Источникоря важ и тетрадка, кай тэ сытювас «Дром и служэния»
1—7 ИЮНЯ
СОМНАК АНДА БИБЛИЯ | БЫТИЕ 44, 45
«О Иосифо простий пэстирэ ԥралэн»
(Бытие 44:1, 2) Через дэсави время о Иосифо ԥэндя лэ манушэсти, саво диқэл пала лэско цэр: «Шу кадэлэ манушэнди андэ гонэ зэрно, скати вонэ смоӷут тэ ундярэн, и сто кажнонэстирэ ловэ андэ лэско гоно. 2 Ай андо гоно лэ цыкнэдэрэсти сто вмести лэ ловэнца андо зэрно мэрни рупуни чаша». И кодэва стердя кадя, сар ԥэндя лэсти о Иосифо.
w15 1/5 14—15
«Хэба мэ Дэл?»
Акана вонэ слинэ андэ лэстирэ вас. Во бишалдя пала ԥрала манушэн, вонэ лэн дорэслэ па дром и дошалярдэ андэ чори. Кала и чаша арақлэ андэ лэ Вениаминоско гоно, лэн всаворэн рисардэ палпалэ каринг о Иосифо. Акана о Иосифо моӷ тэ уӷанэн, савэ вонэ па чачимастэ. Важ всаворэ ԥрала ля тэ дэл дума о Иуда. Во ля тэ мангэл лэ Иосифос, кай во тэ простий лэн, и дажэ ԥэндя тэ ашавэл рабонэнца всаворэн 11 ԥралэн. Но о Иосифо ԥэндя, кай рабоса андо Египто ашэлапэ кати о Вениамино, ай авэр трэбуй тэ ужантар (Бытие 44:2—17).
Тоди о Иуда ля фартэ тэ зашолпэ пала пэско ԥрал. Во ԥэндя: «Во ашэляпэ екжэно анда лэстиря датирэ бэяцэ, и о дад лэс фартэ любий». Кадэла алава линэ лэ Иосифос лэ одестар, важ кода кай во сас барэдэр шаво кай и Рахиль, кай любимо лэ Иаковостири хулаи, сави муля, кала латэ арақаделя о Вениамино. О Иосифо, сар и лэско дад, сэрэлас пала Рахиль. Можэт, именно важ када вонэ цырдэнаспэ каринг о Вениамино (Бытие 35:18—20; 44:20).
О Иуда всаек на парашэлас тэ мангэл пала Вениамино, кай лэс тэ на ашавэн рабоса. Во дажэ мангля, кай во вместо лэстэ тэ ашэлпэ рабоса. И акэ во, ужэ чуть най ясвэнца ԥэндя: «Сар мэ рисавава кай о дад би лэ ԥралэско? Мэ нэ смоӷу тэ диқав пэ бида, сави авэла кай мэрно дад!» (Бытие 44:18—34). Дицол, кай о Иуда ашэля совсем аврэ манушэса. Во най кати каияспэ, но и жалуияс и ӷотово сас тэ отдэл пэс важ о ԥрал.
О Иосифо будэр нэ моӷ тэ зритярдёл. Во одмэкля всаворэ слуӷонэн и ӷромко розровдяпэ, кай лэс ашундэ дажэ андэ лэ фараоноско цэр. И катэ во лэнди ԥэндя: «Мэ тумаро ԥрал Иосифо». Во обля пэстирэ ԥралэн, и анда вся оди простисардя лэнди вся о найлашимос, саво вонэ лэсти стердэ (Бытие 45:1—15). О Иосифо андярдя пэс, сар о Иегова, саво простий анда вся оди (Псалом 86:5). Ай терас ли и амэ кадя жэ, сар о Иосифо?
(Бытие 44:33, 34) Важ када, мангав тут, дэ тирэ слуӷости тэ ашэл вместо цыкнэдэр ԥрал рабоса кай мэрно ӷосподино, ай во мэк рийпэ пэстирэ ԥралэнца. 34 Сар мэ рисавава кай о дад би лэ ԥралэско? Мэ нэ смоӷу тэ диқав пэ бида, сави авэла кай мэрно дад!»
(Бытие 45:4, 5) О Иосифо мангля лэ ԥралэн: «Поджан мандэ». И вонэ поджылэ лэстэ. Тоди во ԥэндя: «Мэ тумаро ԥрал о Иосифо, савэс тумэ битиндэ андо Египто. 5 Но акана нэ пэрэжывайте и на дошалярэн ек еқэс, кай битиндэ ман андо Египто, важ кода кай о Дэл бишалдя ман кардэ англа тумэндэ, кай тэ фэрий тумэнди и жызня.
Виарақас сомнак анда Библия
(Бытие 44:13) Тоди вонэ росшындэ пэр пэстэ и йда, стодэ о бутаро пэ ишакоря и рисайлэ андо форо.
it «Разрывание одежды», абз. 1, 2
Росшынэн и йда
Кала и иудеёря и авэр мануша па Востоко росшынэнас пэр пэстэ и йда, кадэлэса вонэ сыкавэнас, кай лэнди фартэ ԥарэс, особенно кала вонэ уӷанэнас, кай варико анда лэнго чачо муля. Часто и йда росшынэнас кати лэ кырлэстар жы кай о колин, ай най упрал жы тэлэ, кадя и йда можно сас инке тэ ԥиравэн.
