Ԥэнэн о чачимос
«Ԥэнэн ек аврэсти чачимос» (ЗАХАРИЯ 8:16).
1, 2. Ко и сар терэл фартэ вэрыто всаворэ манушэнди?
АМАРИ жызня стердэ май лащи и телефоноря, вураля, и лампочки важ о вудуд, о холодильнико и инке бут со. Ай бут через со и мануша хасарэн и жызня, када пушки, мины, савэнца взорвин, атомни бомбы, цыӷарки и инке бут со. Но исин, со пэ люма сас май англал кадэлэстар и римой инке май бут лэ манушэстири жызня. Пала со жал и дума? Пала хохаимос. Васо кодэва, ко ӷанэн, кай нащи тэ хохавэл, всаек терэл када? Важ кода кай камэл тэ обхохавэл. Ко само пэрво хохадя? О Сатана, пэ саво о Иисусо ԥэндя, кай во «дад лэ хохаимаско». (Адиносар Иоанна 8:44a). Кала во пэрво разо хохадя?
2 Када тердяпэ фартэ бут бэрша палпалэ андо садо Эдемо. И пэрви мануша о Адамо и Ева жувэнас андо райкано раё, саво важ лэндэ стердя о Иегова. О Дэл ԥэндя лэнди, кай сар вонэ хана па «витка, сави сыкавэл, со лашимос, ай со найлашимос», вонэ мэрэна. Но о Сатана через о сап ԥэндя ла Евати: «Най, тумэ на мэрэна». (Када сас само пэрво хохаимос.) Инке во ԥэндя: «Ай инке о Дэл ӷанэн, кай андэ кодэва дес, кала тумэ хана пар лэтэ, тумарэ яқа ԥэрнадёнапэ и тумэ ашэна, сар о Дэл, савэ ӷанэна, со лашимос, ай со о найлашимос» (Бытие 2:15 жы кай 17; 3:1 жы кай 5).
3. Васо ԥэнэса, кай о Сатана хохадя, важ кода кай камэлас тэ авэл вэрыто и каринг со када андя?
3 О Сатана драго полэлас, сар и Ева патяла лэсти и хала о плодо, вой мэрэла. О Сатана хохадя, важ кода кай камэлас тэ авэл вэрыто лэ манушэнди. Кадя и тердяпэ. О Адамо ла Еваса на канглэ лэ Иеговас и сар прожыля и время, вонэ мулинэ (Бытие 3:6; 5:5). Но инке через лэнго бэзэх «смэрть пэрэжыля пэ всаворэ мануша». Сар пистромэ андэ Библия «и смэрть правияс, сар о царё пэ кодэла, ко на стердя кацаво бэзэх, саво стердя о Адамо» (Римлянам 5:12, 14). О Дэл камэлас, кай и мануша тэ авэн би бэзэхэстирэ и тэ на шылинпэ, и тэ жувэн вечно. Ай вижыля кадя, сар ԥэндя о мануш, саво пистросардя о Псалом: «Амарэ деса, семьдесят бэрш. Ай сар исин май бут зор восемьдесят бэрш, но андэр лэндэ всаек бут ԥаримос и биды» (Псалом 90:10). Сар када дэ найдраго! Ай тердяпэ вся через лэ Сатанаско хохаимос.
4. а) Пала со амэ подаса дума? б) Каса о Дэл на парашэла тэ ладий, сар пистромэ андэ Псалом 15:1, 2?
4 О Иисусо ԥэндя пала Сатана: «[Во] на ашэляпэ андо чачимос, важ кода кай о чачимос нинай андэр лэстэ». О Сатана на паруделя, во идоси хохавэл. Во на парашэл «тэ обхохавэл вся о миро» (Откровение 12:9). Амэ на камас, кай о Сатана тэ обхохавэл амэн. Важ када амэ трэбуй тэ ӷанас акэ со. Пэрво, сар о Сатана обхохавэл лэ манушэн андэ амарэ деса? Дуйто, васо и мануша хохавэн? Трито, со амэнди поможыя вся и время тэ ԥэнас о чачимос, кай о Дэл тэ на парашэл тэ ладий амэнца и кай тэ на авас кацавэ, сар о Адамо ла Еваса? (Адиносар Псалом 15:1, 2b).
