Ко када о Дэл?

1, 2. Пала со пушэн и мануша?

ЛЭ БЭЯТОНЭНДИ чалёл бут тэ пушэн. Ԥэнаса, тумэ лэнди пала варисо росԥэндэ, ай вонэ пушэн: «Васо?» Тумэ росԥэнэн лэнди, ай вонэ всаек пушэн: «Ай васо?»

² Ԥурэ амэ чи тэрнэ, амэндэ всаворэндэ исин, со тэ пушас. Амэ пушас: «Со тэ хас, со тэ пас, со тэ лас пэр пэстэ, со тэ тинас?» Кадяжэ амэ пушас пэстар кода, со кажно мануш трэбуй тэ ӷанэн: «Васо амэ жувас и со авэла англэ?» Ай кала амэ на уӷанас пала када тоди, сар прожал и время, амэ ужэ и тэ пушас нисо на камас.

3. Васо бут мануша гиндон, кай никала на уӷанэна кода, со трэбуй тэ уӷанэн?

³ Исин андэ Библия, пала со амэ камас тэ уӷанас? Дэсавэ мануша гиндон, кай када кадя, кати ла фартэ ԥарэс тэ полэн. Па лэндирятэ, тэ полэн, со пистромэ андэ Библия, вижал кати кай и рашая и кай кодэла, ко пэ када висытеля. Ай авэр лажан тэ пушэн, хоть и камэн тэ ӷанэн. Ай со ту гиндос?

4, 5. а) Пала со пушэс пэстар ту? б) Васо трэбуй тэ уӷанэс пала кода, со пушэс пэстар?

⁴ Дэко пушэл пэстар: «Сости мэ жував пэ люма? Со манца авэла, кала мэ мэрава? Ко када о Дэл?» Ашунгло учителё о Иисус Христос ԥэндя: «На парашэн тэ мангэн и тумэнди дэна, на парашэн тэ родэн и арақэна, на парашэн тэ марэн андэ вудара и тумэнди ԥэрнавэна» (Матфея 7:7). На умэк и вас, сар инке на уӷанглян кода, со камэс тэ уӷанэс. Домардю, кай тэ полэс, кай када чачимос!

⁵ Чаче, сар ту на парашэса тэ родэс, тоди ту виарақэса када андэ Библия (Притчи 2:1—5). Кодэлэстар, со ту уӷанэса анда Библия, тири жызня авэла май бахтали и ту полэса, кай англэ тутэ можэт тэ авэл ек о лашимос. Акана подаса дума, пала со бут мануша загиндонпэ?

О ДЭЛ ЛЮБИЙ АМЭН ЧИ ВО ЖЭСТОКО?

6. Васо дэсавэ гиндон, кай лэ Дэвлэсти най куч и мануша?

⁶ Бут ко гиндой, кай амэ лэ Дэвлэсти най куч. Тэ авелоп амэ лэсти куч, пэ люма авелоп вся па аврятэ. Амэ диқас, кай лэ манушэндэ нинай оди, терэнпэ кати биды и война. Кадяжэ ԥари жызня, насвалимос и смэрть. Дэсавэ нащи полэн и ԥэнэн: «Сар амэ куч лэ Дэвлэсти, васо тоди во вся када на улэл?»

7. а) Васо и мануша гиндон, кай о Дэл жэстоко? б) Васо патяса, кай о Дэл нисар найдошало, кала лэ манушэндэ терэнпэ биды?

⁷ И мануша гиндон, кай лэ Дэвлэстэ нинай оди. Вонэ ашунэн када лэ рашандар. И рашая ԥэнэн, кай кала терэнпэ варисавэ биды, кадя закамля о Дэл. Вижал, вонэ ԥэнэн, кай о Дэл дошало андэ кода, кай терэнпэ и биды. Ай андэ Библия запистромэ, кай о Дэл нисар найдошало, важ кода кай нико на стерэла кадя, кай о Дэл тэ терэл о найлашимос и о Дэл на терэл кадя, кай варико тэ стерэл о найлашимос (Иакова 1:13). Када сыкавэл, кай хоть о Дэл и домэкэл, кай пэ люма тэ авэл о найлашимос, во лэс никала на терэл. (Адиносар Иов 34:10—12.) Подам дума пала када май драго.

