СТАТЬЯ ВАЖ И ИЗУЧЕНИЯ 46
О Иегова доԥэнэн, кай о раё пэ ԥув чаче авэла!
«Кажно, ко родэл пэсти блаӷословения пэ ԥув, лэстэ авэла блаӷословения лэ чачунэ Дэвлэстар» (ИС. 65:16).
ДИЛИ 3 Амари надежда, вера и зор
ПАЛА СО И СТАТЬЯa
1. Саво гиндо о пророко Исая камэлас тэ доандярэл лэ израильтянонэнди?
О ПРОРОКО Исая ԥэндя по Иегова, кай во «чачуно Дэл». О алав, саво пэрэандярдо «чачимос» (или «аминь»), сыкавэл «тэ авэл кадя» или «чаче» (Ис. 65:16). О алав «аминь», часто пистройпэ андэ Библия, кай тэ сыкавэл, кай о Иегова и о Иисусо чаче зритярэн пэстирэ алава. Саво гиндо камля тэ пэрэдэл о Исая лэ израильтянонэнди? По Иегова можно андэ вся тэ надеиспэ. Во вся и время исполний пэстирэ обещянии.
2. Васо амэ можэм тэ патяс кодэлэсти, пала со о Иегова дя алав, и савэ вопросоря амэ роздиқаса?
2 Васо амэ можэм тэ патяс кодэлэсти, пала со о Иегова дя алав? Варикай через 800 лет посли кода, сар о Исая пистросардя кадэла алава, о апостало Павло объяснисардя, васо амэ можэм тэ патяс андэ вся, со ԥэнэн о Дэл. Во пистросардя: «О Дэл нэ можэт тэ хохавэл» (Евр. 6:18). Точно кадя жэ сар анда источнико нэ можэт тэ жал о лашо и о лондо паи, кадя жэ о Иегова, савэстэ ек о чачимос, нэ можэт тэ хохавэл. Вижал, всаворэсти, со во ԥэнэн, можно тэ патяс. Андэ кадэя статья амэ роздиқаса кацавэ вопросоря: Со о Иегова ԥэнэн пала кода, со авэла англэ? Сар во доԥэнэн, кай зритярэла пэстирэ алава?
ПАЛА СО О ИЕГОВА ДЯ АЛАВ?
3. а) Саво пророчество фартэ любин всаворэ лэ Иеговастирэ служытеля? (Откровение 21:3, 4). б) Со дэко ԥэнэн, кала ашунэн кадэя обещяния?
3 Амэ подаса дума пала пророчество, саво куч важ кажно лэ Дэвлэско служытелё. (Проадинон Откровение 21:3, 4.) О Иегова ԥэнэн, кай авэла время, кала «и смэрть будэр на авэла, нисави бида, ни дук будэр на авэла». Амэ часто адиносарас кадэла алава андэ служэния, кай тэ сыкавас, сави авэла жызня андо раё. Сар и мануша андярэн пэс, кала ашунэн када? Дэсавэ андар лэндэ ԥэнэн: «Хэба кадя авэла?».
4. а) Пала со ӷанэнас о Иегова, кала ԥэндя, кай пэ ԥув авэла раё? б) О Иегова най кати дя алав, но со инке во стердя?
4 Канешно, о Иегова ӷанэнас, кай амэ ласа тэ адиносарас и алава анда Откровение лэ манушэнди андэ служэния. Во кадяжэ ӷанэнас, кай бутэнди авэла ԥарэс тэ патян кадэлэсти (Ис. 42:9; 60:2; 2 Кор. 4:3, 4). Сар жэ амэ можэм тэ доԥэнас аврэнди — и корко пэсти — кай вся авэла чаче кадя, сар запистромэ андэ Откровение 21:3, 4? О Иегова най кати дя алав, но и сыкадя васо можно лэсти тэ патяс. Сар во када стердя?
