Лэ Иаковоско пророчество. Сости амэ сытювас (часть 2)

1. Пала со амэ подаса дума андэ кадэя статья?

ЛЭ ИАКОВОСТИРЭ шавэ стидэпэ круӷом пэско ԥуро дад и внимательно лэс ашунэн. Сар ужэ сас ԥэндо андэ кодэя статья, о Рувимо, о Симеоно, о Левиё и о Иуда, май ӥто всаворэстар, фартэ удивисайлэ кодэлэсти, со ԥэндя пала лэндэ о Иаково. Важ када вонэ, наверно, нащи доаштярдёнас, со о дад ԥэнэна аврэ шавэнди. Акана подам дума, сости амэ сытювас анда кода, со о Иаково ԥэндя лэ Завулоности, лэ Иссахарости, лэ Даности, лэ Гадости, лэ Асирости, лэ Неффалимости, лэ Иосифости и лэ Вениаминостиa.

ЗАВУЛОНО

2. Со о Иаково ԥэндя лэ Завулоности и сар исполнисайлэ кадэла алава? (Бытие 49:13). (Кадяжэ диқэн и рамка.)

² Проадинон Бытие 49:13. О Иаково ԥэнэн, кай о Завулоно авэла тэ жувэл паша моря. Сар исполнисайлэ кадэла алава? Май бут чем через 200 лет лэ Завулоностирэ потомконэнди дорэсляпэ и ԥув машкар и Галилейско и Средиземно моря. О Моисеё ԥэнэнас: «Лошав, Завуло́но, кала вижас» (Втор. 33:18). Можэт, кадэла алава сыкавэнас, кай через о удобно ҭан машкар дуй мори лэ Завулоностирэ потомкоря моӷли спокойно тэ залэнпэ торӷовляса. Сар бы тэ на авэл, кай лэ Завулоностирэ потомкоря сас васо тэ лошавэн.

3. Со поможыя амэнди тэ лошавас ла жызняти андэ любо ситуацыя?

³ Сости амэ сытювас? Амэндэ всегда исин васо тэ радосавас, кай бы амэ тэ на жувас и кай тэ на авас. Кай тэ радосавас ла жызняти, амэ трэбуй тэ цэнисарас кода, со амэндэ исин (Пс. 16:6; 24:5). Дэкала амэ можэм фартэ тэ загиндосавас пала кода, со амэндэ нинай, и тэ загрыжосавас пала када. Но андэ амари жызня исин бут со лашо. Важ када старыинпэ май бут тэ гиндон пала лашымос, саво тумэндэ исин (Гал. 6:4).

ИССАХАРО

4. Со о Иаково ԥэндя лэ Иссахарости и сар исполнисайлэ кадэла алава? (Бытие 49:14, 15). (Кадяжэ диқэн и рамка.)

⁴ Проадинон Бытие 49:14, 15. О Иаково хвалий лэ Иссахарос важ кода, кай во на бэшэл би дилако, и ԥэнэн, кай во сар зорало ишако, саво можэт тэ ԥиравэл ԥаро ӷрузо. Кадяжэ о Иаково ԥэнэн, кай лэсти дорэсэлапэ райкани ԥув. Сар исполнисайлэ кадэла алава? Лэ Иссахаростирэ потомконэнди дорэсляпэ лащи ԥув паша лэн Иордано (Иис. Н. 19:22). Вонэ пэр латэ бут со садинас. Но кадяжэ вонэ инке бут со терэнас важ авэр (1 Цар. 4:7, 17). Например, о сындомари о Варако и пророчица и Девора манглэ тэ поможын лэнди андэ война лэ Сисараса, и лэ Иссахароско колено закамля тэ дэл помощь. И мануша анда кадэва колено марэнаспэ и андэ авэр войны (Суд. 5:15).

5. Васо амэ трэбуй тэ любисарас тэ терас дила?

⁵ Сости амэ сытювас? О Иегова цэний, кала амэ трудисавас важ лэстэ (Эккл. 2:24). Например, и ԥрала, савэ заботинпэ пала собрания (1 Тим. 3:1). Вонэ, канешно, на марэнпэ андэ война, но вонэ трэбуй тэ фэрин лэ Иеговастирэ народос, кай нико и нисо тэ на дурярэл лэс лэ Иеговастар (1 Кр. 5:1, 5; Иуда 17—23). Пэ када трэбуй бут зор. Ай инке вонэ старыинпэ тэ ԥэнэн и речи, савэ подритярэн лэ ԥралэн и лэ ԥэян (1 Тим. 5:17).

