И любовь, сави исин амэндэ, поможый тэ виритярас, кала амэн вэрыцын

1. Васо на трэбуй тэ удивисавас, кай и мануша вэрыцын амэн, сар ԥэнэнпэ андэ Матфея 24:9?

О ИЕГОВА кадя создал лэ манушэн, кай вонэ тэ любин ек еқэс. Важ када, кала амэн варико вэрыцый, амэнди кадэлэстар ԥарэс по ди и страшно. И ԥэй, савя ақарэн Малинаb ԥэнэн, кай лати дэй ля тэ вэрыцый ла, важ кода кай вой закамля тэ авэл лэ Иеговаско служытелё. Латэ сас по ди, кай вой на трэбуй пэстиря дати, и вой ля тэ гиндой, кай андэр латэ нинай нисо лашо. Тоди ла ԥьяти, сас кати 14 бэрш. Ай о ԥрал Данил росԥэнэн, кай и халавдэ марэнас лэс, ԥэнэнас пэр лэстэ найлашэ алава и камэнас тэ умарэн лэс кати важ кода, кай во лэ Иеговаско свидетелё. Лэсти сас кадэлэстар страшно и фартэ ԥарэс по ди. Но кала и мануша андярэн пэс кадя, амэ на трэбуй тэ удивисавас важ кода, кай пала када ԥэндясас о Иисусо. (Адиносар Матфея 24:9.)

2, 3. Васо и мануша амэн вэрыцын?

² И мануша вэрыцын кодэлэн, ко служый лэ Иеговасти. Васо? Важ кода кай о Иисусо ԥэндя, кай «тумэ най сар всаворэ миро» (Иоан. 15:17—19). Амэ стас патив пэ мануша андо правительство, но амэ на отдас и слава кодэлэсти, со исин андэ страна, например, о флаӷо или о гимно. Амэ отдас вся и слава кати лэ Иеговасти и андэ вся кандас кати лэс. И амэ ӷанас и патяс, кай тэ правий лэ манушэнца можэт кати о Дэл. Ай о Сатана и кодэла, ко жан пала лэстэ, терэн вся, кай тэ сыкавэн, кай о Дэл нэ можэт драго тэ правий лэ манушэнца (Быт. 3:1—5, 15). Но амэ всаек на парашас тэ росԥэнас, кай кати лэ Дэвлэско Царство анэна лашимос лэ манушэнди и через пэско Царство о Дэл улэла всаворэн, ко жал против лэстэ (Дан. 2:44; Отк. 19:19—21). Када анэна лашимос лэ манушэнди, савэндэ ковло ди. Ай лэ манушэнди, савэ на кандэн лэ Дэвлэс, када анэна бида (Пс. 37:10, 11).

³ Пар мэндэ кадяжэ шон вэрыцыя, важ кода кай амэ старысавас тэ жувас кадя, сар пистромэ андэ Библия. И совсем на терас кадя, сар терэн и мануша андэ кадэя люма. И мануша ԥэнэн, кай кала авэр терэн билажавардимос андэ када нинай нисо вэрыто. Но важ о Дэл када гряца, и када дицолас, кала во умардя всаворэ билажавардэ манушэн, савэ жувэнас андо форо Содомо и Гоморра (Иуды 7). И мануша андэ кадэя люма вэрыцын и асан амэндар, важ кода кай амэ на терас кадя сар вонэ. Амэ вэрыцысарас о билажавардимос, каринг саво вонэ присытелэ и жувас кати па лэ Дэвлэско законо! (1 Пет. 4:3, 4).

4. Со поможыя амэнди, кала и мануша амэн вэрыцын?

⁴ Если амэ ласа тэ патяс лэ Иеговасти, кай во амэнди поможыя, када кабута, лас пэса о баро щито, через саво амэ можэм тэ одмарас «всаворэ лэ Сатанастирэ стрелы ягаса» (Эф. 6:16). И када поможыя амэнди тэ на парашас тэ кандас лэ Иеговас, хоть амэн вэрыцын и ԥэнэн найлашэ алава. Но просто тэ патяс лэ Иеговасти, када на хутила. Инке важно тэ любисарас лэс. Кала любисарас, амэ сможэм тэ виритярас любо ԥаримос (1 Кор. 13:4—7, 13). Акана подам дума, сар и любовь каринг о Иегова, каринг амарэ ԥрала и ԥэя андэ собрания и дажэ каринг и вороӷоря, поможыя тэ на парашас тэ кандас лэ Иеговас, дажэ если амэн вэрыцын.