САР О САТАНА ОБХОХАВЭЛ ЛЭ МАНУШЭН?
5. Сар о Сатана обхохавэл лэ манушэн анда амарэ деса?
5 Кай о Сатана тэ на обхохавэл амэн, амэнди трэбуй тэ ӷанас, саво о найлашимос во камэл тэ стерэл (2 Коринфянам 2:11). Амэ ӷанас, кай андэ лэстирэ вас вся и люма. Када и хохавнэ барэ мануша анда веры, барэ мануша андэ страны, савэн подтинэн и чорымастирэ мануша, савэ тинэн и битинэн (1 Иоанна 5:19). Важ када амэ на дас наздив, кай о Сатана и бэнга терэн кадя, кай и барэ мануша тэ хохавэн (1 Тимофею 4:1, 2). Ԥэнаса, дэсавэ барэ мануша хохавэн через и реклама. Вонэ камэн тэ битинэн о хамос, саво римой о зор и хохаимаса вицырдэн анда мануша и ловэ.
6, 7. а) Васо пэ барэ мануша анда веры май бари дош? б) Саво хохаимос ту ашундян лэ барэ манушэндар анда веры?
6 Май бари дош пэ барэ мануша анда веры. Васо? Важ кода кай, сар варико патял лэ хохаимасти, савэсти вонэ сытярэн и терэн, со о Дэл вэрыцый, кацаво мануш хасарэла пэстири жызня англэ и на жувэла вечно (Осия 4:9). О Иисусо ӷанэнас, кай и барэ мануша анда вера обхохавэн лэ манушэн. Во ворта ԥэндя: «Бида тумэнди, книжникоря и фарисеёря, савэ притерэнпэ. Тумэ пэрэжан и моря и и ԥув, кай хоть ек мануш тэ лэл тэ патял андо Иегова. И кала тумэндэ када вижал, тумэ терэн, кай во тэ ашэл кацаво, ко затерэл и геена [када смэрть пэ вечность] дуйвар май бут, чем тумэ екжэнэ» (Матфея 23:15). О Иисусо ԥэндя, кай кодэла хохавнэ барэ мануша анда вера слинэ кацавэ жэ, сар лэнго дад о Сатана, саво сас кодэва, ко умардя (Иоанна 8:44).
7 Андэ амарэ деса кадяжэ исин бут барэ мануша андэ веры. Сар пэр лэндэ кати на ԥэнэн. Ԥэнэн пасторы, рашая, раввины и инке бут сар. Вонэ, сар и фарисеёря на сытярэн лэ чачимасти, саво пистромэ андэ Библия. Вонэ «парудэ о чачимос важ о Дэл по хохаимос» (Римлянам 1:18, 25). Вонэ сытярэн, кай исин адо, андэ саво ԥабон и мануша. Инке сытярэн, кай кала о мануш мэрэл, лэстири жызня пэрэжал андэ варикастэ чи варисостэ авэр. Кадяжэ сытярэн, кай о Дэл ԥандавэл и яқа пэ кода, кай дуй мурша совэн ек еқэса и кай мурша жэнинпэ ек пэ ек и жувля жан ек пала ек.
8. Саво хохаимос и мануша йто ашунэна и, со амэнди тоди трэбуй тэ сэрас?
8 Тэ обхохавэн лэ манушэн вижал и лэ барэ манушэндэ анда страна. Йто лэна тэ ԥэнэн, кай ашэля «миро и безопасность» и када само баро хохаимос важ вся лэ манушэндири жызня. Тоди о Иегова улэла вся лэ Сатанаско миро, кала нико када на аштярэл. На дэн, кай тумэн тэ обхохавэн кодэлэса, кай па кадэва миро о Дэл нисо на спушэла. Амэ драго ӷанас, кай «лэ Иеговаско дес авэла ворта кадя, сар о чор и рят» (1 Фессалоникийцам 5:1 жы кай 4).
