Стон патив по брако

1, 2. Сости амэн сытярэл кода, со запистромэ андэ Евреям 13:4?

ВСАВОРЭ амэ камас тэ стас патив по Иегова. Амэ трэбуй тэ стас патив пэр лэстэ, важ кода кай во ашэл када. И во дэл алав, кай кадяжэ стола патив пар мэндэ (1 Самуила 2:30; Притчи 3:9; Откровение 4:11). Во кадяжэ камэл, кай амэ тэ стас патив пэ авэр мануша, ԥэнаса, пэ правительстворя (Римлянам 12:10; 13:7). Но андэ амари жызня исин инке, пэр со трэбуй тэ стас патив, када о брако.

² О апостоло Павло пистросардя: «Тэ авэл тумэнди куч тумаро брако и мэк нисаво билажавардимос на авэла пэ тумаро ҭан» (Евреям 13:4). О Павло най кати дэлас дума пала брако, но и ԥэнэнас, кай кажно христианино трэбуй тэ цэний о брако. Пуш пэстар: «Кадяжэ мэ диқав по брако?» Када фартэ поджал тэ пушэн пэстар кодэла, ко андо брако.

3. Со подԥэндя о Иисусо пала брако? (Диқэн и картинка англа статья.)

³ Если амэ стас патив по брако, тоди амэ терас кадя, сар о Иисусо. Еқвар и фарисеёря пушлэ лэстар, кай па законо тэ розвэдинпэ чи най. Тоди во ԥэндя лэнди лэ Дэвлэстирэ алава, савэ о Дэл ԥэндя, кала создал о брако. Во ԥэндя: «О мурш ашавэла пэстирэ дадэс и ла да, и дуй мануша ашэна, сар ек тила». Инке о Иисусо ԥэндя: «Кода, со о Дэл стидя, кай тэ авэл ек, о мануш нащи тэ роздилий». (Адиносар Марка 10:2 жы кай 12a; Бытие 2:24).

4. Саво гиндо сас кай о Иегова пала брако?

⁴ О Иисусо сыкадя, кай о брако создал екжэно о Дэл. И када пэ вся и жызня. О Дэл на ԥэндя лэ Адамости и ла Евати, кай вонэ моӷут тэ розжанпэ. Во дэлмут загиндосардя, кай и «дуй мануша» трэбуй тэ ашэнпэ еқэҭанэ пэ вся и вечность.

ПАРУДЕЛЯ КАТИ ПЭ ДЭСАВИ ВРЕМЯ

5. Со паруделя андо брако, кала и мануша линэ тэ мэрэн?

⁵ Лэ Адамоско бэзэх парудя лэ манушэндири жызня. Вонэ линэ тэ мэрэн и кадэлэстар андо брако варисо паруделя. О апостоло Павло ԥэндя, кай кала ек варико анда брако муля, брако будэр нинай. Тоди о христианино, саво ашэляпэ ек, можэт упалэ тэ жэнийпэ (Римлянам 7:1 жы кай 3).

6. Сар па лэ Моисеёско законо дицол, сар о Иегова диқэл по брако?

⁶ Андэ лэ Дэвлэско законо, саво во дя лэ израильтянонэнди, сас пистромэ и пала брако. Андэр лэстэ домэкэласпэ, кай о мануш тэ лэл пэсти най еқа хулая. Кодэва обычаё лэндэ сас инке жы кодэлэстэ, кала о Дэл дя законо. Кодэва законо фэрияс лэ жувлян и лэ бэятонэн. Кала о израильтянино сас жэнато пэ рабыня и инке лэлас пэсти дуйтона хулая, лэсти нащи сас тэ бистрэл ла пэрвона хулая. Во трэбуй сас тэ на ашавэл ла би хамаско и би йдако. Кадяжэ лэсти трэбуй сас тэ дэл лати кода, со трэбуй лэ муршэстар. О Дэл приԥэндя, кай о хулай тэ фэрий ла и тэ диқэл пала латэ (Исход 21:9, 10). Амэнди на трэбуй тэ жувас па лэ Моисеёско законо. Но через кодэва законо амэ полас, сар важ о Иегова куч о брако. Кала амэ гиндосарас пала када, амэ лас тэ диқас по брако кадя жэ, сар о Иегова.

