СТАТЬЯ, КАЙ ТЭ СЫТЮВАС 45
Сар амэнди поможый о свынто духо?
«Пэ вся мандэ исин зор, важ кода кай исин кодэва, ко лэс манди дэл» (ФИЛИППИЙЦАМ 4:13).
ДИЛИ 104 Святой дух — Божий дар
ПАЛА СО УӶАНАСА АНДА СТАТЬЯ?a
1, 2. а) Со поможый амэнди кажно дес тэ пэрэандярас о ԥаримос? б) Со амэ роздиқаса андэ кадэя статья?
«КОРКОНО мэ никала на пэрэандярдоп кадэва ԥаримос!» Ԥэнэнас тумэ кадя варикала чи най? Можэт тумэнди прижыляпэ тэ пэрэандярэн о ԥаримос через о насвалимос или кала муля варико пашутно. Посли вся када тумэ полэн, кай тэ пэрэандярэн када вижыля кати лэ Иеговаса, важ кода кай во дэлас через пэско свынто духо «зор, саво май баро обычнонэстар» (2 Коринфянам 4:7—9).
2 Ай инке, би свынтонэ духоско, амэнди авелоп ԥарэс тэ пэрэандярас кода, кай пар мэндэ тасавэл и люма, савяса правий о Сатана (1 Иоанна 5:19). Ай инке амэнди трэбуй тэ борисавас «против и бэнга, савэ по нэбо» (Эфесянам 6:12). Амэ полас када, и тоди шам сама пэ дуй маменторя, сар амэнди поможый о свынто духо. Посли када подаса дума, со трэбуй тэ терас, кай амэнди тэ поможый о свынто духо.
О СВЫНТО ДУХО ДЭЛ АМЭНДИ ЗОР
3. Росԥэнэн пала пэрво маменто, сар о Иегова поможый амэнди тэ пэрэандярас о ԥаримос?
3 О свынто духо лэ Иеговастар поможый амэнди кодэлэса, кай дэл амэнди зор тэ терас дила, сави амэндэ исин и тэ на диқас по ԥаримос. О апостоло Павло полэлас, кай лэстэ вижалас тэ служый лэ Иеговасти и тэ на диқэл по ԥаримос, важ кода кай надеияспэ по «лэ Христоско зор» (2 Коринфянам 12:9). Кала во сас андо дуйто мисианерско служэния па разни фороря, во най кати бут росԥэнэнас и лащи весть, ай инке терэлас бути, кай тэ прожувэл. Андо Коринфо во жувэлас кай о Акила и Прискилла, савэ сувэнас и катуны. Важ кода кай о Павло кадяжэ ӷанэнас кадэя бути, во терэлас лэнца и дила и отдэлас кадэлэсти дэсави время (Деяния 18:1—4). О свынто духо дэлас лэ Павлости зор, кай во моӷ тэ терэл бути и тэ служый лэ Иеговасти.
4. Со, сар пистромэ андэ 2 Коринфянам 12:7б—9, сас кай о Павло?
4 Адиносар 2 Коринфянам 12:7б—9b. Со о Павло камля кадэлэса тэ ԥэнэн, кала ԥэндя «колючка андэ мэрни тила»? Андо Заокско переводо о алав «колючка» пэрэандярдэ, сар алав «колючка, сави мучий». И колючка можэт тэ анэн бут ԥаримос. Када сыкавэл, кай о Павло камля тэ ԥэнэн, кай лэстэ исин варисаво баро ԥаримос. О Павло пэ кадэва ԥаримос ԥэндя «лэ Сатанаско анӷело», саво лэс марэлас. О Сатана и бэнга моӷли и тэ на авэн дошалэ андэ кадэва лэско ԥаримос. Но кала вонэ додиқлэ и «колючка», вонэ, файма, закамлэ, кай тэ тасавэн пэр латэ, кай во инке май фартэ тэ мучийпэ. Сар диқля пэ када о Павло?
5. Сар о Иегова ашундя лэ Павлостирэ молитвы?
5 Май англал о Павло камэлас, кай о Иегова тэ вилэл лэстар кадэя «колючка». Во ԥэндя: «Тривар мэ фартэ мангавас лэ Ӷосподос [лэ Иеговас], кай када тэ ужал мандар». Хоть о Павло и мангэласпэ, и колючка никаринг на тердяпэ. Сыкавэл када, кай о Иегова на ашундя лэ Павлостирэ молитвы? Най. Во ашундя лэн. Хоть о Иегова на уля о ԥаримос, но во дя лэ Павлости зор тэ пэрэандярэл лэс. О Иегова ԥэндя: «Мэрно зор ашэл совершэно андэ слабость» (2 Коринфянам 12:8, 9). Важ кода кай о Дэл поможысардя лэ Павлости, во на хасардя и радость и по ди ашэля спокойно (Филиппийцам 4:4—7).
