно и радосарас лэ Иеговаско ди. Кала амэ витидас тэ тэлювас лэ Дэвлэсти, кадя амэ витидас и вечно жызня! (Иоан. 17:3).

12, 13. Сости амэ сытювас кай и Джейн и Пэм?

¹² Дажэ и бэяцэ моӷут тэ сытён всаворэ́ одеса тэ любин лэ Иеговас. И кадэя любовь каринг лэстэ лэла тэ барёл инке май фартэ. Акэ со сас андэ жызня кай дуй чаче ԥэя, савэн ақарэн Джейн и Пэмa. Кала вонэ линэ тэ сытён па Библия, лэнди сас 11 и 10 бэрш. И родителя розрешыли лэнди тэ изучают лэ свидетелёнэнца, если вонэ лэна пэ выходни тэ ԥирэн всаворэ ереса андэ қандири пэ служба. И Джейн росԥэнэн: «Кода, со мэ уӷанавас лэ свидетелёнэндар, кала изучала лэнца и Библия, фартэ ман фэрияс. Мэрнэ ровэсникоря андэ школа попробовали наркотики и терэнас билажавардимос, ай мэ ритярдювавас кадэлэстар май дур».

¹³ Прожылэ дэсавэ бэрша, и кадэла щеёра болделэ. Потом вонэ линэ тэ терэн лэ Дэвлэстири дила сар пианероря и тэ диқэн пала пэстирэ родителя. Кала и Джейн вспоминает, со ласа сас, вой ԥэнэн: «Мэ полэм, кай о Иегова никала на ашавэл пэстирэ друӷонэн. Сар ԥэнэнпэ андо 2 Тимафеё 2:19, „О Иегова ӷанэн кодэлэн, ко лэсти прижал“». Амаро Дэл всегда паша кодэла, ко лэс любий и старыийпэ тэ уӷодий лэсти.

14. Сар амэ можэм тэ злас о хохаимос па лэ Иеговаско алав амаря диласа и лэ алавэнца? (Кадяжэ диқэн и картинки.)

¹⁴ Амэ камас тэ злас о хохаимос па лэ Иеговаско алав. Роздиқаса кацави ситуацыя: тутэ исин пашутно друӷо, во добро, найжадно и одяло. И акэ, еқвар ту ашунэс, сар варико ԥэнэн, кай во жадно и хохавно. Со ту терэса? Ту зашосапэ пала пэско друӷо. Точно кадя жэ и о Сатана и кодэла, ко приашундёл каринг лэстэ, старыинпэ хохаимаса тэ римон лэ Иеговаско алав. Но амэ зашаспэ пала лэ Дэвлэско алав, кала росԥэнас аврэнди о чачимос пала лэстэ (Пс. 34:1; Ис. 43:10). Амаря диласа и лэ алавэнца амэ сыкавас, кай камас анда вся оди тэ уӷодисарас лэ Иеговасти.

15. Саво лашымос сас кай о Павло, кай во парудя пэстири жызня? (Филипы 3:7, 8).

¹⁵ Амэ можэм тэ парувас варисо андэ пэстири жызня, кай тэ радосарас лэ Иеговас и тэ уӷодисарас лэсти инке май фартэ. Например, о апостало Павло сас баро мануш андэ иудейско вера, но во отԥэнделя латар, кай тэ ашэл лэ Иисусоско ученико и тэ уӷодий лэ Иеговасти (Гал. 1:14). Во прожудя па чачимастэ бахтали жызня, ай потом ля тэ правий лэ Иисусоса по небо. О Павло никала на гиндояс, кай во витидя най кодэва дром. И амэ тожэ никала на домэкаса кацаво гиндо, если ласа тэ уӷодисарас лэ Иеговасти. (Проадинон Филипы 3:7, 8.)

16. Сости амэ сытювас анда кода, со сас кай и Джулия? (Кадяжэ диқэн и картинки.)

