Ту кадяжэ, сар о Пётро, сможэш тэ на здэспэ!

1. Со сас по ди кай о Пётро, кала во нэожыдано астардя бут мащё?

О ПЁТРО астарэлас о мащё вся и рят, но кадя нисо и на астардя. Тоди о Иисусо ԥэнэн: «Отплывисар интя, кай май ӷлыбко, и котэ зашон и сетки» (Луки 5:4). Лэ Петрости на патяласпэ, кай кадэлэстар авэла варисаво толко. И всаек во кангля и стердя кадя, сар лэсти ԥэндэ. И сетки ԥэрделэ мащеса и лэн сас кадя бут, кай вонэ на виритярэнас и шындёнас! О Пётро и авэр рыбакоря фартэ удивисайлэ, кала полинэ, кай пэ лэндирэ яқа тердяпэ чуда. О Пётро ԥэндя: «Ашав ман, Ӷосподо, важ кода кай мэ ӷрешно мануш!» (Луки 5:6—9). Возможно, во гиндояс, кай нэдостойно тэ авэл паша Иисусо.

2. Васо амэнди авелоп драго тэ подас дума пала лэ Петроско примеро?

² Кала о Пётро ԥэндя, кай во «ӷрешно мануш», — када сас чачимос. Анда Библия дицол, кай дэкала лэстэ дуқалас оди через кода, со во терэлас или ԥэнэнас. Ай тутэ сас по ди кадя жэ, сар кай о Пётро? Можэт ту ужэ най ек бэрш старыиспэ варисо тэ парувэс андэр пэстэ, но тутэ на вижал. Или тут цырдэл каринг варисаво найлашымос и тутэ нисар на вижал тэ улэс када. Если када кадя, тоди лэ Петроско примеро поможыя тути тэ полэс, кай на трэбуй тэ умэкэс и вас. Васо? Погиндосар: тэ камлоп о Иегова, амэ никала на уӷанглоп, андэр со о Пётро шылияспэ. Но во закамля, кай андэ Библия тэ авэл запистромэ пала када (2 Тим. 3:16, 17). Кала амэ уӷанаса, соса борияспэ о Пётро и состар во даралас, тоди амэ диқаса, кай во сас кацаво жэ мануш, сар и амэ. О Иегова на аштярэлас, кай во тэ авэл идиально. Во и амэндар када на аштярэл. Во камэл, кай амэ тэ на умэкас и вас и тэ на парашас тэ служысарас лэсти дажэ тоди, кала амэ шылисавас.

3. Васо важно тэ на здаспэ?

³ Васо амэнди нащи тэ здаспэ? Важ кода кай, кала амэ на парашас варисо тэ терас, амэндэ обычно када вижал май драго и май драго. Акэ ек примеро: кала о мануш камэл драго тэ дилабэл по баяно, во лэла тэ сытёл кадэлэсти най ек бэрш. Пала кадэла бэрша во бут разоря притасавэла най пэ кодэла кнопки, но если во на парашэла тэ сытёл тоди, сар прожала и время, лэстэ вижала драго тэ дилабэл. Но дажэ тоди, кала дилабэл, во дэзначай можэт дэкала тэ притасавэл най кодэя кнопка. Но во на здэлпэ и на парашэл тэ сытёл. Кадя жэ и андэ амари жызня. Можэт, амэ пристас зор, кай тэ парувас варисо андэр пэстэ, и кала здэлпэ, кай амэ ужэ победисардям, амэ всаек можэм тэ шылисавас. Но амэ на здаспэ и на умэкас и вас. Дэкала всаворэ амэ терас или ԥэнас варисо, через со потом дуқал оди. И всаек амэ анда вся оди камас тэ на парашас тэ служысарас лэ Иеговасти и патяс, кай во поможыя амэнди тэ ашас май лашэ (1 Пёт. 5:10). Лэ Петростири жызня — када райкано примеро важ амэндэ. Кала о Пётро терэлас ошыбки, о Иисусо сыкавэлас, кай полэл, со лэстэ по ди. Давайте уӷанаса пала када май бут, када поможыя амэнди верно тэ служысарас лэ Иеговасти.

