Сости амэ сытювас кай и назареёря?

1. Со камэн тэ терэн важ о Иегова лэстирэ служытеля?

КУЧ тути тири дружба лэ Иеговаса? Амэ уверени, кай да! И бутэндэ кацаво андо ди. Андэ всаворэ викоря сас мануша, савэ фартэ любинас лэ Иеговас (Пс. 104:33, 34). Вонэ бут состар отԥэндёнас важ лэстэ. Кадя терэнас и назареёря андо дэлмутно Израилё. Со када за мануша? И сости амэ можэм лэндар тэ сытювас?

2. а) Ко када и назареёря? (Числа 6:1, 2). б) Васо дэсавэ израильтяноря дэнас алав, кай тэ авэн назареёря?

² О алав «назареё» пэ еврейско шыб сыкавэл «отдилимэ» или «отдино». Кадэва алав драго поджал каринг и израильтяноря, савэ анда вся оди, по особому служынас лэ Иеговасти, и бут состар отԥэндёнас. Па лэ Маисеёско законо о мурш чи жувли моӷли тэ дэн лэ Иеговасти алав, кай лэна варисави время тэ жувэн сар назареёряa. (Проадинон Числа 6:1, 2.) Кадэва алав или бари обещяния сыкавэлас, кай о мануш лэл пэр пэстэ обязаности, савэ на сас кай авэр израильтяноря. Васо тоди варико камэлас тэ авэл назареё? И израильтяноря терэнас када через и бари любовь каринг о Иегова и блаӷодарность пала лэстирэ блаӷословении (Втор. 6:5; 16:17).

3. Соса лэ Дэвлэстирэ служытеля андэ амари время шонпэ пэ назареёря?

³ Кала лэ Маисеёско законо паруделя пэ «лэ Христоско законо», и мануша будэр нэ моӷли тэ авэн назареёря (Гал. 6:2; Рим. 10:4). Но адес лэ Иеговастирэ служытеля, кадя жэ сар и назареёря, фартэ камэн тэ служын лэсти всаворэ́ одеса, жызняса, годяса и зорэса (Мар. 12:30). Амэ сыкавас када, кала дас алав тэ жувас важ о Иегова. Амари обещяния сыкавэл, кай амэ ӷотови тэ терас кода, со во камэл и варисостар тэ отԥэндювас. Давайте май бут уӷанаса пала назареёря. Амэ сытюваса лэндар, сар тэ жувас кадя, сар дям алав лэ Иеговасти (Матф. 16:24)b. Давайте роздиқаса дэсавэ маменторя.

АВЭН ӶОТОВИ ВАРИСОСТАР ТЭ ОТԤЭНДЁН

4. Сар ԥэнэнпэ андэ Числа 6:3, 4, состар отԥэндёнас и назареёря?

⁴ Проадинон Числа 6:3, 4. И назареёря трэбуй сас тэ ритярдён май дур лэ пимастар и всаворэстар, со терэн анда винаӷрадо. Кадяжэ вонэ нащи сас тэ хан о винаӷрадо и о изюмо. Авэр мануша моӷли када тэ хан и тэ пэн, и андэ када на сас варисо нэправильно. Важ кода кай о вино — када подарко лэ Иеговастар. Андэ Библия пала вино ԥэнэнпэ, кай лэстар «радуийпэ лэ манушэско ди» (Пс. 104:14, 15). Хоть кадэва хамос и пимос поможыяс тэ радуинпэ ла жызняти, и назареёря отԥэндёнас кадэлэстар екжэнэc.

5. Пэр со жылэ важ о Иегова о Мадиано и Марсэла и васо?

⁵ Амэ, сар и назареёря андэ дэлмутни время, кадяжэ бут состар отԥэндювас, кай май бут тэ служысарас лэ Иеговасти. Роздиқам, со сас андэ жызня кай о Мадиа́но и Марсе́лаd. Кадэва ери жувэлас драго и ни андэр со пэсти на отԥэнэнас. Кай о Мадиано сас ловали бути. Вонэ жувэнас андэ пэстири шукарни и удобно квартира. Но лэнди камэласпэ тэ терэн варисо май бут важ о Иегова. Важ када вонэ закамлэ тэ парувэн пэстири жызня. Акэ со вонэ росԥэнэн: «Амэ лям май набут тэ тратисарас и ловэ, пэрэлаглям андэ квартира, сави май цынёни и битиндям и машына». Обязани сас о Мадиано и Марсела кадя тэ терэн? Най. Вонэ отԥэнделэ кадэлэстар, кай май бут тэ служын лэ Иеговасти. Кала вонэ прилинэ кацави ришэния, вонэ полинэ, кай ашэлэ па чачимастэ лошалэ и бахталэ.

