На терэн важ и мулэ кода, со нинай андэ Библия

1, 2. а) Сар о Сатана обхохавэл лэ манушэн? б) Со амэ уӷанаса андэ кадэя статья?

О САТАНА, «дад лэ хохаимаско». Во обхохавэл лэ манушэн жы кодэла времятар, кала о Дэл создал лэ мануша (Иоанна 8:44). Лэстэ бут исин хохаимос пала смэрть и пала кода, кай кала о мануш мэрэл, во варикай жувэл. И важ када и мануша патян андэ суеверия и андэ кода, кай трэбуй варисо тэ терэн, кай тэ на холярэн лэ мулэн. Ай амарэ ԥралэнди и ԥэянди анда собрания, кала лэндэ варико мэрэл анда родо или кас вонэ ӷанэн, прижалпэ тэ зашонпэ пала чачимос, андэ саво вонэ патян (Иуды 3).

² Если тумэнди прижалапэ кацаво, со поможыя састэс тэ ритярдён кодэлэсти, сости сытярэл и Библия пала кода, со терэлпэ лэ мулэнца? (Эфесянам 6:11). Сар тэ подритярас лэ ԥралэн и лэ ԥэян, савэн заставин тэ терэн кода, со на чалёл лэ Дэвлэсти? Андэ кадэя статья амэ уӷанаса дэсавэ библейски принцыпоря. Но май англал подаса дума, со андэ Библия ԥэнэнпэ пала смэрть.

СО ТЕРЭЛПЭ КОДЭЛЭНЦА, КО МУЛЯ?

3. Каринг со андя о пэрво хохаимос?

³ О Дэл создал лэ манушэн, кай тэ жувэн вечно. Лэстэ на сас гиндо, кай и мануша тэ мэрэн. Но кай тэ жувэн вечно, о Адамо ла Еваса трэбуй сас тэ кандэн лэ Иеговас и када сас найԥарэс. О Дэл ԥэндя лэ манушэсти: «Кати на ха па витка, сави сыкавэл, со лашимос, ай со найлашимос. Важ кода кай андо дес, кала ту хаса пар латэ, мэрэса» (Бытие 2:16, 17). О Сатана через о сап ԥэндя ла Евати: «Най, тумэ на мэрэна». Но вой патяя кадэлэ хохаимасти и халя о плодо и потом и о Адамо халя (Бытие 3:4, 6). Через када о бэзэх и смэрть ашэлэ андэ амари жызня (Римлянам 5:12).

4, 5. Сар о Сатана на парашэлас тэ обхохавэл лэ манушэн?

⁴ Сар и ԥэндя о Дэл, о Адамо и Ева мулинэ. Ай о Сатана на парашэля тэ обхохавэл лэ манушэн. Сар? Прожыля время и мануша линэ тэ патян андо хохаимос, кай посли кода, сар о мануш мэрэл, во варикай жувэл. Андэ кадэва хохаимос по разному патян и мануша и кацавэ манушэн фартэ бут (1 Тимофею 4:1).

⁵ Васо кадя бут мануша патян андэ кадэва хохаимос? О Сатана ӷанэн, со и мануша гиндон пала смэрть и через када во лэн обхохавэл. Важ кода кай о Дэл создал лэ манушэн тэ жувэн вечно, вонэ на камэн тэ мэрэн (Экклезиаст 3:11). Амэ ӷанас, кай и смэрть, када амаро вороӷо (1 Коринфянам 15:26).

6, 7. а) Вижыля кай о Сатана тэ угаравэл о чачимос пала кодэла, ко муля? Росԥэнэн. б) Саво чачимос запистромэ андэ Библия пала кодэла, ко муля, кай лэндар тэ на дарас?