ВАСО И МАНУША ХОХАВЭН?
9, 10. а) Васо и мануша хохавэн и каринг со када анэн? б) Со амэнди трэбуй тэ сэрас пала Иегова?
9 Най кати и барэ мануша хохавэн. Андэ статья «Почему мы лжем» пистромэ: «И мануша хохавэн, важ кода кай гиндон, кай андэ када нинай ни́со». И мануша хохавэн, кай лэнди тэ на пэрэл, кай тэ гаравэн, со най кадя стердэ чи, кай тэ затерэн пэ када. Андэ кадэя статья пистромэ, сар андярэн пэс дэсавэ мануша: «И мануша хохавэн, сар андо найбаро, кадя и андо баро. Вонэ хохавэн кодэлэнди, кас на ӷанэн и каса терэн бути. Кадяжэ хохавэн кодэлэнди, каса ладин, хан и пэн и кас любин».
10 Каринг со анэн о хохаимос? И мануша на допатян ек еқэсти и парашэн тэ ладин ек еқэса. Погиндосар, сар дуқала оди, кала о хулай, саво уӷанэн, кай лэстири хулаи сутя аврэ муршэса и гаравэлас када. Чи погиндон пала ери, андэ саво о хулай марэл и тэлярэл пэстиря хулая и лэ бэятонэн. Ай по миро андярэл пэс кадя, сар лашо хулай. Кай кацавэ мануша вижал тэ обхохавэн аврэ манушэн. Но амэ трэбуй тэ сэрас, кай лэндэ на вижала тэ обхохавэн лэ Иеговас. Андэ Библия пистромэ «нинай нисо́ гарадо, ай вся ԥэрнадо» англа лэстирэ яқа (Евреям 4:13).
11. Сости амэн сытярэл, со сас лэ Ананияса и ла Сапфираса? (Диқэн и картинка англа статья.)
11 Андэ Библия пистромэ пала ек христианско ери, савэн ақарэнас Анания и Сапфира. Вонэ закамлэ тэ обхохавэн лэ апостолонэн. О Сатана дя лэнди гиндо, кай тэ хохавэн лэ Дэвлэсти. Вонэ битиндэ пэстири мал и отдинэ лэ апостолонэнди най всаворэ ловэ. Вонэ камлэ, кай андэ собрания пала лэндэ драго тэ дэн дума. Камлэ тэ сыкавэн, кай вонэ, ԥэнэса, тердэ када анда вся оди. Важ када вонэ ԥэндэ, кай отдинэ всаворэ ловэ. Но о Иегова диқэлас вся и спушля лэндар важ лэнго хохаимос (Деяния 5:1 жы кай 10).
12. Со авэла кодэлэнца, ко ӷанэн, кай нащи тэ хохавэн, ай всаек хохавэн и на каинпэ? Васо?
12 Со кай о Иегова андо ди каринг и мануша, савэ хохавэн? Всаворэ мануша, савэ ӷанэн, кай нащи тэ хохавэн, ай всаек хохавэн и на каинпэ, попэрэна андо возэри ягаса, аврэ алавэнца вонэ мэрэна (Откровение 20:10; 21:8; Псалом 5:6). Васо? Важ кода кай кодэлэн, ко хохавэн, о Иегова стол пэ ек ҭан кодэлэнца, ко терэл дила, сави лэсти гряца (Откровение 22:15).
13. Со амэ ӷанас пала Иегова и со важ када амэ камас тэ терас?
13 Амэ ӷанас, кай «о Дэл най о мануш, кай тэ хохавэл» (Числа 23:19). Андэ Библия ԥэнэнпэ: «О Дэл на ӷанэн тэ хохавэл» (Евреям 6:18). О Иегова вэрыцый «и хохавни шыб» (Притчи 6:16, 17). Амэнди трэбуй вся и время тэ ԥэнас о чачимос, сар камас, кай о Дэл тэ авэл лошало. Важ када амэ на хохавас ек аврэсти (Колоссянам 3:9).