О ИЕГОВА ДОԤЭНЭН, ВАСО МОЖНО ТЭ ПАТЯС ЛЭСТИ
5. Савэ стихоря поможын амэнди тэ патяс андэ лэ Дэвлэстири обещяния?
5 Посли кода, сар о Иегова дя алав тэ стерэл пэ ԥув раё, во доԥэнэн, васо амэ можэм тэ патяс лэсти. Пала када запистромэ андэ Откровение 21:5, 6: «Кодэва, ко бэшэл по престоло, ԥэндя: „Акэ, мэ терав вся нэво“ — и инке ԥэндя: „Запистросар, важ кода кай кадэла алава чачунэ и найхохавнэ“. Потом во ԥэндя манди: „Вся ашэля кадя, сар сас ԥэндо! Мэ о А́льфа и о Аме́га, о пэрво и о послиднё“».
6. Сар и алава анда Откровение 21:5, 6 поможын амэнди май фартэ тэ патяс андэ лэ Дэвлэстири обещяния?
6 Кадэла библейски стихоря поможын май фартэ тэ патяс андэ лэ Дэвлэстири обещяния. Кадэла стихоря сыкавэн, кай о Иегова ԥэнэса подпистрой о лил, андэ саво дэл алав, кай лэ манушэндэ авэла лащи жызня англэ. Откровение 21:3, 4 — када лэ Иеговастири обещяния. Ай авэр дуй стихоря, — када, ԥэнаса, сар лэстири роспись. Када сыкавэл, кай лэстирэ алава чачунэ. Давайте май бут уӷанаса пала 5 и 6 стихо и шаса сама пэ дэсавэ важни маменторя.b
7. Саво интересно гиндо исин андэ пэрви алава андо 5 стихо?
7 О панчто стихо залэлпэ кацавэ алавэнца: «Кодэва, ко бэшэл по престоло, ԥэндя» (Отк. 21:5). Андэ книӷа Откровение пистромэ кати трин случаёря, кала о Иегова дэлас дума най через варикастэ, ай екжэно. Вижал, кадэла алава ԥэнэн най о анӷело и дажэ най о Иисусо, саво рисайля каринг и жызня, ай екжэно о Иегова. Када сыкавэл, кай кодэлэсти, со пистромэ май дур, исин инке май бут патяимос. Васо можно кадя тэ ԥэнэс? Важ кода кай о Иегова «нэ можэт тэ хохавэл» (Титу 1:2). Драго дицол, кай и пэрви алава анда 5 стихо поможын тэ патяс кодэлэсти, со пистромэ андэ Откровение 21:5, 6.
«МЭ ТЕРАВ ВСЯ НЭВО»
8. Сар о Иегова сыкавэл, кай авэла кадя, сар во ԥэндя? (Исая 46:10).
8 Акана май драго роздиқаса и алава «мэ терав вся нэво» (Отк. 21:5). Пэ ӷреческо шыб катэ исин о алав, саво можно тэ пэрэандярэс сар «дик» или «ашун». Кадэва алав андэ книӷа Откровение исин андэ бут стихоря. Андэ ек справочнико пистромэ, кай кадэва алав шол лэ манушэстири сама пэ кода, со пистромэ май дур. Ай пала со пистромэ май дур андо 5 стихо? О Дэл ԥэнэн: «Мэ терав», ай най: «Мэ лава тэ терав». О Иегова ԥэнэн пала кода, со парудёла англэ, кабута када ужэ терэлпэ щяс. Када сыкавэл, кай во точно ӷанэн, кай лэстирэ алава исполнинапэ. (Проадинон Исайя 46:10.)
9. а) Сар о Иегова стерэла вся нэво? б) Со авэла «лэ нэбоса» и «ла ԥувьяса», савэ исин акана?