ДА́НО

6. Сави дила терэлас лэ Даноско колено? (Бытие 49:17, 18). (Кадяжэ диқэн и рамка.)

⁶ Проадинон Бытие 49:17, 18. О Иаково сыстосардя лэ Данос лэ сапэса, саво на дарал тэ дэл по май баро жывотно, например по воено грас. Лэ Даноско колено сас смило, во всегда сас ӷотово тэ жал тэ марэлпэ лэ Израилёстирэ вороӷонэнца. Кала вонэ жанас пэ Обетовано ԥув, кадэва колено жалас послиднё и фэрияс всаворэн, ко жалас май палал (Чис. 10:25). Хоть кода, со терэнас лэ Даностирэ потомкоря, на дицолас, всаек када сас фартэ важно.

7. Пала со трэбуй тэ сэрас, кала терас варисави дила андэ лэ Иеговастири арӷанизацыя?

⁷ Сости амэ сытювас? Сас тумэндэ кацаво, кай тумэ стердэ варисави дила, ай када, сар тумэнди здэлпэ, нико на додиқля? Можэт, тумэ терэнас варисави дила андо Зало Царства, дэнас помощь по канӷрэсо или терэнас варисо авэр. Тоди тумэн можно анда вся ди тэ похвалисарас! Всегда сэрэн, кай о Иегова диқэл и цэний вся, со тумэ терэн важ лэстэ. И лэсти особено приятно, кала тумэ служын лэсти най кай тумэн варико тэ хвалий, ай важ кода, кай тумэ лэс фартэ любин (Матф. 6:1—4).

ГАДО

8. Васо пэ лэ Гадоско колено андэ любо моменто моӷли тэ дэн и вороӷоря? (Бытие 49:19). (Кадяжэ диқэн и рамка.)

⁸ Проадинон Бытие 49:19. О Иаково ԥэндя, кай по Гадо лэна тэ дэн и чордэӷаря. Май бут чем через 200 лет лэ Гадостирэ потомконэнди дорэсляпэ и ԥув каринг о востоко ла лэнатар Иордано, и паша лэндэ жувэнас лэндирэ вороӷоря. Вижал, пэр лэндэ моӷли тэ дэн андэ любо время. Но всаек лэ Гадостирэ потомкоря камэнас тэ жувэн пэ кодэла краёря важ кода, кай котэ сас лашэ ҭана, кай тэ пасыйпэ лэнго ското (Чис. 32:1, 5). Дицол, кай вонэ сас смили мануша. Кадяжэ вонэ патянас, кай о Иегова поможыя лэнди тэ фэрин пэско мищимос лэ чордэӷарендар. Ай инке лэ Гадостирэ потомкоря бут бэрша поможынас аврэ коленонэнди тэ захутилэн и Обетовано ԥув каринг о западо ла лэнатар Иордано (Чис. 32:16—19). Вонэ сас уверени, кай о Иегова фэрия лэндирэ хулаян и лэ бэятонэн, пока лэн нинай. О Иегова блаӷословисардя лэ Гадостирэ коленос важ лэндири смилость (Иис. Н. 22:1—4).

9. Сар тэ сыкавас, кай амэ надеисавас по Иегова?

⁹ Сости амэ сытювас? Кай тэ служысарас лэ Иеговасти андэ ԥари время, амэнди трэбуй тэ надеисавас пэр лэстэ (Пс. 37:3). Адес бут ԥрала и ԥэя терэн дила пэ стройка, пэрэладэн кордэ, кай трэбуй май бут вазвещятеля, или терэн авэр варисави дила андэ арӷанизацыя. Вонэ на даран тэ жан пэ жэртвы важ кода, кай ӷанэн, кай о Иегова позаботияпэ пала лэндэ (Пс. 23:1).

АСИ́РО

10. Сар исполнисайля лэ Иаковоско пророчество пала Асиро? Со на стердя лэ Асироско колено? (Бытие 49:20). (Кадяжэ диқэн и рамка.)