ОШЫБКИ И БЛАӶОСЛОВЕНИИ, САВЭ САС КАЙ О ПЁТРО

4. Сар ԥэнэнпэ андэ Луки 5:5—10, сар о Пётро ԥэндя пэр пэстэ и сар о Иисусо лэс подритярдя?

⁴ Андэ Библия на ԥэнэнпэ, васо о Пётро ԥэндя пэр пэстэ «ӷрешно мануш» и пала саво ӷрехо во дэлас дума. (Проадинон Луки 5:5—10.) Возможно, андэ жызня во фартэ шылияспэ. О Иисусо шутя сама, кай о Пётро дарал. Возможно, во даралас, кай нэ сможэт тэ андярэл пэс кадя, сар аштярэл о Иисусо. Но о Иисусо диқэлас най кати лэ Петростири дар. Во диқэлас, кай кадэва мануш сможэт верно тэ служый лэ Дэвлэсти. Важ када во анда вся оди ԥэндя пэстирэ ученикости: «На дар». О Иисусо сыкадя, кай патял лэсти и када парудя лэ Петростири жызня. Ӷэт май интя во и лэско ԥрал о Андреё ашадэ пэстири дила, тэ астарэн о мащё, и линэ тэ поможын лэ Иисусости андэ лэстири служэния. Через када о Иегова лэн блаӷословил (Мар. 1:16—18).

5. Савэ блаӷословении получисардя о Пётро, кала жыля пала Иисусо, хоть и даралас?

⁵ Кала о Пётро служыяс вмести лэ Иисусоса, во диқля бут чуда. О Иисусо виличияс лэ насвалэн, видаравэлас лэ найвужэн и дажэ рияс лэ мулэн каринг и жызня (Матф. 8:14—17; Мар. 5:37, 41, 42)b. Кадяжэ о Пётро никала на бистрэлас ек удивительно события, сави во диқля пэстирэ яқэнца. Еқвар о Иисусо паруделя и сыкадя, саво во авэла, кала лэла тэ правий андо небесно Царство (Мар. 9:1—8; 2 Пёт. 1:16—18). Чаче, если о Пётро тэ на ашэлоп лэ Иисусоско ученико, во никала на диқлоп вся када. Дэкала лэстэ сас пэрэжывании, кай во нэ сможэт тэ служый лэ Дэвлэсти. Но во на домэкля, кай кадэла пэрэжывании тэ тердярэн лэс. Саво во сас дэ бахтало, кай на умэкля райканэ блаӷословении.

6. Сас вушэро лэ Петрости тэ парудёлпэ? Росԥэнэн.

⁶ Англа Пётро терэнаспэ бут чудеса. Но дэкала лэстэ всаек на вижалас тэ терэл кадя, сар во камэл. Акэ дэсавэ примероря: о Иисусо ԥэндя, кай лэсти прижалапэ тэ пэрэандярэл о ԥаримос и дажэ тэ хасарэл пэстири жызня, кай тэ исполний и библейски пророчестворя. Но о Пётро ԥэндя, кай о Иисусо нэ право (Мар. 8:31—33). О Пётро и авэр апосталоря бут разоря споринаспэ, ко андар лэндэ май ӷлавно (Мар. 9:33, 34). Андэ время, кала авелэ тэ залэн лэ Иисусос, о Пётро анда холи вихутилдя о мечо и отшындя лэ манушэсти о кан (Иоан. 18:10). Андэ кодэя жэ рят, лэс ля и дар и во тривар отԥэнделя лэ Иисусостар, хоть во сас лэско пашутно друӷо (Мар. 14:66—72). Потом о Пётро розровьяпэ (Матф. 26:75).

7. Сави возможность о Иисусо дя лэ Петрости посли кода, сар рисайля каринг и жызня?

⁷ О Иисусо на отԥэнделя, кай о Пётро тэ авэл лэско апостало. Во ӷанэнас, кай о Пётро кадяжэ лэс любий. И во дя лэсти возможность, кай во када тэ сыкавэл. Посли кода, сар о Иисусо рисайля каринг и жызня, во диқляпэ лэ Петроса и ԥэндя лэсти: «Пасысар мэрнэ бакрорэн». И кодэва анда вся оди ля кадя тэ терэл (Иоан. 21:15—17). Кала андэ Пятидесятница андо Иерусалимо пэ лэ Иисусостирэ ученикоря пэрво разо сжыля о свынто духо, о Пётро сас машкар лэндэ.