6. Васо и христианоря ӷотови варисостар тэ отԥэндён? (Диқэн кадяжэ и картинка.)

⁶ Адес и христианоря лошалэ тэ жан пэ жэртвы, кай май бут время тэ отдэн важ лэ Дэвлэстири дила (1 Кор. 9:3—6). О Иегова на мангэл када амэндар. Кадяжэ нащи тэ ԥэнас, кай кода, состар амэ отԥэндювас, — када варисо найлашо. Например, дэсавэ отԥэнделэ, кай лэндэ тэ авэл бути, пала сави вонэ мечтали или тэ авэл пэско цэр. Ай дэсавэ дажэ ӷотови тэ отԥэндён, кай лэндэ тэ авэл домашнё жывотно. Бут христианоря дэсави время на жан миростэ или на жэнинпэ. Ай варико витидя, кай лэндэ пока тэ на авэн бэяцэ. Авэр ԥрала и ԥэя пэрэлаглэ интя, кай трэбуй май бут вазвещятеля, хоть лэнди и прижыляпэ тэ авэн май дур лэ чачендар. Амэ ӷотови тэ жас пэ кацавэ жэртвы, важ кода кай камас тэ отдас лэ Иеговасти со май лашо. Ав уверено: о Иегова цэнуий вся, состар ту отԥэндёс, кай тэ служыс лэсти. Важ лэстэ куч тирэ жэртвы — барэ и найбарэ (Евр. 6:10).

АВ ӶОТОВО ТЭ АВЭС НАЙ КАЦАВО, САР АВЭР

7. Саво ԥаримос моӷ тэ авэл кай о назареё? (Числа 6:5). (Диқэн кадяжэ и картинка.)

⁷ Проадинон Числа 6:5. И назареёря дэнас алав тэ на подшынэн пэстирэ бал. Кадя вонэ сыкавэнас, кай андэ вся кандэн лэ Иеговас. Если о израильтянино сас назареё ужэ най ек бэрш, лэстирэ бал фартэ одбарёнас и када дицолас всаворэнди. Если авэр мануша подритярэнас лэс, лэсти сас май вушэро тэ зритярэл пэско алав. Жалко, но андэ библейско время сас и мануша, савэ на стонас патив пэ назареёря. Кала жувэлас о Амосо, саво пэрэдэлас лэ Дэвлэстирэ алава, андо Израилё сас мануша, савэ оджылэ лэ Иеговастар. Наверно, вонэ камэнас, кай и назареёря тэ на жувэн кадя, сар динэ алав, и важ када дэнас лэнди тэ пэн о вино (Ам. 2:12). Дэкала и назареёря трэбуй сас тэ авэн фартэ смили, кай тэ зритярэн пэстири бари обещяния и тэ на авэн кацавэ, сар авэр.

8. Сар тумэн подритярдя кода, со сас андэ жызня кай о тэрно ԥрал Беньямино?

⁸ О Иегова поможыя амэнди тэ на авас кацавэ, сар авэр, и тэ на дарас кадэлэстар, дажэ если амэ лажавнэ. Подам дума пала Бе́ньямино анда Норвегия, савэсти 10 бэрш. Во лэ Иеговаско свидетелё. Лэндэ андэ школа стидэпэ тэ сыкавэн, кай подритярэн и Украина. И бэяцэ трэбуй сас тэ дилабэн и тэ авэн утидэ, сар о украинско флаго. Кай тэ на терэл када, о Беньямино ришыл тэ на пашол кордэ, кай вся када прожалас. Но и учительница шутя сама пэ када и зацыписайля: «Ав кардэ и дилабэ вмести амэнца. Амэ всаворэ тут аштярас!» О Беньямино смило поджыля каринг латэ и ԥэндя: «Мэ на залав никастири риг андэ политика. Бут лэ Иеговастирэ свидетеля дажэ бэшэн андо баруно, важ кода кай отԥэндён тэ жан пэ война». И учительница соӷласисайля и мэкля, кай во андэ када тэ на участвует. Но и однокласникоря тожэ линэ тэ пушэн, васо во на камэл тэ дилабэл лэнца. О Беньямино кадя запэрэжывал, кай чуть на заровдя. И всаек, во смило англа вся о класо инке еқвар ԥэндя кадэла жэ алава, савэ ԥэндя ла учительницати. Посли када во росԥэндя пэстирэ родителёнэнди, кай о Иегова лэс подритярэлас и важ када лэстэ вижыля тэ зашолпэ пала кода, андэр со патял.