⁶ О Сатана камэлас тэ гаравэл о чачимос пала смэрть, но лэстэ нисо на вижыля. Адес, сар никала, бут мануша ӷанэн анда Библия о чачимос пала смэрть, и саво лашимос авэла англэ кодэлэндэ, ко муля. И мануша, савэ ӷанэн кадэва чачимос, росԥэнэн лэс аврэнди (Экклезиаст 9:5, 10; Деяния 24:15). Кода, кай амэ ӷанас, со терэлпэ кодэлэнца, ко муля, амэ на дарас и амэнди вушэро по ди. Амэ лэндар на дарас и нэ пэрэжываем пала лэндэ. Амэ ӷанас, кала о мануш мэрэл, во ужэ никай на жувэл и нисо вэрыто нэ можэт тэ терэл. Во, сар ԥэнэса, драго совэл (Иоанна 11:11—14). Амэ кадяжэ ӷанас, важ кодэла, ко муля, и время терделя. И кала о Дэл лэла тэ рий лэн каринг и жызня, всаворэ кодэла бэрша, дажэ кодэлэнди, ко муля бут бэрша палпалэ, здэнапэ, сар секунды.

⁷ Тумэ диқэн, кай о чачимос пала мулэ, када вся просто, понятно и вся сжалпэ. Сар жэ када на шолпэ, сар заболдэл и хохавэл о Сатана! Пэстирэ хохаимаса о Сатана най кати дилярэл лэ манушэн, но и хохавэл пэ амаро Создателё. Кай тэ полас, скати найлашимос андя о Сатана пэстирэ хохаимаса, подаса дума акэ пала со. Сар во хохавэл по Дэл? Сар лэско хохаимос змарэл лэ манушэн тэ на патян, кай о Иисусо отдя пала амэндэ пэстири жызня? Сар лэско хохаимос терэл лэ манушэнди тэ авэл инке май ԥарэс, кала лэндэ биды?

САВО ПАРИМОС АНДЯ ЛЭ САТАНАСКО ХОХАИМОС?

8. Васо кодэлэса, кай о Сатана дилярэл важ и мулэ, во хохавэл по Иегова, сар дицол анда Иеремия 19:5?

⁸ Кодэлэса, кай о Сатана дилярэл лэ манушэн пала кодэла, ко муля, во хохавэл по Иегова. Например, исин кацаво, кай сытярэн, кай посли кода, сар о мануш мэрэл, во мучийпэ андо адо. Кадэлэса вонэ хохавэн по Дэл. Васо? Важ кода кай вонэ сыкавэн, кай о Дэл, саво любий всаворэн, кацаво жэ жэстоко, сар и о Бэнг (1 Иоанна 4:8). Сар тумэнди кадэлэстар по ди? Ай со май важно, сар лэ Иеговастэ по ди, важ кода кай во нэнавидит любо жэстокость? (Адиносар Иеремия 19:5b.)

9. Васо лэ Сатанаско хохаимос змарэл лэ манушэн тэ на патян, кай о Иисусо отдя пала амэндэ пэстири жызня, сар пистромэ андэ Иоанна 3:16 и 15:13?

⁹ Лэ Сатанаско хохаимос змарэл лэ манушэн тэ на патян, кай о Иисусо отдя пала амэндэ пэстири жызня (Матфея 20:28). Инке ек хохаимос, када, кай кала о мануш мэрэл во варикай жувэл. Если када тэ авелоп кадя, када сыкадоп, кай и мануша моӷут тэ жувэн вечно. Вижал, кай амэ тэ жувас вечно, лэ Иисусости на трэбуй сас тэ мэрэл важ амэндэ? На бистрэн кода, кай о Иисусо отдя пэстири жызня, када само бари любовь каринг и мануша. (Адиносар Иоанна 3:16c; 15:13d.) Кати погиндон, сар ԥарэс лэ Иеговасти и лэ Иисусости по ди кодэлэстар, кай кадя сытярэн и через када и мануша на цэнин кацаво фартэ кучутно подарко.

10. Сар лэ Сатанаско хохаимос терэл лэ манушэнди тэ авэл инке май ԥарэс, кала лэндэ биды?