Пэрво мануш, пала кастэ ԥэнэнпэ андэ Библия, кай во росшындя пэр пэстэ и йда, када сас о Рувимо, барэдэр лэ Иаковоско шаво. Кала во рисайля каринг и яма, андэ сави шутэ лэ Иосифос, ай лэс котэ на сас, о Рувимо росшындя пэр пэстэ и йда и ԥэндя: «Лэ шаворэс нинай! Со манди акана тэ терав?» Сар барэдэр шаво, о Рувимо диқэлас пала цэкнэдэр ԥрал. Кала лэ Иаковости ԥэндэ, кай бистэ лэско шаво муля, во тожэ росшындя пэр пэстэ и йда и шутя пэр пэстэ котора па гонэ. Када сыкавэлас, кай лэстэ тердяпэ бида (Бытие 37:29, 30, 34). Андо Египто, кала по Вениамино ԥэндэ, кай во чордэӷари, лэстирэ ԥрала росшындэ пэр пэстэ и йда (Бытие 44:13).
(Бытие 45:5—8) Но акана нэ пэрэжывайте и на дошалярэн ек еқэс, кай битиндэ ман андо Египто, важ кода кай о Дэл бишалдя ман кардэ англа тумэндэ, кай тэ фэрий тумэнди и жызня. 6 Акэ ужэ дуйто бэрш андэ кадэла ҭана жал о боқалимос, и инке панч бэрш на лэна ни тэ ӷанавэн и ԥув, ни тэ стидэн о уражаё. 7 О Дэл бишалдя ман кардэ англа тумэндэ, кай тэ фэрий тумарэ еря андэ кадэла ҭана, тэ спасый тумэнди и жызня и тэ сыкавэл пэско баро зор. 8 Вижал най тумэ бишалдэ ман кардэ, ай о чачуно Дэл. Во стердя када, кай мэ тэ авав ӷлавно советнико важ о фараоно, ӷосподино пэ вся лэско цэр и правителё па вся Египто.
w04 15/8 15, абз. 15
Лэн вэрыцысардэ ни васо
15 Со дэла амэнди помощь тэ на холявас пэ кодэла, ко нэнавидит амэн ни васо? На бистэр, кай амарэ вороӷоря, када о Сатана и бэнга (Эфесянам 6:12). Дэсавэ мануша ӷонин амэн спецыально. Но бут анда кодэла, ко жан против лэ Дэвлэско народо, терэн кадя, кай на полэн, против кастэ вонэ жан, или пэр лэндэ тасавэн авэр (Даниил 6:4—16; 1 Тимофею 1:12, 13). О Иегова камэл «кай и разни мануша тэ спасынпэ и драго тэ полэн о чачимос» (1 Тимофею 2:4). И дэсавэн анда кодэла, ко амэн ӷонинас, ля лэ одестар кода, сар амэ драго пэс андярас, и акана вонэ вмести амэнца тэлён лэ Иеговасти (1 Петра 2:12). Инке амэ можэм тэ сытювас кай лэ Иаковоско шаво, кай о Иосифо. Кай о Иосифо сас бут ԥаримос через лэстирэ ԥрала, но во на ритярэлас пэр лэндэ холи. Васо? Во додиқля андэ вся када лэ Иеговаско вас и поля, кай о Дэл пала вся диқэл, кай тэ авэл кода, со во загиндосардя (Бытие 45:4—8). О Иегова можэт тэ стерэл кадя, кай и андэ амаро ԥаримос, саво амэ на затердям, лэско алав тэ авэл ашунгло (1 Петра 4:16).
8—14 ИЮНЯ
СОМНАК АНДА БИБЛИЯ | БЫТИЕ 46, 47
«Помощь, кала боқалимос»
(Бытие 47:13) Пэ всавори кодэя ԥув на сас марно, важ кода кай о боқалимос сас фартэ баро. Андо Египто и андо Ханаано сас баро ԥаримос лэ боқалимастар.
w87 1/10 15, абз. 2
Спасын и жызня, кала боқалимос
2 Прожылэ 7 бэрша, андэ савэ сас баро уражаё, и авеля о боқалимос, пала саво ԥэндясас о Иегова. Када сас най кати андо Египто, но и па вся и ԥув. Кала и мануша андо Египто линэ тэ мангэн кай о фараоно марно, во ԥэндя: «Жан каринг о Иосифо и терэн вся, со во тумэнди ԥэнэна». О Иосифо битинэнас лэ египтянонэнди о зэрно, пока лэндэ нэ закончились и ловэ. Тоди вместо ловэ вонэ дэнас лэсти лэ жывотнонэн. Ай потом о народо авэлас кай о Иосифо и ԥэнэнас: «Тин амэн и амари ԥув важ о марно, и амэ ку амари ԥув ашаса раборя кай о фараоно». И о Иосифо тиндя важ о фараоно вся и ԥув кай и египтяноря (Бытие 41:53—57; 47:13—20).
(Бытие 47:16) Тоди о Иосифо ԥэндя: «Если ловэ будэр нинай, анэн лэ скотос, и тумэ отдэна манди лэ скотос, ай мэ дава тумэнди марно».