¹⁶ Если важ амэндэ авэла само важно тэ уӷодисарас лэ Иеговасти, тоди амэндэ авэна бут блаӷословении акана и англэ. Роздиқаса, со сас андэ жызня кай ек амари ԥэй, савя ақарэн Джу́лия. Кала вой сас цынёни, вой дилабэлас андэ қандири. Вой кадя драго када терэлас, кай ла ақардэ тэ сытёл тэ дилабэл сар оперно певица. Май интя и Джулия ашэля ашунгли певица и дилабэлас пэ барэ канцэрторя. Кала вой сытёлас андэ ашунгли музыкально школа, лако однокласнико росԥэндя лати, кай кай о Дэл исин алав — Иегова. Посли када и Джулия ля тэ сытёл па Библия дувар андо курко. Потом вой витидя тэ отдэл пэсти жызня лэ Иеговасти, ай най тэ тратий ла пэ кода, кай тэ авэл ашунгли певица. Лати сас найвушэро када тэ стерэл. И Джулия росԥэнэн: «Бут ко ԥэнэнас манди, кай мэ заӷанавав пэско таланто андэ ԥув. Но мэ камавас тэ отдав вся пэско зор, кай тэ уӷодисарав лэ Иеговасти». Со и Джулия гиндой адес пала кода, со вой витидясас 30 бэрш палпалэ? Акэ со вой ԥэнэн: «Манди по ди кадя драго, и мэ точно ӷанав, кай англэ о Иегова стерэла вся, со камэл мэрно ди» (Пс. 145:16).

НА ПАРАШЭН ТЭ УӶОДИН ЛЭ ИЕГОВАСТИ

17. Амэ ӷанас, кай ашэляпэ набут время. Со када сыкавэл важ кодэла, ко тэлёл лэ Иеговасти, и важ кодэла, ко инке най?

¹⁷ Амэ жувас андэ послидни деса. О апостало Павло пистросардя: «Инке „совсем набут“, и „кодэва, ко жал, авэла и на заритярдёла“» (Евр. 10:37). Со во камля тэ ԥэнэн? Кай и мануша, савэ на тэлён лэ Иеговасти, ашэляпэ набут время, кай тэ залэн лэстири риг (1 Кр. 7:29). Ай важ кодэла, ко тэлёл лэ Дэвлэсти, кадэла алава сыкавэн, кай любо лэнго ԥаримос ӥто прожала.

18. Со аштярэл амэндар о Иисусо и о Иегова?

¹⁸ О Иисусо ақардя лэ манушэн тэ ашэн лэстирэ ученикоря и тэ лэн лэстар примеро (Матф. 16:24). Можэт, ту ужэ бут бэрша старыиспэ тэ уӷодис лэ Иеговасти. Када роздраго! На умэк и вас! О Иегова камэл, кай ту никала тэ на змардёс па дром, саво витидян. Да, во най само вушэро, но пэр лэстэ тут аштярэл бут лашымос и радость (Пс. 35:27).

19. Сости амэ сытювас анда кода, со сас кай о Джино?

¹⁹ Дэко гиндой, кай тэ тэлёс лэ Иеговасти — када вся и время тэ отԥэндёс кодэлэстар, со тути камэлпэ, и када на анэн радость. Если ту тэрно, тути можэт тэ здэлпэ, кай пока ту старыиспэ тэ уӷодис лэ Иеговасти, ту бут со хасарэс. О тэрноро ԥрал, савэс ақарэн Джино, ԥэнэн: «Манди здэласпэ, кай и жызня прожал мимо мандэ. Всаворэ мэрнэ ровэсникоря ԥирэнас пэ тусовки, пэ свидании и цэлэнаспэ андэ разни стрелялки. Ай мэ кати ԥиравас пэ собрания и росԥэнавас важ о Дэл». Сар кадэла гиндоря повлияли по Джино? Во ԥэнэн: «Мэ лэм тэ терав кода, со терэнас мэрнэ ровэсникоря, но гарававас када аврэндар. Спэрва манди сас интересно, но када ӥто прожыля. Па чачимастэ бахтало мэ кадя и на ашэлэм. Тоди мэ авря ригатар диқлэм по чачимос анда Библия и полэм: о Иегова камэл важ амэндэ ек о лашымос. Манди трэбуй сас просто тэ кандав лэс. Важ када мэ закамлэм тэ уӷодисарав лэсти всаворэ́ одеса. И кодэла времятар на сас инке ни ек молитва, пэ сави о Иегова манди бы не ответил».

20. Со ту камэс тэ терэс?

²⁰ О Давидо дилабэлас лэ Иеговасти: «Бахтало кодэва, кас ту витидян и пашардян каринг пэстэ, кай во тэ жувэл андэ тирэ грады» (Пс. 65:4). Давай тэ на парашас и май англэ тэ уӷодисарас лэ Иеговасти. Мэк андэ амаро ди всегда авэна и алава, савэ ԥэндясас о Иисусо Навино: «Мэ и мэрно ери ласа тэ полас лэ Иеговас» (Иис. Н. 24:15).