8. Сар о Пётро фартэ шылисайля андэ Антиохия?

⁸ О Дэл витидя лэ Пётрос, кай во тэ правий лэ Иисусоса по нэбо. Но через када о Пётро на ашэля сразу идиально. Андо 36 бэрш н. э. во диқля, сар о свынто духо сжыля по Корнилиё, саво сас най обшындо и найевреё. Через када драго дицэля, кай о Дэл всаворэнца обжалпэ еқэндар, и кай и мануша анда авэр народоря моӷут тэ ашэн христианоря (Дила 10:34, 44, 45). Посли када о Пётро моӷ спокойно тэ хал кацавэ манушэнца, хоть раньшэ во када на тердоп (Гал. 2:12). Но дэсавэ христианоря, савэ сас евреёря, гиндонас, кай лэнди нащи тэ хан лэ манушэнца анда авэр народоря. Кала кодэла, ко кадя гиндонас, авелэ андэ Антиохия, о Пётро ля тэ дурёл пэстирэ ԥралэндар, савэ на сас евреёря. Во андярдя пэс кадя, важ кода кай даралас тэ холярэл лэ христианонэн анда евреёря. О апостало Павло диқля кацави лицымерия и англа всаворэ стердя лэ Петрости выӷоворо (Гал. 2:13, 14). Но хоть о Пётро шылисайля, во всаек терэлас вся, кай верно тэ служый лэ Иеговасти. Со лэсти поможыяс?

СО ПОМОЖЫЯС ЛЭ ПЕТРОСТИ ТЭ НА ЗДЭЛПЭ?

9. Сар и алава анда Иоана 6:68, 69 сыкавэн, кай о Пётро на ашавэлас лэ Иисусос?

⁹ О Пётро на ашавэлас лэ Иисусос, во на домэкэлас, кай варисо лэс тэ тердярэл. Особено када дицэля, кала о Иисусо ԥэндя кода, со и ученикоря на полинэ. (Проадинон Иоанна 6:68, 69.) Бут андар лэндэ дажэ на линэ тэ розлэнпэ и ашадэ лэ Иисусос. Ай о Пётро най. Во драго полэлас, кай кати лэ Иисусостэ «и алава пала вечно жызня».

10. Андар со дицол, кай о Иисусо сас уверено андо Пётро? (Диқэн кадяжэ и статья.)

¹⁰ Хоть о Пётро часто шылияспэ, о Иисусо на одбанделя лэстар. Роздиқаса, со тердяпэ, кала пашолас лэ Иисусостири смэрть. Во ӷанэнас, кай о Пётро и авэр апосталоря ашавэна лэс. И всаек во ԥэндя, кай патял, кай о Пётро рияпэ и лэла верно тэ служый лэ Дэвлэсти (Луки 22:31, 32). О Иисусо полэлас, кай «оди цырдэлпэ, ай и тила слабо» (Мар. 14:38). Важ када о Иисусо на хасардя о патяимос андо Пётро дажэ тоди, кала во отԥэнделя лэстар. Кала о Иисусо рисайля каринг и жызня, во сыкаделя лэсти, наверно тоди, кала о Пётро сас екжэно (Мар. 16:7; Луки 24:34; 1 Кор. 15:5). Канешно, кадэлэса во фартэ подритярдя пэстирэ ученикос, савэстэ дуқалас оди через пэстири ошыбка.

11. Сар о Иисусо поможысардя лэ Петрости тэ полэл, кай о Иегова лэс на ашавэла?

