Лэ Иаковоско пророчество. Сости амэ сытювас (часть 1)

1, 2. Со о Иаково стердя англа пэстири смэрть и васо? (Кадяжэ диқэн и картинка.)

КАЛА о Иаково ужэ сас ԥуро, во лэ ереса анда Ханаано жыля тэ жувэл андо Египто. Во сас фартэ радо, кай диқляпэ котэ пэстирэ шавэса, лэ Иосифоса, и кай всаворэ лэстирэ бэяцэ упалэ паша лэстэ. Посли када прожыля почти 17 лет (Быт. 47:28). О Иаково чуствует, кай ӥто мэрэла, и важ када мангэл всаворэ пэстирэ шавэн тэ авэн каринг лэстэ. Во камэл лэн тэ стидэл, кай тэ ԥэнэн варисо важно (Быт. 49:28).

² Андэ кодэя время о хулай обычно стидэлас лэ ерес, кай тэ ԥэнэн пэско послиднё алав (Ис. 38:1). Кала вся о ери стидэласпэ, во моӷ, например, тэ ԥэнэн, ко лэла тэ хулаий андо ери посли лэстэ.

3. Со амэ уӷанас анда Бытие 49:1, 2?

³ Проадинон Бытие 49:1, 2. Но када разо лэнго ери стидяпэ най сар обычно. О Иаково сас пророко. И через лэ Дэвлэско зор во росԥэндя пэстирэ шавэнди, со авэла лэнца и лэндирэ еренца англэ.

4. Со амэ уӷанаса анда кадэя статья? (Кадяжэ диқэн и рамка «Лэ Иаковоско ери».)

⁴ Андэ кадэя статья амэ уӷанаса, со о Иаково ԥэндя лэ Рувимости, лэ Симеоности, лэ Левиёсти и лэ Иудасти. Кай о Иаково сас инке восемь шавэ. Анда авэр статья амэ уӷанаса, со во ԥэндя и лэнди. Сар амэ уӷанаса, о Иаково дэлас дума най кати пала пэстирэ шавэ, но и пала лэндирэ потомкоря. Прожыля время, и лэндар жыля баро народо Израилё. Кала амэ май бут уӷанас пала кадэва народо, амэ диқас, сар исполнисайлэ лэ Иаковостирэ алава. Андар лэндэ амэ можэм бут сости тэ сытювас и инке май драго тэ полас, сар тэ радосарас амэ Дадэс, лэ Иеговас.

РУВИМО

5. Со о Рувимо, возможно, аштярэлас пэстирэ дадэстар?

⁵ Сначала о Иаково взвисайля каринг о Рувимо и ԥэндя: «Ту мэрно барэдэр шаво» (Быт. 49:3). О Рувимо, сар барэдэр шаво, моӷ тэ гиндой, кай лэсти лэстирэ дадэстар дорэсэлапэ дувар май бут. Ай инке, возможно, во моӷ тэ гиндой, кай посли кода, сар мэрэла лэско дад, во авэла хулай по ери. И всаворэ лэстирэ потомкоря тожэ лэна тэ хулаин.

6. Васо о Рувимо хасардя кода, со лэсти прижалас? (Бытие 49:3, 4).

⁶ Но о Рувимо хасардя кода, со лэсти прижалас сар барэдэрэ шавэсти (1 Лет. 5:1). Васо? Через дэсави время посли кода, сар муля и Рахиль, во сас латиря служанкаса ла Валласа. Вой сас лэ Иаковостири наложница (Быт. 35:19, 22). Васо о Рувимо кадя стердя? Можэт, и Валла лэсти чалёлас сар жувли, и во просто стердя кадя, сар закамля. Ай можэт, во надеияспэ, кай посли када о Иаково лэла тэ вэрыцый ла Валла и авэла май фартэ тэ любий лэстиря да, ла Лия. Сар бы тэ на авэл, кода, со стердя о Рувимо, сас гряца и важ о Иегова, и важ о Иаково. (Проадинон Бытие 49:3, 4.)

