Geneza

29 Pala codoia o Iacob gălea mai dur pe pesco drom hai gălea ando them codolengo catar înclel o cham. 2 Vo dichlea pe iech plai iech haing hai trin turme bacreanța cai beșenas tele pașă catar o than cai sas-lo vo, anda codoia că delas-pe te pien pai le turmenghe anda codoi haing. Hai po mui la haingaco sas iech baro bar. 3 Cana chidenas sea le turme code, le păstori denas tele o bar pa o mui la haingaco hai denas te pien pai le turmenghe, pala codoia șionas parpale o bar pe lesco than, po mui la haingaco. 4 O Iacob pușlea-le: „Mânre phrala, cathar san?”, hai von phende: „Sam anda Haran”. 5 Vo phendea lenghe: „Prinjianen le Labanos, o nepoto le Nahorosco?”. „Prinjianas-les”, phende lesche von parpale. 6 Hai vo pușlea-le: „Silo mișto?”. Von phende lesche: „Silo mișto. Ita că avel i Rahela, leschi șei, le bacreanța!”. 7 Vo mai phendea: „Tha încă si o mașcar le ghiesco. Ci si o timpo te aven chidine le turme. Den le bacrean te pien pai, pala codoia jian hai len sama pe lende”. 8 Tha von phende: „Ci si amenghe mechlo te cheras cadaia ji cana ci chiden-pe sea le turme hai ci si dino tele o bar pa o mui la haingaco. Numai atunci das le bacrean te pien pai”. 9 Ando timpo so încă delas duma cadalența, avilea i Rahela le bacreanța lache dadesche, că sas-li păstorița. 10 Cana dichlea la Rahela, i șei le Labanoschi, o phral lesca deiaco, hai le bacrea le Labanosche, o Iacob pașilea sigo, dea tele o bar pa o mui la haingaco hai dea le bacrean le Labanosche te pien pai. 11 Pala codoia o Iacob ciumidea la Rahela hai astardea te rovel zurales. 12 Hai o Iacob phendea caring i Rahela că si neamo lache dadeia hai că si o șiav la Rebecaco. Atunci voi nașlea te phenel cadai buchi lache dadesche. 13 Cana o Laban așundea că o Iacob, o șiav lesca pheiaco, sas-lo code, nașlea angla leste. Dea-les angali, ciumidea-les hai andea-les ande lesco chăr, hai vo phendea le Labanosche sea so întâmplosardea-pe. 14 Atunci o Laban phendea lesche: „Tu san ciaces mânro cocalo hai mânro mas”. Hai o Iacob așilea leste sea o șion. 15 Pala codoia o Laban phendea caring o Iacob: „Numai anda codoia că san mânro neamo, te slujis manghe de ivea? Phen manghe: So pochinimos cames?”. 16 Hai le Labanos sas-les dui șeia. I mai bari bușiolas Lea, hai i mai țâni, Rahela. 17 Le iacha la Leiache ci strălucinas, ando timpo so i Rahela cărdilea iech jiuvli zurales șucar. 18 O Iacob merelas pala i Rahela, cadea că phendea: „Som gata te slujiv tuche efta bărșa anda i Rahela, chi mai țâni șei”. 19 O Laban phendea lesche: „Si mai mișto te dav-la tuche sar te dav-la avere murșesche. Ași mande”. 20 Hai o Iacob slujisardea efta bărșa anda i Rahela, tha ande lesche iacha fanas-pe numai chichiva ghiesa, anda codoia că merelas pala late. 21 Pala codoia o Iacob phendea caring o Laban: „De mânra rromnia, anda codoia că nachle le ghiesa cai trebunas te cherav buchi anda late, caște sovav lasa”. 22 Atunci o Laban chidea sea le manușen anda codo than hai cărdea iech bari meseili. 23 Tha pi riat lea pesca șeia i Lea hai îngărdea-la co Iacob, caște sovel lasa. 24 Hai o Laban dea la Leache sar slujitoarea la Zilpa, leschi slujitoarea. 25 Pi teharin, o Iacob dichlea că sas i Lea. Atunci phendea caring o Laban: „So cărdean manghe? Ci cărdem tuche buchi anda i Rahela? Sostar athadean-ma?”. 26 O Laban phendea lesche: „Ande amare thana ci si o obiceio te del-pe i mai țâni angla codoia cai si i iechto năștime. 27 Nachav cado curco cadala jiuvleaia. Pala codoia va avela tuche dini vi i coaver jiuvli hai, sar pochinimos, va avela te cheres manghe buchi încă efta bărșa”. 28 O Iacob cărdea cadea hai nachadea codo curco anda abiav codola jiuvleaia. Pala codoia o Laban dea-la lesche sar rromni la Rahela, leschi șei. 29 Hai o Laban dea la Rahelache sar slujitoarea la Bilha, leschi slujitoarea. 30 O Iacob sutea la Rahelaia. I Rahela sas lesche mai cuci sar i Lea hai cărdea buchi le Labanosche încă efta bărșa. 31 Cana o Iehova dichlea că i Lea ci sas iubime, cărdea ca voi te așel phari. Tha i Rahela ci daștilas te cherel șiave. 32 I Lea așilea phari hai cărdea iech șiavorro, savesche șiutea o anav Ruben, anda codoia că phendea: „O Iehova dichlea mânri duch hai de acanara mânro rrom va iubila-ma”. 33 Hai așilea pale phari hai cărdea iech șiavorro. Atunci phendea: „O Iehova așundea-ma, anda codoia că ci somas iubime, cadea că dea-les manghe vi cadales”. Hai șiutea lesche o anav Simeon. 34 Hai mai așilea încă iech data phari hai cărdea iech șiavorro. Atunci phendea: „De acanara mânro rrom va așela pașa mande, anda codoia că cărdem lesche trin șiave”. Cadea că, sas șiuto lesche o anav Levi. 35 Hai așilea încă iech data phari hai cărdea iech șiavorro. Atunci phendea: „De cadai data va avela te așarav le Iehovas”. Cadea că, șiutea lesche o anav Iuda. Pala codoia ci mai cărdea șiave.