(Бытие 47:19, 20) Состэ амэ тэ мэрас англа тутэ, амэ и амари ԥув? Тин амэн и амари ԥув важ о марно, и амэ ку амари ԥув ашаса раборя кай о фараоно. И дэ амэнди семена, кай амэ тэ ашаспэ жундэ и тэ на мэрас, кай амари ԥув тэ на ашэлпэ шущи». 20 Тоди о Иосифо стиндя кай и египтяноря вся и ԥув важ о фараоно, важ кода кай через о баро боқалимос всаворэ египтяноря битиндэ пэстири ԥув. Кадя вся и ԥув ашэля лэ фараоностири.
(Бытие 47:23—25) Тоди о Иосифо ԥэндя лэ народости: «Акана мэ тиндэм тумэн и тумари ԥув важ о фараоно. Акэ тумэнди зэрно, кай тэ засеин и ԥув. 24 Кала и ԥув дэла уражаё, панчто часть тумэ отдэна лэ фараоности, ай и штар части ашэнапэ по зэрно важ и маля и по хамос тумэнди, кодэлэнди, ко андэ тумаро цэр, и тумарэ бэятонэнди». 25 Вонэ ԥэндэ: «Амаро ӷосподино, ту спасысардян амэн. Шу сама пар мэндэ и жалуисар, и амэ ашаса лэ фараоностирэ рабонэнца».
kr 234—235, абз. 11, 12
О Царство пэ ԥув терэл кода, со камэл о Дэл
11 Бут хамос. И мануша боқалэ кодэлэстар, кай на полэн лэ Дэвлэс. Андэ Библия ԥэнэнаспэ: «О Владыка Ӷосподо Иегова ԥэнэн: „Поджал и время, кала мэ бишалава пэ ԥув боқалимос. Най кацаво боқалимос, кала нинай марно и паи, но кацаво, кала на ашундёл, со ԥэнэн о Иегова» (Амос 8:11). Ай боқалэ кодэла, ко тэлён лэ Иеговасти? О Иегова ԥэндя, кай авэла фартэ бари разница машкар лэско народо и лэстирэ враӷоря: «Мэрнэ служытеля лэна тэ хан, ай тумэ авэна боқалэ. Мэрнэ служытеля лэна тэ пэн, ай тумэндэ на авэла нисо тэ пэн. Мэрнэ служытеля лэна тэ радосавэн, ай тумэнди авэла лажаво» (Исаия 65:13). Ай ту диқэс, сар исполняеца кадэва пророчество?
12 Вся, со о Иегова дэл, кай амари вера тэ авэл састи, ашэл инке май бут, сар ашэл май бут о паи андэ лэн. Через амарэ публикацыи, аудио и видео, собрании, канӷрэсоря и амаро сайто, амэндэ исин вся, кай лэ Иеговаса тэ авэл лащи дружба. Ай и мануша андэ люма залин лэ боқалимастар, кай на ӷанэн лэ чачунэ Дэвлэс (Иезекииль 47:1—12; Иоиль 3:18). Хэба тумэ на радуинпэ, кала кажно дес диқэн, сар о Иегова зритярэл пэско алав? На промэкэс ли ту тэ хас па лэ Иеговаско скамин?
Виарақас сомнак анда Библия
(Бытие 46:4) Мэ екжэно жава туса андо Египто и екжэно виандярава тут котар, и о Иосифо пэстирэ вастэса ԥандавэла тирэ яқа».
it «Жесты и позы», абз. 51
Жэсторя и позы
Тэ ԥандавэл и яқа кодэлэстирэ, ко муля. И алава, савэ о Иегова ԥэндя лэ Иаковости: «О Иосифо пэстирэ вастэса ԥандавэла тирэ яқа» (Бытие 46:4), сыкавэнас, кай о Иосифо ԥандавэла и яқа лэ Иаковости, кала во мэрэла. Обычно када терэлас о барэдэр шаво. Кадя о Иегова, наверно, сыкадя лэ Иаковости, кай о право лэ барэдэрэ шавэско пэрэжала лэ Иосифости (1 Летопись 5:2).
(Бытие 46:26, 27) Всаворэ лэ Иаковостирэ потомкоря авелэ лэса андо Египто, лэн сас 66 мануша, если тэ на адиносарас лэ шавэндирэ хулаян. 27 Кай о Иосифо слинэ 2 шавэ, савэ лэстэ арақаделэ андо Египто. Вся лэ Иаковоско цэр, саво авеля андо Египто, слинэ 70 манушэн.