9 Давайте шаса сама инке пэ ек маменто андэ алава «мэ терав вся нэво». Сар о Иегова стерэла вся нэво? Варисо во парувэла, ай варисо лашарэла. Со о Иегова парувэла? Андэ Откровение 21:1 амэ адиносарас, кай о нэбо и ԥув, савэ сас спэрва, будэр нинай. «О нэбо, саво сас» сыкавэл манушыканэ правительства, савэнца хулаий о Сатана и лэстирэ бэнга (Матф. 4:8, 9; 1 Иоан. 5:19). О алав «ԥув» андэ Библия можэт тэ сыкавэл лэ манушэн, савэ жувэн пэ ԥув (1 Лет. 16:31; Пс. 96:1). Амэ полас, кай «и ԥув, сави сас» — када вэрыти мануша, савэ жувэн адес. О Иегова на лэла просто тэ лашарэл «о нэбо» и «ԥув», савэ исин акана. Во совсем лэн улэла. Во парувэла лэн по «нэво нэбо» и пэ «нэви ԥув» — када нэво правительство и нэвэ мануша.
10. Со Иегова лашарэла?
10 Но о Иегова на лэла тэ парувэл вся. Дэсо во лашарэла, кай када тэ ашэл сар нэво (Отк. 21:5). О Иегова стерэла, кай и ԥув и мануша упалэ тэ авэн идиальни. Во улэла вся о найлашымос и виличия лэ манушэн. О Исая ԥэндя, кай амари ԥув ашэла, сар росшукарно парко, кацаво жэ, сар сас о Эдэмско садо. Кажно андар мэндэ лэла тэ полэл, сар во парудёл и лэл зор. Кодэла, ко ланган, на диқэн или на ашунэн авэна зоралэ. И дажэ кодэла, ко мулинэ, ринапэ каринг и жызня! (Ис. 25:8; 35:1—7).
«КАДЭЛА АЛАВА ЧАЧУНЭ». «ВСЯ АШЭЛЯ КАДЯ, САР САС ԤЭНДО!»
11. Со о Иегова ԥэндя тэ стерэл лэ Иоаности и васо?
11 Со инке ԥэндя о Иегова, кай амэ май фартэ тэ патяс лэсти? Во ԥэндя лэ Иоаности: «Запистросар, важ кода кай кадэла алава чачунэ и найхохавнэ» (Отк. 21:5). О Дэл най просто ԥэндя: «Запистросар». Во кадяжэ ԥэндя, васо када трэбуй: «Важ кода кай кадэла алава чачунэ и найхохавнэ». Амэ лошалэ, кай о Иоано кангля лэ Дэвлэс! Блаӷодаря кадэлэсти амэ ӷанас, кай о Иегова дя алав тэ стерэл о раё пэ ԥув. Ай кадяжэ можэм тэ гиндосарас пала лашымос, саво авэла англэ.
12. Васо о Иегова ԥэндя: «Вся ашэля кадя, сар сас ԥэндо!»?
12 Со инке о Дэл ԥэндя? «Вся ашэля кадя, сар сас ԥэндо!» (Отк. 21:6). О Иегова ԥэнэн пала раё кадя, кабута во ужэ исин. Лэ Дэвлэстэ исин право кадя тэ ԥэнэн. Важ кода кай нико и нисо нэ можэт тэ тердярэл лэс, кай во тэ стерэл кадя, сар загиндосардя. Давайте роздиқаса, сар о Иегова инке сыкавэл, васо амэ можэм лэсти тэ патяс.
«МЭ О АЛЬФА И О АМЕГА»
13. Васо о Иегова ԥэндя: «Мэ о Альфа и о Амега»?
13 Май упрэ амэ дям дума, кай андэ Откровение о Иегова тривар дэл дума екжэно, ай най через варикастэ (Отк. 1:8; 21:5, 6; 22:13). Андэ кажно кадэва случаё о Иегова ԥэнэн: «Мэ о Альфа и о Амега». О Альфа — када пэрво буква андо ӷреческо алфавито, ай о Амега — послиднё. Кала о Иегова ԥэнэн «о Альфа и о Амега», во сыкавэл, кай вся и время достерэл любо пэстири дила.
О Иегова вся и время достерэл любо пэстири дила (Диқэн и абзацоря 14, 17.)
