СТАТЬЯ, КАЙ ТЭ СЫТЮВАС 49
Амэ фартэ патяс, кай кодэла, ко мулинэ, ринапэ каринг и жызня!
«Мэ патяв лэ Дэвлэсти... кай ринапэ каринг и жызня кодэла, ко муля» (ДЕЯНИЯ 24:15).
ДИЛИ 151 О Дэл ақарэла
ПАЛА СО УӶАНАСА АНДА СТАТЬЯ?a
1, 2. Со аштярэн лэ Иеговастирэ служытеля?
КАЖНО мануш камэл, кай андэ лэстири жызня тэ авэл вся драго. Варико камэл, кай лэстэ тэ авэл бахтало ери. Варико камэл, кай лэстирэ бэяцэ тэ авэн зоралэ. Ай варико камэл тэ виличийпэ лэ ԥарэ насвалимастар. Но важ амэндэ, сар важ лэ Дэвлэстирэ служытеля, исин варисо май важно. Амэ аштярас кодэя время, кала сможэм тэ жувас вечно и тэ диқас амарэ чачен, савэ мулинэ.
2 О апостоло Павло ԥэндя: «Мэ патяв лэ Дэвлэсти, сар и вонэ патян, кай ринапэ каринг и жызня кодэла, ко муля, праведни и нэправедни» (Деяния 24:15). И во сас най пэрво мануш, саво дэлас дума, кай и мануша, савэ мулинэ, ринапэ каринг и жызня. Пала када дэлас дума и о Иово. Во патялас, кай о Дэл на бистрэла пала лэстэ и рия лэс каринг и жызня (Иов 14:7—10, 12—15).
3. Сар амэнди поможын и алава анда 1 Коринфянам 15 ӷлава?
3 Если амэ патяс, кай и мануша ринапэ каринг и жызня, када ек анда кода ӷлавно андэр со амэ патяс, и када сар фундаменто важ амари вера андо Дэл (Евреям 6:1, 2). О Павло росԥэнэн пала када андэ 15 ӷлава андо Пэрво письмо лэ коринфянонэнди. Лэстирэ алава придинэ зор лэ христианонэнди, када придэла зор и амэнди. Кадяжэ лэстирэ алава поможын инке май фартэ тэ патяс, кай и мануша ринапэ каринг и жызня. И дажэ если амэ аштярас када ужэ на ек бэрш.
4. Васо амэ патяс, кай амарэ чаче, савэ мулинэ, упалэ лэна тэ жувэн?
4 Через кода, кай о Иисусо муля и рисайля каринг и жызня, амэ патяс, кай и амарэ чаче, савэ мулинэ, упалэ лэна тэ жувэн. Кай о Иисусо рисайля каринг и жызня, када сас ек анда кода, пала со о Павло росԥэнэнас лэ коринфянонэнди (1 Коринфянам 15:1, 2). Во пистросардя, кай если лэ Дэвлэско служытелё на патял, кай о Иисусо рисайля каринг и жызня, тоди лэстири вера андо Дэл, нисо на ашэл (1 Коринфянам 15:17). Важно тэ ӷанас и тэ патяс, кай о Иисусо рисайля каринг и жызня.
5, 6. Васо амэ трэбуй тэ ӷанас кадэла трин маменторя, савэ запистромэ андэ 1 Коринфянам 15:3, 4?
5 Кала о Павло росԥэнэнас, кай и мануша моӷут тэ ринпэ каринг и жызня, во призындярдя трин маменторя. Када, кай о Христос муля пала амарэ ӷрехоря, кай лэс притидэ, и, сар сас ԥэндо андэ пророчества, кай по трито дес во рисайля каринг и жызня. (Адиносар 1 Коринфянам 15:3, 4b.)
6 Состэ амэ трэбуй тэ ӷанас, кай о Иисусо муля, кай лэс притидэ и кай во рисайля каринг и жызня? О пророко Исаия ԥэндя, кай лэ Христос умарэна и притидэна андэ кацаво ҭан, андэ саво притидэн лэ приступниконэн. Кадяжэ о Исаия ԥэндя, кай о Христос трэбуй тэ отдэл пэстири жызня важ всаворэ мануша. Кадэва пророчество стердяпэ, кала о Иисусо отдя пэстири жызня, кай тэ витинэл лэ манушэн лэ бэзэхэстар (Исаия 53:8, 9, 12; Матфея 20:28; Римлянам 5:8). Кадэла трин маменторя, пала савэ ԥэндя о Павло, поможын тэ патяс, кай амэ можэм тэ авас би ӷрехостар, тэ на хасарас и жызня и тэ диқас амарэ чачен, савэ мулинэ.