nwtsty каминтариё каринг Деяния 7:14
семьдесят пять манушэн. Амэ точно на ӷанас, ԥэндя ли о Стефано кадэла алава па варисаво стихо анда Еврейски Писания, кала ԥэндя андэ дума, кай андо Египто авелэ 75 манушэн анда лэ Иаковоско ери. Андо масорецко тексто андэ Еврейски Писания нинай кадэя цыфра. Андэ Бытие 46:26 ԥэнэнпэ: «Всаворэ лэ Иаковостирэ потомкоря авелэ лэса андо Египто, лэн сас 66 мануша, если тэ на адиносарас лэ шавэндирэ хулаян». Ай андо 27 стихо ԥэнэнпэ: «Вся лэ Иаковоско цэр, саво авеля андо Египто, слинэ 70 манушэн». Андэ кадэла стихоря и цыфра отличаеца важ кода, кай по разному виадиносардэ. Андо 26 стихо ԥэнэнпэ кати пала лэ Иаковостирэ потомкоря, ай андо 27 ԥэнэнпэ пала всаворэ, ко авелэ андо Египто. Скати потомкоря сас кай о Иаково кадяжэ ԥэнэнпэ андэ Исход 1:5 и Второзаконие 10:22, и андэ лэдуй кадэла стихоря ԥэнэнпэ, кай лэ манушэн сас 70. Но о Стефано ԥэнэн пала трито цыфра 75, и можэт, када слинэ авэр мануша, савэ ужан андэ лэ Иаковоско ери. Дэсавэ библеисторя ԥэнэн, кай када слинэ лэ Манассиястирэ и лэ Ефремостирэ шавэ и внукоря, пала савэ ԥэнэнпэ андэ Бытие 46:20 андэ ӷреческо Септуагинта. Но авэр гиндон, кай када лэ Иаковостирэ боря, савэ на ужан андэ цыфра анда Бытие 46:26. Анда када дицол, кай 75 када моӷут тэ авэн всаворэ мануша, скати авелэ лэ Иаковоса андо Египто. Исин и авэр гиндо. О Стефано моӷ када тэ уӷанэн анда копии па Еврейски Писании, савэ адинонас андо пэрво вико лэ И. Х. Амэ ӷанас, кай и цыфра 75 тердёл андэ ӷреческо Септуагинта (андэ Бытие 46:27 и Исход 1:5). Ай инке, андо 20 вико арақлэ дуй котора анда свиткоря анда Мёртво моря (пэ еврейско шыб). Андэр лэндэ, андо Исход 1:5 тожэ ԥэнэнпэ, кай лэ манушэн сас 75. О Стефано моӷ тэ ԥэнэн кодэла алава па кадэла свиткоря. Саво бы гиндо тэ на авэл точно, дицол акэ со, кай и цыфра, пала сави ԥэндя о Стефано, сыкавэл, кай лэ Иаковостирэ потомконэн по разному виадиносардэ.
15—21 ИЮНЯ
СОМНАК АНДА БИБЛИЯ | БЫТИЕ 48—50
«И ԥурэ, када блаӷословения важ и тэрнэ мануша»
(Бытие 48:21, 22) Тоди о Израилё ԥэндя лэ Иосифости: «Мэ мэрав. Но о Дэл авэла тумэнца и рия тумэн пэ ԥув, сави сас кай тумарэ ԥурэ. 22 Мэ дав тути по ек участко ԥув май бут, чем тирэ ԥралэнди. Кадэя ԥув мэ залэм мечоса и лукоса кай и амореёря».
it «Иаков», абз. 36
Иаково
Инке жы кай пэстири смэрть о Иаково блаӷословил пэстирэ внуконэн, лэ Иосифостирэ шавэн, кадя сар камля о Иегова, кай о цыкнэдэр, о Ефремо, тэ авэл май баро лэ Манассиястар, лэ барэдэрэстар. Лэ Иосифости пэрэжыля дуй части анда наследство, саво прижалас лэ барэдэрэ шавэсти. И о Иаково ԥэндя лэсти: «Мэ дав тути по ек участко ԥув май бут, чем тирэ ԥралэнди. Кадэя ԥув мэ залэм мечоса и лукоса кай и амореёря» (Бытие 48:1—22; 1 Летопись 5:1). О участко паша Сихемо о Иаково тиндя, а на заля войнаса, кай лэ Емморостирэ шавэ. Вижал о алав, саво о Иаково дя лэ Иосифости, сыкавэл, кай лэстэ сас састи вера (Бытие 33:19, 20). О Иаково ԥэндя, кай лэстирэ потомкоря, май англэ залэна о Ханаано, но ԥэндя када кадя, кабута во када ужэ стердя екжэно мечоса и лукоса. (Дик АМОРЕИ.) Дуй части ԥув, савэ залинэ пэ война и прижанас лэ Иосифости, слинэ дуй участкоря, савэ отдинэ лэ Ефремостирэ и лэ Манассиястирэ потомконэнди.
(Бытие 49:1) О Иаково ақардя пэстирэ шавэн и ԥэндя: «Стидэнпэ еқэҭанэ, и мэ росԥэнава тумэнди, со тумэнца авэла андэ послидни деса.
it «Последние дни», абз. 2
Послидни деса
Лэ Иаковоско пророчество англа лэстири смэрть. О Иаково ԥэндя пэстирэ шавэнди: «Стидэнпэ еқэҭанэ, и мэ росԥэнава тумэнди, со тумэнца авэла андэ послидни деса [«андэ деса, савэ авэна», СП]». Кадэлэ алавэнца во ԥэндя пала время, андэ сави о пророчество лэла исполняца (Бытие 49:1). Май бут чем важ 200 бэрш палпалэ о Иегова ԥэндя лэ Иаковостирэ папости, лэ Аврамости (Авраамости), кай лэстирэ потомконэн лэна тэ ӷонин 400 бэрш (Бытие 15:13). Вижал, и время, пала сави ԥэндя о Иаково, сар пала «послидни деса», трэбуй тэ начнёца посли кода, сар прожана и 400 бэрш. (Май драго тэ роздиқэс и 49 ӷлава Бытие можно па статьи пала лэ Иаковостирэ шавэ.) Кадэва пророчество трэбуй сас инке тэ исполница пэ «лэ Дэвлэско Израилё» (Галатам 6:16; Римлянам 9:6).