АМЭ ԤЭНАС О ЧАЧИМОС
14. а) Соса амэ на шаспэ лэ манушэнца анда хохавнэ веры? б) Росԥэнэн пала алава анда Луки 6:45?
14 Соса и чачунэ христианоря на шонпэ лэ манушэнца анда хохавнэ веры? Амэ ԥэнас о чачимос. (Адиносар Захария 8:16, 17c). О Павло ԥэндя, амэ «сыкавас пэс, сар лэ Дэвлэстирэ служытеля... андэ чачуни дума» (2 Коринфянам 6:4, 7). Ай акэ, со ԥэндя о Иисусо: «Соса ԥэрдо ди, ԥэнэн и вуш» (Луки 6:45). Аврэ алавэнца, и мануша, кастэ о чачимос исин андо ди, вся и время ԥэнэн о чачимос. Вонэ на хохавэн ни андо найбаро, ни андо баро, ай вся и время ԥэнэн о чачимос кодэлэнди, кас на ӷанэн, каса терэн бути, каса ладин, хан и пэн и кодэлэнди, кас любин. Акана подам дума, андар со дицола, кай амэ чачунэ аврэнца.
Сави жызня андярэл кадэя тэрни ԥэй? (Диқэн и абзацоря 15, 16.)
15. а) Васо найдраго, кала мануш притерэлпэ? б) Со поможыя лэ тэрнэ манушэнди тэ на терэн кадя, сар кодэла, ко лэнца еқэ бэршэнца?
15 И тэрнэ христианоря лэн тэ притерэнпэ, кай лэн тэ прилэн кодэла, ко лэнца еқэ бэршэнца. Андо ери и андэ собрания, вонэ андярэн пэс кадя драго, кай лэндар тэ сытён авэр. Ай кала вонэ кодэлэнца, каса сытён андэ школа и кала бэшэн андо интэрнэто, вонэ ашэн авэр мануша. Вонэ дэн дума найлащи дума, ԥиравэн найсэжо йда, ашунэн диля найлашэ алавэнца. Инке вонэ матён, цырдэн, прилэн о драб и чоралэс варикаса дэн дума, диқэнпэ, пэрэпистронпэ и инке бут со. Вонэ хохавэн пэстирэ дадэсти и ла дати, лэ ԥралэнди и лэ ԥэянди, савэнца патян андо ек Дэл (Псалом 26:4, 5). О Иегова диқэл кодэлэс, ко притерэлпэ, кай стол лэс пэ пэрво ҭан, ай екжэно терэл и найлащи дила (Марка 7:6). Фартэ драго тэ терас кадя, сар пистромэ андэ Притчи 23:17: «Мэк тиро ди на вороӷуий кодэлэнди, ко терэн бэзэх, ай вся о дес дарал лэ Дэвлэстар»d.
16. Васо, кала пистрос и заявления по пионерско, по спецыально пионерско чи пэ вефильско служэния, трэбуй тэ пистрос о чачимос?
16 Ԥэнаса, ту камэс тэ авэс пионероса чи тэ лэс тэ служыс, сар специально пионеро, чи тэ терэс лэ Дэвлэстири дила андо вефилё. Кала ту пистрос и заявления, фартэ трэбуй, кай пэ вся пала со котэ пушэлпэ, тэ ԥэнэс чачимос. Када, саво тутэ зор, савэ тутэ развлечении и терэс ту чи диқэс варисо билажавардо (Евреям 13:18). Но со, сар ту стердян, со лэ Иеговасти на чалёл чи пала со тиро ди хал тут? Росԥэндян ту пала када лэ старейшынонэнди? Сар инке на росԥэндян, тоди подэ дума лэнца, кай тэ служыс лэ Иеговасти вужэ одеса (Римлянам 9:1; Галатам 6:1).
17. Пала со трэбуй тэ сэрэн, кала тумэндар допушэн пала ԥрала, савэнца патян андо ек Дэл?