КАЙ О ИИСУСО РИСАЙЛЯ КАРИНГ И ЖЫЗНЯ, ДИҚЛЭ БУТ МАНУША
7, 8. Со поможый лэ христианонэнди тэ патян, кай о Иисусо рисайля каринг и жызня?
7 Если амэ ӷанас, кай о Иисусо рисайля каринг и жызня, када поможыя амэнди тэ патяс, кай и мануша, савэ мулинэ, ринапэ каринг и жызня. Важ када амэнди трэбуй точно тэ ӷанас, кай о Иегова рисардя лэ Иисусос каринг и жызня. Со доԥэнэн када?
8 Кала о Иисусо рисайля каринг и жызня, лэс диқлэ бут мануша (1 Коринфянам 15:5—7). Пэрво, ко лэс додиқля, када о Кифа, пэ саво инке ԥэнэнас Пётро. Пала када ԥэндэ инке дэсавэ ученикоря (Луки 24:33, 34). Потом о Павло пистросардя, кай о Иисусо авеля каринг и 12 апостолоря. Потом лэ Иисусос диқлэ май бут чем 500 мануша, савэ сас лэстирэ ученикоря. Можэт о Павло камля тэ ԥэнэн пала кодэва маменто, кала вонэ диқлэпэ андэ Галилея, и пала када запистромэ андэ Матфея 28:16—20. Кадяжэ о Иисусо авеля каринг о Иаково, каринг пэско чачо ԥрал па дэй. Во на патялас, кай о Иисусо, када о Христос. Но кала о Иаково додиқля, кай о Иисусо рисайля каринг и жызня, во патяя андэр лэстэ (Иоанна 7:5). О Павло пистросардя пэско письмо варикай андо 55 бэрш лэ И. Х. Тоди бут мануша, савэ диқлэ лэ Иисусос, кала во рисайля каринг и жызня, сас инке жундэ. Важ када, если варико на допатялас, андэ кадэва чачимос, во моӷ тэ уӷанэн када лэ манушэндар, савэ диқлэсас, сар о Иисусо рисайля каринг и жызня.
9. Со инке доԥэнэн, кай о Иисусо рисайля каринг и жызня, сар запистромэ андэ Деяния 9:3—5?
9 Потом о Иисусо авеля и каринг о Павло, тоди пэр лэс ԥэнэнас Савло (1 Коринфянам 15:8). Кала о Павло жалас анда Дамаско, во ашундя лэ Иисусоско ӷолосо и додиқля лэс по нэбо. (Адиносар Деяния 9:3—5c.) Кадэва маменто, сыкавэл, кай о Иисусо па чачимастэ рисайля каринг и жызня (Деяния 26:12—15).
10. Со о Павло ля тэ терэл, кала патяя, кай о Иисусо рисайля каринг и жызня?
10 Кай о Павло росԥэнэн пала Иисусо, када фартэ важно. Важ кода кай во раньшэ ӷонияс лэ манушэн, савэ линэ тэ патян андо Иисусо. Ай кала о Павло патяя, кай о Иисусо рисайля каринг и жызня, во ля тэ росԥэнэн пала када аврэнди, кай и вонэ андэ када тэ патян. Лэ Павлос марэнас, бэшарэнас андо бар, и во най еқвар чуть на тасыля по кораблё (1 Коринфянам 15:9—11; 2 Коринфянам 11:23—27). О Павло кадя патялас, кай о Иисусо рисайля каринг и жызня, кай дажэ сас ӷотово тэ мэрэл важ кода, кай росԥэнэнас пала када аврэнди. Кода со ԥэнэнас лэ Дэвлэстирэ служытеля андо пэрво вико, поможый тэ патяс, кай о Дэл рисардя лэ Иисусос каринг и жызня. И хэба через када амэ на лас тэ патяс май фартэ, кай кодэла, ко мулинэ, моӷут тэ ринпэ каринг и жызня?
СО НАЙ КАДЯ ПОЛЭНАС И ХРИСТИАНОРЯ?
11. Васо дэсавэ христианоря нэ правильно полэнас о гиндо пала кода, сар и мануша ринапэ каринг и жызня?