(Бытие 50:24, 25) О Иосифо ԥэндя пэстирэ ԥралэнди: «Мэ мэрав, но о Дэл всаек шола сама пэр тумэндэ и виандярэла тумэн катар пэ ԥув, пала сави во солахадя лэ Авраамости, лэ Исаакости и лэ Иаковости». 25 Важ када о Иосифо ԥэндя лэ Израилёстирэ шавэнди тэ солахан лэсти: «О Дэл всаек шола сама пэр тумэндэ. И тоди виандярэн катар мэрнэ кокаля».
w07 1/6 28, абз. 10
И ԥурэ, када блаӷословения важ и тэрнэ мануша
10 И ԥурэ моӷут тэ дэн зор и кодэлэнди, ко андэ собрания. Кала лэ Иосифости, лэ Иаковостирэ шавэсти, сас 110 бэрш, во ԥэндя, кай посли лэстири смэрть и израильтяноря тэ залэн лэстирэ кокаля пэса, кала лэна тэ вижан анда Египто (Бытие 50:25; Евреям 11:22). Кода, со во приԥэндя, фартэ подритярэлас лэ Дэвлэстирэ народос инке бут бэрша. И израильтяноря ӷанэнас, кай вонэ трэбуй тэ вижан анда Египто, андэ саво слинэ рабонэнца, и лэ Иосифостирэ алава бут бэрша дэнас лэнди зор тэ аштярэн кадэя время.
Виарақас сомнак анда Библия
(Бытие 49:19) По Га́до лэна тэ дэн и чордэӷаря, но во лэла тэ ӷонийпэ пала лэндэ.
w04 1/6 15, абз. 4, 5
4 Англа кода сар вся о народо тэ зажал пэ Обетованно ԥув, лэ Гадостирэ потомкоря манглэ тэ ашэнпэ тэ жувэн по востоко лэ Иорданостар, андо лашо ҭан, кай тэ пасыйпэ лэнго ското (Числа 32:1—5). И жызня андэ кодэва ҭан сас фартэ ԥари. Лэ израильтянонэн, савэ жувэнас по западо ла лэнатар, фэрияс и иорданско долина, кай пэр лэндэ тэ на жан войнаса (Иисус Навин 3:13—17). Ай андэ ҭана, савэ слинэ по востоко лэ Иорданостар, сас па аврятэ. О Джорджо Адамо Смито андэ пэстири книӷа пала кадэла ҭана пистросардя: «Почти вся кодэя ԥув па вся северо пэ Аравия, када ровно ҭан. Через када вся и время пэ кадэла ҭана дэнас и боқалэ качевникоря, и дэсавэ андар лэндэ кажно бэрш дэнас пэ ҭана, кай пасынас о ското» («The Historical Geography of the Holy Land»).
5 Сар лэ Гадостирэ потомкоря виритярэна када? Бут бэрша палпалэ лэнго пропапо о Иаково англа пэстири смэрть ԥэндя: «По Гадо лэна тэ дэн и чордэӷаря, но во лэла тэ ӷонийпэ пала лэндэ» (Бытие 49:19). Спэрва можэт тэ здэлпэ, кай кадэва пророчество найлашо. Но па чачимастэ через кадэва пророчество лэ Гадостирэ потомкоря трэбуй авэна тэ рин кодэлэнди, ко дэла пэр лэндэ. И о Иаково ԥэндя лэнди, кай если вонэ лэна кадя тэ терэн, тоди и чордэӷаря тэлярдэ шэрэса лэна тэ нашэнтар, ай вонэ лэна тэ ӷонинпэ пала лэндэ.
(Бытие 49:27) О Вениамино лэла тэ росшынэл и добись, сар о рув. Тэсара во лэла тэ хал лэ жывотнонэс, савэс астардя, и вэчэром тэ делий и добись».
it «Вениамин», абз. 9
Вениамино
Пала кода, кай лэ Вениаминостирэ потомкоря лашэ воиноря, о Иаково ԥэндясас андо пророчество англа пэстири смэрть. Важ пэско любимо шаво во ԥэндя: «О Вениамино лэла тэ росшынэл и добись, сар о рув. Тэсара во лэла тэ хал лэ жывотнонэс, савэс астардя, и вэчэром тэ делий и добись» (Бытие 49:27). И воиноря вениамитяноря слинэ метки. Кажно андар лэндэ шувидэлас и бара и правонэ и левонэ вастэса и попэрэлас ворта андо шэро (Судей 20:16; 1 Летопись 12:2). Анда лэ Вениаминостири племя сас о сындомари Аодо, во сас левша и умардя лэ царёс Еглонос, саво тасавэлас пэ израильтяноря (Судей 3:15—21). Кадяжэ «тэсара», то есть сар кати жыля о Израильско царство, пэрвонэ царёса ашэля о Сауло, лэ Кисоско шаво, анда лэ Вениаминостири племя. О Сауло смило воевал лэ филистимлянонэнца (1 Самуила 9:15—17, 21). Кадяжэ «вэчэром», кала заканчивалась и израильско правления, через и Эсфирь и о Мардохеё, савэ слинэ анда лэ Вениаминостири племя, спасысайля о израильско народо ла смэртятар, кала лэн камлэ тэ умарэн андэ Персия (Эсфирь 2:5—7).