ЛЮБИСАРАС ЛЭ ИЕГОВАС

5. Со поможысардя лэ Иисусости тэ виритярэл о ԥаримос?

⁵ Англа пэстири смэрть о Иисусо ԥэндя пэстирэ учениконэнди: «Мэ любисарав лэ Дадэс, мэ терав кадя, сар приԥэндя манди о Дад» (Иоан. 14:31). Кода кай о Иисусо фартэ любияс пэстирэ Дадэс, поможысардя лэсти тэ на парашэл тэ кандэл лэс дажэ андо ԥаримос. Если и амэ ласа тэ любисарас лэ Иеговас, када поможыя и амэнди и придэла зор.

6. Сар лэ Иеговастирэ служытеля андярэн пэс, кала о миро лэн вэрыцый, сар запистромэ андэ Римлянам 5:3—5?

⁶ Лэ Иеговастирэ служытеля любинас лэс, и када поможыяс лэнди тэ виритярэн о ԥаримос, кала лэн вэрыцынас. Андо пэрво вико о само баро сындо андэ Иудея приԥэндя, кай и апостолоря тэ парашэн тэ росԥэнэн пала Дэл. И кай вонэ любинас лэ Иеговас, поможысардя лэнди смило тэ ԥэнэн, кай трэбуй тэ кандэн лэ Дэвлэс, сар правителёс, ай най лэ манушэн (Деян. 5:29; 1 Иоан. 5:3). Кацави бари любовь поможый и адес лэ ԥралэнди и лэ ԥэянди и придэл зор. Амарэ ԥрала и ԥэя на парашэн тэ кандэл лэ Дэвлэс дажэ андэ кодэла страны, кай и правителя обжанпэ лэнца фартэ жэстоко. И всаворэ амэ на умэкас и вас, кала амэн вэрыцын, ай наоборот радосавас (Деян. 5:41; адиносар Римлянам 5:3—5).

7. Сар трэбуй тэ андярас пэс, кала варико анда ери на дэл тэ служысарас лэ Иеговасти?

⁷ Но со май ԥарэс важ лэ Дэвлэско служытелё, када кала против лэстэ жал лэско ери. Кала амэ лас тэ уӷанас о чачимос пала Дэл, варико анда ери можэт тэ гиндой, кай амэн обхохавэн, или кай амэ диляйлям. (Диқэн Марка 3:21.) Вонэ дажэ моӷут фартэ тэ холявэн пар мэндэ. Но на трэбуй тэ удивисавас, важ кода кай о Иисусо ԥэндясас, кай дажэ «лэ манушэско вороӷо ашэла лэско ери» (Матф. 10:36). И чаче, нэ важно, сар андярэл пэс о родо, амэ на гиндосарас, кай вонэ амарэ вороӷоря. Наоборот, со май фартэ амэ ласа тэ любисарас лэ Иеговас, со май фартэ ласа тэ любисарас аврэн (Матф. 22:37—39). Но амэнди на трэбуй тэ жас против лэ Дэвлэстирэ законоря и принцыпоря, кати важ кода, кай тэ уӷодисарас аврэнди.

8, 9. Со поможысардя ла ԥьяти тэ на парашэл тэ служый лэ Иеговасти андо ԥаримос?

⁸ И ԥэй Малина, пала сави амэ ужэ дямас дума, ԥэнэн, кай спэрва вонэ вмести ла даса линэ тэ изучают и Библия. Прожыля бэрш епашэса, и Малина закамля тэ ԥирэл пэ собрании. Но и дэй ля тэ диқэл пэ када совсем па аврятэ важ кода, кай вой ля тэ дэл дума лэ отступниконэнца. Вой патялас андэ кодэва хохаимос, саво вонэ ԥэнэнас, и важ када андэ дума ла Малинаса, вой ԥэнэнас алава, савэ ԥэнэнас и отступникоря и дошалярэлас ла. Кадяжэ вой ԥэнэнас пэр латэ найлашэ алава, цырдэлас ла балэндар, тасавэлас ла и вишолас амари литература. Но кадэя ԥэй на диқля ни пэр со, и кала лати ашэля 15 бэрш, вой всаек болделя. Латири дэй терэлас вся, кай вой тэ на служый лэ Иеговасти. Важ када и дэй отдя ла андо интэрнато, андэ саво сас наркоманки и бандитки. И Малина ԥэнэн, кай со май ԥарэс лати сас кодэлэстар, кай када вся терэлас латири дэй, сави трэбуй сас тэ заботийпэ и тэ любий ла. Но и ԥэй на диқля пэ кода, кай ла фартэ вэрыцыяс латири дэй, вой всаек на парашэля тэ служый лэ Иеговасти.