9. Сар амэ можэм тэ радосарас лэ Иеговаско ди?

⁹ Амэ витидям тэ терас кода, со камэл о Иегова, и важ када на шаспэ пэ авэр мануша. Амэнди трэбуй смилость, кай тэ ԥэнас, кай амэ лэ Иеговастирэ свидетеля андэ школа и пэ бути. Со май дур, со май ԥарэс амэнди авэла тэ жувас па Библия и тэ росԥэнас и лащи новость. Важ кода кай и мануша андэ кадэя люма гиндон и андярэн пэс вся май хужэ и май хужэ (2 Тим. 1:8; 3:13). Но вся и время сэр, кай лэ Иеговаско ди лошавэл, кала ту на дарас тэ авэс най кацаво, сар и мануша, савэ лэсти на служын (Прит. 27:11; Мал. 3:18).

МЭК О ИЕГОВА АВЭЛА ӶЛАВНО АНДЭ ТИРИ ЖЫЗНЯ

10. Кода, со сас пистромэ андэ Числа 6:6, 7, возможно, сас ԥарэс важ и назареёря. Васо?

¹⁰ Проадинон Числа 6:6, 7. И назареёря нэ моӷли тэ пашон каринг кодэва, ко муля. Спэрва можэт тэ здэлпэ, кай када сас вушэро тэ стерэн. Но андэ библейско время важ о назареё када моӷло тэ авэл фартэ ԥарэс, особено, кала на ашэлас варикас анда лэско ери. Андэ кодэя время сас кацавэ обычаи, кай и мануша трэбуй сас тэ авэн паша кодэва, кас на ашэля (Иоан. 19:39, 40; Дила 9:36—40). Но кодэя обещяния, сави дя о назареё, на дэлас лэсти када тэ терэл. Дажэ кала лэсти сас фартэ ԥарэс, во сыкавэлас пэстири састи вера и на парашэлас тэ зритярэл пэско алав. Амэ точно ӷанас, кай о Иегова подритярэлас кацавэ служытелёнэн, савэ на парашэнас лэс тэ кандэн, кай вонэ моӷли тэ виритярэн кадэва баро ԥаримос.

11. Со о христианино трэбуй тэ терэл, кала прижалпэ тэ ришый о вопросо андо ери? (Диқэн кадяжэ и картинка.)

¹¹ Амэ дям алав, кай ласа тэ жувас важ о Иегова и серьёзно пэ када диқас. И када влияет пэ кода, савэ ришэнии амэ прилас. Амэ анда вся оди терас пэстирэ обязаности андо ери, сар ԥэнэнпэ андэ Библия. Но амэ на домэкас, кай кода, со камэн амарэ чаче, тэ авэл май важно чем кода, со камэл о Иегова (Матф. 10:35—37; 1 Тим. 5:8). Дэкала, кай тэ радосарас лэ Иеговас, амэнди прижалпэ тэ прилас и ришэнии, савэнца лэ родости ԥарэс тэ соӷласинпэ.

12. Сар андярдя пэс о Александру андэ найвушэро ситуацыя?

¹² Акэ, со сас андэ жызня кай о Алекса́ндру и лэстири хулаи и Дори́на. Вонэ изучали и Библия варикай бэрш. Посли када и Дорина закамля тэ парашэл тэ изучает и ԥэнэнас, кай о Александру тожэ тэ мэкэл. Но во ковлэс и драго ԥэндя лати, кай во на стерэла када. Ла Доринати када на чалеля и вой вся терэлас, кай тэ одмарэл лэс кадэлэстар. О Александру ԥэнэн, кай лэсти сас найвушэро тэ полэл, васо лэстири хулаи кадя пэс андярэл. Дэкала и Дорина вихалас лэсти оди и ԥэнэнас ӷруби алава. Через када во дажэ камэлас тэ мэкэл вся и будэр тэ на изучает и Библия. И всаек, о Александру на парашэлас тэ терэл вся, кай о Иегова тэ авэл ӷлавно андэ лэстири жызня. Во всегда сыкавэлас пэстиря хулаяти, кай любий ла и стол пэр латэ патив. Кода, кай во пэс драго андярэлас, побудисардя ла Дорина упалэ тэ лэл тэ сытёл па Библия. Прожыля время и вой болделя. (Диқэн о видео «Александру и Дорина Вэкар. «Любовь терпеливо и добро» анда рубрика «О чачимос парувэл и жызня» по сайто jw.org.)