22—28 ИЮНЯ
СОМНАК АНДА БИБЛИЯ | ИСХОД 1—3
«Мэ ашава кодэлэса, каса закамава тэ ашав»
(Исход 3:13) Но о Моисеё ԥэндя лэ чачунэ Дэвлэсти: «Со, если мэ авава каринг и израильтяноря и ԥэнава лэнди: „Ман бишалдя каринг тумэндэ о Дэл тумарэ ԥурэнго“, ай вонэ пушэна: „Сар лэс ақарэн?“ Со мэ лэнди тэ ԥэнав?»
Терэн вся, кай лэ Дэвлэско алав тэ авэл ашунгло
4 Адиносар Исход 3:10—15. Кала лэ Моисеёсти сас 80 бэрш, о Иегова дя лэсти важно задания. О Иегова ԥэндя лэсти: «Ту виандярэса мэрно народо, лэ израильтянонэн, анда Египто». Но о Моисеё задя лэсти фартэ важно вопросо. О Моисеё, можно тэ ԥэнас, пушля: «Сар тут ақарэн?» Если тэ сэрас, кай о миро ужэ дэлмут ӷанэнас, сар ақарэн лэ Дэвлэс, со тоди камля тэ уӷанэн о Моисеё? Дицол, кай во камэлас май бут тэ уӷанэн, саво о Иегова. То есть кода, со доԥэндоп лэ народости, кай о Дэл лэн па чачимастэ спасыя. Кода, пала со пэрэжывал о Моисеё, на сас евья, важ кода кай и израильтяноря ужэ бут время слинэ андо рабство. Вонэ моӷли тэ на допатян, кай лэндирэ ԥурэнго Дэл чаче можэт тэ спасый лэн. Важ кода кай дэсавэ израильтяноря дажэ линэ тэ тэлён лэ египецконэ дэвлэнди! (Иезекииль 20:7, 8).
(Исход 3:14) О Дэл ԥэндя лэ Моисеёсти: «Мэ ашава кодэлэса, каса закамава тэ ашав». И инке ԥэндя: „Акэ со ту ԥэнэса лэ израильтянонэнди: «Ман бишалдя каринг тумэндэ кодэва, кас ақарэн ‚Мэ ашава‘“».
kr 43, рамка
СО СЫКАВЭЛ ЛЭ ДЭВЛЭСКО АЛАВ
О АЛАВ Иегова, када еврейско глаголо, саво сыкавэл «тэ ашэл». Дэсавэ учони гиндон, кай кадэва глаголо тердёл андэ каузативно форма, сави сыкавэл, васо во када терэл и со кадэлэстар авэла. Важ када бут ко соӷласни, кай лэ Дэвлэско алав сыкавэл, кай «Во дэл тэ ашэл». Кацаво алав драго поджал лэ Иеговасти сар Создателёсти. Сар Кодэва, ко дэл всаворэсти тэ ашэл, во создал и Люма, лэ анӷелонэн и лэ манушэн, ай кадяжэ во терэл кода, со загиндосардя.
Но сар тоди тэ полас лэ Иеговаско атвето анда Исход 3:13, 14 пэ кода, со пушля лэстар о Моисеё? О Моисеё пушля: «Со, если мэ авава каринг и израильтяноря и ԥэнава лэнди: „Ман бишалдя каринг тумэндэ о Дэл тумарэ ԥурэнго“, ай вонэ пушэна: „Сар лэс ақарэн?“ Со мэ лэнди тэ ԥэнав?» Пэ када о Иегова ԥэндя: «Мэ ашава кодэлэса, каса закамава тэ ашав».
Шон сама, о Моисеё на мангэлас, кай о Иегова тэ ԥэнэн пэско алав. О Моисеё и израильтяноря и кадя ӷанэнас лэ Дэвлэско алав. Во камэлас, кай о Иегова тэ росԥэнэн пала пэстэ варисо кацаво, состар лэндири вера ашэлоп май састи, и со сжылопэ кодэлэса, сар ақарэн лэ Дэвлэс. Кала о Иегова ԥэндя: «Мэ ашава кодэлэса, каса закамава тэ ашав», во росԥэндя пала пэстэ дэсо важно. Андэ любо ситуацыя во ашэл кодэлэса, каса трэбуй, кай тэ стерэл кода, со загиндосардя. Например, важ о Моисеё и израильтяноря во ашэлас Кодэлэса, ко лэн фэрияс, дэлас законоря и праварэлас, и када инке най вся. Вижал, о Иегова витидэл тэ ашэл кодэлэса, каса трэбуй, кай тэ стерэл кода, пала со во дя алав пэстирэ народости. И хоть кацави значения ужал андэ лэ Иеговаско алав, када инке най вся. Лэско алав кадяжэ сыкавэл, кай во «дэл тэ ашэл» всаворэсти, со во стердя, кодэлэса, каса и соса трэбуй важ пэстири воля.
Виарақас сомнак анда Библия
(Исход 2:10) Кала о бэято подбареля, вой андя лэс кай лэ фараоностири щей, и во ашэля латирэ шавэса. Лэ фараоностири щей дя лэсти алав Моисей, и ԥэндя: «Мэ вилэм лэс анда паи».
g04 8/4 6, абз. 4
Сас ли о Моисеё па чачимастэ?