7. Со ашэля лэ Рувимоса и лэстирэ потомконэнца? (Кадяжэ диқэн и рамка «Лэ Иаковоско пророчество».)

⁷ О Иаково ԥэндя лэ Рувимости: «Ту на авэса пэрво». Кадэла алава исполнисайлэ. Андэ Библия никай на ԥэнэнпэ, кай варико анда лэ Рувимостирэ потомкоря сас царё, священико или пророко. Но о Иаково на отԥэнделя пэстирэ шавэстар, и во всаек дя лэсти дэсо анда кода, со лэсти прижалас. Лэ Рувимостар жыля ек колено андо Израилё (Иис. Н. 12:6). Хоть и ситуация ла Валласа сас вэрыто, дицол, кай будэр нисо кацаво о Рувимо на терэлас. Авэр ситуацыи сыкавэн, кай лэстэ сас и лашэ качестворя (Быт. 37:20—22; 42:37).

8. Сости амэ сытювас анда кода, со сас лэ Рувимоса?

⁸ Сости амэ сытювас? Всаворэнди амэнди трэбуй тэ старысавас тэ ритярас пэс андэ вас и тэ на поддаспэ лэ билажавардимасти. Если амаро ди цырдэл амэн тэ стерас бэзэх, трэбуй сразу жэ тэ погиндосарас, сар дэ больно кадэлэстар авэла лэ Иеговасти, амарэ ерести и аврэ манушэнди. Кадяжэ нащи тэ бистрас: «Со посадия о мануш, кода и стидэла» (Гал. 6:7). Инке кода, со сас лэ Рувимоса, сыкавэл, пэскати о Иегова дэ одяло. Через амарэ ошыбки амэндэ моӷут тэ авэн проблемы, и о Иегова на фэрий амэн лэндар. Но если амэ каисавас и старысавас тэ андярас пэс правильно, во простий амэн и блаӷословий.

СИМЕОНО И ЛЕВИЁ

9. Васо о Иаково сас холинако по Симеоно и по Левиё? (Бытие 49:5—7).

⁹ Проадинон Бытие 49:5—7. Потом о Иаково взвисайля каринг о Симеоно и каринг о Левиё. Па лэстири дума дицолас, кай во фартэ пэр лэндэ холинако. Кала вонэ инке жувэнас андо Ханаано, о Шехемо, саво тожэ жувэлас пэ кодэла краёря, асаяпэ лэ Иаковостиря щятар, ла Динатар. Канешно, через када всаворэ лэ Иаковостирэ шавэ фартэ росхоляйлэ. Но дуй андар лэндэ, о Симеоно и о Левиё, заԥабилэ холятар. Вонэ динэ алав лэ Шехемости и лэстирэ манушэнди, кай доԥэндёна лэнца, если вонэ стерэна пэсти обрезания. Но вонэ кадя лэн дилярдэ. И мануша соӷласисайлэ, но, кала вонэ инке сас насвалэ посли обрезания, о Симеоно и о Левиё динэ пэр лэндэ. Вонэ «линэ мечоря, зажылэ андо форо и пэр лэндэ нико на шутя сама, и вонэ умардэ всаворэн муршэн» (Быт. 34:25—29).

10. Сар исполнисайлэ лэ Иаковостирэ алава по Симеоно и по Левиё? (Кадяжэ диқэн и рамка «Лэ Иаковоско пророчество»).

¹⁰ Через лэндири жэстокость о Иаково фартэ пэр лэндэ росхоляйля. Во ԥэндя, кай о Симеоно и о Левиё авэна росшутэ и розделимэ андо Израилё. Кадэла алава исполнисайлэ май бут чем через 200 бэрш посли кода, сар о израильско народо авеля пэ Обетовано ԥув. Лэ Симеоностирэ колености дорэслэпэ и фороря пэ лэ Иудастири територия (Иис. Н. 19:1). Ай лэ Левиёсти дорэслэпэ 48 фороря па вся Израилё (Иис. Н. 21:41).

11. Со лашо стердэ лэ Симеоностирэ и лэ Левиёстирэ потомкоря?