¹¹ О Иисусо поможысардя лэ Петрости тэ полэл, кай о Иегова лэс на ашавэла. Посли кода, сар во рисайля каринг и жызня, во стердя кадя, кай о Пётро и авэр апосталоря тэ астарэн бут мащё (Иоан. 21:4—6). Када поможысардя лэ Петрости тэ полэл, кай важ о Иегова най ԥарэс тэ позаботийпэ пала кода, со трэбуй важ и жызня лэстирэ служытелёнэнди. Возможно, о апостало вспомнил лэ Иисусостирэ алава, кай о Иегова дэла вся, со трэбуй кодэлэнди, ко стол о Царство по пэрво ҭан андэ пэстири жызня (Матф. 6:33). Важ када о Пётро отдя пэстири жызня андэ служэния, ай най кай тэ астарэл о мащё. Во смило ԥэндя и речь андо дес, кала сас и Пятидесятница 33 бэрш н. э. Блаӷодаря кадэлэсти тысячи мануша прилинэ и лащи новость (Дила 2:14, 37—41). Тоди во поможысардя лэ самаритянонэнди и кодэлэнди, ко найевреё тэ ашэн лэ Христостирэ ученикоря (Дила 8:14—17; 10:44—48). Сар дицол, о Пётро сас лашо инструменто андэ лэ Иеговастирэ вас. Блаӷодаря лэсти разни мануша смоӷли тэ ашэн христианоря.

СОСТИ АМЭ СЫТЮВАС?

12. Сар лэ Петроско примеро можэт тэ подритярэл кодэлэн, ко борийпэ, кай тэ парудёл?

¹² О Иегова поможыя амэнди тэ на парашас тэ служысарас лэсти. Када можэт тэ авэл особено найвушэро, кала амэндэ варисо на вижал тэ парувас андэр пэстэ. Дэкала можэт тэ здэлпэ, кай амэнди пэ бутэстэ май ԥарэс, чем лэ апосталости Петрости. Но о Иегова дэла амэнди зор, кай амэ тэ на умэкас и вас (Пс. 94:17—19). Например, ек ԥрал англа кода, сар тэ ашэл лэ Иеговаско свидетелё, най ек бэрш жувэлас муршэнца. Во полностью паруделя и ашадя билажаварди жызня. Но дэкала лэстэ появинаспэ нэправильни жылании и лэсти прижаласпэ тэ борийпэ кадэлэса. Со поможыяс лэсти тэ на здэлпэ? Кадэва ԥрал росԥэнэн, кай би лэ Иеговастирэ зорэско лэстэ када на вижылоп: «Мэ полэм, кай лэстирэ зорэса мэ моӷу тэ жав па чачуно дром... ...О Иегова домэкля ман тэ ашав лэско служытелё и хоть мандэ исин дифекторя, во вся и время подритярэл ман».

13. Сости амэ можэм тэ сытювас кай о Пётро, сар ԥэнэнпэ андэ Дила 4:13, 29, 31? (Диқэн кадяжэ и статья.)

¹³ Сар амэ диқлям, через и дар англа мануша, о Пётро най еқвар фартэ шылияспэ. Но кала во мангэласпэ, лэстэ вижалас тэ андярэл пэс смило. (Проадинон Дила 4:13, 29, 31.) Амэ тожэ можэм тэ улас пэстар и дар. Акэ со тердяпэ еқэ тэрнэ ԥралэса, савэс ақарэн Хорсто. Во жувэлас андэ Германия, кала жалас и Дуйто мирово война. Через кода, кай пэр лэстэ тасавэнас андэ школа, во най еқвар ԥэнэнас «Хайль Гитлер!». Кала кацаво терэласпэ и родителя на цыпинас пэр лэстэ. Вонэ вмести лэса мангэнаспэ лэ Иеговасти, кай во тэ дэл лэсти смилость. О Хорсто надеияспэ по Иегова и лэсти поможынас и родителя. Блаӷодаря кадэлэсти во смоӷ тэ ашэлпэ верно лэ Дэвлэсти. Ай ӷэт май интя во ԥэндя: «О Иегова никала на ашавэлас ман»c.

14. Сар и барэдэр ԥрала, савэ амэн любин, поможын кодэлэнди, ко чуть на здяпэ?