¹⁰ Проадинон Бытие 49:20. О Иаково ԥэндя, кай лэ Асиростирэ потомкоря ашэна барвалэ. Имено кадя и сас. И ԥув, сави дорэсляпэ лэ Асирости, сас фартэ лащи, пэр латэ вся драго барёлас (Втор. 33:24). Вой прожалас паша Средиземно моря. Кадяжэ лэндэ сас барвало финикийско торӷово ҭан Сидоно, саво тердёлас пэ моря. Но о Асиро на видарадя лэ хананеёнэн па пэстири ԥув (Суд. 1:31, 32). Через дэсави время лэ Асиростирэ потомкоря ужэ най кадя служынас лэ Иеговасти, сар варикала. Можэт, кадя ашэля через кода, кай вонэ цырдэнаспэ каринг о барвалимос и пэр лэндэ найдраго влияли и хананеёря. Например, кала о сындомари о Варако мангля лэ израильтянонэн тэ поможын тэ марэнпэ лэ хананеёнэнца, о Асиро на закамля тэ дэл помощь. Через када кадэва колено на диқля, сар о Иегова стердя чуда паша Мегидо и поможысардя пэстирэ народости тэ победий (Суд. 5:19—21). Наверно, лэ Асирости сас лажаво тэ ашунэн, сар о Варако и Девора дилабэнас пала лэстэ андэ дили: «О Асиро бэшэлас би дилако паша ла моряко бэрэӷо» (Суд. 5:17).

11. Васо и ловэ на трэбуй тэ авэн само ӷлавно андэ амари жызня?

¹¹ Сости амэ сытювас? Амэ камас тэ отдас лэ Иеговасти со май лашо. Важ када давайте на аваса сар и мануша андэ кадэя люма, савэ гиндон, кай о барвалимос и о мищимос — када само ӷлавно андэ жызня (Прит. 18:11). Амэ полас, кай и ловэ трэбуй, но вонэ най май ӷлавни, чем и служэния лэ Иеговасти (Эккл. 7:12; Евр. 13:5). Амэнди куч амари время и о зор, важ када амэ на тинас кода, со амэнди най фартэ трэбуй. Вместо када амэ пристас вся о зор, кай тэ служысарас лэ Иеговасти. Амэ ӷанас, кай если о Иегова авэла амэндэ по пэрво ҭан, амари жызня авэла бахтали и лошали адес и англэ (Пс. 4:8).

НЕФФАЛИ́МО

12. Со, возможно, означали лэ Иаковостирэ алава пала Неффалимо? (Бытие 49:21). (Кадяжэ диқэн и рамка.)

¹² Проадинон Бытие 49:21. О Иаково ԥэндя, кай о Неффалимо лэла шукарнэс тэ дэл дума. Возможно, када сыкавэлас, кай кадя лэла тэ дэл дума о Иисусо. Кала во сас пэ ԥув, во бут время проандярэлас «андэ пэско форо», андо Капернаумо, саво сас пэ лэ Неффалимоско краё (Матф. 4:13; 9:1). Андо пророчество пала Христос, о Исайя пистросардя, кай о Завулоно и о Неффалимо додиқэна о ашунгло свето (Ис. 9:1, 2). Чаче, о Иисусо, со май баро Учителё, сас «чачуно свето, саво светий лэ разнонэ манушэнди» (Иоан. 1:9; 7:46).

13. Сар пэстиря думаса тэ радосарас лэ Иеговас?

¹³ Сости амэ сытювас? Важ о Иегова важно, со амэ дас дума и сар. Со поможыя амэнди тэ дас дума шукарнэс, кай када тэ авэл приятно лэ Иеговасти? Пэрво, ԥэнэн чачимос (Пс. 15:1, 2). Дуйто, старыинпэ пэстиря думаса тэ придэн зор аврэнди — май часто хвалин лэн, май ридко дэн дума пала аврэндирэ недостаткоря и май набут ровэнпэ (Еф. 4:29). Ай инке стон цэль тэ сытён тэ залэн просто дума лэ манушэнца, кай андэ любо моменто тэ росԥэнэн лэнди пала Иегова.

ИОСИФО

14. Сар исполнисайлэ лэ Иаковостирэ алава пала Иосифо? (Бытие 49:22, 26). (Кадяжэ диқэн и рамка.)

¹⁴ Проадинон Бытие 49:22, 26. О Иосифо сас пэрво ла Рахиляко шаво. Вой сас любимо лэ Иаковостири хулаи. О Иаково ԥэндя, кай о Иосифо — «виточка ла баря виткатар». И бари витка — када о Иаково, ай и виточка — када о Иосифо. О Иаково, май ӥто всаворэстар, абурояс пэстирэ шавэса, лэ Иосифоса, саво сас избрано машкар пэстирэ ԥрала. О Иаково ԥэндя, кай лэ Иосифости вместо Рувимо дорэсэлапэ дувар май бут (Быт. 48:5, 6; 1 Лет. 5:1, 2). Сар исполнисайлэ кадэла алава? Лэ Иосифостирэ шавэндар — лэ Ефремостар и лэ Манассиястар — жылэ дуй коленоря. Кажнонэсти андар лэндэ дорэсляпэ часть андэ Обетовано ԥув (Быт. 49:25; Иис. Н. 14:4).