Но хэба моӷло кацаво тэ авэл, кай лэ фараоностири щей тэ лэл тэ барярэл кацавэ бэятос? Андэ египецко вера сытярэнас, кай о мануш трэбуй тэ терэл лащи дила, кай тэ попэрэл по нэбо. Ек учоно ԥэнэн: «И жувля андо Египто домардёнас, кай лэндэ тэ авэл кацаво жэ право, сар кай и мурш. Важ лэндэ слинэ кацавэ жэ законоря андэ юридически вопросоря и андэ вопросоря лэ ловэнца, но пала када сас кати пистромэ... кадяжэ и жувля моӷли тэ усыновин бэятонэн». Исин ек лил, андэ саво пистромэ, кай ек жувли усыновила пэстирэ рабонэн. Ай пала кода, кай лэ Моисеёстиря да наймисардэ тэ праварэл лэс, андо ек библейско словарё ԥэнэнпэ: «Кода, кай лэ Моисеёстири дэй праварэлас лэс важ и ловэ... фартэ шолпэ пэ кода, со пистронас андэ доӷовороря важ о наймо андэ Месопотамия» («The Anchor Bible Dictionary»).
(Исход 3:1) О Моисеё ля тэ пасый о стадо кай о мадиамско рашай Иафо́ро, савэсти во дожалас зятё. Еқвар во дарадя о стадо пэ западно риг па пустыня и авеля каринг лэ чачунэ Дэвлэско плай, каринг о Хори́во.
w04 15/3 24, абз. 4
Интересни гиндоря анда книӷа Исход
3:1 —Со за рашай сас о Иафоро? Андэ время, кала жувэнас и патриархоря, о хулай андо ери сас рашай важ пэско ери. Дицол, кай о Иафоро сас барэдэр кай и мадианитяноря. Важ кода кай и мадианитяноря жылэ лэ Авраамостар (через и Хеттура), вонэ, можэт, дэсо ӷанэнас анда кода, сар тэ тэлён лэ Иеговасти (Бытие 25:1, 2).
29 ИЮНЯ — 5 ИЮЛЯ
СОМНАК АНДА БИБЛИЯ | ИСХОД 4, 5
«Мэ авава туса»
(Исход 4:10) Тоди о Моисеё ԥэндя лэ Иеговасти: «Простисар ман, Иегова, но мэ никала на давас дума шукарнэс. Шукарнэс мэ на дав дума и акана, кала ту дэс дума пэстирэ слуӷоса. Манди ԥарэс тэ дав дума, мэ на ӷанав тэ дав дума».
(Исход 4:13) Но о Моисеё ԥэндя: «Простисар ман, Иегова, но мангав тут, бишал варикас аврэс».
w10 15/10 14, абз. 1
Сар о Иегова диқэл пэ кода, кала о мануш оправдываеца?
«Мандэ када на вижала». Можэт тумэнди здэлпэ, кай тумэндэ на вижала тэ росԥэнэн и лащи новость. Дэсавэ лэ Иеговастирэ служытеля андэ кодэя время гиндонас, кай лэндэ на вижала тэ терэн лэстири дила. Шам сама по Моисеё. Кала о Иегова дя лэсти важно дила, о Моисеё ԥэндя: «Простисар ман, Иегова, но мэ никала на давас дума шукарнэс. Шукарнэс мэ на дав дума и акана, кала ту дэс дума пэстирэ слуӷоса. Манди ԥарэс тэ дав дума, мэ на ӷанав тэ дав дума». Хоть и о Иегова ԥэндя, кай подритярэла лэс, о Моисеё всаек мангля лэс: «Простисар ман, Иегова, но мангав тут, бишал варикас аврэс» (Исход 4:10—13). Со лэсти пэ када ԥэндя о Дэл?
(Исход 4:11, 12) Но о Иегова ԥэндя лэсти: «Ко дя лэ манушэсти тэ дэл дума? Ко терэл мутонэса, кашукэса, кай тэ диқэл или корэса? Хэба най мэ, о Иегова? 12 Важ када, жа, мэ авава туса, кала ту дэса дума, и сытярава тут, со тэ ԥэнэс».
w14 15/4 9, абз. 5, 6
Диқэс ту Кодэлэс, кас на дицол?
5 Англа кода сар о Моисеё тэ рийпэ андо Египто, о Дэл росԥэндя лэсти ек важно принцыпо. О Моисеё потом запистросардя лэс андэ книӷа Иов: «И дар англа Иегова, када мудрость» (Иов 28:28). О Иегова поможысардя лэ Моисеёсти, кай лэстэ тэ авэл кацави дар и кай во тэ андярэл пэс мудро. Во сыкадя, пэскати и мануша на шонпэ по Всемоӷущё Дэл. Во пушля: «Ко дя лэ манушэсти тэ дэл дума? Ко терэл мутонэса, кашукэса, кай тэ диқэл или корэса? Хэба най мэ, о Иегова?» (Исход 4:11).
6 Сости амэ анда када сытювас? Лэ Моисеёсти на трэбуй сас тэ дарал. Лэс бишалдя о Иегова, саво дя лэсти вся, со трэбуй, кай тэ пэрэдэл лэ фараоности кода, со во ԥэндя. Ай кадяжэ о фараоно сас нико англа Иегова. Лэ Дэвлэстирэ служытелёнэн ужэ най пэрво разо ӷонинас и египецки правителя. Можэт, о Моисеё гиндояс пала кода, сар о Иегова фэрияс лэ Авраамос, лэ Иосифос и дажэ лэс екжэнэс, кала правинас авэр фараоноря (Бытие 12:17—19; 41:14, 39—41; Исход 1:22—2:10). О Моисеё патялас андо Иегова, андэ Кодэва, кас на дицол, и важ када во смило авеля кай о фараоно и пэрэдя лэсти всаворэ лэ Иеговастирэ алава.