¹⁰ Лэ Сатанаско хохаимос терэл лэ манушэнди тэ авэл инке май ԥарэс, кала лэндэ биды. Дэкала лэ родителёнэнди, кастэ муля о бэято, ԥэнэн, кай лэс заля о Дэл, кай по нэбо тэ авэл инке ек анӷелочко. Ашэл кадэлэ хохаимастар и бида май вушэро или вой ашэл инке май ԥари? Через о хохаимос пала адо, варикала сԥабарэнас кодэлэн, ко на патялас андэ католическо қандири. Кадэлэса, кодэла, ко сԥабарэнас лэ манушэн, камэнас тэ ԥэнэн, кай кадя камэл о Дэл. Андэ книжка пала испанско инквизицыяe пистромэ, васо дэсавэ сындомаря сԥабарэнас кодэлэ манушэн? Вонэ патянас, кай кодэла, кас вонэ сԥабарэн, полэна, со када тэ ԥабон андо адо и тэ каинпэ англа пэстири смэрть. Андэ авэр страны и мануша тэлён пэстирэ ԥурэнди, савэ мулинэ, полэн лэн и камэн, кай вонэ лэн тэ блаӷословин. Ай авэр роздэн о хамос, стон мисяйля, кай тэ помэнин, кай тэ на холярэн лэ мулэн. Кадэлэ лэ Сатанастирэ хохаимастар, савэсти вонэ сытярэн, на ашэл май вушэро по ди. Вонэ кати терэн май бут тэ авэл пэрэжывания и дар.

ЗАШОНПЭ ПАЛА ЧАЧИМОС АНДА БИБЛИЯ

11. Сар о родо чи кодэла, кас амэ ӷанас, анда лашимастэ тасавэн пар мэндэ тэ терас кода, со нинай андэ Библия?

¹¹ Дэкала о родо чи кодэла, кас амэ ӷанас, анда лашимастэ, камэн тэ заставин амэн тэ терас кода, со нинай андэ Библия. Но кода, кай амэ любисарас лэ Иеговас и лэстири Библия, дэл амэнди зор тэ кандас лэ Иеговас, ай най лэн. Вонэ моӷут амэн тэ лажаварэн и тэ дошалярэн, кай амэ на любисарас и на полас кодэлэс, ко муля и кай через амэндэ во холявэла пэр лэндэ. Сар амэ можэм тэ зашаспэ пала чачимос анда Библия? Подам дума пала дэсавэ принцыпоря, савэ запистромэ андэ Библия.

12. Со терэн и мануша, кала варико мэрэл, со нинай андэ Библия?

¹² Ритярдёнпэ май дур кодэлэстар, со най анда Библия (2 Коринфянам 6:17). Бут, ко гиндон, кай кала о мануш мэрэл, посли када трэбуй тэ затидэн и юнглинды. Инке гиндон, кай во ԥирэл и можэт тэ авэл цэрэ, ай пэр кастэ сас холяко, можэт кодэлэсти тэ стерэл варисо найдраго. Кала и мануша на бреинпэ и на подшынэн и бал, вонэ гиндон, кай кадэлэса вонэ уӷодин лэ мулэсти. Кадяжэ о хамос, саво ашэлпэ, кала помэнин, сшон по паи чи варикай андэ лэн. Амэ лэ Иеговастирэ свидетеля на патяс андэ кадэла суеверия и на терас вся кода, со нинай андэ Библия, и со подритярэл лэ Сатанаско хохаимос (1 Коринфянам 10:21, 22).

13. Со, сар запистромэ андэ Иакова 1:5 трэбуй тэ терэс, кала ту точно на ӷанэс, сжалпэ ла Библияса чи най кода, со терэн важ и мулэ?

¹³ Кала тумэ точно на ӷанэн, сжалпэ ла Библияса кода чи най, со терэн важ и мулэ, мангэнпэ кай о Иегова, кай во тэ дэл тумэнди мудрость. (Адиносар Иакова 1:5f.) Посли када диқэн, со важ када пистромэ андэ амари литература. Ай кала трэбуй, тоди подэн дума пала када лэ старейшынонэнца анда пэсти собрания. Вонэ на ԥэнэна, сар тумэ точно трэбуй тэ терэн, но поможына тэ арақэн, со пистромэ важ када андэ Библия. Например, подԥэнэна тэ проадинон кадэя статья. Кадя тумэ сытёна драго «тэ полэн, со лашо, ай со най» (Евреям 5:14).