15. Со о Иосифо терэлас, кала лэса обжанаспэ несправедливо?

¹⁵ О Иаково кадяжэ ԥэнэн пала лучникоря, савэ «вэрыцынас [лэ Иосифос]... и стреляли андэр лэстэ» (Быт. 49:23). Када сас лэстирэ ԥрала, савэ лэсти завидуинас. Вонэ обжылэпэ лэса несправедливо, и через када андэ лэстири жызня сас бут ԥаримос. Но о Иосифо на ля тэ ритярэл и холи пэ пэстирэ ԥрала и на дошалярэлас лэ Иеговас андэ пэско ԥаримос. Сар ԥэндя о Иаково, лэ Иосифоско «луко ашэляпэ састо, ай и вас зоралэ и проворни» (Быт. 49:24). Андэ любо бида о Иосифо надеияспэ по Иегова. Во най кати простисардя пэстирэ ԥралэн, но и стердя лэнди лашымос (Быт. 47:11, 12). Через о ԥаримос о Иосифо сытеля тэ авэл инке май лашо мануш (Пс. 105:17—19). Важ када о Иегова моӷ тэ дэл лэсти тэ терэл инке май бари дила.

16. Сар лэ Иосифоско примеро поможыя амэнди тэ пэрэандярас о ԥаримос?

¹⁶ Сости амэ сытювас? На домэкэн, кай о ԥаримос тэ дурярэл тумэн лэ Иеговастар, лэ ԥралэндар и лэ ԥэяндар андэ собрания. Сэрэн: андэ ԥари время о Иегова можэт варисости амэн тэ сытярэл (Евр. 12:7). Андэ кацави время амэ можэм тэ ашас инке май лашэ христианоря. Например, тэ сытювас тэ жалуисарас и тэ простисарас аврэн (Евр. 12:11). Амэ можэм тэ авас уверени, кай о Иегова блаӷословия амэн, кай амэ вся виритярас, кадя жэ сар во блаӷословисардя лэ Иосифос.

ВЕНИАМИНО

17. Сар исполнисайля о пророчество пала Вениамино? (Бытие 49:27). (Кадяжэ диқэн и рамка.)

¹⁷ Проадинон Бытие 49:27. О Иаково сыстосардя лэ Вениаминос лэ рувэса. Лэстирэ алава сыкавэнас, кай и вениамитяноря авэна лашэ войноря (Суд. 20:15, 16; 1 Лет. 12:2). «Тэсара», кала о Израильско царство кати появисайля, пэрво царё андэр лэстэ сас о вениамитянино Сауло. Во смило марэласпэ лэ филистимлянонэнца (1 Сам. 9:15—17, 21). Ай через бут бэрша, можно тэ ԥэнэс «вечером», лэ израильтянонэн камлэ тэ стрин па парни люма. Но и царица Эсфирь и о Мардохеё, лэ Вениаминостирэ потомкоря, спасысардэ лэн (Эсф. 2:5—7; 8:3; 10:3).

18. Сости амэ можэм тэ сытювас кай лэ Вениаминоско колено?

¹⁸ Сости амэ сытювас? Канешно, и вениамитяноря фартэ абуронас, кай о мануш анда лэнго колено ашэля царё андо Израилё. Но потом о Иегова отдя о царство лэ Давидости анда лэ Иудаско колено. Хоть и най сразу, но и вениамитяноря всаек линэ тэ кандэн лэ нэвэ царёс (2 Сам. 3:17—19). Через бут бэрша дэш коленоря звазглэпэ, но и вениамитяноря на парашэлэ тэ подритярэн лэ Иудаско колено и лэ царёс, савэс стодя о Иегова (1 Цар. 11:31, 32; 12:19, 21). Давайте тожэ тэ кандас кодэлэн, кас о Иегова адес стодя тэ заботинпэ пала пэско народо (1 Фес. 5:12).

19. Васо сас важно май драго тэ полас лэ Иаковоско пророчество?

¹⁹ Сар амэ диқлям, амэ можэм бутэсти тэ сытювас анда лэ Иаковоско пророчество, саво во ԥэндя англа пэстири смэрть. Амэ уӷанглям, сар во исполнисайля, и через када лям инке май фартэ тэ патяс, кай о Иегова всегда зритярэл пэско алав. Кадяжэ амэ подям дума пала блаӷословении, савэ получисардя кажно колено, и инке май драго полям, сар тэ радосарас лэ Иеговас.