11 Андо Коринфо дэсавэ христианоря нэ правильно полэнас о гиндо пала кода, сар и мануша, савэн нинай, ринапэ каринг и жызня. Варико андар лэндэ дажэ на патялас, кай кодэла, ко мулинэ, ринапэ каринг и жызня (1 Коринфянам 15:12). Васо? Дэсавэ христианоря линэ тэ патян кодэлэсти, со ԥэнэнас и учони андэ Афины. Кадэла учони на патянас и асанаспэ кодэлэстар, кай о Иисусо рисайля каринг и жызня (Деяния 17:18, 31, 32). Авэр христианоря гиндонас, кай о мануш кабута «най жундо», если во терэлас бэзэх. Ай кала о мануш ашэлас христианино, во кабута «жундёлас», важ кода кай лэско бэзэх простияспэ. Сар тэ на авэл, кода, андэр со патянас кодэла христианоря, сар ԥэндя о Павло, сас евья. Если о Дэл на рисардя лэ Иисусос каринг и жызня, вижал во и на витиндя амэн лэ бэзэхэстар, ай если на витиндя лэ бэзэхэстар, тоди амаро бэзэх на простийпэ. Важ када кацавэ манушэнди най пэр со сас тэ надеинпэ (1 Коринфянам 15:13—19; Евреям 9:12, 14).
12. Соса на шолпэ кода, сар о Иегова рисардя каринг и жызня лэ Иисусос и сар аврэ манушэн, сар ԥэнэнпэ андэ 1 Петра 3:18, 22?
12 О Павло пэстирэ яқэнца диқля, кай о Иисусо рисайля каринг и жызня. Дэлмут о Иегова ужэ рияс каринг и жызня кодэлэн, ко муля. Но всаек вонэ потом упалэ мэрэнас. Но о Иисусо рисайля каринг и жызня най сар всаворэ. О Павло ԥэндя: «О Христос рисайля пэрво каринг и жызня». Сар тэ полас, кай во пэрво? Во сас пэрво, ко рисайля каринг и жызня сар анӷело, и вазгляпэ по нэбо. (1 Коринфянам 15:20; Деяния 26:23; адиносар 1 Петра 3:18d, 22e).
МАНУША, САВЭН О ДЭЛ РИЯ КАРИНГ И ЖЫЗНЯ
13. Сар ԥэндя о Павло, сави исин разница машкар о Адамо и о Иисусо?
13 Сар и смэрть еқэ манушэсти, можэт тэ спасый и жызня милиононэ манушэнди? О Павло драго пала када росԥэндя и сыкадя, со андя лэ манушэнди лэ Адамостири смэрть, и со андя лэ Иисусостири смэрть. Кала о Павло дэлас дума пала Адамо, во ԥэндя, кай и «смэрть авеля через о мануш». И кода, кай о Адамо на кангля лэ Дэвлэс, када андя бида и лэсти и всаворэ манушэнди. Через кода, кай о Адамо на кангля лэ Дэвлэс, во андя бари бида амэнди. Но блаӷодаря кодэлэсти, кай о Иегова рисардя лэ Иисусос каринг и жызня, амэндэ исин пэр со тэ надеисавас. О Павло ԥэндя: «Кадя и мулэ ринапэ каринг и жызня через о мануш. Сар через о Адамо всаворэ мэрэн, кадя через о Христос всаворэ жундёна» (1 Коринфянам 15:21, 22).
14. Рия о Дэл лэ Адамос каринг и жызня? Росԥэнэн.
14 Со о Павло камля тэ сыкавэл, кадэлэ алавэнца: «Через о Адамо всаворэ мэрэн»? Во камля тэ ԥэнэн, кай лэ Адамостирэ потомконэнди пэрэжыля лэско бэзэх. Вонэ ашэлэ най совершэни (Римлянам 5:12). Ай о Иисусо витиндя анда бэзэх лэ манушэн, савэ сас най совершэни. Хоть о Адамо сас совершэно во всаек жыля против о Дэл. И важ када о Иегова лэ Адамос на рия каринг и жызня, сар всаворэ манушэн. Лэса авэла кода жэ, со и аврэ манушэнца, савэ жан против о Иисусо, и «лэн умарэна пэ вся и вечность» (Матфея 25:31—33, 46; Евреям 5:9).
О Иисусо сас пэрво анда кодэла, ко рисайля каринг и жызня по нэбо (Диқэн и абзацоря 15, 16.)g
15. Пала кастэ жал и дума андэ 1 Коринфянам 15:22?