7, 8. а) Кала, о мурш моӷ тэ розвэдийпэ ла хулаяса, сар пистромэ андэ Второзаконие 24:1? б) Сар о Иегова диқэл пэ кода, кала росжанпэ?

⁷ Ай со андо законо ԥэнэнаспэ пала розводо? О Иегова на парудя пэско гиндо пала брако. Но во домэкля, кай и израильтяноря тэ розвэдинпэ пэстирэ хулаянца, сар кати додиқэна, кай и хулаи «андярэл пэс най кадя, сар трэбуй». (Адиносар Второзаконие 24:1b.) Андо законо на сас пистромэ, со када «андярэл пэс най кадя, сар трэбуй». Но и дума на жалас важ варисави мелочь. Ай и дума котэ жалас пала кода, кала и хулаи на столас патив по хулай и пэр лэско ери чи лажаварэлас лэс (Второзаконие 23:14). Андэ кодэя время, кала о Иисусо жувэлас пэ ԥув, бут иудеёря розвэдинаспэ пэстирэ хулаянца важ любо мелочь (Матфея 19:3). Амэнди нащи тэ диқас по брако кадя, сар вонэ.

⁸ О пророко Малахия пистросардя, сар о Дэл диқэл пэ кода, кала росжанпэ. Андэ лэстирэ деса и мурша вушэро розжанаспэ пэстирэ жувлянца, пэ савэ вонэ жэнисайлэ тэрнэнца. Файма, вонэ камэнас тэ жэнинпэ пэ май тэрнэ жувля, савэ на патянас андо Иегова. О Малахия запистросардя лэ Иеговастирэ алава: «Мэ нэнавижу, кала росжанпэ» (Малахия 2:14 жы кай 16). Када сжалпэ кодэлэса, со андэ Библия пистромэ пала пэрво брако: «О мурш... прилипияпэ каринг пэстири хулаи и вонэ ашэна, сар ек тила» (Бытие 2:24). О Иисусо диқэл пэ када кадя жэ, сар и лэско дад. Во ԥэндя: «Кода, со о Дэл стидя, кай тэ авэл ек, о мануш нащи тэ роздилий» (Матфея 19:6).

ЕК, ЧЕРЕЗ СО МОЖНО ТЭ РОЗВЭДИНПЭ

9. Со сыкавэн лэ Иисусостирэ алава, савэ запистромэ андэ Марка 10:11, 12?

⁹ Варико можэт тэ пушэл: «Исин кода, васо о христианино можэт тэ розвэдийпэ и тэ жэнийпэ пэ авэр?» О Иисусо ԥэндя: «Ко розвэдийпэ пэстиря хулаяса и жэнийпэ пэ авэр, кодэва терэл билажавардо бэзэх против и пэрво хулаи. Кадяжэ и жувли, кала розвэдийпэ пэстирэ хуласа и вижал пала аврэстэ, вой терэл билажавардо бэзэх» (Марка 10:11, 12; Луки 16:18). Дицол, кай о Иисусо стол патив по брако и аштярэл када аврэндар. Но исин кацаво, кай о хулай росжалпэ пэстиря хулаяса. Ай лэстири хулаи на сас аврэ муршэса, но во всаек жэнийпэ пэ авэр. Тоди вижал, кадэва хулай терэл билажавардо бэзэх. Кадяжэ када поджал и каринг и жувли, сави росжалпэ пэстирэ хуласа, саво на сас авря жувляса. Кодэла, ко кадя росжанпэ, вонэ всаек ашэнпэ андэ лэ Дэвлэстирэ яқа, сар «ек тила». О Иисусо кадяжэ ԥэндя акэ со. О мурш, саво розвэдийпэ пэстиря хулаяса, сави на сас аврэ муршэса, во терэл кадя, кай и хулаи тэ терэл билажавардо бэзэх. Сар? Андэ кодэла деса, кай и жувли тэ вижувэл, вой жалас пала аврэстэ. Ай када и исин билажавардо бэзэх.