14. Со поможыя амэнди тэ на ашас кацавэ, через кастэ варико можэт тэ змардёл па правильно дром?

¹⁴ Терэн вся, кай тэ прославляете лэ Дэвлэс и тэ на авэн кацавэ, через кастэ змардён па правильно дром (1 Коринфянам 10:31, 32). Англа кода, сар тэ терас варисо, амэнди трэбуй тэ погиндосарас, сар пэ кода, со амэ терас, диқэна авэр мануша, особенно амарэ ԥрала и ԥэя. Амэ на камас никала тэ авас кацавэ, кай через амэндэ, варико можэт тэ змардёл па правильно дром (Марка 9:42). Инке амэ на камас, кай тэ авэл найдраго по ди кодэлэндэ, ко на патял амэнца андэ ек Дэл. На трэбуй лэнца тэ спорисавас и тэ асаспэ кодэлэстар, со вонэ терэн. Кода, кай амэ любисарас лэн, поможыя амэнди тэ дас дума пативалэс и тэ прославляем лэ Иеговас. Сар амэ любисарас амарэ вороӷонэн, амэ дажэ можэм тэ ковлярас лэнго ди.

15, 16. а) Васо авелоп драго, кай авэр тэ ӷанэн, андэр со амэ патяс? Росԥэнэн пала Каролина и Франсишко. б) Сар амэ можэм тэ терас па лэ Павлостирэ алава анда Римлянам 1:16?

¹⁵ Росԥэнэн аврэнди, кай тумэ лэ Иеговастирэ свидетеля (Исаия 43:10). Кала холявэл тумаро родо чи кодэла, кас тумэ ӷанэн, тумэнди авэла май вушэро, кала ԥэнэна, кай тумэ кандэн лэ Иеговас. Акэ, со пистросардя о Франсишко, саво жувэл андо Мозамбико: «Кала амэ мэрня хулаяса ла Каролинаса уӷанглям о чачимос, амэ ԥэндям амарэ родости, кай будэр на тераса кода, со терасас варикала, кала варико мэрэлас. И кала кай и Каролина муля и ԥэй, амэнди сас ԥарэс, важ кода кай котэ, кай амэ жувас, терэн кадя. Кала лэ мулэс обхалавэн, о паи вишон. Посли када, само пашутно родо трэбуй трин рятя тэ совэл пэ кодэва ҭан, кай вишутэ о паи. Вонэ гиндон, кай кадэлэса можно тэ замалин лэ мулэс. О родо камэлас, кай када тэ стерэл и Каролина».

¹⁶ Со тердя кадэва ери? О Франсишко росԥэнэн: «Амэ любисарас лэ Иеговас и камас лэс тэ радосарас, важ када амэ отԥэнделям тэ стерас кода. Ла Каролинако родо фартэ пар мэндэ холяйлэ. Вонэ линэ тэ дошалярэн амэн, кай амэ на полас ла Каролинатиря ԥэя, сави муля. Инке вонэ ԥэндэ, кай на лэна амэндэ тэ зажан и на поможына амэнди, кала амэнди авэла трэбуй. Амэ ужэ ԥэндям лэнди, андэр со амэ патяс, и на лям нисо тэ дас дума, пока вонэ сас холинатирэ. Варико анда ери дажэ зашутяпэ пала амэндэ и ԥэндя, кай амэ ужэ росԥэндямас, кай на тераса када. Прожыля время и о родо успокоисайля и амэ помирисайлям лэнца. Дэко дажэ авеля амэндэ цэрэ и манглэ библейско литература». Давайте никала тэ на лажас тэ зашаспэ пала чачимос, саво амэ ӷанас пала мулэ! (Адиносар Римлянам 1:16g.)