15 О Павло ԥэндя, кай «через о Христос всаворэ жундёна» (1 Коринфянам 15:22). Кадэва письмо о Павло пистросардя лэ памазаниконэнди андо Коринфо, савэ посли смэрть, ринапэ каринг и жызня, кай тэ жувэн по нэбо. О Павло ԥэнэн, кай лэн витидэ лэ свынтонэ духоса, кай вонэ тэ авэн свынти, сар о Христос. Во кадяжэ дэл дума пала лэ «Христостирэ ученикоря, савэ мулинэ» (1 Коринфянам 1:2; 15:18; 2 Коринфянам 5:17). Андэ авэр письмо о Павло ԥэндя, кай «если амэ лэса мулям, сар во муля, тоди амэ аваса лэса кадя жэ, сар во рисайля каринг и жызня» (Римлянам 6:3—5). О Иисусо рисайля каринг и жызня сар анӷело и вазгляпэ по нэбо. Кадяжэ авэла и лэ памазаниконэнца.
16. Со о Павло камля тэ ԥэнэн лэ алавэнца, кай о Иисусо пэрво жала по нэбо?
16 Инке о Павло пистросардя, кай о Иисусо пэрво, ко муля и рисайля каринг и жызня по нэбо. Ай и мануша, савэ варикала ринаспэ каринг и жызня, например о Лазарё, ринаспэ каринг и жызня пэ ԥув. О Иисусо сас пэрво, кас о Иегова рисардя каринг и вечно жызня по нэбо, сар анӷелос. Можно тэ ԥэнас, кай во сас пэрво плодо, саво анэнас и израильтяноря андэ жэртва лэ Дэвлэсти. Кадэла алава на сыкавэнас, кай кати о Христос рияпэ каринг и жызня по нэбо. Кадяжэ трэбуй сас тэ ринпэ каринг и жызня и апостолоря и авэр памазаникоря, савэ тожэ трэбуй сас тэ жан по нэбо.
17. Кала и памазаникоря трэбуй сас тэ жан по нэбо?
17 Кала о Павло пистрояс пэско письмо лэ коринфянонэнди, во ԥэндя, кай и памазаникоря инке на ринаспэ каринг и жызня по нэбо. Во ԥэндя, кай када инке трэбуй тэ авэл англэ: «Но кажно [рияпэ каринг и жызня] андэ пэстири время. О Христос, када пэрво плодо, ай потом, кала во авэла [тэ правий сар Царё по нэбо], и кодэла, ко лэ Христостирэ» (1 Коринфянам 15:23; 1 Фессалоникийцам 4:15, 16). И алава «кала во авэла», сыкавэн и время, андэ сави амэ жувас. Важ када и апостолоря и авэр памазаникоря нэ моӷли тэ жан по нэбо и тэ авэн лэ Иисусоса пока во на ля тэ правий.
АМЭ НАЙ ЕВЬЯ ПАТЯС!
18. а) Васо можно тэ ԥэнас, кай ринапэ каринг и жызня най кати и памазаникоря, но и авэр мануша? б) Сар и алава, савэ запистромэ андэ 1 Коринфянам 15:24—26 поможын тэ полас, со авэла по нэбо?
18 Андэ Библия ԥэнэнпэ, кай о Павло и авэр памазаникоря, авэна кодэла, кас пэрвонэн «рина каринг и жызня» (Откровение 20:6). Но инке трэбуй сас и авэр мануша тэ ринпэ каринг и жызня, и пала када ԥэнэнас о Иов (Иов 14:15). И памазаникоря авэна лэ Христоса по нэбо, «кала во улэла всаворэ правительстворя, власти и зора», улэла дажэ лэ послиднёнэ вороӷос, «када и смэрть». Кодэла, ко ринапэ каринг и жызня, кай тэ жувэн по нэбо, будэр никала на мэрэна. Ай со авэла кодэлэнца, ко на парашэл тэ кандэл лэ Дэвлэс, и ко на жала по нэбо? (Адиносар 1 Коринфянам 15:24—26f.)
19. Пэр со надеинпэ и мануша, савэ авэна тэ жувэн пэ ԥув?
19 Лэ манушэнди, савэ надеинпэ тэ жувэн вечно пэ ԥув, придэн зор лэ Павлостирэ алава: «Мэ патяв лэ Дэвлэсти... кай ринапэ каринг и жызня кодэла, ко муля, праведни и нэправедни» (Деяния 24:15). Амэ полас, кай и нэправедни мануша нэ моӷут тэ жувэн по нэбо. Вижал, кода, со ԥэндя о Павло, поджал каринг кода, кай ринапэ каринг и жызня кодэла мануша, савэ авэна тэ жувэн пэ ԥув.