13. Сар амэ можэм тэ сыкавас и любовь каринг о Иегова и каринг о ери?

¹³ О Иегова создал о ери. Во камэл, кай и еряли жызня тэ анэн лош лэ хуласти и ла хулаяти (Эф. 3:14, 15). Кай тэ авас па чачимастэ бахталэ, амэнди трэбуй тэ терас кода, со мангэл о Иегова. Заботинпэ пала пэстирэ чаче, любин лэн и стон пэр лэндэ патив (Рим. 12:10). Вся и время патян, важ о Иегова куч, кай тумэ пристон бут зор тэ радуин лэс.

ПОМОЖЫН ЕК ЕҚЭСТИ ТЭ АВЭН САР НАЗАРЕЁРЯ

14. Кас особено амэ трэбуй тэ подритярас лэ алавэнца?

¹⁴ Кодэла, ко кати линэ тэ служын лэ Иеговасти, любин лэс и важ када ӷотови варисостар тэ отԥэндён. Но дэкала када найвушэро. Сар тэ поможысарас ек еқэсти кадя тэ терас? Трэбуй тэ ԥэнас алава, савэ придэн зор (Иов 16:5). Ай исин андэ тумари собрания ԥрала и ԥэя, савэ терэн пэстири жызня май просто, кай май бут тэ служын лэ Иеговасти? Адес амарэ тэрнэ мануша сытён андэ школа и на даран тэ отличаюца аврэндар, хоть дэкала лэнди када найвушэро. Ӷанэн тумэ кацавэ ԥралэн и ԥэян? Кадяжэ пэ дэсавэ мануша тасавэл о родо. Через када кодэлэнди, ко изучает и Библия или лэ ԥралэнди и лэ ԥэянди, найвушэро тэ ашэнпэ предани лэ Иеговасти. И мануша, савэ сыкавэн кацави смилость и бут состар отԥэндён важ о Иегова, ашэн, кай лэн тэ хвалин. Давайте на ласа тэ умэкас и возможность тэ ԥэнас лашэ алава, кай тэ подритярас лэн (Флм. 4, 5, 7).

15. Сар дэко подритярэл лэ ԥралэн и лэ ԥэян, савэ служын полновремено?

¹⁵ Дэкала амэ можэм тэ дас зор лэ ԥралэнди и лэ ԥэянди, савэ служын полновремено (Прит. 19:17; Евр. 13:16). Кадя стердя ек ԥэй, сави андэ бэршэндэ и жувэл андэ Шри-Ланка. Лати линэ тэ дэн май бари пенсия и вой закамля тэ поможый дуе тэрнэ ԥэянди, савэ служынас пианеронэнца. Кай кадэла ԥэя сас дэсавэ трудности лэ ловэнца. Лати камэласпэ, кай вонэ тэ на мэкэн пэстири служэния. Важ када вой ля кажно шон тэ дэл лэнди ловэ, кай тэ шон по щёто. Блаӷодаря кадэлэсти, по телефоно лэндэ вся и время сас ловэ. Саво дэ лашо примеро подя кадэя ԥэй!

16. Пала со амэ уӷанглям, кала подям дума пала назареёря?

¹⁶ И назареёря екжэнэ ӷотови сас варисостар тэ отԥэндён. Вонэ андэ када подинэ розлашо примеро! Кадяжэ кода, со амэ роздиқлям пала назареёря поможый амэнди май драго тэ уӷанас амарэ небеснонэ Дадэс. О Иегова уверено, кай амэ анда вся оди камас тэ радосарас лэс. Во патял, кай амэ ӷотови варисостар тэ отԥэндювас, кай тэ зритярас пэско алав — тэ жувас важ лэстэ. О Дэл стол патив пар мэндэ, кай домэкэл амэнди екжэнэнди тэ витидас, сар амэ ласа тэ сыкавас пэстири любовь каринг лэстэ (Прит. 23:15, 16; Мар. 10:28—30; 1 Иоан. 4:19). Но во шол сама и цэнуий, кай амэ отԥэндювас варисостар важ лэстэ. Важ када давайте и май дур тэ служысарас лэ Иеговасти и тэ отдас лэсти вся, со май лашо!