(Исход 4:14, 15) Тоди о Иегова холяйля по Моисеё и ԥэндя: «Ай тиро ԥрал, о левито Аароно? Мэ ӷанав, кай во драго дэл дума, и во ужэ жал каринг тутэ. Во авэла радо тут тэ диқэл. 15 Ту лэса тэ ԥэнэс лэсти, со во трэбуй тэ дэл дума, ай мэ авава тумэнца, кала ту лэса тэ дэс дума, и сытярава тумэн, со тэ терэн.
w10 15/10 14, абз. 2
Сар о Иегова диқэл пэ кода, кала о мануш оправдываеца?
О Иегова на зля па Моисеё кадэя задания, но дя лэсти андэ помощь, лэ Ааронос (Исход 4:14—17). И потом о Иегова инке бут бэрша сас лэ Моисеёса и дэлас лэсти вся, со трэбуй, кай во тэ стерэл и задания, сави во дя лэсти. Ту можэш тэ патяс, кай через и ԥрала и ԥэя, савэндэ састи вера, о Иегова кадяжэ поможыя и тути тэ служыс лэсти. И само ӷлавно, андэ Библия ԥэнэнпэ, кай о Иегова поможыя амэнди тэ стерас и задания, сави во дя амэнди (2 Коринфянам 3:5). (Дик рамка «Самые счастливые годы моей жизни».)
Виарақас сомнак анда Библия
(Исход 4:24—26) Па дром, кала во притерделя тэ ратярэл, лэс диқля о Иегова и камля лэс тэ умарэл. 25 Но и Сепфора ля востро котор кремнё, стердя обрезания пэстирэ шавэсти, и шутя о котор мурцы лэсти каринг и пэрнэ и ԥэндя: «Важ кода кай ту мэрно лэ ратэско тэрно». 26 И о Дэл одмэкля лэс. Ай вой ԥэндя: «Лэ ратэско тэрно», через обрезания.
w04 15/3 28, абз. 4
Пушэн кодэла, ко адинон
Ла Сепфоратирэ алава «ту мэрно лэ ратэско тэрно» фартэ нэобычни. Со кадэла алава ԥэнэн пала Сепфора? Кала вой стердя па законо пала обрезания, вой прижангля о доӷоворо лэ Иеговаса. Потом, кала лэ израильтянонэнца сас стердо о доӷоворо, дицэля, кай андо доӷоворо о Иегова сас сар хулай, ай авэр риг, сар хулаи (Исаия 54:1, 5). Важ када, кала и Сепфора дя дума лэ Иеговастирэ анӷелоса, сар «лэ ратэстирэ тэрнэса», вой сыкадя, кай прижанэн кода, со ԥэнэнпэ андо доӷоворо. Вой ԥэнаса сас андо доӷоворо пала обрезания сар и хулаи, ай о хулай сас о Дэл Иегова. Сар бы тэ на авэл, кода, кай и Сепфора йто вся стердя, сыкадя, кай вой кандэл лэ Дэвлэс, и кадэлэса вой спасысардя и жызня пэстирэ шавэсти.
(Исход 5:2) Но о фараоно ԥэндя: «Ко кацаво о Иегова, кай мэ тэ кандав лэс и тэ одмэкав о Израилё? Мэ на ӷанав лэ Иеговас и на одмэкава о Израилё».
it «Иегова», абз. 43
Иегова
Вижал, о алав «тэ ӷанэс» можэт тэ сыкавэл май бут, чем тэ ӷанэс варикас или варисо или кай када исин. О найгодявэрно Навало, саво ӷанэнас лэ Давидос па алавэстэ, всаек пушля: «Ко кацаво о Давидо?». Кадэлэса во камля тэ ԥэнэн: «Ко во сыно?» (1 Самуила 25:9—11; дик 2 Самуила 8:13). Кадя жэ и о фараоно ԥэндясас лэ Моисеёсти: «Ко кацаво о Иегова, кай мэ тэ кандав лэс и тэ одмэкав о Израилё? Мэ на ӷанав лэ Иеговас и на одмэкава о Израилё» (Исход 5:1, 2). О фараоно кадэлэса камля тэ ԥэнэн, кай на ӷанэн лэ Иеговас, сар чачунэ Дэвлэс, или сар кодэлэс, кастэ исин варисави власть по египецко царё и пэ лэстири дила, или сар кодэлэс, кастэ исин зор, кай тэ стерэл кода, со во ԥэндя через о Моисеё и Аароно. Но лэ фараоности и всаворэ египтянонэнди прижыляпэ тэ уӷанэн, со па чачимастэ сыкавэл лэ Дэвлэско алав, тэ уӷанэн, саво сыно Кодэва, кас ақарэн Иегова. О чачуно Дэл сыкадя лэ Моисеёсти, кай када трэбуй сас тэ авэл. Кала? Кала о Дэл стердоп кода, со загиндосардя важ израильтяноря, кай тэ освободий лэн анда рабство и тэ дэл лэнди и ԥув, пала сави дя алав лэндирэ папонэнди. Именно кадя трэбуй тэ полас лэ Дэвлэстирэ алава: «Тумэ уӷанэна, кай мэ о Иегова, тумаро Дэл» (Исход 6:4—8; дик ВСЕМОГУЩИЙ).