10. Васо и христианоря моӷут тэ розвэдинпэ и тэ жэнинпэ пэ аврэндэ?

¹⁰ Но всаек о Иисусо ԥэндя, кай о хулай и хулаи моӷут тэ розвэдинпэ. Кала? Во пэндя: «Ко розвэдийпэ пэстиря хулаяса най важ кода, кай вой стердя билажавардо бэзэх [по ӷречески порне́йа] и жэнийпэ пэ авэр, кодэва терэл билажавардо бэзэх» (Матфея 19:9). Пала када жэ во ԥэндя андэ пэстири ашунгли дума по плай (Матфея 5:31, 32). И катэ и котэ, о Иисусо ԥэндя пала «билажавардо бэзэх». Андэ када бут со ужал. Када, кала о хулай чи и хулаи сас аврэса, кала битинэн корко пэс, кала най андо брако совэн ек еқэса, кала совэл мурш лэ муршэса чи и жувли ла жувляса, чи мануш жывотнонэнца. Ԥэнаса, кала о жэнато мурш ашэл дошало андэ кацаво билажавардо бэзэх, тоди лэстири хулаи екжэни витидэл, тэ розвэдийпэ лэса чи най. Сар вой розвэдияпэ лэса, тоди о Дэл будэр на диқэла пэр лэндэ, сар по хулай и хулаи, савэ андо брако.

11. Васо о христианино чи и христианка можэт тэ витидэл тэ на розвэдийпэ, дажэ кала пэ када исин право?

¹¹ Шон сама, кай о Иисусо на ԥэндя, кай кала варико андо брако стердя билажавардо бэзэх (порне́йа), лэса трэбуй тэ росжанпэ. И жувли можэт тэ витидэл, кай фэдэр тэ фэрий о брако. Можэт вой идоси любий пэстирэ хулас и важ када камэл тэ простий лэс и тэ ашэлпэ лэса. Инке и хулаи полэл, кай сар вой росжалапэ лэса и на вижала пала аврэстэ, тоди латэ авэла бут ԥаримос. Вижала латэ тэ затерэл, кай тэ прожувэл? Сможэт вой тэ жувэл би кодэлэско, со лати трэбуй лэ муршэстар? Виритярэла вой кода, кай вой екжэни? Со авэла лэ бэятонэнца? Вижала латэ тэ сытярэл лэн па Библия? (1 Коринфянам 7:14). Чаче, о розводо можэт тэ анэн фартэ бут ԥаримос.

12, 13. а) Со тердяпэ андо ери кай о Осия? б) Васо о Осия рисардя ла Гомеря́ цэрэ и сости када сытярэл лэ хулан и лэ хулаян?

¹² Кай май драго тэ полас, сар о Дэл диқэл по брако, диқаса пэ кода, со сас лэ Осияса. О Иегова ԥэндя лэсти: «Лэ пэсти хулая, сави лэла тэ терэл билажавардо бэзэх». Во инке ԥэндя: «Тутэ авэна бэятцэ, савэ аракадёнапэ кодэлэстар, кай вой лэла тэ ԥирэл аврэ муршэндэ». О Осия жэнисайля пэ Гоме́рь, и вой «арақадя лэсти шавэс» (Осия 1:2, 3). Прожыля время и латэ арақаделэпэ инке дуй бэятцэ аврэ муршэндар, щей и шаво. О Осия на диқля пэ кода, кай вой най еқвар ԥирэлас аврэ муршэндэ. Во ласа на розжыляпэ. Ай и Гомерь всаек ужыля лэ Осиястар, саво сас пророко и ашэля рабыня. Но о Осия витиндя ла анда рабство (Осия 3:1, 2). Па лэ Осиястири жызня о Иегова камля тэ сыкавэл, кай во най еқварэс простияс лэ Израилёсти кода, кай вонэ тэлёнас аврэ дэвлэнди. Сости амэн када сытярэл?