¹⁴ О Иегова и о Иисусо никала амэн на ашавэна. Посли кода, сар о Пётро отԥэнделя пэстирэ Ӷосподиностар, лэсти трэбуй сас тэ витидэл: тэ здэлпэ или тэ ашэлпэ лэ Христоско ученико. О Иисусо анда вся оди мангэлас лэ Иеговас, кай о Пётро тэ на парашэл тэ патял. О Иисусо ԥэндя лэ Петрости, кай во мангэласпэ пала лэстэ. Во кадяжэ ԥэндя, кай о Пётро ӷэт май интя сможэт тэ подритярэл пэстирэ ԥралэн (Луки 22:31, 32). Наверно, кажно разо, кала лэ Петрости авэнас по гиндо кадэла лэ Иисусостирэ алава, во лэлас зор. Если андэ амари жызня авэла кацави ситуацыя, сар кай о Пётро, о Иегова сможэт тэ позаботийпэ пала амэндэ через и барэдэр ԥрала андэ собрания. Вонэ, сар заботливи пастухоря, поможына амэнди тэ ашаспэ верни лэ Дэвлэсти (Эф. 4:8, 11). О барэдэр ԥрал, савэс ақарэн Павло, ужэ бут бэрша служый лэ Иеговасти и старыийпэ тэ авэл имено кацаво жэ лашо пастухо. Кала во дэл дума кодэлэнца, ко умэкля и вас, во мангэл лэн тэ погиндон, сар о Иегова пашардя лэн каринг пэстэ. Ай тоди во ԥэнэн, кай о Иегова анда вся оди любий лэн и никала на ашавэла. О Павло ԥэнэн: «Мэ диқлэм, сар бут ԥрала и ԥэя, савэ чуть на здинэпэ, линэ зор блаӷодаря лэ Иеговасти».

15. Сар о апостало Пётро и о Хорсто Хеншелё пэстиря жызняса сыкадэ, кай андо Матфеё 6:33 пистромэ чачимос?

¹⁵ О Иегова позаботисайля пала Пётро и авэр апосталоря, кай лэндэ тэ авэн ловэ и вся, со трэбуй важ и жызня. Кадяжэ о Дэл позаботияпэ и пала кода, со трэбуй амэнди, если амэ стас и служэния по пэрво ҭан андэ жызня (Матф. 6:33). Рисаваса каринг о примеро, саво сыкадя о ԥрал Хорсто. Посли Дуйто мирово война во закамля тэ ашэл пианероса, но во сас фартэ чороро и гиндояс, кай нэ сможэт тэ проправарэл пэс, если лэла май бут тэ служый. Со во стердя? О Хорсто закамля тэ диқэл, лэла о Иегова тэ заботийпэ пала лэстэ чи най? Кала андэ лэстири собрания авеля раёно барэдэр ԥрал, во вся о курко проандярдя андэ служэния. Кала о курко почти прожыля, лэ Хорстос аштярэлас сюрпризо. О раёно барэдэр ԥрал дя лэсти конверто и на ԥэндя, кастар во. Андо конверто сас ловэ, пэ савэ о Хорсто моӷ тэ жувэл най ек шон и тэ служый пианероса. О Хорсто диқля пэ кадэва подарко, сар по атвето лэ Иеговастар, кай во лэла тэ заботийпэ пала лэстэ. Кодэла времятар во всегда столас лэ Царствостири дила по пэрво ҭан андэ пэстири жызня (Мал. 3:10).

16. Васо амэнди трэбуй май бут тэ уӷанас пала Пётро и пала лэстирэ письморя?

¹⁶ Варикала о Пётро мангля лэ Иисусос, кай во тэ ашавэл лэс. Саво во сас дэ бахтало, кай о Иисусо на стердя кадя, сар во мангля! О Христос на парашэлас тэ сытярэл лэ Петрос и во ашэля верно апостало и христианино, саво сыкавэл амэнди райкано примеро. Кода, сости о Иисусо сытярэлас лэ Петрос, поджал и каринг амэндэ. Дэсавэ анда кадэла советоря и бут со авэр можно тэ виарақас андэ дуй лэ Петростирэ письморя. Во пистросардя лэн важ и собрании андо пэрво вико, ай потом вонэ сас запистросардэ андэ Библия. Андэ авэр статья амэ роздиқаса дэсавэ советоря анда кадэла письморя и уӷанаса, сости амэ можэм тэ сытювас андар лэндэ.