17 Ԥэнаса, андэ тумари страна на дэн тэ росԥэнэн пала Иегова. Со тэ терэн, кала тумэн виақардэ и рая, и линэ тэ допушэн пала ԥрала анда собрания? Трэбуй тэ ԥэнэн вся, со тумэ ӷанэн? Сар андярэлас пэс о Иисусо, кала лэстар допушэлас о римско баро мануш? Во ӷанэнас, кай «исин время... тэ ашэс мулком, ай исин время тэ дэс дума». Важ када во най вся росԥэнэнас (Экклезиаст 3:1, 7; Матфея 27:11 жы кай 14). Сар амэндар кадяжэ допушэн, амэ трэбуй тэ гиндосарас, со тэ ԥэнас, ай со най, кай амарэ ԥралэндэ тэ на авэл бида (Притчи 10:19; 11:12).
Со поможый тумэнди тэ полэн, кала тэ ашэн мулком, ай кала тэ ԥэнэн о чачимос? (Диқэн и абзацоря 17, 18.)
18. Пала со амэ трэбуй тэ сэрас, кала росԥэнас лэ старейшынонэнди пала бэзэх, саво варико тердя анда собрания?
18 Ԥэнаса, ту уӷанглян, кай варико анда тири собрания тердя баро бэзэх. И старейшыноря диқэн, кай андэ собрания нико тэ на терэл бэзэх. Важ када вонэ пушэна тутар, со ту ӷанэс пала када. Со ту стерэса, сар жал дума пала кодэва, ко тути куч чи пала варикастэ анда тиро родо? Андэ Библия пистромэ: «Ко дэл дума анда оди, ԥэнэна о чачимос» (Притчи 12:17; 21:28). Амэ трэбуй тэ росԥэнас лэ старейшынонэнди вся о чачимос, саво амэ ӷанас, нисо тэ на гаравас и тэ на пэрэбандярас. Вонэ трэбуй тэ ӷанэн о чачимос. Васо? Вонэ трэбуй тэ полэн, сар май драго тэ поможын кодэлэсти, ко тердя о бэзэх, кай во упалэ тэ авэл лашо англа Дэл (Иакова 5:14, 15).
19. Пала со жала и дума андэ авэр статья?
19 О Давидо мангляпэ лэ Иеговасти: «Ту виарақэс лош андо чачимос, саво андо ди» (Псалом 51:6). Во ӷанэнас, кай кодэлэстэ, кастэ о чачимос андо ди, кодэва андэ вся чачуно. Чачунэ христианоря вся и время ԥэнэн ек аврэсти кати о чачимос. Соса инке амэ на шаспэ пэ мануша, савэ анда хохавнэ веры? Амэ росԥэнас лэ манушэнди о чачимос анда Библия. И дума пала када жала андэ авэр статья.
a Иоанна 8:44: «Тумаро дад, о Сатана. И тумэ камэн тэ терэн, со камэл тумаро дад. Во май англал сас кодэва, ко умардя, и на ашэляпэ андо чачимос, важ кода кай о чачимос нинай андэр лэстэ. Кала во хохавэл, када сыкавэл, саво во исин, важ кода кай во хохавно и дад лэ хохаимаско».
b Псалом 15:1, 2: «Иегова, ко авэла ӷостё андэ тири бари катуна? И ко лэла тэ жувэл пэ тиро свынто баро плай? Кодэва, ко на терэл о найлашимос, ко кандэл лэ Дэвлэс и ко ԥэнэн о чачимос андэ пэско ди».
c Захария 8:16, 17: «Акэ, со тумэ трэбуй тэ терэн. Ԥэнэн ек аврэсти чачимос, сындон паша вороты па чачимастэ и виандярэн о сындо, саво анэн каринг о ладо. О Иегова ԥэнэн: „На загиндон андэ пэстирэ одя о найлашимос против ек аврэстэ и на любин тэ солахэн евья. Важ кода кай мэ вэрыцысарав вся када“».
d Диқэн и книжка «Ответы на твои вопросы», томо 2, ӷлава 15 «Как не попасть под дурное влияние?» и ӷлава 16 «Нужно ли покончить с двойной жизнью?».