¹³ Если о хулай уӷангля, кай лэстири хулаи сас аврэ муршэса, лэсти трэбуй тэ витидэл, тэ ашэлпэ вмести ласа чи най. Кадяжэ, кала и хулаи уӷангля, кай лако хулай сас авря жувляса, вой можэт тэ витидэл тэ розвэдийпэ лэса чи най. О Иисусо ԥэндя, еқа ригатар кай о найдошало христианино исин, васо тэ розвэдийпэ и тэ жэнийпэ. Ай авря ригатар кадэва мануш можэт тэ простий. И андэ када нинай нисо вэрыто англа Дэл. О Осия рисардя ла Гомеря́ цэрэ, и ԥэндя лати, кай вой будэр кадя тэ на терэл. Кала вой авеля цэрэ, дэсави время о Осия на совэлас ласа, сар хулаяса. Прожыля время и во упалэ ля ласа тэ совэл. Кадяжэ о Иегова приля пэстирэ народос, саво най еқвар ашавэлас лэс, кай вонэ упалэ лэс тэ полэн (Осия 1:11; 3:3 жы кай 5). Сости када сытярэл лэ хулан и лэ хулаян? Ԥэнаса, варико андар лэндэ тердя билажавардо бэзэх и кодэва христианино упалэ лэл тэ совэл пэстиря хулаяса чи хуласа. Када сыкавэл, кай анда дуй ек простисардя аврэс (1 Коринфянам 7:3, 5). После када хоть лэстэ, хоть латэ нинай библейско право тэ розвэдинпэ. Акана лэнди дуйжэнэнди трэбуй тэ поможын ек еқэсти тэ цэнин о брако кадя, сар о Дэл.

СО ТЭ ТЕРАС, КАЛА АНДО БРАКО ԤАРИМОС?

14. Со можэт тэ авэл андо брако, сар пистромэ андэ 1 Коринфянам 7:10, 11?

¹⁴ Всаворэ христианоря трэбуй тэ стон патив по брако, сар о Иегова и о Иисусо. Но важ кода кай амэ найсовершэни, дэкасти када фартэ ԥарэс (Римлянам 7:18 жы кай 23). Важ када амэ на трэбуй тэ дас наздив, кай и андэ пэрво вико кай дэсавэ христианоря андо брако кадяжэ сас ԥаримос. О Павло пистрояс, кай «и хулаи нащи тэ ужал пэстирэ хуластар». Но дэкала кадя и терэласпэ. (Адиносар 1 Коринфянам 7:10, 11c.)

15, 16. а) Со трэбуй тэ терэн о хулай чи хулаи, если андо брако исин ԥаримос и васо? б) Со тэ терэл о христианино, кала андо брако исин ԥаримос, ай ек андар лэндэ на служый лэ Иеговасти?

¹⁵ О Павло на ԥэндя, васо и хулаи можэт тэ ужал пэстирэ хуластар и тэ жувэл лэстар отдельно, хоть о хулай и на тердя билажавардо бэзэх. Ай тэ тердоп во билажавардо бэзэх, латэ авелоп право тэ розвэдийпэ лэса и тэ жал пала аврэстэ. Упалэ о Павло пистросардя, кай и хулаи, сави ужыля пэстирэ хуластар, трэбуй тэ на жал пала аврэстэ. Инке во ԥэндя, кай вой тэ ашэлпэ екжэни чи тэ помирийпэ пэстирэ хуласа, важ кода кай андэ лэ Дэвлэстирэ яқа, вонэ всаек, сар хулай и хулаи. Кадяжэ о Павло ԥэндя, дажэ кала кай о хулай и хулаи исин ԥаримос андо брако, но нико андар лэндэ всаек на терэл билажавардо бэзэх, лэнди трэбуй тэ поладин машкар пэстэ. Кадяжэ вонэ моӷут тэ бандён пала помощь кай и старейшыноря, савэ дэна лэнди па Библия советоря и на залэна никастири риг.