8, 9. Васо о Дэл на затердя, кай амэ тэ дошалярас лэс андо ԥаримос, саво амэндэ исин? Росԥэн.

⁸ Ԥэнаса, тэрно мануш жувэл пэстирэ дадэса и пэстиря даса. Важ пэско дад во фартэ куч и важ када во лэс сытярдя тэ витидэл, со лашо. Но о тэрно мануш витидэл тэ на кандэл пэстирэ дадэс и ужал цэрал. Во лэл тэ залэлпэ найлащя диласа и попэрэл андэ бида. Ԥэндоп ту, кай дошало о дад, кай на тердярдя лэ шавэс, кала кодэва ужалас цэрал? Най! (Луки 15:11—13). Кадя жэ и о Дэл на ля тэ тердярэл лэ манушэн, кала вонэ закамлэ лэс тэ на кандэн и линэ тэ терэн найлашимос. Важ када, кала тумэндэ терэлпэ варисаво ԥаримос, сэрэн, кай о Дэл най дошало. Во на затердя, кай амэ тэ дошалярас лэс.

⁹ Кай о Дэл исин, васо во домэкэл о найлашимос пэ ԥув. Андэ кадэя книжка, андэ 11 ӷлава, авэла май бут пистромэ пала када. Патян, кай амэ куч лэ Дэвлэсти и кай во най дошало, кай амэндэ исин ԥаримос. Па чачимастэ ек о Дэл улэла о ԥаримос (Исаия 33:2).

10. Васо амэ патяс, кай о Дэл улэла вся о найлашимос?

¹⁰ О Дэл свынто (Исаия 6:3). Во терэл кати о лашимос. Важ када амэ патяс лэсти. Ай и мануша дэкала терэн фартэ найдраго. Вонэ най кацавэ сар о Дэл. И саво бы лашо тэ на авэл о баро мануш андэ страна, во нисар на улиноп вся о вэрытимос, саво стердэ и мануша. Никастэ нинай кацаво зор, саво исин кай о Дэл. Кати во улэла вся о вэрытимос, саво стердэ и найлашэ мануша. О Дэл стерэла, кай о найлашимос будэр никала на авэла. (Адиносар Псалом 37:9—11.)

СО КАЙ О ДЭЛ АНДО ДИ, КАЛА ВО ДИҚЭЛ ПО ԤАРИМОС?

11. Со кай о Дэл терэлпэ андо ди, кала во диқэл амаро ԥаримос?

¹¹ Со кай о Дэл терэлпэ андо ди, кала во диқэл, со терэлпэ пэ люма? Со кай о Дэл терэлпэ андо ди, кала во диқэл, саво ԥаримос тутэ? Анда Библия амэ уӷанас, кай «О Иегова любий справедливость» (Псалом 37:28). О Дэл фартэ любий тэ терэл лашимос и во вэрыцый о найлашимос. Во на камэл, кай лэ манушэндэ тэ авэл ԥаримос. Андэ Библия пистромэ, кай лэ Дэвлэстэ «задуқая оди», кала во додиқля, кай пэ вся ԥув ашэля о найлашимос (Бытие 6:5, 6). И о Дэл на паруделя (Малахия 3:6). Андэ Библия пистромэ, кай о Дэл диқэл пала амэндэ и фэрий амэн. (Адиносар 1 Петра 5:7.)

12, 13. а) Васо амэ ӷанас тэ любисарас, и со амэндэ терэлпэ андо ди, кала аврэндэ ԥаримос и биды? б) Васо амэ патяс, кай о Дэл улэла вся о ԥаримос и кай лэ манушэнца обжанпэ найдраго?

¹² Инке андэ Библия пистромэ, кай о Дэл создал амэн, кай амэ тэ ӷанас тэ андярас пэс кадяжэ драго, сар и во (Бытие 1:26). Амэнди ԥарэс тэ диқас, сар кай и мануша, савэ ни андэр со найдошалэ терэнпэ и биды. Ай лэ Дэвлэсти инке май ԥарэс! Тоди, со терэлпэ лэстэ андо оди, кала во када диқэл?