ТЕРЭН ЛАШИМОС И ПОДРИТЯРЭН КОДЭЛЭН, КАСТИ ԤАРЭС

17. Со амэнди трэбуй тэ терас, кала лэ ԥралэстэ чи ла ԥэятэ анда собрания муля варико чачо?

¹⁷ Кала варикастэ анда ԥрала или ԥэя мэрэл лэнго чачо, амэнди трэбуй тэ авас лэсти «чачуно друӷо», чи «ԥрал, саво авеля пэ люма, кай тэ поможый андэ бида» (Притчи 17:17). Сар тэ подритярас лэ ԥралэс чи ла ԥэя, кала пэр лэндэ тасавэн, кай вонэ тэ терэн кода, со на чалёл лэ Иеговасти? Подаса дума пала дуй библейски принцыпоря, савэ поможына амэнди андэ када.

18. Васо о Иисусо заровдя и сости када амэн сытярэл?

¹⁸ «Ровэн кодэлэнца, ко ровэл» (Римлянам 12:15). Дэкала на ӷанэс, со тэ ԥэнэс, кай тэ улэс манушэс, савэстэ фартэ бари бида. Но май бут чем варисавэ алава, када и ясва. Кала муля о Лазарё, друӷо лэ Иисусоско, и Мария, и Марфа и лэндирэ друӷоря сас умардэ бидатар. Через штар дес лэндэ авеля о Иисусо. Кала во додиқля, кай вонэ ровэн, лэстэ кадяжэ «линэ тэ питян и ясва», хоть во и ӷанэнас, кай рия лэ Лазарёс каринг и жызня (Иоанна 11:17, 33—35). Кода, со сас лэ Иисусоса сыкадя, со сас по ди кай о Иегова. Лэ Иисусостирэ ясва сыкавэнас, кай во фартэ любий кадэва ери. Кадэлэстар, канешно, по ди ашэля май вушэро кай и Мария и кай и Марфа. Кадяжэ, кала амарэ ԥрала и ԥэя диқэн, кай амэ лэн любисарас и заботисавас пала лэндэ, вонэ полэн, кай най екжэнэ, кай паша лэндэ друӷоря, савэ лэн любин.

19. Сар амэ можэм тэ подритярас кодэлэс, касти ԥарэс, кала сэрас и алава анда Экклезиаст 3:7?

¹⁹ «Исин время тэ ашэс мулком, ай исин время тэ дэс дума» (Экклезиаст 3:7). Сар инке можно тэ подритярэс кодэлэс, кастэ варико муля? Можно просто драго лэс тэ виашунэс. Дэ лэсти, мэк виԥэнэн, со лэстэ по ди, и на холяв, если лэстирэ алава резки (Иов 6:2, 3). Можэт лэсти дувар май ԥарэс кодэлэстар, кай пэр лэстэ тасавэл о родо, саво на патял лэса андэ ек Дэл. Мангэнпэ вмести лэса. Мангэн кодэлэс, «ко ашунэл и молитвы», кай тэ дэл лэсти зор и во драго тэ полэл, со тэ терэл (Псалом 65:2). Вмести адинон и Библия, кала када вижал, чи и статья анда амари литература, ԥэнаса, важ варикастири жызня, сави лэс подритярэла.

20. Пала со амэ подаса дума андэ авэр статья?

²⁰ Сар жэ амэ блаӷодарни, кай ӷанас о чачимос пала кодэла, ко муля и ӷанас, саво лашимос лэндэ авэла англэ! (Иоанна 5:28, 29). Давайте амарэ алавэнца и амаря диласа тэ на лажас тэ зашаспэ пала чачимос анда Библия и тэ росԥэнас о чачимос аврэнди, кала исин любо возможность. Андэ авэр статья амэ подаса дума инке пала ек лэ Сатанастири ловушка, через сави во на дэл лэ манушэнди тэ уӷанэн о чачимос. Када бэнгалимос. Амэ диқаса, васо трэбуй тэ ритярдювас май дур кодэлэстар, со сԥангло лэса, када развличении и авэр варисавэ дилы.