6. а) Сар о Иегова можэт тэ сыкавэл, кай ашунэл амарэ молитвы? б) Савэ алава анда стихоря андо абзацо дэн тумэнди зор?
6 Сас тумэнца кацаво, со сас лэ Павлоса, кай тумэ мангэнас лэ Иеговас тэ улэл тумэндар варисаво ԥаримос? Если, дажэ ясвэнца мангэнаспэ, ай о ԥаримос на ужалас и ашэлас инке май ԥарэс, здэласпэ тумэнди, кай о Иегова пэр тумэндэ холяйля? Тоди погиндон, со сас лэ Павлоса. О Иегова ашундя лэстирэ молитвы, во ашунэла и тумарэ молитвы! Можэт о Иегова на улэла тумэндар о ԥаримос, но через о свынто духо дэла зор вся тэ пэрэандярэн (Псалом 61:3, 4). Можэт дажэ о ԥаримос тумэн змарэл па пэрнэ, но о Иегова на ашавэла тумэн андэ бида (2 Коринфянам 4:8, 9; Филиппийцам 4:13).
О СВЫНТО ДУХО ПОМОЖЫЙ АМЭНДИ ТЭ ЖАС АНГЛЭ
7, 8. а) Сар о свынто духо шолпэ пэ балвал? б) Со о апостоло Пётро пистрояс пала свынто духо?
7 Сар инке амэнди поможый о свынто духо? Дэкала хоть и моря найспокойно, и балвал андярэл интя, каринг трэбуй. Кадяжэ о свынто духо поможый амэнди тэ жас через о ԥаримос каринг о лашимос, пала саво о Дэл дэл алав, кай авэла раё пэ ԥув.
8 О апостоло Пётро сас рыбако и ӷанэнас, сар када тэ плавуий тала парусо. Можэт важ када, кала во пистрояс, со терэл о свынто духо, во сыстосардя када кодэлэса, кала о кораблё плавуий па моря. Во пистросардя: «О пророчество никала на сас лэ манушэндар, но пэ мануша сжалас о свынто духо и вонэ дэнас дума лэ Дэвлэстар». Ӷреческо алав, саво пэрэандярдэ катэ «сжалас», сыкавэл «андярэлас» (2 Петра 1:21).
9. Со камля тэ ԥэнэн о Пётро, кала ԥэндя о алав «сжалас»?
9 Со о Пётро камэлас тэ ԥэнэн, кала ԥэндя о алав «сжалас»? Кадэва жэ ӷреческо алав кати па аврятэ пистросардя о Лука андэ книӷа Деяния важ о кораблё, саво «андярэлас и балвал» (Деяния 27:15). Када сыкавэл, кала о Пётро ԥэндя пэ кодэла, ко пистросардя и Библия, кай пэр лэндэ сжалас о свынто духо. Сар ԥэндя ек учоно, саво полэл и Библия, о Пётро «фартэ драго сыстосардя када кодэлэса, сар о кораблё плавуий па моря». Аврэ алавэнца о Пётро ԥэндя, кай кадяжэ, сар и балвал андярэл о кораблё каринг лэсти трэбуй, кадяжэ и о свынто духо и пророкоря и кодэла, ко пистронас и Библия, терэнас и дила, сави лэнди сас трэбуй. Кодэва жэ учоно ԥэнэн: «И пророкоря, можно тэ ԥэнэс, ваздэнас и парусоря». О Иегова терэлас пэстири дила, во дэлас и балвал, када о свынто духо. Ай кодэла, ко пистронас и Библия, терэнас пэстири дила, вонэ терэнас кадя, сар камэлас о свынто духо.
ПЭРВО ШАГО. На парашэн тэ терэн лэ Иеговастири дила
ДУЙТО ШАГО. Со май бут терэн лэ Иеговастири дила (Диқэн о абзацо 11.)h
10, 11. а) Со трэбуй тэ стерас, кай о свынто духо тэ поможый амэнди? б) Росԥэнэн о примеро.