¹⁶ Инке можэт тэ авэл ԥарэс кодэлэстар, кай о хулай чи хулаи на жувэл па библейско законо. Тоди можэт о христианино тэ жувэл отдельно? Сар ужэ адиносардям андэ Библия, тэ росжанпэ можно кати тоди, кала ек варико андар лэндэ тердя билажавардо бэзэх. Андэ Библия на ԥэнэнпэ, кала вонэ моӷут тэ жувэн отдельно ек еқэстар. Но о Павло пистросардя: «И жувли, савятэ о хулай на патял ласа андо ек Дэл, но камэл тэ жувэл ласа, мэк на ашавэл лэ хулас» (1 Коринфянам 7:12, 13). Кадэва совето поджал и андэ амари время.

17, 18. Васо дэсавэ христианоря на ужантар ек еқэстар, хоть и лэндэ андо брако баро ԥаримос?

¹⁷ Дэкала о хулай, саво на патял ла хулаяса андо ек Дэл, андярэл пэс кадя, кай пар лэстэ дицол, кай во на камэл тэ жувэл ласа. Файма, во ла фартэ марэл. Во кадя фартэ ла марэл, кай вой полэл, кай можэт тэ хасарэл пэско зор и дажэ во можэт тэ умарэл ла. Чи, файма, во отԥэндёл тэ дэл ловэ, кай тэ прожувэл о ери. Кадяжэ во терэл вся, кай вой тэ на служый лэ Дэвлэсти. Кала во кадя терэл, када сыкавэл, кай во на камэл ласа тэ жувэл (хоть во и на ԥэнэн лати пала када ворта андэ яқа). Тоди вой полэл, кай лати фэдэр тэ жувэл отдельно лэстар. Ай дэсавэ христианки, кастэ кацаво жэ терэлпэ андо ери, ашэнпэ пэстирэ хуласа и терэн вся, кай тэ поладин лэса. Васо?

¹⁸ Кала о хулай и хулаи витидэ тэ жувэн отдельно, вонэ всаек ашэнпэ хулай и хулаи. Кажнонэстэ лэндэ авэла ԥаримос, пала саво ԥэнэнаспэ май упрэ андэ кадэя статья. О апостоло Павло ԥэндя, васо инке трэбуй тэ фэрин о брако: «О хулай, саво на патял андо Дэл ашэл свынто через и хулаи, ай и хулаи, сави на патял андо Дэл, ашэл свынто через о ԥрал. Тоди тумарэ бэятцэ авелоп найвужэ англа Дэл, ай акана вонэ свынти» (1 Коринфянам 7:14). Амэ ӷанас, кай исин еря, кай о хулай чи хулаи на патян андо Иегова. Но и христианоря, савэ на парашэн тэ кандэн лэ Дэвлэс, витидэн всаек тэ на ужантар кодэлэстар, ко на патял лэса андо ек Дэл дажэ тоди, кала андо ери фартэ баро ԥаримос. Прожыля и время и лэндирэ хулая ашэлэ лэ Иеговастирэ свидетеля. Кадэла христианоря фартэ лошалэ, кай виритярдэ кацаво ԥаримос и на ужылэтар ек еқэстар. (Адиносар 1 Коринфянам 7:16d; 1 Петра 3:1, 2.)

19. Васо машкар христианоря бут бахталэ еря?

¹⁹ О Иисусо ԥэндя пала кода, васо можно тэ розвэдинпэ. Ай о апостоло Павло ԥэндя пала кода, кала и христианоря, о хулай чи и хулаи, моӷут тэ жувэн отдельно ек аврэстар. Анда када дицол, кай и о Иисусо и о Павло камэнас, кай лэ Дэвлэстирэ служытеля тэ стон патив по брако. Адес андэ христиански собрании па вся миро бут бахталэ еря. Андэр лэндэ и хула́я цэнин пэстирэн хулая́н и любин лэн, ай и хулая́ полэн лэн и стон пэр лэндэ патив. Можэт тумэндэ андэ собрания кадяжэ исин кацавэ еря. Кадэлэса вонэ всаворэ сыкавэн, кай по брако вижал тэ стон патив. Амэ лошалэ, кай милионоря еря пэстиря жызняса сыкавэн, кай лэ Иеговастирэ алава чачунэ: «Важ када о мурш ашавэла пэстирэ дадэс и ла да и прилипияпэ каринг пэстири хулаи и вонэ ашэна, сар ек тила» (Эфесянам 5:31, 33).