⁹ Но со поможысардя ла ԥьяти тэ виритярэл вся? Вой ԥэнэн, кай андэ кодэя время вой ужэ проадиносардя вся и Библия. Кадяжэ вой ӷанэнас, кай виарақля о чачимос пала Дэл и кай о Иегова никала на ашавэла ла. Вой най еқвар мангэласпэ лэсти и ӷанэнас, кай во ашунэл латирэ молитвы. Ай кала вой сас андо интэрнато, каринг латэ авэлас ек ԥэй и ақарэлас ла пэстэ цэрэ тэ побэшэн, и вмести тэ поизучают и Библия. Андэ кодэя время ла фартэ подритярэнас и ԥрала и ԥэя. Вонэ ашэлэ важ латэ, сар ери и вой поля, кай о Иегова май зорало, чем латирэ вороӷоря, ко бы вонэ тэ на авэн.

10. Андэр со амэ точно патяс?

¹⁰ О апостоло Павло пистросардя, кай нико и нисо на стерэла кадя, кай о Дэл тэ парашэл амэн тэ любий (Рим. 8:38, 39). Да, дэкала амэнди ԥарэс, но о Иегова вся и время паша амэндэ, кай тэ поможый и тэ дэл зор. И кода, со сас андэ жызня кай и ԥэй Малина, сыкавэл, кай о Иегова поможый амэнди через и ԥрала и ԥэя андэ собрания.

ЛЮБИСАРАС ЛЭ ԤРАЛЭН И ЛЭ ԤЭЯН

11. Сар и любовь, пала сави пистромэ андэ Иоанна 15:12, 13, поможысардя лэ Иисусостирэ учениконэнди? Росԥэнэн о примеро.

¹¹ Англа пэстири смэрть о Иисусо упалэ ԥэндя пэстирэ учениконэнди, пэ скати дэ важно тэ любин ек еқэс. (Адиносар Иоанна 15:12, 13.) Во ӷанэнас, кай если вонэ лэна тэ любин ек еқэс май фартэ чем пэс, када поможыя лэнди тэ авэн, сар ек ери и тэ виритярэн, кай лэн вэрыцын. Подаса дума пала христианоря, савэ жувэнас андо форо Фессалоники. Сар кати андэ кодэва форо стидэ собрания, лэнди на дэнас тэ служын лэ Дэвлэсти спокойно. Но всаек вонэ на парашэлэ тэ патян лэ Дэвлэсти, тэ любин ек еқэс и тэ виритярэн о ԥаримос (1 Фес. 1:3, 6, 7). О Павло мангля лэн, кай вонэ инке май фартэ тэ сыкавэн пэстири любовь (1 Фес. 4:9, 10). Например, тэ дэн зор кодэлэнди, ко сас слабо (1 Фес. 5:14). Вонэ приашунделэ каринг о Павло и терэнас кадя, сар во ԥэндя. Амэ када ӷанас анда лэско дуйто письмо, саво во пистросардясас варикай через бэршэстэ. О Павло ԥэндя, кай дицол, кай вонэ любин и заботинпэ ек пала еқэстэ (2 Фес. 1:3—5). Именно када и поможысардя лэнди, кай вонэ тэ виритярэн о ԥаримос и тэ на парашэн тэ служын лэ Иеговасти.

12. Сар и ԥрала и ԥэя сыкадэ пэстири любовь, кала андэ ек страна жалас и война?