10 Канешно, прожыля кодэя время, кала о Иегова дэлас о свынто духо лэ манушэнди, кай тэ пистрон и Библия. Но во и акана ԥэнэн пэстирэ народости, со тэ терэн через о свынто духо. О Иегова, сар и варикала, терэл пэстири дила. Сар амэнди тэ поможый о свынто духо? Амэнди трэбуй тэ полас, ай амэ пэстиря ригатар терас варисо андэ кадэя дила. Со важ када трэбуй?
11 Роздиқам ек примеро. Кай и балвал тэ поможый лэ моряконэнди, лэнди трэбуй тэ ӷанэн дуй маменторя. Пэрво, трэбуй тэ вижан андэ моря кордэ, кай ԥурдэл и балвал. Если о кораблё тердёл паша бэрэӷо дур ла балвалятар, во на сжала па ҭан. Дуйто, трэбуй тэ розмэкэн и парусоря кадя фартэ, пэ скати када можно. Дажэ если пэ моря исин балвал, о кораблё плавуия англэ кати посли кода, сар и парусоря астарэна и балвал. Кадя и амэндэ вижала тэ служысарас лэ Иеговасти кати тоди, если амэнди поможыя о свынто духо. Кай тэ авэл амэндэ кадэя помощь, амэнди трэбуй акэ, со тэ стерас. Пэрво, амэнди трэбуй, можно тэ ԥэнэс, тэ авас андэ моря, кай ԥурдэл и балвал, када тэ терас и дила, пала сави диқэл лэ Дэвлэско духо. Дуйто, трэбуй па вся «тэ розмэкас пэстирэ парусоря», када тэ терас андэ служэния вся, со па амаро зор (Псалом 119:32). Тоди о свынто духо лэла тэ поможый амэнди тэ жас англэ через о ԥаримос и кода, кай ӷонин, и во поможыя амэнди тэ на змардювас па дром и тэ доплавуисарас жы каринг кодэя время, кала авэла о раё пэ ԥув.
12. Со амэ акана роздиқаса?
12 Амэ подям дума пала дуй маменторя, сар амэнди поможый о свынто духо. Во дэл амэнди зор, кай тэ на парашас тэ кандас андо ԥаримос. Кадяжэ во поможый амэнди тэ жас англэ и тэ на змардювас па дром, саво андярэл каринг и вечно жызня. Акана роздиқам штар советоря, через савэ амэнди анда вся поможыя о свынто духо.
СО ТЭ ТЕРАС, КАЙ АНДЭ ВСЯ ТЭ ПОМОЖЫЙ О СВЫНТО ДУХО?
13. а) Сости Библия можэт амэн тэ сытярэл, сар пистромэ андэ 2 Тимофею 3:16, 17? б) Со важ када амэнди трэбуй тэ терас?
13 Пэрво, тэ сытювас па Библия. (Адиносар 2 Тимофею 3:16, 17c.) О ӷреческо алав, саво пэрэандярдэ «лэ Дэвлэстар» сыкавэл, кай о Иегова через пэско свынто духо дэлас кодэлэнди, ко пистрояс и Библия, тэ запистрон лэстирэ гиндоря. Кала амэ адиносарас и Библия и гиндосарас пала кода, со адиносардям, амэ можэм тэ полас лэ Дэвлэстирэ гиндоря. Вонэ поможын амэнди тэ парувас амари жызня, кай тэ уӷодисарас лэ Иеговасти (Евреям 4:12). Но кай андэ вся амэнди тэ поможый о свынто духо, амэнди трэбуй тэ витидас время, кай тэ сытювас па Библия и драго тэ гиндосарас пала кода, со адиносардям. Тоди, лэ Дэвлэско алав лэла тэ поможый амэнди андэ вся, со амэ терас и со дас дума.
14. а) Васо амэ патяс, кай пэ собрании исин свынто духо? б) Со поможыя амэнди тэ жас англэ, сар о кораблё, савэстэ па вся розмэклэ и парусоря?
14 Дуйто, тэ тэлювас лэ Иеговасти трэбуй еқэҭанэ лэ ԥралэнца и лэ ԥэянца (Псалом 22:22). Пэ собрания амэ, можно тэ ԥэнэс, «астарас и балвал». Важ кода кай котэ лэ Иеговаско духо (Откровение 2:29). Катар амэ када ӷанас? Важ кода кай, кала тэлювас лэ Дэвлэсти еқэҭанэ лэ ԥралэнца и лэ ԥэянца, амэ мангас кай о Дэл свынто духо, дилабас диля важ о Дэл, савэ па Библия, и ашунас библейски речи, савэ росԥэнэн и ԥрала, савэн стодя о свынто духо. Кадяжэ о свынто духо поможый лэ ԥэянди тэ стерэн и задании и тэ выступают лэнца пэ собрания. Кай андэ вся амэнди тэ поможый о свынто духо, амэнди трэбуй тэ ӷотовимся каринг и собрании и тэ дас каминтарии. Тоди амэ жаса англэ, сар о кораблё, савэстэ па вся розмэклэ и парусоря.