14. а) Росԥэнэн, кала о Иегова кабута ԥэндя «Альфа» и кала во ԥэнэна «Амега»? б) Со доԥэнэн и алава анда Бытие 2:1—3?
14 Кала о Иегова создал лэ Адамос и ла Ева, во росԥэндя кода, со загиндосардя важ и мануша и важ и ԥув. Амэ адиносарас андэ Библия: «Тоди о Дэл блаӷословил лэн и ԥэндя лэнди: „Авэн тумэ ерялэ, мэк авэн тумэндэ бут бэяцэ па вся и ԥув, залэнпэ ла ԥувьяса“» (Быт. 1:28). Андэ кодэва маменто о Иегова кабута ԥэндя «Альфа». Во драго сыкадя, со камэл тэ стерэл, — кай лэ Адамостирэ и ла Еватирэ кандинэ бэяцэ тэ жувэн па вся и ԥув и тэ стерэн, кай пэр латэ тэ авэл раё. Кала када исполнияпэ о Иегова кабута ԥэнэна «Амега». О Иегова сыкадя, кай кадя и авэла, сразу посли кода, сар создал о нэбо и ԥув. Пала када запистромэ андэ Бытие 2:1—3 (проадинон). Котэ ԥэнэнпэ, кай о Иегова ԥэндя по седьмо дес, кай во авэла свынто. Кадэлэса о Дэл драго сыкадя, кай кала закончица о седьмо дес, во чаче стерэла вся, со загиндосардя.
15. Васо через о Сатана, возможно, здэласпэ, кай о Дэл нэ сможэт тэ стерэл кода, со загиндосардя?
15 О Адамо и Ева жылэ против о Дэл и ашэлэ ӷрешни. И через када всаворэ манушэнди пэрэдяпэ о бэзэх и смэрть (Рим. 5:12). Сыкавэл када, кай о Дэл на стерэла кода, со загиндосардя, кай пэ ԥув тэ жувэн и мануша, савэ кандэн лэс? Нэужэли через кода, кай о Сатана закамля тэ правий, о Дэл нэ сможэт тэ ԥэнэн «Амега»? Возможно, о Сатана гиндояс, кай лэ Дэвлэстэ нинай выходо анда кадэя ситуацыя. О Сатана моӷ тэ гиндой, кай лэ Дэвлэсти прижалапэ тэ умарэл лэ Адамос и ла Ева и вместо лэн тэ создаст аврэ манушэн. Но если о Иегова тэ стердоп кадя, тоди о Сатана ԥэндоп, кай во — хохавно. Васо? Важ кода кай андэ Бытие 1:28, о Дэл ԥэндя лэ Адамости и ла Евати, кай и мануша, савэ жана лэндар, ԥэрэна и ԥув.
16. Васо о Сатана моӷ тэ гиндой, кай лэстэ вижала тэ дошалярэл лэ Иеговас андэ кода, кай во нэ можэт тэ достерэл пэстири дила?
16 Со инке моӷ тэ гиндой о Сатана? Возможно, во гиндояс, кай дажэ если о Иегова домэкэла, кай лэ Адамостэ и ла Еватэ тэ авэн бэяцэ, вонэ всаек никала на авэна совершэни (Эккл. 7:20; Рим. 3:23). Тоди о Сатана ԥэндоп, кай о Иегова нэ можэт тэ достерэл пэстири дила. Васо? Если па вся и ԥув на авэла раё, кай жувэн совершэни мануша, савэ кандэн лэ Дэвлэс, тоди вижал, кай о Иегова на стердя кода, со загиндосардя.
17. Со стердя о Иегова, кала о Сатана жыля против лэстэ, и каринг со када анэна? (Диқэн кадяжэ и картинка.)