¹³ Андэ Библия пистромэ, кай «о Дэл исин любовь» (1 Иоанна 4:8). Вся, со терэл о Дэл, во терэл, важ кода кай любий. Амэ ӷанас тэ любисарас, важ кода кай о Дэл любий. Погиндосар акэ пала со. Улиноп ту всаворэ биды и кай найдраго обжанпэ лэ манушэнца па вся люма, тэ авелоп тутэ пэ када зор? Улиноп! Важ кода кай тути куч и мануша. Ай о Дэл? О Дэл най кати любий лэ манушэн, ай инке лэстэ исин зор тэ улэл о ԥаримос и кай лэ манушэнца обжанпэ найдраго. Май англал андэ кадэя книжка пистромэ пала алав, саво дя о Дэл. Патя, во зритярэла лэс! Ай, кай тэ патяс, трэбуй май драго тэ уӷанэс лэ Дэвлэс.

О ДЭЛ КАМЭЛ, КАЙ АМЭ ТЭ УӶАНАС ЛЭС МАЙ ДРАГО

14. Сар ақарэн лэ Дэвлэс и васо трэбуй тэ ақарэс лэс па алавэстэ?

¹⁴ Кала ту камэс варикас май драго тэ уӷанэс, со ту терэс спэрва? Ту ԥэнэс пэско алав. Ай кай о Дэл исин алав? Андэ бут веры пэр лэстэ ԥэнэн «Дэл» чи «Ӷосподо». Ай када най алав. Када сыкавэл, соса во залэлпэ, ԥэнаса, сар «царё» чи «президенто». О Дэл ԥэндя, кай лэско алав, «Иегова». Андэ Библия лэ Дэвлэско алав пистромэ на ек тысяча разоря. Андэ Псалом 83:18 пистромэ: «Кай и мануша тэ ӷанэн, кай ту, каско алав Иегова, ту ек Всевышнё па вся ԥув». О Иегова камэл, кай амэ най кати тэ ӷанас лэско алав, ай и тэ ақарас лэс па алавэстэ. Во ԥэндя пэско алав, кай ту тэ ашэс лэско друӷо.

15. Со сыкавэл лэ Иеговаско алав?

¹⁵ Андо алав «Иегова» ужал бут со. Во сыкавэл, кай о Дэл зритярэла всаворэ пэстирэ алава, ай кадяжэ стерэла вся, со загиндосардя. Нико и нисо на змарэла лэс. Ек о Иегова ашэл, кай лэстэ тэ авэл кадэва алавa.

16, 17. Со сыкавэл, кала по Дэл ԥэнэн а) «Всемоӷущё»? б) «Царё ла времяко»? в) «Создателё»?

¹⁶ Андэ Откровение 15:3 пистромэ: «Всемоӷущё Дэл Иегова, фартэ шукарни и бари вся тири дила. Царё ла времяко, пэ тирэ дрома кати чачимос и лашимос». Со сыкавэл, кала по Дэл ԥэнэн «Всемоӷущё»? Кай пэ вся люма лэ Иеговастар нинай нико май зорало. Ай со сыкавэл, кай по Дэл ԥэнэн «Царё ла времяко»? Кай о Иегова сас вся и время. Андэ Псалом 90:2 пистромэ, кай о Дэл вся и время сас и авэла. Аврэ алавэнца, кай о Дэл вечно. Кадэлэ гиндостар жал мразо па тила!

¹⁷ Кати по Иегова ԥэнэса, кай во Создателё. Андэ Откровение 4:11 амэ адиносарас: «Иегова, амаро Дэл, ту ашэс, кай тэ прилэс лашо алав, патив и о зор, важ кода кай ту вся стердян и вся, со ту закамлян, исин и стердо». Лэ анӷелонэн, савэ по нэбо, лэ мащес, лэ птицэн, и черӷая, и витки, и цвиторя, вся када создал о Иегова.

ВИЖАЛА ТУТЭ ТЭ АВЭС ЛЭ ДЭВЛЭСКО ДРУӶО?

18. а) Васо дэсавэ мануша гиндон, кай лэ Дэвлэс нащи тэ полэс, сар друӷос? б) Со андэ Библия пистромэ пала дружба лэ Дэвлэса?

¹⁸ Дэсавэ, кала уӷанэн, саво лашо о Дэл, ԥэнэн: «О Дэл баро, зорало, и во кадя дур. Лэсти нинай нисави дила каринг амэндэ». Вонэ нащи полэн, сар када тэ дружыс лэ Дэвлэса. Ай о Дэл Иегова камэл, кай и мануша тэ полэн лэс, сар друӷос? Андэ Библия пистромэ, кай о Иегова «найдур кажнонэстар амэндар» (Деяния 17:27). О Дэл камэл, кай амэ тэ полас и тэ ладисарас лэса. Пэстиря ригатар, о Дэл дэл алав, кай во «пашола каринг тумэндэ» (Иакова 4:8).