15. Сар о свынто духо поможый амэнди андэ служэния и со амэ трэбуй тэ терас?
15 Трито, тэ росԥэнэн важ о Дэл. Кала андэ служэния амэ ԥэрнавас и Библия, о свынто духо поможый амэнди тэ росԥэнас важ о Дэл и тэ сытярас аврэн (Римлянам 15:18, 19). Кай андэ вся амэнди тэ поможый лэ Дэвлэско свынто духо, трэбуй тэ на парашас тэ ԥирас андэ служэния и вся и время тэ заадиносарас анда Библия. Ек, со фартэ драго поможый, кай тэ авэл служэния май лащи, када тэ дас дума па планоря каринг и думы анда тетрадка «Дром и служэния».
16. Сар тэ получисарас о свынто духо?
16 Штарто, тэ мангэнпэ каринг о Дэл (Матфея 7:7—11; Луки 11:13). Кай тэ поможый о свынто духо, амэнди трэбуй пала када тэ мангас лэ Иеговас. Никастэ и нисостэ нинай зор, кай тэ терэл кадя, кай амарэ молитвы тэ на дожан каринг о Иегова или кай во тэ на дэл амэнди о свынто духо. Кадэва зор нинай ни кай о баруно ни кай о Сатана (Иакова 1:17). Сар амэнди трэбуй тэ мангаспэ, кай о свынто духо тэ поможый амэнди андэ вся? Кай тэ виарақас атвето пэ кадэва вопросо, роздиқам и притча, сави запистромэ кати андэ Евангелия лэ Лукастарd.
НА ПАРАШЭН ТЭ МАНГЭНПЭ
17. Со амэ можэм тэ полас важ пэстэ анда лэ Иисусостири притча, сави запистромэ андэ Луки 11:5—9, 13?
17 Адиносар Луки 11:5—9e, 13f. Лэ Иисусости притча сыкавэл, сар амэ трэбуй тэ мангас о свынто духо. Андэр латэ пистромэ, через кода, кай о мануш на парашэлас тэ мангэл, во вимангля кода, со лэсти сас трэбуй. Хоть аврял сас бари рят, во на дарайля тэ мангэл пэстирэ друӷос, кай тэ поможый лэстиg. Сар о Иисусо сыстосардя кадэя притча ла молитваса? Во ԥэндя: «На парашэн тэ мангэн, и тумэнди дэна, на парашэн тэ родэн, и виарақэна, на парашэн тэ стучин и тумэнди ԥэрнавэна». Со амэ полям анда када? Кай о свынто духо амэнди тэ поможый, амэнди трэбуй тэ на парашас тэ мангас пала када.
18. Васо, сар пистромэ андэ лэ Иисусостири притча, амэ патяс, кай о Иегова дэла амэнди пэско свынто духо?
18 Лэ Иисусостири притча кадяжэ поможый тэ полас, васо о Иегова дэла амэнди о свынто духо. Мануш, пала саво росԥэнэнпэ андэ притча, камля тэ шол сама пэстирэ ӷостёс, саво авеля поздно. Во полэлас, кай лэ ӷостёс трэбуй тэ праварэл, ай о хамос лэстэ на сас, важ када жыля каринг о сосидо. Па лэ Иисусостирэ алава, о сосидо дя кодэлэ манушэсти марно, важ кода кай во на парашэлас тэ мангэл. Сости амэн камля тэ сытярэл о Иисусо? Если о найсовершэно мануш поможысардя лэ сосидости, саво на парашэлас тэ мангэл, тоди инке май фартэ амаро добро небесно Дад поможыя кодэлэнди, ко на парашэл тэ мангэл лэстар о свынто духо! Сар дицол андэ кадэя притча, амэ можэм тэ мангаспэ и тэ патяс, кай о Иегова ашунэл амарэ молитвы, кала амэ анда оди мангас о свынто духо (Псалом 10:17; 66:19).
19. Васо амэ патяс, кай на парашаса тэ кандас лэ Дэвлэс?