¹² О ԥрал Данил росԥэндя, со лэсти прижыляпэ инке тэ пэрэжувэл. Андэ лэнго форо заляпэ война. Но во и лэстири хулаи на парашэлэ тэ ԥирэн пэ собрании, тэ росԥэнэн пала Дэл аврэнди и тэ поможын лэ ԥралэнди и лэ ԥэянди хамаса. Еқвар лэндэ по цэр динэ и халавдэ лэ мардянца. Вонэ камэнас, кай о ԥрал тэ отԥэндёл лэ Иеговастар. Но во на ля када тэ терэл. Тоди вонэ лэс мардэ и ԥэндэ, кай застрелина лэс. И кай тэ пэрэдаравэн лэ ԥралэс, вонэ спецыально стрелисардэ мимо. Ай кала и халавдэ линэ тэ ужан, вонэ ԥэндэ, кай авэна и асанапэ лэстиря хулаятар. Пала када уӷанглэ и ԥрала и ԥэя андэ собрания. Тоди вонэ май ӥто стодэ лэн по поездо и одбишалдэ андэ авэр форо. О Данил ԥэнэн, кай никала на бистрэла, сар и ԥрала и ԥэя сыкадэ пэ дила пэстири любовь каринг лэндэ! И андо форо, андэ саво вонэ пэрэлаглэ, и ԥрала и ԥэя сразу авелэ каринг лэндэ, андэ лэнди хамос и поможысардэ тэ виарақэн бути и цэр. Прожыля время, и вонэ ужэ екжэнэ поможынас и прилэнас пэстэ цэрэ аврэ ԥралэн и ԥэян, савэ занашлэ котар, кай жалас и война. Када вся сыкавэл, кай и любовь сави исин машкар и ԥрала и ԥэя, поможый тэ на парашэн тэ кандэн лэ Иеговас, хоть лэн и вэрыцын авэр.

ЛЮБИСАРАС ЛЭ ВОРОӶОНЭН

13. Сар о свынто духо поможый амэнди тэ на парашас тэ кандас лэ Дэвлэс?

¹³ О Иисусо ԥэндясас пэстирэ учениконэнди: «На парашэн тэ любин пэстирэ вороӷонэн» (Матфея 5:44, 45). Канешно, када найвушэро тэ терас. Но лэ Дэвлэско свынто духо амэнди можэт тэ поможый андэ када. Кадяжэ о Дэл амэнди дэл пэско свынто духо, кай амэ тэ на парашас тэ любисарас, тэ на грабисавас тэ холявас, тэ авас добри, кай амэндэ тэ авэл ковло ди и тэ ритярас пэс андэ вас (Гал. 5:22, 23). И если амэ пэс кадя андярас, тоди амэ на парашаса тэ кандас лэ Дэвлэс, дажэ если амэн вэрыцын и вороӷоря. Важ када кодэла, ко варикала вэрыцыяс амэн, акана ашэлэ амарэ ԥрала и ԥэя. Кала амэнди ԥарэс тэ любисарас пэстирэ вороӷонэн, трэбуй тэ мангаспэ пала свынто духо (Луки 11:13). На бистрэн, всегда авэла фэдэр, если тумэ витидэна тэ кандэн лэ Дэвлэс (Прит. 3:5—7).

14, 15. Сар и алава анда Римлянам 12:17—21 поможысардэ ла ԥьяти тэ на парашэл тэ любий пэстирэ хулас, хоть лати сас ԥарэс?

¹⁴ И ԥэй Ясмин, сави жувэл по Ближнё Востоко, росԥэнэн, кай кала вой ашэля лэ Иеговаско свидетелё, лако хулай гиндояс, кай ла котэ обхохавэн, и терэлас вся, кай вой тэ на служый лэ Иеговасти. Во ԥэнэнас пэр латэ найлашэ алава, терэлас вся, кай лако родо пэр латэ тэ тасавэл. И камэлас тэ пэрэдаравэл ла через о рашай, саво сас анда лэндири қандири, и через о драбатяримари. Во дошалярэлас ла, кай вой камэл тэ розмарэл о ери. Ай еқвар во дажэ авеля пэ собрания и ля тэ ԥэнэн найлашэ алава пэ ԥрала. Во терэлас най еқвар, кай вой тэ ровэл.

¹⁵ И ԥрала и ԥэя анда собрания ӷанэнас, сави жызня сас кай и ԥэй Ясмин, и вонэ ла подритярэнас. Ай и старейшыноря ԥэнэнас, кай вой тэ терэл кадя, сар запистромэ андэ Римлянам 12:17—21 (адиносар). И Ясмин ԥэнэн, кай лати сас фартэ ԥарэс тэ терэл кадя. Но вой мангэлас помощь кай о Иегова и терэлас вся, со па лако зор. Например, кала лако хулай нарошно пэрэшолас пэ кухня, вой жалас и поприлэлас. Кала во ԥэнэнас пэр латэ найлашэ алава, вой всаек сас спокойно и дэлас дума лэса ковлэс. Ай кала во занасвайля, вой диқэлас пала лэстэ и заботияспэ.