¹¹ Лэ Симеоностирэ и лэ Левиёстирэ потомкоря на терэнас и ошыбки, савэ стердэ лэндирэ папоря. Лэ Левиёско колено полэлас кати лэ Иеговас и следияс пала када. Кала о Моисеё вазгляпэ по плай Синаё, кай о Иегова лэсти тэ дэл и законоря, бут израильтяноря линэ тэ тэлён лэ сомнакунэ гуруворэсти. Кала о Моисеё рисайля, во пушля: «Ко залэл лэ Иеговастири риг?» Тоди всаворэ левиторя ӥто стидэпэ круӷом лэстэ и поможысардэ тэ умарэн кодэлэн, ко тэлёлас кодэлэ хохавнэ дэвлэсти (Исх. 32:26—29). О Иегова отделисардя лэ левитонэн, кай вонэ тэ авэн священикоря (Исх. 40:12—15; Чис. 3:11, 12). Лэ Симеоностирэ и лэ Иудастирэ потомкоря потом стидэсаспэ вместе, кай тэ захутилэн и Обетовано ԥув. И када сас уӷодно лэ Иеговасти (Суд. 1:3, 17).

12. Сости амэ сытювас анда кода, со сас лэ Симеоноса и лэ Левиёса?

¹² Сости амэ сытювас? Амэнди никала нащи тэ терас варисо анда холи. Кала амэнца или амарэ чаченца обжанпэ несправедливо, када, канешно, фартэ холярэл (Пс. 4:4). Но если андэ холи амэ закамаса тэ рисарас кодэлэсти, ко амэн холярдя, лэ Иеговасти када на чалёла (Иак. 1:20). Со тоди тэ терас, кала амэнца обжанпэ несправедливо? Всегда тэ терас кадя, сар пистромэ андэ Библия, и неважно, ко амэн холярдя: и ԥрала и ԥэя или авэр мануша. Тоди амарэ алава и дила никасти на стерэна вэрыто (Римо 12:17, 19; 1 Пёт. 3:9). Ай акэ сости моӷут тэ сытён и бэяцэ и подросткоря. Если тирэ родителя андярэн пэс неправильно, ту на трэбуй тэ андярэс пэс кадя, сар вонэ. На бистэр: если авэр мануша терэн неправильно, када не значит, кай о Иегова на лэла тэ блаӷословий тут. О Иегова лэла тэ дэл тути зор, кай ту тэ радуис лэс и тэ терэс правильно.

ИУДА

13. Васо о Иуда моӷ тэ пережывает, кала поджыля лэстири очередь тэ виашунэн пэстирэ дадэс?

¹³ Потом о Иаково взвисайля каринг о Иуда. Кала о Иуда ашундя, со лэско дад ԥэндя лэ барэдэрэ ԥралэнди, во моӷ тэ запережывает. Во ж тожэ стердя дэсавэ барэ ошыбки. Май ӥто всаворэстар, во тожэ обчорэлас о форо Шехемо (Быт. 34:27). Во ԥэндя пэстирэ ԥралэнди тэ битинэн лэ Иосифос андо рабство и лэнца жэ обдилярдя пэстирэ дадэс (Быт. 37:31—33). Ай ӷэт май интя во сас пэстиря боряса, ла Фамаряса. Во ла на ӷатярдя и погиндосардя, кай када сас найлащи манушни (Быт. 38:15—18).

14. Со лашо стердя о Иуда? (Бытие 49:8, 9)

¹⁴ Но о Иаково похвалисардя лэ Иудас и дя лэсти пэстири блаӷословения. (Проадинон Бытие 49:8, 9.) Ай вся важ кода, кай о Иуда жалуисардя пэстирэ цыкнэдэрэ ԥралэс, лэ Вениаминос. Во погиндосардя, со можэт тэ авэл по ди кай лэско ԥуро дад (Быт. 44:18, 30—34).

15. Сар исполнисайля о пророчество пала Иуда?