19 Амэ патяс, кай амэндэ вижала тэ виритярас о ԥаримос лэ Сатанастар. Васо? Важ кода кай о свынто духо поможый амэнди через и дуй маменторя. Пэрво, во дэл амэнди зор, кай амэ тэ виритярас о ԥаримос. Дуйто, о свынто духо поможый амэнди тэ служысарас лэ Иеговасти и тэ диқас о лашимос, кала авэла о раё пэ ԥув. Мэк кажнонэсти андэ вся поможый о свынто духо!
ДИЛИ 41 Услышь мою молитву
a Кадэя статья драго сыкавэла, сар лэ Дэвлэско свынто духо поможый амэнди тэ пэрэандярас о ԥаримос. Андэр латэ кадяжэ росԥэнэнпэ пала кода, со тэ терас, кай амэнди андэ вся тэ поможый о свынто духо.
b 2 Коринфянам 12:7б—9: «Важ када, кай мэ фартэ тэ на заваздав о шэро, о Дэл домэкля и колючка андэ мэрни тила, лэ Сатанаско анӷело, тэ марэл ман, кай мэ фартэ тэ на заваздав о шэро. Тривар мэ фартэ мангавас лэ Ӷосподос, кай када тэ ужал мандар. Но во ԥэндя манди: „Хутила тути мэрно лашимос, саво ту на затердян, важ кода кай мэрно зор ашэл совершэно андэ слабость“. И важ када мэ баря радостяса фэдэр лава тэ хвалисавав кодэлэса, кай мэ слабо, кай лэ Христоско зор, сар катуна, тэ авэл понад мандэ».
c 2 Тимофею 3:16, 17: «Всаворэ алава андэ Писания лэ Дэвлэстар и вонэ лашэ, кай тэ сытярэн, тэ сыкавэн, со най кадя, тэ парувэн и жызня, и тэ сытярэн, сар тэ ритярэн лэ Дэвлэско законо, кай лэ Дэвлэско мануш вся тэ полэл и андэ вся тэ ӷанэн тэ терэл лашимос».
d О Лука май бут анда всаворэ, ко пистросардя и Евангелия, поможый амэнди тэ полас, сар важно андэ лэ Иисусостири жызня сас и молитва (Луки 3:21; 5:16; 6:12; 9:18, 28, 29; 18:1; 22:41, 44).
e Луки 11:5—9: «Посли када во ԥэндя лэнди: „Представьте, кай тумэ авэн андэ епаш рят кай о друӷо и ԥэнэн: ,Дэ манди трин лепёшки, важ кода кай мандэ зажыля друӷо и манди най со лэсти тэ став тэ хал‘. Ай о друӷо на вижыля анда цэр и ԥэнэн: ,На стучисар манди и двэри ужэ ԥандадэ, мэрнэ бэятцэ и мэ ужэ совас. Мэ нэ моӷу тэ ущяв и тэ дав тути марно‘. Ԥэнав тумэнди, если во на ущела и нисо на дэла лэсти, важ кода кай во лэско друӷо, тоди во ущела и дэла вся, со лэсти трэбуй, важ кода кай во на парашэл тэ мангэл. Кадя и мэ ԥэнав тумэнди, на парашэн тэ мангэн, и тумэнди дэна, на парашэн тэ родэн, и виарақэна, на парашэн тэ стучин и тумэнди ԥэрнавэна».
f Луки 11:13: «Вижал, если тумэ ӷрешни, и ӷанэн, сар тэ терэн тумарэ бэятонэнди лашэ подаркоря, тоди пэ скати тумаро Дад, о Иегова, дэла тумэнди о свынто духо. Тумэнди трэбуй кати тэ мангэн лэс!».
g Диқэн и каминтарии каринг о алав «на парашэн» андо источнико важ и тетрадка «Дром и служэния» важ о июлё 2018 бэрш, страница 6.
h Пэ картинки. ПЭРВО ШАГО. Ԥрал и ԥэй зажан андо зало, кай тидэнпэ лэ Иеговастирэ свидетеля. Кала вонэ машкар авэр лэ Иеговастирэ служытеля, вонэ полэн, кай котэ о свынто духо. ДУЙТО ШАГО. Вонэ подӷотовились и дэн каминтарии. Кадэла дуй маменторя можно тэ прилэс и каринг авэр советоря, савэ исин андэ кадэя статья. Сытён па Библия, росԥэнэн важ о Дэл, и мангэнпэ лэ Иеговасти.