17 О Сатана дажэ на дополэлас, со стерэла о Иегова. Хоть о Сатана и пэрви мануша жылэ против о Дэл, во ӷанэнас, сар тэ розришый кадэя ситуацыя кадя, кай тэ зритярэл пэско алав (Пс. 92:5). Во домэкля, кай лэ Адамостэ и ла Еватэ тэ авэн бэяцэ. Важ када о Сатана нэ моӷ тэ дошалярэл лэ Иеговас, кай во хохавно. Кадяжэ во нэ моӷ тэ ԥэнэн, кай о Иегова на достерэл пэстири дила. Важ кода кай о Дэл позаботисайля, кай тэ авэл о «потомко», саво отдэла пэстири жызня и спасыя лэ кандинэ манушэн, савэ жылэ лэ Адамостар и ла Еватар (Быт. 3:15; 22:18). О Сатана дажэ нэ моӷ и тэ гиндой, кай о Иегова жала пэ кацави жэртва. Васо? Важ кода кай о Иегова када терэлас анда вся ди и нисо на родэлас важ пэстэ (Матф. 20:28; Иоан. 3:16). Ай лэ Сатанастэ нинай кацави любовь. Во гиндой кати пала пэстэ. Саво лашымос анэна о выкупо? Кала закончица и Тысячелетнё лэ Христостири правления, андо раё пэ ԥув лэна тэ жувэн совершэни и кандинэ мануша, савэ жылэ лэ Адамостар и ла Еватар. Вся авэла кадя, сар и загиндосардя о Дэл спэрва. Тоди о Иегова, кабута ԥэнэна, «Амега».
САР МАЙ ФАРТЭ ТЭ ПАТЯС АНДЭ ЛЭ ИЕГОВАСТИРИ ОБЕЩЯНИЯ?
18. Сар о Иегова доԥэндя, кай пэ ԥув чаче авэла раё? (Кадяжэ диқэн и рамка «Трин маменторя, васо амэ патяс, кай о Иегова зритярэла пэско алав».)
18 Андэ кадэя статья амэ роздиқлям, сар о Иегова доԥэндя, кай пэ ԥув чаче авэла раё. Пэрво, о Иегова екжэно ԥэнэн пала када. Андэ книӷа Откровение ԥэнэнпэ: «Кодэва, ко бэшэл по престоло, ԥэндя: „Акэ, мэ терав вся нэво“». Кай о Дэл исин мудрость, зор и во камэл тэ зритярэл пэско алав. Дуйто, о Иегова ԥэнэн пала кода, со авэла англэ кадя, кабута во ужэ када стердя. Акэ васо во ԥэндя: «Кадэла алава чачунэ и найхохавнэ» и «Вся ашэля кадя, сар сас ԥэндо!» Трито, если о Иегова лэлпэ тэ терэл варисави дила, во вся и время достерэл ла, важ када во ԥэнэн пэр пэстэ «о Альфа и о Амега». О Иегова доԥэнэна, кай о Сатана хохавно и кай во нэ можэт тэ тердярэл лэ Дэвлэс тэ зритярэл пэско алав.
19. Со тумэ можэте тэ стерэн, кала лэ манушэсти ԥарэс тэ патял, кай о Иегова стерэла раё пэ ԥув?
19 Сэрэн, тумэ лэна май фартэ тэ патян лэ Иеговасти, если лэна тэ росԥэнэн пала лэстирэ обещянии аврэ манушэнди. Но со если тумэ проадиносардэ лэ манушэсти Откровение 21:4, ай во ԥэндя: «Хэба кадя авэла»? Со тумэ можэте тэ стерэн? Например, тэ проадинон и тэ объяснин 5 и 6 стихо. Сыкавэн, кай о Иегова драго доԥэндя, кай зритярэла пэстирэ алава, посли лэндэ во кабута стодя пэстири роспись (Ис. 65:16).
ДИЛИ 147 О Дэл дя алав, кай авэла вечно жызня
a Андэ кадэя статья амэ роздиқаса, сар о Иегова доԥэндя, кай о раё пэ ԥув чаче авэла. Кажно разо, кала амэ росԥэнас пала када аврэнди, амэ лас инке май фартэ тэ патяс лэ Иеговасти.