19. а) Сар тэ ашэс лэ Дэвлэстирэ друӷоса? б) Со тути май фартэ чалёл андо Иегова?

¹⁹ Сар ту можэшь тэ ашэс лэ Дэвлэстирэ друӷоса? Трэбуй тэ на парашэс тэ уӷанэс пала лэстэ и пала Иисус Христос. О Иисусо ԥэндя: «Кай тэ авэл вечно жызня, трэбуй тэ уӷанэн тут, еқэ чачунэ Дэвлэс, и лэ Иисусос Христос, савэс ту бишалдян» (Иоанна 17:3). Амэ ӷанас, «о Дэл исин любовь» (1 Иоанна 4:16). Во андэ вся шукарнэс пэс андярэл. Анда Библия амэ уӷанас, кай о Иегова «жалуий анда вся оди и никала на ашавэл, кала ԥарэс. Во на грабийпэ тэ холявэл, терэл бут лашимос и чачимос» (Исход 34:6). Во «терэл лашимос и камэл тэ простий» (Псалом 86:5). О Дэл ӷанэн тэ аштярэл и на грабийпэ тэ холявэл. Кадяжэ о Дэл никала на ашавэл, важ кода кай любий (2 Петра 3:9; Откровение 15:4). Кала ту адинос и Библия, ту май бут уӷанэс, сар шукарнэс о Иегова пэс андярэл.

20—22. а) Амэ на диқас лэ Дэвлэс. Тоди сар лэса тэ дружысарас? б) Со тэ терэс, сар варико лэл тэ змарэл тут тэ на сытёс па Библия?

²⁰ Амэ на диқас лэ Дэвлэс. Тоди сар лэса тэ дружысарас? (Иоанна 1:18; 4:24; 1 Тимофею 1:17). Адиносар и Библия. Кадя ту май драго уӷанэса, саво во (Псалом 27:4; Римлянам 1:20). Со май фартэ ту лэса лэс тэ уӷанэс, со май фартэ лэса тэ любис. И кала прожала и время ту ашэса лэско друӷо.

²¹ Ту полэса, васо о Иегова, сар Дад (Матфея 6:9). Во най кати дя амэнди жызня, ай камэлас, кай вой тэ авэл бахтали. Хэба, кажно дад, савэсти куч лэстирэ бэятцэ, на камэл када важ лэндэ? (Псалом 36:9). Анда Библия ту сытёс, кай тэ авэс лэ Дэвлэстирэ друӷоса, тутэ вижала (Иакова 2:23). Кати погиндосар, о Иегова, саво стердя вся и люма, камэл, кай ту тэ авэс лэско друӷо!

²² Дэсавэ мануша лэна тэ змарэн тут, кай ту тэ на сытёс па Библия. Файма, вонэ даран, кай ту парувэса пэстири вера. На домэк, кай лэндэ када тэ вижал. Важ кода кай тоди ту хасарэса само лашэ друӷос, саво кати можэт тэ авэл.

23, 24. а) Васо на трэбуй тэ лажас тэ пушэс? б) Пала со амэ подаса дума, кала адиносараса авэр ӷлава?

²³ Кала о мануш сытёл па Библия, дэкала во варисо на дополэл. Кай май драго тэ полэс, дэ дума, кай тути тэ поможын и роспуш май драго. О Иисусо ԥэнэнас, кай трэбуй тэ на заваздас о шэро, кай тэ авас, сар бэятцэ (Матфея 18:2—4). Лэ бэятонэнди най лажаво тэ пушэн. О Дэл камэл, кай ту тэ домардёс, тэ уӷанэс, пала со пушэс. Важ када, присто о зор, кай тэ сытёс па Библия. Кадя ту полэса, кай кода, со пистромэ андэ Библия, чачимос. (Адиносар Деяния 17:11.)

²⁴ Ту май драго уӷанэса пала Иегова, кала сытёса па Библия. Андэ авэр ӷлава пистромэ, соса и Библия на шолпэ пэ авэр книжки.