Амэ патяс, кай и мануша ринапэ каринг и жызня, и када поможый амэнди тэ аштярас о лашимос, саво авэла англэ (Диқэн о абзацо 20.)h
20. Сар кадэя статья поможысардя инке май фартэ тэ патяс андэ кода, кай о Дэл рия каринг и жызня кодэлэн, ко муля?
20 Амэ фартэ патяс, кай ринапэ каринг и жызня кодэла, ко мулинэ! Кодэла, кас о Дэл рия каринг и жызня, смоӷут тэ жувэн вечно пэ ԥув. И кадэлэсти можно тэ патяс. Блаӷодаря кодэлэсти, кай ӷанас, кай о Дэл рия каринг и жызня кодэлэн, ко муля, амэнди май вушэро тэ пэрэандярас кода, кала варико мэрэл анда амарэ чаче. О Дэл рия лэн каринг и жызня андэ кодэя время, кала о Иисусо и кодэла, ко авэла лэса, лэна тэ правин тысяча бэрш (Откровение 20:6). Ай кадяжэ амэ патяс, кай если амэнца варисо терэлапэ жы каринг кода, сар залэлапэ лэ Иисусостири Тысячелетнё правления, о Дэл всаек рия амэн каринг и жызня. Када дэл амэнди зор и поможый тэ лошавас андэ служэния лэ Иеговасти. Кода, андэр со амэ патяс, на авэла евья (Римлянам 5:5). Но андэ авэр статья амэ уӷанаса, кай андэ 1 Коринфянам 15 ӷлава исин и авэр важни гиндоря.
ДИЛИ 139 Представь ту пэс андо раё пэ ԥув
a Андэ 15 ӷлава андэ 1 Коринфянам ԥэнэнпэ пала кода, кай кодэла, ко мулинэ, ринапэ каринг и жызня. Васо амэ трэбуй када тэ ӷанас? И васо амэ можэм тэ патяс, кай о Иисусо рисайля каринг и жызня? Давайте подаса дума пала када.
b 1 Коринфянам 15:3, 4: «Само важно, со мэ тумэнди ԥэндэм и андэр со мэ патяем, када, кай о Христос муля важ амарэ ӷрехоря, сар ԥэнэнпэ андэ Писания. Лэс притидэ, и по трито дес во рисайля каринг и жызня, сар и сас пистромэ андэ Писания».
c Деяния 9:3—5: «Кала о Савло сас андэ дромэстэ и пашолас каринг о Дамаско, во додиқля свето па нэбо, саво фартэ светияс. Во пэля пэ ԥув и ашундя ӷолосо: „Савло, Савло, васо ту ман ӷонис?“. Во пушля: „Ко ту, Ӷосподо?“ Кодэва ԥэндя: „Мэ о Иисусо, савэс ту ӷонис“».
d 1 Петра 3:18: «Важ кода кай екжэно о Христос еқвар и навсегда муля пала ӷрехоря, праведно пала нэправедни, кай тэ анэн амэн кай о Дэл. Лэс умардэ, кала во сас мануш, ай каринг и жызня во рисайля, сар анӷело».
e 1 Петра 3:22: «Во вазгляпэ по нэбо и акана па право вас лэ Дэвлэстар, и лэс кандэн и анӷелоря и власти».
f 1 Коринфянам 15:24—26: «Тоди авэла конец, кала во улэла всаворэ правительстворя, власти и пэрэдэла о царство пэстирэ Дэвлэсти и Дадэсти. Во трэбуй тэ правий, пока о Дэл на стола лэсти тала пэрнэ лэстирэ вороӷонэн. Послиднё вороӷо, савэс улэла, када смэрть».
g ПЭ КАРТИНКА. О Иисусо сас пэрво, ко жыля по нэбо (Деяния 1:9). Потом рисайлэ каринг и жызня, кай тэ жан по нэбо и лэстирэ ученикоря, о Фома, о Иаково, и Лидия, о Иоанно, и Мария и о Павло.
h ПЭ КАРТИНКА. Кай о ԥрал андэ собрания муля и хулаи, савяса во бут бэрша служыяс лэ Иеговасти. И акана во на парашэл тэ служый лэ Иеговасти и патял, кай во рия каринг и жызня лэстиря хулая.