16, 17. Сости амэ можэм тэ сытювас кай и ԥэй Ясмин?

¹⁶ Кода кай и Ясмин на парашэля тэ любий пэстирэ хулас, андя лати бут лашимос. Вой ԥэнэн, кай лако хулай ля лати май бут тэ патял, важ кода вой вся и время ԥэнэн кати о чачимос. Во ля тэ стол пэр латэ патив и ля тэ ашунэл, со вой росԥэнэн пала Иегова. Во поля, кай андо ери тэ авэл мирно и драго, трэбуй и во варисо тэ терэл. Вой лошали кай лако ери кадя паруделяпэ. Акана лэндэ мирно и спокойно. И лако хулай дажэ екжэно ля лати тэ ԥэнэн, кай вой тэ ԥирэл пэ собрания. И ԥэй фартэ надеийпэ, кай во ашэла лэ Иеговаско служытелё, и вонэ авэна вмести лэсти тэ служын.

¹⁷ Анда ла ԥьятирэ алава дицол, кай кала любин, можно вся тэ виритярэн и вся тэ пэрэандярэн (1 Кор. 13:4, 7). Кала амэн вэрыцын, кадэлэстар можэт фартэ тэ дуқал оди. Но кала амэ любисарас кодэлэн, ко амэн вэрыцый, кадя лэнго ди можэт тэ ашэл май ковло. Кала амэ кадя терас о Иегова лошавэл. Но дажэ если и вороӷоря на парашэн амэн тэ вэрыцын, амэ всаек можэм тэ авас бахталэ.

БАХТАЛЭ ТУМЭ, КАЛА О МИРО ТУМЭН ВЭРЫЦЫЙ

18. Васо амэ можэм тэ ашаспэ бахталэ, кала амэн вэрыцын?

¹⁸ О Иисусо ԥэндя: «Бахталэ тумэ, кала... о миро тумэн вэрыцый» (Луки 6:22). Канешно, амэ на камас, кай о миро амэн тэ вэрыцый и кадэлэстар амэнди фартэ ԥарэс. Но васо амэ всаек бахталэ? Важ кода кай лэ Иеговасти чалёл, кала амэ на парашас тэ служысарас лэсти, дажэ кала исин ԥаримос (1 Пет. 4:13, 14). Кадя амэ сыкавас пэ скати дэ фартэ патяс лэсти (1 Пет. 1:7). И кала амэ вся када виритяраса, тоди о Иегова амэн блаӷословия и дэла вечно жызня (Рим. 2:6, 7).

19. Васо посли кода, сар лэ апостолонэн мардэ, вонэ всаек на парашэнас тэ лошавэн?

¹⁹ Посли кода, сар о Иисусо рисайля по нэбо, лэстирэ апостолоря полинэ, пэ скати дэ чачунэ сас лэстирэ алава. Хоть лэн мардэ, ԥэндэ тэ на росԥэнэн пала Дэл, вонэ всаек сас лошалэ. Васо? Важ кода кай лэн мардэ важ лэ Иисусоско алав (Деян. 5:40—42). Лэндири любовь каринг о Иисусо сас май бари, чем и дар англа мануша. И када вонэ сыкадэ пэ дила. Вонэ на парашэлэ тэ сытярэн и тэ росԥэнэн пала Дэл. Адес бут ԥрала и ԥэя тожэ на парашэн тэ служын лэ Иеговасти, хоть лэндэ и бут ԥаримос андэ жызня. Вонэ ӷанэн, кай о Дэл на забистрэла лэндири любовь и, со вонэ терэн важ лэстэ (Евр. 6:10).

20. Пала со амэ подаса дума андэ авэр статья?

²⁰ Пока кадэла люмаса правий о Сатана, о миро лэла амэн тэ вэрыцый (Иоан. 15:19). Но амэнди на трэбуй тэ дарас. Андэ авэр статья амэ подаса дума пала кода, кай о Иегова подритярэл и фэрий пэстирэ служытелёнэн, савэ на парашэн лэс тэ кандэн (2 Фес. 3:3). Ай амэнди трэбуй тэ на парашас тэ любисарас лэ Иеговас, лэ ԥралэн и лэ ԥэян анда собрания и дажэ амарэ вороӷонэн. Кадя амэндэ вижала тэ авас, сар ек ери, тэ на парашас тэ патяс лэ Иеговасти и тэ слависарас лэс. Тоди амэ сыкаваса, кай и любовь улэл и холи.