¹⁵ О Иаково ԥэндя, кай о Иуда авэла ӷлавно машкар пэстирэ ԥрала. Но кадэва пророчество ля тэ исполнийпэ най сразу, ай кати варикай через 200 лет. Кала израильтяноря вижылэ анда Египто и жанас через и пустыня андо Обетовано ԥув, лэ Иудаско колено жалас англал (Чис. 10:14). Через бут бэрша, кала линэ тэ захутилэн и Обетовано ԥув, о Иуда пэрво жыля тэ марэлпэ лэ хананеёнэнца (Суд. 1:1, 2). Андо Израилё бут бэрша правинас царёря анда лэ Иудаско колено. И о Давидо сас пэрво андар лэндэ. Но пэ када инке вся о пророчество на исполнисайля.

16. Сар исполнисайля о пророчество анда Бытие 49:10? (Кадяжэ диқэн и рамка «Лэ Иаковоско пророчество».)

¹⁶ О Иаково ԥэндя, кай лэ Иудастар авэла Правителё, саво лэла тэ правий ла ԥувьяса вечно. (Проадинон Бытие 49:10.) Кадэва Правителё — о Иисусо Христос. Пала лэстэ о анӷело ԥэндя: «О Дэл о Иегова дэла лэсти тэ правий па лэ Давидоско троно, лэстирэ дадэско» (Лука 1:32, 33). Кадяжэ по Иисусо ԥэнэн, кай во «лево анда лэ Иудаско колено» (Тайна 5:5).

17. Сар о Иегова диқэл пэ пэстирэ служытеля и сар амэ можэм тэ терас кадя жэ?

¹⁷ Сости амэ сытювас? О Иегова блаӷословисардя лэ Иудас, хотя во и потердя барэ ошыбки. Можэт, лэ Иудастирэ ԥрала нащи полэнас, васо лэсти кацави бах. Сар бы тэ на авэл, о Иегова диқэлас, кай о Иуда лашо мануш, и блаӷословисардя лэс важ када. Сости амэ сытювас лэ Иеговастар? Например, кала варикасти дэн особо дила, пэрво, со амэ можэм тэ ԥэнас, када: «Сар лэсти вобще динэ кадэя дила тэ терэл?» Но трэбуй тэ сэрас, кай о Иегова цэний вся, со исин лашо андэ кадэва мануш. О Иегова май бут сама шол пэ лашэ качестворя, и амэ трэбуй тэ терас кадя жэ.

18. Васо амэ трэбуй тэ авас терпеливи?

¹⁸ Инке, сар о Иуда, амэ можэм тэ сытювас тэ авас терпеливи. О Иегова всегда зритярэл пэско алав. Но кода, сар и кала во када терэл, можэт тэ авэл важ амэндэ неожыдано. Лэ Иудастирэ потомкоря най сразу линэ тэ андярэн лэ Дэвлэстирэ народос. Но вонэ кандэнас кодэлэн, кас о Иегова стодя тэ терэн кадэя дила. Када сас о левито Моисеё, о ефремлянино Иисусо Навино и о вениамитянино Сауло. Давайте тожэ тэ кандас кодэлэн, кас о Иегова стодя адес тэ диқэн пала лэско народо (Евр. 6:12).

19. Со амэ уӷанглям пала Иегова анда лэ Иаковоско пророчество?

¹⁹ Со амэ уӷанглям анда пророчество, саво о Иаково ԥэндя пэстирэ штарэ шавэнди? Драго дицол, кай «о Дэл диқэл най кадя, сар о мануш» (1 Сам. 16:7). О Иегова фартэ терпеливо и лэсти чалёл тэ прощает. Во на ԥандавэл и яқа по бэзэх, но во на аштярэл, кай лэстирэ служытеля авэна совершени. О Иегова можэт тэ блаӷословий дажэ кодэлэн, ко варикала стердя барэ ошыбки, но анда вся оди каисайля и ля тэ терэл правильно. Кай о Иаково сас инке восемь шавэ, и андэ авэр статья амэ уӷанаса, со во ԥэндя и лэнди.